དྲང་གཏམ།——མ་ཡུམ་དུས་ཆེན་ལ་ཕུལ་བ།

ངག་རྒྱུན་ལྟར་ན། ང་ཚོ་གདོང་དམར་བོད་པའི་རིགས་རྒྱུད་ནི་ཕ་སྤྲེའུ་བྱང་ཆུབ་སེམས་དཔའ་དང་མ་བྲག་སྲིན་མོ་གཉིས་ལས་ཆད་པའི་རྐྱེན་གྱིས་སྐྱེས་པ་རྣམས་ལ་བྱམས་དང་སྙིང་རྗེ་ལྡན་ཞིང་དཔའ་ངར་ཆེ་བ་དང་། བུད་མེད་རྣམས་ནི་དེ་ལས་ལྡོག་སྟེ་གདུག་རྩུབ་ཆེ་ཞིང་རང་གཤིས་གྱོང་བས་བྱ་ནག་མོ་གཉིས་ལ་རྣ་བ་མེད། ཤིག་སྲོ་མ་གཉིས་ལ་རུས་པ་མེད་ཟེར། ཡིན་ཡང་ཞིབ་ཏུ་བརྟགས་ནས་བསམ་བློ་ཞིག་བཏང་ཚེ། དེ་ནི་ཁུངས་མེད་འུར་སྒྲོག་གི་ལོང་གཏམ་ཁོ་ན་ཞིག་ཡིན་པ་ལས་བུད་མེད་ཀྱི་རང་གཤིས་ངོ་མ་ནི་དེ་ལྟ་བུ་ཞིག་ག་ལ་ཡིན་མ་ཡིན་ནོ། །ཁོ་མོ་ཚོ་ནི་དེ་ལས་ལྡོག་སྟེ་བསམ་པ་བཟང་ཞིང་བློ་ཁོག་དྲང་བ་དང་། བྱ་བ་ཆེ་ཕྲ་གང་ལའང་གཞན་དོན་ཁུར་ཁྱེར་གྱི་བསམ་བློ་དང་སྙིང་སྟོབས་མངའ་བའི་རླབས་ཆེན་གྱི་གང་ཟག་ཅིག་ཡིན་པ་འདས་ཟིན་པའི་ལོ་རྒྱུས་དག་ལ་རོབ་ཙམ་ཕྱི་བལྟས་ཤིག་བྱོས་དང་། ས་ཕྱར་ན་རྡོ་ལྷང་ལ་འབུད་ཟེར་བའི་དཔེ་ལྟར་བདེན་རྫུན་གྱི་ལེགས་ཉེས་རྩོད་མི་དགོས་པར་རང་བཞིན་གྱིས་གསལ་ངེས་ཡིན་ནོ། །

དེ་བས། ད་ལྟའི་དུས་འདི་རྩོད་ལྡན་སྙིགས་མ་ལྔ་བདོ་བའི་དུས་ཡིན་པར་མ་ཟད། ཉེར་གཅིག་དུས་ཀྱི་དཔལ་འབྱོར་མཚོ་ལྟར་རྒྱས་པའི་སྐབས་ཡིན་པའི་རྐྱེན་གྱིས་ཕོ་བ་འགྲངས་ན་དཔའ་གཏམ་དང་ཉི་མས་དྲོས་ན་སྟོང་གཏམ་མང་ཟེར་བ་བཞིན། སྐྱེས་པ་རྣམས་ཀྱིས་ཕོ་མཆོག་མོ་དམན་གྱི་ལྟ་བ་བརྗོད་ཀྱིན་ཡོད་ལ། བུད་མེད་ཚོས་ཀྱང་ཕོ་མོ་འདྲ་མཉམ་གྱི་སྲིད་ཇུས་སྨྲ་བཞིན་ཡོད་པ་རེད། དོན་དམ་དུ་བཤད་ན། དེ་ནི་རྒྱལ་བོ་གླང་དར་གྱི་མགོ་ན་རྭ་ཡོད་མེད་བརྩད་པའི་གཏམ་རྒྱུད་བཞིན་ལོ་ཉི་ཤུའི་ཉི་མ་སྟོང་ཟད་ལ་བཏང་ཞིང་། ཝ་དམར་བོའི་གྲ་ཁ་རླུང་ཟད་ལ་བཏང་དང་གཏོང་གིན་