ལམ་སྐབས་དེ་ནས་ང་རང་ཁེར་བུར་ལམ་ལ་ཆས།
ཁ་ཕྱོགས་ཙམ་ཡང་མེད་པའི་རྒྱང་རིང་དེ་ལ་ཅེར།
དབུགས་རིང་ཞིག་གི་རྗེས་སུ།
ཆུང་འདྲིས་ཞེས་པའི་སེམས་ཀྱི་གས་ཁ་དེར་རི་མོ་བཏོད།
ན་ཟུག་ཏུ་ཐིམས་པའི་སེམས་པ་སྙི་མོ་དེ།
དེ་ལྟར་རྨ་ཤུལ་མེད་པའི་སྐྱོ་ཡུས་ཀྱིས་བསྐྱངས།
འདི་ནི་ལོ་རབས་སྟོང་ལན་ཆགས་ཀྱི་བུ་ལོན་དེ་ལོས་ཡིན་ཨང་།
དེ་རིང་།
གཉོམ་དག་པའི་སེམས་པ་འདི།
ཆུང་འདྲིས་ཞེས་པའི་རི་ལུང་དུ་འགྲིམ་དུས།
ཡིད་མུག་པའི་ཏབ་ཏུབ་ཀྱི་ཚོར་བ་ཞིག་གིས་སེམས་ཁ་གཡོགས།
དེ་ནི་སྙིང་གསོན་པོའི་དྲོད་ཐིགས་ལ་གས་ཁ་བཞག་པས་ཡིན་ནམ།
ཡང་ན་རྒྱུས་ཡོད་ཀྱི་མི་ཞིག་རྒྱུས་མེད་དུ་གྱུར་བར།
སྲིད་པའི་ས་ཆེན་གྱི་སྙིང་རྗེ་སྒོམ་པའི་དྲན་པ་ཞིག་སླར་གསོ་བྱས་པ་ཡིན།
ལམ་སྐབས་འདིར།
ང་ལ་གས་ཆག་ཤོར་བའི་བརྩེ་འདུན་ཞིག་ཡོད།
རྨ་མེད་ཀྱང་ཟུག་ངུ་འདེབས་དགོས་པའི་རྨ་ཁ་ཞིག་ཡོད།
རྨ་ཁ་དེར་ཤབ་ཤོབ་ཀྱི་གཏམ་རྒྱུད་གང་ཡང་མེད།
ལྷད་མེད་ལ་དྭངས་གཙང་བའོ།
ཞིབ་གྱིས་བསམ་ན།
དེ་ནི་ལོ་ཟླའི་གཉེར་རིས་ཀྱིས་བྲིས་པའི་སྐྱེ་བ་སྔོན་མའི་ལན་ཆགས་ཙམ་ཡིན་པ་ཚོར།
སྔོན་ཆད།
ངས་ཉིན་མཚན་སྟོང་གི་སྐྱོ་ཡུས་ཀྱི་སྨྲེ་ངག་སེམས་སུ་བསྙལ་ནས།
རྐང་རྗེས་དབེན་པའི་མཚན་སྨད་འདིར་རྐང་རྗེས་ཤིག་བཙལ།
དེ་དུས། སྲིད་པས་བ་ཆུང་བཤས་པའི་གླུ་ཤགས་འདི།
ངའི་སེམས་ཁ་བསྲོ་བའི་རླབས་རིས་ཡིན།
དེ་རིང་།
སྙིང་གི་འཕར་ལྡིང་རྒོད་ས་ཞིག་ནས།
རི་ཚོགས་རེ་རེ་རྒྱབ་དུ་སྐྱུར་ཞིང་།
གཙང་བོ་རེ་རེ་མིག་གིས་འདོར་བཞིན།
ངའི་སྐྱེ་བ་སྔོན་མའི་ལས་དབང་ཞིག་ལ་སེམས་པ་བརྒྱུས་ནས།
བྲག་འགོ་དང་བྲག་འགོའི་ཞེན་ཆགས་ལ་ཕྱིར་མིག་འདོན་བཞིན།
ཕ་ཡུལ་དུ་མ་གྱུར་ཞིང་གཉེན་ཉེ་རུ་མི་འགྱུར་བའི།
རྒྱང་རིང་རྒྱང་རིང་གི་བརྩེ་འདུན་དེར་སེམས་པ་བསྲོ་དགོས་བྱུང་།
རེད་དེ།
དབུགས་རིང་ཞིག་གི་རྗེས་སུ།
ལས་དབང་གིས་མ་ལྡོག་པའི་ལས་དབང་དེ་ལ་གྱེས་ཕྱག་ཕུལ་ནས།
གས་ཆག་གི་སེམས་ཤས་དེ་ལ་བདེ་སྐྱིད་ལྡན་པའི་སྨོན་འདུན་ཞུ་དགོས་བྱུང་།