འབྲོག་ཐང་གི་བུ་མོ།

ཞེ་སེམས་སྣང་བ་མཐུན་པ་ལས་དབང་གི་བཀོད་སྒྲིག།

སྐྱིད་སྡུག་ཁ་ཆར་འབབ་ས་ཕ་ཡུལ་གྱི་ལུང་པ། །

འཕྲལ་ཕུགས་འདུ་བྲལ་བར་གྱི་སྒྱུ་མ་ཡི་འཇིག་རྟེན། །

རི་ཟོམ་སྨུག་པས་དཀྲིས་པའི་ངང་ཚུལ་འདི་སྐྱོ་བ། །

ལས་དབང་གོམ་ཁ་བཙན་པོའི་ཞབས་རྗེས་ཀྱི་ཁྲོད་ན། །

ལོ་ཟླའི་འདང་བརྩེ་ཟབ་མོ་དྲན་གདུང་གི་མིག་ཆུ། །

དུངས་སེམས་རུམ་ལ་བཅུག་པའི་འབྲོག་ཐང་གི་བུ་མོ། །

ཁ་བ་ལྷབ་ལྷུབ་འབབ་པའི་ནམ་ཟླ་འདི་སྐྱོ་བ། །

མཁུར་ཚོས་དམར་མདངས་ཆགས་པའི་ཡིད་འོང་གི་ལྷ་མོ། །

མིག་ཟུང་ཀེམ་ཀེམ་གཡོ་བའི་ཞེ་འདྲིས་ཀྱི་བུ་མོ། །

དྲན་འཛིན་ཀློང་གི་མིག་ཆུའི་ཕོན་ཐག་ནི་ཆད་སོང་། །

ལས་ཀྱི་རླུང་འཚུབ་ནག་པོའི་སྡུག་བསྔལ་འདི་སྐྱོ་བ། །

རྩེད་ར་གྲུ་བཞིའི་ཆུང་འདྲིས་མེ་ཏོག་ནི་འཐུ་རོགས། །

མྱི་ཁའི་གཏམ་གྱིས་སྐོར་བའི་ཆུང་ཆུང་གི་རོགས་ལོ། །

ང་རང་སློབ་མཐར་ཕྱིན་ནས་ཕ་ཡུལ་ལ་ལོག་དུས། །

མ་ཤི་གསོན་བྲལ་ལྟ་བུའི་ལས་དབང་འདི་སྐྱོ་བ། །

འདབ་དྲུག་ཁ་བ་དཀར་པོས་རི་ལུང་ནི་གཡོགས་དུས། །

སྲོད་ཀྱི་ལྷགས་རླུང་བཙན་པོ་ལུས་སེམས་ལ་ཕོག་སོང་། །

བགྲོད་ལམ་ཁ་བས་བཅད་པའི་ཐག་རིང་གི་མགྲོན་པོ། །

རེ་སྒུག་སེམས་རྩ་གཉོམ་པའི་ངང་ཚུལ་འདི་སྐྱོ་བ། །

ཞེ་འདྲིས་ལག་རྡང་སྦྲེལ་བའི་འཛུམ་དཀར་ཀྱི་བུ་མོ། །

ཚེ་སྔོན་སྨོན་ལམ་བཟང་པོའི་མཐུ་སྟོབས་ཀྱི་ལས་འཕྲོ། །

མ་ངེས་སྐྱིད་སྡུག་མདང་གི་རྨི་ལམ་དང་འདྲ་བའི། །

མིག་ཆུའི་ཐིགས་པ་འཛག་པའི་ཞེད་སྣང་འདི་སྐྱོ་བ། །

རབ་དཀར་རབ་གཙང་ན་གཞོན་ཕོ་མོ་ཡི་བརྩེ་གདུང་། །

རྣམ་དག་ཡིད་སེམས་རེས་མོས་སྐྱིད་སྡུག་གི་དཀྱིལ་འཁོར། །

འཁོར་བའི་ཆོས་ཉིད་ཟབ་མོ་ཉག་ཕྲན་གྱི་མདའ་མོ། །

ལས་ཀྱི་བཀའ་བཀོད་བཙན་པོའི་བཤད་ལུགས་འདི་སྐྱོ་བ། །

སྲིད་པའི་གངས་རི་མཐོན་པོ་ནང་སེམས་ཀྱི་ལྕགས་རི། །

ལྷུང་ལྷུང་གངས་ཆུ་དྭངས་མོ་ཞིམ་མངར་གྱི་བདུད་རྩི། །

བཅུ་དྲུག་ལང་ཚོ་སྨིན་པའི་ཆུང་འདྲིས་དང་གྱེས་དུས། །

ཕངས་སེམས་མིག་ཆུ་མོད་པའི་ན་ཟུག་འདི་སྐྱོ་བ། །

སྔོན་བསགས་ལས་ཀྱི་ཉིན་ཞག་དབྱར་དུས་ཀྱི་ནམ་ཟླ། །

དྲན་པའི་གདུང་བ་ཟབ་མོ་ཞེན་ཆགས་ཀྱི་ན་བུན། །

བདག་སེམས་རྫ་རི་སྨུག་པོའི་ལག་ཁྱུ་དང་འདྲེས་དུས། །

མིག་མདུན་བགྲོད་ལམ་བོར་བའི་ལོ་ཟླ་འདི་སྐྱོ་བ། །

རྫི་གླུ་རི་ལ་འཐེན་པའི་ཕ་ཡུལ་གྱི་བུ་མོ། །

གཡང་ཟོག་རྟ་ནོར་འཚོ་བའི་འབྲོག་ཐང་གི་བདག་མོ། །

མི་འདོད་གཞན་ཡུལ་འགྲིམས་པའི་སྐྱོ་གར་གྱི་ལེའུ། །

མིག་ཆུའི་ཁེར་ལབ་མང་བའི་མཚན་མོ་འདི་སྐྱོ་བ། །

བརྩེ་བའི་ཟུངས་ཁྲག་དམར་པོ་རྣམ་དག་གི་དམ་བཅའ། །

ཁྲེལ་གཞུང་སོར་གདུབ་བོར་བའི་འབྲོག་ཐང་གི་བུ་མོ། །

སོས་ཀའི་གནམ་ངོ་འདྲ་བའི་སྐྱིད་སྡུག་གི་མི་ཚེ། །

ཁ་ཆར་བུ་ཡུག་འཚུབ་པའི་དགུན་གཞུང་འདི་སྐྱོ་བ། །

དཀར་ནག་ལས་ཀྱི་ཁ་བ་གྲང་ལྷགས་དང་བསྡོངས་ནས། །

ཕ་ཡུལ་གཡུ་ཡི་ལུང་པར་ཉིན་འབབ་ནི་མཚན་འབབ། །

མནའ་ཚིག་ལྕགས་ནག་མདུད་པའི་འཆིང་རྒྱ་ནི་གཏོར་སོང་། །

དགུན་གྱི་གྲང་ངར་རྒོད་པའི་དུས་ཚིགས་འདི་སྐྱོ་བ། །

ཚེ་རབས་དྲན་འཛིན་ཀློང་གི་ཆུང་འདྲིས་ཀྱི་བུ་མོ། །

ཆུང་འདྲིས་ཞལ་རས་འདྲ་བའི་མཁའ་དབྱིངས་ཀྱི་ཟླ་བ། །

བརྩེ་འཛུམ་འོད་ཀྱི་སྣང་བ་བདག་སེམས་ལ་ཚེས་རུང་། །

སྨྲེང་སེམས་བཏེགས་པའི་ལོ་ཟླའི་མིག་ཆུ་འདི་སྐྱོ་བ། །