ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོའི་ལས་དོན་ཚོགས་འདུའི་ཐོག་གནང་བའི་གསུང་བཤད།

དེ་སྔོན་ནས་ཏང་ཀྲུང་དབྱང་གིས་བརྗོད་དོན་གཙོ་བོའི་སློབ་གསོ་སྤེལ་རྒྱུའི་སྐོར་གྱི་《བསམ་འཆར་》གཤམ་སྤེལ་བྱས་ཤིང་། ཐེངས་འདིའི་བརྗོད་དོན་གཙོ་བོའི་སློབ་གསོ་དམ་འཛིན་ཡག་པོ་བྱ་རྒྱུའི་ཐད་བཀོད་སྒྲིག་བྱས་ཏེ་བླང་བྱ་གསལ་པོ་བཏོན་ཡོད། འདིར་ངས་གནད་དོན་3བཤད་རྒྱུ་ཡིན།

གཅིག ཐེངས་འདིའི་བརྗོད་དོན་གཙོ་བོའི་སློབ་གསོ་སྤེལ་བའི་དོན་སྙིང་གལ་ཆེན་ལ་ངོས་འཛིན་ཟབ་མོ་བྱེད་དགོས།

རྫོང་དང་ཁྲུའུ་རིམ་པ་ཡན་གྱི་འགོ་ཁྲིད་ལས་བྱེད་པ་གཙོ་གནད་དུ་བཟུང་སྟེ་ཏང་ཡོངས་སུ་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོ་གཏིང་ཟབ་ཏུ་སྤེལ་བ་ནི་ཏང་གི་ཚོགས་ཆེན་ཉི་ཤུ་པའི་དགོངས་དོན་ལག་བསྟར་དོན་འཁྱོལ་བྱེད་པའི་བྱེད་ཐབས་གལ་ཆེན་ཞིག་ཡིན་པ་དང་། ཏང་ཡོངས་ཀྱི་བསམ་བློ་གཅིག་གྱུར་དང་། ཏང་ནང་ཁུལ་དུ་གནས་པའི་གནད་དོན་འབུར་ཐོན་ཅན་ཐག་གཅོད། ཏང་དང་མི་དམངས་མང་ཚོགས་བར་ཐོག་མཐའ་བར་གསུམ་དུ་ཤ་ཁྲག་ལྟ་བུའི་འབྲེལ་བ་མཐའ་འཁྱོངས། ཏང་དང་རྒྱལ་ཁབ་ཀྱི་བྱ་གཞག་གོང་དུ་འཕེལ་བར་སྐུལ་འདེད་བཅས་བྱེད་པའི་ཐད་དོན་སྙིང་གལ་ཆེན་ལྡན་པ་རེད།

དང་པོ། འདི་ནི་ཏང་ཡོངས་ཀྱི་བསམ་བློ་འདོད་བློ་བྱ་སྤྱོད་གསུམ་གཅིག་གྱུར་དང་། ཏང་གི་གོང་བུར་འགྲིལ་ཤུགས་དང་འཐབ་འཛིང་བྱེད་ནུས་ཆེན་པོ་ཐོག་མཐའ་བར་གསུམ་དུ་མཐའ་འཁྱོངས་བྱེད་པའི་ལྡོག་མེད་བླང་བྱ་ཡིན། མཐུན་སྒྲིལ་གཅིག་གྱུར་ནི་ཏང་གི་ཚེ་སྲོག་དང་ཏང་གི་སྟོབས་ཤུགས་གནས་ས་ཡིན། བསམ་བློའི་སྟེང་གཅིག་གྱུར་ཡིན་པ་ནི་ཏང་གི་མཐུན་སྒྲིལ་གཅིག་གྱུར་གྱི་གཏིང་ཟབ་ཤོས་དང་། རྒྱུན་རིང་ཤོས། ཡིད་རྟོན་རུང་ཤོས་བཅས་ཀྱི་འགན་ལེན་ཡིན། ང་ཚོའི་ཏང་འདི་འདྲ་ཆེན་པོ་ཞིག་གིས་རྒྱལ་ཁབ་ཆེན་པོ་འདི་འདྲ་ཞིག་ལ་འགོ་ཁྲིད་བྱེད་ཀྱི་ཡོད་པ་དང་། རྒྱལ་ཡོངས་མི་རིགས་ཁག་གི་མི་དམངས་ལ་སྣེ་ཁྲིད་བྱས་ཏེ་རྒྱལ་ཁབ་སྟོབས་འབྱོར་ལྡན་པ་དང་མི་རིགས་བསྐྱར་དར་ཡོང་བར་བྱེད་པའི་དཀའ་ཚེགས་ཆེ་བའི་ལས་འགན་ཕྲག་ཏུ་འཁུར་ཡོད་པར་བརྟེན། ཏང་ཡོངས་ཀྱིས་ངེས་པར་དུ་བསམ་བློ་གཅིག་གྱུར་དང་། འདོད་བློ་གཅིག་གྱུར། བྱ་སྤྱོད་གཅིག་གྱུར་བཅས་བྱེད་དགོས། ཏང་ཡོངས་བསམ་བློ་དང་། འདོད་བློ། བྱ་སྤྱོད་བཅས་ཀྱི་ཐོག་གཅིག་གྱུར་ཡོང་བ་ཇི་ལྟར་བྱེད་དགོས་སམ་ཞེ་ན། ཆེས་རྩ་བར་གྱུར་པ་ནི་ཏང་གི་གཞི་རྩའི་རིགས་པའི་གཞུང་ལུགས་ཀྱིས་ཏང་ཡོངས་ལ་དྲག་ཆས་སྤྲས་དགོས་པ་དེ་ཡིན།

ང་ཚོའི་ཏང་གིས་ཐོག་མཐའ་བར་གསུམ་དུ་རིགས་པའི་གཞུང་ལུགས་ཀྱིས་དྲག་ཆས་སྤྲས་རྒྱུར་མཐོང་ཆེན་ཚད་མཐོན་པོ་བྱེད་ཀྱི་ཡོད་པ་དང་། ལོ་རྒྱུས་ཀྱི་འགག་རྩ་གལ་ཆེན་རེ་རེ་ཚང་མར་ཏང་གི་གསར་གཏོད་རིགས་པའི་གཞུང་ལུགས་ལ་བརྟེན་ནས་ཏང་ཡོངས་ཀྱི་བསམ་བློ་གཅིག་གྱུར་བྱས་པ་དང་། ཏང་ནང་ཁུལ་གྱི་གཅིག་སྡུད་སློབ་གསོ་རེ་རེ་ཚང་མས་རིགས་པའི་གཞུང་ལུགས་སློབ་སྦྱོང་བྱ་རྒྱུ་དེ་ལས་འགན་གཙོ་བོར་འཛིན་པ་མ་ཟད་ཐོག་མཐའ་བར་གསུམ་དུ་ལག་ལེན་བསྟར་ཏེ། ཏང་ཡོངས་མཐུན་སྒྲིལ་གཅིག་གྱུར་ཡོང་བར་བསམ་བློའི་རྨང་གཞི་བརྟན་པོ་བཏིངས་ཡོད། ད་ལྟ་ང་ཚོའི་ཏང་གིས་རྒྱལ་ཡོངས་མི་རིགས་ཁག་གི་མི་དམངས་ལ་སྣེ་ཁྲིད་བྱས་ཏེ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པ་དང་། ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་བའི་འཐབ་ལམ་གསར་པར་བསྐྱོད་པས། དུས་རབས་གསར་པ་དང་འཐབ་ལམ་གསར་པའི་ཏང་གི་འགན་འཁྲི་དང་ལས་འགན་སྔར་ལས་ལྷག་པར་ཕྲག་ཏུ་འཁུར་དགོས་པ་དང་། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སྤྱད་དེ་བསམ་བློར་དྲག་ཆས་སྤྲས་པ་དང་། ལག་ལེན་ལ་ཁྲིད་སྟོན་དང་ལས་ཀར་སྐུལ་འདེད་བཅས་བྱེད་པའི་དགོས་པ་གལ་ཆེན་ཡོད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ལག་ལེན་ནང་དུ་ཆགས་པ་དང་འཕེལ་རྒྱས་འགྲོ་བ་དང་བསྟུན་ནས། ང་ཚོས་ཏང་གི་གསར་གཏོད་རིགས་པའི་གཞུང་ལུགས་སྤྱད་དེ་ཏང་ཡོངས་ལ་དྲག་ཆས་སྤྲས་པར་མུ་མཐུད་སྐུལ་འདེད་བཏང་ནས་གྲུབ་འབྲས་མངོན་གསལ་དོད་པོ་བླངས་ཡོད། ཡིན་ནའང་། རིགས་པའི་གཞུང་ལུགས་ཀྱིས་དྲག་ཆས་སྤྲས་པའི་ལས་འགན་སྔར་བཞིན་དཀའ་ཚེགས་ཆེ་བ་ཡིན། ཕྱོགས་གཅིག་ནས་དོན་དམ་དུ་སློབ་སྦྱོང་དང་དད་མོས་དང་བེད་སྤྱོད་བྱེད་པ་དང་། སློབ་སྦྱོང་ཡག་པོ་བྱེད་ཅིང་གོ་བ་ཟབ་མོ་ལོན་ལ་དོན་མཐའ་འཁྱོལ་བ་ཞིག་བྱེད་པའི་ཐད་ད་དུང་མཐོང་ཆེན་བྱེད་དགོས་པའི་གནད་དོན་འགའ་ཤས་གནས་ཡོད་དེ། ཏང་ཡོན་དང་ལས་བྱེད་པ་ལ་ལར་རིགས་པའི་གཞུང་ལུགས་སློབ་སྦྱོང་བྱེད་པའི་སྤྲོ་བ་ཆེན་པོ་མེད་ཅིང་སློབ་སྦྱོང་བྱེད་མི་ཐུབ་ལ་སློབ་སྦྱོང་བྱེད་མདོག་ཙམ་སྟོན་པ་དང་། ལ་ལས་སློབ་སྦྱོང་རྒྱུད་རིམ་ལྡན་པ་དང་གཏིང་ཟབ་པོར་མི་བྱེད་ཅིང་། བརྟག་དཔྱད་གཏིང་ཟབ་པོར་མི་བྱེད་པས་དེ་འདྲ་ཡིན་པ་ཤེས་རུང་དེ་འདྲ་ཡིན་ལུགས་མི་ཤེས་པ། ལ་ལ་སྦྱོང་སྤྱོད་གཉིས་ཡ་བྲལ་དུ་སོང་བ་དང་། སློབ་སྦྱོང་དང་བྱ་བྱེད་དབར་འབྲེལ་མཚམས་ཆད་ཅིང་། སློབ་སྦྱོང་གི་གྲུབ་འབྲས་དེ་ལས་སྒྲུབ་ལས་གཏོད་ཀྱི་འཇོན་ཐང་ངོ་མར་སྒྱུར་མཁས་པོ་མེད་པ་ལྟ་བུ་སོགས་རེད། གནད་དོན་དེ་དག་གི་ཐོག་ནས་ཏང་གི་རིགས་པའི་གཞུང་ལུགས་ཀྱིས་དྲག་ཆས་སྤྲས་པའི་ལས་དོན་ཐད་ཚུལ་འཆོས་བྱེད་མི་རུང་བར་ངེས་པར་དུ་གཏིང་ཟབ་ཏུ་འཇུག་པ་དང་གནད་དུ་ཕྱིན་པ་རྒྱུན་མཐུད་བྱེད་དགོས་པ་གསལ་བཤད་བྱས་ཡོད། ཕྱོགས་གཞན་ཞིག་ནས་ཏང་གི་གསར་གཏོད་རིགས་པའི་གཞུང་ལུགས་རྒྱུན་ཆད་མེད་པར་འཕེལ་རྒྱས་འགྲོ་བཞིན་ཡོད་ཅིང་། ཏང་གི་ཚོགས་ཆེན་ཉི་ཤུ་པའི་ཐོག་དགོངས་པ་གལ་ཆེན་དང་ལྟ་བ་གལ་ཆེན་རབ་དང་རིམ་པ་བཏོན་པ་དང་། ཏང་གི་ཚོགས་ཆེན་ཉི་ཤུ་པ་འཚོགས་ཚུན་ཏང་གི་ཚོགས་ཆེན་ཉི་ཤུ་པའི་དགོངས་དོན་རྒྱས་བཤད་བྱེད་རིམ་ནང་དུ་ལྟ་བ་གསར་པ་ཁ་ཤས་བཏོན་ཡོད་ལ། ལྷག་པར་དུ་ཀྲུང་གོའི་ལུགས་ཀྱི་དེང་རབས་ཅན་སྐོར་གྱི་རིགས་པའི་གཞུང་ལུགས་དང་ལག་ལེན་གྱི་གནད་དོན་གཞ་ཆེན་འདི་བཏོན་པ་མ་ཟད་རྒྱུད་རིམ་ལྡན་པའི་སྒོ་ནས་རྒྱས་བཤད་བྱས་པ་བཅས་ཀྱི་ཐོག་ནས། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སྔར་བས་ཕུན་སུམ་ཚོགས་སུ་བཏང་ཡོད། དེའི་སྐོར་སློབ་སྦྱོང་དང་ལག་བསྟར་བྱེད་པའི་འགོ་བརྩམས་མ་ཐག་ཡིན། དེར་བརྟེན་འཐབ་ལམ་གསར་པ་འགོ་ཚུགས་པའི་སྐབས་འདིར། ཏང་ཡོངས་ཀྱིས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱེད་པར་ངེས་པར་དུ་མུ་མཐུད་སྐུལ་འདེད་གཏོང་དགོས། རིགས་པའི་གཞུང་ལུགས་སློབ་སྦྱོང་གཏིང་ཟབ་མོ་དང་དཔྱིས་ཕྱིན་པ་ཞིག་མ་བྱུང་ན། བསམ་བློ་གཅིག་གྱུར་ཡོང་བར་རྨང་གཞི་མེད་པ་དང་། ཏང་གི་མཐུན་སྒྲིལ་གཅིག་གྱུར་ལ་ཤུགས་རྐྱེན་ཚབས་ཆེན་བཟོ་སྲིད་པ་ལོ་རྒྱུས་དང་མངོན་སུམ་གཉིས་ཐད་ནས་གསལ་བཤད་བྱས་ཡོད།

