བར་དོའི་རྣམ་ཤེས།

“སྐར་མ་ཚང་བ་དང་ལྷ་བུ་ཉི་ཟླ་ཚེ་ལས་འཕོས་སོང་།”

“འཕོ་བ་འདེབས་མཁན་སུ་ཕེབས་གདའ།”

“སྤྲུལ་སྐུ་པདྨ་ཧེ་རུ་ཀ་ཕེབས་འདུག”སྨག་རུམ་ཁྲོད་དུ་ངའི་རྣ་བར་ངུ་སྐད་ཀྱི་ཀློང་དུ་མི་སྙན་པའི་སྐད་ཆ་དེ་དག་མགར་ཚང་ནང་གི་མེ་སྟག་མཆེད་པ་ལྟར་གཅིག་འཕྲོར་གཅིག་མཐུད་སེམས་ལ་ཟུག་པ་ལྟར་བྱུང་བས་དངངས་འདར་ཞིག་ཤོར། ད་གཟོད་གཟེར་རྒོད་ཀྱིས་མི་བསྲོན་པའི་སྐབས་སུ་མིག་ལམ་དུ་སྨན་པ་ལྷུན་གྲུབ་ལགས་ཀྱིས་བདུད་རྩི་རིལ་བུ་སྦྱིན་པ་ནས་ཡང་བསྐྱར་གཟེར་རྒོད་ཐོ་ལུམ་འདྲ་བ་ཞིག་གིས་རྨི་ལམ་གྱི་ཞིང་དུ་ཁྲིད་པ་མ་ཡིན་ནམ། གློ་བུར་དུ་མི་རྣམས་ཀྱིས་ངའི་མིང་ནས་འབོད་ཅིང་ལྷ་བུ་ཉི་ཟླ་ཚེ་ལས་འདས་སོང་ཟེར་བའི་སྐད་ཆ་དེས། ང་རང་ཀྲོང་ངེར་རང་ཉིད་ཉལ་སའི་འཁྲིས་སུ་འགྲེངས་འདུག ངས“ང་ཤི་མེད། ང་ཤི་མེད།___”སྐད་འགྲགས་ཇི་ཙམ་ཆེ་རུ་བཏང་ནས་བོས་ཀྱང་མནའ་མ་ཟླ་བ་མིག་མཛེས་དང་ཨ་ཕ་རབ་ལྷ་གཉིས་ཀྱི་རྣ་བར་ཁྲོ་ཆུ་བླུགས་པ་ལྟར་ལས་ཅི་ཡང་ཐོས་མ་སོང་། དུས་རྒྱུན་ཡིན་ན་ཁང་པ་དེའི་ནང་བྲག་ཆས་བཀད་གྲབས་བྱས་པ་ལྟ་བུ་གྲོད་པ་ལྡིར་ལྡིར་ངོ་རོག་རོག་ཡོང་བ་ཞིག་བོས་ཡོད་བསམས་ཀྱང་སྐད་སྒྲ་དེར་བྲག་ཆ་ཡོད་མེད་ངས་ཀྱང་ཐོས་མ་བྱུང་། མ་གཞི་མི་ནི་འཆི་རྒྱུ་ཡིན་ཀྱང་འཆི་ལུགས་མི་འདྲ་བ་རྣམ་པ་བཅོ་བརྒྱད་ཡོད་པ་བཞིན་ང་རང་དོན་མེད་དུ་ཤི་སོང་བ་ཡིན་ནམ། ང་རང་དོགས་པ་ཟ་འགོ་ཚུགས།

མུན་ཁྲོད་དེར་ཁོང་གཉིས་ཉ་མོ་བྱེ་ཚན་བཏོན་པ་བཞིན་འགྲེ་ལོག་ལིང་ལིང་རྒྱག་གིན“ལྷ་བུ་ཉི་ཟླ་ཤོར་སོང་།”“ངའི་སྙིང་ཤོར་སོང་།”སྤྱང་ཚང་དུ་རྡོ་ཕོག་པ་བཞིན་ངུ་ཟུག་ལྷང་ལྷང་འདུག ཁང་པ་དེའི་ནང་སྐད་སྒྲ་དེ་ཙམ་ཡོད་པ་ཐོས་མ་མྱོང་། སྒོ་ཁའི་ཁྱི་རྣམས་ཀྱང་ངུ་ཟུག་ཏིང་ཏིང་གྱུར། མུན་ནག་ནང་དུ་ཁྱིམ་མཚེས་རྣམས་རྡིག་སྒྲ་དི་རིར་བང་མ་འདུར་གྱིས་ངེད་ཚང་གི་སྦྲ་སྒོར་སླེབས།“ཅི་མ་ཉེས་ནི་རེད།”“ལྷ་བུ་ཉི་ཟླ་ཚེ་ལས་འཕོས་སོང་། ཨོཾ་མ་ཎི་པདྨེ་ཧཱུྃ།”“་་་་་་་་་་”སྒོ་ཁར་སླེབས་པ་བཞིན་སྔོན་མས་རྗེས་མ་ལ་བཤད་པའི་སྐད་ཆ་རེད།

ང་རང་དེ་མ་ཐག་ཤི་བ་ཨེ་ཡིན་སྙམ་ནས་དངངས་སྐྲག་ཆེན་པོ་ཞིག་ཤོར་ཏེ་སྒོ་ཁར་བྲོས་ཀྱང་ཐལ་འཚུབ་མི་འདུག ད་དུང་དོགས་པ་དེ་བས་ཆེ་བ་ལངས་ཤིང་། བྱེ་མའི་ཐང་ཆེན་དུ་སོང་ཞིང་རྐང་རྗེས་ཨེ་འབབ་བལྟས། རླུང་ལས་ཡང་བའི་ལུས་པོར་གྱུར་འདུག་པས་བྱིའུའི་རྗེས་ཙམ་ཡང་ས་རུ་འབབ་མ་ཐུབ། ངས་བྱེ་མ་མཐོང་བ་ལས་བྱེ་མས་ངར་མཐོང་གི་མེད་པ་ལྟར་བྱེ་ཟེགས་ཀྱི་རྡུལ་ཙམ་ཡང་གཡོ་འགུལ་ཐེབས་མ་སོང་། ཁབ་འབུགས་གྲི་གསུམ་གྱིས་གཙགས་པ་ལྟར་འཇིགས་དངངས་ཀྱིས་ཤི་སོང་། ལྗོན་ཤིང་གི་ཡལ་གར་འཛེགས་ཤིང་གྲིབ་གཟུགས་ཡོད་མེད་བལྟས། སྐབས་དེར་ཉི་ཟླ་ཡོད་མེད་ཀྱང་ཚོར་མ་བྱུང་། ང་ནི་སྙིང་མེད་གསོབ་གསོབ་ཆུ་ཡི་དབུ་བ་ལྟར་གྱུར་འདུག་ཅིང་བྱ་གྲིབ་ཙམ་ཡང་ས་ལ་མ་བབས། ངོ་མ་ཤི་བ་ཞེས་པ་དེ་ང་ལ་བྱུང་བ་མིན་ནམ་སྙམ་ཞིང་སྙིང་ལ་ཐོག་བརྒྱབ་པ་ལྟར་དུམ་བུར་གས་པའི་སྣང་བ་བྱུང་བས། ཟླ་བ་མིག་མཛེས་མགུལ་ལ་འཁྱུད་ཅིང“ང་འཆི་མ་བཅུག ང་འཆི་མ་བཅུག”སྐད་འགྲགས་བཏང་། ཁ་དང་རྣ་གཏུགས་ནས་བོས་ཀྱང་ལན་མེད་པར་མོ་རང་སྔར་ལྟར་ས་ཁར་འགྲེ་ལྡོག་རྒྱག་གིན་ངུས། ཨ་ཕ་རབ་ལྷའི་དྲུང་དུ“ང་འདིར་ཡོད”སྐད་ཇི་ཙམ་ཆེ་རུ་བཏང་ཡང་གཟུགས་བརྙན་ལ་བོས་པ་ལྟར་ཨ་ཕ་རབ་ལྷས་ཅི་ཡང་གོ་མ་སོང་། ང་རང་དེ་ལྟར་གོ་མེད་ཚོར་མེད་ངང་ཁྱི་ཤི་ཝ་ཤི་ལྟར་ཤི་སོང་བ་ཡིན་ནམ། ང་རང་མི་ཚེ་བསྐྱལ་བ་ལས་བསྐྱལ་རྒྱུ་མང་ཡོད། ངས་མ་མཐའ་ཡང་ཨ་ཕའི་ཞབས་ཕྱི་དང་མནའ་མའི་བཟའ་ཟླ་དགོས་ཀྱི་ཡོད་བསམ་ཞིང་ང་རང་ཡང་འགྲེ་ལོག་བརྒྱབ་ནས་ངུས་པ་ཡིན།

༢

བུ་ནམ་མཁའི་གོ་ཆས་ཀྱང་ལག་ཏུ་སྤགས་རྡོག་ཅིག་བཅངས་ཤིང་ཟླ་བ་མིག་མཛེས་ངུ་བཞིན་པའི་འཁྲིས་སུ་མཆུ་རྫུབ་རྫུབ་ངང་ངུ་གྲབས་བྱེད་ཀྱིན་འདུག བུ་མོ་ལྕམ་ལྕམ་ནི་གོམ་པ་ཐར་ཐོར་འགའ་ལས་སྤོ་མི་ཤེས་པས་རལ་པ་འཇུར་བུ་ཟིང་ངེར་སྒྱེད་པུའི་འཁྲིས་སུ་ལངས་འདུག ཁོང་རྣམས་ཀྱི་ངུ་དོན་ཅི་ཡིན་ཤེས་ཀྱི་མི་འདུག ཁ་འཕྲེད་འཕྲེད་མིག་རུབ་རུབ་བྱེད་ལུགས་ལ་བལྟས་ན་མོ་ཡང་མཆི་མ་འཆོར་གྲབས་འདུག

ངས་ང་རང་གི་ཕུང་པོ་མཐོང་གི་འདུག མགོ་བོ་ནས་བཏེགས་ཤིང་ཡར་སློང་སྙམ་ཡང་ཞ་ཉེ་བླུགས་པ་ལྟར་གཡོ་འགུལ་ཅི་ཡང་མ་ཐུབ། ངའི་ཕུང་པོས་ལག་པ་གཅིག་གིས་ལྟོ་བ་སྐྱོར་ཞིང་གཅིག་གིས་ད་དུང་བདུད་རྩི་ལ་ལག་གཟེད་འདུག ང་རང་ད་དུང་ཤི་ཡོད་སྣང་མི་འཆར་ལ་གཡོ་འགུལ་མེད་པའི་གཟུགས་པོ་དེར་འཐམ་བཞིན་ཡུན་རིང་འགོར། ངོ་མ་ཤི་བ་ཡིན་པ་འདྲ་ང་རང་ཕུང་པོ་ལས་ཁ་བྲལ་ཞིང་རྣམ་ཤེས་ལ་གྱུར་འདུག་པས། ཕུང་པོའི་ནང་དུ་ཞུགས་ཅི་ཐུབ་བྱས་ཀྱང་ཕར་ཐལ་ཚུར་ཐལ་དུ་བུད་འགྲོ་བས་ཕུང་པོ་ལ་གཡོ་འགུལ་ཅི་ཡང་གཏོང་མ་ཐུབ།

སྐྱ་མདའ་གཏོང་མི་འདུག ངའི་མགོ་སྔས་ཁ་སྤྲོད་དུ་རྐྱང་གདན་སྟེང་དུ་སྤྲུལ་སྐུ་པདྨ་ཧེ་རུ་ཀས་ཞལ་ངོ་སྨུག་ལྟེམ་མེར《བར་དོ་ཐོས་གྲོལ》གསུང་གིན་གདའ།

“ཀྱེ་རིགས་ཀྱི་བུ་ལྷ་བུ་ཉི་ཟླ་ཉོན་ཅིག ད་ནི་ཁྱོད་ལ་འཆི་བ་ཞེས་བྱ་བ་དེ་བསླེབས་ནས་འདུག་པས།___”ར་འབའ་བའི་སྐད་དང་འདྲ་ཞིང་སྐབས་རེ་ལུད་པ་འཆོར་ཞིང་ཁོང་གི་གསུང་སྐད་དེ་ཙམ་སྙན་རྒྱུ་མི་འདུག

