ལྷམ། ( ཞར་བཀོད་གཅིག)—— ཡང་ན་མི་རབས་ཤིག་གི་དཀའ་སྡུག་གི་བརྗེད་བྱང་།

དཀའ་སྡུག་ཅེས་པ་ནི་ཡི་གེར་ཤོང་བ་དང་སྐད་ཆས་མཚོན་ཐུབ་པ་ཞིག་ཡེ་ནས་མིན་པས་ན། གོད་ཆག་སྣ་ཚོགས་ཀྱིས་རྨེག་མེད་བྱས་པའི་ཉམ་ཆུང་གི་མི་ཚེ་དང་དཀའ་སྡུག་གི་ལོ་ཟླ་ལྷམ་གྱིས་བྲི་བར་བྱ།

ང་རང་ལོ་དྲུག་ལ་སོན་པའི་ལོ་དེའི་ལོ་སར་ཚེས་ཉེར་དྲུག་ཉིན་ཕ་ལོ་ལགས་ང་ཚོ་དང་གཏན་དུ་གྱེས། དེ་ནི་སྤྱི་ལོ1973ལོ་རེད།

དེ་ལྟར་བརྩིས་ན་ཕལ་ཆེར་ང་རང་ལོ་བཞི་ལྔ་ཙམ་ཡིན་དུས་ཡིན་སྲིད། སྐབས་དེར་ངེད་མིང་སྲིང་བཞི་བོའི་གྱོན་ཆས་ཆ་ཚང་སྤྱི་ཚོགས་རྙིང་བའི་ནང་གི་རྒྱའི་ཕྱུག་བདག་གི་བུ་དང་བུ་མོའི་གྱོན་གོས་ཏེ་གོས་ཆེན་གང་བཟང་དང་ཀོ་ལྷམ་གང་ཡག་གོན་པ་ཡིན།

གྱོན་གོས་སྤུས་གཙང་དེ་འདྲ་ཕ་ལོ་ལགས་ཀྱིས་ཇི་ལྟར་འཁྱེར་ཡོང་བ་མི་ཤེས་མོད། ངས་ཤེས་པ་ནི་ལོ་རེའི་ལོ་གསར་འཐོན་ལ་ཉེ་སྐབས་རུ་ཁ་ཁྱིམ་མཚེས་ལ་ལ་ངེད་ཚང་ལ་ཡོང་ནས་ང་ཚོའི་ལྭ་བ་རྙིང་བ་རེ་ཨེ་ཡོད་སློང་སྲོལ་ཡོད་པ་དེ་རེད།

ལྷམ་མཐིལ་ཅུང་མཐུག་པོ་ཡོད་ནའང་བཟོ་ལྟ་གཞུན་ལ་ནག་ཀྲིག་ཀྲིག་བྱེད་པའི་ལྷམ་དེ་འདྲ་ཡིད་ལ་འབབ་པ་ཞིག་ངས་ནི་ད་ལྟའི་བར་དུ་མཐོང་མ་མྱོང་ཞིང་། དེ་ནི་ཆུང་ལོ་བཞི་ལོ་ལྔའི་དུས་ཀྱི་ངའི་ལྷམ་ཡིན།

ཕ་ལོ་ལགས་ང་ཚོ་དང་གྱེས་པ་ནས་བཟུང་ངེད་ཚང་ལ་གོད་ཆག་རབས་དང་རིམ་པ་བྱུང་ཞིང་། གོད་ཆག་གི་རྗེས་ན་མེད་མུག་ཡོད་པ་ནི་ཆོས་ཉིད་རེད།

མེད་མུག་གི་ལོ་ཟླའི་ནང་ཨ་མ་ལགས་ཀྱི་ཤ་ཉེ་ཞིག་གིས་ངེད་མིང་སྲིང་ཚོར་ལྷམ་མཐིལ་ཀོ་བ་དང་ལྷམ་ཧོར་ལུག་ལྤགས་ཡིན་པ་རེ་བཏབ་སྟེ་བསྐོན།

སྲུབས་ཟན་ཁེར་རྐྱ་ཞིག་ལས་བརྒྱབ་མེད་པའི་ལྷམ་དེ་ནི་བདེ་ལ་དྲོ་ཞིང་འབོལ་འབོལ་ཡིན་པ་དང་། དེ་ལས་ཀྱང་འབོའུ་ཏི་ཞེས་པའི་མིང་རྙིང་ཉེ་བོ་ཞིག་ཡོད་དེ། མིང་དེ་ནི་ང་ཡི་ཡིད་ལ་སིམ་པ་ཞིག་ཡིན།

དར་མཐའ་རྒུད་པའི་ཆོས་ཉིད་མངོན་དུ་གྱུར་ཏེ། མིར་ལྷུང་བ་བབས་གདའ།། སྟག་ལ་གྲ་བཅག་སྤུ་བསྣོལ།། ཞེས་པ་ལྟར། སྔོན་ཆད་གཞན་གྱིས་རང་གི་ཟས་གོས་བསླངས་ཤིང་། ད་ནི་གཞན་ལ་ཟས་གོས་ངན་ངོན་སློང་དུས་སྟེར་མཁན་མེད། དངོས་གནས་དུས་རེ་འགྱུར་ན་མི་རེ་ཟེར་བ་ཅིས་མ་བདེན། 

ལོ་དང་ཟླ་བའི་རྗེས་ལ་ང་ཚོ་ལག་ཆགས་པ་དང་འབོའུ་ཏི་ཡང་ཐེད། ངེད་ཚང་ལ་གོད་ཆག་ཀྱང་སྔར་ལས་བསམ་མི་བཟོད་པ་བྱུང་། ཨ་མ་ལགས་ཀྱིས་ང་ཚོའི་སྡེ་བའི་གོང་ན་ཡོད་པའི་ས་གཤིས་རུ་ཁག་དང་གཞུང་ལམ་ཞིག་གསོ་རུ་ཁག་གི་ལས་བྱེད་པའི་ནང་མི་རྒྱ་མོ་དེ་ཚོར་ཁྱིམ་བྱའི་གཟན་ཆས་སུ་པུ་ཙེ་རེ་བྱིན་ནས་དེ་ཚོའི་བྱིས་པ་ཚོའི་ལྭ་བ་དང་ལྷམ་རྙིང་བ་གང་ཡོད་ལ་བརྗེས་ཤིང་གཙང་མར་བཀྲུས་ཏེ་ཤུག་པ་རེ་བདུགས་རྗེས་ང་ཚོར་བསྐོན།

ལྭ་ཆེ་བ་རེ་ཡོད་ན་ཐོག་མར་ཨ་ཅེ་ཡིས་གོན། ཨ་ཅེ་ལ་ཆུང་ཚེ་ཕུ་བོས་གོན་དགོས་པ་དང་ཕུ་བོར་ཆུང་ན་ངས་གོན་དགོས་པས། རེས་ང་ལ་བབས་དུས་ཨ་མས་ལྭ་བ་དེ་ལ་མདོག་སྣ་ཚོགས་ཀྱི་ལྷན་པ་ཆེ་ཆུང་སྣ་ཚོགས་ཤིག་བརྒྱབ་རྗེས་ད་གཟོད་ངས་གོན་དགོས། ངས་གོན་པའི་རྗེས་ལ་ལྭ་བའང་རལ་ཚར་ཡོད་པས། ནུ་བོར་མཚམས་མཚམས་སུ་ལྭ་བ་སོ་མ་རེ་གྱོན་པའི་གོ་སྐབས་ཡོད། 

ང་རང་བུ་སྐལ་དུ་སོང་བའི་ལོ་དེ་ནས་བཟུང་ཨ་མ་ལགས་ལ་ལྭ་བ་གཅིག་དང་ལྷམ་གཅིག་གི་དཀའ་ཁག་ཇེ་ཉུང་དུ་སོང་ཡོད་ནའང་། ང་ལ་སྔར་བཞིན་ཆེད་དུ་རང་ལ་ཉོས་པའི་ལྷམ་ཞིག་རེག་མ་ཐུབ། 

དབྱར་ཐོག་སྐྲ་ཤད་ལ་བརྗེས་པའི་འགྱིག་ལྷམ་གློ་ཁ་རེ་གོན་ཐུབ་ཀྱང་། དགུན་ཁར་གང་ཞིག་ནས་བཙལ་ཡོང་བ་མི་ཤེས་མོད། ཨ་ནེས་རྒྱའི་བུད་མེད་ཀྱི་བེམ་པོར་བསྐོན་པའི་ལྷམ་ཞིག་བཙལ་ཏེ་ང་ལ་གོན་དུ་བཅུག

