ང་དང་རྡོ་རིང་སྤུན་གསུམ། ད་དུང་དེ་ལ་འབྲེལ་བ་ཡོད་པའི་མི་གཞན་དག

གཅིག

ངས་ཁ་པར་ལ་ལྟ་བཞིན་གཞུང་ལས་ཁང་གི་ཕྱོགས་སུ་འགྲོ་བཞིན་ཡོད།

“ཁྱོད་ཀྱི་ཕ་ཡུལ་ན་ཟེར་སྒྲོས་ཡ་མཚན་ཅན་གྱི་ཡུལ་ལྗོངས་དང་དངོས་པོ་ཅི་ཞིག་ཡོད་དམ། ཟེར་སྒྲོས་ཡ་མཚན་དེ་ཁྱོད་ཀྱིས་བརྗོད་ནུས་སམ།”ཁ་པར་དུ་བྱ་འགུལ་འདི་འདྲ་ཞིག་སྤེལ་བཞིན་གདའ།

ང་རང་གི་ཕ་ཡུལ་ན་ཅི་ཞིག་ཡོད་དམ།

ང་རང་གི་ཕ་ཡུལ་ན་རྡོ་རིང་སྤུན་གསུམ་ཟེར་བ་ཞིག་ཡོད་དེ། རྡོ་རིང་སྤུན་གསུམ་ནི་སྐད་གྲགས་ཅན་ཞིག་ཡིན་པས། དེ་དག་གི་བྱུང་ལུགས་ནི་ད་ལྟ་ད་དུང་ཡུལ་མི་ཆེ་ཆུང་ཀུན་གྱི་ངག་ན་གནས་འདུག འོན་ཏེ་ངས་ཡུན་རིང་ཞིག་ལ་རྡོ་རིང་གི་ཟེར་སྒྲོས་དེ་ནི་གཏམ་རྒྱུད་ཡག་པོ་ཞིག་ཡིན་པར་སྙམ་མོད། གཞན་ལ་བརྗོད་པའི་རིན་ཐང་ཡོད་མེད་རྟོགས་མ་སོང་།

གཞུང་ལས་ཁང་ལ་སླེབས་སྐབས། ལས་གྲོགས་ཤིག་གིས་ཁྱོད་རང་དམངས་སྲོལ་པ་དགེ་འདུན་གྱིས་འཚོལ་བཞིན་ཡོད་པར་བརྗོད་པས། ང་རང་ཁོ་རང་གི་གཞུང་ལས་ཁང་ལ་སོང་བ་ན། དམངས་སྲོལ་པས་ཁ་པར་ལས་ཅི་ཞིག་ཕབ་ལེན་བྱེད་བཞིན་འདུག་ལ། ངས་ཅི་མི་སྙམ་པའི་ངང་ནས་བརྟགས་པ་ན་གཞན་གྱིས་བཤད་པའི་ཡུལ་ལྗོངས་དང་དངོས་པོ་ཟེར་སྒྲོས་ཡ་མཚན་ཕབ་ལེན་བྱེད་བཞིན་ཡོད་པ་རྟོགས་སོང་། ཟེར་སྒྲོས་འདི་དག་ལ་རིན་ཐང་ཟེར་བ་ཞིག་ཡོད་དམ། ངས་དེ་ལྟར་བསམ་བཞིན་ཁ་རོག་གེར་བསྡད་པ་ན། དམངས་སྲོལ་པ་དགེ་འདུན་གྱིས་ངའི་ངོ་མདངས་ལས་ཅི་ཞིག་རྟོགས་སོང་བ་འདྲ།

“བཀྲ་ཤིས། ཁྱོད་ཀྱི་མེས་པོ་ནི་ཚྭ་པ་མ་མིན་ནམ།”དམངས་སྲོལ་འཇུག་པ་དགེ་འདུན་གྱིས་ཅི་ཞིག་ལ་དམིགས་ནས་དེ་ལྟར་དྲིས་བྱུང་།

“ཡིན། ངའི་མེས་པོ་ནི་ཚྭ་པ་ཡིན། མེས་པོ་ཚྭ་ལ་སོང་བའི་སྐོར་ལ་གཏམ་རྒྱུད་ཀྱང་མང་པོ་ཞིག་ཡོད།”

“དེ་མིན། ཁྱོད་ཀྱི་ཁྱིམ་རྒྱུད་དེ་རྙིང་མ་པའི་ཁྱིམ་རྒྱུད་ཅིག་ཡིན་པ་དང་། མི་རབས་རེ་ལ་སྔགས་པ་སྐད་གྲགས་ཅན་རེ་ཡོད་པ་མ་ཡིན་ནམ།”དམངས་སྲོལ་པ་དགེ་འདུན་གྱིས་ཅི་ཞིག་ལ་དམིགས་པ་ལྟར་དེ་ལྟར་བརྗོད།

“དེ་ལྟར་ཡིན་པར་བཤད། ངའི་ཨ་ཕའང་སྔགས་པ་ཞིག་ཡིན།”

དམངས་སྲོལ་པ་དགེ་འདུན་གྱིས་གདོང་ལ་འཛུམ་མདངས་རྟོགས་དཀའ་བ་ཞིག་བསྡུས་བྱུང་ལ། འཛུམ་མདངས་དེས་སྐབས་རེར་ང་ལ་ཟུར་ཟ་བྱེད་བཞིན་ཡོད་པ་འདྲ་ལ། མཚམས་རེར་ང་ལ་འཕྱ་དམོད་བྱེད་བཞིན་ཡོད་པ་འདྲ་བས། ང་རང་དོགས་མི་བདེ་བར་གྱུར།

“བཀྲ་ཤིས། ཁྱོད་ཀྱི་ཕ་ཡུལ་ན་རྡོ་རིང་སྤུན་གསུམ་ཟེར་བ་ཞིག་ཡོད་པ་མིན་ནམ།”

“རྒན་ལགས། ཁྱོད་ལ་རྡོ་རིང་སྤུན་གསུམ་གྱི་ཟེར་སྒྲོས་ཡ་མཚན་དེ་མཁོ་བ་ཡིན་ནམ།”

“སྒྲ་བླངས་ཏེ་ཁ་པར་དུ་བཀྲམ་ན་གཞན་ལ་ཕན་ངེས་ཡིན།”