ཐེངས་འདིའི་བརྗོད་དོན་གཙོ་བོའི་སློབ་གསོ་སྤེལ་བར་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་དང་ཏན་ཏིག་ངང་བྱེད་པའི་ཐད་ཤུགས་རྒྱག་པ་དང་། ཏང་ཡོན་དང་ལས་བྱེད་པར་ཁྲིད་སྟོན་བྱས་ཏེ་བསམ་བློའི་ཐོག་ནས་གཞི་སྒྱུར་རྩ་སྒྱུར་དང་ལུས་གསོ་ཟུངས་སྐྱེད། ཆབ་སྲིད་བརྡར་ཤ་གཅོད་ནུས་དང་། ཆབ་སྲིད་ངེས་ཤེས་འདྲོང་ནུས། ཆབ་སྲིད་ལག་བསྟར་བྱེད་ནུས་བཅས་རྒྱུན་ཆད་མེད་པར་ཆེ་རུ་གཏོང་བ། “འདུ་ཤེས་བཞི་”ཆེ་རུ་སྐྱེད་པ་དང་། “གདེང་ཚོད་བཞི་”བརྟན་དུ་གཏོང་བ། “སྲུང་སྐྱོང་གཉིས་”བྱེད་ཐུབ་པ། བསམ་བློ་དང་ཆབ་སྲིད་དང་བྱ་སྤྱོད་གསུམ་ཐད་ནས་ཐོག་མཐའ་བར་གསུམ་དུ་ཏང་ཀྲུང་དབྱང་དང་ཚད་མཐོའི་གཅིག་གྱུར་ཡོང་བ། བསམ་བློ་ཕྱོགས་གཅིག་ཏུ་གཏོང་བ་དང་སྟོབས་ཤུགས་ཕྱོགས་གཅིག་ཏུ་འདོན་པ་བཅས་བྱས་ཏེ། ཐུན་མོང་ཐོག་ཏང་ཉིད་ཕམ་པ་མེད་པའི་ངར་ལྕགས་ལྟར་སྲ་མཁྲེགས་ཆེ་བ་ཞིག་ཏུ་གསོ་སྐྱོང་བྱེད་དགོས།

གཉིས་པ། འདི་ནི་ཏང་ཡོངས་ཀྱིས་འཁུར་ལེན་དང་དོན་གཉེར་ཧུར་ཐག་བྱེད་པར་སྐུལ་འདེད་གཏོང་བ་དང་བྱ་གཞག་འཕེལ་རྒྱས་ཀྱི་རྣམ་པ་གསར་པ་རྒྱུན་ཆད་མེད་པར་གཏོད་པའི་ལྡོག་མེད་བླང་བྱ་ཡིན། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་སྐྲུན་ཚར་བར་བྱེད་པ་དང་ལོ་བརྒྱ་གཉིས་པའི་འབད་འཐབ་དམིགས་འབེན་མངོན་འགྱུར་བྱེད་པ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཡོང་བར་སྐུལ་འདེད་གཏོང་རྒྱུ་ནི་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱི་དུས་རབས་གསར་པ་དང་འཐབ་ལམ་གསར་པའི་ལྟེ་བའི་ལས་འགན་ཡིན། འདི་ནི་སྔར་བྱུང་མྱོང་མེད་པའི་གསར་གཏོད་རང་བཞིན་གྱི་བྱ་གཞག་ཅིག་ཡིན་པས། མདུན་སྐྱོད་ཀྱི་འགྲོ་ལམ་ཐོག་སྔར་བྱུང་མྱོང་མེད་པའི་ཞིབ་འཇུག་བྱ་གཞི་གསར་རྐྱང་འབོར་ཆེན་འཕྲད་ངེས་ཡིན་པ་དང་། དཀའ་ངལ་དང་ཉེན་ཁ་སྣ་ཚོགས་འཕྲད་ངེས་ཡིན་ལ། རླུང་འཚུབ་རླབས་འཕྱོ་དང་ཐ་ན་འཇིགས་རུང་དྲག་རླབས་ཀྱི་ཉམས་སད་ཆེན་པོ་མྱོང་ངེས་ཡིན། དེར་བརྟེན་ཐོག་མཐའ་བར་གསུམ་དུ་འབད་འབུངས་ཡར་བརྩོན་དང་། གཞན་གྱི་སྔོན་དུ་བྱེད་ཕོད་པ། དཀའ་ངལ་ཁྱད་གསོད་བཅས་ཀྱི་འབད་འཐབ་ཀྱི་རྣམ་འགྱུར་མཐའ་འཁྱོངས་དང་། འཁུར་ལེན་དང་དོན་གཉེར་ཧུར་ཐག་བྱེད་པ་དང་། འཐབ་རྩོད་བྱེད་ཕོད་པ་དང་བྱེད་མཁས་པོ་བཅས་བྱས་ན། ད་གཟོད་རྒྱལ་ཁབ་སྟོབས་ལྡན་འཛུགས་སྐྲུན་བྱེད་པ་དང་། མི་རིགས་བསྐྱར་དར་ཡོང་བའི་ལོ་རྒྱུས་ཀྱི་བྱ་གཞག་རླབས་པོ་ཆེར་རྒྱལ་ཁའི་ངང་སྐུལ་འདེད་གཏོང་ཐུབ།

ང་ཚོའི་ཏང་གིས་ལོ་ངོ་བརྒྱ་ཕྲག་རིང་འབད་འཐབ་བྱས་པའི་གྲུབ་འབྲས་རླབས་པོ་ཆེ་ཚང་མ་ཏང་གིས་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་འབད་ནས་ཐོབ་པ་དང་བསྒྲུབས་ནས་ཐོབ་པ་ཡིན་ཞིང་། ཏང་གི་ཚོགས་ཆེན་ཉི་ཤུ་པའི་ཐོག་བཀོད་པའི་བརྗིད་ཉམས་ལྡན་པའི་འཆར་གཞི་དེ་མངོན་དུ་བསྒྱུར་དགོས་ན། སྔར་བཞིན་འབད་བརྩོན་དང་ལས་སྒྲུབ་ལ་བརྟེན་དགོས། སྤྱིའི་ཆ་ནས་བལྟས་ན། ད་ལྟ་རྒྱ་ཆེའི་ཏང་ཡོན་དང་ལས་བྱེད་པའི་འཇོན་ཐང་དང་བྱང་ཚད་དང་བསམ་པའི་འཁྱེར་སོ་ཡག་པོ་ཡོད་པ་རེད། འོན་ཀྱང་གསལ་པོར་མཐོང་དགོས་པ་ཞིག་ནི། ལས་བྱེད་པའི་དཔུང་སྡེ་ནང་འཁུར་ལེན་བྱེད་མི་འདོད་པ་དང་། འཁུར་ལེན་བྱེད་མི་ཕོད་པ། འཁུར་ལེན་བྱེད་མི་མཁས་པ་བཅས་ཀྱི་གནད་དོན་ད་དུང་འབུར་དུ་ཐོན་པ་སྟེ། ལ་ལས་དོན་དག་མི་ཡོང་བའི་ཆེད་དུ་ཉི་མ་འཁྱོལ་ཐབས་བྱེད་པ་དང་། ལ་ལ་འགལ་བ་དང་དཀའ་གནད་ལ་འཕྲད་དུས་གཟུར་ནས་འགྲོ་བ་དང་། རང་འགན་ཁག་དཀྲི་བྱེད་པ། བཙན་པོར་གཏུགས་མི་ཕོད་པ། ངོས་ཀྱི་འགན་འཁྲི་ཕྱི་ལ་སྤྲད་དེ་ནན་པོ་ངོ་མ་དང་བཙན་པོར་གཏུགས་མི་ཕོད་པ། ལ་ལས་ཁ་ནས་བཤད་པ་ཙམ་ལས་ལག་ལེན་མི་བསྟར་བ་དང་། རྣམ་འགྱུར་སྟོན་མང་ཞིང་ཁ་ཤོམ་ཆེ་བ་དང་། ལག་ལེན་ཉུང་ལ་དོན་འཁྱོལ་ཞན་པ། ལ་ལའི་ཀུན་སྤྱོད་གོ་གནས་དང་མི་འཚམ་ཞིང་། འཇོན་ཐང་ཞན་ལ་འགན་ལྕི་འཁུར་མི་ཐུབ་པ། ལས་ཀའི་རྣམ་པ་གསར་འབྱེད་མི་ཐུབ་པ། ལ་ལས་སྔ་བལྟས་ཕྱི་བསམ་དང་སྔ་སྐྲག་ཕྱི་སྐྲག །ཉེན་ཁ་དང་འགྲན་སློང་ཆེན་པོའི་མདུན་དུ་གཏིང་ཤུགས་མི་འདང་བ་དང་དངངས་སྐྲག་སྐྱེས་ནས་ག་བྱེད་འདི་བྱེད་མེད་པར་གྱུར་པ་ལྟ་བུ་སོགས་རེད། གནད་དོན་འདི་དག་ཏང་ཡོན་དང་ལས་བྱེད་པ་ཉུང་ཤས་ཀྱི་བྱ་སྤྱོད་ཡིན་ནའང་དེ་རྒྱ་ཡན་དུ་བཏང་ན་ཏང་གི་སྣང་བརྙན་ལ་གནོད་འཚེ་གཏོང་ངེས་པ་དང་། ཏང་གི་བྱ་གཞག་ལ་གནོད་པ་སྐྱེལ་ངེས་པས། ངེས་པར་དུ་ནན་ཏན་གྱིས་ཐག་གཅོད་བྱེད་དགོས།

