སྙིང་རླུང་དམར་པོ།

ལྷ་གཅིག་ཀོང་ཇོ་བསམས་ནས། །

ལྷ་སའི་ཡུལ་ལ་ཕེབས་ཡོད། །

ཞལ་མཇལ་ཞུས་ན་བསམས་ནས། །

གཡུ་ཆུང་དྲུག་དཀར་ཕུལ་ཡོད། །

གནམ་གྱི་སྤྲིན་དཀར་ཤིག་ཤིག།

རྗེ་བཙུན་སྒྲོལ་མ་ཉེར་གཅིག།

ས་ལ་ཆར་བ་ཤག་ཤག།

སྟོང་ཉིད་ལྷ་མོ་ཕེབས་འདྲ། །

རོགས་འདི་ཞེ་མཐུན་མིན་ན། །

མིག་ཆུ་ཡོང་དོན་མི་འདུག།

དམར་ཆུང་སེམས་ཀྱི་འབྲེལ་མཚམས། །

རྡོ་རྗེའི་ཚིག་གིས་མདུད་ཡོད། །

ལུས་གཉིས་གཅིག་ཏུ་མཐུན་སོང་། །

སེམས་གཉིས་གཅིག་ཏུ་འདྲེས་སོང་། །

ལུས་སེམས་གཉིས་ཀ་མཐུན་པའི། །

རོགས་ཁྱོད་ད་འདྲིས་ཚེ་འདྲིས། །

བསྙབ་ན་ཟིན་ཚོད་ཡོད་ཀྱང་། །

ལག་རྔ་རླུང་གིས་བཅག་སོང་། །

དེད་ན་དུས་སྙམ་ཡོད་ཀྱང་། །

རྡོག་སྣེ་རྡོ་ལ་ཐོགས་སོང་། །

བློ་ཡིས་མི་གཏོང་བསམ་ཡང་། །

བསམ་པ་རང་ལ་མ་དབང་། །

མིག་གིས་མཐོང་ན་བསམ་ཡང་། །

མཐོང་ལམ་ཐལ་བས་བཅད་ཐལ། །

ཁྱོད་རང་མ་འགྲོ་ཞུས་པས། །

འགྲོ་དགོས་ལས་ཡིན་གསུངས་བྱུང་། །

ཆང་དེ་གཙང་བཞེས་བྱས་ཏེ། །

ཞག་གཅིག་མ་འགོར་ཕེབས་ཐལ། །

རང་ཡུལ་ཆུང་འདྲིས་བྱམས་པ། །

ལན་གཅིག་རྨིས་ན་བསམ་བྱུང་། །

སྙིང་གཏམ་ལོ་ཆང་ཟླ་ཆང་། །

ཁམ་གང་བཞེས་ན་འདོད་བྱུང་། །

རི་གསུམ་རྩེ་ནས་འགྲོ་དུས། །

མཐིང་སྨུག་སྦྲ་གུར་དྲན་བྱུང་། །

སྦྲ་གུར་ནང་གི་བདག་མོ། །

ཡིད་ཀྱི་ཞིང་ལ་ཕེབས་རོགས། །

འདོ་བ་རྟ་ལ་གཅེས་གཅེས། །

ཕ་མ་གཉིས་ལ་གཅེས་ན། །

མ་ཤི་དྲིན་ལན་ཟེར་བ། །

ལོགས་སུ་འཇལ་དགོས་མི་འདུག།

སེམས་པ་སྙི་མོ་སྙི་མོ། །

ཟིལ་ཆུ་རྡོག་གཅིག་འདྲ་ལེ། །

གོམ་ཆུང་ག་ལེར་སྤོས་ན། །

དྭངས་ཤ་དུམ་བུར་ཆད་འགྲོ། །

རྟ་ལ་ཅང་ཤེས་འཚེར་བྱུང་། །

གསེར་གྱི་སྒ་ཆུང་དྲན་སོང་། །

གསེར་སྒ་རིན་ཆེན་ནོར་བུ། །

ཕ་མེས་བཞག་པའི་ནོར་ཡིན། །

ཆང་འདི་ལོ་ཆང་མིན་ན། །

འཐུང་འདོད་ཞེ་ལ་མི་འདུག།

ཆང་དྲི་བག་ཙམ་ཁ་ན། །

དེ་བས་བཞེས་འདོད་མེད་འགྲོ། །