བདེན་ནམ། མི་ཕོ་འདི་ནི་དམངས་སྲོལ་པ་རེད། བདེན་པ་ཡིན་དགོས།

ང་རང་ཕ་ཡུལ་དུ་ལོག་རྗེས། རྡོ་རིང་སྤུན་གསུམ་ཡོད་སར་འགྲོ་དགོས་བྱུང་།

འོ་རེད་ལགས། རྡོ་རིང་སྤུན་གསུམ་ནི་དཔལ་མགོན་རྫོང་འཕྱིང་ལུང་ཡུལ་ཤོག་ཉན་པ་གྲོང་ཚོ་ན་ཡོད་ལ། སྔོན་གྱི་དུས་སུ་ས་སྐྱ་སྦྲ་སྦྱར་ཚོ་བའི་ས་ཁོངས་སུ་གཏོགས་པར་བརྗོད། ང་རང་ནི་གྲོང་ཚོ་འདི་ནས་སྐྱེས་རུང་། ཉིན་དེའི་ཡར་སྔོན་ལ་རྡོ་རིང་ཡོད་སར་གཏན་ནས་འགྲོ་མ་མྱོང་། རྡོ་རིང་སྤུན་གསུམ་ལས་ཆེ་བ་ལས་རྡོ་རིང་ཆེ་བ་ལ་སྤྱི་ཁྲི་གཅིག་ལྷག་དང་། ཆུང་བར་སྤྱི་ཁྲེ་གཅིག་མ་ཟིན་ཙམ་ཡོད་ཅིང་། རྡོ་རིང་གསུམ་ག་མཉམ་དུ་བསྒྲིགས་ནས་བཙུགས་འདུག འདི་ལ་ངག་སྒྲོས་ཡ་མཚན་ཞིག་ཡོད་པ་ལས་རིན་ཐང་གཞན་པ་ཅི་ཞིག་ཡོད་དམ།

ཨ་ལ། རྡོ་རིང་གསུམ་གའི་མཐའ་ལ་ཚྭ་རྡོག་མང་པོ་གཏོར་འདུག འདི་ནི་ཅི་ཡིན་ནམ།

མཚན་མོ་དེར། ཨ་མས་ནུབ་འཚལ་ཕུན་སུམ་ཚོགས་པ་ཞིག་གཡོས་སྦྱོར་བྱས་བྱུང་ལ། དེ་ནི་ང་རང་ཕྱི་ཉིན་ལས་ཁུངས་ལ་ལོག་གྲབས་ཡོད་པའི་རྐྱེན་ཡིན་ངེས།

“བཀྲ་ཤིས། དེ་རིང་རྡོ་རིང་སྤུན་གསུམ་ལ་ལྟ་བར་སོང་ངམ།”ཨ་ཕས་ཅི་མི་སྙམ་པའི་ངང་ནས་དེ་ལྟར་དྲིས།

“ཨ་ཕ། རྡོ་རིང་དེ་གསུམ་ནི་རིན་ཐང་ཅན་ཞིག་ཡིན་པ་འདྲ། ང་རང་ཆེད་དུ་སོང་ནས་ཞིབ་ལྟ་ལན་ཞིག་བྱས།”ངས་ཁ་པར་གྱིས་བླངས་པའི་འདྲ་པར་དེ་ཨ་ཕར་བསྟན།

“འོ་རེད་ཡ། ཁྱོད་ཀྱིས་རྡོ་རིང་དེ་རིན་ཐང་ཅན་ཞིག་ཡིན་པ་ཅི་ལྟར་ཤེས་པ་ཡིན།”

“དམངས་སྲོལ་པ་དགེ་འདུན་གྱིས་རིན་ཐང་ཅན་ཞིག་ཡིན་པར་བཤད།”

“ཁྱོད་ཀྱི་ལས་ཁུངས་ཀྱི་དགེ་འདུན་ཟེར་བ་དེ་ཡིན་ནམ།”

“ཡིན། ཁོ་རང་ཡིན།”

ཨ་ཕའི་ངོ་མདངས་སྐད་ཅིག་ཉིད་ལ་འགྱུར་སོང་ལ། ཡུད་ཙམ་གྱི་རྗེས་སུ“དགེ་འདུན་ཟེར་བ་དེ་ཐེའུ་རང་སྤུན་གསུམ་དང་མཚུངས”ཞེས་བཤད་རྗེས། ནུབ་འཚལ་འཐུང་མཚམས་བཞག་སྟེ་མཆོད་ཁང་དུ་ཕྱིན་སོང་བ་དང་། ཨ་མས་དངན་པ་རིང་པོ་ཞིག་འཐེན་རྗེས་ཨ་ཕའི་ཇ་ཕོར་བཟུང་ནས་ཨ་ཕའི་རྗེས་སུ་འབྲངས་སོང་།

འདི་ནི་ཅི་ཞིག་ཡིན་ནམ། ང་རང་གནས་སྐབས་སུ་དོགས་མི་བདེ་བར་གྱུར།

གཉིས།

ང་རང་ཁྱིམ་ཞེས་འབོད་དགོས་པའི་མལ་ཁང་ཆུང་ཆུང་ནས་ཡུན་རིང་ཞིག་ལ་བསྡད་སོང་།

ཁྱིམ་ཞེས་འབོད་དགོས་པའི་མལ་ཁང་ཆུང་ཆུང་དེ་ནས་ཡུན་རིང་ལ་བསྡད་པ་ན། ལས་ཚོགས་ལ་འགྲོ་འདོད་བྱུང་སྟེ་འདུག་མི་བཟོད་མོད། ལས་འགན་ཡོངས་སུ་མ་གྲུབ་ན་ལས་ཚོགས་ལ་འགྲོ་ཐབས་མི་འདུག