ཐེངས་འདིའི་བརྗོད་དོན་གཙོ་བོའི་སློབ་གསོའི་ནང་རྒྱ་ཆེའི་ཏང་ཡོན་དང་ལས་བྱེད་པར་སློབ་གསོ་དང་ཁྲིད་སྟོན་བྱས་ཏེ་དགོངས་པ་སློབ་སྦྱོང་དང་ལག་ལེན་བསྟར་བ་དང་། ཡང་དག་པའི་དབང་ཆའི་ལྟ་བ་དང་། སྲིད་འབྲས་ཀྱི་ལྟ་བ། བྱ་གཞག་གི་ལྟ་བ་བཅས་འཛིན་པ། འགན་འཁྲི་འཁུར་སེམས་དང་ལས་འགན་སྒྲུབ་སེམས་ཆེ་རུ་གཏོང་བ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་འཇོན་ཐང་དང་། མང་ཚོགས་ལ་ཞབས་འདེགས་ཞུ་བའི་འཇོན་ཐང་། ཉེན་ཁ་འགོག་སེལ་བྱེད་པའི་འཇོན་ཐང་བཅས་རྒྱུན་ཆད་མེད་པར་ཆེ་རུ་གཏོང་བ། འཐབ་རྩོད་ཀྱི་སྙིང་སྟོབས་དང་འཐབ་རྩོད་ཀྱི་འཇོན་ཐང་ཆགས་པར་ཤུགས་སྣོན། འབད་འབུངས་ཡར་བརྩོན་དང་འཁུར་ལེན་དོན་ཡོད་ཀྱི་ཉམས་སྟོབས་རྒྱས་པ་བཅས་བྱེད་དགོས། བྱེད་ཐབས་ནུས་ལྡན་སྤྱད་དེ་ལས་བྱེད་པས་འཁུར་ལེན་དང་དོན་གཉེར་བྱེད་པར་ཤུགས་རྐྱེན་བཟོ་བའི་འགལ་རྐྱེན་སྣ་ཚོགས་སེལ་གང་ཐུབ་བྱེད་པ་དང་། འཁུར་ལེན་བྱེད་མཁན་ལ་འགན་འཁུར་བ་དང་། འགན་འཁྲི་འཁུར་མཁན་ལ་འགན་འཁུར་བ། ལས་ཀ་སྒྲུབ་མཁན་ལ་རྒྱབ་སྐྱོར་བཅས་བྱེད་ཕོད་པ། འཁུར་ལེན་བྱེད་འདོད་པ་དང་འཁུར་ལེན་བྱེད་ཕོད་ལ་འ ཁུར་ལེན་བྱེད་མཁས་པའི་སྲོལ་བཟང་ཆགས་པར་བྱེད་པ། རྒྱ་ཆེའི་ཏང་ཡོན་དང་ལས་བྱེད་པས་ལྷག་བསམ་ཟོལ་མེད་ཀྱི་སྒོ་ནས་འཐབ་ལམ་གསར་པར་ཞུམ་མེད་མདུན་སྐྱོད་དང་དུས་རབས་གསར་པར་བྱས་རྗེས་འཇོག་པར་སྐུལ་འདེད་གཏོང་བ་བཅས་བྱེད་དགོས།

གསུམ་པ། འདི་ནི་ཕྱོགས་ཡོངས་ནས་ཏང་ནན་སྐྱོང་བྱེད་པར་སྐུལ་འདེད་གཏིང་ཟབ་གཏོང་བ་དང་ཏང་གི་རང་ངོས་གསར་བརྗེར་བརྟེན་ནས་སྤྱི་ཚོགས་གསར་བརྗེར་སྣེ་ཁྲིད་བྱེད་པའི་ལྡོག་མེད་བླང་བྱ་ཡིན། རྒྱལ་ཁབ་སྐྱོང་བར་ངེས་པར་དུ་སྔོན་ལ་ཏང་སྐྱོང་དགོས་པ་དང་། ཏང་དར་རྒྱས་སུ་བཏང་ན་ད་གཟོད་རྒྱལ་ཁབ་སྟོབས་དང་ལྡན་པར་འགྱུར། ཕྱོགས་ཡོངས་ནས་ཏང་ནན་སྐྱོང་བྱེད་པ་ནི་ནམ་ཡང་བྱེད་བཞིན་པའི་ལམ་ན་ཡོད་པ་དང་། ཏང་གི་རང་ངོས་གསར་བརྗེ་ནི་ནམ་ཡང་བྱེད་བཞིན་པའི་ལམ་ན་ཡོད་ཅིང་། ཏང་ཆེན་པོ་ཁོ་ནར་ཡོད་པའི་དཀའ་གནད་ཐག་གཅོད་བྱེད་པ་ནི་དུས་ཡུན་རིང་ཞིང་དཀའ་ཚེགས་ཆེ་བའི་བརྒྱུད་རིམ་ཞིག་ཡིན་པས། དམ་འཛིན་ལྷོད་མེད་བྱེད་དགོས་ལ་གཅིག་སྡུད་ཀྱིས་ཤུགས་རྒྱག་དགོས་པ་དང་། ཏང་གི་སྔོན་ཐོན་རང་བཞིན་དང་དྭངས་གཙང་རང་བཞིན་ལ་གནོན་པ་སྐྱེལ་བའི་རྒྱུ་རྐྱེན་མཐའ་དག་དུས་ཐོག་ཏུ་གཙང་སེལ་དང་། ཏང་གི་གཟུགས་གཞི་བདེ་ཐང་ལ་གནོད་པའི་ནད་དུག་ཐམས་ཅད་གཙང་སེལ་བྱས་ཏེ། ཏང་ཉིད་ནམ་ཡང་ངོ་བོ་མི་འགྱུར་བ་དང་། མདོག་མི་འགྱུར་བ། བྲོ་བ་མི་འགྱུར་བ་བཅས་ཡོང་བ་འགན་ལེན་ཏན་ཏིག་བྱེད་དགོས།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཏང་གི་མདུན་དུ་ལྷགས་པའི་ཉེན་ཁ་དང་ཉམས་སད་ཆེན་པོ་དང་ཏང་ནང་ཁུལ་དུ་གནས་པའི་གནད་དོན་མངོན་གསལ་ཅན་ལ་དམིགས་ཏེ། ང་ཚོའི་ཏང་གིས་གྲི་ཁ་ནང་ལ་བསྐོར་བའི་རང་ངོས་གསར་བརྗེའི་སྙིང་སྟོབས་ལ་བརྟེན་ནས། འཐབ་ཇུས་ཀྱི་བྱེད་ཐབས་གལ་ཆེན་རབ་དང་རིམ་པ་སྤྱད་དེ་ཏང་གི་ཕྱོགས་ཡོངས་ཀྱི་འགོ་ཁྲིད་རྒྱུན་འཁྱོངས་དང་དེར་ཤུགས་སྣོན་བརྒྱབ་པ་དང་། བློ་བརྟན་འགྱུར་མེད་ངང་ཕྱོགས་ཡོངས་ནས་ཏང་ནན་སྐྱོང་ལ་སྐུལ་འདེད་བཏང་ལ། ཏང་ནི་གསར་བརྗེའི་རང་བཞིན་གྱི་སྐྲུན་བཟོའི་ཁྲོད་སྔར་བས་ཞུམ་མེད་སྟོབས་ལྡན་དུ་གྱུར་ཡོད། གྲུབ་འབྲས་བྱུང་བ་མིག་མཐོང་ལག་ཟིན་ཡིན་ལ་དེ་བཞིན་གནད་དོན་ཡང་སྣང་མེད་དུ་འཇོག་མི་རུང་། ཏང་ནང་དུ་བསམ་བློ་མི་གཙང་བ་དང་། རྩ་འཛུགས་མི་གཙང་བ། སྤྱོད་ཚུལ་མི་གཙང་བ་སོགས་ཀྱི་གནད་དོན་འབུར་ཐོན་ཅན་ད་དུང་རྩ་བའི་ཆ་ནས་ཐག་གཅོད་བྱེད་ཐུབ་མེད་ཅིང་། ཐག་གཅོད་བྱས་ཟིན་པའི་གནད་དོན་ཁ་ཤས་རོ་ལངས་བརྒྱབ་ནས་བསྐྱར་ལངས་འོང་ཉེན་ཡོད་པ་དང་། གནད་དོན་གསར་པ་ཁ་ཤས་ད་དུང་རྒྱུན་ཆད་མེད་པར་ཐོན་བཞིན་ཡོད། དཔེར་ན། ས་གནས་དང་སྡེ་ཁག་ཁ་ཤས་ཀྱིས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དོན་ཐོག་ཏུ་མ་འཁྱོལ་བ་དང་། ཡང་ན་སྟབས་བདེ་སླ་བཅོས་དང་“གཅིག་དཔེ་བརྒྱ་འགེབས་”བྱེད་པ། འདྲ་བཤུས་འདྲ་སྤོས་དང་གོང་འོག་སྦོམ་ཕྲ་གཅིག་མཚུངས་ཡིན་པ། ཡང་ན་གདམ་གསེས་བྱེད་པ་དང་། བབ་སྟུན་སླ་བཅོས་བྱེད་པ། གཅོག་འཐེན་བྱེད་པ་བཅས་དང་། སྤྱི་ཡོངས་ལ་ལྟ་རྟོག་མི་བྱེད་པར་སྡེ་ཁག་དང་ས་གནས་སྲུང་སྐྱོབ་རིང་ལུགས་སྤེལ་བ་ལྟ་བུ་དང་། སྐྱིད་འདོད་རིང་ལུགས་དང་བག་མེད་ལོངས་ཀྱི་སྲོལ་ངན་ཡང་ཡང་ཐོན་པ་དང་། མངོན་མེད་ཡན་གར་བའི་བྱ་སྤྱོད་མི་མངོན་པར་ཐོན་ཞིང་། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཀྱི་གཅོང་ནད་འཇོམས་རྒྱུ་སྔར་བཞིན་ལས་འགན་ལྕི་ལ་ལམ་ཐག་རིང་བ་ལྟ་བུ། ཏང་རྩ་འཛུགས་ཁ་ཤས་ཀྱི་ཆབ་སྲིད་ཀྱི་ནུས་པ་དང་རྩ་འཛུགས་ཀྱི་ནུས་པ་ཞན་པ་དང་། ཏང་འཛུགས་སྐྲུན་གྱིས་གཞི་རིམ་བཅོས་སྐྱོང་ལ་སྣེ་ཁྲིད་བྱེད་པའི་ནུས་པ་ད་དུང་འདོན་སྤེལ་གང་ལེགས་བྱེད་ཐུབ་མེད་པ་ལྟ་བུ། རུལ་རྒོལ་འཐབ་རྩོད་ཀྱི་གནས་བབ་སྔར་བཞིན་ཛ་དྲག་དང་རྙོག་འཛིང་ཆེ་བ་དང་། འཕར་གྲངས་འགོག་སྡོམ་དང་བསགས་འབོར་གཙང་སེལ་བྱེད་པའི་ལས་འགན་སྔར་བཞིན་དཀའ་ཚེགས་ཆེ་བ་ལྟ་བུ་ལ་སོགས་པའོ། །གནད་དོན་དེ་དག་ཐག་གཅོད་པར་ལྷོད་གཡེང་སྤུ་ཙམ་བྱེད་མི་རུང་བར་ངེས་པར་དུ་ནན་པོའི་དགོངས་གཞི་དང་། ནན་པོའི་བྱེད་ཐབས། ནན་པོའི་ཁོར་ཡུག་བཅས་ཡུན་རིང་རྒྱུན་འཁྱོངས་བྱས་ཏེ་ཕྱོགས་ཡོངས་ནས་ཏང་ནན་སྐྱོང་བྱེད་པ་དེ་གཏིང་ཟབ་ཏུ་སྤེལ་དགོས།