ཡོད་པ་རེད་སྙམ། དེ་མིན་ན་སྦྲུལ་གྱི་མདུད་པ་སྦྲུལ་ཁོ་རང་གིས་བཤིག་དགོས་པ་བདེན་མོད། འོན་ཀྱང་ཐག་པ་སོགས་ཀྱི་མདུད་པ་ནི་ངེས་པར་དུ་གཞན་གྱིས་བཀྲོལ་དགོས་པ་དེ་བཞིན་དུ་ཕོ་མཆོག་མོ་དམན་གྱི་ཁྱད་པར་དང་དྲིན་ལན་གྱི་རྒྱ་ཆེ་ཆུང་ཡང་གཟུ་བོར་གནས་པ་གཞན་ཞིག་གིས་ཐག་གཅོད་དགོས་པ་མ་རེད་དམ།

དེས་ན། གཞན་ཞིག་གིས་བདག་ལ་གདམ་གསེས་ཅི་ཡང་མེད་པའི་སྒོ་ནས་སྲེག་བཅད་བརྡར་བའི་གསེར་བཞིན་དུ་དེ་སྔ་དཔྱད་བསྡུར་བྱས་ཟིན་པའི་ཁྱོད་རང་ཉིད་ཀྱི་ལྟ་བ་ངོ་མ་བོ་ངེས་པར་དུ་བཤད་དགོས་ཟེར་ན། སྲིད་པ་འཇིག་རྟེན་འདིའི་སྟེང་གི་རྐང་གཉིས་འགྲོ་བ་སྤྱིའི་ཕོ་མཆོག་མོ་དམན་གྱི་ལྟ་བ་དང་གཞན་དོན་ཁུར་ཁྱེར་གྱི་བསམ་བློའི་རྒྱ་ཆེ་ཆུང་ལ་ཁ་ཚོན་གཅོད་མི་ཐུབ་མོད།འོན་ཀྱང་རང་མྱོང་མ་དཔྱད་ལ་མཁས་ཟེར་བ་ལྟར། རང་བློ་རང་ལ་ལྐོག་ཏུ་མ་གྱུར་པ་ཡིན་པས་འབྲི་མི་དགོས་ཡིག་ཆུང་ངོས་ན་ཡོད། འདོན་མི་དགོས་ཨ་ཁུའི་སེམས་ན་གསལ་ཟེར་བ་བཞིན།རང་སེམས་ཀྱི་དྲན་པའི་མཁའ་དབྱིངས་ན་ཉི་ཟླ་བཞིན་ནམ་ཡང་འོད་དུ་འཚེར་བའི་དྲིན་ཆེན་ཕ་མ་གཉིས་ལ་དཔེ་དྲངས་ནའང་། རང་གི་བུ་ལ་གཅེས་ཕྲུག་གི་ཆོ་ལོ་གནང་སྟེ་དབྱར་གཞུང་ལྟ་བུའི་བྱམས་བརྩེ་དྲིན་མོས་བསྐྱངས་པ་འདྲ་འདྲ་ཡིན་ཡང་། དྲོད་ཁོལ་འཁྱིལ་བའི་མངལ་གྱི་གུར་ཁང་དུ་འཁུར་མཁན་དེ་ཨ་མ་ཡིན་ལ། ཞིམ་མངར་ལྡན་པའི་ནུ་ཞོས་ལྟོགས་སྐོམ་སེལ་མཁན་དེ་ཡང་ཨ་མ་རེད། ད་དུང་གཙང་བཙོག་ལ་མི་འཛེམས་པར་ཁ་སྣ་མཆུ་ཡིས་གཞིབ་མཁན་དེ་ཨ་མ་ཡིན་ལ། གཅིན་སྐྱག་ལག་པས་འབྱིད་མཁན་དེ་ཡང་ཨ་མ་ཡིན་པ་བསྙོན་དུ་མེད་དོ། །