ཉིན་དེར། ངས་གླིང་རྗེ་གེ་སར་རྒྱལ་པོའི་སྒྲུང་སྐོར་ཞིག་མདུན་ཅོག་སྟེང་དུ་སྤུངས་ཏེ་དཔྱད་རྩོམ་ལ་རྒྱུ་ཆ་འཚོལ་བཞིན་ཡོད་ལ། ལོ་རྗེས་མ་ནས་བཟུང་ངས་ཀྱང་ལས་ཐོབ་རེ་ཞུ་བྱས་ཆོག་པས། ཁ་བྱང་ལ《གེ་སར་རྒྱལ་པོའི་སྒྲུང་གི་སྒྲུང་གླུའི་སྒྲིག་གཞི་ལ་དཔྱད་པ》ཟེར་བའི་དཔྱད་རྩོམ་ཞིག་བྲིས་ཏེ་ལས་ཐོབ་བརྩོན་ལེན་བྱེད་གྲབས་ཡོད། ངས་གེ་སར་སྒྲུང་གི་གླུ་ཁོ་ན་བཀླགས་ཏེ་རང་ལ་མཁོ་བའི་གླུ་ཚིག་རྣམས་རེག་ཟིག་ལ་འདེབས་བཞིན་པའི་སྐབས་སུ་དམངས་སྲོལ་པ་དགེ་འདུན་གཞུང་ཁང་ལ་སླེབས་བྱུང་།

“བཀྲ་ཤིས། ཅི་ཞིག་ལ་འབད་བཞིན་ཡོད།”དམངས་སྲོལ་པ་དགེ་འདུན་གྱིས་འཛུམ་དམུལ་དམུལ་གྱིས་དེ་ལྟར་བརྗོད།

“ལོ་རྗེས་མར་ལས་ཐོབ་ལ་རེ་བ་ཞུས་ཆོག་པས། དཔྱད་རྩོམ་ཞིག་བྲི་དགོས་བསམ་པ་ཡིན་མོད། དེང་སྐབས་དཔྱད་རྩོམ་ཤིན་ཏུ་འགོད་དཀའ་བར་བརྗོད།”

“དེ་སླ་མོ་རེད། ངེད་ཚང་གི་མག་པ་རྩོམ་སྒྲིག་ཁང་ན་ཡོད་པ་མ་ཡིན་ནམ། ངས་ཁོ་ལ་མཚམས་སྦྱོར་བྱས་ཆོག”

“ངོ་མ་ཡིན་ནམ།”ང་རང་ཤིན་ཏུ་དགའ་བྱུང་།

“ངོ་མ་ཡིན། དེ་སླ་མོ་རེད། ངས་རྒྱལ་ཁབ་རིམ་པའི་ལས་གཞི་ཞིག་གཉེར་གྲབས་ཡོད། ཁྱོད་ཀྱིས་ངའི་ཚབ་བྱས་ཏེ་སྙན་ཞུ་ཞིག་འབྲི་རོགས།”དམངས་སྲོལ་པ་དགེ་འདུན་གྱིས་གདོང་གཟབ་ནན་གྱི་ཉམས་ཤིག་བསྡུས་ནས་དེ་ལྟར་བཤད།

“……”

དགེ་འདུན་གྱིས་ང་རང་འཐད་མིན་ལ་གཏན་ནས་མི་འཛེམ་སྟེ། ཁོས“སྙན་ཞུ་ཁྱིམ་ནས་འབྲི་རོགས། ལས་ཁུངས་ལ་ལུས་པོ་ན་སོང་ཞེས་བརྗོད་རོགས”ཞེས་བརྗོད་རྗེས། ཤོག་བྱང་ཞིག་ངའི་ལག་ལ་བཞག་སྟེ“འདི་ནི་ཁ་བྱང་ཡིན། ཟླ་གཅིག་གི་རིང་ལ་བྲིས་ནས་མཇུག་རྫོགས་སོང་ན་ཆོག”ཟེར་བཞིན་གཞུང་ལས་ཁང་ནས་ཕྱི་ལ་ཕྱིན་སོང་།

ང་རང་ནི་དུས་ཡུན་རིང་པོར་ཧད་ནས་བསྡད་རྗེས། འུ་ཐུག་པའི་དངན་པ་རིང་པོ་ཞིག་འཐེན་ཏེ་ཤོག་བྱང་ངོ་ལ་བལྟས་པ་ན།“བོད་ཀྱི་ཡུལ་ལྗོངས་ལྷ་རབས་འཚོལ་བསྡུ་དང་ཞིབ་འཇུག”ཅེས་པའི་ཡིག་འབྲུ་དེ་དག་མཐོང་བྱུང་།

ཉིན་མོ་དྲ་ངོས་སུ་རྒྱུ་ཆ་འཚོལ་བསྡུ་བྱེད་བཞིན་སྙན་ཞུ་བྲིས་པ་ན། ཕྱི་དྲོའི་དུས་སུ་ལུས་སེམས་གཉིས་ཀ་ངལ་ཞིང་དུབ་འདུག་པས། སྔར་སྲོལ་ལྟར་ན་ནང་མར་སོང་སྟེ་ཝུ་ཆང་འཐུང་བཞིན་ངལ་གསོ་ལ་རོལ་ཆོག་མོད། འོན་ཏེ་སྐབས་འདིར་ལས་ཁུངས་ལ་ལུས་པོ་ན་བྱུང་ཞེས་བཤད་ཡོད་པ་དང་། མི་མང་འཚོགས་སར་ཕྱིན་ན་ལས་གྲོགས་ཀྱིས་མཐོང་ཉེན་ཆེ་བས། ནམ་རྒྱུན་རང་ཁྱིམ་འབོད་པའི་མལ་ཁང་དུ་བསྡད་དེ་སྟོང་འདང་ལ་མི་རོལ་ཀ་མེད་བྱུང་།

ཐེངས་ཤིག་ལ་སུན་སྣང་ཆེན་པོ་དེ་འཇོམས་ཆེད། བརྙན་འཕྲིན་གྱི་གློག་སྒོ་ཕྱེ་བ་ན། ཕྱི་གླིང་གི་རིས་སྒྲུང་ཞིག་ཤེལ་ཡོལ་ངོས་ལ་ངོས་ལ་མངོན་བྱུང་། བོད་ཀྱིས་ཐེའུ་རང་ཞེས་འབོད་པ་པ་ནི་འདི་ལྟ་བུ་ཞིག་ཡིན་ནམ། ཨ་ཕས“དགེ་འདུན་ཟེར་བ་དེ་ཐེའུ་རང་སྤུན་གསུམ་དང་མཚུངས”ཞེས་བཤད་དོན་ཅི་ཡིན་ནམ། སྐབས་ཤིག་ལ་ངའི་ཡིད་ལ་ཕ་ཡུལ་གྱི་རྡོ་རིང་སྤུན་གསུམ་འཁོར་བྱུང་།

