གནའ་རབས་ཤིག་ནས་ཝ་ཁ་གྲུ་ཁ་ཡིན། །
ཚོང་ལམ་གནས་ལམ་ཕྱྭ་གཡང་འགུག་པའི་ལམ། །
ཕན་བདེ་འབྱུང་བའི་གཞི་མ་ཡུལ་ཕྱོགས་འདིའི། །
དགེ་མཚན་བརྗོད་ལ་ལེགས་པར་གཟིགས་མོ་མཛོད། །
ཀོང་རྩེད་ར་ཡི་བཀོད་པ་མདུན་ན་ཡོད། །
ཚེ་རིང་མཚོ་མོ་ལྷུན་པོའི་རྩེ་ན་འཁྱིལ། །
རྫ་ཆུ་སིལ་མ་གྲོང་གི་བར་ནས་རྒྱུ། །
ཝ་ཁ་གྲོང་འདི་མཆོད་པའི་བཀོད་པ་ཡིན། །
བསིལ་རླུང་འཇམ་པོ་དལ་གྱིས་ལྡང་བ་དང་། །
དགུན་དུས་གྲང་འཁྱག་མིང་ཡང་མི་གྲགས་ཤིང་། །
སིལ་ཏོག་འདོད་དགུ་ལྷུན་གྱིས་གྲུབ་པའི་ཡུལ། །
ཝ་ཁ་གྲོང་འདི་བསོད་ནམས་ཅན་གྱི་ཞིང་། །
རྨ་ཆུ་སྒམ་ཆུ་ལྡིང་ཆུ་གསུམ་པོ་ཡང་། །
འབྲི་ཆུའི་པང་ལ་དལ་གྱིས་བཞུར་བ་དང་། །
ཆུ་སྣ་འདུས་པའི་མཆོད་གཤོམ་རང་འགྲུབ་ཀྱིས། །
ལྟད་མོ་མཐོང་ས་ཝ་ཁའི་ཉེ་བའི་ཕྱོགས། །
དུས་བཞི་མེ་ཏོག་བཀྲ་བ་གཟུགས་སུ་མཛེས། །
ནམ་ཡང་བྱ་བྱེའུ་སྐད་རྣམས་རྣ་ལ་སྙན། །
རྣམ་ཀུན་ལྗོན་པའི་དྲི་བསུང་སྣ་ལ་ཞིམ། །
འདོད་ཡོན་ལྔ་པོ་རང་འགྲུབ་ཝ་ཁ་གྲོང་། །
གཡས་ཕྱོགས་ཨོཾ་བརྒྱ་གནས་རི་ཉམས་ཀྱིས་མཛེས། །
གཡོན་ཕྱོགས་འབའ་ལྷག་སྐེད་རྫོང་བརྗིད་ཅིང་མཛེས། །
མདུན་ཕྱོགས་ཁ་བ་དཀར་པོ་རླབས་ཀྱིས་མཛེས། །
གྲགས་ཅན་གནས་དང་ཉེ་བའི་ཝ་ཁ་གྲོང་། །
དབུས་ཕྱོགས་ལྷ་ལྡན་རྒྱུ་བའི་ཟམ་པ་དང་། །
འཇོལ་ཕྱོགས་ཚོང་ལམ་རྒྱུ་བའི་ཟམ་པ་དང་། །
སེམས་ཀྱི་ཉི་ཟླ་རྒྱུ་བའི་ཟམ་པ་སྟེ། །
ཟམ་ཆེན་སྣེ་མོ་ཟུག་ས་ཝ་ཁའི་ཕྱོགས། །
གོམ་གསུམ་སྤོས་ན་དབུས་ཀྱི་ལྷ་སའི་ཕྱོགས། །
གོམ་གསུམ་སྤོས་ན་ཤམ་བྷ་ལ་ཡི་ཕྱོགས། །
སྡེ་རོང་ཉི་མ་ལུང་པའི་མུ་ཏིག་གི། །
རྡོག་པོ་ས་ཚུགས་ནོར་བུ་ཝ་ཁ་གྲོང་། །
སྨན་གྱི་རྩི་སྦྲང་མངར་མོ་ཕྱུག་ཅིང་འབེལ། །
ཤིང་འབྲས་ཕུན་སུམ་ཚོགས་པས་ཡིད་དབང་འཕྲོག།
ཞིམ་མངར་རྒུན་ཆང་དྭངས་མས་སྣེ་ལེན་ཡོད། །
ཝ་ཁ་གྲོང་གི་མགྲོན་པོ་སྤྲོ་ཞིང་སྐྱིད། །
རིན་ཐང་ཅན་གྱི་ཤིང་རིགས་སྣ་ཚོགས་ཏེ། །
རྫབ་དང་ལ་ཁྲ་ལས་གྲུབ་རིན་ཆེན་སྣོད། །
དངུལ་ཤན་གསེར་ཤན་སྣ་ཚོགས་ཡིད་འོང་དང་། །
བེ་ཤིང་ཤ་མོང་རིགས་ཀྱང་ཧ་ཅང་མང་། །