“ཀྱེ་མ། ནམ་མཁའི་ཁམས་རྣམས་དགྲ་རུ་མི་སྡང་ཞིང་། །

སངས་རྒྱས་མཐིང་གའི་ཞིང་ཁམས་མཐོང་བར་ཤོག །

ཆུ་ཡི་ཁམས་རྣམས་དགྲ་རུ་མི་སྡང་ཞིང་། །

སངས་རྒྱས་དཀར་པོའི་ཞིང་ཁམས་མཐོང་བར་ཐོག །___” དབྱངས་རྟ་རིང་པོ་ཞིག་ལ་དྲངས་ནས་དལ་བུར་བརྗོད་བྱུང་། སྐབས་དེར་ང་རང་ཤ་ཕོའི་ངུར་སྐད་འདྲ་བའི་དབྱངས་རྟ་དེར་ཅུང་ཡེངས་པ་འདྲ། མནའ་མའི་ངུ་སྐད་ཀྱིས་བར་དོ་ཐོས་གྲོལ་གྱི་དབྱངས་རྟ་དམའ་རུ་མནན་སོང་། ཞང་པོ་བརྩོན་འགྲུས་ཀྱིས་ཕོད་འཛར་དེ་རྒྱབ་ཏུ་ཕབ། ཐོད་རྩེད་ལྕང་ལོ་དེ་རྣ་ལྟག་ལ་དྲངས་ཤིང་སྤྲུལ་སྐུ་ལ་གསོལ་ཇ་འདྲེན་པ་དང་ཟླ་བ་མིག་མཛེས་བརྒྱལ་བའི་སྣ་སྒོར་ཕྱེ་བདུག་གཏོང་གིན་འདུག ང་ནི་མེ་མ་མུར་དུ་བཅུག་པ་ལྟར་སེམས་སྡུག་ཚད་མེད་པར་ཟླ་བ་མིག་མཛེས་བརྒྱལ་བའི་ཁའི་ནང་ཆུ་ཞིག་བླུག་བསམ་ཁ་གཏུགས་ཀྱང་ཕན་ཐོགས་མ་བྱུང་། ཁོང་རྣམས་ཀྱིས་ཚེ་འདས་སུ་བཀར་ཏེ་འཕོ་བ་འདེབས་པ་དང་གསུར་བསྔོ་བཞིན་འདུག་པ་སེམས་ཀྱིས་མ་བཟོད་པར་རྟ་རའི་ནང་དུ་སོང་། དུས་རྒྱུན་རྟ་ཕོ་གྲོ་འཛིས་ང་རང་མཐོང་བ་དང་ཧུ་ཧུ་ཞེས་རྣ་མཆོག་མདུན་དུ་བསྲིངས་ཡོང་བས། དེ་རིང་གཟན་ཐུར་རེ་རེ་བཞིན་ཡ་མཆུས་མོལ་མོལ་བྱེད་ཅིང་སྒྲུག་པ་ལས་ང་ལ་སྣང་བ་གཏོང་གིན་མི་འདུག ངས་མཐུར་མདའ་ནས་འཐེན་བསམས་ཀྱང་ཐུག་རེག་མི་འདུག་པས་མཐུར་མདའ་གཡོ་འགུལ་མ་བྱུང་། དེ་མ་ཐག་རྟ་ཕོ་གྲོ་འཛིའི་གདོང་པར་བྱུག་བྱུག་བྱས་ན་ཡང་གདོང་གི་སྤུ་རྐང་གཅིག་ཀྱང་འཕར་འཇགས་མ་བྱུང་བས་མཆི་མ་ཞིག་བྱང་ཁོག་ནས་འཁྱིལ་ཡང་གདོང་ནས་ལུད་རྒྱུ་མི་འདུག ད་ནི་ང་རང་གཅིག་པུ་མ་གཏོགས་མི་ཟོག་ཚང་མས་ང་ལ་ཁ་ཡ་བྱེད་མཁན་མེད་འདུག ཐ་ན་ངའི་ཡན་ལག་དང་ཉིང་ལག་གིས་ཀྱང་ངའི་བཀོད་པ་ཉན་གྱི་མི་འདུག་དྲན། ཨ་མའི་ལུས་རྟེན་བུ་མོ་ལྕམ་ལྕམ་ཁྲིད་ནས་ཐག་རིང་དུ་ལོག་ཨ་བསམ་ཞིང་པང་དུ་བཏབ་ཀྱང་ངའི་ལག་པ་ཉི་རྒྱ་བཞིན་ངའི་ཁར་མི་ཉན་པར་བུ་མོར་ཐུག་རེག་ཅི་ཡང་མི་འདུག བུ་མོས་ཀྱང“པ་པ”ཞེས་མཆུ་རློན་ཙིག་ཙིག་དེ་དུས་རྒྱུན་བཞིན་ཚུར་སྲིང་གི་མི་འདུག བུ་མོའི་ངོ་གདོང་གི་རལ་པ་དེ་སྣབས་འཛར་དུ་འབྱར་འདུག་པས། རྣ་ལྟག་ཏུ་འདེད་སྙམ་ཡང་ངའི་ལག་པ་ཤེད་ཤུགས་གང་ཡང་མེད་པར་སྐྲ་རྐང་དེ་དག་སྔ་མལ་དུ་ལུས་སོང་། ངོ་མ་སྙིང་ལ་མཚོན་བསྣུན་པ་བཞིན་སེམས་རབ་ཏུ་ཕམ་བྱུང་། དེ་ལྟར་འཇིག་རྟེན་ཚང་མས་རྒྱབ་གཏོད་བྱུང་བས་ད་ལྟ་རང་མར་མེ་བདས་པ་བཞིན་ནག་འཚུབ་བེར་ཤི་ན་བསམས་ཤིང་ཆོན་ཐག་གིས་མགུལ་པ་བསྡམས་གྲབས་བྱས་ཀྱང་ལག་རྡུམ་ཞིག་དང་འདྲ་བར་ལུས་སོང་། ང་རང་གློ་བུར་དུ་འཇིག་རྟེན་དཀར་ངོགས་སུ་སྡོད་མི་ཆོག་པར་འདི་ལྟར་ཤི་གསོན་ཁ་ཁར་བཀར་སོང་སྙམ་ཞིང་ལྕགས་ཁང་སྒོ་མེད་དུ་བཅུག་པ་ལྟར་མཆི་མ་རབ་ཏུ་འཁྲུགས་བྱུང་། ཡང་བསྐྱར་མནའ་མའི་སྐེ་ནས་འཁྱུད་ཅིང“ང་རང་འཆི་ལམ་དུ་མ་འདེད”ཞེས་བོས་ཀྱང་མོ་རང་ཅོ་ཐོ་མོ་རང་གིས་འབལ་བཞིན་ལན་བུ་ས་ཁར་བྱ་ནག་ཤི་རྗེས་ལྟར་གཏོར། ཁ་ཆུ་སྣ་ཆུ་ས་ཁར་ལུད་ཅིང་ངུ་བ་ལས་ང་རང་གཏན་ནས་མཐོང་གི་མི་འདུག མ་གཞི་ངའི་ལག་པ་མཐོང་རྒྱུ་ཡོད་ཀྱང་རེག་རྒྱུ་མེད་པར་དངོས་མེད་དུ་གྱུར་འདུག་པས་མནའ་མའི་མགུལ་ལ་ཐོགས་རེག་མེད་པར་ཞུད་ཡོང་བས་མོས་གཏན་ནས་ཚོར་སྣང་མེད་པ་འདྲ། ངས་མོ་རང་འགྲོ་དུས་རྐང་པར་འཐམས་པ་ཡིན། ལས་དུས་ལག་པར་འཆང་བ་ཡིན། སྡོད་དུས་པང་དུ་ཁེན་པ་ཡིན། ཉལ་དུས་རུམ་དུ་འཛུལ་བ་ཡིན། ཐ་ན་ཡང་སྣ་ནས་འཛུལ་ཞིང་ཁ་ནས་ཐོན། ངས་དེ་ལྟར་འཛུལ་ཡོད་སྙམ་པ་ལས་འཛུལ་ཡོད་མེད་ཀྱང་ཤེས་མ་བྱུང་། ང་ནི་མོ་ལ་ཤིན་ཏུ་འཁྲེང་ཡང་མོས་ཅི་ཡང་ཚོར་མ་སོང་། ང་ནི་འཇིག་རྟེན་འདིའི་ཕར་ངོགས་ན་ཉམ་ཆུང་གི་བླ་འཁྱམ་ཞིག་ཏུ་གྱུར་པ་ཤིན་ཏུ་ཕངས་བྱུང་། ང་སྐབས་རེ་འཇིག་རྟེན་སྟེང་ཡོད་ཡོད་འདྲ་ལ་སྐབས་རེ་མེད་མེད་འདྲ། ངས་ང་ངོ་མི་ཤེས་པར་གྱུར། ངོ་མི་ཤེས་པ་དེ་ང་ཡིན་ནམ། ངས་ང་བསྐྱུར་ཏེ་བུད་སོང་བ་འདྲ། ང་རང་གི་སྟེང་དུ་ཁོག་ཁྲོ་ལངས་བྱུང་། ཁོག་ཁྲོ་ལང་མཁན་དེ་སྐབས་རེ་ང་མིན་པ་འདྲ།

༣

ངས་མི་ཡུལ་གྱི་འདོད་དགུ་ལོངས་སྤྱོད་ཚང་མ་བསྐྱུར་ཏེ་ཕྱི་མ་གཤིན་རྗེའི་འཕྲང་རིང་ལ་འགྲོ་དགོས་སམ། ངས་དེ་ལྟར་བསམ་ཞིང་ཅོ་ཐོ་འབྲེད་བཞིན་མགོ་བོ་སར་བརྡབས་པ་ཡིན། དྲག་ཏུ་བརྡབས་པ་ཡིན། ཡོས་སྤུ་གཅོད་པ་བཞིན་བརྡབས་པ་ཡིན། པགས་པ་མཉེད་པ་བཞིན་བརྡབས་པ་ཡིན།

ང་རང་སེམས་རབ་ཏུ་ཕམ་བྱུང་། ངས་འཇིག་རྟེན་མི་ཡུལ་འདི་བསྐྱུར་ནས་ཤི་འདོད་མི་འདུག ང་གཏན་ནས་ཤི་མི་འདོད། ང་གཏན་ནས་མི་ཡུལ་ལས་ཁ་བྲལ་འདོད་མི་འདུག ཁོ་ཚོས་འཁོར་བ་སྙིང་པོ་མེད་ཟེར་བ་རྫུན་ཡིན། ང་ལ་སྙིང་པོ་ཡོད། ང་དེ་ལྟར་སྤུ་གྲིའི་ཚལ་ལ་འཛེགས་པ་བཞིན་སེམས་རབ་ཏུ་ཕམ་བྱུང་། ང་དེ་ལྟར་ང་རང་གི་ཕུང་པོའི་འཁྲིས་སུ་སྡུག་སྐད་བགྲང་བཞིན་མཚན་གང་རིང་ལུས།

ནམ་ལངས་བྱུང་། གྲོང་པ་རྣམས་དུད་པ་སྔོ་ཆི་ལེར་སྔར་ལྟར་ནོར་ལུག་ལྷས་ནས་ཕུད་སོང་། རྫི་རྒན་འགས་ཕུ་རུང་ལས་རིང་བའི་ཕྲེང་བ་རེ་ཁྱེར་འདུག གྲོང་སྨད་ནས་ཡིན་པའི་སྔགས་རྒན་ག་ན་ཀ་བསླེབས་འདུག་པས། ངའི་ཉལ་ཐུལ་ཕྱིང་པ་དང་དེའི་ཕྱི་ལ་བཀབ་པའི་ཕྱར་བ་གཉིས་ཀ་བཤུད་སོང་། “ཤི་མིག་གསོན་ལ་བལྟས་འདུག རྣམ་ཤེས་ལམ་ལ་མ་སོང་ཚར་བ་རེད”ཟེར་ནས་ངའི་མིག་ལྕིབས་མར་བཀབ་སོང་། ད་དུང་ཚེ་གང་སྐེ་ནས་བཤུད་མ་མྱོང་བའི་གཟི་མིག་དགུ་པ་དེ་དང་བླ་གཡུ་བཅས་པ་ལུང་ཐག་ནས་ཧྲག་སེ་བཅད་ཅིང་ཨ་ཕ་རབ་ལྷའི་ལག་ཏུ་བླུགས། ངའི་གཟུགས་པོ་དམར་ཧྲེང་ངང་ཁོ་ཚོའི་ལྟད་མོ་ལྟ་ཡུལ་གྱུར་འདུག

