གནམ་སའི་བར་བཅུག་རི་མོ། (ཞར་བཀོད་གཉིས)

སྔོ་ངད་ལྡང་བའི་མཐའ་མེད་པའི་མེ་ལོང་ཞིག་གིས།

ངའི་མགོ་ཐོག་ཏུ་ལུས་པའི་ཁང་ཁྱིམ་དུ་མ་ཞིག

ག་ལེར་ག་ལེར་གསལ་བར་བྱས་སོང་།

མདོག་འགྱུར་སླ་བའི་སྒམ་ཚུགས་ཀྱི་ས་གཞི་ཧྲིལ་བོར།

སྟོང་བསམ་གྱི་སྐྱེ་དངོས་དག་རབ་ཏུ་འཛིངས་ཤིང་སྐྱེས།

སྣང་བའི་མར་མེ་ལ་མགོ་བོ་བསྙེས་ཏེ་ཞིབ་ཏུ་བསམ་ན།

ཁ་རླངས་ལྟ་བུའི་བདག་གི་ཚེ་སྲོག

སུ་ཞིག་གིས་བཏབ་པའི་ལོ་ཏོག་དེ་མིན་པ་ངས་ཚོར་ཡོང་ལ།

ཚོར་བའི་ངོས་སུ་བརླན་གཤེར་གྱི་ཐ་སྙད་དྲངས་ཚེ།

ང་ནི་གནམ་སའི་མཚམས་སུ་ལུས་པའི་བར་བཅུག་རི་མོ་ཞིག

སྒྱུ་མའི་འཇིག་རྟེན་དུ་དགའ་སྐྱོ་བཅོལ་བའི་ང་ནི།

མི་ཡུལ་དུ་ཟློས་གར་བ་ཞིག་གི་གཟུགས་བརྙན་དུ་གོ་ཡང་།

ལྟ་བ་ཀུན་འདུས་སྤྱད་དེ་དབང་རྩར་ཧུར་གྱིས་མྱངས་ཚེ།

ང་ནི་རླུང་ལ་བརྟེན་པའི་སྨྲ་མི་ཤེས་པའི་ཤོག་ལྷེ་ཞིག་གམ།

ཤོག་ལྷེའི་ངོས་ཀྱི་གནམ་སའི་བར་བཅུག་རི་མོ་དེའོ།

2023.3.11

འཇིག་རྟེན།

འཇིག་རྟེན་ཅི་ཙམ་ཆེ་བ་ངས་ཤེས་ཀྱི་མེད།

ཡིན་ཡང་དྲན་འཛིན་གྱི་ཡོལ་བའི་ངོས་སུ།

རྟག་ཏུ་ཁོག་རྒྱ་ཞེས་པའི་ཐ་སྙད་ཅིག་གིས།

ང་རང་བཙོ་སྦྱོང་བྱེད་ཀྱིན་འདུག

ཆུང་ནས་ཆུང་དུ་གྱུར་ཚར་བའི་ང་རང་།

རླུང་གིས་སྐྱོད་པའི་དར་ལྕེ་བཞིན།

ཉི་ཤར་ཉི་ནུབ་ཀྱི་གཏན་ཚིགས་ལ་ཡིད་སྨོན་ཤོར་ཏེ།

འཇིག་རྟེན་གྱི་བྱ་དངོས་ཁབ་རྩེ་རུ་སྐོར་གྱིན་ཡོང་།

མི་སེམས་ནི་གཤོག་པ་གཉིས་ཀྱིས་གྲུབ་ཡོད་དེ།

ངའི་གཤོག་པ་ཡ་གཅིག་དོགས་སྣང་གིས་བཅུམས་པས།

འཇིག་རྟེན་སྐྱེ་བ་གཅིག་གི་སྒྲུབ་བྱེད་དུ་འཁྲིལ་བཞིན།

རང་ཉིད་ཀྱི་ནམ་མཁའ་ཡང་ཆུང་ནས་ཆུང་དུ་བཏང་ཚར།

2023.3.9

མེ་ཏོག་ལྟ་བུའི་དྲི་བ་དེའི་བསུང་ཞིམ།

བདག་ལ་དབྱར་གཞུང་མེད་ཀྱང་ཆོག་མོད།

ཉི་འོད་ལྟ་བུའི་ཁྱོད་རང་ཤིན་ཏུ་མཁོ།

བདག་མྱ་ངམ་གྱི་ཐང་ཆེན་ཞིག་ལ་དཔེ་བྱས་ན།

ཁྱོད་ནི་དེ་རུ་སྐྱེས་པའི་ལྗང་ཞིང་ནེམ་པའི་རྩི་ཤིང་ཞིག

ངས་གནམ་མཐར་བལྟས་ཏེ་ཀི་འདེབས་མི་སྲིད་ལ།

སྣང་སྟོང་གི་རོལ་མོ་ལས་ངུ་ངག་དཀྲོལ་མི་སྲིད།

ཡིན་ཡང་ཁྱོད་ཀྱི་ཡིད་འོང་དེའི་ཕྱིར་དུ།

ངས་ཅི་ཡང་བཏོན་ཆོག་ལ་འདོན་ཀྱང་ཕོད།

གཏམ་གྱི་རྫོགས་ཚིག་བྲི་བར་ཤིན་ཏུ་རིང་ན་ཡང་།

ངས་མི་རྟག་པའི་ངོ་བོ་བསམ་ནས་སྐྱུར་མྱོང་མེད།

འོན་ཀྱང་བདག་གི་ལང་ཚོར་བརྒྱུས་པའི་ལྕགས་ཀྱུ་ལྟ་བུའི་ཁྱོད་ནི།