ལྷམ་དེ་ནི་མཐིལ་མཐུག་པོ་དང་ཧོར་དམའ་མོ་ཡིན་པ། མ་གཞི་རས་ནག་པོའི་སྟེང་དུ་གོས་སྐུད་དམར་བོ་དང་གློ་ཁ། ལྗང་གུ་སོགས་མདོག་གང་བཀྲ་ཡིས་མེ་ཏོག་སྣ་ཚོགས་གཙག་ཡོད་པ་རེད། ལྷམ་སྣ་འབིག་དེ་སྤྱིར་ན་ང་ལ་ཆེ་ཡོད་པ་དང་ལྷམ་གྱི་ནང་དུ་མཐིལ་གཙག་བྱེད་ཀྱི་སྐུད་པ་སྦོམ་པོ་དེའི་མདུད་པའང་ཕྱིར་བུད་ཡོད་པས། རྐང་བའི་ཕྱི་རྟིང་དང་མཛུབ་མོ་བརྡར་ཏེ་རྨ་ཁ་བཟོས་ཡོད། གལ་སྲིད་སྐབས་དེར་ང་ལ་འབོབ་ཅིག་ཡོད་ན་རྐང་བ་ནས་ཁྲག་དམར་ཟགས་མེད་ཀྱང་སྲིད།

ལྷམ་དེས་གྲང་ངར་འགོག་ཐུབ་རྒྱུ་ལྟ་ཅི། སྐབས་སྐབས་སུ་ཉི་འོད་བརྒྱབ་ཡོད་སའི་གྱང་རྩ་བརྒྱུད་དེ་འགྲོ་དུས་ལྷམ་ཕུད་དེ་རྐང་རྗེན་དུ་སོང་ན་ངའི་ལྷམ་ལས་དགུན་འཁྱག་ནང་གི་ས་འཁྱག་གིས་དྲོད་སྣང་སྟེར། དེ་ལྟར་ཉིན་ཞག་མང་བོ་སོང་བ་ན་ངའི་རྐང་བ་ཡོངས་རྫོགས་ཕྱིད། ཕྱི་རྟིང་ལ་སེར་ག་བྱེའུའི་མཆུ་འདྲ་བ་རེ་གས་པས། དགོང་མོ་མལ་ནས་རྐང་བ་མར་བསྲིངས་ན་སེར་ག་རྩག་ཐུལ་ནང་གི་སྤུ་ལ་ཐོགས་ཏེ་ན་ཟུག་བཟོད་གླགས་མེད་པ་སློང་ཞིང་དེའི་མུར་ཁྲག་དམར་ཙར་ཙར་བྱེད། ཉིན་དཀར་ལྷམ་གོན་དཀའ་ཞིང་དེ་ལས་ཀྱང་རྐང་བ་ས་ལ་སྤོ་དཀའ་བར་གྱུར།

དགུན་ཁར་དགུ་ཆུ་དར་གྱིས་བཟུང་ན་ང་ཚོ་དར་ལམ་བརྒྱུད་འཇའ་མོ་སྡེ་བའི་ཞིང་སར་སྤོ་ཐོ་སྐྱས་པར་འགྲོ་དགོས། སྤོ་ཐོ་ས་འཚིག་ཏུ་བཟོས་རྗེས་ཕྱི་ལོ་སོས་བུད་ན་ལུད་ཀྱི་ཚབ་ཏུ་ཞིང་སར་གཅོལ་དགོས་སྟབས། ང་ཚོས་མི་བཞི་རེ་ལྔ་རེ་བསྡེབས་ཏེ་རེས་བསྐོར་ནས་ཁྱིམ་ཚང་སོ་སོར་འཁུར་དགོས།

ངའི་དགུན་ལྷམ་དེ་དར་ཐོག་ནས་ཤུད་སླ་ཞིང་། ལྷམ་མཐིལ་སྲ་མཁྲེགས་ཤིང་འདྲ་བ་ཡིན་པས་ལ་ཐུར་བརྒྱུད་དུས་ལྷམ་མ་ཕུད་ན་གོམ་གང་སྤོ་ཐབས་བྲལ། དེ་བས་ངས་ཐོག་མར་སེལ་བོའི་ནང་དུ་ས་ཁུར་ཡོང་ནས་དར་ཐོག་ལ་གཅོལ་ཏེ་རང་ལ་ལམ་ཕྲན་ཞིག་བཟོས་པ་ཡིན་ལ། དེས་ཀྱང་ལས་ཀའི་དུས་ཚོད་མང་བོ་གྲོན་གྱིན་ཡོད་ཅིང་། སྒོས་སུ་རྐང་བའི་སེར་གས་ང་རང་ཡུན་རིང་གྱོལ་བའི་རྗེས་ལ་རིམ་གྱིས་བརླ་རྨེན་ཡང་སྐྲངས་ཏེ་འགྲོ་དཀའ་བར་གྱུར་པས། ངའི་གྲོགས་མོ་ཚོས་ང་རང་གྲོགས་སུ་མ་འདོད་པར་ཁེར་རྐྱང་དུ་བསྐྱུར། དེ་བས་ང་ལ་མཚོན་ན་ཁོ་ཚོའི་སུ་ལའང་མེད་པའི་དཀའ་ཁག་ལྷག་མ་ཞིག་ཕྲད་ཡོད།

གནས་ཚུལ་དེ་རིགས་སུ་ཞིག་གིས་ངའི་ཨ་མ་ལགས་ལ་བཤད་སོང་བས། ཕྱི་དྲོ་ཞིག་ལ་ཨ་མ་ལགས་ཨ་ནེ་ཚང་དུ་ཡོང་ནས་ང་རང་ནུབ་དེར་ཡུལ་ལ་འགྲོ་ཆོག་པ་ཞུས་ཤིང་། རང་ཁྱིམ་དུ་བསླེབས་པ་དང་ཨ་མས་ཆུ་བསྲོས་ཏེ་ཚ་བོ་བྱས་རྗེས་གཞོང་བ་ཞིག་ཏུ་བླུགས་ནས་ངའི་རྐང་བ་སྦངས་ཤིང་། གྲི་ཆག་ཅིག་གིས་རྐང་བའི་སེར་གའི་གཡས་གཡོན་དྲད་པ་ན་ཟུག་བཟོད་བསྲན་མི་ཐུབ་པ་བསླངས།

དེའི་རྗེས་ལ་སྐམ་ལུག་གང་རུང་གི་ནང་ཚིལ་ཉུང་ཙམ་ཞིག་ཁྱེར་ཡོང་ནས། དཀར་མེར་ཐུག་ཙམ་ཐུག་ཙམ་གྱིས་བཞུས་རྗེས་ཨ་མ་དང་མ་སྤུན་གཉིས་ཀྱིས་ང་རང་མར་མནན་ཏེ་ཕྱི་རྟིང་གི་སེར་གའི་ནང་ཚིལ་ཁུ་འཛར་དུ་བཅུག་པ་ན། ན་ཟུག་དྲག་པོས་ང་རང་རྔུལ་ནག་ཕྲོམ་ཕྲོམ་བྱེད་ཅིང་། ངས་ཕེ་འདེབས་ཞོར་འཕག་འཚག་ཇི་ལྟར་བྱས་ཀྱང་ཨ་མ་ལགས་སྤུན་གཉིས་ཀྱི་དོ་ཡ་ག་ནས་ཡིན། ཁོ་གཉིས་ཀྱིས་སྔར་བཞིན་ཚིལ་བཞུས་ཏེ་སེར་གའི་ནང་ཐིག་ཏུ་བཅུག ན་ཟུག་གི་དབང་གིས་ཚག་ཚག་ཚག་གི་སྒྲ་དེ་ཚིལ་ཁུ་སེར་གའི་ནང་འཛར་བ་ལས་གྲག་གིན་འདུག་བསམས་སོང་མོད། ཡིན་པ་ནི་ཚིལ་མེ་ལ་བཞུས་པའི་སྒྲ་རེད། ཚིལ་ཁུ་སེར་ག་ནས་དཀག་པ་དང་ཨ་མས་རས་སྐུད་ཉིས་རྐྱ་ཞིག་ཁབ་ལ་བརྒྱུས་ཏེ་སེར་ག་བཙེམས།

གནས་སྐབས་རིང་ན་ཟུག་དྲག་པོ་མྱངས་ནའང་རིམ་གྱིས་རིམ་གྱིས་རུས་རྐང་གི་གཏིང་ན་བདེ་སྣང་ཞིག་ཡོད་པ་ཚོར།

ནུབ་མོ་དེར་ང་རང་གཉིད་ཁུགས་ནས་བརྒྱལ་སོང་བ་འདྲ།

ཕྱི་ཉིན་ཨ་མས་ཕུ་བོའི་ཀོ་ལྷམ་སྐྱ་ལྡང་ཐེད་པོ་ཞིག་ཡོད་པ་དེའི་ས་རྡུལ་གཙང་མར་སྤྲུགས་རྗེས། མོ་རང་གི་ལག་རྩལ་ལ་བརྟེན་ནས་ལྷམ་གྱི་སྣ་ཐོད་ཁ་ཕྱེས་ཡོད་ས་དེར་འཛེར་མ་བརྡབས།