ང་རང་ཞེ་སྡང་མེ་ལྟར་འབར་ཞིང“ཁོ་རེ། ངའི་བླ་གཡུ་ཤུད་མ་འགྲོ”བཤད་ཅིང་ཁོའི་ལག་གཉིས་ནས་ཤུགས་ཀྱིས་འཐེན་ཡང་ཐོགས་རེག་ཅིག་གང་ནས་ཡོད། ཡང་ལྕི་རླུང་ཙམ་ཡང་མི་འདུག ད་དུང་ཁོས་ངའི་སྐེ་ནས་ངའི་སྐ་རགས་ཀྱིས་དམ་པོར་བསྡམས་ཤིང་མདུད་པ་ནག་པོ་དགུ་བརྒྱབ། ང་རང་དབུགས་ཀྱང་གཏོང་ལེན་ཇི་ལྟར་བྱ་བསམས་ནས་ཐག་པའི་བར་དུ་འཚང་ཡང་ཕན་ཐོགས་མ་བྱུང་། ཉེན་ཅན་ཞིག་སྲོག་ཁྲིམས་གཅོད་པ་བཞིན་བྲེང་པ་ཞིག་གིས་ལག་པ་གཉིས་ཀ་རྒྱབ་ཏུ་གཉའ་ལག་བཀུགས་ཤིང་བཅིངས། རྐང་པ་གཉིས་མཉམ་དུ་གཡག་བཤའ་ཁ་ལྟར་ཤ་ཚ་མེད་པར་བསྡམས་ཤིང་རྐུབ་སུག་གཏད་ནས་བཞི་བཀྱིགས་དྲུ་གུ་འདྲ་ཞིག་བྱས། ཕྲུག་ལྭའི་ཁུག་ཏུ་སྐྲ་སེན་ཙམ་ཡང་ཕྱི་ལ་མི་མཐོང་བར་སྡོང་ཐུར་དཀྲིས་པ་ལྟར་བཏུམས་ཤིང་སྲུབས་བར་སྐུད་པས་འཚེམས་བཞིན་འདུག ང་རང་སེམས་སྡུག་དང་ཞེ་སྡང་གིས་ཆུ་ཁོལ་ནང་གསོན་འཚོད་བྱས་པ་བཞིན་ཡུད་ཙམ་ཚོར་བ་འགག་བྱུང་།

༤

སླ་ངའི་ནང་དུ་བསྲེགས་པ་བཞིན་སྡུག་བསྔལ་དྲགས་པོ་རེ་མྱོང་བ་དང་ཇི་ལྟར་སོང་བ་མ་ཚོར་བར་སྨན་པ་ལྷུན་གྲུབ་ཀྱི་སྒོ་ཁར་སླེབས། ང་གསོད་མཁན་སྨན་པ་ཁོ་རེད་འདུག་པས། ཁོང་ཁྲོ་རབ་ཏུ་ལངས་ཀྱང་ལག་རྡུམ་ཞིག་ལྟར་བྱ་ཐབས་ཅི་རྙེད་འདི་རྙེད་མི་འདུག ཐ་ན་ཁོའི་ཕོར་པའི་ནང་དུ་སྐྱག་གཅིན་གཏང་བསམས་ཀྱང་ང་ལ་བཤང་གཅི་ཞིག་གང་ན་ཡོད། ང་དེ་ལྟར་འུ་ཐུག་ཐབས་ཟད་བར་བསྡད་ཅིང་ཕྱིར་མ་ལོག་ཅི་ལོག་རེད། ལྷུན་གྲུབ་ངེད་གཉིས་ཆུང་ནས་མཉམ་ཚར་ཡིན་པས་ཕན་ཚུན་འདྲིས་རྒྱུས་ཧ་ཅང་ཆེ། ཁོའི་སྨན་དྲིན་ལས་བྲག་ནག་ལུང་པའི་མི་ཟོག་རྣམས་མགོ་ཞ་ཞ་དང་ལྕེ་ནར་ནར་བྱེད། ངེད་ཚང་ཁ་ན་མཆུ་གཟེར་བྱུང་ན་རྩ་ཆུ་བསྟན་ས་ཁོ་ཡིན། ཁོའི་སྨན་ངོ་ལག་དྲིན་གྱིས་ངེད་ཚང་གི་གྲོ་མ་མར་ཁུ་དང་མར་ཟན་སོགས་ཟས་སྣ་ཡག་པ་རེ་ཡོད་ན་ཁོ་ལ་སྦྱིན། གཞོང་པའི་ནང་དུ་འབྲི་ཤའི་བྲང་མགོ། ལུག་ཤའི་ཚང་ར་བཞག་བཞག་ནས་ཡོད། ཟླ་བ་མིག་མཛེས་སྐྱེ་ཟུག་བརྒྱབ་དགོང་མར་ཁོ་རང་སྐད་གཏོང་ཡོད། ཁོས་མོའི་འགབ་སྣེ་ནས་འཐེན་ཞིང་མགོ་འཕྲུ་ཐོན་ཡོད་མེད་ལྟ་སྐབས་རྨོངས་སྤུ་འོད་ཆིལ་ཆིལ་དང་འདོམས་ཤ་ག་ཤོ་ཤོ་དེ་མཐོང་བ་དང་རང་དབང་མེད་པར་མཆིལ་མ་མིད་པར་དེད་དགོས་ཐུག ཁོས་མ་པང་གཡུ་མཚོའི་ཉ་ཤ་ཞིག་སྤྲད་སྐབས་ཆགས་སེམས་ཐོག་མ་དེ་ལྟར་ཤོར། ནམ་མཁའི་གོ་ཆ་ཆམ་རིམས་ཕོག་དགོང་མར་ཁོས་ཟླ་བ་མིག་མཛེས་ཀྱི་ཁ་པར་འབྲེལ་མཐུད་བྱས། ང་རང་བྲག་ནག་རྫོང་དུ་པགས་ཀོ་ར་ཤུན་འཚོང་བར་སོང་ཤུལ་ཁོས་ནམ་ཕྱེད་དུ་ཟླ་བ་མིག་མཛེས་རུམ་དུ་བཙན་ཤེད་ཀྱིས་འཛུལ། ངས་དེ་དག་རེ་རེ་བཞིན་མེ་ལོང་ནང་དུ་བལྟས་པ་ལྟར་མཐོང་བས་སྐབས་དེར་ང་རྒྱལ་འཕྱུར་ཆེ་བས་ཁོའི་མགོ་བོར་རྡོག་པས་འཁྲབ་བརྫིས་བྱས་ཀྱང་ཕན་པ་ཏིལ་འབྲུ་ཙམ་ཡང་མ་བྱུང་། ཐ་ན་ཁོའི་སྐྲའི་ལྕང་ལོ་ཙམ་ཡང་གཡོ་འགུལ་མ་བྱུང་།

ཁོས་དེ་ནས་བཟུང་སྟེ་ངའི་ཆུང་མ་ཟླ་བ་མིག་མཛེས་ལ་སེམས་ཤོར་ཅིང་ཉིན་གྱི་ཟས་དང་མཚན་ལ་གཉིད་མི་ཁུག་པར་གྱུར། ཁོས་ཟླ་བ་མིག་མཛེས་ཇི་ལྟར་དུང་བ་དང་ང་ལ་དེ་ལྟར་སྡང་གིན་འདུག ཁོ་རང་བུ་མོ་ལྕམ་ལྕམ་གྱི་ཕར་གྱུར་པ་དང་ང་རང་མེད་པར་གཏང་རྒྱུའི་སྦྱོར་བ་བརྩམས་འདུག ཉེ་ཆར་ང་རང་ཤ་དུག་བྱུང་བ་དང་ཁོས་ཞི་བྱེད་དྲུག་པ་ཞིག་སྤྲད་ནས་ཕྱིར་ཐོན། དེ་ནུབ་ཁོག་པའི་རྒྱུ་མ་རྒྱུ་རྩི་དང་བཅས་པ་བརྙང་ཞིང་མཚན་ནམ་རིང་ཐལ་སྤུངས་སྒང་དུ་ལུས། ཕྱི་ཉིན་ཁོ་རང་ཡང་བསྐྱར་སླེབས་འདུག་ལ་སྐབས་དེར་ང་རང་གཟེར་ངན་གྱིས་ཉལ་ས་རུ་མི་བརྟེན་པར་ཉ་མོ་བྱེ་ཚན་ལས་བཏོན་པ་བཞིན་འགྲེ་ལོག་རྒྱག་གིན་ཡོད། ཁོས་བདུད་རྩི་རིལ་བུ་ཡིན་ཟེར་ནས་རིལ་བུ་མངར་མོ་ཞིག་བྱིན་པ་དང་ང་རང་ཚོར་བ་འགག ཏག་ཏག་སྐབས་དེར་ཁོས་ང་ལ་རེ་དུག་དགུ་སྦྱོར་བྱས་པའི་དུག་རིལ་བྱིན་ནས་བསད་འདུག ཁོས་དུག་སྨན་དེ་རེའུ་ལུག་མང་པོར་ཚོད་ལྟ་བྱས་པ་མ་ཟད་གྲོང་སྨད་རྒན་མོ་དེའང་རེ་དུག་དགུ་སྦྱོར་གྱིས་བསད་འདུག རིག་པ་དགུ་འགྱུར་གྲུང་བའི་བར་དོའི་རྣམ་ཤེས་མིན་ན་ང་རང་དེ་ལྟར་བསད་པ་སུས་ཤེས་སྙམ་ཞིང་། སྙིང་དམར་སྐམ་པས་གཅུས་པ་ལྟར་ཞེ་སྡང་གིས་ས་གཞི་ཡོངས་རྫོགས་ནག་འཐོམ་མེར་བཏང་བྱུང་། དོ་ནུབ་ཁོའི་སེམས་ལ་ཉི་མ་ཤར་བ་དང་མེ་ཏོག་བཀྲ་བ་བཞིན་ཇི་ཙམ་དགའ་སྤྲོས་ཁེངས་ན་ངའི་སེམས་ལ་ས་འོག་རིམ་པ་དགུའི་ཞབས་སུ་མནན་ཞིང་ཚེར་མས་བཏུམས་པ་ལྟར་དེ་ཙམ་གཟེར་ཟུག་གིས་ཁེངས་ཡོང་བས། མུ་མཐུད་ཁོའི་བསམ་བློ་མཐོང་འདོད་མེད་པར་མིག་བཙུམས་ནས་བྲོས་པ་ཡིན།

༥

“ཧིག_ཧིག_ཧིག_”སྤྲུལ་སྐུ་པདྨ་ཧེ་རུ་ཀ་གདན་ཁ་ནས་འཕག་འཚག་རེ་དང་ཧིག་སྒྲ་རེ་བྲག་ཆ་འཁོར་བ་བཞིན་བརྗོད།ངའི་མནའ་མ་ཟླ་བ་མིག་མཛེས་དབང་པོ་རེ་གྲུང་པ་དང་ངའི་ཕུང་པོ་དེར་འཐམ་བཞིན་ངུ་འབོད་བྱེད་ཀྱིན་འདུག ངས་ངའི་ཕུང་པོའི་ཤ་གསེང་དུ་དིམ་པའི་བཀྱིགས་ཐག་གི་མདུད་སྣེ་རེ་རེ་བཞིན་ཨེ་འཁྲོལ་བལྟས་ཀྱང་མཛུབ་མོ་ཐོགས་རེག་མེད་པ་རླུང་བུ་ལྟར་བུད་འགྲོ། ངས་ཧིག་སྒྲ་རེ་རེ་ཐོས་དུས་དངངས་འདར་རེ་འཆོར་ཞིང་ཁྱིམ་ལ་འཁོར་མི་ཕོད།