དེ་བཞིན་དུ་ལོ་རྒྱུས་ཀྱི་དཀྱོགས་མཚམས་འདི་ནས་གནའ་སྔ་མོའི་འབྲོག་ཕྱོགས་ཀྱི་བུད་མེད་དག་གི་བསུབ་ཏུ་མེད་པའི་ལས་དབང་ལ་ཕྱི་མིག་ཅིག་བལྟས་ཏེ་བཤད་ནའང་། སྦྲ་མཐིང་སྨུག་གི་སྒོ་དར་རླུང་ལ་སྐྱོད་ཀྱིན་གོ་ཁ་བུས་གང་ཞིང་། སྒོ་ཁ་རྒྱུས་གང་ཡོད་པ་དེའི་མིང་ལ་འཁོར་བ་ཟེར། འཁོར་བའི་གཞི་འཛིན་པ་ལ་ཐོག་མར་མགོ་སྦྲ་ཕུབ་དགོས་པས། སྦྲའི་གྲུབ་ཆ་གཙོ་བོ་ནི་ནོར་ནག་གི་རྩིད་པ་ལས་བཟོས་པ་ཡིན་ཏེ། གཉེན་སྟོན་དང་སྦྲ་སྟོན་གྱི་སྐབས་སུ་སྐྱེས་པ་སྨྲ་ལྕེ་བདེ་མོ་ཅན་ཞིག་གིས་མཆོད་ཁ་འཕེན་ཞོར་དུ། ཡ། ངས་གཡུ་སྦྲ་མཐིང་སྨུག་གོང་དགུ་འདི་ལ་བསྟོད་པ་རྣམ་གསུམ་རེ་བྱས་ན། འདི་གཡག་ཀ་ལ་བརྒྱ་ཡི་མཆན་རྩིད་ཡིན། ། འབྲི་ཐུལ་མ་བརྒྱ་ཡི་ལག་རྩིད་ཡིན། །འཕང་ཤིང་ཙན་དན་དམར་བོ་ཡིན། །འཕང་ལོ་གསེར་རྡོ་སེར་བོ་ཡིན་ཞེས་བསྟོད་པ་བྱེད་ཀྱིན་ཡོད་པ་ལྟར། ཐོག་མར་རྩིད་པ་བསེད་དེ་སྤུས་གཙང་བཟོས་ནས་ཚད་དང་རན་པའི་རྡོག་མ་རེ་རེ་བྱས་རྗེས། རྡོག་མ་གཅིག་ལག་གཡོན་པའི་ནང་དུ་བཟུང་སྟེ་སྦོམ་ཕྲ་རན་པར་འཕང་ཤིང་གི་སྐེད་ལ་དཀྲི་ཞོར་ལག་གཡས་པའི་མཐེབ་ཆེན་དང་གོང་མཛུབ་གཉིས་ཀས་འཕང་ཤིང་བསྐོར་དགོས། དེའི་མིང་ལ་འཕང་འཁེལ་བ་ཟེར།

འཕང་བཀལ་ཚར་རྗེས་ཐགས་འཐག་དགོས་པས། དེ་ལ་ཡང་དམངས་ཁྲོད་ངག་རྒྱུན་སྦྲ་བསྟོད་ལས་སྦྲ་འདི་གཡུ་སྦྲ་གོང་དགུ་རེད། །སྟེང་ལྷ་མོ་བརྒྱ་ཡིས་བཀལ་ནི་ཡིན། ། ཕྲ་སྦོམ་ཙམ་ཡང་ཡོད་ལེ་མིན། ། འོག་ཀླུ་མོ་བརྒྱ་ཡིས་བརྒྱུས་ནི་ཡིན། ། འགྱུར་ཚགས་ཙམ་ཡང་ཡོད་ལེ་མིན།། བར་གཉན་མོ་བརྒྱ་ཡིས་འཐག་ནི་ཡིན། །ཐགས་སྐུད་ནོར་ཙམ་ཡོད་ལེ་མིན་ཞེས་པ་ལྟར། རང་རང་གི་ལག་རྩལ་ལས་ཐོན་པའི་ཐགས་འཐག་པའི་སྐབས་སུ་རེ་ལྡེ་ཡི་ལྷས་སྟངས་དང་ཞིབ་ཚགས་སོགས་ཀྱི་ཁྱད་ཆོས་འབུར་དུ་ཐོན་དགོས་པས། ལུས་ནས་རྔུལ་ཆུའི་ཡུར་ཆུ་བཞུར་གྱིན་བརྩོན་པ་ཇི་ལྟར་བསྐྱེད་ནའང་ཉིན་རེར་གཞུ་འདོམ་ལྔ་དྲུག་ཙམ་ལས་འཐག་མི་ཐུབ། དེ་མིན་འབྲི་གཡག་གི་རྩིད་པ་དཀར་ནག་བསྲེས་ཏེ་བསྒྲིལ་ནས་སྦྲའི་ཆོན་ཐག་བྱེད་ཀྱིན་ཡོད་ལ། ནོར་ཁུལ་དང་བལ་འཇམ་དཀར་བོ་བསྒྲིལ་ནས་ངོ་ཐིག་དང་གྲུ་ཐག