ནག་བཟའ་བསོད་ཡག་གི་སྙན་ངག་བོད་འགྱུར་མ་ཁག་དྲུག

བཟི་སྣང་།

ལག་པ་བསྲིངས་ཚེ་མཛུབ་རྩེ་བྱེ་ཐང་ལ་འཕྲད།

ངལ་བར་གྱུར་ཚེ་གཉིད་སྣང་ཉི་འོད་ལ་བཅར།

མིད་པ་གདངས་ཚེ་རི་ཀླུང་དང་ཆུ་མིག་ནི།

ལུས་པོའི་ནང་མངོན་སུམ་གཟུགས་ཅན་དུ་གྱུར་ཏེ།

བཟི་སྣང་སྐྱེད་པར་བྱེད།

གཡུ་ལོ་བཀོད་པའི་ལྗོངས་ཏེ།

སྐྱེ་དགུ་མ་ལུས་འདུས་པའི་ཚང་ཚིང་དུ།

བདག་ནི་ཤུན་སྐོགས་སྲ་མོ་དོར་བའི་འབུ་སྲིན་ཉིད།

ས་གཞིའི་ལག་པ་དང་རླབས་ཀྱི་མཆུ་སྒྲོས་སོགས།

ཐམས་ཅད་མ་སྨིན་པ་ལྟར་དབེན་པའི་ཁམས་སུ་གནས།

བདག་ནི་མཐོ་སྒང་གི་དྲི་བཞོན་ནང་།

བརྩེ་བས་བརྒྱན་པར་བྱས།

སྐྱེ་འགྲོ་ཀུན་གྱིས་ཅི་འདོད་པ་བཞིན་བྱས་ན།

འོད་སྣང་སྐྱོགས་གང་ལེགས་པར་བཀྲུས་ཏེ།

ཟླ་བདུན་དབང་པོར་བུ་ཞིག་བཙའ།

རྨི་བཤད་མཁན་གྱིས་ནི།

འོད་ཀྱི་ལུས་པོ་ནག་ཐིགས་ཀྱིས་གང་འདུག་སྟེ།

ཚུལ་དེ་གཟིག་ཅིག་དང་རྔོན་ཁྱི་ཞིག་གིས།

ལུང་པའི་ནང་གཟན་རྩོད་པ་དང་འདྲ་ཟེར།

ཁ་ཟས་ཀྱི་དོན་རབ་རབ་དེ།

གྱང་བརྟོལ་ཏེ་རླུང་གིས་ཁྱེར་ཡོང་ཞིང་།

མི་ཡུལ་གྱི་རྣ་བ་གང་བར་བྱས།

“སྐྱེ་འགྲོ་ཀུན་གྱིས་ཅི་འདོད་པ་བཞིན་བྱས་ན··· ···”