ལྷམ་དེ་ནི་ཧ་ཅང་སྲ་མཁྲེགས་ཡིན་པས་ཁབ་སྐུད་ལྟ་བུ་སྤྱད་དེ་བཙེམ་ཐུབ་པ་ཞིག་གཏན་ནས་མིན། དེ་བས་ཨ་མས་ལྷམ་གྱི་ཨི་ཁུང་འཛེར་མས་བསྡམས་པ་ནི་གཅིག་ནས་ལས་སླ་བོར་རལ་མི་ཐུབ་ཅིང་། གཉིས་ནས་ལྷམ་ཇེ་ཆུང་ལ་བཏང་སྟེ་ང་ལ་རན་པར་བཟོས་པ་རེད།

ཡིན་ནའང་མ་གཞི་ནས་ལྷམ་དེ་ཆེན་པོ་ཡོད་པ་དང་། དེའི་ཁར་འཛེར་མ་མང་བོ་བརྡབས་པ་ཡིས་ལྷམ་དེ་ངའི་རྐང་བས་མི་ཐེག་པར་གྱུར། དེ་ལྟ་ནའང་ཨུ་ཚུགས་བྱས་ཏེ་གོན་ཐབས་བྱས་མོད། ཡར་མར་ལ་ཐོགས་ནས་ཐང་ལ་འགྱེལ་བ་ནི་རྒྱུན་ལྡན་གྱི་སྣང་ཚུལ་ཡིན།

སྐབས་སྐབས་སུ་ངས་མགོ་སྒུར་ཏེ་རང་གི་ལྷམ་ལ་ལྟ་དུས་ཆ་མ་སྐམ་པོ་ཞིག་མདུན་ན་ཡོད་པ་དང་མཚུངས། ཨ་མ་ལགས་ལ་ཚེམ་བཟོ་བྱེད་པའི་ཚད་ལྡན་གྱི་ལག་ཆ་ཅི་ཡང་མེད་པས། ལྷམ་གྱི་ནང་ན་ཕྱིར་བུད་ཡོད་པའི་འཛེར་མགོས་སྔར་བཞིན་ངའི་རྐང་བར་རྨ་ཁ་བཟོས།

དུས་ཡུན་གང་འཚམ་ཞིག་འགོར་རྗེས་ཀྱི་ཉིན་ཞིག་ཨ་མ་ལགས་ཀྱི་ཤ་ཉེ་རྒད་པོ་དྲིན་ཆེན་ཁོང་གིས་ལྷམ་སོ་མ་ཞིག་བཏབ་ནས་ནང་ལ་ཕྱིང་བ་བཏིངས་ཏེ་ང་ལ་བསྐོན། ལྷམ་དེ་ལ་ལ་ལས་རྒྱ་ལྷམ་སྟེ་རྒྱ་ནག་ཐང་གི་སྐབས་ཀྱི་ལྷམ་ཡིན་ལུགས་ཟེར། ལ་ལས་བོད་ལྷམ་དུ་འབོད་ཅིང་བོད་པ་རང་གི་ལྷམ་ཡིན་ཚུལ་སྒྲུབ་ཤག་ཤག་བྱེད།

གང་ཡིན་ན་ཡིན་དུ་ཆུགས། ང་ལ་ལྷམ་གོན་རྒྱུ་ཡོད་ན་དེ་རེད། 

དམའ་འབྲིང་སློབ་མ་རྣམས་ཀྱིས་གྱོན་པ་དང་ལྷམ་གྱི་ཡག་བཙོག་དང་བཟང་ངན་ལ་བལྟས་ཏེ་རང་ཚོད་ཀྱི་འཁྱེར་སོ་རེ་ཡོད་པ་རེད། སྒོས་སུ་བུ་མོ་རྣམས་ལ་མཚོན་ན་རང་རང་ལ་ཁྲ་ཁྲ་རིག་རིག་རེ་གོན་རྒྱུ་ཡོད་ཚེ། དེ་ཚོ་ཁ་འཆམ་ནས་འཁོས་ཀ་ཞན་པའི་ཁྱིམ་ཚང་གི་བུ་མོ་ཚོ་ལ་སྤྱི་དགྲ་ལྟ་བུའི་འདུ་ཤེས་ཤིག་བཟུང་སྟེ་བརྙས་བཅོས་དང་ཐུབ་ཚོད་གང་འདོད་བྱེད་པའི་སྲོལ་ཞིག་ཡོད།

དེ་ནི་སྐྱེས་ཕོ་མོ་སུ་ཡིན་རུང་ཤེས་འཇོན་ཅི་ཡང་མེད་ཀྱང་ཐུན་མོང་གི་ཁྱད་ཆོས་ཤིག་ཡོད་པ་ནི། ཡེ་ནས་བྱུང་མྱོང་མེད་པའི་དོན་དག་གང་ཞིག་ཁོ་ཚོས་ཁུངས་དང་བཅས་གསེད་བཀྲོལ་ཐུབ་ཅིང་། རང་བློར་མི་འཚམ་པ་ཞིག་ཡིན་ཚེ་ཞྭ་མོ་སྣ་ཚོགས་བསྐོན་རྐྱང་བྱེད་པར་ཉམ་མི་ང་བ་དང་། གོ་སྐབས་གང་འགྲིག་ལ་ཕ་རོལ་པོ་དེ་ནག་པོ་བཟོ་ཅི་ཐུབ་བྱེད་པ་དང་ཤིན་ཏུ་མཚུངས་ཏེ། དེ་ཚོར་དེ་ལྟ་བུའི་སྤྱི་ཚོགས་ཤིག་དང་རིག་གནས་ཤིག་གྲུབ་ཡོད།

ངས་ལྷམ་དེ་གོན་པའི་ཕྱི་ཉིན་ནས་བུ་མོ་ཚོས་ང་རང་གང་ནས་མཐོང་ན་ཤབ་ཤུབ་དང་ཧབ་ཆ་དིར་རེ་བྱེད།

ངའི་ལྷམ་དེ་རྐང་ལ་དྲོ་ཞིང་བདེ་ནའང་ང་རང་དོགས་བདེ་བོ་མེད། ཡིན་ནའང་། ཁོ་ཚོར་ཡང་ཁག་མི་འདུག་སྟེ། རེབ་གོང་རྫོང་མི་རིགས་སློབ་འབྲིང་གི་སློབ་མ་ཡོངས་ཀྱི་ཁྲོད་དུ་བོད་ལྷམ་མམ་རྒྱ་ལྷམ་གོན་མཁན་ང་གཅིག་པུ་ཡིན།

དེ་ལྟར་སློབ་གྲོགས་བུ་མོ་ཚོའི་འཕྱ་དམོད་ཀྱི་ལྐོག་ལབ་དང་འཕྱ་དམོད་ཀྱི་དགོད་སྒྲའི་ནང་ནས་ང་རང་ཉིན་བཞིན་སློབ་ཁྲིད་ལ་ཞུགས།

ཉིན་ཞིག་གི་རྩིས་རིག་སློབ་ཐུན་སྐབས་དགེ་རྒན何有忠（དཔལ་གཡུང་དྲུང་། གྲོ་ཚང་གི་མི།）ལགས་ཁྲིད་སྟེགས་སྟེང་ནས་མར་འཁོར་ཏེ། སློབ་གྲོགས་ཚང་མའི་ནང་དུ་པདྨ་འཚོའི་ལྷམ་ལས་ཡག་པོ་མི་འདུག ངས་རང་ལའང་མོའི་ལྷམ་དེ་འདྲ་ཞིག་ཡོད་ན་ཅི་མ་རུང་སྙམ། ངེས་པར་རང་ལ་ལྷམ་དེ་འདྲ་ཞིག་ཐབས་ཤེས་བྱ་རྒྱུ་ཡིན་ཟེར། རྒན་ལགས་ཀྱིས་དེ་ལྟར་གསུངས་པར་དམིགས་ཡུལ་ཡོད་ཀྱང་མེད་ཀྱང་། ངས་ནི་ཕྱི་ཉིན་ནས་སློབ་གྲོགས་ཚོའི་མདུན་དུ་མགོ་བོ་དགྱེ་དགྱེ་བྱས་ཏེ་ཅི་མི་སྙམ་པར་སོང་བ་ཡིན།

ཉིན་འགའི་རྗེས་ཀྱི་ཉིན་གུང་ཞིག་ལ་ཨ་ཁུ་ལོ་ལོན（ཚལ་དགེ་བཤེས་དགེ་འདུན་དར་རྒྱས་ལགས）གྱིས་ང་རང་བོས་ཏེ་ཤོག་བུ་དཀར་གཙང་གིས་གཅུད་པའི་དངོས་པོ་ཞིག་གཏད་བྱུང་། ངས་ནི་ཅི་ཡིན་སྙམ་པའི་མཚར་སྣང་གིས་ཁ་ཕྱེས་པ་ན་ཨ་ཁུ་ལོ་ལོན་གྱིས་ང་ལ་ལྷམ་སོ་མ་ཞིག་ཉོས་འདུག་ཅིང་། དེ་ནི་ངའི་མི་ཚེའི་ནང་ཆེད་དུ་ང་ལ་ཉོས་པའི་ལྷམ་དང་བོ་དེ་ཡིན།

