ཨ་མྱེས་ནི་ངའི་དཔྲལ་བའི་མིག་ཡིན།

ཉེ་ལམ་ང་ལ་ངལ་གསོའམ་སློབ་གསེང་གི་སྐབས་སུ་རྒྱུན་ལྡན་ལྟར་དཔེ་ཆ་ཀློག་པ་དང་ཁ་པར་རྩེ་བ་ལས་གཞན་མཚམས་མཚམས་སུ་དམིགས་ཡུལ་དང་ཁ་ཕྱོགས་གང་ཡང་མེད་པར་བཞུད་ཟིན་པའི་ལོ་ཟླ་དག་ལ་ཕྱིར་དྲན་བྱེད་པའི་གོམས་སྲོལ་ཞིག་ཆགས་འདུག དེ་ནི་ཆུང་ཆུང་བྱིས་དུས་ཀྱི་རྩེད་ར་གོར་མོ་དེའི་ནང་གི་གཏམ་རྒྱུད་ཡིན་ཆོག་ལ་།ཤེས་བྱའི་མཛོད་འཛིན་པའི་ལྡིང་ཁང་གྲུ་བཞི་དེའི་འོག་གི་བྱུང་བ་ཡང་ཡིན་རུང་བ་དང་། རང་དང་འབྲེལ་ཡོད་ཀྱིདགའ་སྐྱོ་འདྲེས་མའི་བརྗོད་གཞི་ཞིག་ཡིན་ངེས་ལ་ཡང་ན་རང་ཉིད་ལ་འབྲེལ་བ་ཏིལ་འབྲུ་ཙམ་ཡང་མེད་པའི་ཉེ་ལོགས་ཀྱི་དོན་བྱ་གང་ཞིག་ཡིན་ཡང་སྲིད། གང་ལྟར། དེ་ཡིས་ངའི་གནས་སྐབས་དེའི་སུན་སྣང་དང་ངལ་དུབ་མང་པོ་ཞིག་ཕྱོགས་ཕྱོགས་སུ་བདས་ཏེ་ང་ལ་ལྷིང་འཇགས་ཀྱི་དུས་ཤིག་སྦྱིན་ཡོང་ལ་དབུགས་དབྱུང་གི་གོ་སྐབས་མང་ཙམ་སྤྲད་ཡོང་།

དེ་ལྟར་ངས་ཐེངས་མང་པོར་ཕྱིར་དྲན་བང་མཛོད་ཀྱི་སྒོ་མོ་ཆེ་བར་ཕྱེས་ཏེ་རྒྱང་ལ་བཞུད་སོང་བའི་ལོ་ཟླ་དག་གི་བར་གསེང་རེ་རེ་ནས་འཚོལ་དུས།དྲན་པའི་མེ་ལོང་གི་ངོགས་སུ་དགའ་སྐྱོ་ཆགས་སྡང་གིས་བྱུགས་པའི་ཕལ་བའི་མི་ཞིག་གི་འཚོ་བ་ཤར་ཡོང་ལ།དེ་ལྟ་བུའི་དོན་བྱ་མང་བོའི་ཁྲོད་བག་ཆགས་ཆེས་ཟབ་པ་ནི་ཕལ་ཆེ་བ་ཨ་མྱེས་དང་འབྲེལ་བའི་དོན་དེ་དག་རེད། ངའི་ཨ་མྱེས་ནི་སློབ་གྲྭར་སོང་མ་མྱོང་བར་རྫ་མགོ་རི་མགོར་ནོར་ལུག་གི་རྨིག་རྗེས་སུ་འབྲངས་པའི་འབྲོག་པ་རྣལ་མ་ཞིག་ཡིན་ལ། ནོར་ལུག་གི་རྗེས་ནས་དཔེ་ཀློག་བྱེད་པར་གོམས་ཡོད་པའི་འབྲོག་མི་དཀྱུས་མ་ཞིག་ཀྱང་ཡིན། བྱིས་དུས་སུ། ཨ་མྱེས་རྒྱུན་པར་སྦྲ་ནག་གི་འདབས་དང་ནོར་ལུག་གི་མཐའ་ནས་ང་རང་པང་དུ་བཟུང་སྟེ་རྒྱང་རིང་དུ་བལྟ་རུ་འཇུག