དེ་དུས། བྱང་ས་སྐྱ་ཁུལ་དུ་ཕ་འདྲེ་རྒད་པོ་སྔགས་ནག་རལ་པ་ཅན་ཞིག་དང་། མོ་འདྲེ་རྒན་མོ་མཆེ་བ་ཅན་ཞེས་འབོད་པའི་སྟངས་དཔྱལ་གཉིས་ཡོད་ལ། སེམས་ཅན་མ་རུང་བ་དེ་གཉིས་སྟངས་དཔྱལ་དུ་གྱུར་རྗེས། ཐེའུ་རང་བདུད་ཀྱི་སྤྲུལ་པ་ཡིན་པར་གྲགས་པའི་བུ་གསུམ་སྐྱེས། སྐབས་ཤིག་ལ། གླིང་རྗེ་གེ་སར་རྒྱལ་པོས་སྨུག་པོ་འཇང་ལ་དམག་དྲངས་པ་ན། ཕོ་འདྲེ་མོ་འདྲེ་གཉིས་ལ་འཚུབ་ཆ་ལྡང་སོང་བས། མྱུར་མོར་རང་གི་བུ་གསུམ་སྟེ་ཐེའུ་རང་སྤུན་གསུམ་པོ་འཇང་ཡུལ་དུ་ཚྭ་གཡང་རྐུ་བར་ཕྱིན་པ་དང་། གླིང་དཔའ་རྟུལ་འཇང་གི་ཚྭ་ཁར་འབྱོར་བ་གཉིས་དུས་མཉམ་དུ་ཐེའུ་རང་སྤུན་གསུམ་ཡང་ཚྭ་ཁར་སླེབས་བྱུང་།

གསུམ།

ལས་ཚོགས་ལ་འགྲོ་ཐུབ་པར་གྱུར་པ་ན། ང་རང་ལ་ཅི་ཞིག་ལས་ཡོངས་སུ་ཐར་སོང་བ་ལྟ་བུའི་ཚོར་སྣང་བྱུང་བས། རང་གིས་ཀྱང་ག་དུས་ལམ་ལ་ཆས་པ་མ་ཚོར་མོད། གང་ལྟར་ཞོགས་པའི་དུས་སུ་ཉི་མ་ཤར་བ་དང་ལྷན་དུ་གཞུང་ལས་ཁང་ལ་སླེབས་བྱུང་།

ང་རང་གིས་ཤེལ་གྱི་ཇ་ཕོར་དེ་ལ་ཇ་ལོ་སྦངས་རྗེས། རྐུབ་སྟེགས་སུ་བསྡད་དེ་ཇ་ལོ་ཆུ་ལ་སྙིག་བཞིན་པར་ཅེར་བ་ན། སེམས་ཀྱི་འདོད་པ་རེ་རེ་ལུས་སྟོད་ནས་ལུས་སྨད་དུ་སྙིག་བཞིན་ཡོད་པའི་ཚོར་བ་སྐྱེས་བྱུང་། ལྷག་པར་ཉི་འོད་གཞུང་ལས་ཁང་དུ་འཕྲོས་པ་དང་། ཉི་ཐིག་ལས་རྡུལ་ཕྲན་ལྕུག་ལྕུག་ཏུ་འདར་བཞིན་པ་མཐོང་སྐབས། སངས་རྒྱས་ཆོས་ལུགས་ཀྱི་གཞུང་ལས་བསྟན་པའི་གནས་ལུགས་ཤིག་རྟོགས་སོང་བ་འདྲ་མོད། བསམ་བློ་ག་འདྲ་བཏང་རུང་གནས་ལུགས་ཅི་ཞིག་རྟོགས་སོང་བ་གཏན་ནས་བརྗོད་མ་ནུས།

གོམ་སྒྲ་ལ་བརྟགས་ན། ལས་གྲོགས་རྣམས་རེ་རེ་བཞིན་ལས་ཚོགས་སུ་སླེབས་བྱུང་བ་རྟོགས་ཐུབ། ང་རང་གིས་གེ་སར་སྒྲུང་གི་དཔེ་དེབ་རྣམས་མདུན་ཅོག་སྟེང་ལ་བཞག་སྟེ་རྒྱུ་ཆ་འཚོལ་བསྡུ་བྱེད་མགོ་བརྩམས། སྐབས་ཤིག་ལ། དམངས་སྲོལ་པ་དགེ་འདུན་གཞུང་ལས་ཁང་ལ་སླེབས་བྱུང་། ཁོ་རང་གི་གདོང་ལ་རེ་ལྟོས་ཀྱི་འཛུམ་མདངས་འགོག་ཐབས་མེད་པ་ཞིག་འཁྱིལ་འདུག

“བཀྲ་ཤིས། སྙན་ཞུ་བྲིས་ཏེ་རྫོགས་སོང་ངམ།”

“རྒན་ལགས། སྙན་ཞུ་བྲིས་ཏེ་མཇུག་རྫོགས་སོང་།”

“མགྱོགས་པ་ལ་ཨང་། ན་གཞོན་ཞིག་ཡིན་ན་སླ་མོ་ཞིག་ཡིན་ངེས།”

ངས་གློག་ཡིག་དཔར་མ་དེ་དམངས་སྲོལ་པ་དགེ་འདུན་གྱི་ལག་ལ་བཞག་པ་ན། ཁོ་རང་གིས་གདོང་ལ་སྲིད་དམ་སྙམ་པའི་ཉམས་ཤིག་བསྡུས་ཏེ“གློག་ཡིག་མེད་དམ”ཞེས་དྲིས་བྱུང་བས། ངས་མྱུར་མོར“གློག་ཡིག་ཡོད། ངས་སྐད་འཕྲིན་བརྒྱུད་ནས་སྐུར་ཡོང”ཞེས་བཤད་མོད། ཁོ་རང་གིས“ངས་སྐད་འཕྲིན་ལས་ཡིག་ཆ་ལེན་མི་ཤེས། ཁྱོད་ཀྱིས་ཡིག་ཆ་གློག་ཀླད་དུ་ལོངས་དང་། ངས་ཡིག་སྣོད་དུ་བླངས་ཆོག”ཅེས་བརྗོད་པ་ན། ངས་ཁོ་རང་གི་སྤྱོད་ལུགས་འདི་ལ་གནད་དོན་ཞིག་ཡོད་པར་སྙམ་མོད། སྐབས་དེར་གནད་ཅི་ཞིག་ཡོད་པ་རྟོགས་མ་སོང་།