བྲག་ནག་ལུང་པའི་ཡར་གྲོང་མར་གྲོང་གི་རྒན་རྒོན་རྣམས་ཀྱི་ངོ་གདོང་སྡུག་ར་རོ་ཙམ་ལུག་ཅིང་མཆོད་མེ་ཀོང་བུ་རེ་དང་། ཇ་མར་རྡོག་པོ་རེ་ཁྱེར། འཚང་ག་ཤིག་ཤིག་གིས་སླེབས་ཤིང་འགའ་རེས་ཨ་ཕ་རབ་ལྷའི་མགུལ་ནས་འཁྱུད་ཅིང་ངུ་རོགས་བྱེད། བུ་མོ་རྣམས་ཀྱིས་ཟླ་བ་མིག་མཛེས་འགྲམ་པར་སྐྱོར་ཞིང་མཆི་མ་འདོན་རོགས་བྱེད། ངས་མི་རེ་རེའི་མདུན་དུ“ང་ཤི་མེད། ང་འདིར་ཡོད།” རྫི་བོས་སྤྱང་ཀི་མཐོང་བ་བཞིན་ཀི་བཏབ་ཀྱང་ཁོ་ཚོས་སྦྲང་བུའི་སྐད་ཙམ་ཐོས་ཀྱི་མི་འདུག ཁོག་ཏུ་ལྒང་བུ་བཞིན་དབུགས་ཆེན་པོ་བསྐུམས་ཤིང་དུས་གཅིག་ཏུ་མགྲིན་པ་ནས་གཏོང་བ་ཡིན་ཡང་། ང་རང་གི་ཀི་འབོད་ང་རང་གིས་ཀྱང་ཐོས་ཀྱི་མི་འདུག ཞང་པོ་བརྩོན་འགྲུས་ཀྱིས་ལག་འདར་གྱིན“ལྷ་མོ་ཚང་། མར་རྒྱ་གང་རྒྱུན་དོ།༫[ གནའ་བོའི་འབྲི་སྲོལ་ཏེ། གཅིག་དང་ཕྱེད་ཀ་ལྟ་བུ་ཕྱེད་ཀའི་དོན་ཡིན།] ཇ་བག་ཆུང་༭_”མར་མེའི་འགྲུལ་ཐོ་ཞེས་ངའི་མེས་པོའི་མེས་པོས་བྲིས་པའི་དེབ་ཧྲུལ་འགོ་འཚེམ་ནག་ལྕིབས་དེ་ལ་དུད་གསར་རྣམས་ཀྱི་སྒོར་གྲངས་དང་མར་གྱི་རྒྱ་གྲངས་ཤོག་ངོས་དེར་ཁ་གསབ་མཐུད་ཀྱིན་འདུག ང་འདི་ལྟར་བར་དོའི་རྣམ་ཤེས་གྱུར་རྗེས་འཇིག་རྟེན་དཀར་ངོགས་ཀྱི་བྱིས་པའི་བྱ་བྱེད་ལྟ་བུར་མི་འདོད་ཅིང་གཏོར་བཤིག་གཏོང་དགོས་སྙམ་ཡང་བྱ་ཐབས་ཅི་ཡང་མི་འདུག ཐ་ན་འཇིག་རྟེན་རྫུན་མ་འདི་དྲིལ་སྒྲོག་བྱ་བསམས་ཀྱང་ངག་ལྐུགས་ནས་སྦྲང་མའི་གཤོག་རླབས་ཙམ་ཡང་མི་འདུག

སྟག་མོ་དགོན་པའི་གྲྭ་ཆུང་ཁ་ཤས་གདན་དྲངས། མདང་ནུབ་འཆང་བུ་བརྒྱ་རྩའི་རིམ་གྲོ་བཏོན་རྗེས་གཏོར་མ་དང་མར་མེ་མདང་ནུབ་བསྡུ་ལོང་རེད་མི་འདུག མར་མེ་དང་ཐག་ཉེ་བའི་གཏོར་རྒྱན་འགའ་རེ་མར་གུག་ནས་ཁྲལ་ལི་ཁྲུལ་ལིར་ཞུ། གཏོར་མ་འགའ་རེར་ཙི་ཙིས་སོ་བཏབ་རྗེས་ཧྲལ་ལེ་ཧྲོལ་ལེ་བཏང་བ་མཐོང་བས་སེར་སྣ་ཤོར་བྱུང་།

སྒོ་ཁར་སྔགས་པ་ག་ན་ཀས་ཟློག་གཏོ་བཅའ་བཞིན་འདུག ཟླ་བ་མིག་མཛེས་གསོལ་ཇ་འདྲེན་དུ་སྐྱོད་སྐབས་ཁོས་རྔ་བརྡུང་རྒྱུ་བརྗེད་ཅིང་ཟླ་བ་མིག་མཛེས་ཀྱི་གདོང་ལ་ཡེངས་འདུག སྒྲེའུ་དེ་ངའི་ཉལ་ས་རུ་བརྡབས། རལ་པ་ནག་སིགས་སེ་གཤེད་ཆས་ཚང་མ་ངའི་ཉལ་སར་བརྡབས་པ་དང་ང་རང་རྒྱང་རིང་པོར་བྲོས་པ་ཡིན། ཁོས་གཤེད་བཀུག་པར་བརྩིས་ནས་ཤིང་གི་བྱང་བུ་ལེབ་མོ་བུད་མེད་ཀྱི་ཐག་ལས་ཡོ་བྱེད་ལག་ཆ་ལྟ་བུ་ལབ་བེ་ལེབ་བེ་འགའ་མེ་ལ་བསྲེགས་སོང་ཡང་ངའི་གཤེད་མ་དངོས་ནི་སྨན་པ་ལྷུན་གྲུབ་ཡིན་མོད་ཁོ་ལ་གཡོ་འགུལ་བ་སྤུ་ཙམ་ཡང་བཏང་མ་སོང་། ངས་དེ་ལྟར་དྲན་ནས་སྒྲེའུ་དེ་ལྷུན་གྲུབ་ཀྱི་མགོ་ལ་རྒྱག་བསམས་ཀྱང་གཤེད་སྒྲོ་རླུང་ལྟར་འཛིན་རྒྱུ་མ་བྱུང་།

སྒོ་ཁར་མེ་ཁྲོལ་སྟེང་དུ་རྩམ་པ་རྒྱུན་ཆད་མེད་པར་བླུགས་ཤིང་གསུར་དྲིས་སྦྲ་རྡང་ལྷས་གསུམ་མ་ཚད་བྲག་ནག་ལུང་པ་གཞོབ་དྲིས་ཁྱབ། གསུར་དེ་ང་ལ་བསྔོས་པ་ཡིན་ཟེར་ཡང་ང་རང་ཕོ་བ་ལྟོགས་པ་ཕར་ཞོག་སྡུག་བསྔལ་ཁོག་གང་ནས་ཡོད་པས་གསུར་མེ་མཐོང་བ་དང་སེར་སྣ་ཞེ་སྡང་འདྲེས་མ་ཞིག་ལངས་ཡོང་། ངའི་ཕོར་པའི་ནང་དུ་ཕྱི་ལག་གིས་ཇ་བསྲུབས་མ་ཞིག་ལྡུག་སོང་བས་ང་རང་ཤི་བར་བརྩི་བ་དེ་ལ་སེམས་རབ་ཏུ་ཕམ་བྱུང་། མ་གཞི་ངའི་ཕུང་པོ་ཁོང་ཚོས་ངའི་གཤེད་མ་ཁྲམ་ལ་བཏབ་པ་བཞིན་བྱས་ནས་ཉལ་ས་རུ་བཞག་ཡོད་པས། བར་དོའི་བླ་འཁྱམ་ལ་རྒྱུ་མ་དང་ཕོ་བ་མེད་པར་འཁྱག་ལྟོགས་སྐོམ་གསུམ་གང་ནས་ཡོང་། མར་མེ་སྤར་སོང་། སྤོས་ཕུལ་སོང་། གཏོར་མ་བཅས་སོང་། གསུར་བསྔོས་སོང་།

༦

སྤྲུལ་སྐུ་པདྨ་ཧེ་རུ་ཀ་ཡིས་བར་དོ་ཐོས་གྲོལ་ཚར་གཅིག་བཀླགས་གྲུབ་ཅིང་ཉིན་གུང་གསོལ་ཟས་ཤ་ཁུ་གསོལ་བ་མཐོང་། ཤ་དེ་ངེད་ཚང་གི་འབྲི་མོ་གྭ་ཐོ་མ་བཤས་པའི་ཤ་རེད་འདུག འབྲི་མོ་གྭ་ཐོ་མས་མོའི་ཤ་ཁམ་རེ་བཟོས་པ་དང་རྭ་གཡུག་དང་འཕྲ་ཤགས་བྱེད་ཅིང་སྐོར་རྒྱུགས་གློད་ཀྱི་འདུག་ཀྱང་ཁོང་གིས་མཐོང་མ་སོང་། ཤ་ཁུའི་རླངས་པས་གདོང་གི་མིག་ཤེལ་ངོས་སུ་བ་མོ་སྐྱ་ཆིལ་ཆིལ་གཡོགས་སོང་། ཕྱག་ལག་གིས་མིག་ཤེལ་གདོང་ཁུག་ནས་ཡར་འདེད་ཙམ་བྱས་ཏེ་ཁ་པར་སྐད་མགོ་དམའ་མོར་བཏང་ཞིང་ལྟད་མོ་གཟིགས་བཞིན་ཞལ་ངོ་འཛུམ་ཙམ་འཛུམ་ཙམ་བྱེད་འོང་། ཁོང་གི་ཡིད་ལ་གྲོགས་མོ་བཙུན་མ་དེར་བརྙན་རིས་བཙོག་པ་ཞིག་སྐུར་བ་དང་ལན་ཅི་འདྲ་སྐུར་ཡོད་སྙམ་ནས་འཛུམ་ཆུང་ཤོར་སོང་། བཙོག་པ་ཟེར་ན་མི་ཆོག་སྟེ་ཆགས་པ་སློང་བྱེད་ཅིག་ཡིན་པས་མཆུ་ཙོག་ཙོག་འོ་བསྐྱལ་ལ་ཁད་ལྟ་བུ་ཞིག་བསྐུར་སོང་།

“ཀྱེ་མ། ཚེ་འདས་རིགས་ཀྱི་བུ། ཁྱོད་འོད་དཀར་པོ་བཀྲག་མདངས་ལྡན་པར་མ་སྐྲག་ཅིག ནག་པོ་བཀྲག་མེད་ལ་མ་བལྟ་ཞིག __”ཁོང་གིས་ནམ་ཉིན་མཚན་གཉིས་ལ་ཤྭ་ཕོའི་ངུར་དབྱངས་ལྟར་གསུངས་སོང་ཡང་འོད་དཀར་ནག་ཟེར་བ་ཞིག་མིག་གིས་མཐོང་སར་མི་འདུག ད་དུང་ཤི་གསོན་བྱེ་མའི་ལ་ཁ་ཟེར་བ་དེ་མཐོང་མ་སོང་། གཤིན་ཆུ་རབ་མེད། གཤིན་ལམ་སྐྱ་མོ། བར་དོའི་འགག་འཕྲང་། ཁོང་གིས་དེ་དག་ལ་མ་འཇིགས་མ་སྐྲག་པར་སངས་རྒྱས་དང་བྱང་ཆུབ་སེམས་དཔའི་ར་མདའ་དང་སྐྱེལ་མ་ཡོད་གསུང་བཞིན་མིག་ཟིམ་ཟིམ་ངང་སྨོན་ལམ་འདེབས་པའི་དཀའ་ཚེགས་བྱེད་ཀྱིན་འདུག་ཀྱང་། ང་རང་གི་མཐོང་ཡུལ་དུ་གཤིན་ཆུ་དང་གཤིན་ལམ་མི་འདུག ར་མདའ་དང་སྐྱེལ་མ་མི་འདུག དེ་འདྲའི་བདམ་ཁ་ཞིག་ཡོད་ན་ནོར་སྲིད་དམ། ཁོང་རྣམས་ལས་ང་རང་གྲུང་འདུག ང་རང་སྐད་ཅིག་ལ་གླིང་བཞི་རི་རབ་བསྐོར་བར་ཐོགས་པ་མེད་འདུག ཆུ་བོ་ཕར་ཚུར་གོམ་པ་སྤོ་དགོས་མི་འདུག དེ་སྔོན་ཤི་ཟིན་པའི་གྲོང་སྟོད་ཚང་གི་རྒན་རྒོན་ཚང་མ་མཐོང་གི་འདུག མ་ཟད་ལོ་སྔོན་མར་ཤི་བའི་ཁྱི་རྒན་རྒྱ་བོ་དེ་ཡང་ངུ་ཟུག་དི་རེར་འགྲོ་བ་མཐོང་། མི་རྣམས་ཀྱི་སེམས་ཁོང་ཅི་ཞིག་དྲན་པ་ཚུད་ཆད་མཐོང་གི་འདུག་ཀྱང་ཇུས་མེད་ཇུས་གཏོགས་རེད་བསམས་ནས་མ་བལྟས། མནའ་མ་ཟླ་བ་མིག་མཛེས་དང་ཨ་ཕ་རབ་ལྷའི་སེམས་ལ་དྲན་པ་རྣམས་མི་འདོད་བཞིན་དུ་ལམ་ལམ་འཆར་ཡོང་། ཨ་ཕས་བསམས་ན་ཟླ་བ་མིག་མཛེས་ཀྱིས་ཁོའི་ཆུང་མར་ཁས་ལེན་ཨེ་ཡོང་མི་ཡོང་། གལ་ཏེ་མོས་ཁས་མ་བླངས་ན་ཁྱིམ་ཚང་འཐོར་རྒྱུ་རེད་བསམ་འདུག ཟླ་བ་མིག་མཛེས་ཀྱིས་རབ་ལྷ་ནི་ལོ་ན་རྒས་ཀྱང་ལྷ་བུ་ཉི་ཟླའི་ཕ་ཡིན་པས་ཁོའི་ཆུང་མ་བྱས་ན་ཁྱིམ་ཚང་འདི་ཕ་ཤུལ་བུས་བཟུང་ཆོག་མོད། དེ་ལྟར་ཁོས་ཁས་ལེན་ཨེ་ཡོང་སྙམ་ཞིང་། ཕན་ཚུན་གཅིག་གིས་གཅིག་ལ་རྩ་བ་ནས་ངག་འཁྲོལ་གྱི་མི་འདུག ལྷག་པར་དུ་སྤྲུལ་སྐུ་པདྨ་ཧེ་རུ་ཀ་དང་སྔགས་རྒན་ག་ན་ཀ་ཡི་སེམས་ལ་ཅི་ཤར་བ་ལྷང་ངེར་མཐོང་ཡོང་། ཁོང་རྣམས་ཀྱིས་ཆགས་སྡང་རྨོངས་གསུམ་གྱི་རྟོག་པ་ཅི་ཞིག་ཤར་བ་ལྷང་ངེར་མཐོང་བ་དང་། ངའི་དད་པའི་ཞིང་ས་ན་དཀར་ལམ་ལམ་དང་དམར་ལམ་ལམ། ནག་ལམ་ལམ་གྱི་སྤྲིན་འཁྲིགས། གློག་འཁྱུགས། ཐོག་བརྒྱབ་བྱུང་བས་ང་རང་ཉིན་རེར་ཤི་ཐེངས་བརྒྱ་ལ་བསྒྱུར་སོང་། ངོ་མ་དམྱལ་ཁམས་བཅོ་བརྒྱད་འགྲིམས་པ་ལྟ་བུའི་སྡུག་བསྔལ་མྱངས་བྱུང་།