ཁོང་གིས་བཙན་པོ་སྲོང་བཙན་གྱིས་སློབ་དཔོན་ཐོན་མི་རིག་གནས་ཀྱི་རུ་མ་འཚོལ་དུ་མངགས་སའི་ས་དེ་རྒྱང་རིང་ན་ཡོད་པར་བཤད་ལ། རྒྱལ་བའི་བསྟན་པ་དེ་ཆེས་ཐོག་མར་དར་ས་ཡང་རྒྱང་རིང་ཞིག་ཡིན་པར་བཤད་ལ་ལྷ་ས་དང་པོ་ཏ་ལ་ཡང་རྒྱང་རིང་ན་ཡོད་པར་ལབ། ད་དུང་ཁ་སང་གི་གཏམ་རྒྱུད་མང་པོ་ཞིག་རྒྱང་རིང་ནས་བྱུང་ཚུལ་དང་མ་འོངས་བའི་དོན་མང་བོ་ཞིག་ཀྱང་རྒྱང་རིང་ནས་འབྱུང་ངེས་པར་བཤད་ལ། དེ་དག་གི་མཚར་སྡུག་ལ་རོལ་མྱོང་བྱེད་འདོད་ན་སློབ་གྲྭར་འགྲོ་དགོས་པ་དང་དཔེ་ཀློག་བྱེད་དགོས་ཞེས་གདམས་མྱོང་། དེ་བས། ཆུང་དུས་ཀྱི་ངས་གཡའ་དག་པའི་བྱིས་བློའི་མཁའ་དབྱིངས་སུ་རྒྱང་རིང་ཞེས་པའི་མཛེས་སྡུག་གི་ཡུལ་གྲུ་ཞིག་བཞེངས་བསྐྲུན་བྱས་ཡོད་ལ། ནར་སོན་གྱི་བརྒྱུད་རིམ་ཁྲོད་དུ་ཡང་གནས་དེར་འགྲོ་ཐུབ་པའི་ལམ་གཅིག་པུ་སྟེ་སློབ་སྦྱོང་ལ་ཧུར་བརྩོན་དང་དཔེ་ཀློག་གི་གོམས་གཤིས་ཤིག་ཆགས་པར་འབད་ཀྱིན་ཡོད། ད་ལྟ་ཕྱིར་འདང་རེ་བརྒྱབས་ན། ངའི་ཨ་མྱེས་ནི་དངོས་གནས་ཨ་མྱེས་གཞན་དག་དང་མི་འདྲ་བ་ཞིག་རེད་འདུག་སྟེ། ཨ་མྱེས་དུ་མས་བུ་མོ་འགྲོ་ས་གནས་ཡུལ་ཡིན་པའི་ལྟ་བའི་རྒྱ་ལས་མ་ཐར་བར་ཡོད་དུས། ངའི་ཨ་མྱེས་ཁྱིམ་ཚང་གི་དཀའ་ངལ་ལ་མ་བལྟས་པར་ང་རང་སློབ་གྲྭར་བསྐྱལ་བ་དང་དུས་རྒྱུན་ང་ལ་སློབ་སྦྱོང་ལ་ཧུར་བརྩོན་བྱེད་དགོས་པར་གདམས་ཡོང་མ་ཟད། རིག་གནས་གཙིགས་འཛིན་གྱི་བསམ་བློ་དེ་དཀའ་སྡུག་གི་རླུང་བུ་དྲག་ཏུ་གཡུགས་ཀྱང་འཁུར་ཐུབ་མེད་ལ་ལོ་ཟླས་ཆར་ཆུས་ཇི་ལྟར་བྲན་ཡང་བསུབ་ཐུབ་མེད།དེ་བས་ངས་ནི་འདི་ལྟ་བུའི་ཨ་མྱེས་ཡི་བསླབ་བྱ་ལ་ཉན་བཞིན་ནར་སོན་ལ།ཕ་ཡུལ་དང་བྲལ་དུས་ཀྱི་རིང་ནས་ནང་སེམས་ཀྱི་རྒྱང་རིང་དེ་འཚོལ་དང་འཚོལ་བཞིན་ཡོད་ཅིང་། ནམ་ཡང་རྒྱང་རིང་ན་ད་གཟོད་རང་ཉིད་ལ་དབང་བའི་ལམ་བུ་དེ་ཡོད་ངེས་པར་བསམ་ཡོད། ཡིན་ནའང། ད་ལྟ་ང་རང་རྒྱང་རིང་གི་གནས་མལ་འདི་རུ་ཁ་ཕྱོགས་དང་དམིགས་འབེན་