“རྒན་ལགས། འདི་ནི་རྡོ་རིང་སྤུན་གསུམ་གྱི་གཏམ་རྒྱུད་ཡིན།”

དམངས་སྲོལ་པ་དགེ་འདུན་ནི་དགའ་སྟེ་གདོང་ལ་འཛུམ་མདངས་རྒྱས་མོད། ཅི་ཡང་ཡི་བརྗོད་པར་ཡིག་ཆ་དཔར་མ་ལག་ཁུག་ཏུ་བཅུག་རྗེས། མྱུར་མོར་གཞུང་ལས་ཁང་གི་ཕྱི་ལ་ཕྱིན་སོང་།

ཉིན་དེར། ལས་ཁུངས་ཀྱིས་ཚོགས་འདུ་ཞིག་བསྡུས་སོང་།

མགོ་ཁྲིད་དཀོན་མཆོག་གིས་གཏམ་གནང་སྐབས། ཐོག་མར་རྒྱལ་ཁབ་རིམ་པའི་ལས་གཞི་གཉེར་བའི་གལ་ཆེན་རང་བཞིན་དེ་ཆབ་སྲིད་དང་རིག་གནས། རྒྱལ་ཁབ་དང་མི་རིགས་བཅས་ལ་སྦྱར་ནས་བརྗོད་བྱུང་བ་དང་། དེ་ནས“དེ་རིང་གི་ཚོགས་འདུ་ནི་ལས་གཞིའི་སྙན་ཞུ་ལ་བསམ་འཆར་བསྡུ་ལེན་བྱེད་པའི་ཚོགས་འདུ་ཞིག་ཡིན། ལྷན་རྒྱས་ཀྱིས་དགོངས་འཆར་ལྷུག་པར་སྩོལ་རོགས”ཞེས་བརྗོད་རྗེས། དྲུང་ཡིག་ལ་བཀའ་ཕབ་སྟེ་སྙན་ཞུའི་ཡིག་ཆ་མི་རེ་རེའི་མདུན་བཞག་བྱུང་།

དྲུང་ཡིག་གཞོན་ནུ་མ་དེ་མོ་རང་གི་འདུག་སྟེགས་ཕྱོགས་སུ་འགྲོ་སྐབས། ལྷམ་མཐིལ་གྱིས་ཐྲིག་སྒྲ་གསལ་ཐག་ཆོད་པ་རེ་བསྒྲགས་བྱུང་ལ། འགྲོ་ལུགས་ནི་སྒེག་ཉམས་ཀྱིས་ཕྱུག་ཅིང་ཡིད་དུ་འོང་བ་ཞིག་རེད། ལས་གྲོགས་མང་པོས་མོ་རང་ནི་མགོ་ཁྲིད་དཀོན་མཆོག་གི་དགའ་རོགས་ཡིན་པར་བརྗོད། བདེན་པ་ཡིན་ནམ།

“བློ་མཐུན་རྣམ་པ། ལྷན་རྒྱས་ཀྱིས་ཡིག་ཆར་ལྟོས་དང་། ངས་ལས་གཞི་ངོ་སྤྲོད་བྱེད།”

ངས་ཡིག་ཆར་བལྟས་པ་ན། ང་རང་ཧ་ལས་སོང་། ཡིག་ཆ་ནི་ངས་དམངས་སྲོལ་པ་དགེ་འདུན་ལ་བྲིས་པའི་སྙན་ཞུ་དེ་རེད། ལྷག་པར་ཧ་ལས་དགོས་པ་ཞིག་ནི། མགོ་ཁྲིད་དཀོན་མཆོག་གིས་ལས་གཞིའི་ཞིབ་འཇུག་གི་དམིགས་ཡུལ། ཞིབ་འཇུག་གི་དགེ་མཚན་སོགས་གླེང་སྐབས། ཡོད་ཚད་ཁོ་རང་གི་འཆར་སྒོ་དང་ངོས་ཟིན་བ་ཡིན་པའི་ཚོར་བ་སྟེར། སྐབས་དེར། ངས་དམངས་སྲོལ་པ་དགེ་འདུན་ལ་བལྟ་དགོས་བྱུང་ལ། ཁོ་རང་གི་གདོང་ལ་འཛུམ་མདངས་ཤིག་བསྡུས་འདུག་མོད། ཞིབ་ཏུ་བརྟགས་ན་འཛུམ་མདངས་དེ་ནི་ཨུ་ཚུགས་ལ་བརྟེན་ནས་བྱུང་བ་རྟོགས་ཐུབ།

ལས་གྲོགས་རྣམས་ཀྱིས་ལས་གཞི་ལ་བསྟོད་བསྔགས་བྱེད་མགོ་བརྩམས་ལ། ངས་རང་ཉིད་ཀྱིས་ཡག་པོ་ཞིག་འབྲི་ནུས་སམ་སྙམ་པ་ན། ང་རྒྱལ་ཞིག་གམ། མནོང་འགྱོད་ཅིག་གམ། ཁ་སྐྱེངས་པའམ། དོགས་མི་བདེ་བ་སོགས་ལ་གཏོགས་པའི་ཚོར་བ་ཞིག་གིས་ལུས་ཀྱི་མགོ་མཇུག་ཐམས་ཅད་བདག་གིར་བཟུང་སོང་།

“བཀྲ་ཤིས། ཁྱོད་ལ་བསམ་འཆར་ཅི་ཞིག་ཡོད།”མགོ་ཁྲིད་དཀོན་མཆོག་གིས་ཅི་མི་སྙམ་པའི་ངང་ནས་དེ་ལྟར་བཤད།

ངས་ཐོག་མར་ཅི་དྲན་འདི་དྲན་མེད་པར“ང་ལ་བསམ་འཆར་མེད”ཅེས་བརྗོད་མོད། སྐད་ཅིག་མ་གཉིས་པར་དེ་ལྟར་བརྗོད་ན་མི་ལེགས་པ་རྟོགས་ཏེ“དགེ་རྒན་རྣམ་པས་ཡག་པོ་གསུང་བྱུང་། ང་ལ་བསམ་འཆར་གཞན་པ་མེད”ཅེས་གསལ་བཤད་བྱས།