ཐེངས་འདིའི་བརྗོད་དོན་གཙོ་བོའི་སློབ་གསོའི་ནང་ཏང་རྩ་འཛུགས་རིམ་པ་ཁག་དང་། རྒྱ་ཆེའི་ཏང་ཡོན་དང་ལས་བྱེད་པར་སློབ་གསོ་དང་ཁྲིད་སྟོན་བྱས་ཏེ། གནད་དོན་ཁྲིད་ཕྱོགས་སུ་འཛིན་རྒྱུ་འབུར་འདོན་བྱས་ཏེ། མི་འདང་ས་འཚོལ་བ་དང་། ཧེ་བག་འཚོལ་བ། ཁ་ཕྱོགས་གསལ་སྟོན་བཅས་བྱེད་པ་དང་། ཆབ་སྲིད་ལ་བརྟག་དཔྱད་བྱེད་པ། ཆབ་སྲིད་ཀྱི་ཐལ་རྡུལ་འཕྱག་པ། བྱ་སྤྱོད་ཀྱི་ནོར་འཛོལ་ཡོ་བསྲང་། བསམ་བློ་དང་རྩ་འཛུགས་མི་གཙང་བའི་གནད་དོན་འབུར་ཐོན་ཅན་ཐག་གཅོད། ཏང་གིས་རང་ངོས་གཙང་སྒྱུར་དང་། རང་ངོས་འཐུས་ཚང་། རང་ངོས་གསར་སྒྱུར། རང་ངོས་མཐོར་འདེགས་བཅས་བྱེད་པའི་ནུས་པ་རྒྱུན་ཆད་མེད་པར་ཆེ་རུ་གཏོང་བ་བཅས་བྱས་ཏེ། ང་ཚོའི་ཏང་ལ་ནམ་ཡང་སྐྱེ་སྟོབས་ཀྱི་དཔལ་འབར་བ་བྱེད་དགོས་པ་དང་། ཏང་ཉིད་ནམ་ཡང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བྱ་གཞག་གི་འགྱུར་མེད་སྟོབས་ལྡན་གྱི་འགོ་ཁྲིད་སྲོག་ཤིང་དུ་ཆགས་པ་བྱེད་དགོས།

གཉིས། བརྗོད་དོན་གཙོ་བོའི་སློབ་གསོའི་དམིགས་འབེན་དང་བླང་བྱ་ཆ་ཚང་ཞིང་གནད་ལ་འཁེལ་བར་ཤེས་རྟོགས་བྱེད་དགོས།

ཏང་ཀྲུང་དབྱང་གིས་སྤེལ་བའི་《བསམ་འཆར་》ནང་ཐེངས་འདིའི་བརྗོད་དོན་གཙོ་བོའི་སློབ་གསོའི་སྤྱིའི་བླང་བྱ་དང་། དམིགས་འབེན་དང་ལས་འགན། བྱེད་ཐབས་དང་ཐབས་ཤེས་བཅས་གཏན་འབེབས་ཁ་གསལ་བྱས་ཡོད། རིམ་པ་ཁག་གི་ཏང་རྩ་འཛུགས་ཀྱིས་དོན་དངོས་དང་ཟུང་འབྲེལ་གྱིས་དོན་འཁྱོལ་ཡག་པོ་བྱས་ཏེ་སྔོན་དཔག་ཕན་འབྲས་ཐོན་པ་འགན་ལེན་བྱེད་དགོས།

དང་པོ། སྤྱིའི་བླང་བྱ་ཤེས་རྟོགས་བྱེད་དགོས། ཐེངས་འདིའི་བརྗོད་དོན་གཙོ་བོའི་སློབ་གསོའི་སྤྱིའི་བླང་བྱ་ནི་“དགོངས་པ་སློབ་སྦྱོང་བྱེད་པ་དང་། ཏང་གཤིས་ཆེ་རུ་སྐྱེད་པ། ལག་ལེན་གཙོ་བོར་འདོན་པ། ལེགས་སྐྱེས་གསར་པ་འབུལ་བ་”བཅས་ཡིན། སྐད་ཆ་ཚིག་བཞི་པོ་འདིས་ང་ཚོའི་ཏང་གིས་ངོས་འཛིན་དང་ལག་ལེན་ཟུང་དུ་སྦྲེལ་བ་དང་། རིགས་པའི་གཞུང་ལུགས་དང་དོན་དངོས་ཟུང་དུ་སྦྲེལ་བ། རང་སྣང་གི་འཇིག་རྟེན་བསྒྱུར་བཀོད་དང་ཕྱི་རོལ་ཡུལ་གྱི་འཇིག་རྟེན་བསྒྱུར་བཀོད་གཅིག་གྱུར་བྱེད་པ་བཅས་ཀྱི་འགྱུར་མེད་བླང་བྱ་མཚོན་ཡོད་ཅིང་། དེ་ནི་ཟུང་འབྲེལ་དམ་ཟབ་དང་། ཕན་ཚུན་སྦྲེལ་མཐུད། ནང་ཁུལ་གཅིག་གྱུར་བཅས་ཀྱི་སྤྱི་ཡོངས་ཤིག་ཡིན། སྤྱིའི་བླང་བྱ་འདི་ཐེངས་འདིའི་བརྗོད་དོན་གཙོ་བོའི་སློབ་གསོའི་བརྒྱུད་རིམ་ཧྲིལ་པོར་དཀྱུས་གཅིག་ཏུ་བསྟར་དགོས།

དགོངས་པ་སློབ་སྦྱོང་བྱེད་པ་ཞེས་པ་ནི། ཕྱོགས་ཡོངས་ནས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་གོ་བ་ལེན་པ་དང་། དགོངས་པ་དེའི་གཞི་རྩའི་ལྟ་བ་དང་ཚན་རིག་གི་མ་ལག་ནང་བྱན་ཆུད་པ། དགོངས་པ་དེའི་འཇིག་རྟེན་ལྟ་བ་དང་བརྟག་ཐབས་སྨྲ་བ་ཤེས་རྟོགས། དེའི་ནང་ཁྱབ་པའི་ལངས་ཕྱོགས་དང་ལྟ་བ་དང་བྱེད་ཐབས་རྒྱུན་འཁྱོངས་དང་བེད་སྤྱོད་ཡག་པོ། ཏང་གི་གསར་གཏོད་རིགས་པའི་གཞུང་ལུགས་སྐོར་གྱི་ཆབ་སྲིད་ཀྱི་ངོས་འཛིན་གཅིག་མཐུན་དང་། བསམ་བློའི་ངོས་འཛིན་གཅིག་མཐུན། རིགས་པའི་གཞུང་ལུགས་ཀྱི་ངོས་འཛིན་གཅིག་མཐུན། བརྩེ་དུང་གི་ངོས་འཛིན་གཅིག་མཐུན་བཅས་རྒྱུན་ཆད་མེད་པར་ཆེ་རུ་གཏོང་བ། མར་ཁེ་སིའི་རིང་ལུགས་ཀྱི་འཇོན་ཐང་ལེགས་ཤོས་དངོས་འབྲེལ་ཁོང་དུ་ཆུད་པ། རང་རྟོགས་ངང་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སྤྱད་དེ་ལས་དོན་ཁག་ལ་སློབ་སྟོན་བཅས་བྱེད་དགོས་པ་དེ་ཡིན།

ཏང་གཤིས་ཆེ་རུ་སྐྱེད་པ་ཞེས་པ་ནི། རང་རྟོགས་ངང་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སྤྱད་དེ་རང་སྣང་གི་འཇིག་རྟེན་བསྒྱུར་བཀོད་བྱེད་དགོས་པ་དང་། དགོངས་པ་དེའི་ཕུགས་བསམ་དང་དད་སེམས་བརྟན་དུ་གཏོང་བ་དང་། བསམ་བློའི་གོ་འཕང་མཐོ་རུ་གཏོང་བ། ཏང་གཤིས་སྦྱོང་བརྡར་ལ་ཤུགས་སྣོན་རྒྱག་པ་ལ་སོགས་པའི་སྐོར་གྱི་བླང་བྱ་རབ་དང་རིམ་པར་གོ་བ་གཏིང་ཟབ་ལེན་དགོས་པ། ཐོག་མཐའ་བར་གསུམ་དུ་གུང་ཁྲན་ཏང་མིའི་ཆབ་སྲིད་ཀྱི་རང་གཤིས་མཐའ་འཁྱོངས་བྱེད་དགོས་པ་དེ་ཡིན།

ལག་ལེན་གཙོ་བོར་འདོན་པ་ཞེས་པ་ནི། རང་རྟོགས་ངང་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ལག་བསྟར་བྱེད་དགོས་པ་དང་། དེ་སྤྱད་དེ་ཕྱི་རོལ་ཡུལ་གྱི་འཇིག་རྟེན་བསྒྱུར་བཀོད་དང་བྱ་གཞག་གོང་འཕེལ་གཏོང་བ་དང་། དེ་སྤྱད་དེ་དུས་རབས་ལ་ལྟ་ཞིབ་དང་ཤེས་རྟོགས་དང་ཁྲིད་སྟོན་བཅས་བྱེད་པ། ཧུར་ཐག་གིས་འགྱུར་ལྡོག་ལ་ངོས་འཛིན་དང་། འགྱུར་ལྡོག་ལ་བསྟུན་པ། འགྱུར་ལྡོག་ཡོང་ཐབས་བྱེད་པ། དཔལ་འབྱོར་དང་སྤྱི་ཚོགས་འཕེལ་རྒྱས་དང་ཏང་འཛུགས་སྐྲུན་ཐད་གནས་པའི་འགལ་བ་དང་གནད་དོན་སྣ་ཚོགས་ཐག་གཅོད། ཉེན་ཁ་ཚབས་ཆེན་འགོག་སེལ། ཀྲུང་གོའི་ལུགས་ཀྱི་དེང་རབས་ཅན་ལ་འཕེལ་སྐྱེད་གསར་པ་དང་ཐོད་བརྒལ་གསར་པ་ཡོང་བར་སྐུལ་འདེད་བཅས་བྱེད་དགོས་པ་དེ་ཡིན།