ལྷམ་དེའི་མིང་ལ་སྐབས་དེའི་མི་རྣམས་ཀྱིས་སྦ་ལྷམ་སོ་ལུག་ཟེར། སྐབས་དེར་དེང་སང་ནང་བཞིན་ལྷམ་སོ་མ་ཤོག་སྒམ་དུ་འཇོག་སྲོལ་མེད་དེ། དབྱར་གྱི་དམག་ལྷམ་ཁ་ཁྱ་ཡིན་ཡང་ཆོག དགུན་གྱི་སྦ་ལྷམ་སོ་ལུག་ཡིན་ཡང་རུང་། ཚང་མ་ཤོག་བུ་དཀར་པོའི་ཁུད་དུ་གཅུད་ཡོད་པ་རེད།

ང་ལ་སྦ་ལྷམ་སོ་ལུག་ཐོབ་པ་ནས་ངའི་སྣང་བའང་སྟོན་ཀ་ཡིན། སྦ་ལྷམ་སོ་ལུག་བསྟུད་མར་དགུན་ཐོག་འགར་གོན་པ་ན་ལྷམ་གྱི་ནང་ངོས་ཐེད་པས། ཨ་ཁུ་ལོ་ལོན་གྱིས་ལག་བཙེམ་བྱས་ཏེ་དྲ་རས་དམར་པོ་ཞིག་གི་ལྷན་པ་བརྒྱབ་པས་མུ་མཐུད་དུ་གོན།

ང་དང་ན་མཉམ་ཚོའི་ཁྲོད་དུ་ཁ་ཁྱ་དང་སོ་ལུག་གོན་མྱོང་མེད་མཁན་ཧ་ལམ་ཡོད་མི་སྲིད། ཁ་ཁྱ་དང་སོ་ལུག་གིས་རྒྱང་དུ་ཡལ་ཅིང་བརྗེད་ལ་ཉེ་བའི་དུས་རབས་ཤིག་གི་དྲན་པ་གསོ་ཐུབ།

སློབ་གྲྭས་སྤྱི་ལུགས་ལོ་གསར་བསུ་བའི་རིག་རྩལ་འཁྲབ་སྟོན་བསྡུ་འཆར་གྱིས་འཛིན་གྲྭ་སོ་སོར་ཞབས་བྲོ་དང་ཁ་ཤགས་སོགས་བཀོད་སྒྲིག་བྱས་ཤིང་ང་ཚོའི་འཛིན་གྲྭའི་བུ་མོ་ཚོས་ཀྱང་ཞབས་བྲོ་འཁྲབ་དགོས་པས་ང་རང་ཡང་བསྐྱར་དཀའ་ཁག་ལ་ཕྲད།

ང་ལ་ལྷམ་གྲ་དག་ཅིག་གོན་རྒྱུ་མེད་པར་ཐོག་མར་སེམས་ཁྲལ་བྱུང་ཞིང་རིམ་གྱིས་གནོན་ཤུགས་སུ་གྱུར། དེ་བས་འཛིན་བདག་དགེ་རྒན་ལ་ང་རང་ཞབས་བྲོ་བའི་མིང་ཐོ་ལས་ཕྱིར་འཐེན་པར་རེ་བ་ཞུས་ཀྱང་དགོངས་ཁྲོལ་མ་ཐོབ།

འཁྲབ་སྟོན་གྱི་ཉིན་གུང་དེར་ཨ་མ་ལགས་དང་གནས་ཡུལ་ན་ཡོད་པའི་ཨ་ཅེ་གཉིས་ཀྱིས་ཨ་ཅེའི་ཀོ་ལྷམ་དང་ཚི་ལེན་ཐགས་བབས་ཤིག་ཁྱེར་ཏེ་སློབ་གྲྭའི་ནང་ཐོན་བྱུང་། ཀོ་ལྷམ་རྙིང་ཡོད་པའི་ཁར་ཨ་མ་དང་ཨ་ཅེ་གཉིས་ཀྱིས་འཇུར་རྩི་ཞིག་ཀྱང་ཉོ་ཐུབ་མེད་པས་ཀོ་ལྷམ་ལ་ཚིལ་བྱུགས་ཤིང་ལྷམ་གྱི་ནང་ལ་རས་དང་བལ་བརྫངས་ཏེ་ང་ལ་རན་པ་བྱས་འདུག  དེ་བས་ང་རང་བློ་སེམས་བདེ་བར་གྱུར།

ད་ནི་ཞབས་བྲོ་འཁྲབ་དུས་ང་ལ་ཁ་བཏགས་མེད་པ་མ་གཏོགས་སེམས་ཁུར་གཞན་ཅི་ཡང་མེད་དེ། དེར་ཡང་མི་སྐྱོན། ངས་སློབ་གྲོགས་ཤིག་གི་མགོ་དཀྲིས་དམར་པོ་རིང་བོ་དེ་གཡར་ཡོད། མདོག་དམར་པོ་ཡིན་པའི་མགོ་དཀྲིས་དེས་ཁ་བཏགས་དཀར་པོའི་ཚབ་གཏན་ནས་མི་ཐུབ་རུང་། ང་རང་གར་སྟེགས་སུ་ལག་སྟོང་ལ་འབུད་མ་དགོས་པ་ནི་ང་ལ་མཚོན་ན་སེམས་ཀྱི་ཁུར་བོ་ཞིག་ཕོག་པ་རེད།

ཞབས་བྲོ་འཁྲབ་ཚར་རྗེས་ང་ཡང་སློབ་གྲོགས་མང་བོའི་གྲས་སུ་ཞུགས་ཏེ་ལྟད་མོར་བལྟས།

སློབ་གྲོགས་ཚོའི་འདུ་འཛི་དང་ར་སྐོར་ནང་གི་ས་རྡུལ་གྱིས་ངའི་ཀོ་ལྷམ་རྩམ་པ་གཡིས་བརྫིས་ལྟ་བུ་ཞིག་ཏུ་གྱུར།

སློབ་གྲོགས་ཚོས་ལྟད་མོར་བལྟས་ཏེ་དགའ་འབོད་ཡང་ཡང་བྱེད་ཅིང་། ངས་ནི་རང་གི་ལྷམ་ལ་ཡང་ཡང་བལྟས་ཏེ་ལག་པས་ཡང་ཡང་ཕྱིས། 

ལོ་གསར་འཐོན་ལ་ཉེ་སྐབས་སུ་ཕུ་བོ་ལགས་ཀྱིས་དཔྱི་སའི་ནགས་ལས་ཁང་གི་ལས་བྱེད་པ་ཞིག་ལ་ཤིང་སྡོང་གཅོད་རོགས་སུ་སོང་སྟེ་ཐོབ་པའི་གླ་ཆའི་ནང་ནས་ང་ལ་ཀོ་ལྷམ་ཞིག་ཉོས་འདུག་ཅིང་ལྷམ་ནག་ནག་ནང་ཕྲུག་ཁྲ་ཅན་ཞིག་རེད། ལྷམ་དེ་ནི་ཆེད་དུ་ང་ལ་ཉོས་པའི་ལྷམ་གཉིས་པ་དེ་ཡིན་ལ་སྐབས་དེའི་ངའི་དགའ་སྤྲོ་ཚིག་གིས་མཚོན་དུ་མེད།

ཞག་མ་རེ་རེར་ལྷམ་སྔས་འགྲམ་ལ་བཞག་སྟེ་ཉལ་ཅིང་རྨི་ལམ་དུ་ཀོ་ལྷམ་ཅིག་གིས་ཁྱེར་འདྲ། ཆུ་ཡིས་ཁུར་འདྲ། རྙེད་དུ་མེད་འདྲ། འཚབ་འཚུབ་ཀྱིས་ལྷམ་ལ་རེག་རེག་བྱས་རྗེས་ཀྱི་དགའ་བ་དེ་ནི་སྨྲ་བརྗོད་ལས་འདས།

ང་ལ་ཐོབ་པའི་ལྷམ་གསུམ་པ་ནི་ངའི་ནུ་བོ་རང་ལོ་བཅུ་བཞིའི་སྟེང་ཁུལ་འབྲུ་མཛོད་ཁང་དུ་སོང་སྟེ་འབྲུ་རིགས་བླུགས་པའི་གསོ་སྒྱེ་རང་ལས་ལྡབ་ཀྱིས་ལྕི་བ་ཡར་བརྩིགས་མར་ལེན་བྱས་ཏེ་ཁོའི་རྔུལ་ཆུས་བཙལ་པའི་ལས་གླ་ཐོག་མ་དེས་ང་ལ་ཀོ་ལྷམ་སྨུག་པོ་རྟིང་ག་ཅུང་ཙམ་མཐོན་པོ་ཡོད་པ་ཞིག་ཉོས་པ་དེ་ཡིན།