༧

ངའི་ཕུང་པོ་དེ་ཡང་ཅ་ལག་དབོར་བ་བཞིན་རླངས་འཁོར་དོས་སྒམ་དུ་བླུགས་སོང་། མགལ་དུམ་དང་སྟེའུ་ཤུག་པ་རྣམས་སྲུང་བཞི་ཡིན་ཟེར་ནས་ཁང་པའི་ཕྱོགས་བཞིར་བཀྲམས་སོང་། ཁོང་ཚོས་ཕུང་པོའི་ལྷན་དུ་ངའི་གོས་ལྷམ་རྣམས་ཤུལ་མེད་བཟོས་ཚར་འདུག ཐ་ན་ངའི་མིང་ཙམ་ཡང་ཕྱིར་ལོག་རྒྱུ་མེད་པར་རྒྱང་རིང་དུ་སྐྱེལ་བསམ་བཞིན་མཐོ་རིས་པོ་ཟེར་བ་ལས་ལྷ་བུ་ཉི་ཟླ་འབོད་མཁན་གཅིག་ཀྱང་མི་འདུག ཧོར་ལུགས་ལྟར་སྲིད་པ་ཧོའི་ཕྱག་རྒྱ་དཔར་བའི་རས་ལྷེབ་ཁྲུ་གང་ཙམ་ཞིག་རླངས་འཁོར་སྣ་འགོར་ལྷན་ཞིང་ཤག་པོ་ཁ་བཀྲས་མ་ཎི་བགྲང་བཞིན་རླངས་འཁོར་དེ་བྱ་འཕུར་བ་ལྟར་དུར་ཁྲོད་དུ་སྐྱོད་ཀྱིན་གདའ། ཟླ་བ་མིག་མཛེས་རླངས་འཁོར་རྗེས་ཀྱི་ཐལ་འཚུབ་དེར་བལྟས་བལྟས་ལ་དྲན་མེད་དུ་བརྒྱལ་སོང་། ང་རང་ང་རང་གི་ཕུང་པོ་ལ་སེམས་ཆགས་ཧ་ཅང་ཆེ་བས་ངུ་བཞིན་ཕུང་པོའི་མཉམ་དུ་རླུང་འཚུབ་པ་བཞིན་སོང་། ཞང་པོ་བརྩོན་འགྲུས་ཀྱིས་ངའི་ཕུང་པོ་དམར་རྗེན་མར་ཕུད་ཅིང་མི་ཁྲག་དང་མི་ཚིལ་གྱིས་དྲེག་པ་སྟུག་པོར་བསྒོས་པའི་དུར་རྡོའི་སྟེང་དུ་ཁ་སུབ་ཏུ་བཞག ནམ་མཁའི་བྱ་རྒོད་ལ་ལྟ་བཞིན་ངའི་ཕུང་པོ་ལམ་སོང་མེད་པར་གཏང་དགོས་སྙམ་ཞིང་བྲེལ་བ་ལངས་འདུག སྐད་ཅིག་ཏུ་ཐང་དཀར་ཐང་སྨུག་རྣམས་སྦར་མོས་མགོ་བོ་མར་བཀུགས། གཤོག་ཟུང་རྩེ་མོ་ལག་པའི་གྲུ་མོ་བསྐུམས་པ་ལྟར་བཀུགས་ཏེ་ནམ་མཁའ་ནས་རྡོ་ལྷུང་བ་བཞིན་ནག་ཐར་རེར་བཏིགས་ཡོང་། རྒོད་རྣམས་ཀྱིས་ང་རང་མི་མཐོང་བར་སྣ་ཤུ་དི་རིར་ཤ་འཆམ་རྒྱག་ཅིང་ངའི་རོ་ཐོག་ཏུ་རྒྱུག་འགྲོ། ལམ་སང་རོ་ཤུན་རྣམས་ཕྱིར་བཀབ་ཀྱང་མ་ཁོག་པར་ཀྲད་ཀྲད་ཀྲུང་ཀྲུང་ཟེར་ནས་མཆུ་ཏོས་ངའི་ཕུང་པོ་དམར་ཐར་རེར་གཏོར་སོང་། ཤ་རྡོག་རྣམས་བགོ་བཤའ་བརྒྱབ་པ་ལྟར་རྒོད་རེའི་ཨོག་མ་རུ་ཚོམ་བུ་རེ་བླུགས། ངའི་ཟུངས་ཁྲག་གིས་རྒོད་རྣམས་ཀྱི་མགོ་བོར་བཙག་བསྐུས་པ་ལྟར་ཁྲག་གིས་ཚོས་ཤིང་ས་གཞི་ཁྲག་འདམ་གྱིས་རློན་པར་བཟོས། ངའི་ཀླད་རྫིས་སྐྱ་ཡུ་ལེར་སྒལ་ཕྲེང་འབྱར་བ་ཞིག་ཐང་སྨུག་རྣམས་ཀྱིས་ད་དུང་འཐེན་བཞིན་འདུག ཞང་པོ་བརྩོན་འགྲུས་ཀྱིས“དུམ་བུ་གཅིག་པ་ཞིག་འདུག”ཟེར་ཞིང་ངའི་ཐོད་པའི་ཀ་ལི་བཀོག་ནས་ཁྱེར་བ་དང་ཁྲག་འགོས་པའི་རུས་པ་དུམ་བུ་ཞིག་ཤོག་ཆག་བརྒྱབ། ལྷག་མ་རྣམས་ཐོ་བས་རྡུང་ཞིང་གཙང་མར་བཟོས་ནས་བུད་སོང་། ཁྲག་གིས་འདམ་པ་བརྫིས་པའི་བྱ་རྗེས་གསེང་དུ་སྐྲ་རྐང་རེ་ཟུང་དང་ད་ནངས་ངའི་སུག་བཞི་བཀྱིགས་ཐག་བྱས་པའི་སྐ་རགས་རློན་པ་དེ་ལྷག་འདུག ང་རང་ཤི་ཐེངས་གཉིས་པ་བྱུང་བ་བཞིན་སེམས་རབ་ཏུ་ཕམ་ཞིང་མགོ་བོ་དུར་རྡོར་རྡེབ་རྡེབ་བྱས་ནས་ངུ་རྒྱང་འཐེན།

དུར་ཁྲོད་དེར་ང་དང་འདྲ་བའི་ཤི་བོ་རྩི་རྩི་གྲངས་མེད་ཅིག་ཕུང་པོ་འཐོར་བའི་སྡུག་བསྔལ་མ་བཟོད་པར་མགོ་བོ་སྔས་བཞིན་བསྡད་འདུག ང་རང་ཆུང་དུས་ནས་ཨ་མ་གྲོངས་སོང་བས། མ་ངོ་མི་ཤེས་ཀྱང་དེ་རིང་ཨ་མ་སྐར་མ་སྨིན་དྲུག་གིས་དུར་རྡོའི་དྲུང་དུ་སེ་ཡུ་ལེར་བསྒུགས་འདུག ན་ནིང་སྤྲུལ་སྐུ་པདྨ་ཧེ་རུ་ཀ་ཡིས་ཨ་མའི་རྣམ་ཤེས་ངའི་བུ་མོ་ལྕམ་ལྕམ་རེད་གསུངས་པ་དེ་ཧོན་ནག་པོ་དགུ་ལ་སངས་བྱུང་། ཨ་མས་ཨ་ཕ་ངེད་གཉིས་ཉིན་སྲུང་མཚན་སྲུང་བྱ་ར་བྱས་ཤིང་ང་རང་སྨན་ལོག་སྤྲད་སྐབས་སྨན་པའི་ལག་པ་ནས་ཐེན་ཡང་མ་ཐུབ་པར་ང་རང་ཤི་བ་ཤེས་འདུག ཨ་མས་ད་དུང་མི་ཡུལ་འདིར་མུན་ནག་དང་རབ་རིབ་ཅིག་ལས་མི་འདུག་པས་མུན་པ་འདི་མ་གསལ་བར་མི་ལུས་ལེན་མི་ཕོད་ཟེར། ངས་ཨ་མ་ལྟ་བུ་ཤི་བོ་མང་པོ་ཞིག་མུན་ནག་ལྟ་བུའི་མི་ཡུལ་འདིར་མི་ལུས་ལེན་མི་ཕོད་པར་བསྒུགས་ཡོད་པ་གཞི་ནས་ཤེས་བྱུང་། ཨ་མས་ཉིན་རེར་ཨ་ཕ་ངེད་གཉིས་སྐོར་བ་ཐེངས་རེ་བརྒྱབ་ཅིང་ཕྱིར་དུར་ཁྲོད་དུ་ལོག་གི་འདུག ང་རང་ཨ་མ་དང་འདྲིས་ཆ་དེ་ཙམ་མེད་པས་ཟླ་བ་མིག་མཛེས་དྲན་ཞིང་ཕྱིར་ཁྱིམ་དུ་ལོག་འདོད་སྐྱེས།

“ཞང་པོ་བརྩོན་འགྲུས་སླེབས་འདུག”ཅེས་ཁྱིམ་དུ་སྐད་བཏང་སོང་། ཨ་མཆོད་དབུ་ལ་སེ་ཐིག་ལྷུང་བ་དེས་ཆུ་བཤར་དང་མེས་བྲབས་ཀྱིས་ཞང་པོ་དང་ཤག་པོ་གཉིས་ཀའི་གོས་ལྷམ་སྲེག་གྲབས་བྱས་སོང་། ཞང་པོའི་སྐྲ་དང་ཁ་སྤུ་སེར་ཆི་ལེར་མེ་ལྕེས་ཚིག་འདུག་ཀྱང་ང་རང་ཕུང་པོ་འཐོར་བའི་སྡུག་བསྔལ་གྱིས་དགོད་རྒྱུ་མ་བྱུང་། ཟླ་བ་མིག་མཛེས་ཀྱིས་བརྩོན་འགྲུས་མཐོང་བ་དང་ངའི་གཟུགས་རིས་མཐོང་བ་བཞིན་མཆི་མ་བབ་སོང་། མོ་རང་མིག་ཡོངས་དམར་པོ་ཆགས་འདུག་ཀྱང་ད་དུང་མཆི་མ་ཆད་རྒྱུ་མི་འདུག མོའི་མཆི་མ་རེ་རེའི་ནང་དུ་ངའི་གཟུགས་བརྙན་རེ་འདྲེས་ནས་ས་ཁར་བཏིག་སོང་། གསུར་མེ་མཉམ་དུ་འདྲེས་ནས་ཚིག་སོང་། ཆུ་བོ་དང་མཉམ་དུ་འདྲེས་ནས་བཞུར་སོང་། མར་ཁུ་མཉམ་དུ་འདྲེས་ནས་འབར་སོང་། མོའི་མཆི་མ་་་་་་།

“མ་ངུ་། མ་ངུ་། ཤི་བོ་ལ་ཆོས་ངུ་དགོས་པ་ལས། མི་ངུས་པས་ཅི་ཕན།”བརྩོན་འགྲུས་ཀྱི་སྐད་ཆ་རེད།