ལེགས་སྐྱེས་གསར་པ་འབུལ་བ་ཞེས་པ་ནི། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་ནང་འབད་བརྩོན་ཆེར་སྐྱེད་བྱེད་པའི་བློ་གྲོས་དང་སྟོབས་ཤུགས་བསྡུ་ལེན་བྱེད་དགོས་པ་དང་། དེའི་ནང་གི་འགོ་ཁྲིད་བྱེད་སྟངས་དང་། བསམ་བློ་གཏོང་སྟངས། ལས་ཀ་སྒྲུབ་སྟངས་བཅས་ནང་བྱན་ཆུད་པར་བྱས་ཏེ། རང་འགན་ལྷུར་ལེན་གྱི་ནུས་པ་དང་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ་དང་། སེམས་ཤུགས་གཅིག་སྒྲིལ་གྱིས་འཕེལ་རྒྱས་ལ་སྐུལ་འདེད། ཟམ་མི་འཆད་པར་དོན་འཁྱོལ་དམ་འཛིན། ལས་གནས་ཐོག་ལེགས་སྐྱེས་འབུལ་བ། ལོ་རྒྱུས་དང་མི་དམངས་ཀྱི་ཞིབ་བཤེར་ཐེག་ཐུབ་པའི་གྲུབ་འབྲས་ངོ་མ་གཏོད་གང་ཐུབ་བཅས་བྱེད་དགོས་པ་དེ་ཡིན།

གཉིས་པ། དམིགས་འབེན་དང་ལས་འགན་དམ་པོར་འཛིན་དགོས། ཐེངས་འདིའི་བརྗོད་དོན་གཙོ་བོའི་སློབ་གསོ་སྤེལ་བའི་རྩ་བའི་ལས་འགན་ནི་སློབ་སྦྱོང་དང་བསམ་གཞིག་དང་བེད་སྤྱོད་གསུམ་གཅིག་འབྲེལ་བྱེད་པ་དང་། ཤེས་ཡོན་དད་སེམས་བྱ་སྤྱོད་གསུམ་གཅིག་གྱུར་ཡོང་རྒྱུ་རྒྱུན་འཁྱོངས་བྱས་ཏེ། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དེ་ཕུགས་བསམ་བརྟན་དུ་གཏོང་བ་དང་། ཏང་གཤིས་སྦྱོང་བརྡར། ལག་ལེན་ལ་མཛུབ་སྟོན། ལས་ཀར་སྐུལ་འདེད་གཏོང་བ་བཅས་ཀྱི་སྟོབས་ཤུགས་ཆེན་པོར་བསྒྱུར་ནས། ཏང་ཡོངས་ཀྱིས་ཐོག་མཐའ་བར་གསུམ་དུ་བསམ་བློ་གཅིག་གྱུར་དང་། འདོད་བློ་བརྟན་པོ། བྱ་སྤྱོད་མཐུན་སྦྱོར། འཐབ་འཛིང་གི་ནུས་སྟོབས་ཆེན་པོ་བཅས་མཐའ་འཁྱོངས་ཐུབ་པར་བྱེད་དགོས་པ་དང་། སློབ་སྦྱོང་ལ་བརྟེན་ནས་བླ་སྲོག་གསོ་བ་དང་། སློབ་སྦྱོང་ལ་བརྟེན་ནས་བློ་གྲོས་འཕེལ་བ། སློབ་སྦྱོང་ལ་བརྟེན་ནས་སྤྱོད་ངན་སྲོང་བ། སློབ་སྦྱོང་ལ་བརྟེན་ནས་ལས་ཀར་སྐུལ་འདེད་བཅས་བྱེད་པའི་ཐད་ཕན་འབྲས་ངོ་མ་ཐོབ་པར་བརྩོན་དགོས། བྱེ་བྲག་ཏུ་གཤམ་གྱི་དམིགས་འབེན་དག་ཡོངས་འགྲུབ་བྱེད་དགོས།

གཅིག་ནི་བློ་སྒྲིལ་སེམས་སྐྱེད་དང་རྩ་བ་བརྟན་པོར་འཛུགས་དགོས། རྒྱ་ཆེའི་ཏང་ཡོན་དང་ལས་བྱེད་པར་སློབ་གསོ་དང་ཁྲིད་སྟོན་བྱས་ཏེ། བསམ་བློའི་ཞུན་བརྡར་དང་བསམ་པའི་ཞུན་བརྡར་མྱོང་བ་དང་། མར་ཁེ་སིའི་རིང་ལུགས་ལ་དད་མོས་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལ་དད་སེམས། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་ཀྲུང་གོའི་ཕུགས་འདུན་མངོན་འགྱུར་ཡོང་བར་ཡིད་ཆེས་བཅས་བརྟན་པོ་འཆང་བ། ཏང་འཛུགས་སྙིང་སྟོབས་རླབས་པོ་ཆེ་དར་སྤེལ། ངེས་པར་དུ་ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་བརྟན་པོར་འཆང་བ། ངེས་པར་དུ་ཁེངས་སྐྱུང་གཟབ་ནན་དང་དཀའ་སྤྱད་འབད་བརྩོན་བྱེད་པ། ངེས་པར་དུ་འཐབ་རྩོད་བྱེད་ཕོད་པ་དང་འཐབ་རྩོད་བྱེད་མཁས་པ། དད་མོས་ཀྱི་རྩ་བ་བརྟན་པོར་བཏིང་བ་དང་། བློ་སྟོབས་ཀྱི་ཀལ་འབེལ་པོར་གསོ་བ། བསམ་བློའི་ཁ་ལོ་བརྟན་པོར་སྒྱུར་བ་བཅས་བྱེད་དགོས།

གཉིས་ནི་གཤིས་རྒྱུད་སྦྱོང་བརྡར་དང་ལྷག་བསམ་རྣམ་དག་བྱེད་དགོས། རྒྱ་ཆེའི་ཏང་ཡོན་དང་ལས་བྱེད་པར་སློབ་གསོ་དང་ཁྲིད་སྟོན་བྱས་ཏེ། ཆབ་སྲིད་ཀྱི་གཤིས་རྒྱུད་སྦྱོང་བརྡར་བྱེད་དགོས་པ་དང་། ཆབ་སྲིད་བརྡར་ཤ་གཅོད་ནུས་དང་། ཆབ་སྲིད་ངེས་ཤེས་འདྲོང་ནུས། ཆབ་སྲིད་ལག་བསྟར་བྱེད་ནུས་བཅས་རྒྱུན་ཆད་མེད་པར་ཆེ་རུ་གཏོང་བ། “འདུ་ཤེས་བཞི་”ཆེ་རུ་སྐྱེད་པ་དང་། “གདེང་ཚོད་བཞི་”བརྟན་དུ་གཏོང་བ། “སྲུང་སྐྱོང་གཉིས་”བྱེད་ཐུབ་པ། ཏང་གི་དར་ཆ་དེ་དར་ཆ་དང་། ཏང་གི་འདོད་བློ་དེ་འདོད་བློ། ཏང་གི་འགན་འཁྲི་དེ་འགན་འཁྲི་བཅས་སུ་བརྩི་བ། ཐོག་མཐའ་བར་གསུམ་དུ་ཏང་དང་མི་དམངས་དང་མར་ཁེ་སིའི་རིང་ལུགས་ལ་བློ་དཀར་བ། ཁ་ཞེ་གཉིས་མེད་ཀྱིས་ཏང་ལ་དགའ་ཞེན་དང་། དུས་དང་རྣམ་པ་ཀུན་ཏུ་ཏང་ལ་སེམས་ཁྲལ། བློ་རྩ་བརྟན་པོས་ཏང་སྲུང་སྐྱོབ། ནུས་ཤུགས་ཡོད་རྒུས་ཏང་དར་རྒྱས་གཏོང་བ་བཅས་བྱེད་དགོས།

གསུམ་ནི་དངོས་སྒྲུབ་འཁུར་ལེན་དང་འཕེལ་རྒྱས་ལ་སྐུལ་འདེད་གཏོང་དགོས། རྒྱ་ཆེའི་ཏང་ཡོན་དང་ལས་བྱེད་པར་སློབ་གསོ་དང་ཁྲིད་སྟོན་བྱས་ཏེ། “རྒྱལ་ཁབ་ཀྱི་དོན་ཆེན་”ཡིད་ལ་འཆང་བ་དང་། དུས་རབས་གསར་པ་དང་འཐབ་ལམ་གསར་པའི་ཏང་གི་ལྟེ་བའི་ལས་འགན་ལ་དམ་པོར་དམིགས་པ། དངོས་འཛིན་དངོས་སྒྲུབ་དང་དོན་འབྲས་བརྩོན་ལེན། གནད་དོན་ལ་རྩེ་གཅིག་ཏུ་དམིགས་པ་དང་དཀའ་ངལ་ཁྱད་བསད་ཀྱིས་མདུན་སྐྱོད། “དུས་དང་རྣམ་པ་ཀུན་ཏུ་སེམས་ཁྲལ་བྱེད་པའི་”འགན་འཁྲི་འཁུར་སེམས་དང་འཁུར་ལེན་དང་དོན་གཉེར་ཧུར་ཐག་བྱེད་པའི་སྙིང་སྟོབས་བསྟེན་ནས་ཏང་དང་མི་དམངས་ཀྱི་དོན་དུ་རང་འགན་ལྷུར་ལེན་བྱེད་པ། རྣམ་པ་གསར་པ་དང་དོན་གཉེར་གསར་པའི་ཐོག་ནས་སྤུས་ཚད་མཐོ་བའི་འཕེལ་རྒྱས་ཐད་གྲུབ་འབྲས་གསར་པ་ཐོབ་པར་སྐུལ་འདེད། ཞུམ་པ་མེད་པའི་འཐབ་རྩོད་ལ་བརྟེན་ནས་བྱ་གཞག་འཕེལ་རྒྱས་ཀྱི་རྣམ་པ་གསར་པ་གཏོད་པ་བཅས་བྱེད་དགོས།