ལུས་ཀྱི་ལྭ་བ་རྙིང་རལ་དུ་གྱུར་ཡོད་ཀྱང་རྐང་གི་ལྷམ་དེས་ང་ལ་བཀྲག་མདངས་བྱིན།

རང་ལོ་བཅུ་དྲུག་སྟེང་ང་རང་སློབ་ཆེན་དུ་འགྲོ་དུས་ཨ་མ་ལགས་ཀྱིས་ཉོས་པའི་ལྷམ་དེ་ནི་ང་ལ་ཐོབ་པའི་ལྷམ་བཞི་བ་ཡིན། མདོག་ཁམ་ནག་དང་ལོང་བུ་ཆ་རུ་ཅན་གྱི་དབྱར་ལྷམ་དེ་ནི་གཡས་ལྷམ་རན་ཞིང་གཡོན་ལྷམ་ཆེ་བ་ཞིག་སྟེ། དེ་ནི་ཚོང་བ་རྒྱ་མོས་གཞན་གྱིས་བསལ་བསལ་རྗེས་ལྷག་པའི་ལྷམ་ཞིག་བསམ་བཞིན་ངའི་ཨ་མར་བྱིན་པའམ། ཡང་ན་ཨ་མས་ལྷམ་གྱི་ཨང་ཀི་མ་ཤེས་པར་ཉོ་ནོར་ཐེབས་པ་གང་ཡིན་ཡང་ང་ལ་རན་པ་ཞིག་མིན་པས། འགྲོ་དུས་རྐང་བའི་གཡོན་མཛུབ་འཁུམས་ནས་ཤ་བསྒྲིམས་ཏེ་འགྲོ་དགོས། དེ་མིན་གཡོན་ལྷམ་རྐང་ནས་དུས་ངེས་མེད་དུ་ཡར་ཉེན་ཆེ་ནའང་། ལྷམ་དེ་གོན་ནས་མཚོ་སྔོན་མི་རིགས་སློབ་ཆེན་གྱི་སྒོའི་ཕྱི་ནང་ནས་ང་རང་ཡིན་མདོག་མདོག་གིས་སོང་མྱོང་།

ད་ཆ་རང་ལ་ལྷམ་གང་ཡག་དང་གང་བདེ་གང་དགར་ཉོ་ཐུབ་དུས། ཨ་མ། ངའི་ལྷམ་ཨེ་ཡག་གི་ཞེས་དྲི་སའི་མི་དེ་མཐོང་རྒྱུ་མི་འདུག 

རེད་དེ། ལྷམ་དེ་དག་བོར་ནས་ཡུན་རིང་ཕྱིན་ཀྱང་། ལྷམ་དེ་དག་གིས་བསྐྱལ་པའི་ལོ་ཟླ་ནི་དྲན་ངོགས་ནས་འབོར་ཐབས་མེད།

2022ལོའི་ཟླ12པའི་ཚེས16ལ།

རྒྱང་རིང་གི་ཨ་ལགས་ཚང་།

 —— ཕལ་བའི་ཚིག་གི་ལབ་གླེང་འདིས་ཁྱེད་ལ་རྗེས་དྲན་ཞུ། 

ཐག་རིང་ཐག་རིང་ཞིག་ན་ངེད་མིང་སྲིང་ཚོར་ཨ་ལགས་ཚང་ཞེས་རེ་ལྟོས་བྱ་ཡུལ་ཞིག་ཡོད། ལོ་རེའི་ལོ་སར་གྱི་ཚེས་ནང་ལ་ཐུག་སྐམ（挂面）བག་ཆ་གཉིས་དང་ཕག་ཤ་ཏི་ཀ་ཞིག སིལ་ཙོ་རིལ་དང་བ་དམ། ཀ་ར་འདྲེས་མའི་ཤོག་ཐུམ་གཅིག སྒོར་ཉི་ཤུ་བཅས་ནི། ངའི་བསམ་ཤེས་པ་ནས་བཟུང་ང་ཚོར་ཆགས་མེད་དུ་ཐོབ་པའི་ཨ་ལགས་ཚང་གིས་བསྐུར་བའི་ལོ་སར་གྱི་སྐལ་ཡིན་ལ། དེ་ནི་ང་ཚོས་ལོ་རེ་བཞིན་རེ་སྒུག་བྱ་ས་ཉག་གཅིག་ཀྱང་ཡིན། 

ཕ་ལོ་ལགས་བཞུད་སྔ་བའི་ཁར་སྲིད་ཇུས་ཀྱི་བཙིར་གནོན་དྲག་པོས་མུ་གེའི་སྟེང་ལ་ཟླ་ལྷག་བྱུང་སྟེ། ཕྱི་ནས་འཐབ་རྩོད་ཀྱི་མདུང་ཁ་བསྐོར་ཅིང་ནང་ནས་མེད་མུག་གིས་ཨར་ལ་གཏད་པས་འཇིགས་སྐྲག་དང་ལྟོགས་གྲང་བར་ནས་ངེད་མིང་སྲིང་ཚོ་ནར་སོན་རྒྱུ་དེ་ཧ་ཅང་དཀའ་སོང་། 

གནས་སྐབས་དེ་འདྲ་ཞིག་གི་སྒང་ལ་རྒྱང་རིང་གི་ཨ་ལགས་ཚང་ཞེས་པའི་ཁྱེད་ཀྱིས་རང་ཉིད་ཀྱང་ཁྲི་མུན་ནས་ཐར་ཙམ་ཡིན་ནའང་ངེད་མིང་སྲིང་ཚོ་བློས་མ་ཐོངས་པར་གཞན་ལ་མངགས་བཅོལ་བརྒྱུད་གནད་འགག་གི་སྐབས་སུ་ང་ཚོའི་གྲང་ལྟོགས་གཉིས་ཀ་བསལ་བ་བགྲང་གིས་ག་ལ་ལངས། སྡེ་བའི་ནང་གི་དྲག་སྐྱོད་མི་སྣ་ཚོས་ངའི་ཨ་མ་ལགས་ལ་འཐབ་རྩོད་དང་གཅར་རྡུང་། བརྙས་བཅོས་ཚད་ལས་འདས་པ་བྱེད་སྐབས་རྒྱང་རིང་གི་ཨ་ལགས་ཁྱེད་མཐོང་མྱོང་མེད་ནའང་ངའི་སེམས་སུ་ཁེན་ས་ཞིག་ཡོད་སྣང་གིས་ལོ་ན་ཆུང་ཆུང་གི་ང་རང་ཞེ་རྩ་བཀན་མྱོང་།

རྒྱང་རིང་གི་ཨ་ལགས་ཁྱེད་ལ་ཐེངས་དང་པོར་མཇལ་དུས་ནི། སྤྱི་ལོ1984ལོའི་སྟོན་ཁ་རེད། དེ་དུས་ཁྱེད་ནི་དགུང་ལོ་ཞེ་བདུན་དང་ང་ནི་རང་ལོ་བཅུ་བདུན་ཡིན། 

ལོ་དེར་ང་རང་སློབ་ཆེན་ལོ་རིམ་གཉིས་པ་ཡིན་ཞིང་ཨ་མ་ལགས་ཀྱིས་ཀྱང་ངེད་ཅག་མིང་སྲིང་ཚོ་བསྐྱུར་ནས་བཞུད་མ་ཐག་ཡིན་པས། འཇིག་རྟེན་ན་རང་ཉིད་ཁེར་མོ་ལྷག་པ་ལྟ་བུའི་སྡུག་བསྔལ་གྱི་གཡང་ལ་ལྷུང་ཡོད་དུས་ཤིག་རེད། 

གཟའ་སྤེན་པའི་ཉིན་ཞིག་གི་སྔ་དྲོའི་སློབ་ཐུན་སྐབས་དགེ་རྒན་སངས་རྒྱས་ལགས་སློབ་ཁང་དུ་ཕེབས་ནས་ང་རང་སྒོར་བོས་ཏེ་ཨ་ལགས་ནང་སོས(ནང་སོ་བཀྲ་ཤིས་རྣམ་རྒྱལ་ལགས། དེ་དུས་ཞིང་ཆེན་སྲིད་གྲོས་ཀྱི་དྲུང་གཞོན།)ད་སོ་མ་ང་ལ་ཁ་པར་བཏང་སྟེ། ཁྱོད་མགྱོགས་པོར་ཡར་ཤོག་ཟེར། ཁྱོད་རེམ་མ་སོང་དང་ཁྱོད་ཚོའི་འཛིན་བདག་དགེ་རྒན་ལ་ངས་གནང་བ་ཞུ་ཟེར་བས། ང་རང་སློབ་གྲྭའི་སྒོ་ཆེན་ཁའི་སྤྱི་སྤྱོད་རླངས་འཁོར་ཨང་གཉིས་པར་བསྡད་དེ་ཨ་ལགས་ནང་སོ་ཚང་དུ་བསྐྱོད།