“རེད་རེད། མ་ངུ་། མ་ངུ་། ངེད་གཉིས་ལ་བསོད་བདེ་མེད་པ་དེ་སྐྱེ་བ་སྔོན་གྱི་ལས་རེད། སྤྲུལ་སྐུས་རིམ་གྲོ་ནི་བསྒྲུབས། ལྷ་རྗེས་སྨན་ཁ་ནི་བྱས། བར་ཆད་མ་རེད་ཚེ་ཚད་རེད། སྐྱེ་བ་སྔོན་གྱི་བསྐོས་ཐང་རེད།”ཨ་ཕ་རབ་ལྷས་ཟླ་བ་མིག་མཛེས་ཀྱི་ཕུ་རུང་ནས་ཡར་འཐེན་བཞིན་སེམས་གསོ་བྱས།

༨

སྤྲུལ་སྐུ་པདྨ་ཧེ་རུ་ཀ་ཡིས་རིམ་གྲོ་བཏོན་པ་ནས་ཟླ་བ་མིག་མཛེས་ཀྱི་མིག་ཟུང་ལ་ཡང་ཡང་གཟིགས་ཤིང་། བུ་མོ་འདི་ཅི་འདྲའི་སྙིང་དུ་སྡུག་པ་ལ་ཨང་དྲན་བཞིན་ཡོད་རེད། ང་ཤི་རྗེས་བདུན་ཚིགས་རེ་རེ་བཞིན་ཟླ་བ་མིག་མཛེས་ཀྱི་ངོ་ལ་ཡང་ཡང་གཟིགས་བཞིན་གསུང་སྐད་སྙན་མོ་རེ་གསུངས། མོ་རང་སེམས་སྡུག་ཇེ་ཡང་དུ་སོང་ན་དགོང་མ་ཞིག་ལ་ཁོའི་ཟུར་མོར་རྟེན་ཨ་དྲན་གྱི་ཡོད་རེད། ང་རང་སྐབས་དེར་ཞེ་སྡང་ལྕགས་སྲེག་གི་གོང་དུ་ཆུ་གཏོར་བ་བཞིན་འབར་ཞིང་། ངའི་ཆུང་མ་སྙིང་དང་འདྲ་བ་འདི་སུ་གང་ལ་ཡང་འགྲོག་མི་བཅུག་སྙམ། ངའི་མིང་སྲིང་གཉིས། ངའི་རླངས་འཁོར། ངའི་གཟི་མིག་དགུ་པ།

ང་རང་མི་བསམ་དགུ་ལ་བསམ་ཞིང་ཡང་ཤི་ཡང་སོས་ལྟ་བུའི་སྡུག་བསྔལ་བྱུང་། སྤྲུལ་སྐུ་པདྨ་ཧེ་རུ་ཀའི་སེམས་སུ་ཕ་རྒན་འདིས་ཡོན་ཇི་ཙམ་འབུལ་ལམ། རྟ་ཕོ་གྲོ་འཛི་འཕོ་རྟ་ལ་འབུལ་ལམ། ཟླ་བ་མིག་མཛེས་ཀྱིས་ཁས་ལེན་ཡོང་ངམ། སྤྲུལ་སྐུའི་གཟུངས་མ་ལན་གཅིག་བྱས་ན་ཐར་བ་ཐོབ་པ་མོས་ཤེས་ཨེ་ཡོད་སྙམ་ཞིང་དབུ་ཕུར་ཕུར་མཛད་ཅིང་།

“ཆགས་ཞེན་འཁྲི་བ་ཀུན་བཅད་དེ། །

བདེ་བ་ཅན་གྱི་ཞིང་ཁམས་སུ། །

བྱ་རྒོད་རྙི་ལས་ཐར་བ་བཞིན། །

ཕྱི་བལྟས་མེད་པར་བགྲོད་པར་ཤོག།”སྐབས་དེར་ཁོས་དབྱངས་རྟ་དལ་མོས་བར་དོའི་སྨོན་ལམ་གསུང་གིན་འདུག གྲྭ་ཆུང་ཕུར་པ་སྐྱབས་ཀྱིས་ཁ་པར་ནས་ཟླ་བ་མིག་མཛེས་ངུ་བཞིན་པའི་པར་ལེན། སྐབས་རེ་ཀོང་བུ་གྲལ་དུ་སྒྲིག་པའི་མར་མེའི་པར་ཉེ་རིང་ཐུང་གསུམ་ནས་ལེན་བཞིན་འདུག ངས་ཁོང་ཚོ་ཨ་མཆོད་རེ་རེ་བཞིན་སེམས་ལ་ཅི་ཞིག་དྲན་པ་ལྟ་འདོད་མ་བྱུང་།

ཟླ་བ་མིག་མཛེས་སེམས་སྡུག་གིས་མནར་ཞིང་ཉིན་ལ་ཟས་དང་མཚན་ལ་གཉིད་མེད་པར་གྱུར། ད་དུང་མཚམས་རེ་ངུ་དགོད་འདྲེས་མ་ཅན་དུ་ཆགས། སྨན་པ་ལྷུན་གྲུབ་ཀྱིས་མར་མེ་སྐྱེལ་ཞོར་ཟླ་བ་མིག་མཛེས་ཀྱི་མཁྲིག་མའི་རྩ་ལ་བཅངས་ཤིང་ཨ་གར་སོ་ལྔ་ཞིག་བྱིན་སོང་། ཁོས་ང་ལ་རེ་དུག་དགུ་སྦྱོར་བྱིན་པ་མ་ཟད་ད་དུང་ཟླ་བ་མིག་མཛེས་ལ་ངོ་སོ་བསྟོད་བྱེད་དུ་བཟང་དྲུག་བྱིན་སོང་བསམ་ཞིང་ངའི་སྙིང་ལ་སོ་བྲད་བྱས་པ་ལྟ་བུའི་ན་ཟུག་སྐྱེས་ཤིང་ལྷུན་གྲུབ་མཐོང་བ་དང་ཞེ་སྡང་རབ་ཏུ་འབར་ཞིང་མགོ་བོ་རྡོ་ལ་བརྡབས་ཀྱང་འཆི་རྒྱུ་མི་འདུག

༩

བདུན་ཚིགས་གསུམ་པའི་སྟེང་དུ་སྤྲུལ་སྐུ་ལགས་ཀྱིས་ཟླ་བ་མིག་མཛེས་ལ་ཚེ་འདས་མཐོ་རིས་སུ་སྤར་ཡོད་གསུངས་པ་དང་དགའ་ཆེ་ཞིང་མཆི་མ་ལྷུག་ལྷུག་ཏུ་བཞུར། དེ་ནས་བཟུང་སྟེ་ཚེ་འདས་མཐོ་རིས་སུ་ཡོད་སྙམ་ཞིང་སྡུག་བསྔལ་རིམ་བཞིན་ཡང་དུ་སོང་། བདུན་ཚིགས་བཞི་པར་གདན་འདྲེན་པའི་དུས། མཐོ་རིས་ཞེས་པ་གང་ཞིག་ཏུ་ཡིན་པ་འདྲི་བསམས་ཀྱང་ཆོ་ག་སྒྲུབ་པའི་གཡོག་ལས་དང་སྒོ་ཁའི་ནོར་ལུག་རྣམས་འདོགས་གློད་ཀྱི་བྲེལ་བས་མ་ཁོམ། བདུན་ཚིགས་ལྔ་པར་ངེས་པར་འདྲི་ཨ་སྙམ་ཞིང་རིན་པོ་ཆེ་གཅིག་པུར་བཞུགས་པའི་གླགས་དང་བསྟུན་ནས་བསྒུགས། གསོལ་ཇ་དཀར་ཡོལ་གང་དྲངས་པ་དང་ཐུ་སྣེ་གཡས་པ་རྙུ་རིལ་འཛར་འཛར་སྐེ་རགས་བར་དྲངས་པ་དེ་མར་ཕབ་ཅིང་ཨོང་ཚུགས་བྱས་ཏེ་འཁུན་གཟེར་ཞིག་ཤོར་བ་དང“རིན་པོ་ཆེ”ཞེས་ཞུས་ཀྱང་ཁོང་གིས་འདས་པོའི་སྐོར་བདུན་ཕྲག་སྔོན་མ་ནས་མི་གསུང་བར་ཞལ་མོལ་གཞན་དག་ཕོ་མོའི་བརྩེ་དུང་སྐོར་གསུང་ཞིང་གད་མོ་ལྷུག་ལྷུག་ཏུ་མཆིས།

“ཝེ། ག་རེ།”སྤྱན་ཧུར་རེར་གཟིགས་པས་ཟླ་བ་མིག་མཛེས་མགོ་གུག་ཙམ་གུག་ཙམ་ལྕེ་སྣར་ངང་འདྲི་མ་ཕོད་པར་ཐེ་ཚོམ་དུ་ལུས། སྤྲུལ་སྐུ་ལགས་ཀྱིས་མོའི་མིག་ཀོང་མཆི་མས་བརྣང་བའི་གདོང་གི་མྱ་ངན་ལས། འདས་པོར་སེམས་སྡུག་བྱེད་པ་མཐོང་ཞིང་།

“སེམས་སྡུག་དགོས་མ་རེད། ཚེ་འདས་མཐོ་རིས་སུ་སྤར་ཡོད་ད། མཐོ་རིས་སུ་སྤར་ཡོད་ད།”མཛུབ་མོ་ཟླ་བ་མིག་མཛེས་ཀྱི་གདོང་པར་ཐུག་ལ་ཁར་སྲིང་བཞིན་གསུངས། ཟླ་བ་མིག་མཛེས་ངུ་དགོད་འདྲེས་མར“ལགས་སོ་ལགས་སོ”ཟེར་ཞིང་ཐོད་པ་ས་རུ་གཏུག་ཅིང་རྐྱང་ཕྱག་གྱང་འགྱེལ་བ་བཞིན་བཙལ་བྱུང་།

“སེམས་སྡུག་བྱས་ཤིང་མཆི་མ་བཏང་ན་འདས་པོའི་ལུས་ལ་ལྕགས་ཀྱི་ཆར་པ་འབབ་ཡོང་། དེ་བས་ང་ཚོ་སྐྱིད་པོ་བཏང་ན་འདས་པོ་ཁོང་གི་ས་ལམ་ལ་བར་ཆད་ཡོང་གི་མ་རེད།”དུས་རྒྱུན་འདས་པོའི་ནང་མི་ལ་དེ་ལྟར་གསུངས་ན་མཆི་མ་ཡུར་ཁ་བསྒྱུར་བ་བཞིན་ཆད་འགྲོ་བ་རྒྱུས་ཡོད་པས་སློབ་གསོ་ཡག་པོ་བརྒྱབ་ཡོད་སྙམ་ནས་འདུག

ང་རང་ཁོང་ཁྲོ་རབ་ཏུ་ལངས་ཏེ་ཁོང་གཉིས་བར་དུ་འཚང་ཞིང“ང་རང་འདིར་ཡོད་ངོ་ཚ་རྒྱུ་མེད་པའི་སྤྲུལ་སྐུ་ཁྱོད”ཟེར་ནས་འབོད་པ་དྲག་པོ་བྱས་ཀྱང་ཁོ་ཚོའི་སྣང་བར་རླུང་བུ་ཙམ་ཡང་ཡོད་ས་མི་འདུག བྱིས་པ་ལྟ་བུའི་ངའི་ཁྱིམ་མི་རྣམས་ངུ་དགོད་འདྲེས་མར་གྱུར་འདུག་པས། ང་དངོས་སུ་ཕྱིར་ལོག་སྟེ་བཤད་ན་སྤྲུལ་སྐུ་ལགས་ལ་དོགས་པ་ཙམ་ཡང་འཆར་མི་སྲིད། མ་གཞི་འཇིག་རྟེན་འདི་བྱིས་པ་ཞིག་རེད་འདུག་དྲན་ཞིང་ཧ་ཅང་སུན་བྱུང་།

“མཐོ་རིས་གང་ན་རེད།”ཟླ་བ་མིག་མཛེས་ཀྱིས།“རིན་པོ་ཆེ།”ལྕེ་སྣར་བཞིན་ཁ་ཆུ་སྣ་ཆུ་འཛར་ར་ར་ཞུས་སོང་།

“མཐོ་རིས་ཞེས་ནམ་མཁའི་དབྱིངས་སུ་ཤེལ་གྱི་ཁང་པ་ཕྱི་གསལ་ནང་གསལ་ཅན་དུ། འདོད་དགུའི་ལོངས་སྤྱོད་དཔག་ཏུ་མེད་པ། ལྷ་དང་ལྷ་མོའི་འཁོར་གྱིས་བསྐོར་བ། སྐར་མ་སྨིན་དྲུག་གི་ནང་དུ་སྐྱེས་ཡོད་རེད་ད།”ཟླ་འོད་ཀྱི་ངོས་སུ་དཔུང་པའི་ཤ་རྒོད་སྐྱ་ནར་རེ་བསྲིངས་ཤིང་ཕྱག་ལག་གཡས་ཀྱིས་མོའི་འགྲམ་པ་ནས་སྐྱོར་ཞིང་ཁོའི་བྲང་ཁར་སྦྱར་ལ་ཁད་བྱས་ཏེ་མོའི་སྣ་ལམ་དུ་སྤོས་དྲི་ཆིལ་ཆིལ་འཐུལ་བར་བཅིར་བྱུང་།

