མི་མཇེད་ཀྱི་འཇིག་རྟེན་ཐང་ཆེན།
ཡང་ན་སྤྲོས་པ་བྲལ་བའི་ཞིང་ཁམས།
ཐབས་ཤེས་མདའ་གཞུ་ཐོགས་པའི་རྟེན་འབྲེལ་གྱི་འཁོར་ལོ།
ཡང་ན་དྲན་འཛིན་གྱི་ཀློང་ན་འཕྱོ་བའི་དགའ་སྡུག་གི་ཡིག་འབྲུ་རེ་རེ།
རྨི་ལམ་གྱི་རྟ་ཕོའི་བང་ལ་བཅོལ།
བདེ་མོའི་ཐང་ནས་གླུ་རེ་བླངས།
འཇིག་རྟེན་ཁྱོད་ལ་དབང་ཞིང་ང་ལ་དབང་།
འཕྲང་མོའི་ལམ་ནས་ཀི་རེ་བཏབ།
ཆོས་ཉིད་བདེན་པ་འདྲ་ལ་ཀུ་རེེར་འདྲ།
ཟླ་འོད་ཟ་ཟི།
རྨི་ལམ་ཟ་ཟི།
ལམ་གྱི་ཁུག་པའང་ཀྱག་ཀྱོག་སྟེ།
རླུང་གི་རྨིག་བཞི་འཁོར་ལོས།
ས་བྱང་ཐང་སྐྱ་མོ་འཕྲད་ཀྱིས་གཅད་དགོས།
སྲ་མཁྲེགས་ཀྱི་དགུན་གཞུང་བརྒལ་ནས་དཔྱིད་ལ་ཆས་དགོས།
ཟླ་ངོགས་ཀྱི་དྲན་པ།
ཅིའི་ཕྱིར། རྨི་ལམ་ནི་ཐག་རིང་ཐག་རིང་གི་སྒྱུ་འཕྲུལ་ཞིག
ཅིའི་ཕྱིར། ལོ་ཟླ་ནི་སྐད་ཅིག་སྐད་ཅིག་གི་འཆར་བརྙན་ཙམ།
གང་ལྟར། ཕྱིར་ཡོང་མེད་པའི་ཟླ་ངོགས་ཀྱི་དྲན་པ་རིང་མོ།
དྲན་པ་རིང་མོ་དེ་དག
རི་བོ་དང་གཙང་པོའི་རླབས་ལ་བཅོལ།
ལོ་ཟླའི་ཆུ་བོ་ལྷུང་ལྷུང་ལ་འགྲོགས་ནས།
འཁོར་བ་རྒྱ་མཚོའི་ཀློང་ཡངས་ལ་བསྐྱོད་ན།
འཇིག་རྟེན་འཇིག་རྟེན་ཟེར་བ་དཀར་པོ་ཡིན་རུང་ནག་པོ་ཡིན།
ང་ཚོ་སྔར་བཞིན་མུན་པ་ལ་རྒྱབ་ཀྱིས་ཕྱོགས་ནས།
སང་ཉིན་གྱི་སྐྱ་རེངས་ལྷ་མོའི་ཞལ་རས་དེ་འཚོལ་ན་ཆོག་ག
སང་ཉིན་གྱི་སྲིད་པའི་ལས་ལ་སྨོན་ལམ་རེ་བཏབ་ན་ཆོག་ག
ཅིའི་ཕྱིར། འཇིག་རྟེན་ནི་སྐྱ་རེས་སྔོ་རེས་ཀྱི་ཆོས་ཉིད་ཅིག
ཅིའི་ཕྱིར་རྒྱང་རིང་ནི་ལས་དང་བསྐལ་བ་ཡི་བར་ཐག་ཅིག
གང་ལྟར། རྒྱུ་མཚན་མེད་པའི་མཛེས་སྡུག་གི་རྨི་ལམ་རིང་མོ།
རྨི་ལམ་རིང་མོ་དེ་དག
ཞེ་དང་སྣང་བའི་བར་ལ་བཅོལ།
ལོ་ཟའི་ཆར་བ་ཟ་ཟིལ་ལ་འགྲོགས་ནས།
ཡར་ཀླུང་གཙང་པོའི་དབྱངས་རྟ་ལ་འཐིམ་འགྲོ།
འཁོར་བ་འཁོར་བ་ཟེར་བ་བདེ་བ་ཡིན་ནམ་སྡུག་བསྔལ་ཡིན།
ང་ཚོ་སྔར་བཞིན་མི་ཡུལ་གྱི་ཐང་ལ་འགྲེང་ནས།