ཡང་ན། སྦྲའི་ཕོ་ལུང་དང་མོ་ལུང་སོགས་བྱེད་ཀྱིན་ཡོད་པས། ཕོ་ལུང་ཐམས་ཅད་གསེར་སྐུད་ཡིན། ། མོ་ལུང་ཐམས་ཅད་དངུལ་སྐུད་ཡིན། ། ཆ་རུ་ཐམས་ཅད་བྱུ་རུ་ཡིན། ། ངོ་ཐིག་ཐམས་ཅད་མུ་ཏིག་ཡིན་ཞེས་བསྟོད་ཀྱིན་ཡོད་པ་ལྟ་བུའོ། །

འཁོར་བའི་རྟེན་གཞི་སྦྲ་ནག་གྲུབ་ཚར་རྗེས། དེའི་ནང་དུ་ཐབ་ཀ་བཟོ་དགོས་པས་ཡར་སྒྱིད་རྟ་ཕོ་ཁ་བཀུགས། མར་སྒྱིད་མནའ་མ་བག་འདུག་ཟེར་བ་བཞིན། རབ་ན་ཐབ་ཁུང་གི་ལོགས་སུ་གཡུང་དྲུང་ལུ་གུ་རྒྱུད་ཀྱི་རི་མོ་སོགས་འབུར་དོད་དུ་ཡོད་པའི་ཁྱད་ཆོས་དང་ལྡན་པ་ཞིག་བཟོ་དགོས་མོད། དེ་མ་ནུས་ཀྱང་སྒྱིད་པུ་གསུམ་དང་ལྡན་པའི་འབྲོག་ཐབ་ཀྱི་ཡོན་ཏན་ངེས་པར་དུ་ཚང་དགོས་པ་རེད། ཐབ་ཀའི་གཡས་ཕྱོགས་ལ་ཕོ་ཁྱིམ་དང་གཡོན་ཕྱོགས་ལ་མོ་ཁྱིམ་ཟེར། ཁྱིམ་ལ་གཡང་འཁོར་ཞིང་ཟས་ལ་བཅུད་ལྡན་པར་མ་ཟད། ཞོ་འོ་མ་སྣོད་དུ་ལྟེམ་མེར་ཡོད་ཅིང་། མར་ཆུར་བ་རི་ལྟར་སྤུངས་ནས་ཡོད་པ། འདི་དག་ཡོད་ཚད་གནམ་ནས་ལྷུང་བ་མ་ཡིན་ལ། ས་ནས་སྐྱེས་པའང་མ་ཡིན་པར། ལུས་ལ་བརྩོན་ཞིང་བློ་ཁོག་ཡངས་པའི་མ་སྲུ་མོ་སྨན་རྣམས་ཀྱིས་ནངས་སྔ་ལངས་སྐར་ཆེན་གྱི་ཞྭ་གོན་ཅིང་། དགོང་འཕྱི་ཉལ་བ་མོ་ཡི་ལྷམ་གྱོན་ནས་ལོ་ཟླའི་འཁོར་སྐྱོད་དང་ཉིན་ཞག་གི་བརྗེ་རེས་བར་ནས་འདི་ལྟ་བུའི་འཚོ་བ་དྲོད་ཁོལ་ལྡན་པ་ཞིག་བསྐྲུན་པ་མ་ཡིན་ནམ།

