སྨན་ཁང་། (ཞར་བཀོད་གཅིག)

ནད་ཀྱི་མདུད་ལོག་དེའི་ནང་ན།

ངལ་ཞིང་དུབ་པར་གྱུར་མོད།

ཁྱོད་ཀྱི་འོད་སྣང་ལ་བཅར་བ་ནས།

ཡང་བསྐྱར་འཁྲུལ་སྣང་གི་ཆག་རོ་བསྒྲིག་སྟེ།

ཕ་ཡུལ་དུ་ལོག་པར་རེ་ཞིང་བསྒུག

ན་ཟུག་གི་གསིག་བརྡབ་འཇགས་ཐབས་བྲལ་བ་ལྟར།

སྨན་ཁང་ནས་ཚོར་བ་སྣ་མང་ལ་འཛིངས་པས།

སྙན་ངག་གཅིག་ཀྱང་འབྲི་མ་ཐུབ།

                        2023.3.5

ཚ་འཁྲུལ།

གཉིད་དུ་ཡུར་བའི་མཚན་མོར།

དར་མའི་ལུས་པོ་འདི་ཉིད།

གཞི་ནས་ཡུན་རིང་བཀག་སྡོམ་བྱས་པའི་ནད་དང་འདྲེས་པར་གྱུར།

སྐད་ཅིག་ཕྱུང་འདོད་ཀྱང་།

མགྲིན་པའི་སྦུབས་སུ་ལུས་ཀྱི་སྙིགས་མ་མཐའ་དག་འཚངས་འདུག་པ་འདྲ།

དབུགས་ཡང་མོ་ཞིག་ལེན་པར་ཡང་ཤིན་ཏུ་དཀའ་སྣང་སྐྱེ།

ལུས་སྟེང་ནས་ཐོན་པའི་རྔུལ་ཆུ་གྲང་མོས།

མཚན་གྱི་ཁུ་སིམ་དང་འདོད་འདུན་གྱི་རི་མོ་བསྒུལ་ཞིང་།

GWPལགས་དྲན་པའི་རྨི་ལམ་གྱི་སྟེང་དུ་བྱེ་མ་ཚ་བོ་ཇི་སྙེད་པ་ཞིག་སྤུངས།

ཤ་རུས་གསེང་གི་བདེ་བ་ཁབ་རྩེ་ཡིས་བྲུས་པ་བཞིན།

རབ་ཏུ་འཁྱག་པ་དང་ཤིན་ཏུ་ཚ་བའི་གློག་དམར།

གཟུགས་པོའི་ཕྱི་ནང་ཀུན་ཏུ་ཡང་ནས་ཡང་དུ་འཁྱུག

ཁོ་ཚོས་བསྲན་ཚུགས་པ་ལས་དྲག་སྐྱེས་འབྱུང་ངེས་ལབ་འོང་མོད།

ང་ལ་བཟོད་བསྲན་ནུས་པ་ཡེ་ནས་མི་འདུག་སྟེ།

ལུ་གུ་རྒྱུད་ཀྱི་རྣམ་རྟོག་གི་འཕྲོ་འདུ་ཡང་ཡུད་ཙམ་ལ་ཁེགས།

ནམ་ལངས་ཚེ།

ནད་ཀྱིས་བསྣད་པའི་ལུས་པོར།

ཟས་དང་སྨན་གྱི་ལྷན་པ་རེ་བརྒྱབ་ན།

འཇིགས་ཡེར་བའི་སྣང་བ་ལས་སད་ངེས་སྙམ།

ཞིབ་ཏུ་བསམ་ཚེ།

ནད་ཀྱིས་ང་ཚོ་ནམ་ཡང་ཇེ་ལྷོད་དུ་བཏང་མ་མྱོང་བ་འདྲ