“རིན་པོ་ཆེ། བཀའ་དྲིན་ཆེ། བཀའ་དྲིན་ཆེ།”ཟླ་བ་གཅིག་རིང་ངུས་པས་རྫ་རྐུབ་ལས་ནག་པའི་གདོང་པ་ནས་སོ་མདངས་དཀར་ཧྲིག་ཧྲིག་ངང་ཟླ་བ་མིག་མཛེས་གད་མོ་བགད་བྱུང་། ཅུང་ཙམ་མིན་ན་སྤྲུལ་སྐུའི་བྲང་ཁར་མཆུ་སྦྱར་སོང་། དེ་མ་ཐག་ནམ་མཁའི་གོ་ཆ་མཐོང་བ་དང་པང་དུ་བཏབ་ཅིང་འོ་ཡང་ཡང་སྦྱར་ཞིང་། “རབ་ལྷ། འདས་པོ་མཐོ་རིས་སུ་སྐྱེས་འདུག མཐོ་རིས་སུ་སྐྱེས་འདུག” འབོད་བཞིན་འདུར་མ་རྒྱུག་ལ་སོང་།“ཨ།” ཨ་ཕ་རབ་ལྷའི་མིག་སོ་གྲུང་དུ་སོང་ཞིང་།“མཐོ་རིས་ཨེ། ག་བ་རེད།”དེ་མ་ཐག་ཟླ་བ་མིག་མཛེས་མཛུབ་མོ་གནམ་དུ་བསྒྲེངས་བྱུང་། དགོང་མོ་དེར་ཨ་ཕས་གནམ་ལ་ཡང་ཡང་ལྟ་བཞིན་སྐར་མ་སྨིན་དྲུག་སོགས་སྐར་ཚོགས་ཁྲ་ལྷམ་མེར་མཐོང་། མ་རྒན་སྐར་མ་སྨིན་དྲུག་གྲོངས་པ་ནས་དགོང་མ་རེ་རེ་བཞིན་ནམ་མཁའི་སྐར་མ་སྨིན་དྲུག་ཐེངས་རེ་བལྟ། ན་ནིང་བུ་མོ་ལྕམ་ལྕམ་སྐྱེས་པ་ནས་ཨ་ཕས་གནམ་ལ་བལྟས་མ་མྱོང་། དོ་ནུབ་སྐར་མ་སྨིན་དྲུག་མཐོང་བ་དང་མ་རྒན་མཐོ་རིས་པོ་ཡིད་ལ་འཁོར་ཡོང་། ལྷ་བུ་ཉི་ཟླ་གང་ཞིག་ན་སྤར་ཡོད་དམ་སྙམ་ཞིང་མ་ཎི་འདོན་རྒྱུ་ཇེ་ཉུང་དུ་གྱུར་ཏེ་སྐར་མ་རེ་རེ་བཞིན་མིག་འབྱེད་འཛུམ་མེད་པར་བརྩིས་པས། སྐར་མ་སྨིན་དྲུག་ནང་དུ་སྐར་འབྲུ་གཅིག་འཕར་མར་སླེབས་པ་མཐོང་ཞིང་ལྷ་བུ་ཉི་ཟླ་ལྟ་བུ་ཁྲ་འཚེར་རེ་མངོན་ཡོང་། “སྨིན་དྲུག་ནང་དུ་སྐར་མ་གཅིག་འཐོར་བ་སླེབས་འདུག ལྟོས་ར། ལྟོས་ར།” ཨ་ཕ་རབ་ལྷ་ཁོག་པ་འོ་མས་རྒྱགས་པ་ལྟར་དཀར་ལྟེམ་མེར་གྱུར་ཅིང་ཟླ་བ་མིག་མཛེས་ཀྱི་ཕྲག་ལྟག་ནས་བཟུང་ཞིང་སྐད་བརྒྱབ། ཁོ་རང་བྱིས་པ་ཞིག་ལྟར་ངུ་དགོད་འདྲེས་མར་ལུས་པོ་དར་ལྕོག་རླུང་གིས་བརྡབས་པ་ལྟར་ལྷབ་ལྷབ་འདར་བྱུང་།

ཉིན་གུང་དེར། ཟླ་བ་མིག་མཛེས་སེམས་ཤིན་ཏུ་སྐྱིད་ཅིང་རྐང་འཁྲབ་ལག་འཁྲབ་ངང་བྱིས་པ་ཞིག་གི་ཚུགས་ཀར་གྱུར་འདུག རིན་པོ་ཆེ་ཁོང་སངས་རྒྱས་གསོན་པོ་དངོས་ཡིན་དྲན་ཞིང་དད་པའི་རླབས་ཕྲེང་ལ་རེ་བའི་མེ་ཆེན་འབར། སྤྲུལ་སྐུ་ལགས་ཀྱི་རྟ་རྫི་ཁྱི་གཡོག་ཡིན་ཡང་ཤི་ན་འཇའ་འཆར་ཞིང་གསོན་ན་བྱིན་རླབས་འཐུལ་ཡོང་དྲན་ཞིང་དད་པའི་སྤུ་ལོང་ཤ་གསེང་རུས་གསེང་ནས་འདར་འཁྱོམ་འཁྱོམ་དང་སྦྲིད་ཐམ་ཐམ་གཡོས། ཉིན་མཚན་དུས་དྲུག་གསོལ་བ་བཏབ་ན་ཐུགས་རྗེའི་ལྕགས་ཀྱུ་སྙིང་ནས་དྲངས་ཏེ་མོ་རང་ཤི་རྗེས་ལྷ་བུ་ཉི་ཟླའི་མཉམ་དུ་མཐོ་རིས་སུ་སྐྱེས་ན་བསམ་ཞིང་ལུས་ཡོངས་ཚ་འཁྱུག་རྒྱབ་པ་ལྟར་སྐྲ་མཚམས་ནས་རྔུལ་ཆུ་འོད་ཙིག་ཙིག་བཞུར། ལུས་པོ་ཡོངས་རྫོགས་རློན་ཆིལ་ཆིལ་གྱུར་པ་དང་ལག་མཐིལ་དུ་རློན་ནེམ་ནེམ་ཆགས། མཐོ་རིས། མཐོ་རིས་ཞེས་ཁ་ནས་བར་མེད་བགྲངས།

༡༠

ཉི་མ་ནུབ་རིར་སྤྲིན་ནག་གི་རུམ་དུ་ལྷུང་འདུག་པས་ས་གཞི་ཚང་མ་མུན་ནག་གི་ཁ་ཟས་སུ་གྱུར། རྔ་སྒྲ་དང་གསུར་དྲི་རླུང་བུ་དང་སྡེབ་ཅིང་མུན་ཁྲོད་དུ་ཡལ། ང་རང་རླུང་བུ་བཞིན་སྡོད་སའི་གནས་དང་འགྲོ་སའི་ཁ་ཕྱོགས་མེད་པར་རི་ཐང་ཀླུང་གསུམ་འཁྱམ། ཚ་སོབ་སོབ་ཀྱི་ཁྱིམ་གཞིས་བསྐྱུར་ནས་གཤིན་ཡུལ་སྐྱ་མོ་འགྲིམ་དགོས་པའི་སྡུག་བསྔལ་གྱིས་འཁྱག་ལྟོགས་སྐོམ་གསུམ་གང་ཡང་མི་ཚོར། ཁྱིམ་དུ་སྡུག་སྒུར་བྱས་ན་ཁོང་ཚོས་མི་ཤེས། གྲོགས་པོའི་སར་འཁྱམས་ན་ཁོང་ཚོས་མི་མཐོང་། གྲོགས་མོའི་འཁྲིས་སུ་སོང་ན་མོས་མི་ཚོར། ཤི་གསོན་བར་གྱི་བར་དོའི་འབབ་ཚུགས་འདིར་ཇི་འདྲའི་སྡུག་བསྔལ་ཞིག དེ་བས་གདོས་བཅས་ཀྱི་ཤ་ཁྲག་ཁུར་ཞིང་ནག་འཐོམ་འཐོམ་གྱི་མཚན་འགྲུལ་ལྟ་བུའི་མི་གྲས་སུ་ཞུགས་ན་ཧ་ཅང་འདོད་སོང་། འཇའ་རྗེས་འདེད་པའི་བྱིས་པ་བཞིན་ཁྱར་ཁྱོར་ངང་སྨུག་ལོང་ཁྲོད་དུ་ཞུགས་ན་ཧ་ཅང་འདོད་སོང་། ཟླ་འོད་ཁྲོད་ཀྱི་ལྷ་བ་ལྟར་ལད་མོའི་འཁྲབ་སྟོན་དུ་ཞུགས་ན་ཧ་ཅང་འདོད་སོང་།

མཆོད་ཁང་དུ་སྤྲུལ་སྐུ་ལགས་ཆབ་བསིལ་འབྱོན་ཞོར་ངའི་དཔེ་ཆ་རྣམས་ཕར་སློག་ཚུར་སློག་བྱེད་ཀྱིན་འདུག ༡༩༩༦ལོའི་《 སྦྲང་ཆར》དེབ་གསུམ་པའི་ངོས་ཀྱི་མཛེས་མའི་པར་རིས་མཐོང་ཞིང་སེམས་ནང་དུ་གཡའ་སྒོག་པ་ལྟར་འཛུམ་ཤིག་ཤིག་འཕྱུར་བ་དང་ལམ་སོང་ཕྱག་ཏུ་བླངས། འདི་ནི་མཁའ་འགྲོ་མ་ཞིག་གི་པར་རིས་མིན་ནམ་སྙམ་ཞིང་། དེབ་ངོས་གཡས་གསེག་གཡོན་གསེག་ཇི་ལྟར་བྱས་ཀྱང་ཟུར་མིག་དེ་ཁོང་ལ་བལྟས་པ་ལྟར་འདུག་པས་པར་མིག་དེ་གསོན་པོ་ཡིན་སྣང་ཤར། གློ་བུར་དུ《 རྒྱོ་འདོད་སྐྱེས་བུའི་གདུང་སེལ》གྱི་དཔེ་ཆ་དེ་ཐང་དུ་ལུག་སོང་། སྤྱན་ཆེ་ཙམ་གདོང་ཞིང་རྒྱོ་འདོད་སྐྱེས་བུའི་གདུང་སེལ་ཞེས་ཁ་བྱང་དེ་དབུགས་ཐེངས་གཅིག་ལ་བཏང་ཞིང་འདོད་པའི་བསྟན་བཅོས། ངོ་མ་འདོད་པའི་བསྟན་བཅོས་རེད་འདུག་དྲན་ཞིང་དེ་མ་ཐག་མི་གཞན་གྱིས་མཐོང་ཡོད་མེད་ཕར་ཚུར་གཟིགས་ཙམ་གནང་ནས་རུམ་དུ་བཅུག ལོ་མང་རིང་ཐོས་ཀྱང་ལྟ་མ་མྱོང་བའི་འདོད་པའི་བསྟན་བཅོས་ངོ་མ་དེ་རིང་ལྷ་ཡིས་གནང་བྱུང་སྙམ་ཞིང་བྲང་ཁར་ཕུར་ཕུར་མཛད།

ང་རང་དུས་རྒྱུན་ཁ་འདོན་ལྟར་ལྟ་མྱོང་བའི་བཞེད་པའི་རྡོ་རྗེའི《 རྒྱོ་འདོད་སྐྱེས་བུའི་གདུང་སེལ》ནག་ལྕིབས་དེ་སྤྲུལ་སྐུ་ལགས་ཀྱིས་ཡང་དང་བསྐྱར་དུ་བཀླགས། ཚིག་རེ་རེ་བཞིན་བློ་ལ་ངེས་པ་དང་གཅིན་པ་གཏོང་དུ་ཐེངས་ལྔ་དྲུག་ཕེབས་སོང་། ནམ་སྨད་ཟླ་བ་མིག་མཛེས་ཀྱི་རུམ་དུ་ཚུལ་ཁྲིམས་དྲི་མ་ཆི་ལེར་འཛུལ། སྐབས་དེར་ང་རང་ཞེ་སྡང་ལངས་ཆེ་བས་ཐག་རིང་དུ་བྲོས་པ་ལས་ཐབས་ཤེས་མི་འདུག མིག་འཚུམ་བཞིན་བྲོས་ཀྱང་ཁོང་གཉིས་ཀྱི་བྱ་སྤྱོད་གསལ་པོ་མཐོང་ཡོང་། དེ་དུས་ངའི་སྙིང་གཡུག་པའི་རྡིག་སྒྲ་ཏིག་ཏིག་ཐོས་ཡོང་།