འཇིག་རྟེན་བརྩེ་བ་ཟེར་བ། །

ལ་འདིའི་ཕར་ནང་ཚུར་ནང་། །

ཆུ་ཆེན་ཟམ་ཆེན་མེད་ན། །

རང་རང་སྨྲེང་རོགས་ཡིན་འགྲོ། །

སེམས་གཞས་སྤྲིན་ལ་བསྙལ་བ། །

ནམ་མཁའི་མཐའ་ན་ཡོད་རུང་། །

སྦྲང་ཆར་ཟིམ་ཟིམ་འཇོ་བ། །

དབུ་སྐྲ་བརླན་རོགས་མིན་ནམ། །

བྱ་རྒྱལ་ཁུ་ཡུག་སྔོན་པོ། །

སྟོན་མཇུག་རྒྱ་ཁྲ་ཧོར་བ། །

མྱི་སེམས་མེད་པའི་རོགས་དེ། །

ཚེ་སྨད་སྡུག་གི་ཁུར་བོ། །

གནམ་ན་སྤྲིན་དཀར་ལིང་ལིང་། །

སྦྲང་ཆར་འབབ་ན་བསམ་ཡང་། །

མི་འདོད་སད་དང་སེར་བས། །

མེ་ཏོག་ཐང་མར་བརྡལ་སོང་། །

གཡུ་ཐོག་ཟམ་པའི་ཁ་ནས། །

ཁྱོད་ལ་སྒུག་འདུག་གསུངས་གི། །

རྐང་ཐང་ལམ་ཐག་རིང་བས། །

ཉི་མ་རི་རྩེར་བརྒྱབ་བྱུང་། །

རྒྱ་བྱ་སོག་དཀར་འདྲ་ལེའི། །

རྟ་ཞིག་ང་ལ་ཡོད་དེ། །

རྒྱ་ཚ་ཞལ་དཀར་འདྲ་ལེའི། །

མྱི་ཞིག་ང་རང་མ་རེད། །

བཏབ་པ་ལན་མེད་འདྲ་ལའི། །

གྲི་ཞིག་ང་ལ་ཡོད་དེ། །

ཇོ་སྐྱིད་དམ་པ་འདྲ་བའི། །

མྱི་ཞིག་ང་རང་མ་རེད། །

གོམ་གསུམ་གོམ་པའི་བར་ན། །

ཚིག་གསུམ་མདུད་པ་བརྒྱབ་ཡོད། །

བློ་ལ་སོང་བའི་མི་དེ། །

འགྱུར་བ་མེད་པའི་སྨོན་ལམ། །

ཟུར་མིག་མདའ་མོ་གཤོག་དྲུག།

འཕེན་འདོད་ཡིད་ལ་མེད་རུང་། །

མེ་ཏོག་འཛུམ་ལུགས་ཡག་པས། །

སེམས་ཀྱི་གཞུ་ལས་ཤོར་སོང་། །

སྦྲང་ཆུང་འུར་འུར་ལྡིང་བ། །

གེ་སར་མངར་བས་ལན་འདུག།

རོ་ལྡན་གེ་སར་གཞོན་ནུ། །

སུ་ཡིས་ཟ་འདོད་མི་ཡོང་། །

ཡུན་རིང་འདྲིས་པའི་བུ་མོས། །

ང་ལ་ངོ་ལོག་བརྒྱབ་བྱུང་། །

སྒོ་ཁར་བཏགས་པའི་ཁྱི་འདིས། །

ང་ཡི་གཞིས་ཀ་བསྲུངས་འདུག།

གཡུ་ཆུ་ཐུར་ལ་ལོས་བཞུར། །

གཡུ་ཐོག་ཟམ་པས་བསྒུགས་ཡོད། །

བུ་མོ་གནས་ལ་ལོས་འགྲོ། །

ནོར་བུ་བཟང་པོས་བསྒུགས་ཡོད། །

ཁྲུང་ཁྲུང་དཀར་མོ་མིན་ན། །

གཤོག་རྩལ་གཡར་དགོས་མི་འདུག།

རྒྱ་ཁྲ་ཧོར་བས་དེད་ན། །

ནམ་འཕང་ཆོད་ཚོད་མི་འདུག།

མཚོ་ཆེན་ཁ་སྔོན་གཏིང་སྔོན། །

ངང་བ་སྒྲོ་གཤོག་སེར་པོ། །

བསམ་པ་ཡིད་ནས་མཐུན་ན། །

དགུན་འཁྱག་དར་གྱིས་མི་ཐུབ། །

ལ་དགུ་ལུང་དགུ་བརྒལ་ཡོད། །

ཆུ་དགུ་ལམ་དགུ་བཅད་ཡོད། །

བྱམས་པ་བཙལ་ནས་མ་རྙེད། །

རྐང་གི་རུས་པ་ཟད་འདུག།

ཆང་འདི་མི་འཐུང་བསམ་ཡང་། །

བྱམས་པས་ཞབས་བཏེགས་བྱས་བྱུང་། །

ཆང་ལ་དགའ་སྣང་མེད་ཀྱང་། །

བྱམས་པའི་སྐུ་ངོ་མ་ལྕོག།

འབབ་པའི་རྫ་ཆུ་ཟིལ་མ། །

རྫ་རིའི་འོག་ནས་བཞུར་སོང་། །

ཆུ་རྒྱུན་མ་མཐོང་ལུས་པ། །

མིག་གིས་ལན་པ་མ་རེད། །

སྐྱོ་ཉམས་གདོང་ལ་མེད་ཀྱང་། །

སྐྱོ་དོན་སེམས་ལ་ཡོད་རེད། །

སྐྱོ་བའི་མིག་ཆུ་ཟེར་བ། །

མངོན་ལྐོག་གཉིས་ནས་བཞུར་ཡོང་། །

བསམ་པ་གླིང་དཀར་སྟོད་རེད། །

བསམ་རྒྱུ་སྨུག་པོ་མཁར་རེད། །

མཁར་དེའི་ཕྱི་ནང་གཉིས་ན། །

སྒྲོལ་མའི་བྱིན་རླབས་ཨེ་ཡོད། །

བལྟས་ན་རྒྱ་སེ་དམར་པོ། །

ཚོར་བ་ཡོངས་སུ་རྐུ་ཡོང་། །

རེག་ན་དུག་ཤིང་ཚེར་མ། །

དོན་ལྔ་སྣོད་དྲུག་གཏོར་འགྲོ། །

ལྷམ་ལ་དྲལ་ཐིག་ཕོག་ཡོད། །

སེམས་ལ་རྡོག་ཁྲེས་ཁུར་ཡོད། །

ལས་ཀྱི་ཆད་པ་ཕོག་པའི། །

འཁྱམ་པོ་ས་མཐའི་ཁྱི་རེད། །

གདོང་ཕྱེད་ལྷ་ཡི་ལྷ་མོ། །

ངོ་ཕྱེད་བདུད་ཀྱི་བུ་མོ། །

ཆ་ཡོད་ཆ་མེད་འདྲ་བའི། །

རོགས་འདི་ང་ལ་མི་དགོས། །

སེང་ལྕམ་འབྲུག་མོ་འདྲ་ལེའི། །

མ་ཞིག་ཁྱོད་རང་ཡིན་ན། །

སྐྱིད་སྡུག་སྒོ་རྭ་སྨུག་ཆུང་། །

མཉམ་དུ་རྒས་ན་ལོས་ཆོག། །

ས་ལ་དཔྱིད་དཔལ་བཞད་ནས། །

སྤང་ལ་མེ་ཏོག་བཀྲ་བྱུང་། །

མེ་ཏོག་བཀྲ་ཤིས་རྟགས་བརྒྱད། །

བུ་མོའི་ཐུགས་ལ་ཨེ་འབབ། །

གཡུ་ཤུག་ལྗོན་པའི་རྩེ་ན། །

བྱ་རྒྱའི་ཁུ་ཡུག་བཞུགས་ཡོད། །

བསམ་ནག་དགྲ་སྟ་ངར་མས། །

རྩ་བ་བཅད་དགོས་མ་ཟེར། །

རྨ་ཆུ་ལུ་མའི་ཁ་ན། །

རྨ་ཁུག་གྱི་ལིང་ཨེ་བཞུགས། །

རྟ་བདག་བསམ་པའི་དོན་འགྲུབ། །

སྐུ་གཟུགས་བདེ་མོ་ཨེ་ཡིན། །

རྒྱ་ཡི་ཚོང་དཔོན་བཅུ་གསུམ། །

རྨ་ཡུལ་བརྒྱུད་ནས་ཕེབས་ཐལ། །

རིན་ཆེན་གསེར་གྱི་སྒ་སྲབ། །

