རྨ་ཆུའི་རབ་ཁར་ཉུལ་བ། (ཞར་བཀོད་གཅིག)

སེམས་ཀྱི་མས་སྣེ།

མཐིང་མདོག་གི་རྨི་ལམ་དང་འདྲེས།

ནམ་མཁའ་དང་གཙང་བོ་མཉམ་དུ་འདྲེས་སྟངས་ནི།

ང་དང་ཁྱེད་འདྲེས་སྟངས་ཤིག་ཡིན།

ཆུ་རྡུལ་རེ་རེའི་ནང་སེམས་ལ་འཁོར་བའི།

སེར་ལམ་ལམ་གྱི་བྱ་ཁྱུ་དང་དེའི་གཤོག་རྩལ།

ཁ་ཁུ་སིམ་མེར་ལྷ་སྒྲུང་དུ་གྱུར།

སྤྲིན་པ་ཁ་ཤས་རླུང་གིས་རྒྱང་རིང་དུ་ཁྱེར་སོང་།

ཤུལ་དུ་ལྷག་པའི་ལོ་མ་འགས་སྟོན་ཀ་མཚོན་མི་ཐུབ་ཀྱང་།

ཧ་ཅང་དལ་བའི་དུས་ཚོད་འདིའི་ནང་།

ང་རང་སླར་ཡང་ཁེར་རྐྱང་གིས།

ཕྱེ་ལེབ་ཀྱི་གར་སྟབས་མཛེས་པའི་ཁྱེད་ཀྱི་སྟོན་ཀའི་ནང་ཞུགས།

གཙང་བོ་ནི་དུས་ཚོད་ཀྱི་གཙང་བོ་སྟེ།

དུས་གསུམ་གྱི་རྨི་ལམ་ཐམས་ཅད་ཁྱུར་མིད་བྱེད།

མཛེས་སྡུག་ཡོད་ཚད་ལ་མི་རྟག་པ་ཞེས་འདོགས་དུས།

ཀོ་གྲུ་མེད་པའི་རབ་ཁ་འདིར་བསྡད་དེ།

ཁྱེད་སླར་ཡང་གླེང་དགོས་བྱུང་།

ཨ་རིག་ཟེར་བའི་ལྷ་ཁང་དེ།

སྐྱེས་ཆེན་ཞིག་གིས་མི་འགྱུར་གཟེར་དུ་བཏབ་པའི།

བླ་སློབ་ཀྱི་དམ་ཚིག་ལ་ལྷད་མ་ཞུགས་པའི།

ལོ་ཟླ་སྔར་བཞིན་ལྷིང་འཇགས་ལ་བསྟིམས་པའི།

ཨ་རིག་གི་མཚེར་ཤུལ་ལྟར་ལུས་པའི།

ཁེར་རྐྱང་། ཆེས་ཁེར་རྐྱང་གི་ལྷ་ཁང་།

སུ་ཞིག་གིས་རྨ་ཆུའི་རབ་ཁ་ནས་རྡོ་བའི་མཛད་པ་དྲན།

སུ་ཞིག་གིས་རྨ་ཆུའི་མཆོད་པ་སེམས་ཀྱི་བུམ་ཆུང་དུ་བསྐྱིལ།

རྒྱང་དུ་བདས་པའི་ལང་ཚོའི་རི་མོ།

མཐའ་མཇུག་གི་དར་ལྕོག་གིས་རླབས་ངོས་སུ་ཡང་ཡང་འབྲི་དུས།

དྲན་འཛིན་གྱི་རི་མོ་ཇེ་གསལ་དུ་གྱུར།

ཕྱི་མིག་ལམ་ནས་བསྐྱུར་མ་བཟོད་པའི་ལྷ་དང་ལྷ་མོ།

ལོ་ངོ་ག་ཚོད་ལ་རབ་ཆུའི་གདངས་སུ་ཞུགས།

ཆུ་དང་རྡོ་བ། ས་སེར་དང་རབ་ཆུ།

ཁ་སང་དང་དེ་རིང་གི་མཚམས་སུ།

མིང་མེད་པའི་ཞོགས་པ་བསུ་མཁན་དེ།

ཨ་རིག་ཟེར་བའི་ལྷ་ཁང་དེ།

ཨ་རིག་ཟེར་བའི་མེས་པོ་དེ།

2023/1/30མགོ་མང་།