༡༡

བུ་མོ་ལྕམ་ལྕམ་མཐོང་བ་དང་མཆི་མ་ཤམ་ཤམ་བཞུར་བྱུང་། བཞུར་བྱུང་ཟེར་ཡང་མིག་ཀོང་ནས་སྐམ་ཞིང་གདོང་ནས་འགྲིམ་རྒྱུ་མ་བྱུང་། སྙིང་ཁྲག་ལས་སྨར་བའི་བཟའ་ཟླ་དང་ཨ་ཕ། ད་དུང་མཆོད་ཡུལ་དུ་བཞུགས་པའི་སྤྲུལ་སྐུ་ལགས་ཀྱི་སེམས་ཁོང་ན་ཅི་ཞིག་འཆར་བ་དམར་རྗེན་དུ་མཐོང་ཡང་ལྟ་ཕོད་མ་བྱུང་། ངེད་ཚང་གི་ཨ་ཕ་དང་མནའ་མ་ནི་དད་པ་དང་ཡིད་ཆེས་ཀྱིས་མིག་ཡོད་ཀྱང་མཐོང་རྒྱུ་མེད་པར་ཡོད་ཚད་བསྒྲིབས་ཚར་འདུག ང་རང་ཤི་བའི་སྡུག་བསྔལ་གྱིས་འཇིག་རྟེན་གཞན་ཞིག་ཏུ་འགྲོ་ཨ་བསམས་ཀྱང་འགྲོ་ས་མི་འདུག ཨ་མའི་མཉམ་དུ་དུར་ཁྲོད་ནང་སྡོད་འདོད་མེད་པར་ཁང་ཁྱིམ་ཉེ་སྐོར་དུ་ཁྱི་འཁྱམ་ཞིག་ལྟར་ཡང་ཡང་མྱུལ། ད་ནི་ཅིས་ཀྱང་བྲག་ནག་ལུང་པར་མི་ལུས་ལེན་དགོས། གློ་བུར་དུ་ཕ་མ་འཚོལ་རྒྱུ་དྲན་བྱུང་། མོ་གཞོན་དེའང་མི་འདུག་བུ་སྣོད་བཀག་བཞག བུ་མོ་དེའང་མི་འདུག་བུ་སྣོད་བཙེམས་བཞག མནའ་མ་དེའང་མི་འདུག་བུ་སྣོད་བཀོག་ཚར། བྲག་ནག་ལུང་པར་ཕ་མ་བྱེད་ཆོག་པའི་བུ་སྣོད་ཡོད་པའི་བུ་མོ་གཅིག་ཀྱང་རྙེད་ཀྱི་མི་འདུག དེ་སྔོན་དགའ་རོགས་བུ་མོ་དེ་དག་ཁྱོ་ག་རེ་དང་མཉམ་དུ་རྩེད་དགའ་དགོད་བཞིན་འདུག་ཀྱང་བུ་སྣོད་མ་བཀག་པ་གཅིག་ཀྱང་མི་འདུག ཁྱོ་ག་མེད་པའི་མོ་ཡན་རྣམས་བུ་སྣོད་བཀག་པ་ཁག་མི་འདུག་ཁོ་ཚོ་ནལ་བུ་རེ་སྐྱེས་ན་མི་གྲལ་དུ་ཚུད་པའི་ཁ་ཡིག་མི་རྙེད་པའི་དོན་རེད། ཡར་གྲོང་ནང་གི་ཇོ་མོ་དེ་ཡང་བུ་སྣོད་བཀག་པ་མཐོང་བས་དང་པོ་ཧ་དམར་པོ་ལས་ཀྱང་། མཐར་སེམས་རབ་ཏུ་ཕམ་བྱུང་། མོ་རང་ཁག་མི་འདུག སྤྲུལ་སྐུ་ལགས་ཀྱིས་མོའི་སྡོམ་པ་ཕྲོགས་རྗེས་མོ་ལ་ཕྲུ་གུ་འཁོར། སྤྲུལ་སྐུའི་བཀའ་ལྟར་བྲག་ནག་རྫོང་སྨན་ཁང་དུ་སྦྲུམ་མ་བཀོག་ཅིང་སྦྲུམ་འགོག་ལྕགས་ཀྱི་ཨ་ལོང་འཇོག་དགོས་ཐུག་ཡོད། བུ་སྣོད་མ་བཀག་པར་རང་དབང་དུ་བཞག་པ་ཟླ་བ་མིག་མཛེས་མ་གཏོགས་གཅིག་ཀྱང་ལྷག་མི་འདུག གློ་བུར་དུ་ཟླ་བ་མིག་མཛེས་ཨ་མ་བྱེད་རྒྱུ་བྱུང་ན་བསམ་པའི་སྣང་བ་ཤར་བྱུང་། དོ་ནུབ་སྤྲུལ་སྐུ་པདྨ་ཧེ་རུ་ཀ་བཞུགས་འདུག་པས་ཐབས་ཤེས་ཤིག་ཨེ་ཡོད་སྙམ་ཞིང་བསྒུགས། ཁྱིམ་ཚང་དེར་ཉིན་གང་མི་ཚོགས་ཀྱི་འདུ་ལོང་དེ་ཅུང་ཙམ་འཇགས་འདུག་ཀྱང་། མར་ཁུའི་དྲི་མ་དང་། གསུར་དྲི། གཏོར་དྲི། ཇ་དྲི། ཤ་དྲི་བཅས་ད་དུང་སྒོ་ཁ་ནས་ཁྱབ་བཞིན་འདུག ཟླ་བ་མིག་མཛེས་མཆོད་མེ་སྦར་བ་དང་གཏོར་མ་མཆོད་པ། གསུར་བླུག་པ་བཅས་བྲེལ་བ་ཚུབ་ཚུབ་འདུག

༡༢

མུན་པས་ས་གཞི་ཡོངས་ལྕགས་རྨོག་གཡོག་པ་ལྟར་ནག་ངབ་བེར་བསྒྱུར། སྦྲ་ནག་གི་རུམ་ཁ་ནས་འཚེར་བའི་དཀར་མེ་རྣམས་རེ་རེ་བཞིན་མིག་བཙུམ་པ་ལྟར་གཟིམས་སོང་། ངེད་ཚང་གཅིག་པུ་མར་མེའི་འོད་མདངས་སྐྱ་བོང་བོང་མཚན་མོ་སྨག་རུམ་ནང་གི་འདྲེ་མེ་འབུད་དང་གཅིག་པུ་ཁེར་རྐྱང་ངང་ལྷག་འདུག དེ་རིང་སྤྲུལ་སྐུ་ལགས་གདན་འདྲེན་མཁན་རྟ་དང་རླངས་འཁོར་མང་པོ་སླེབས་ཀྱང་དོ་ནུབ་ངེད་ཚང་དུ་ཞག་བཞུགས་བྱེད་བསམས་ནས་ཕེབས་མ་སོང་། དོ་ནུབ་ཟླ་བ་མིག་མཛེས་ཀྱི་མངལ་སྒོ་འབྱེད་མཁན་རྙེད་མི་ཡོང་ངམ་སྙམ་བཞིན་སྒོ་གྲིབ་དེར་སྒུག་པས་གཉིད་ལ་ཤོར་སོང་། རྨི་ལམ་རབ་རིབ་ཅིག་ལ་ཟླ་བ་མིག་མཛེས་ལ་ངས་ཨ་མ་ཞེས་འབོད་བཞིན་འདུག སྨན་པ་ལྷུན་གྲུབ་ངེད་ཚང་གི་ཁྱིམ་བདག་ཏུ་གྱུར་འདུག་པ་མ་ཟད་ངས“ཨ་པ”ཞེས་འབོད། ངའི་ཨ་མ་དང་སྨན་པ་ལྷུན་གྲུབ་ཀྱི་ཆུང་མ་གཉིས་ཀའི་རྣམ་ཤེས་ངེད་ཚང་དུ་སླེབས་འདུག་ཀྱང་ཁོང་ཚོས་མཐོང་གི་མི་འདུག ངས་གོམ་པ་འཁྱར་འཁྱོར་དུ་སྤོ་ཞིང་ངག་ལས་དག་མ་དིག་གིས་འགྲུལ་པ་རེ་ལ“ང་སྤུལ་སྐུའི་བུ་ཡིན། པ་མ་ཧེ་ཡུ་ཁའི་བུ་ཡིན།” “་་་་་་” ཁོ་ཚོས་ངའི་ཞང་པོ་རུ་འབོད་པའི་ཟླ་བ་མིག་མཛེས་ཀྱི་མིང་པོ་དེ་ཧ་ལས་ཤིང་མགོ་བོ་འཕྲད་དུ་གཡུག་གིན་ང་ལ་བལྟས་འདུག

“ང་སྤུལ་སྐུའི་བུ་ཡིན། པ་མ་ཧེ་ཡུ་ཁའི་བུ་ཡིན།”“་་་་་་་་་་”ངས་ནེ་ནེ་རུ་འབོད་པའི་ལྷུན་གྲུབ་ཀྱི་སྲིང་མོ་དེ་ཡང་ཧ་ལས་ཤིང་མགོ་བོ་གཡུགས་སོང་།

“ཁྱོད་སུ་ཡིན།”ཤག་པོ་ཁ་བཀྲའི་སྐད་རེད། དྲང་པོར་བཤད་ན་ཁ་བཀྲ་ཤག་པོ་ཡིན་པ་ཡང་མི་ཤེས།

“ང་སྤུལ་སྐུ་པ་མ་ཧེ་ཡུ་ཁའི་བུ་ཡིན།”ཞེས་འབོད་བཞིན་འདུག སྐབས་དེར་སྤྲུལ་སྐུ་པདྨ་ཧེ་རུ་ཀ་ཡིས་སྟག་མོ་དགོན་དུ་ང་རང་ཨ་ལགས་ཤིག་གི་ཡང་སྲིད་ཡིན་པར་ངོས་འཛིན་གནང་སོང་། ཡུལ་མི་རྣམས་ཀྱིས“བྱིས་པ་འདིས་སྤྲུལ་སྐུ་ཞིག་གི་སྐྱེ་བ་ཡིན་པར་ཤོད་ཀྱིན་འདུག”ཟེར་ནས་ངའི་བཤང་གཅི་དང་ཁ་ཆུ་རྣམས་ལ་བཙོག་ལྟ་ཅི་ཡང་མེད་པར་བདུད་རྩི་རུ་རྩི་བཞིན་འདུག ང་རང་སྐབས་དེར་བྱིས་པ་ཞིག་ལ་གྱུར་ཚར་འདུག ཁོ་ཚོ་དང་མཉམ་དུ་རྩེད་མོ་རྩེ་བཞིན་འདུག བྱིས་པ་དག་དང་མཉམ་དུ་རྩེད་མོ་རྩེ་བཞིན་འདུག བྱིས་པ་རྣམས་ཀྱི་དོན་དུ་རྩེད་མོ་རྩེ་བཞིན་འདུག ད་དུང་བྱིས་པ་རྣམས་ཀྱི་མགོ་བོར་གཏོར་མ་འཇོག་ཅིང་ཡོད་པ་དང་ཨ་མ་སྐར་མ་སྨིན་དྲུག་ངའི་ནུ་བོར་ལུས་བླངས་པ་དེ་ངའི་དབང་ཞུ་རུ་སླེབས་པ་མཐོང་ཞིང་སྐྲག་འདར་ཞིག་ཤོར་བ་དང་གཉིད་ལས་སད། ཤེས་པ་བན་ནེ་བུན་ནེའི་ངང་མི་ལུས་ལེན་པར་སྐྲག་འདར་ཤོར། སྐབས་དེར་ཟླ་བ་མིག་མཛེས་མ་གཏོགས་བླ་མཆོད་ཉི་ཤུ་ལྷག་ཚང་མ་གཟིམས་ཚར་འདུག ཨ་ཕ་རབ་ལྷ་དོ་ནུབ་སེམས་དགའ་བཞིན་ཕྱི་རྒྱུ་ཁྲ་བོ་དང་ནང་རྒྱུ་སྨུག་པོ་ཚང་མ་ཆོས་ལ་བཏང་ཚར། ད་ནི་སྙིང་དང་འདྲ་བའི་ལྷ་བུ་ཉི་ཟླ་མཐོ་རིས་སུ་སྐྱེ་ཐུབ་སོང་། སྐར་མ་སྨིན་དྲུག་གི་ནང་དུ་སྐར་འབྲུ་གཅིག་འཕར་མ་སླེབས་འདུག་བསམ་ཞིང་གནམ་ལ་སྐར་འབྲུ་དེ་འཚོལ་བཞིན་ཉལ་ས་རུ་ཨ་ལོག་རྒྱག་གིན་འདུག