ལག་ལ་འབྱོར་བ་ཨེ་བྱུང་། །

ཨ་འགྲིག་སེམས་པ་དགུ་སྒྲིལ། །

མདུད་མཚམས་དམ་པོ་ཨེ་ཡིན། །

ཇོ་ཇོ་ཐུགས་ཁོམ་ཡོད་ན། །

ང་ལ་བསྐོར་ཞིག་མ་བརྗེད། །

ཆུ་བོ་རྒྱལ་མོ་རྔུལ་ཆུ། །

ཡར་འགྲོ་ཡིན་ན་དགའ་བ། །

རང་ཡུལ་ཕྱོགས་ཀྱི་ན་ཟླ། །

དྲན་པའི་འཕྲིན་ཞིག་བསྐུར་ཆོག།

མཆོད་པའི་ལྷ་ཞིག་ཡོད་དེ། །

ལམ་གྱི་འགྲོ་རོགས་མ་བྱུང་། །

བྱམས་པས་གནང་བའི་གཡུ་དེ། །

སེམས་ཀྱི་ཁེན་ས་ཉན་སོང་། །།

ས་ལ་མེ་ཏོག་ལྡེམ་ལྡེམ། །

སྦྲང་ཆུང་སྐད་སྙན་འུར་འུར། །

དགུན་འཁྱག་བ་མོ་མིན་ན། །

འབྲལ་བའི་བསམ་པ་མི་འདུག།

ཉི་ཟླ་རི་བོའི་རྩེ་ནས། །

ཉི་ཟླ་འཆར་རེས་ནུབ་རེས། །

སྡེ་ཆེན་ཁྲོམ་པའི་དཀྱིལ་ནས། །

ངེད་གཉིས་འགྲོ་རེས་འདུག་རེས། །

སྐྱིད་ཆུ་བརྒྱུད་ནས་སླེབས་ཡོང་། །

རྨ་ཡུལ་བསྐོར་ནས་ཐོན་ཡོང་། །

ཆུང་འདྲིས་བྱམས་པ་ངེད་གཉིས། །

ཁྲ་མོ་གླིང་ནས་འཛོམས་འགྲོ། །

ལྷ་སའི་དྲུག་དཀར་སྔོན་པོ། །

ཇོ་ཇོའི་འགུལ་ལ་སྒྲོན་ན། །

གཡུ་འདི་མཐོང་ཐེངས་རེ་ལ། །

ང་རང་ལན་རེ་དྲན་ཆོག།

མི་འགྱུར་གསེར་གྱི་རི་ལ། །

ལྷ་ཤིང་ཤུག་པ་བཙུགས་ཡོད། །

གཡུ་ཤུག་ལོ་མ་སྔོན་པོའི། །

བདག་པོ་ང་ལས་མི་འདུག།

ཨ་ཅེ་འབྲོག་པའི་བུ་མོ། །

སྐྲ་ལོ་རིང་སོང་མ་ཟེར། །

ཡིད་འོང་སྐྲ་ཡི་ལན་བུས། །

དྭངས་གཙང་ཁྲེལ་གཞུང་མཚོན་ཡོད། །

ཀི་གསུམ་རི་ལ་བཏབ་ཡོད། །

རླུང་རྟ་སྒང་ལ་མཆོད་ཡོད། །

སྨོན་ལམ་སེམས་ནས་བྱས་ཡོད། །

རེ་བ་ཡིད་ལ་བཞག་ཡོད། །

ལམ་དེར་ཀྱོག་ཀྱོག་མང་ཡང་། །

རྟ་དེ་འགྲོས་ལྡན་ཅང་ཤེས། །

འགྲོ་ཚུལ་སྟོང་དང་ལྡན་པས། །

ང་རང་སེམས་ཁྲལ་མ་བྱུང་། །

དྲན་པ་སེམས་ཀྱི་ནད་རེད། །

མིག་ཆུ་མིག་གི་ནད་རེད། །

དུང་བའི་ཞེ་འདང་ཆེ་བ། །

ཁྱེད་ལ་འཁྲེང་བའི་ནད་རེད། །

འོ་མ་དཀར་པོ་མཆོད་ཡོད། །

འགྲོ་ལམ་བདེ་མོ་ཡོང་རོགས། །

ཚེ་རིང་མཆེད་ལྔ་བོས་ཡོད། །

ཚེ་ཐག་རིང་གི་སྨོན་ལམ། །