དེ་མིན། ད་དུང་འབྲོག་པའི་ཁྱིམ་གཞིས་ཤིག་གི་འཚོ་བའི་གོ་རིམ་དང་ཁྱིམ་བདག་ཨ་མ་ཞིག་གི་མཛད་རྒྱུ་མེད་པའི་དཀའ་སྡུག་བརྗོད་པའི་ཞར་ཞོར་དུ། བྱམས་ལྡན་མ་ཡུམ་དག་གི་ཐབས་ཤེས་དང་སྙིང་སྟོབས་སོགས་ཀྱང་རགས་ཙམ་བརྗོད་ན། གངས་ཅན་ཁ་བའི་ལྗོངས་ཀྱི་ལོ་རྒྱུས་སྟེང་སྙན་པའི་གྲགས་པ་འབར་བའི་རྗེ་བཙུན་མི་ལ་རས་པ་དེ་ཉིད་ཚེ་གཅིག་ལུས་གཅིག་ལ་སངས་རྒྱས་པའི་གཞི་རྩ་ཡང་ཕར་དེད་ན་ཡུམ་ཆེན་མྱང་ཚ་དཀར་རྒྱན་གྱི་སྙིང་སྟོབས་དང་ཐབས་ཤེས་ལ་རག་ལས་ཡོད་པས། ཨ་ཁུ་དང་ཨ་ནེ་ཡིས་ཁོ་མ་སྨད་ཚོ་སྡུག་ལ་སྦྱར་བའི་གནད་འགག་གི་སྐབས་དེར་མོས་རང་གི་བུ་ལ་ཁྱོད་ཀྱིས་སྟེང་དུ་བེར་གྱོན། འོག་ཏུ་རྟ་ཞོན་པའི་ཡོབ་ཆེན་སྡང་བ་དགྲ་འདི་ཚོའི་གཉའ་ཐོག་ན་ཕར་ཤུད་དེ་བ་ཞིག་འདོད་པ་ཡིན་ཏེ། དེ་རང་མི་འོང་བ་འདྲ། ངན་གཡོ་ཆེ་རབ་འོང་བ་འདྲ་བ་འདུག་པས། མཐུ་གཏད་སེར་གསུམ་མཐར་ཕྱིན་པ་ཞིག་བསླབ་ནས། ཨ་ཁུ་དང་ཨ་ནེ་གཙོ་བྱས་པའི་ཡུལ་མི་ཁྱིམ་མཚེས་རང་རེ་མ་སྨད་ལ་སྡུག་པོ་གཏོང་མཁན་འདི་ཀུན་རྩ་བ་དགུ་རྒྱུད་ནས་རབས་ཆད་པ་ཞིག་འདོད་དེ། ཨེ་འོང་ལྟོས་ཞེས་དང་། ཕན་ཚུན་གྱེས་ཁར་ཡང་གལ་བོ་ཆེ་ལ་ནན་ཏན་གྱི་ཚུལ་དུ་བུ་ཆུང་གི་ལག་མགོ་ནས་བཟུང་སྟེ་གདོང་མཆི་མས་གང་བའི་ངུ་ངག་གིས་བུ་འུ་ཅག་མ་སྨད་ཀྱི་ལས་བསྐོས་ལ་ལྟོས་ལ། ཡུལ་དུ་མཐུའི་རྟགས་ཐོན་པ་ཞིག་ཅིས་ཀྱང་གྱིས་ཤོག་ཅིག ཁོང་ཚོའི་མཐུ་དང་འུ་ཅག་གི་མཐུ་མི་འདྲའོ།། ཁོང་ཚོ་གཅེས་ཕྲུག་རྒྱགས་པའི་མཐུ་ཡིན་པར་འདུག འུ་ཅག་མ་སྨད་སྡུག་ལ་ཐུག་པའི་མཐུ་ཡིན་པས་ཁྱོད་སྙིང་རུས་སྐྱེད་ཤོག་ཅིག རྒྱ་ལ་གལ་ཏེ་བུ་ཁྱོད་ཀྱིས་ཡུལ་དུ་མཐུའི་རྟགས་མ་ཐོན་པར་ལོག་བྱུང་ན། ང་མ་རྒན་མོ་ཁྱོད་རང་གི་མདུན་དུ་ལྕེབས་ནས་ཤི་སྡོད་དོ་ཞེས་གསུངས་འདུག