བཞི་ནི་དགོངས་དོན་ལག་བསྟར་དང་མི་དམངས་ལ་བདེ་སྐྱིད་སྐྲུན་དགོས། རྒྱ་ཆེའི་ཏང་ཡོན་དང་ལས་བྱེད་པར་སློབ་གསོ་དང་ཁྲིད་སྟོན་བྱས་ཏེ། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་བརྟན་པོར་འཛིན་དགོས་པ་དང་། བྱ་བ་ཐམས་ཅད་མི་དམངས་ཀྱི་ཆེད་དུ་སྒྲུབ་པ་དང་བྱ་བ་ཐམས་ཅད་མི་དམངས་ལ་བརྟེན་ནས་སྒྲུབ་པ་རྒྱུན་འཁྱོངས། རང་རྟོགས་ངང་དམངས་ལ་བློ་དང་དགོས་མཁོ་འདྲི་བ། ཐོག་མཐའ་བར་གསུམ་དུ་མི་དམངས་དང་སྐྱིད་སྡུག་མཉམ་མྱོང་དང་ལས་དབང་མཉམ་འཁུར་དང་གཅིག་སེམས་གཅིག་འབྲེལ་བྱེད་པ། “བག་ལེབ་”ཇེ་ཆེར་བཟོས་ནས་དམངས་འཚོའི་བདེ་སྐྱིད་མུ་མཐུད་ཆེ་རུ་གཏོང་བ། མི་དམངས་མང་ཚོགས་ཀྱི་བྲེལ་དཀའ་སྡུག་སྨོན་བཞིའི་གནད་དོན་ཐག་གཅོད་ཤུགས་ཆེན་བྱེད་པ། དམངས་འཚོར་ཕན་པ་དང་། དམངས་སེམས་དྲོ་བ། དམངས་ཀྱི་འདུན་པ་ལ་བསྟུན་པ་བཅས་ཀྱི་ལས་ཀ་མང་ཚོགས་ཀྱི་བློར་འབབ་པར་སྒྲུབ་པ། མི་དམངས་མང་ཚོགས་ཀྱི་ཐོབ་སྣང་སྐྱིད་སྣང་བདེ་སྣང་གསུམ་ཆེ་རུ་གཏོང་བ་བཅས་བྱེད་དགོས།

ལྔ་ནི་སྤྱོད་གཙང་སྤྱི་གཞོལ་དང་སྲོལ་གསར་གཏོད་དགོས། རྒྱ་ཆེའི་ཏང་ཡོན་དང་ལས་བྱེད་པར་སློབ་གསོ་དང་ཁྲིད་སྟོན་བྱས་ཏེ། སྒྲིག་ཁྲིམས་ཀྱི་འདུ་ཤེས་དང་སྒྲིག་ལམ་གྱི་འདུ་ཤེས་ཆེ་རུ་སྐྱེད་པ་དང་། “སྤྱོད་ཚུལ་བཞི་”རྒྱུན་མཐུད་ངང་ཡོ་བསྲང་བཅོས་སྐྱོང་། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཡོ་བསྲང་བཅོས་སྐྱོང་བྱ་རྒྱུ་དེ་སྔར་ལས་འབུར་ཐོན་གྱི་གོ་གནས་སུ་འཇོག་པ། དྲང་གཞག་ངང་དབང་ཆ་སྤྱོད་པ་དང་། ཁྲིམས་ལྟར་དབང་ཆ་སྤྱོད་པ། དམངས་དོན་དུ་དབང་ཆ་སྤྱོད་པ། སྤྱོད་གཙང་ངང་དབང་ཆ་སྤྱོད་པ་བཅས་བྱེད་ཐུབ་པ། གཙང་མ་གཙང་རྐྱང་གི་བློ་མཐུན་བར་གྱི་འབྲེལ་བ་དང་། བག་ཡོད་ཚུལ་ལྡན་གྱི་གོང་འོག་བར་གྱི་འབྲེལ་བ། མཛའ་མཐུན་ལྷད་མེད་གཅིག་གྱུར་གྱི་སྲིད་ཚོང་བར་གྱི་འབྲེལ་བ་གསར་པ་བཅས་ཆགས་པར་སྐུལ་འདེད། ཆབ་སྲིད་ཀྱི་སྐྱེ་ཁམས་དང་སྤྱི་ཚོགས་ཀྱི་དར་སྲོལ་བཟང་པོའི་སྣེ་ཁྲིད་བྱེད་མཁན་དང་། འཛུགས་སྐྲུན་བྱེད་མཁན་དང་། སྲུང་སྐྱོང་བྱེད་མཁན་བཅས་ཡག་པོ་བྱེད་དགོས།

གསུམ་པ། ཕྱོགས་ཡོངས་ནས་གཙོ་གནད་བྱེད་ཐབས་དོན་འཁྱོལ་བྱེད་དགོས། ཐེངས་འདིའི་བརྗོད་དོན་གཙོ་བོའི་སློབ་གསོ་ནི་དུས་རིམ་དང་ལྷུ་ཚིགས་མི་དབྱེ་བར་རིགས་པའི་གཞུང་ལུགས་སློབ་སྦྱོང་དང་། བརྟག་དཔྱད་ཞིབ་འཇུག །འཕེལ་རྒྱས་སྐུལ་སྤེལ། ཞིབ་བཤེར་དག་ཐེར་སོགས་དཀྱུས་གཅིག་ཏུ་བསྟར་ནས་གཞི་མཐུན་པར་མཉམ་འདྲེས་དང་སྡེབ་གཅིག་ཏུ་སྐུལ་འདེད་བྱེད་དགོས།

རིགས་པའི་གཞུང་ལུགས་སློབ་སྦྱོང་ལ་ཤུགས་སྣོན་བྱེད་དགོས། མ་རྩོམ་ཀློག་པ་དང་། མ་ཡིག་སྦྱོང་བ། རྩ་བའི་རིགས་པ་རྟོགས་པ་བཅས་རྒྱུན་འཁྱོངས་དང་། བསམ་བློ་མང་གཏོང་དང་སློབ་སྦྱོང་གཏིང་ཟབ་དང་གོ་བ་གཏིང་ཟབ་ལོན་པ་རྒྱུན་འཁྱོངས་བྱས་ཏེ། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་ཚན་རིག་གི་མ་ལག་དང་། ལྟེ་བའི་བརྗོད་སྙིང་། ལག་ལེན་གྱི་བླང་བྱ་བཅས་ཆ་ཚང་བར་སློབ་སྦྱོང་དང་གོ་བ་བླངས་ཏེ། སྤྱི་ཁོག་ངེས་པ་དང་མཐའ་གསལ་མཐིལ་རྟོགས་ཡོང་བ་བྱེད་དགོས། རིགས་པའི་གཞུང་ལུགས་དང་དོན་དངོས་ཟུང་འབྲེལ་བྱེད་པའི་མར་ཁེ་སིའི་རིང་ལུགས་ཀྱི་སློབ་སྲོལ་དར་སྤེལ་ཤུགས་ཆེན་དང་། དུས་རབས་གསར་པའི་རྔམ་བརྗིད་ལྡན་པའི་ལོ་རྒྱུས་འཕེལ་རིམ་དང་འཕོ་འགྱུར་རླབས་པོ་ཆེ་དང་ཟུང་འབྲེལ་དམ་ཟབ་བྱས་ཏེ། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་བྱུང་འཕེལ་གྱི་ལག་ལེན་རྨང་གཞི་ཁོང་དུ་ཆུད་དགོས་པ་དང་། འཐབ་རྩོད་རླབས་པོ་ཆེ་དང་། ལས་གྲྭ་རླབས་པོ་ཆེ། བྱ་གཞག་རླབས་པོ་ཆེ། ཕུགས་འདུན་རླབས་པོ་ཆེ་བཅས་གཅིག་འདོམས་བྱེད་པ་དང་། “ཕྱོགས་ལྔ་གཞི་གཅིག་”གི་སྤྱིའི་བཀོད་པར་གཅིག་འདོམས་ཀྱིས་སྐུལ་འདེད་གཏོང་བ་དང་། “ཕྱོགས་ཡོངས་བཞི་”ཡི་འཐབ་ཇུས་ཀྱི་བཀོད་པར་མཐུན་སྦྱོར་ངང་སྐུལ་འདེད་གཏོང་བའི་དུས་རབས་ཀྱི་བླང་བྱ་དང་ཟུང་འབྲེལ་དམ་ཟབ་བྱས་ཏེ། དགོངས་པ་དེའི་རྒྱལ་སྲིད་སྐྱོང་ལུགས་སྐོར་གྱི་འདུ་ཤེས་གསར་པ་དང་བསམ་བློ་གསར་པ་དང་འཐབ་ཇུས་གསར་པ་བཅས་ཁོང་དུ་ཆུད་དགོས་པ། ལས་ཀའི་འགན་འཁྲི་དང་ཟུང་འབྲེལ་དམ་ཟབ་བྱས་ཏེ། དགོངས་པ་དེའི་འབྲེལ་ཡོད་ཁྱབ་ཁོངས་སྐོར་གྱི་རྣམ་བཤད་གལ་ཆེན་དང་དེ་བཞིན་བྱེ་བྲག་གི་ལས་དོན་ཡག་པོར་སྒྲུབ་པའི་བསམ་ཕྱོགས་དང་། བྱེད་ཐབས། ཐབས་ཤེས་བཅས་ཁོང་དུ་ཆུད་དགོས་པ་བཅས་རེད། ཆ་ཚང་སློབ་སྦྱོང་དང་གཙོ་གནད་སློབ་སྦྱོང་ཟུང་འབྲེལ་བྱས་ཐོག །རྒྱ་ཆེའི་ཏང་ཡོན་དང་ལས་བྱེད་པར་ཁྲིད་སྟོན་བྱས་ཏེ། གང་ཞིག་བསྒྲུབ་དགོས་ན་གཙོ་གནད་དུ་བཟུང་ནས་སློབ་སྦྱོང་བྱེད་དགོས་པ་དང་། ཅི་ཞིག་མི་འདང་ན་དེ་གཙོ་གནད་དུ་བཟུང་ནས་ཁ་གསབ་བྱེད་དགོས་ཤིང་། སློབ་སྦྱོང་གི་དམིགས་གཏད་རང་བཞིན་ཆེ་རུ་གཏོང་དགོས་ལ། ཧུར་བརྩོན་གྱིས་སློབ་སྦྱོང་གི་ཕན་འབྲས་ཆེ་རུ་གཏོང་དགོས། རིམ་པ་ཁག་གི་ཏང་ཨུ་(ཏང་ཙུའུ་)ཡིས་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོ་ཆུང་གི་སློབ་སྦྱོང་དང་དཔེ་ཀློག་འཛིན་གྲྭ་སྒྲུབ་པ་སོགས་བྱེད་སྟངས་སྣ་ཚོགས་སྤྱད་དེ་གཅིག་སྡུད་སློབ་སྦྱོང་དང་བགྲོ་གླེང་སྤེལ་རེས་ཟབ་མོར་བྱེད་དགོས། འགོ་ཁྲིད་ལས་བྱེད་པས་ཁྲིད་སྟེགས་ཐོག་བུད་དེ་ཏང་གི་ཤེས་བྱའི་སློབ་ཁྲིད་བྱེད་དགོས་པ་དང་། རང་དཔེ་གཞན་སྟོན་དང་སློབ་ཁྲིད་ལ་བརྟེན་ནས་སློབ་སྦྱོང་ལ་སྐུལ་འདེད་གཏོང་དགོས། ཏང་ནང་ཁུལ་གྱི་སློབ་གསོ་ལ་བརྟེན་ནས་སྤྱི་ཚོགས་ཡོངས་ཀྱི་སློབ་སྦྱོང་ལ་ཁྲིད་སྟོན་དང་སྐུལ་ཁྲིད་བྱ་རྒྱུ་རྒྱུན་འཁྱོངས་བྱས་ཏེ། ཏང་གི་གསར་གཏོད་རིགས་པའི་གཞུང་ལུགས་“མི་སེར་དཀྱུས་མའི་ཁྱིམ་དུ་སླེབས་པ་”བྱེད་དགོས།

