འདབ་པ།

ལྷ་ཡི་རྫིང་རིང་དང་མཚུངས་མཐའ་བྲལ་རྩྭ་ཐང་ཀློང་། །

བདག་གི་རླངས་འཁོར་འདི་ཡང་མགྲིན་རིང་ཇི་བཞིན་དུ། །

གནས་མཆོག་ལི་ཐང་བསྐོར་བ་ཐེངས་ཤིག་བརྒྱབ་ནས་ནི། །

མཐོ་རིས་ལྷ་ཡི་གནས་དང་དབྱེ་མེད་འདབ་པ་ཐོན། །

རི་བོ་རིགས་གསུམ་མགོན་པའི་རྣམ་སྤྲུལ་ཞིང་། །

རྒྱ་ལྕང་རྐང་འཐུང་མཛེས་པའི་དཔལ་ཉམས་ཅན། །

དྭངས་གཙང་ཡན་ལག་བརྒྱད་ལྡན་རྒྱུ་བའི་གྲོང་། །

གསུམ་འཛོམས་གནས་མཆོག་འདབ་པ་ཨེ་མ་རྨད། །

གློག་འོད་དར་མཚོན་སྣ་ལྔའི་རང་མདངས་ཕུན་སུམ་ཚོགས ། །

མཚན་ལྗོངས་གོས་སུ་གྱོན་པའི་ཡུལ་མི་སྐོར་བྲོ་བ། །

འཚོ་བའི་བྲ་རྡོ་ལྷོད་ལ་བཞགས་ནས་སྐྱོ་བ་སངས། །

སྒྱུ་རྩལ་མཉམ་བཞེངས་ཅན་གྱི་འདབ་པའི་རྒན་གཞོན་སྤྲོ། །

མཐའ་འཁོར་བརྗིད་ཆགས་རྫ་དང་སྤང་རིའི་འཁོར་གཡོག་རྣམས། །

དཀྱིལ་གཞུང་ཡོངས་འདུ་གྲོང་ཁྱེར་ཆེད་དུ་སྲུང་བ་བཞིན། །

ཀླུ་ཡི་བང་མཛོད་ཆུ་སྲིན་གནས་ལྟར་ཆགས་ནས་འདུག།

སེམས་འདི་ཁྱོད་དང་ཉེར་བ་གྱུར་པས་སྨྲ་བསམ་འདས། །

སྲོལ་རྒྱུན་བཟོ་བཀོད་རབ་མཛེས་ཁང་བཟང་ཕྲེང་། །

གཉུག་མའི་ཚོང་ཁྲོམ་བཤམས་པའི་གཞུང་ལམ་དུ། །

དལ་བུ་གོམ་པའི་འདེགས་འཇོག་བསྒྱུར་བ་ན། །

བདག་ནི་གནའ་གྲོང་ལྷ་ས་མྱུལ་བ་འཁྲུལ། །

ལྗོངས་རྒྱུ་ཞིང་ཁམས་ཉི་སྟེན་གནས་ལ་མ་སླེབས་རུང་། །

ཕན་རོགས་གནའ་ཤུལ་བཤམས་སྟོན་ནོར་བུའི་ཕོ་བྲང་དུ། །

གསལ་བའི་རྡོ་ཆས་རྙིང་མས་མེས་པའི་བློ་གྲོས་དང་།

གངས་ཅན་རིགས་འདི་ལོ་ཟླ་ཁྲི་ཕྲག་ཆགས་པ་ཤེས། །

པ་ཊའི་གཞུང་ལམ་གད་སྙིགས་ཕུང་པོས་དབེན། །

དྭངས་གཙང་ཤེལ་གྱི་ཆུ་ཕྲན་གཏིང་མཐའ་མངོན། །

དཔལ་ཡོན་དང་ལྡན་སྔོན་ཐོན་རི་གྲོང་མཛེས། །

མི་རིགས་འཕེལ་རྒྱས་མངོན་པས་གཟི་བརྗིད་སྐྱེས། །

མཁའ་ལ་བསྙེགས་པའི་བཅིངས་གྲོལ་མགྲོན་ཁང་དུ། །

རྒྱ་ཇ་མེ་ཏོག་རོལ་བཞིན་འབེལ་གཏམ་སྨྲ། །

རབ་གསལ་ལས་ནི་མིག་ཞགས་འཕངས་པ་ན། །

མཛེས་ལྗོངས་དང་ནི་མཛེས་མ་ལྷན་དུ་རོལ།།

སྐབས་འགར་སྙན་ངག་མཁན་དང་མཉམ་འདུ་ཞིང་། །

རེ་འགའ་ཞེ་མཐུན་གྲོགས་དང་འགྲོགས་གྱུར་པས། །

ཉིན་ཞག་རིང་མོ་འདི་ཡང་ཡུད་ཙམ་འདས། །

མཐོ་སྒང་གྲོང་འདི་ཁོ་བོས་སྙན་ངག་སྒོམ། །