རེ་དོགས་ཀྱི་ལྗོན་པ་ཐལ་སྐྱ།

སྟོང་ལྡན་མཁའ་དབྱིངས་སུ་འཕྱོ་བའི། །

སེམས་ཉིད་ང་རོ་ཡི་རང་མདངས། །

ཚིག་སྦྱོར་ཆོ་འཕྲུལ་གྱི་ཕོ་བྲང་། །

སྣང་བའི་རི་སྒང་ལ་བཞེངས་འདོད། །

དགུང་སྟོད་སྤྲིན་ཕུང་གི་བརྩེགས་མ། །

སྐྱི་བསེར་རླུང་བུ་ཡིས་གཏོར་དུས། །

དགུང་སྨད་དགུ་ཚིགས་ཀྱི་ཕག་གི །

སྐར་མའི་མིག་ཆུ་དེ་ཨེ་མཐོང་། །

འཚོལ་སྙེག་ནམ་མཁའ་རུ་འཕུར་བའི། །

འདུན་པའི་ཤོག་བྱ་ལ་ལྟོས་དང་། །

གནམ་ས་ཁ་སྦྱོར་གྱི་འཕྲང་ནས། །

རེ་ཆད་འཁུན་སྒྲ་ཞིག་ཨེ་ཚོར། །

མི་རྟག་གཞོན་དུས་ཀྱི་སྒྱུ་ལུས། །

ལང་ཚོ་སྟོན་མཇུག་གི་སྡོང་ལོ། །

བཟློག་མེད་ལོ་ཟླ་ཡི་རླུང་བུས། །

ཕྱོགས་མེད་ཐང་སྟོང་དུ་ཁྱེར་བཞག །

དུང་བ་ཞིམ་མངར་གྱི་རྒུན་ཆང་། །

བདུད་རྩིའི་ཉིང་ཁུ་རང་མ་འདོད། །

ལུས་སེམས་བཟི་ཁ་ཡི་རྗེས་སུ། །

མྱོང་རོལ་སྐྱུར་དྲི་ལས་མི་འདུག །

བརྗོད་མེད་ཡིད་འགྱུར་གྱི་ཁམས་ལ། །

གཞོན་པའི་སྣང་བ་དེ་བཞེངས་ཀྱང་། །

ལང་ཚོ་ཤོག་དཀར་གྱི་དར་ལྕོག །

ལོ་ཟླའི་སྒང་སོ་ནས་ཟད་སོང་། །

གྲགས་འགུལ་དབེན་པ་ཡི་ལོ་ཟླ། །

མུན་པའི་རེ་ནག་གི་ཕག་ནས། །

ཉིན་མཚན་མཛུབ་མོ་ལ་བརྩིས་ན། །

ཉིན་ཐོའི་ཁུར་པོ་འདི་ལྕི་འགྲོ། །

མནོག་ཆུང་མི་ཚེ་ཡི་ཕུགས་རེ།

ཐ་སྙད་རྩམ་སྐྱ་ཡི་རྒྱགས་ཕྱེ། །

བརྡ་སྤྲོད་སྦར་མོ་རུ་ཉར་ཡང་། །

རྨོངས་གཉིད་རླུང་བུ་ཡིས་འཁྱེར་འགྲོ། །

ཆགས་སྡང་རྩྭ་ཟིལ་གྱི་བ་མོས། །

འཚོ་བའི་གོས་ཐུ་དེ་བརླན་སོང་། །

རེ་དོགས་ཉི་ནུབ་ཀྱི་གྲིབ་སོ། །

གར་སོང་ས་ཕྱོགས་ལ་བསླེབ་ཡོང་། །

རྒྱ་གྲོང་མི་ཚོགས་ཀྱི་གཡོ་ཁྲམ། །

དཔྱིད་ཀྱི་གནམ་ངོ་དང་མཚུངས་པ། །

གདོང་གི་འཛུམ་དྲོད་དེའི་རྗེས་སུ། །

ཞེ་ནག་སྨུག་པ་དེ་འཐིབ་ཡོང་། །

ལས་དབང་བསླུ་བྲིད་ཀྱིས་སྤྲད་པའི། །

ཡིད་འགྲོགས་ཨ་གསར་གྱིས་ཟད་དུས། །

མཆོར་འདོད་ཡིད་ངོ་ནས་གསལ་བའི། །

གདུབ་ཀོར་གཡུ་ཁྲ་ཡང་རྙིང་སོང་། །

དཀར་ནག་སྐད་ཅིག་ཏུ་དབྱེ་བའི། །

བདེན་མཐུའི་དབང་པོ་ཞིག་ཡོད་ན། །

བསླུ་མེད་བདེན་དོན་གྱི་རང་ཞལ། །

འཇིག་རྟེན་དཀར་ངོགས་ལ་སྟོན་རོགས། །