བརྟག་དཔྱད་ཞིབ་འཇུག་གཏིང་ཟབ་བྱེད་དགོས། ཏང་ཡོངས་སུ་བརྟག་དཔྱད་ཞིབ་འཇུག་རྒྱ་ཆེར་བྱ་རྒྱུའི་སྐོར་གྱི་ཏང་ཀྲུང་དབྱང་གི་ལས་ཀའི་འཆར་ཟིན་ལྟར། རྒྱ་ཆེའི་ཏང་ཡོན་དང་ལས་བྱེད་པ་སྤྱི་དང་ལྷག་པར་དུ་རིམ་པ་ཁག་གི་འགོ་ཁྲིད་ལས་བྱེད་པ་སྒྲིག་འཛུགས་བྱས་ཏེ་ལས་གནས་དང་པོར་ཟབ་ཞུགས་དང་། གྲོང་གསེབ་དང་། སྡེ་ཁུལ། ཁེ་ལས། སྨན་ཁང་། སློབ་གྲྭ། “གསར་པ་གཉིས་”ཀྱི་རྩ་འཛུགས་སོགས་གཞི་རིམ་སྡེ་ཚན་དུ་ཟབ་འཇུག་བྱས་ཏེ། གནད་དོན་གྱི་རྒྱུ་རྐྱེན་འཚོལ་བ་དང་དབྱེ་ཞིབ་ཕྲ་མོ་བྱེད་པ། གནད་དོན་གསེད་བཀྲོལ་དང་དཀའ་གནད་བཤེར་འབུད། ཏང་གི་གསར་གཏོད་རིགས་པའི་གཞུང་ལུགས་སྤྱད་དེ་གནས་ཚུལ་གསར་པར་ཞིབ་འཇུག་དང་གནད་དོན་གསར་པ་ཐག་གཅོད་བྱེད་དགོས། གནད་དོན་ཁྲིད་ཕྱོགས་སུ་འཛིན་པ་རྒྱུན་འཁྱོངས་དང་། གནད་དོན་གྱི་འདུ་ཤེས་ཆེ་རུ་གཏོང་བ། གནད་དོན་ལ་ལྟ་སྟངས་ཡང་དག་འཛིན་པ། གནད་དོན་ཤེས་རྟོགས་བྱེད་མཁས་པ། “ཐོག་བརྩེགས་ཁང་ཆེན་”ལ་བལྟ་དགོས་ལ་“སྲིབ་རྒྱབ་ཀྱི་སྲང་ལམ་”ལ་ཡང་བལྟ་དགོས་པ། གནས་ཚུལ་གསལ་རྟོགས་དང་། གནད་དོན་གནད་ལ་འཕིགས་པར་འཚོལ་བ། ཁ་གཏད་འཇལ་ཐབས་ཐིག་པོ་འདོན་པ་བཅས་བྱེད་དགོས། བརྟག་དཔྱད་ཞིབ་འཇུག་བྱེད་སྟངས་ལེགས་བཅོས་བྱེད་དགོས་པ་དང་། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་སྤང་གང་ཐུབ་བྱེད་དགོས་ལ། དཀའ་ངལ་མང་བ་དང་། མང་ཚོགས་ཀྱི་བསམ་འཆར་གཅིག་སྡུད་ཡིན་པ། ལས་ཀའི་རྣམ་པ་གསར་འབྱེད་བྱེད་མི་ཐུབ་པ་བཅས་ཀྱི་ས་གནས་དང་སྡེ་ཚན་དུ་ཕྱིན་ནས་བརྟག་དཔྱད་ཞིབ་འཇུག་བྱེད་དགོས། གནས་བརྗེས་བསམ་གཞིག་མཁས་པོ་བྱེད་པ་དང་། མང་ཚོགས་ཀྱི་ཁྲོད་དུ་སྐྱོད་དེ། མང་ཚོགས་ཀྱི་རེ་འབོད་ལྷག་བསམ་ཟོལ་མེད་ཀྱིས་ཉན་དགོས་པ་དང་། མང་ཚོགས་ཀྱི་བསམ་འདུན་ཇི་མ་ཇི་བཞིན་དུ་མཚོན་དགོས་ཤིང་། མང་ཚོགས་ཀྱི་བདེ་སྡུག་ལ་ཞེ་ཐག་པ་ནས་སེམས་ཁུར་བྱེད་དགོས་ལ། མང་ཚོགས་ཀྱི་སེམས་ཁྲལ་དང་རེ་སྒུག་མ་ནོར་བར་ཤེས་རྟོགས་བྱེད་དགོས། བརྟག་དཔྱད་ཞིབ་འཇུག་གི་གྲུབ་འབྲས་བཀོལ་སྤྱོད་བྱེད་པར་མཐོང་ཆེན་བྱེད་དགོས་པ་དང་། བརྟག་དཔྱད་བྱས་པའི་རྨང་གཞིའི་ཐོག་ཞིབ་འཇུག་གཏིང་ཟབ་བྱེད་པ་དང་། བརྟག་དཔྱད་ཞིབ་འཇུག་བྱས་འབྲས་ཀྱི་སྤུས་ཚད་མཐོ་རུ་གཏོང་བ་དང་། བརྟག་དཔྱད་ཞིབ་འཇུག་གི་གྲུབ་འབྲས་དེ་གནད་དོན་ཐག་གཅོད་དང་ལས་ཀ་ལེགས་བཅོས་བྱེད་པའི་བྱེད་ཐབས་ངོ་མར་བསྒྱུར་ཏེ། བརྟག་དཔྱད་མང་ཞིང་ཞིབ་འཇུག་ཉུང་བ་དང་། གནས་ཚུལ་མང་ཞིང་དབྱེ་ཞིབ་ཉུང་བ། ཁ་གཏད་འཇལ་ཐབས་དང་གྲོས་འགོ་བཏོན་པ་ཧ་རེ་ཧུ་རེ་དང་སྟོང་པ་ཡིན་པ། དོན་དངོས་ཀྱི་གནད་དོན་ཐག་གཅོད་མི་བྱེད་པ་བཅས་བཀག་འགོག་བྱེད་དགོས། བརྟག་དཔྱད་ཞིབ་འཇུག་གི་དུས་ཚོད་དང་ས་གནས་གཅིག་གྱུར་གྱིས་བཀོད་སྒྲིག་དང་ལུགས་མཐུན་གྱིས་གཏན་འཁེལ་བྱེད་དགོས་པ་དང་། མཉམ་རུབ་ཀྱི་བརྟག་དཔྱད་ཞིབ་འཇུག་དང་ཚུལ་འཆོས་ཅན་གྱི་བརྟག་དཔྱད་ཞིབ་འཇུག་བཀག་འགོག་བྱེད་དགོས། བརྟག་དཔྱད་ཞིབ་འཇུག་བྱེད་རིང་འཁོར་ཉུང་སྟབས་བདེ་དང་། གཞུང་དོན་སྣེ་ལེན་སྟབས་བདེ་དང་། གཞི་རིམ་གྱི་ཁུར་པོ་ལྗིད་དུ་མི་གཏོང་བ་བྱེད་དགོས།

སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས། སྤུས་ཚད་མཐོ་བའི་འཕེལ་རྒྱས་ཏེ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་ལས་འགན་ཨང་དང་པོར་རྩེ་གཅིག་ཏུ་དམིགས་ཏེ། རིགས་པའི་གཞུང་ལུགས་སློབ་སྦྱོང་ལ་ཤུགས་བརྒྱབ་ནས་ལག་ལེན་འཕེལ་རྒྱས་ལ་མཛུབ་སྟོན་དང་། བརྟག་དཔྱད་ཞིབ་འཇུག་གཏིང་ཟབ་ཏུ་སྤེལ་ནས་འཕེལ་རྒྱས་ཀྱི་དཀའ་གནད་སེལ་བར་སྐུལ་འདེད། སློབ་སྦྱོང་དང་བརྟག་དཔྱད་ཞིབ་འཇུག་བྱ་རྒྱུ་དེ་ཏང་གི་ཚོགས་ཆེན་ཉི་ཤུ་པས་བཀོད་སྒྲིག་བྱས་པའི་ལས་འགན་ཁག་གི་ནང་དོན་འཁྱོལ། སྤུས་ཚད་མཐོ་བའི་འཕེལ་རྒྱས་ཀྱི་ཕན་འབྲས་གསར་པར་བརྟེན་ནས་བརྗོད་དོན་གཙོ་བོའི་སློབ་གསོའི་གྲུབ་འབྲས་ལ་ཞིབ་བཤེར་བཅས་བྱེད་དགོས། ཏང་ཀྲུང་དབྱང་གི་འཕེལ་རྒྱས་ཀྱི་འདུ་ཤེས་གསར་པ་ལག་བསྟར་དང་། འཕེལ་རྒྱས་ཀྱི་བཀོད་པ་གསར་པ་འཛུགས་པ་དང་། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་སྐོར་གྱི་བླང་བྱ་དང་ཐབས་ཇུས་བཀོད་སྒྲིག་རབ་དང་རིམ་པ་དོན་འཁྱོལ་ཏན་ཏིག་བྱེད་པ་དང་། མ་ལག་གི་འདུ་ཤེས་དང་སྤྱི་ཡོངས་ཀྱི་འདུ་ཤེས་ཆེ་རུ་བསྐྱེད་དེ། ནང་མཁོ་རྒྱ་སྐྱེད་དང་འདོན་སྤྲོད་ཕྱོགས་གྲུབ་ཚུལ་རང་བཞིན་གྱི་སྒྱུར་བཅོས་གཏིང་ཟབ་ཏུ་སྤེལ་བར་ཤུགས་རྒྱག་པ་དང་། དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་ཇེ་མགྱོགས་སུ་གཏོང་བ། ཕྱོགས་ཡོངས་ནས་གྲོང་གསེབ་དར་རྒྱས་གཏོང་བ། ཚན་སློབ་ལ་བརྟེན་ནས་རྒྱལ་ཁབ་དར་རྒྱས་གཏོང་བའི་འཐབ་ཇུས་དང་། ཤེས་ལྡན་མི་སྣར་བརྟེན་ནས་རྒྱལ་ཁབ་སྟོབས་ལྡན་དུ་གཏོང་བའི་འཐབ་ཇུས། གསར་གཏོད་ལ་བརྟེན་ནས་འཕེལ་རྒྱས་ལ་སྐུལ་འདེད་གཏོང་བའི་འཐབ་ཇུས་བཅས་ལག་བསྟར། འཕེལ་རྒྱས་གཏོང་རིང་དམངས་འཚོ་འགན་སྲུང་དང་ལེགས་བཅོས་བྱེད་པ། ལྗང་མདོག་འཕེལ་རྒྱས་དང་མཛེས་སྡུག་ལྡན་པའི་ཀྲུང་གོ་འཛུགས་སྐྲུན་ལ་སྐུལ་འདེད་གཏོང་བ། ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བར་སྐུལ་འདེད་གཏོང་བ། སྤྱི་ཚོགས་རིང་ལུགས་ཀྱི་རིག་གནས་སྟོབས་ལྡན་རྒྱལ་ཁབ་འཛུགས་སྐྲུན། སྤྱི་ཚོགས་ཀྱི་བརྟན་བརླིང་སྲུང་སྐྱོང་བྱེད་པ་སོགས་ཐད་ཀྱི་ལས་དོན་ཡག་པོར་བསྒྲུབ་དགོས་པ་དང་། སྤུས་ཚད་མཐོ་བའི་འཕེལ་རྒྱས་ལ་མཉམ་དུ་སྐུལ་འདེད་གཏོང་བའི་བསྒྲིལ་ཤུགས་ཆེན་པོ་ཆགས་པ་བྱེད་དགོས། དོན་དངོས་དང་ཟུང་འབྲེལ་དམ་ཟབ་བྱེད་པ་དང་། ངན་གོམས་བསམ་གཞིག་གཏོར་བ། བསམ་བློའི་འདུ་ཤེས་སྒྱུར་བ། ས་ཁུལ་དེ་ག་དང་སྡེ་ཁག་དེ་ག་དང་སྡེ་ཚན་དེ་གའི་སྤུས་ཚད་མཐོ་བའི་འཕེལ་རྒྱས་འགྲོ་བར་གནོད་པ་དང་འགལ་རྐྱེན་བཟོ་བའི་གནད་དོན་ཆད་སྐྱོན་དང་དེའི་འབྱུང་རྩར་དམ་པོར་དམིགས་པ། འབེན་གཏད་གསོ་བཅོས་བཅས་བྱས་ཏེ། མྱུར་ཚད་དང་སྤུས་ཚད། འཕེལ་རྒྱས་དང་བདེ་འཇགས། འཕེལ་རྒྱས་དང་ཁོར་ཡུག་སྲུང་སྐྱོབ། འཕེལ་རྒྱས་དང་རིམས་འགོག་ལ་སོགས་པའི་འབྲེལ་བ་གལ་ཆེན་ཐག་གཅོད་ཡང་དག་པར་བྱེད་དགོས་པ་དང་། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་མ་ལག་རང་བཞིན་དང་། སྤྱི་ཡོངས་རང་བཞིན། མཐུན་སྦྱོར་རང་བཞིན་བཅས་རྒྱུན་ཆད་མེད་པར་ཆེ་རུ་གཏོང་དགོས། ནན་བཤད་བྱེད་དགོས་པ་ཞིག་ནི། རིམ་པ་ཁག་གི་འགོ་ཁྲིད་ཚན་པས་ཏང་དང་མི་དམངས་ཀྱི་མངག་བཅོལ་བློ་ལ་བརྟན་པོར་ངེས་ཏེ། “བྱས་འབྲས་ཐོབ་པར་ངས་མི་རྩོད། བྱས་རྗེས་འཇོག་པར་ང་ཡིས་འབད་”ཅེས་པའི་སྙིང་སྟོབས་དར་སྤེལ་གཏོང་དགོས་པ་དང་། འཆར་གཞི་གཅིག་མཐར་མ་ཐུག་བར་དུ་འགོད་པ་རྒྱུན་འཁྱོངས་བྱས་ནས། ད་ཡོད་ཀྱི་བཀོད་སྒྲིག་དང་འཆར་བཀོད་ནི་ཚན་རིག་དང་མཐུན་པ་དང་། ལག་ལེན་གྱི་བླང་བྱ་གསར་པ་དང་མཐུན་པ། མི་དམངས་མང་ཚོགས་ཀྱི་རེ་འདུན་དང་མཐུན་པ་བཅས་ཡིན་ཕྱིན་རྒྱུན་འཁྱོངས་བྱེད་དགོས་པ་དང་། གཅིག་རྗེས་གཅིག་གིས་མཐུད་དེ་བསྒྲུབ་དགོས་ལ། སྐབས་བརྗེ་བྱས་རྗེས་སུ་འབྱུང་སླ་བའི་སྲིད་འབྲས་ལ་སྲེད་པ་དང་། རྨོངས་ཚོད་དང་འོལ་ཚོད་ཀྱིས་སྒྲུབ་པ། ཆེ་སྒྲུབ་མྱུར་སྤེལ་དང་དེ་བཞིན་“འགྲན་ལམ་བརྗེ་བ་”དང་“རྗེས་ཤུལ་འཇོག་པ་”སོགས་ཀྱི་སྣང་ཚུལ་བཀག་འགོག་བྱེད་དགོས།