མཚན་མོ་དེར། ང་རང་གིས་གཉིད་གཏན་ནས་མི་ཁུག་པར་གྱུར། ང་རང་ནི་ཅི་ཞིག་ཡིན་ནམ། མགོ་ཁྲིད་དཀོན་མཆོག་ནི་ཅི་ཞིག་ཡིན་ནམ། དམངས་སྲོལ་པ་དགེ་འདུན་ནི་ཅི་ཞིག་ཡིན། ངེད་གསུམ་ལ་ཐེའུ་རང་སྤུན་གསུམ་ཞེས་པའི་མཚང་མིང་ཞིག་བཏགས་ན་ཆོག་གམ།

ཐེའུ་རང་སྤུན་གསུམ་དེ་འཇང་གི་ཚྭ་གཡང་རྣམས་ཁྱེར་ནས་ཕྱིར་རང་ཡུལ་དུ་ཡོང་བའི་སྐབས་སུ་གླིང་དཔའ་བརྟུལ་རྣམས་ཀྱིས་རྗེས་འདེད་བཏང་ཡང། ཐེའུ་རང་སྤུན་གསུམ་དེ་རླུང་འཚུབ་ཅིག་གི་ནང་དུ་ཡལ་སོང་བས་དཔའ་བརྟུལ་གྱིས་རྗེས་མ་ཟིན། འོན་ཀྱང་ཚྭ་གཡང་ཐེའུ་རང་གི་ལག་ཏུ་ཤོར་སོང་ན་རྗེས་མ་བོད་དུ་ཚྭ་གཏེར་འཇིག་འགྲོ་བར་དགོངས་ནས་བོད་སྐྱོང་བརྟན་མ་བཅུ་གཉིས་ལ་འཕྲིན་བཅོལ་ཞུས།

ཐེའུ་རང་སྤུན་གསུམ་མྱུར་མོར་རང་ཡུལ་ཕྱོགས་སུ་མཆོང་བ་ན། ཡུན་རིང་མ་འགོར་བར་རང་གི་ཕ་མ་གཉིས་དང་ཐག་རིང་བའི་གནས་སུ་སླེབས་བྱུང་། ཁོ་ཚོ་ཁུག་དམར་གཙང་པོའི་འགྲམ་དུ་སླེབས་རྗེས། གཙང་པོ་དེར་ཁྲུས་བརྒྱབ་ནས་ངལ་གསོ་བཞིན་ཡོད་པའི་སྐབས་སུ། བོད་སྐྱོང་བརྟན་མ་བཅུ་གཉིས་ཀྱིས་ཐོག་བརྒྱབ་སྟེ་ཐེའུ་རང་སྤུན་གསུམ་དམ་ལ་བཏགས་པ་མ་ཟད། གཟུགས་ཕུང་རྡོ་མདོང་གསུམ་དུ་བསྒྱུར་ནས་བཞག

ང་རང་གིས《གེ་སར་རྒྱལ་པོའི་སྒྲུང་གི་སྒྲུང་གླུའི་སྒྲིག་གཞི་ལ་དཔྱད་པ》ཞེས་པ་དེ་བྲིས་ནས་མཇུག་རྫོགས་སོང་བས། ཡིག་ཆ་དཔར་མ་ཁྱེར་ནས་དམངས་སྲོལ་པ་དགེ་འདུན་གྱི་གཞུང་ལས་ཁང་ལ་སོང་།

“བཀྲ་ཤིས། དཔྱད་རྩོམ་བྲིས་ཏེ་མཇུག་རྫོགས་སོང་ངམ། གནས་སྐབས་སུ་ཐབས་ཇུས་མི་འདུག མག་པ་པེ་ཅིང་ལ་ཟབ་སྦྱོང་བྱེད་པར་མངགས་སོང་།”དམངས་སྲོལ་པ་དགེ་འདུན་གྱིས་ཐབས་ཟད་པའི་ཉམས་ཤིག་སྟོན་བཞིན་དེ་ལྟར་བརྗོད།

“དགེ་རྒན་གྱིས་རྩོམ་སྒྲིག་པ་གཞན་པར་མཚམས་སྦྱོར་བྱས་ན་ཆོག་གམ།”ངས་རེ་ལྟོས་ཆེན་པོས་དེ་ལྟར་བཤད།

“ཁྱོད་རང་མགོ་ཁྲིད་དཀོན་མཆོག་གི་མདུན་ལ་སོང་དང་། རྩོམ་སྒྲིག་ཁང་གི་དབུ་ཁྲིད་དང་ཁོ་གཉིས་ནི་ཏང་གི་སློབ་གྲྭའི་སློབ་གྲོགས་རེད། ཁོ་ལ་ངོ་སོ་མཐོ་བས་མཚམས་སྦྱོར་བྱས་ན་འགོད་ངེས་ཡིན།”

“ཡ་ཡ།”ང་རང་རབ་ཏུ་ཕམ་སོང་།

མཚན་མོ་དེར། ང་རང་གེ་སར་ནང་མར་སོང་བ་ན། དམངས་སྲོལ་པ་དགེ་འདུན་གྱི་བུ་མོའི་ཁྱོ་ག་ནང་མར་སླེབས་འདུག

“ཁྱོད་རང་པེ་ཅིང་ལ་ཕྱིན་སོང་བ་མ་ཡིན་ནམ།”ང་རང་ཡིད་མི་ཆེས་པའི་ངང་ནས་དེ་ལྟར་དྲིས།

“མ་སོང་།”ཁོ་རང་གིས་མཚར་སྣང་དང་བཅས་དེ་ལྟར་བཤད།

དམངས་སྲོལ་པ་དགེ་འདུན་གྱིས་རྫུན་ལབ་དོན་ཅི་ཡིན་ནམ།

བཞི།

“བོད་ཀྱི་ཡུལ་ལྗོངས་ལྷ་རབས་འཚོལ་བསྡུ་དང་ཞིབ་འཇུག”ཅེས་པའི་ལས་གཞི་དེ་ལ་ཆོག་མཆན་ཐོབ་སོང་བས། མགོ་ཁྲིད་དཀོན་མཆོག་གིས་མི་སྣ་རེ་གཉིས་ཁྲིད་དེ་ས་ཆ་སོ་སོར་རྒྱུ་ཆ་འཚོལ་བསྡུ་བྱེད་པར་སོང་བ་ན། ལས་ཁུངས་ཀྱི་ཚོགས་འདུ་ཇེ་ཉུང་ལ་སོང་བས། ལས་གྲོགས་རྣམས་ལ་དགའ་སྤྲོ་ཆེན་པོ་སྐྱེས་སོང་།