ང་རང་ནང་དུ་ཐོན་མ་ཐག་ཨ་ལགས་ནང་སོས་ཤོག་ཤོག་ཟེར་ནས་ང་རང་གཞོགས་ཁང་ཞིག་ཏུ་ཁྲིད་པ་ན། དེ་རུ་ལྭ་བ་ཁམ་སྨུག་དང་ཚི་ལེན་སེར་པོ་ཅན་གྱི་མི་ཆ་མེད་ཅིག་བསྡད་འདུག་ཅིང་། ཨ་ལགས་ནང་སོས་མི་དེར་བལྟས་ཏེ་འདི་འུ་ཚང་གི་བུ་མོ་རེད་ཅེས་ཟེར་ཞིང་། ཡང་ང་ལ་བལྟས་ཏེ་ཁོང་འུ་ཚང་གི་ཨ་ལགས་རེད། ཨ་ལགས་བསེ་ཚང་མི་ཤེས་སམ། ཟེར་བཞིན་ལོགས་ཤིག་ཏུ་བསྡད་པ་ན། ང་རང་རྒྱང་རིང་གི་ཨ་ལགས་ཁྱེད་ཚང་ལ་གློ་རྡེག་དེ་ལྟར་མཇལ་བས་ཧ་ལས་ཤིང་། ངག་ཀྱང་མི་ཁྲོལ་བར་དར་ཅིག་ཧད་དེ་ལུས། དེའི་མུར་ཁྱེད་རང་ཡར་བཞེངས་ཏེ་ངའི་འཁྲིས་སུ་ཕེབས་ནས་ངའི་མགོ་བོར་བྱིལ་བྱིལ་དང་བཅས་སྡོད་སྡོད་དེར་སྡོད། ཅེས་ཁྱེད་ཀྱི་གམ་གྱི་འབོལ་སྟེགས་སུ་སྡོད་དུ་བཅུག་པ་ན། ངས་ནི་ཆུང་དུས་ཀྱི་དཀའ་ཚེགས་དང་སྐྱི་གཡའ་བའི་ལོ་ཟླ་དེ་དག་དྲན་ཞིང་། ཨ་མ་ལགས་རང་དང་ཁ་བྲལ་མ་ཐག་པ་ཡིན་པ་དང་། ལུས་པོ་རྒྱང་རིང་རྒྱང་རིང་ན་ཡོད་ཀྱང་། སེམས་པས་ཉེ་ས་ཉེ་ས་ཞིག་ནས་ང་ཚོ་འཚོས་མྱོང་བའི་ཁྱེད་དང་གློ་བུར་མཇལ་བ་བཅས་ཀྱིས་ངུ་སྙིང་ཞིག་གཏིང་ནས་འཚངས་ཤིང་འོང་བས་ངུས་ངུས་ཤིང་། ཁྱེད་ཀྱིས་ཀྱང་ཚིག་གཅིག་ཀྱང་མི་གསུངས་པར་ཡུན་རིང་ཞིག་ལ་ཁ་རོག་གེར་བཞུགས།

དེ་ནས་མཚམས་ཤིག་ཨ་ལགས་ནང་སོས་གཞོགས་ཁང་གཞན་ཞིག་བསྟན་ཏེ། དེར་སོང་དང་ཨ་ལགས་ཚེ་ཏན་ཞབས་དྲུང་ཚང་བཞུགས། ཕྱག་འཚོལ་ལ་མཇོལ་ནས་ཤོག་ཟེར་པ་དང་ང་ཡང་གཞོགས་ཁང་དེར་སོང་བ་ན། གྲྭ་ཆས་ཆ་ཚང་སྤྲས་པའི་ཨ་ལགས་ཚེ་ཏན་ཞབས་དྲུང་ཚང་བཞུགས་འདུག  

ངས་ཕྱག་འཚལ་སྐབས་ཁོང་ཚང་གིས་ང་ལ་ཅི་ཞིག་དྲིས་སོང་མོད་ང་རང་ཧ་ཅང་འཚབ་པས་གསལ་བོ་ཞིག་མ་གོ་བར་ཚོད་ཚོད་ལ་ང་རེབ་གོང་གི་ཡིན་ཞེས་ལན་བཏབ་པས་ཁོང་བཞད་ཀྱིན་སླར་ཡང་ཁྱོད་ཀྱི་མིང་ལ་ཅི་ཟེར་གསུངས་ནས་དྲིས། ང་རང་ལྷག་ཏུ་འཚབ་པ་དང་མགོ་ཡར་དགྱེས་ཏེ་བལྟས་པ་ན། ཁོང་ནི་དེ་འདྲའི་སྐུ་བརྗིད་ཆེ་ཞིང་ཚེམས་ཀྱང་དེ་འདྲའི་མང་པ་ལ་ཨང་སྙམ་པ་ཞིག་བྱུང་།

ང་རང་དེ་ནས་ཕྱིར་བུད་དེ་ཁང་བ་དཀྱིལ་མའི་ནང་དུ་སོང་བ་ན། དེ་རུ་མི་མང་བོ་ཞིག་འདུག་ཅིང་། ཨ་ལགས་ནང་སོས་ང་ལ་ཁོང་ཚང་ཨ་ལགས་གུང་ཐང་ཚང་རེད། ཁོང་ཚང་ཀུན་མཁྱེན་འཇམ་དབྱངས་བཞད་པ་ཚང་རེད། ཁོང་ཚང་ཨ་ལགས་སྡེ་བ་ཚང་། ཁོང་ཚང་ཨ་ལགས་ཨ་ཀྱཱ་ཞེས་ཨ་ལགས་རྣམས་རེ་རེ་ནས་བསྟན་ཅིང་། ད་དུང་ཨ་ལགས་གཞན་ཡང་འགའ་རེ་འདུག ཨ་ལགས་དེ་དག་གི་ཁྲོད་ན་ཆང་རག་དང་ཐ་མག་མཆོད་མཁན་ཡང་འགའ་རེ་ཡོད་པ་མཐོང་། ཁོང་རྣམ་པ་ནི་མཚོ་སྔོན་དུ་བསྡུས་པའི་ནང་བསྟན་གྱི་ཚོགས་འདུ་ཞིག་ལ་ཞུགས་ཏེ། གུང་གསེང་གི་སྐབས་དང་བསྟུན་ནས་ཨ་ལགས་ནང་སོ་ཚང་གིས་གདན་འདྲེན་ཞུས་པ་ཡིན་པ་རེད།

ང་རང་ཇ་ཁང་དུ་སོང་བ་ན། ཨ་ནེ་འབྲུག་མོ་རྒྱལ་གྱིས(ཨ་ལགས་ནང་སོའི་སྐུ་ལྕམ)ང་ལ་ཁྱོད་ཀྱིས་སྲན་ཐུག་ལག་གདལ་ཞིག་གདོལ་ལ་སྐོལ་དང་ཨ་ལགས་ཚེ་ཏན་ཞབས་དྲུང་ཚང་ལ་འདྲེན་དགོས་ཟེར། 

དེ་མུར་ངས་ཐུག་པ་གདལ་ཏེ་བསྐོལ་ནས། ཨ་ལགས་ཚེ་ཏན་ཞབས་དྲུང་ཚང་གི་མདུན་དུ་སོང་བ་ན། ཁོང་གིས་ཧུབ་གང་བཞེས་རྗེས་ཞིམ་པོ་བསྐོལ་འདུག ཁྱོད་ལོ་ག་ཚོད་ཡིན་སོགས་དྲིས་ཤིང་ཞལ་བརྡ་མང་བོ་གསུངས་པ་དང་། ང་དེར་སྡོད་གསུངས་ཏེ་ཁོང་གིས་སྲན་ཐུག་ནང་དུ་ཞོག་ཁོག་མཐུག་པོ་ཆེན་པོ་བྱས་ནས་གཙབ་ཅིང་། ཁྲོ་ཟངས་ལ་རྩྭ་སྐྱ་བསྒོང་ནས་བསྐོལ། དེ་ནས་རྡོ་དཀར་ནང་བཅུས་ཏེ་འཐུང་ན་ལྷག་ཏུ་ཞིམ་ཚུལ་སོགས་བཀའ་མོལ་མང་བོ་གསུངས་ཤིང་ང་རང་ཡང་འཚབ་ཆ་ཅུང་ཙམ་ལྷོད་པར་གྱུར། 

དྲོས་ཇའི་རྗེས་ལ་ཨ་ལགས་བསེ་ཚང་གིས་ང་རང་ལ་ཁྱོད་ངའི་རོགས་ལ་འགྲོ་དགོས། ཕྱི་དྲོ་འུ་གཉིས་དཔེ་ཁང་ཉུལ་གསུངས།