ཁེར་རྐྱང་གི་འཁོར་བའི་མགྲོན་པོའི་ལོ་ཟླ་དེ་འཚོལ་ན་ཆོག་ག
སང་ཉིན་གྱི་འཁོར་བའི་གནས་ལ་སེམས་གསོ་རེ་གཏོང་ན་ཆོག་ག
མར་མེ།
——འཁྲབ་ཁྲིད་པ་གྲོགས་པདྨ་ཚེ་བརྟན་ལགས་སྐུ་གཤེགས་པར་ཕུལ་བ།
དོ་ནུབ་ས་མཐའི་གནམ་གཤིས་འདི་ཧ་ཅང་འཁྱགས།
མུན་པ་དང་ཁེར་རྐྱང་གི་མཚན་མོ་ཡུན་རེ་རིང་།
ཟླ་འོད་ལ་བཏགས་པའི་ནོར་ལུག་དང་སྤྲིན་པ་སྔར་བཞིན་དྲན།
གསལ་ལ་མ་གསལ་བའི་དྲ་དང་དྲ་བའི་སྣང་ངོར།
དཔྱིད་ཀྱི་ནམ་ཟླ་དེའང་དགུན་གྱི་ཁ་བར་འཐིམ་འདུག
རྟེན་འབྲེལ་ཡང་ལུགས་ལྡོག་ཅིག་སྟེ།
རྒྱུ་འབྲས་ཀྱང་གོ་ལྡོག་ཅིག
མཚན་མོར།
སྲིད་པ་ག་ཤེད་ཅིག་དྲན་ཡང་།
འཁྲུལ་བ་སྣ་ཚོགས་ཀྱང་བྱུང་རུང་།
འཁོར་བའི་ངེས་འབྱུང་དང་སྨོན་པ་དེ་སྙེད་ཀྱི་གྲུ་ག་ནས།
འུ་ཚོའི་ཁ་ཆད་ལ་ལོ་ཟླའི་ཁ་བ་བརྩེགས་བྱུང་།
ཉི་ཟླའི་རྔམ་ཁ་ལ་བསུ་བའི་ཕོ་ཉ་སླེབས་བྱུང་།
ཕ་ཡུལ་གྱི་མུན་པ་སྔར་བཞིན་མཐུག
འོད་སྣང་གི་ཟེགས་མ་ནུབ་ལ་ཕྱོགས།
རྨི་རྟག་དྲན་པ་ཕྲ་མོ།
འཁོར་བའི་འཛིན་པ་རིང་མོ།
མཛེས་སྡུག་གི་ཡོད་ཚད་དེ་རྨི་ལམ་དང་རྨི་ལམ་གྱི་ཆོ་འཕྲུལ་ཡིན་པར་གཞི་ནས་ཤེས་ཡོད།
མཛེས་སྡུག་གི་རྣམ་པར་ཤར་བའི་བརྙན་རིས་ཇི་སྙེད།
མཛེས་པ་ཡོད་ཚད་ཀྱི་དར་དཀར་ཡོལ་བར་འཐིམ་ཡོད།
བདེན་གཉིས་སྣང་གཟུགས་ཀྱི་འོད་གསལ་མེ་ལོང་སྟེ།
ལྷ་མིའི་བར་དུ་སྦྲེལ་བའི་དམ་ཚིག་གི་ཕྱག་རྒྱ་རྟག་ཏུ་བརྟན་པར་ཞུ།
འཇིག་རྟེན་གྱི་དཀར་ངོགས་འདི་ནས་གཏན་དུ་གཟིམས་ལགས་སམ།
ཕྱི་རོལ་སྐྱོ་གདུང་གི་རླུང་སྒྲ་སྙན་ངག་གི་ལམ་ནས་བཞུར་འོང་།
དྲན་པ་དང་རི་རབ་གཙང་པོའི་ཀློང་ནས་འཚོལ་དུས།
ཡིག་འབྲུ་མང་པོའི་གསེབ་ནས་ཆོས་ཉིད་དང་སེམས་གསོ་མཐོང་འོང་།
དོ་ནུབ།
ངས་ཀྱང་མར་མེ་རྐང་གཅིག་ཐར་བའི་ལམ་སྣེ་ཟིན་པའི་སྨོན་དབྱིངས་སུ་སྒྲོན་ཡོད་ལ།
མར་མེ་རྐང་གཅིག་ཁྱེད་རང་སླར་ཡང་འཇིག་རྟེན་འོད་དུ་གསལ་བའི་རྟེན་འབྲེལ་དུ་སྒྲོན་ཡོད།