ངས་དང་ཐོག<<རྣལ་འབྱོར་གྱི་དབང་ཕྱུག་ཆེན་པོ་མི་ལ་རས་པའི་རྣམ་མགུར>>ཀློག་ཐེངས་རེར་དགྲ་ཤ་ལེན་པའི་ཕྱིར་དུ་ནར་མ་སོན་པའི་བུ་ཆུང་མཐེ་བོང་ཙམ་ཞིག་ས་མཐར་བརྫངས་པའི་མྱང་ཚ་དཀར་རྒྱན་གྱི་བྱ་སྤྱོད་ལ་ཁོང་ཁྲོ་ཟ་ཡི་ཡོད་མོད། འོན་ཀྱང་དེ་ནི་རང་གི་བུ་ལ་སྦྱོང་བརྡར་ལེགས་པོ་ཞིག་ཐོབ་ཆེད་ཨ་མ་ཞིག་གིས་བསྒྲུབ་པར་དཀའ་བའི་སེམས་ཁམས་ལས་བརྒལ་ཡོད་པས། ད་ནི་བདག་གིས་ཀྱང་ཡོད་ཚད་བློས་གཏོང་ཐུབ་པའི་ཁོ་མོའི་སྙིང་སྟོབས་དང་ཆོད་སེམས་ལ་ཡི་རང་བྱས་དང་བྱེད་ཀྱིན་ཡོད་པར་མ་ཟད། ཁྱད་པར་དུ་ཡུམ་མྱང་ཚ་དཀར་རྒྱན་གྱིས་རྟ་ཁ་ཐུབ་ཙམ་གྱི་རང་གི་གཅེས་ཕྲུག་གཅིག་པོ་ས་མཐར་བརྫངས་པ་དེས། བོད་མི་རིགས་ཀྱི་ཤ་གསེང་རུས་གསེང་དུ་ཐིམ་པའི་ངག་རྒྱུན་ཞིག་ལ་བུ་གཅིག་པོར་བན་དེ་མ་བྱེད། རྟ་གཅིག་པོར་སྲུང་རྟགས་མ་འདོགས་ཞེས་པའི་ཁུངས་མེད་རྙིང་ཞེན་གྱི་སྐྱག་རྫུན་དེའི་མཐིལ་རྟོལ་འདུག་སྙམ།

དེར་མ་ཟད། <<ནགས་ཚང་ཞི་ལུའི་སྐྱིད་སྡུག>>ཅེས་པའི་ནང་དུ། མ་རྒན་རང་སྲོག་ཤོར་ཡང་བུ་ཕྲུག་སྤྱང་ཀིར་མ་བྱིན་ཟེར་བ་ཞིག་འདུག དེ་ནི་སྤྱི་ཚོགས་རྙིང་བའི་སྐབས་སུ་ནགས་ཚང་འདུར་ཁོ་སོགས་ལྷ་སར་འགྲོ་བའི་ལམ་སྐབས་ནས་དངོས་སུ་མཐོང་བའི་གཏམ་རྒྱུད་ངོ་མ་ཞིག་སྟེ། ཐོས་ན་ཡིད་སྐྱོ་ཞིང་སྐྱི་གཡའ་བ་ཞིག་རེད་ཨང་། གང་ལྟར་གཏམ་རྒྱུད་དེ་ལས་མོའི་ལུས་ཡོངས་རྫོགས་གང་ལ་བལྟས་ན་ཁྲག་གིས་སྦགས་ཡོད་པ་དང་། རས་ཆོན་སྔོ་དམར་གཉིས་རྒྱག་བྱས་ཡོད་པའི་སློག་པ་ནི་སྐེད་པའི་སྐ་རགས་བསྡམས་ཡོད་སར་ཅུང་ཙམ་ལྷག་ཡོད་པ་མ་གཏོགས་གཙབ་ཤ་འཁོར་ལོ་བྱས་ཚར་འདུག་ལ། མོའི་རྒྱབ་དང་ཁོག་སྨད། ལག་པ་གཡས་གཡོན་གྱི་དཔུང་ཤ་ཐམས་ཅད་སྤྱང་ཀིས་ཟོས་ཚར་ནས་རྒྱུས་པ་ཤ་རེ་ཤུར་རེ་གཡུག་འདུག