ཕྱི་དྲོར་ངེད་གཉིས་བདུན་གཅིག་ལམ་གྱི་ཞིང་ཆེན་སྲིད་གྲོས་ཀྱི་གཞིས་རྙིང་དེ་ནས་རྐང་ཐང་གིས་བཞི་མདོ་ཆེན་མོའི་དཔེ་ཁང་བར་ཡུན་རིང་བསྐྱོད་ཅིང་། དེའི་རིང་ལ་ཁོང་གིས་ཁྱིམ་གྱི་འཚོ་བའི་གནས་ཚུལ་དང་ངའི་སློབ་སྦྱོང་གི་སྐོར་བཅས་ཡར་མར་མང་བོ་དྲིས་ཤིང་རེ་རེ་ནས་ལན་ཞུས།

དཔེ་ཁང་དུ་འབྱོར་ནས་ཁོང་དཔེ་ཁང་ནང་ནས་ཡར་མར་ཐམས་ཅད་ལ་ཞིབ་ཏུ་ཉུལ་རྗེས་མཚོ་སྔོན་ཕྱོགས་འདི་ན་བོད་ཡིག་གི་དཔེ་ཆ་དགའ་རེ་བཙོང་རྒྱུ་མེད་ཀ་གསུངས། དེ་མ་ཐག་ང་རང་ཁ་གཏད་ཀྱི་བོད་ཡིག་དཔེ་སྒྲོམ་རྩར་སོང་ནས་ཐང་རྒྱལ་རྣམ་ཐར(ཐང་སྟོང་རྒྱལ་པོའི་རྣམ་ཐར)གྱི་དཔེ་དེབ་ཅིག་ཁྱེར་ཡོང་སྟེ་ཁོང་ལ་གཏད་ནས། འོས་སྦྱོར་གྱི་ཚུལ་དུ་དཔེ་ཆ་འདི་ཧ་ཅང་ཡག ངས་བཀླགས་མྱོང་། ཁྱེད་ཀྱིས་ཀྱང་ཀློགས་དང་ཞེས་པ་ན། ཁོང་བཞད་མོ་བཞད་ཀྱིན་ཡ་ཡ་གསུངས། ཨེ། བྱིས་པ་ནི་བྱིས་པ་རང་རེད།

དེའི་རྗེས་ནས་བཟུང་ང་རང་རྒྱུན་དུ་ཁོང་ལ་མཇལ་ཐུབ་ཅིང་། ངའི་མགོ་ཐོག་ལ་གནམ་རྡིབ་པའི་ལོ་ཟླའི་ནང་ཡང་ཁོང་གིས་ཕ་ཡིས་བུ་ལ་གདམས་པ་བཞིན་ང་ལ་སེམས་གསོ་དང་སྙིང་ཕུར་བརྡབས་ཤིང་། ཁོང་གི་སྐུ་ཚེའི་ནང་གི་མྱོང་བ་དངོས་གསུངས་ཏེ། ངེས་པར་རང་མགོ་ཐོན་དགོས་ཚུལ་དང་། ཁྱོད་རང་ཕ་སྟག་འདྲ་ཞིག་གི་བུ་མོ་ཡིན་པས་སྡུག་བསྔལ་བྱུང་དུས་ངེས་པར་མགོ་འཕང་མཐོ་མ་ཐུབ་ན་ཕ་དགའ་ཞིག་གི་བུ་མོ་ཡིན་མ་ཡིན་མེད། དེ་བས་གནད་འགག་གི་སྐབས་སུ་རང་གིས་རང་ལ་འདང་ཞོག་དགོས། འཇིག་རྟེན་འདིའི་སྟེང་གི་ཅི་བྱུང་ཐམས་ཅད་རང་རང་གི་ལས་དབང་ཡིན་པའི་གོ་བ་ལོན་ཐུབ་དགོས་ཚུལ་དང་། ལས་མ་བྱས་པ་དང་མི་འཕྲད་པའི་གནས་ལུགས་སོགས་མང་པོ་གསུངས་ཤིང་། ལྷག་པར་ཁྲི་མུན་དུ་བཞུགས་སྐབས་ཀྱི་སྐུ་ཚེའི་ཉམས་མྱོང་མང་བོ་གསུངས་པ་དང་། ཉེ་སྔོན་ཡང་ད་རུང་ཁྱོད་ཀྱི་ལས་ཀ་དགེ་རྒན་ཡིན་པས་སློབ་མ་ཚོར་ཤ་ཚ་ཚས་སློབ་ཁྲིད་བྱོས་དང་དེ་ལས་ལྷག་པའི་དགེ་སྦྱོར་མེད་ཚུལ་སོགས་གསུངས་པ་བཅས་ཀྱིས་ཐང་སྟོང་ན་མགོན་མེད་དུ་འཁྱམས་པའི་ངའི་ནང་སེམས་སྡུག་བསྔལ་ལས་ཡང་ཡང་བསྐྱབས་པས། ཁོང་ནི་ངའི་སྐྱེ་བ་འདི་ཡི་སེམས་ཀྱི་རྟེན་ས་དང་། ཕྱི་མའི་ལམ་སྟོན་གྱི་སྒྲོན་མེ་གཅིག་པུའོ།།

རྒྱང་རིང་གི་ཨ་ལགས་ཚང་འདི་ལྟར་གློ་བུར་དུ་བཞུད་པས། ད་ནི་ང་ལ་བདེ་སྡུག་ཞུ་ས་མེད་ཅིང་འཇིག་རྟེན་ན་རང་ཉིད་ཁོ་ན་ལུས་པ་ལྟ་བུའི་གྲང་ཤུར་ཤུར་གྱི་རང་གི་གྲིབ་གཟུགས་ཤིག་ལས་ཅི་ཡང་མི་འདུག་ཨང་།

ཧོར་ཚེ་གངས་མིག（གཙོས）

སླར་ཡང་། མུན་པ་དང་གདུང་སེམས་བརྟོལ་ནས་དལ་བུར་སླེབས་བྱུང་།

ཁྱོད་ཀྱིས་ཆུ་འཛིན་གྱི་སྒྲིབ་ཡོལ་གདོང་གིས་གཅོད་བཞིན་བསིལ་ཟེར་གྱི་ཐིག་ལེ་ལྟེམས་ཤིང་འཕྱོ། ནམ་ཡང་། ངའི་ཡིད་སེམས་ཀྱི་རྫིང་ངོགས་དེ་རུ་འདྲིས་ཡོད་ཀྱི་ཞལ་རས་སྒོར་མོ་ཞིག་སྐྱོམས་ལ། ཨ་སྔོན་མཐོངས་དབྱིངས་སུ་གཏོར་བའི་རྒྱུ་སྐར་གྲངས་མེད་དེ། ང་དང་ངའི་འཐོར་ཟིན་པའི་མིག་ཆུ་རེད།

མུན་ནག་གི་ཞིང་ཁམས་འདི་ནས་ཁྱེད་ནི་ང་དང་རྒྱང་ཐག་རིང་ནའང་། ངའི་ཀུ་མུད་ལྟ་བུའི་སེམས་པ་ཁྱོད་ཕྱོགས་ལ་འཁོར་བས། དགུ་ཚིགས་ཀྱི་ཆུ་ཀླུང་རིང་མོ་ངའི་བརྩེ་སེམས་ཕྲ་མོ་ཉག་ཅིག་ཡིན།

སྐབས་འགར་ཁྱོད་ནི་སྦྲ་ནག་ཁ་ཚུབ་ལས་འཛུམ་སྟེ་ང་ཡི་རྨི་ལམ་འཕྲོག སྐབས་འགར་ཁྱོད་ནི་རི་བོའི་ཉག་གར་ཡིབ་སྟེ་ང་ཡི་སྙིང་གཏམ་བརྐུས། ཁྱོད་ཀྱིས་ང་ཡི་ཡོད་ཚད་རྟོགས་ཀྱང་། ཁྱོད་ནི་ནམ་ཡང་ང་དང་རྒྱང་དུ་གྱར།

དུས་རྟག་ཏུ་ཁྱོད་རང་སྤང་ཐང་འདི་བརྒལ་ནས་བཞུད་སྐབས། ང་རང་སྤང་ཁུག་ནས་འགྲེང་སྟེ་སྐྱོ་སྣང་གི་མིག་ཟེར་ངེས་མེད་མཐའ་མཚམས་ཤིག་ཏུ་བཀལ། ངོ་མ། གནས་འདི་རུ་ཨ་མའི་འཛུམ་མདངས་ཞིམ་ལ། ཨ་ཕའི་རྒྱབ་རི་མཐོ། སྤུན་ཟླའི་ལག་རྡང་དམ། སྙིང་སྡུག་མའི་ཤ་དྲོད་འཇམ་ནའང་། ཁྱོད་ཀྱི་རྒྱང་བཞུད་འདིས་ངའི་ཡོད་ཚད་ལ་བསླུ་བྲིད་གཅིག་བསླངས། ཀྱེ་སྤང་ལྗོངས་ཀྱི་དུང་ཟླ་སྒོར་མོ།