དམངས་སྲོལ་པ་དགེ་འདུན་གྱིས་སླར་ཡང་རྒྱལ་ཁབ་རིམ་པའི་ལས་གཞི་ཞིག་གྲ་སྒྲིག་བྱེད་བཞིན་ཡོད་ལ། ཁ་བྱང་ལ“མཚོ་བོད་མཐོ་སྒང་དང་ཉེ་འཁོར་གྱི་ལྷ་རབས་ལ་གཞིགས་ཏེ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ལ་དཔྱད་པ”ཟེར།

ཉིན་ཞིག་ལ་དམངས་སྲོལ་པ་དགེ་འདུན་ང་ཡི་གཞུང་ལས་ཁང་ལ་སླེབས་བྱུང་།

“ལས་གཞིའི་ཁ་བྱང་འདི་ག་འདྲ་རེད།”ཁོས་ཤོག་བྱང་ཞིག་ངའི་ལག་ལ་བཞག་ནས་དེ་ལྟར་བཤད།

“ཡག་པོ་རེད།”

“སྙན་ཞུ་ནི་ཁྱོད་ཀྱིས་བྲི་དགོས་འདུག སྔ་མོ་ནས་གྲ་སྒྲིག་ཡག་པོ་ཞིག་གནང་རོགས།”

“རྒན་ལགས། ངས་ད་དུང་དཔྱད་རྩོམ་སྤེལ་མེད། དཔྱད་རྩོམ་བྲི་དགོས་འདུག”

“ད་སྐབས་གེ་སར་སྐོར་གྱི་དཔྱད་རྩོམ་ཤིན་ཏུ་མང་བས། ཤིན་ཏུ་འགོད་དཀའ། དཔྱད་རྩོམ་གཞན་ཞིག་འབྲི་བར་མཛོད་དང་། ངས་མག་པར་ངོ་སྤྲོད་བྱེད་ཡ།”དམངས་སྲོལ་པ་དགེ་འདུན་གྱིས་སླར་ཡང་མག་པོ་གླེང་བྱུང་།

“……”

“ཁྱོད་ཀྱིས་སྙན་ཞུ་འབྲི་རོགས། དཔྱད་རྩོམ་ནི་ངས་མག་པར་མཚམས་སྦྱོར་བྱེད།”

“……”

སྟོན་ཀ་དེར། མགོ་ཁྲིད་པ་དཀོན་མཆོག་སྒྲིག་ཁྲིམས་ཨུ་ཡོན་ལྷན་ཁང་གི་ལས་མིས་ཁྲིད་སོང་ལ། གོ་ཐོས་ལྟར་ན་ཁོ་རང་གིས་ལས་ཁུངས་ཀྱི་ཞིབ་འཇུག་ཐད་ཀྱི་གྲོན་དངུལ་མང་པོ་ལྐོག་བཟའ་བྱས་པ་མ་ཟད། སྐྱེས་མ་མང་པོ་ཞིག་དང་ཚུལ་མཐུན་དང་མ་ཡིན་པའི་འབྲེལ་བ་བྱུང་བ་ཡོད་ཟེར།

དྲུང་ཡིག་གཞོན་ནུ་མ་དེ་ད་དུང་ལས་ཚོགས་ལ་ཞུགས་ཡོད་པ་མིན་ནམ།

མཚན་མོ་དེར། རྨི་ལམ་དུ་ཐོག་མར་ང་རང་ཐེའུ་རང་སྤུན་གསུམ་ལ་འཕྲད་སོང་བ་དང་། དེའི་རྗེས་སུ་འདྲེ་ཕོ་འདྲེ་མོ་དེ་གཉིས་ཀའང་མཐོང་བྱུང་བས། འཇིགས་ཤིང་སྐྲག་པར་གྱུར་ཏེ་ཡུན་རིང་ལ་བྲོས་མོད། ཆུ་བོ་རབ་མེད་ཅིག་གི་འགྲམ་དུ་ང་རང་འདྲེ་ལག་ལ་ཚུད་སོང་།

ཐེའུ་རིང་སྤུན་གསུམ་དེ་ཚྭ་ཁར་སོང་ནས་ཡུན་རིང་འགོར་རུང་སླར་མ་སླེབས་པ་ན། འདྲེ་ཕོ་འདྲེ་མོ་གཉིས་ཀར་སེམས་ཁྲལ་ཆེན་པོ་བྱུང་བས། འདྲེ་ཕོས་འུ་གཉིས་ཀྱི་བུ་གསུམ་པོ་ཚྭ་ཁར་སོང་ནས་དུས་ཡུན་དེ་ཙམ་འགོར་ཡང་ཕྱིར་ལོག་རྒྱུ་མི་འདུག དེ་རིང་འུ་གཉིས་རི་མགོ་སོང་ནས་བུ་གསུམ་པོ་གང་དུ་ཡོད་པར་བལྟ་དགོས་ཞེས་བཤད་བྱུང་ལ། རྒན་མོས་ཀྱང་འོ་ལགས་སོ་ཞུས་སོང་།

རྒད་པོས་རང་གི་རྔ་དེ་ཁུར་ནས་ཤར་རིར་སོང་། རྒན་མོས་རང་ཁྱིམ་གྱི་མཆིག་དེ་ཁུར་ནས་ནུབ་རིའི་རྩེ་ལ་སོང་། ཁོང་གཉིས་ཀྱིས་ཕྱོགས་གང་སར་བལྟས་ཀྱང་བུ་གསུམ་པོ་མ་མཐོང་མོད། བོད་སྐྱོང་བརྟན་མ་བཅུ་གཉིས་ཀྱིས་ཁོང་གཉིས་མཐོང་སྟེ་དམ་ལ་འདོགས་པའི་གོ་སྐབས་བཟང་པོ་ཞིག་བྱུང་སོང་།

ལྔ།

དགུན་ཁ་དེར། ཨ་མ་ན་བྱུང་བས། གྲོང་ཁྱེར་སྨན་ཁང་ལ་ཡོང་ནས་ཉི་མ་ཉི་ཤུ་ལྷག་ལ་སྨན་བཅོས་བྱས། ཨ་མ་ནད་ལས་ཐར་བ་ན། ཨ་ཕ་ཤིན་ཏུ་དགའ་བར་གྱུར་ལ། ང་རང་ཡང་ཤིན་ཏུ་དགའ་བྱུང་བས། གསོལ་ཁང་ཡག་པོ་ཞིག་ལ་སོང་སྟེ་ཕ་མ་གཉིས་ལ་གསོལ་སྟོན་བཤམས་པ་ཡིན།

