སྨུག་པ། (ཞར་བཀོད་གཅིག)

ཁྱོད་ཀྱིས་སྒོ་གདོང་དུ་བསྣར་བའི་ཟྭ་དེ།

འཁྲུལ་སྣང་དང་ངལ་དུབ་ཀྱིས་བཟོས།

སྒོ་འབྱེད་པའི་ཉིན་མོ་རེ་རེར།

ཚེ་སྲོག་གི་འགྲོ་གྲོན་བཏང་བའི་ཚོང་པ་ཁ་ཤས་ཀྱིས།

ཡི་དྭགས་དང་འདབ་ཆགས་དེ་དག་ལ།

མེ་ལོང་དང་དེའི་ནང་གི་ནགས་ཚལ་ཉོས་ཀྱང་།

ཟིལ་བ་རེ་རེའང་རང་སྟེང་དུ་ཆགས།

ཀོ་གྲུ་གཏོང་མཁན་དེ་ང་རང་ཡིན་ཆོག་ཀྱང་།

ཟྭ་ལྕགས་འདི་སྒོ་འབྱེད་པར་ནགས་ཚལ་གྱི་ས་བོན་མི་དགོས།

སྐྱེ་བ་གྲངས་མེད་ཅིག་གི་མིག་ཟུང་མཐའ་དག་བསྡུས་ནས།

བཙའ་ཆགས་པའི་རྒྱབ་གཟུགས་རྙེད་པར་བློས་བསླངས་བྱས་ཚེ།

མཐའ་ཡས་པའི་ནམ་མཁའ་སྟོང་བར་ཅི་ཞིག་བྱའམ།

2022.05.15ལ་བརྩམས།

ཁྱེད་རང་གི་ཆེད་དུ། 

རྐང་བས་ས་རྡུལ་ལ་རེག་ཚེ།

མིག་ཟུང་ཀེམ་ཀེམ་གཡོ་ཞིང་རྟབ་རྟབ་པོར་གྱུར།

སྙིང་ཉེ་བ་དེ་དག  མིག་ཟུང་ལས་མངོན་བྱུང་།

དེའི་ཆེད་དུ།  

དུར་ཁྲོད་ཀྱི་ཉེ་སར་གཅར་བར་ཤིན་ཏུ་སྐྲག

དུར་ཁྲོད་ནི་དགུན་ཟླ་ཞིག་དང་འདྲ།

དགུན་ཟླ་དེར།  ང་ཡི་བཟའ་མི་ཁ་ཤས་ཀྱང་བཞུགས་ཡོད།

ཁོ་བོས།  ཕ་ཡུལ་གྱི་རི་ལུང་ཀུན་ཏུ།

ཁྱོད་ཀྱི་ཞབས་རྗེས་ཀྱི་རི་མོ་ལ།

ལག་པ་འདིས་ཡང་ཡང་རེག་ཀྱང་།

འཁྱག་པ་འཁྱག་པ་ཞིག་ལས་ཅི་ཡང་མི་ཚོར།