མཐའ་འཁོར་གྱི་རི་རྒྱུད་དག་སྔར་བཞིན་ནག་རོག་གེར་སྣང་ལ། ཨ་སྔོན་གྱི་སྐར་ཚོགས་ཀུན་སྔར་བཞིན་ཁྲ་ལམ་མེར་བཀྲ། ལྷིང་འཇགས་ཀྱི་མཚན་མོ་འདིར། ང་ནི་ཇི་འདྲའི་ཉམ་ཐག་ནུས་མེད་ཅིག་ཏུ་གྱུར་ནའང་། རི་བོ་དང་སྤང་ཐང་། མེ་ཏོག་དང་ཆུ་ཕྲན། ཕྱུགས་ཁྱུ་དང་སྦྲ་གུར … …

ཐམས་ཅད་ཁྱོད་ཀྱི་ཕྱི་མིག་གི་སྣེ་ན་བན་བུན་དུ་འཚོ།

སླར་ཡང་། མུན་པ་དང་གདུང་སེམས་བརྟོལ་ནས་སླེབས་བྱུང་ངམ།

ཁ་བའི་བསམ་གཞིགས།

གཡུ་འབྲུག་གི་ངར་སྐད་སྟོངས་ལ། གློག་དམར་གྱི་འཁྱུག་འགྲོས་ཉམས། ཁྱོད་དལ་བ་དལ་བུར་ནམ་མཁའི་པང་ནས་ཆས་ཏེ་དོ་མཉམ་པའི་རྐང་རྗེས་ས་གཞིའི་ཕང་བར་བཀོད་ཕྱིར། བདེ་སྡུག་གི་འཇིག་རྟེན་འདི་དཀར་བོང་བོང་གི་མདངས་བརྩེ་ཟབ་མོས་གཡོགས་པར་བྱས།

ཇི་འདྲའི་བག་ཆགས་ཟབ་པའི་འབྲོག་ཐང་དང་རྫི་གླུ། ངའི་ཕྱིར་དྲན་གྱི་ཁུགས་པར་ཕ་ཡུལ་གྱི་མངར་སྐྱུར་འཁྱིལ་ཡོང་། ལོ་ཟླ་དེ་དག་ཀྱང་བསྟར་བྱུང་།

ཁྱོད་ཀྱི་གསོན་སྙིང་འཕགས་པའི་གངས་འདབས་ན། ཁྱོད་ཀྱི་ཟུངས་ཁྲག་འཕྱུར་བའི་རྨ་འགྲམ་ན། གྲང་ངར་བུ་ཡུག་འཚུབས་པའི་ང་ཡི་ཕ་ས་ཡོད། གནས་དེ་རུ་རྟ་ནོར་ལུག་ཁྱུར་འདྲིས་པའི་འཚོ་གཞིས་ཟབ། གནས་དེ་རུ་གཡུ་བྱུར་རྒྱན་ཆས་སྤྲས་པའི་ལང་ཚོ་འཛུམ། གནས་དེ་རུ་གཉིད་ལས་སད་བཞིན་པའི་མི་དང་གཉིད་ལས་མ་སད་པའི་རྟོག་འགྱུ་ཞིག་ལུས་ཡོད།

ཐམས་ཅད་ཁྱོད་ཀྱི་འདབ་གཤོག་འོག་ན་ལ་མ་ལོང་། ཐམས་ཅད་ཁྱོད་ཀྱི་མཉེན་འཇམ་ཚལ་ན་གྱ་མ་གྱུ།

ཁྱོད་རང་རྒྱང་ཐག་རིང་སར་བསྐྱོད་པའི་འཕུར་གཤོག་སྐྱེན་ལ། འཇིག་རྟེན་དཀར་བོར་བསྐྲུན་པའི་འོད་མདངས་འཚེར། ཁྱོད་རང་མཐའ་མཚམས་ཀུན་ནས་སྦྲེལ་བར་ལ་ཐུར་མེད་ཅིང་། བར་སྣང་ཁམས་ནས་འཚུབས་ཀྱང་རོལ་དབྱངས་མེད། ངས་ཅིས་ཀྱང་དེ་རིང་གི་དྲོད་ཀྱིས་སྟོངས་པའི་ཁ་བའི་མི་ཡུལ་འདི་མནན་ཏེ་འཁྲེང་སེམས་ཀྱི་གོམ་ཁ་མདུན་ནས་མདུན་དུ་བསྒྱུར།

མུན་ནག་གི་བཀག་སྡོམ་གྲོལ་དུས། འོད་ཟེར་གྱི་བདེ་གྲོལ་ཐོབ་དུས།

ཁྱོད་ཀྱིས་དགའ་དྲགས་པའི་མིག་ཆུ་འདོན་བཞིན། ཚེ་སྲོག་གི་རྩ་བ་བརླན་བཞིན། སླར་ཡང་ནམ་མཁའི་པང་དུ་ཆས།

སྟོན་མཇུག་གི་སེམས་པ།

ཁ་ཆར་རེས་མོས་ཀྱིས་བརླན་པའི་བདག་གི་སྨྲེང་སེམས་སྟོན་མཇུག་གི་སྡོང་ལོ་དང་བསྡེབས་ནས་ས་ལ་ཐོལ་གྱིས་ཟགས། ཁུ་བྱུག་སྔོན་མོར་བདག་གི་སྙིང་གཏམ་བསྐུར་དུས། རྒྱང་བཞུད་སྤྲིན་པར་བདག་གི་མིག་ཆུ་བསྐུར་དུས། ཁྱོད་ཀྱི་སེམས་ཁོང་གི་ཞིང་ས་ན་བརྩེ་སེམས་ཀྱི་ལྗང་མྱུག་ཨེ་ཡོད། ཀྱེ་བདག་ཡིད་ཀྱི་གངས་ལྷ་དཀར་མོ།

གྲང་རླུང་འུར་འུར་དུ་གཡུག་ཚེ་ཁྱེད་ཀྱི་སྐྲ་ལོ་རླུང་གིས་ཤད་ཀྱིན་པ་བདག་གིས་མཐོང་། ཁ་བ་ལྷབ་ལྷུབ་ཏུ་འཚུབ་ཚེ་ཁྱོད་ཀྱི་སེམས་ངལ་འཁྱག་པ་བདག་གིས་ཚོར། ཁྱོད་དང་འུ་གཉིས་ཀྱི་ལས་སྐལ་མཚོ་མོར་སྐྱོ་སྣང་དང་ཆག་གྲུམ་གྱི་རླབས་རིས་རབས་དང་རིམ་པར་གཡོས་སོང་། འོན་ཀྱང་། ངས་མཐའ་དག་དང་ཡོད་ཚད་ལས་དབང་ཞིག་ལ་གཏན་ནས་བརྩི་སྲོལ་མེད།

བྱ་ཚོགས་ཀྱི་གཤོག་རླབས་ལྷོ་མཐའི་མཚམས་སྤྲིན་དུ་འདྲེས་ཤིང་། ཆུ་ཕྲན་གྱི་འགྱུར་ཁུགས་རྒྱ་མཚོའི་གཞུང་ལ་འཐིམས། ཁྱོད་ཀྱི་ཕྱིར་མིག་རི་བོའི་ཉག་ག་ནས་ཟིན་པས། ང་ཡི་རེ་སྒུག་རྐང་ལམ་འདི་ནས་སྐྱོར་གྱིན། ང་ཡི་རྨི་ལམ་སྤང་ཐང་འདི་ནས་འཐུ།

གྲང་ངར་ཆེ་བའི་སྟོན་མཇུག་གི་ནམ་ཟླ་འདིར། སད་སེར་གྱིས་ཁྱེར་བའི་མེ་ཏོག་གང་བུ་རེར་ཁྱོད་ཀྱི་འཛུམ་མདངས་ཉར་ཡོད་ལ། བུ་ཡུག་གིས་བསྐྱོད་པའི་འཇག་སྐྱའི་ཐུར་རྐང་རེར་ང་ཡི་གདུང་སེམས་བཀུག་ཡོད།

ཁྱོད་རང་འབྲུག་སྒྲ་དང་ཆར་རྒྱུན་གྱི་གསེབ་ནས་བརྡོལ་བྱུང་ངམ། ཁྱོད་རང་མེ་ཏོག་དང་རྫི་གླུའི་བར་ནས་འཕུར་བྱུང་ངམ། དུས་དེར། ངས་ངོ་ཚ་དང་བཀག་རྒྱ་ཐམས་ཅད་རྒྱང་དུ་དོར་ཏེ། ངས་ཕྲག་དོག་དང་སྡང་མིག་གང་མང་རུམ་ལ་བཅུག་ནས། རང་ཉིད་ཀྱི་ཡོད་ཚད་ཁྱོད་ལུས་སུ་འཁྱུད་པར་འདོད་ལ། སེམས་གཏིང་གི་རྨ་ཁ་རེ་རེའང་ཕྱི་རུ་འདོན་པར་སྒུག།