“བཀྲ་ཤིས། ང་རང་དང་དགེ་འདུན་གཉིས་ཀ་མ་འགྲིག་ན། ཁྱོད་ཀྱི་བྱ་བ་ལ་བར་ཆད་ཡོད་དམ།”ཨ་ཕས་གློ་བུར་དུ་དེ་ལྟར་དྲིས།

“དགེ་འདུན་ཟེར་བ་དེ་དམངས་སྲོལ་པ་དགེ་འདུན་ཡིན་ནམ།”

“ཡིན།”

“གནོད་པ་ཡོད་མི་སྲིད། ཁྱོད་དང་དམངས་སྲོལ་པ་དགེ་འདུན་གཉིས་ལ་རྩོད་གཞི་ཅི་ཞིག་ཡོད།”ངས་ཧ་མི་གོ་བའི་ངང་ནས་དེ་ལྟར་དྲིས།

“ལོ་དུ་མའི་སྔོན་ལ་ངའི་དཔེ་ཆ་རྙིང་པ་དང་། ཐང་ག་རྙིང་པ། མཆོད་ཆ་རྙིང་པ་སྐོར་ཞིག་གཡར་རྗེས། ངས་ཡུན་རིང་ལ་འབྲེལ་གཏུག་བྱས་མོད། གཏན་ནས་སླར་སྤྲད་མ་སོང་། ད་སྐབས་དངོས་པོ་དེ་འདྲ་གཏན་ནས་གཡར་མ་མྱོང་ཟེར་བཞིན་འདུག”

“ཨ་ཕ། ཁོ་རང་གིས་ད་ལྟ་ད་དུང་དེ་ལྟར་བརྗོད་ན། ཁྱོད་ལ་ཐབས་ཇུས་ཡོད་དམ།”ང་རང་གི་སེམས་ཁམས་མི་བདེ་བར་གྱུར།

“དངོས་པོ་དེ་དག་སྤྲུལ་སྐུ་མཆོག་གྲུབ་ཀྱིས་མཚམས་སྦྱོར་གནང་བ་ལྟར་གཡར་བ་ཡིན། སྤྲུལ་སྐུ་མཆོག་གྲུབ་ད་ལྟ་གྲོང་ཁྱེར་འདི་ན་ཡོད། ཁོང་གིས་རང་ཉིད་དཔང་མི་བྱས་ཆོག་ཅེས་གསུང་བྱུང་།”

“དེ་འདྲ་ཡིན་ན་འགྲིག་འདུག”ངའི་སེམས་བདེ་ལ་བབས་སོང་།

“སང་ཉིན། ང་རང་གཞུང་ལས་ཁང་ལ་ཁོ་རང་འཚོལ་བར་འགྲོ་གྲབས་ཡོད། ཁྱོད་ལ་གནོད་པ་མི་འབྱུང་ངམ།”ཨ་ཕས་ཏན་ཏན་ཏིག་ཏིག་གིས་དེ་ལྟར་བརྗོད།

“གནོད་པ་ཡོད་མི་སྲིད། ཡོད་རུང་རང་གི་དངོས་པོ་རང་ལ་དབང་དགོས། འོན་ཏེ་ཁོ་རང་གིས་དངོས་པོ་དེ་དག་སྤྲོད་སྲིད་དམ།”ངས་ཨ་ཕ་ནི་དམངས་སྲོལ་པ་དགེ་འདུན་གྱི་དོ་ཟླར་མི་ཡོང་བསམ་བྱུང་།

“སྤྲུལ་སྐུ་ལགས་ཀྱིས་ང་ལ་ཁྲིམས་རྩོད་པ་ཞིག་བཙལ་ཡོད། ངས་ཁྲིམས་རྩོད་པ་དེ་ཁྲིད་ནས་སོང་ན་ཁོ་རང་གི་གཡོ་འོག་ལ་ཚུད་མི་སྲིད།”

“དེ་ཡག་པོ་རེད། ངས་རྡོ་རིང་སྤུན་གསུམ་གྱི་གཏམ་རྒྱུད་དེ་ཡི་གེར་བཀོད་དེ་ཁོ་ལ་ཕུལ་ཟིན། དེའང་ལེན་དགོས་སམ།”

“རྡོ་རིང་སྤུན་གསུམ་ལ་བརྟན་མ་བཅུ་གཉིས་ཀྱིས་ཚྭ་མཚོར་ཚྭ་ལེན་དུ་འགྲོ་མཁན་གྱི་མི་ཟོག་ལ་སྲུང་སྐྱོབ་བྱ་དགོས་ཞེས་བཀའ་བསྩལ་པ་ན། དེ་དག་གིས་ཚྭ་པའི་མི་ཟོག་ལ་མགོན་སྐྱབས་གནང་བཞིན་ཡོད་ལ། ཚྭ་པ་རྣམས་ཀྱང་ཚྭ་ལ་འགྲོ་དུས་རྡོ་རིང་ཡོད་སར་ཞག་བསྡད་བྱེད་སྐབས། རྡོ་རིང་ལ་ཚྭ་མཆོད་དེ་བཀའ་དྲིན་ཞུ་བཞིན་ཡོད། དགེ་འདུན་ཟེར་བ་དེ་མཁས་པ་ཞིག་ཡིན་པར་བརྗོད་མོད། ཚྭ་པ་ཕལ་བ་ཞིག་གི་སེམས་རྒྱའང་མི་འདུག”

“……”

ངས་ཨ་མའི་མདུན་གྱི་སྡེར་མར་ལུག་ཤ་ལེབ་མོ་ཞིག་འཇོག་གྲབས་བྱེད་སྐབས། ཨ་མ་ནི་ཨ་ཕ་ངེད་གཉིས་ཀྱི་གདོང་ལ་ཅེར་འདུག་པ་མཐོང་བས། ངེད་གཉིས་ཀྱིས་སླར་ཡང་ཨ་མའི་སེམས་ཁམས་དཀྲུག་བྱུང་སྙམ་སྟེ་དོགས་མི་བདེ་བར་གྱུར། །