རྣ་བ་བརྒྱ་དང་བརྒྱད།

གློ་བུར་དུ་སྤྲིན་ཐོག་སྤྲིན་པ་བརྩེགས།

ངོས་ཅིག་ཤོས་ཀྱི་འཇིག་རྟེན་དེ།

ས་གཞིས་མི་ཟིན་པའི་བར་སྣང་ན་འཁོར།

ངས་ནི་འགྱུར་ཁུགས་ཅིག་ནང་འགྲེང་བསྡད་ནས།

དབྱངས་རྟ་རེ་རེའི་ཁ་ཕྱོགས་ཨེ་ཟིན་བལྟས།

དེ་དག་དམའ་ས་ནས་མཐོ་སར་འཕགས།

དྲག་ཏུ་རྒྱུག་པའི་རྟ་ཁྱུ་ཞིག་དང་།

ལྗོན་པའི་རྩེ་མོ་རྐང་འོག་ཏུ་རྫི་བའི་རླུང་བུ་འདྲ།

ཆར་ཆུ་གཅིག་པུ་ལུས་ནས་མར་མར་འབབ།

ཤིང་ཏོག་འཐོག་པའི་ལྷིང་འཇགས་གཅིག་པུས།

ལྷ་ཡི་སྐད་སྒྲ་ལེན་པར་བྱེད།

ངས་ལྐུགས་པའི་ཁ་ཁུ་སིམ་པོ་གྱོན་ནས།

སྒྲ་ཡི་ངོས་གཅིག་ཕྱིས།

དེ་ནི་ལྡེབས་རིས་ལས་ཐོན་པའི་ལུས་དབྱིབས་དང་འདྲ་སྟེ།

རྒྱབ་གཟུགས་མ་གྲུབ་ཅིང་དོན་ལྔ་ཕྱིར་མངོན་པའི་ཉམ་ཆུང་གི་ཚུལ་དེའོ།

གདོང་མདུན་ནས་འཕྲོས་པའི་མིག་འོད་དང་།

ལམ་བུ་བསྐོར་ཏེ་ཡོང་བའི་ཉི་འོད།

དེ་ནི་སུ་ཞིག་གི་མཛེས་པའམ་སུ་དང་འབྲེལ་བ་ཡོད་དམ།

དེ་རྒྱས་ཤིང་གསལ་བའི་ཆུ་ཡི་ཐིགས་པ་བརྒལ་ཏེ་འོངས།

རི་ཁྲོད་ཀྱི་བགྲོད་ལམ་སྟོང་པར་ཆུ་ཡི་རྐང་རྗེས་དཔར།

དེ་ལས་ལྡོག་པའི་ཕྱོགས་སུ་མིག་ནང་གི་བརླན་བཤེར་བཀྲམས།

འཇའ་ཚོན་གསར་པ་ཞིག་དུས་མཉམ་དུ་ཐོབ།

གནའ་མིའི་ཕྱོགས་སུ་བསྲིངས་པའི་ཟམ་པ་ཞིག་གིས།

རྣ་བ་བརྒྱ་དང་བརྒྱད་འཁྲོལ་བར་བྱེད།

རི་མོ་བ།

བེར་ནག་བཤུས་ཤིང་ནང་གི་མི་དེ་གཙང་པོའི་ཕ་རོལ་ཏུ་བསྐྱལ།

ཟམ་པ་ཞིག་གིས་སྐྱེལ་མ་ཞུས་ཤིང་ཆུ་བོ་ཞིག་དྲན་རྟེན་དུ་བཞག

འཇིག་རྟེན་སྤྲོ་དགའི་དོན་རྣམས་མ་ལུས་པ།

མདོར་ན་སྐྱོ་བའི་མདངས་ཅན་ཏེ།

དམ་བཅས་པའང་འགྱུར་འགྲོའོ།

ཕུགས་བསམ་གྱི་བྱིས་པ་ནི་ཚོན་སྨྱུག་ལ་བསྙེས།

ཤ་ཁྲག་པགས་པ་གསུམ་གྱིས་སྣག་ཚ་བྱས་པ་དང་།

རུས་པ་རྒྱུས་པ་ཁུ་བ་བཅས་ཀྱིས་སྨྱུག་ཁོག་གྲུབ་པར་བྱས།

རུས་པའི་གཟར་ཚད་ནི་སྐྱེ་བོ་གང་གི་འགག་གཡང་དང་འདྲ་སྟེ།

དཀའ་སྤྱད་ཀྱིས་འགོ་བའི་མི་ནི་མགོ་བོ་དུད་དེ་སར་བསྡད།

འདུན་པ་ས་སྟེང་ལ་མནན་ཅིང་།

བྲག་རྡོའི་ས་བོན་བཏབ་ནས།

ཁོག་པའི་ནང་གི་འདར་ཆ་སྲ་མོར་བྱས།

བྱེ་མའི་མཁར་རྙིང་ནང་དུ་ཉི་མའི་མདངས་འཛིན་པའི་རྒྱལ་སྲས་བཞུགས་ཡོད།

ཁོས་ཁ་བའི་ལྗོངས་ལ་ཚེ་སྲོག་གི་སྐྱ་རིས་ཇི་བཞིན་བྲིས།

ངེད་ཅག་ནི་གཉེན་ཉེའོ།།

ཁོ་ནི་སྐབས་འགར་ཚིག་རྒྱན་དང་འདྲ་བར།

འཚོ་བའི་བར་གསེང་དུ་བདེ་བར་སྡོད།

རེས་འགར་ཐབ་མེ་དྲོན་མོ་དང་འདྲ་བར།

འཕྱོ་ཞིང་ལྡིང་བའི་རྣམ་ཤེས་ལ་སེམས་གསོ་བྱེད།

སྐབས་འགར་རྟོག་བཟོའི་དོང་ལམ་དུ་བསྡད་དེ།

ལག་པ་ཟུང་གི་རང་ཉིད་གཞན་དེ་བསྒྲིབས།

ངས་ལྐོག་ལྟ་བྱ་མི་རུང་བའི་རྣམ་ཤེས་དེ།

མར་མར་ལྷུང་དུ་འཇུག་ཀྱང་མི་རུང་།

ངེད་ཅག་ནི་གཉེན་ཉེའོ།

ཆར་ཆུ།

ཆར་ཆུས་ཉ་མོ་ཞིག་འཆི་བར་ངན་སྐུལ་བྱས།

ཆར་ཆུ་རང་གི་མི་ཚེ་ལས་ཐར་མ་ཐུབ།

ཆར་ཆུ་མར་ནུབ་པའི་སྲང་ལམ་དུ།

སྐྱེ་བོ་གང་ཞིག་སྐད་མི་འབྱིན་པར་ངུ་བར་བྱེད།

མདུན་དུ་སོང་ན་སྐར་ཁྱིམ་ཞིག་ལ།

གང་འདོད་དུ་བརྡུངས་པའི་རྗེས་ཤུལ་ཡོད་དོ།

ཆར་ཆུས་མི་ཚོགས་ཤིག་གི་སྟོང་ཆ་གསབ་ཐབས་བྲལ།