ཅི་ཡང་མེད་པའི་མི་ཞིག་ཏུ་གྱུར་ཡོད་དེ། དུས་ཀྱི་ཆ་ཕལ་མོ་ཆེ་རུ་ངས་རང་ཉིད་ཕྱོགས་གང་ནས་གང་ལ་བགྲོད་དགོས་པའང་ཤེས་ཀྱིན་མེད། འདི་ལྟར་ངས་མདུན་གྱི་བགྲོད་ལམ་བོར་ཏེ་མགོ་འཐོམས་ནས་ཡོད་དུས། ཨ་མྱེས་ཀྱི་ལྷག་བསམ་གྱི་སྤྱན་གྱིས་ཡང་བསྐྱར་ང་ལ་སྡོངས་གྲོགས་མཛད་པ་རེད། ངའི་ཨ་མྱེས་ནི་དངོས་ནས་ཁྱིམ་ཚང་གཞན་གྱི་ཨ་མྱེས་དང་མི་འདྲ་བར་འདུག་ཨང་། ཁྱིམ་མཚེས་ཀྱི་ཨ་མྱེས་དུ་མ་ཕྱིའི་མཛེས་སྡུག་གི་བསླུ་བྲིད་ལ་ཆགས་ནས་རང་གི་བུ་དང་བུ་མོ་ཕྱི་ལ་འགྲོ་བར་སྐུལ་དུས།ངའི་ཨ་མྱེས་གཅིག་པུས་ང་རང་ཕྱིར་རང་གི་ཕ་ཡུལ་ལ་ལོག་དགོས་པར་གདམས་བྱུང་། ཁོང་གིས་ང་ལ་གཙུག་ལག་རིག་གནས་བཅུ་ཕྲག་གི་བདུད་རྩི་འཇོ་ས་དེ་ཕ་ཡུལ་ཡིན་པ་དང་དམ་ཆོས་བསུང་ཆབ་གཙང་མས་བྱབས་ཁྲུས་གནང་ཡོད་པའི་གནས་དེ་ཡང་ཕ་ཡུལ་ཡིན་པར་ལབ་ལ། ད་དུང་གླིང་གེ་སར་རྒྱལ་བོ་དང་སྨན་འབྲུག་མོའི་མཛེས་སྡུག་གི་སྒྲུང་རིང་སོགས་ཆུང་དུས་ང་ལ་བཤད་མྱོང་བའི་ངོ་མཚར་བའི་གཏམ་རྒྱུད་མང་བོ་ཞིག་གི་འབྱུང་ཁུངས་ཡང་ཕ་ཡུལ་ཡིན་པར་བཤད། ཕ་ཡུལ་ན་ངའི་རྩེད་རོགས་རྟ་ནོར་ལུག་གསུམ་དང་ཕ་ཁྱིམ་རེ་སྦྲ་སྨུག་པོ། ཕ་མེས་ཀྱིས་བཞག་པའི་སྲོལ་རྒྱུན་དང་ཡབ་མེས་ཀྱིས་མཛད་པའི་རིག་གཞུང་སོགས་ཡོད་པར་བཤད་དུས།ངའི་སེམས་སུ་རང་དབང་མེད་པར་སྐད་ཆ་ཚིག་གཅིག་དྲན་ཡོང་སྟེ་དེ་ནི〝ང་ཕ་ཡུལ་ན་ཡོད་དུས་ཕ་ཡུལ་ཧ་ཅང་ཆུང་། ཕྱིར་ཕ་ཡུལ་ལ་ལྟ་དུས་ཕ་ཡུལ་ནི་ཧ་ཅང་ཆེ།〞ཞེས་པ་དེ་རེད།དངོས་ནས། མི་ཞིག་རང་ཉིད་ཀྱི་ཉེ་འགྲམ་དུ་ཡོད་པའི་བྱ་དངོས་གང་དེར་ཁ་ཐག་རིང་དུ་གྱེས་རྗེས་ད་གཟོད་དེའི་སྟེང་གི་མཛེས་སྡུག་ངོ་མ་དེ་མཐོང་ཐུབ་ཟེར་བའི་གཏམ་དེ་བདེན་པརའདུག་ཨང་། ང་རང་ཆུང་དུས་ནས་ཕ་ཡུལ་གྱིས་བསྐྱངས་ཤིང་གཉོར་ནས་ད་ལྟའི་བར་སོན་ཡང་ངས་ཕ་ཡུལ་གྱི་མཛེས་སྡུག་ངོ་མ་དེ་རྟོགས་མ་ཐུབ་ལ། ད་ལྟ་ཕ་ཡུལ་དང་རྒྱང་རིང་བའི་གནས་འདི་ནས་ཕྱིར་ལྟ་བྱེད་དུས། ད་གཟོད་ངའི་ཕ་ཡུལ་ནི་རིན་ཐང་གཞལ་ཡས་ཀྱི་ནོར་བུ་ཞིག་ཡིན་པ་རྟོགས་ལ། ཆུང་དུས་ངའི་ཨ་མྱེས་ཀྱི་ཁ་ཏའི་ཁྲོད་ཀྱི་རྒྱང་རིང་དེ་དང་ཡུན་རིང་པོར་ནང་སེམས་ཀྱི་རྒྱ་རུ་མི་ཚེའི་མཇུག་མཐའི་གནས་མལ་དུ་སྒོམ་ཡོད་པའི་རྒྱང་རིང་དེ་ནི་དོན་ལ་ཕ་ཡུལ་ཡིན་པ་རྟོགས་བྱུང་།

ཨ་མྱེས་ནི་ངའི་དཔྲལ་བའི་མིག་རེད།ངའི་མདུན་གྱི་ལམ་བུར་རྡོག་པ་བཀོད་དུས་དེ་དྲང་བདེན་དང་འོས་འཚམ་གྱི་ལམ་ཞིག་ཡིན་མིན་ལ་ལྟ་བའི་མིག་དེ་རེད། ང་རང་སྐྱེས་དུས་ཁོག་གི་སྙིང་ལས་མི་འདུག་ཀྱང་ཨ་མྱེས་ང་ལ་དཔྲལ་བའི་མིག་ཅིག་བསྩལ་བྱུང་།ངས་རྩོམ་ཡིག་མང་བོ་ལས་བུ་ཕྲུག་ནི་ཕ་མའི་ཁོག་པའི་སྙིང་དང་དབྲལ་བའི་མིག་རེད་ཅེས་བྲིས་ཡོད་པ་མཐོང་མྱོང་ལ་ང་རང་ཉིད་ཀྱིས་ཀྱང་དེ་ལྟར་བྲིས་མྱོང་།ཡིན་ནའང་དེ་རིང་ད་གཟོད་ངས་ཨ་མྱེས་ནི་རང་གི་དཔྲལ་བའི་མིག་ཡིན་པའི་དོན་དངོས་དེ་གསལ་བོར་རྟོགས་བྱུང་།བྱིས་དུས་སུ་རྩེད་དགོད་ཀྱིས་གཡེང་ནས་མི་འཁྱེར་བའི་ཆེད་རྒྱང་རིང་གི་མཛེས་སྡུག་གླེང་སྟེ་ངའི་བྱིས་བློའི་མཚར་ཉམས་སློང་མཁན་དེ་དང་ནར་སོན་དུས་ཕྱི་ཡི་ཁྲ་ཁྲ་རིག་རིག་གི་འཇིག་རྟེན་དེའི་ཁྲོད་མགོ་བོ་འཐོམས་ནས་རང་གི་རིག་གཞུང་གི་རྐང་བརྗེད་ནས་འདོར་བར་དོགས་སྟེ་ཕྱིར་ལོག་པར་གདམས་མཁན་གྱི་མི་དེ་རེད།ཨ་མྱེས་ཀྱིས་ང་ལ་ལམ་ཁའི་རྒྱགས་བྲོ་མང་བོ་ཞིག་གནང་མྱོང་།ཨ་མྱེས་ཀྱིས་ང་ལ་གྱེས་དུས་ཀྱི་རྫོང་བ་དཔག་མེད་ཅིག་བསྩལ་མྱོང་། དེ་བས་ངས་ཀྱང་ཕྱིར་ལྡོག་དུས་ཨ་མྱེས་ལ་ལེགས་སྐྱེས་གྱ་ནོམ་པ་ཞིག་འཁྱེར་ཨེ་ཐུབ་ལ་འབད་ཀྱིན་ཡོད།

ད་ལྟ་ང་རང་གཅིག་པུ་ལས་ཀྱི་བསྐོས་ཐང་གིས་འཛོམས་པའི་གྲོང་ཁྱེར་འདིར་སྡོད་དུས།ཨ་མྱེས་ཀྱིས་གདམས་པའི་བསླབ་བྱ་དག་ཡང་ཡང་དྲན་ཡོང་།ཡང་ཡང་དྲན་ཡོང་། །