རི་སུལ་དུ་བཞད་པའི་མེ་ཏོག

སྤྲིན་པ་བཞིན་འགྱུ་ཞིང་གཡང་དཀར་ལྟར་རྩེན་པའི།

བསིལ་རླུང་བཞིན་རྒྱུ་ཞིང་རྟ་རྒོད་ལྟར་འཚེར་བའི།

ཟིལ་བ་བཞིན་དྭངས་ཤིང་མར་ཕྱུར་ལྟར་ལྟེམས་པའི།

ལྗང་ནེམ་ནེམ་གྱིས། ཁྲ་ལམ་ལམ་གྱིས།

མཛེས་མཚར་མཚར་གྱིས། འོད་ཁྱུག་ཁྱུག་གིས།

སྤང་སྔོན་མོའི་ཚེ་ནོམ་དུ་འབོད་པའི།

སྒོ་ཕྱུགས་མོའི་མཛེས་རྒྱན་གྱིས་བཏེགས་པའི།

སྤྲིན་ལེབ་མོའི་བཞིན་དཔལ་ལ་འགྲན་པའི།

གཡུ་སྦྲང་གིས་དུང་བ་བརྗོད་ས།

ཕྱེ་ལེབ་ཀྱིས་སེམས་པ་གླན་ས།

མེ་ཏོག རི་སུལ་དུ་བཞད་པའི་མེ་ཏོག

གཞོན་ནུ་མའི་མིག་མཐར་སྐུང་བའི་ཟུར་མིག་གི་མདའ་མོ་ཡིན་ནམ།

འཛུམ་ཞལ་གྱིས་གྲོལ་ཏེ་བརྩེ་དུང་གིས་མཆོད་པའི་ལང་ཚོ་ཡིན།

ཁ་བ་བཞུས་རྗེས་ཀྱི། ཆར་བ་བབས་ཤུལ་ན།

ཉི་འོད་ཀྱི་བདེ་དྲོད་རུམ་པའི་རི་སུལ་དུ་མེ་ཏོག་གི་འཛུམ་མདངས་རྒོད།

མེ་ཏོག་འདི་དག སྤང་སྔོན་མོར་འཁྱུད་པའི་མེ་ཏོག་འདི་དག

བཟོ་རིག་གི་སྤྲུལ་བསྒྱུར་མ་ཞུགས་པའི་མེ་ཏོག་འདི་དག

མི་ཚོགས་ཀྱི་ཁ་རླངས་མ་ཕོག་པའི་མེ་ཏོག་འདི་དག

དུས་དང་ཆར་གྱིས་སིམ་པའི་དབེན་འཇགས་ཀྱི་སྣང་ངོར།

མགོ་རིས་དཀྲིས་པའི་ཨ་ཆེའི་ལྷད་མེད་ཀྱི་བརྩེ་བ།

བཞོ་ཟེའུ་ཁུར་བའི་འབྲོག་མོའི་ཡ་ཆུང་གི་མར་ལོ།

སུ་ཞིག་གི་སྙིང་ཆུང་གི་ལུ་གུ་ལྡིང་ལྡིང་།

གང་ཞིག་གི་འདོད་ཞེན་གྱི་འགྲམ་ཆུ་ལྡང་ལྡང་།

མེ་ཏོག་ལ་ཚོས་རྩི་མི་དགོས་དཀར་དམར་གྱི་མདངས།

མེ་ཏོག་ལ་ལེགས་བཅོས་མི་དགོས་རང་དབང་གིས་བཞད།

མེ་ཏོག་གིས་ཚ་གྲང་གི་འཚོ་བ་སྦྲ་ཁྱིམ་དུ་སྙོར།

མེ་ཏོག་གིས་ཆར་རླུང་གི་སྐྱིད་སྡུག་རི་སུལ་དུ་གཉེར།

མེ་ཏོག་རྩྭ་ཐང་དུ་བཞད་པ་ནས།

དར་སྣེ་རླུང་གིས་སྐྱོད་པའི་མན་ངག་སྙིང་དུ་སྒོམ།

རླུང་རྟ་དགུང་དུ་གཏོར་བའི་སྲོལ་རྒྱུན་རིང་དུ་སྤུར།

ཁ་ཚུབ་ལས་བཀར་བའི་ཉི་ཁྱིམ་གྱི་གཏམ་རྒྱུད་དང་།

གཏམ་རྒྱུད་ཀྱི་བྱུང་བ་མཚོན་པའི་མེ་ཏོག་འདི་དག

ལུ་གུ་དང་མཉམ་དུ་འབྲོག་པའི་སྦྲ་ཁྱིམ་དུ་འཛོམས་ཏེ།

ཨ་ཆེའི་བྲང་ཁོག་ན་ལུ་གུ་ལྟར་ལྡིང་བའི་མེ་ཏོག

ད་དུང་ཡང་རི་སུལ་དུ་སྙིང་སྡུག་གེར་བཞད།

མེ་ཏོག རི་སུལ་དུ་བཞད་པའི་མེ་ཏོག

དབྱར་ཟླ་འདིར་སུ་ཞིག་གིས་པར་མིག་ཏུ་བཙུད་ཨེ་འགྲོ།

དུས་ཟླ་འདིར་སུ་ཞིག་གིས་རྐང་འོག་ཏུ་བརྫིས་ཨེ་འགྲོ།

ཡང་ན་མེ་ཏོག་རང་མེ་ཏོག་གིས་བཞད་སྲིད་ཨང་།

རི་སུལ་དུ་བཞད་པའི་མེ་ཏོག

སྤྲིན་གྱི་མེ་ཏོག ཁ་བའི་མེ་ཏོག

རྩྭ་ཐང་དུ་བཞད་པའི་ཡིད་འོང་གི་མེ་ཏོག