དེ་མིན་རྒྱབ་ཀྱི་སོག་ཞབས་དང་རྩིབ་གུའི་བར་ནས་ཀྱང་ཤ་བཀོག་ཚར་ནས་གློ་བ་ལའང་གནོད་པ་བྱས་ཡོད་པའི་རྐྱེན་གྱིས་དབུགས་ལེན་དུས་ཙིར་སྒྲ་གྲག་གིན་འདུག་ནའང་། མོའི་མཆན་འོག་ཏུ་བཟུང་བའི་བྱིས་པ་དེའི་ལུས་ཐོག་ཏུ་རྨ་ཁ་ཅུང་ཙམ་ཡང་མི་འདུག་ཟེར། དེ་ནི་བུ་ཡི་ཚེ་སྲོག་སྲུང་ཕྱིར་རང་ལུས་གཅན་གཟན་ལ་ཕངས་མེད་དུ་སྦྱིན་པའི་བྱམས་ལྡན་ཨ་མ་ཞིག་གི་སྙིང་སྟོབས་དང་བརྩེ་བ་ཡིན་པས། ཨ་མའི་བརྩེ་བ་ནི་ཆུ་བོ་བཞིན་དུ་དྭངས་ཤིང་གཙང་ལ། ཉི་མ་ལས་ཀྱང་དྲོད་ཁོལ་ལྡན་ཨང་།

གང་ལྟར། ཁོ་མོ་ཚོས་འཚོ་བའི་ཁ་རྒྱབ་ཀྱི་ཕྱིར་དུ་རང་ཁྱིམ་གྲུ་བཞི་མ་དེའི་ལས་འགན་ཡོད་ཚད་ཕྲག་ཏུ་བླངས་ཏེ། ཐོ་རངས་སྐར་ཆེན་དང་ལྷན་དུ་ནོར་ཁྱུ་རི་ནས་ཕབ་སྟེ་འབྲི་མོའི་འོ་མ་འཇོ་བ་དང་། བཞོས་ཚར་རྗེས་འོ་མ་དཀྲོགས་ནས་མར་ལེན་པ། དེ་རྗེས་དར་བ་བསྐོལ་ཏེ་གཤེར་ཁུ་བཙགས་ནས་ཆུར་བ་ལེན་པ། ལག་སྐོར་རམ་མཆིག་བསྐོར་ཏེ་རྩམ་པ་འཐག་པ། ཨོང་བ་འཐུ་བ། རིལ་མ་བསྒྲུགས་པ། ཆུ་ལེན་པ་སོགས་ཉིན་རེར་ཚར་རྒྱུ་མེད་པའི་ལས་ཀ་ལུ་གུ་རྒྱུད་དུ་ཡོད་པས་ཁྱིམ་གྱི་བདག་མོ་རྣམས་ཕར་ཞོག ཐ་ན་ལ་མགོའི་ཉི་རྩེ་བཞིན་ནུབ་ལ་ཉེ་བའི་རྒས་འཁོགས་མ་རྒན་དག་ཀྱང་ལག་ལས་ཀའི་བར་ན་འདར་འདར་གྱིས་བྲེལ་གྱིན་ཡོད་ན་ཡང་། སྐྱེས་པ་རྣམས་ནི་ཐེད་ཀྱིས་འགྲངས་པའི་རྒོད་པོ་ཞིག་དང་འདྲ་བར་ངའོ་སྙམ་པའི་ང་རྒྱལ་གྱིས་ཁེངས་བཞིན་སོས་དལ་བག་ཕེབས་ངང་གར་འགྲོ་གར་འདུག་རང་དབང་ཡིན་པ་སོགས་ལ་ཞིབ་ཞིབ་ཏུ་དཔྱོད་དང་། དེ་གཉིས་ཀྱི་བཀའ་དྲིན་ལ་ཁྱད་མེད་ཀྱི་རྟགས་མཚུངས་ཤིག་འདྲེན་ཐབས་ཡོད་དམ། དེར་མ་ཟད་ཁྱིམ་ཚང་ཞིག་ན་སྐྱེས་པ་ཞིག་མེད་ན། ཁྱིམ་ཚང་དེའི་མདངས་ཡལ་ཞིང་མདོག་ཤོར་མི་སྲིད་མོད། འོན་ཀྱང་དེ་ལས་ལྡོག་སྟེ་བུད་མེད་ཅིག་གི་གོམ་སྒྲ་མེད་ཚེ། ཁྱིམ་ཚང་དེར་དྲོད་ཁོལ་མེད་ལ། ་བློ་གཟུ་བོར་གནས་པའི་སྒོ་ནས་དྲང་གཏམ་ཞིག་བརྗོད་ན། ལྷིང་འཇགས་ཀྱི་འཚོ་བ་ཞིག་དང་བདེ་སྐྱིད་ཀྱི་དགོད་སྒྲ་ཞིག་གང་ན་ཡོད། ཡོད་མི་སྲིད་དོ། །