གྲོང་མིའི་གཤིས་ཀ་དར་ལས་འཇམ་ཞིང་ལྷོད། །
སྒོ་ལྕགས་མི་དགོས་བག་ཡངས་རྒྱུ་ན་ཆོག།
མགྲོན་པོར་བྱམས་ཤིང་དགའ་བས་འཛུམ་གྱིས་བསུ། །
ཝ་ཁ་འདི་ནི་དཔལ་ཡོན་ཅན་གྱི་གྲོང་། །
སེམས་ཉིད་ངལ་གསོ་བྱེད་སའི་གནས་ཀྱི་མཆོག།
འགྲོ་འཆག་ལུས་སྦྱོང་བྱེད་ལ་སྟབས་བདེ་ཞིང་། །
ཟུར་དང་ཟུར་དུ་ལྗོན་པའི་བསིལ་གྲིབ་འོག།
བགྲོ་གླེང་ལྷུག་པོར་ཆོག་སའི་ཝ་ཁའི་གྲོང་། །
གསེར་ལྡན་འབྲི་ཆུས་སྐེད་རགས་འདི་ནས་བཅིངས། །
བྲག་སྤུངས་བཀྲ་ཤིས་གཡང་འཁྱིལ་འདི་ན་བདོག།
ཡིད་ཆུང་ལྷ་མོའི་གླུ་དབྱངས་འདི་ནས་གྱེར། །
ཝ་ཁ་གྲོང་འདི་བཀྲ་ཤིས་གཡང་འཛོམས་ཡིན། །
བརྩེ་བ་རྒྱ་མཚོའི་རླབས་ཀྱིས་སྐྱོམས་པ་དང་། །
དུང་པ་རི་རབ་བམ་འཐུག་བརྗིད་ཉམས་ཀྱིས། །
བྱམས་འཁྱམ་བྲོ་ཡི་བསྟན་པ་ལ་སོགས་པའི། །
དམངས་ཁྲོད་རིག་གནས་དར་བའི་ཞིང་ས་ཡིན། །
འཇང་དང་མྱ་དཀར་ལི་སུའུ་ལ་སོགས་པའི། །
མི་རིགས་སོ་སོའི་ལོ་རྒྱུས་ཡུལ་སྲོལ་དང་། །
ཟས་སྤྱོད་བཅས་པའི་རིག་གནས་རྒྱུས་ལེན་ལ། །
སྟབས་བདེའི་གནས་གཞི་ས་ཚུགས་ཝ་ཁ་གྲོང་། །
ལས་གཉེར་རྒྱུ་འགྲུལ་བཟོ་སའི་ལམ་འགག་ཡིན། །
མགྲོན་རྣམས་ཡིད་དུ་འོང་བའི་ཞིང་ས་ཡིན། །
ཇ་རིགས་འཛོམས་པའི་བཏུང་བ་ཞིམ་པོ་ཡོད། །
བགྲོ་གླེང་བྱེད་སའི་ལྷིང་འཇགས་ཁོར་ཡུག་ཡོད། །
སེམས་པ་སྐྱིད་པོ་འཛུམ་གྱིས་ཁེངས་པ་དང་། །
གླུ་སྒྲ་སྙན་པོ་ངག་གི་སྒྱུ་རྩལ་ཅན། །
རོལ་ཆས་པི་ཝང་དཀྲོལ་ལ་མཁས་པའི་ཕུལ། །
ངོ་མཚར་རོལ་རྩེད་ཅན་ཡང་འདི་ན་ཡོད། །
གླུ་ཚིག་ཆུ་ར་གསེར་ཉ་ཁྲ་མོ་དང་། །
ཐབ་ཀ་གསེར་ཐབ་ཁྲ་མོ་ཞེས་པ་དང་། །
ད་དུང་སྐས་རིས་དམ་པ་བཅུ་གསུམ་ཞེས། །
དམངས་ཁྲོད་སྙན་རྩོམ་དག་ཀྱང་འདི་ན་ཡོད། །
ཉི་མ་ལུང་དང་འབའ་ལྷག་སྐེད་རྫོང་དང་། །
སེམས་ཀྱི་ཉི་ཟླ་ཁ་བ་དཀར་པོ་དང་། །
ཚྭ་ཁའི་ཡུལ་དང་འཇོལ་གྱི་ཡུལ་ལ་སོགས། །
ཡུལ་བསྐོར་དེས་ཀྱང་ས་འདིའི་དགེ་མཚན་ཤེས། །
ཝ་ཁ་གྲོང་དུ་ཐེངས་མ་ཁ་ཤས་སླེབས། །
ཡུལ་གྱི་དགེ་མཚན་མཐོང་ཐོས་མྱོང་བ་རྣམས། །
དབང་མེད་ཤར་ཤར་བརྡོལ་བའི་འཆར་སྒོ་འདི། །
ཇི་བཞིན་བྲིས་པས་དགེ་ལེགས་རྒྱུར་གྱུར་ཅིག།