ལྟ་ཞིབ་དག་ཐེར་ཡག་པོ་བྱེད་དགོས། ཕྱོགས་གཅིག་ནས་སློབ་སྦྱོང་དང་། ཕྱོགས་གཅིག་ནས་ཞིབ་བསྡུར། ཕྱོགས་གཅིག་ནས་ཞིབ་བཤེར། ཕྱོགས་གཅིག་ནས་དག་ཐེར་བཅས་བྱ་རྒྱུ་རྒྱུན་འཁྱོངས་དང་། གནད་དོན་དག་ཐེར་བྱ་རྒྱུ་དེ་བརྗོད་དོན་གཙོ་བོའི་སློབ་གསོའི་ཐོག་མཐའ་བར་གསུམ་དུ་དཀྱུས་གཅིག་ཏུ་བསྟར་ཏེ། མི་དམངས་མང་ཚོགས་ལ་གནད་དོན་ཐག་གཅོད་བྱས་པའི་ཕན་འབྲས་ལོངས་སུ་སྤྱོད་ཐུབ་པ་བྱེད་དགོས། འགོ་ཁྲིད་ཚན་པས་《བསམ་འཆར་》ལ་ཞིབ་བསྡུར་དང་། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་ཀྲུང་དབྱང་གི་ཐབས་ཇུས་དང་བཀོད་སྒྲིག་གལ་ཆེན་དང་ཞིབ་བསྡུར་བྱས་ཏེ། བརྟག་དཔྱད་ཞིབ་འཇུག་ལས་ཤེས་རྟོགས་བྱུང་བའི་གནད་དོན་དང་། འཕེལ་རྒྱས་ལ་སྐུལ་འདེད་བྱེད་རིང་འཕྲད་པའི་གནད་དོན། མང་ཚོགས་བསམ་འཆར་ཆེ་བའི་གནད་དོན་བཅས་ཆ་ལག་ཚང་བར་གསེད་བཀྲོལ་བྱེད་དགོས་པ་དང་། སྐོར་གཟིགས་སྐོར་ཞིབ་དང་རྩིས་བཤེར་ལྟ་སྐུལ་ལས་ཤེས་རྟོགས་བྱུང་བའི་གནད་དོན་དང་ཟུང་འབྲེལ་བྱས་ཏེ། དོན་ཚན་རེ་རེ་བཞིན་དག་ཐེར་ཡོ་བསྲང་བྱེད་ཐབས་གཏན་འབེབས་བྱེད་པ་དང་། ཡོ་བསྲང་བྱེད་ཐུབ་རིགས་འཕྲལ་མར་ཡོ་བསྲང་བྱེད་དགོས་ཤིང་། སྐབས་ཤིག་རིང་ཐག་གཅོད་མི་ཐུབ་པའི་རིགས་ལྷོད་གཡེང་མི་གཏོང་བར་མུ་མཐུད་དག་ཐེར་ཡོ་བསྲང་བྱས་ཏེ། དག་ཐེར་ཡོ་བསྲང་གནད་ལ་འཁེལ་བར་འགན་ལེན་ཏན་ཏིག་དང་། ཡུན་རིང་ནར་འགྱངས་ཀྱིས་ཐག་གཅོད་མི་བྱེད་པ་དང་དག་ཐེར་བྱས་ཀྱང་ཡོ་བསྲང་མི་བྱེད་པ་བཀག་འགོག་བྱེད་དགོས། ཏང་ཡོན་དང་ལས་བྱེད་པ་སྤྱི་དང་ལྷག་པར་དུ་འགོ་ཁྲིད་ལས་བྱེད་པས་རང་ཉིད་དེའི་ནང་འཇུག་པ་དང་། འགན་འཁྲི་དེའི་ནང་འཇུག་པ། ལས་དོན་དེའི་ནང་འཇུག་པ་བཅས་བྱས་ཏེ། ཞིབ་བཤེར་བྱས་པའི་གནད་དོན་དང་ཞིབ་བསྡུར་བྱས་ནས་ཏང་གཤིས་ལ་དབྱེ་ཞིབ་དང་། ནན་ཏན་གྱིས་སྐྱོན་བརྗོད་དང་རང་སྐྱོན་རང་བརྗོད་བྱེད་སྐབས་མི་དང་། བྱ་བ། བསམ་བློ་བཅས་མཐོང་དགོས་ཤིང་། བསམ་བློའི་འབྱུང་རྩའི་ཐོག་ནས་གནད་དོན་ཐག་གཅོད་པར་ཤུགས་རྒྱག་དགོས། ས་ཁུལ་ཁག་དང་སྡེ་ཁག་ཁག་དང་སྡེ་ཚན་ཁག་བཅས་ཀྱིས་གནད་དོན་འབུར་ཐོན་ཅན་ལ་ཆེད་དམིགས་དག་ཐེར་ཡག་པོ་བྱེད་དགོས་པ་དང་། བཙན་པོར་གཏུགས་ཕོད་པ་དང་ཕན་འབྲས་དོན་གཉེར་བྱེད་དགོས། “འཕྲལ་མར་བཅོས་པ་”དང་“ཡུན་རིང་འཛུགས་པ་”ཟུང་འབྲེལ་བྱ་རྒྱུ་རྒྱུན་འཁྱོངས་བྱས་ཏེ། བརྗོད་དོན་གཙོ་བོའི་སློབ་གསོའི་ནང་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བྱེད་ཐབས་ཡག་པོ་དང་ཉམས་མྱོང་བཟང་པོ་དུས་ཐོག་ཏུ་ལམ་ལུགས་ཀྱི་རྣམ་པའི་ཐོག་ནས་གཏན་འཁེལ་བྱེད་དགོས། ཡང་དང་བསྐྱར་དུ་ཐོན་པའི་གནད་དོན་ལ་ལམ་ལུགས་ཐོག་ནས་དེའི་རྒྱུ་རྐྱེན་འཚོལ་དགོས་པ་དང་། ལམ་སྲོལ་འཐུས་ཚང་དུ་གཏོང་བ་དང་སྒྲིག་སྲོལ་ལམ་ལུགས་འཛུགས་པའི་ལས་དོན་ཡག་པོ་བསྒྲུབས་ནས་གནད་དོན་བསྐྱར་དུ་ཐོན་པ་བཀག་འགོག་བྱེད་དགོས།

ཀྲུང་དབྱང་དང་རྒྱལ་ཁབ་ལས་ཁུངས་ཀྱིས་རྒྱལ་ཁབ་བཅོས་སྐྱོང་མ་ལག་ནང་དམིགས་བསལ་གྱི་གོ་གནས་གལ་ཆེན་ཟིན་ཡོད་པ་དང་། ཏང་ཀྲུང་དབྱང་དང་ཐག་ཉེ་ཤོས་ཡིན་ལ། ཏང་ཀྲུང་དབྱང་ལ་ཐད་ཀར་ཞབས་འདེགས་ཞུ་བཞིན་ཡོད་སྟབས། ཐེངས་འདིའི་བརྗོད་དོན་གཙོ་བོའི་སློབ་གསོ་ཡག་པོ་སྤེལ་བར་སྟོན་རྟགས་ལྟ་བུ་ནུས་པ་ཐོན་གྱི་ཡོད། ཐེངས་འདིའི་བརྗོད་དོན་གཙོ་བོའི་སློབ་གསོའི་ནང་ཀྲུང་དབྱང་དང་རྒྱལ་ཁབ་ལས་ཁུངས་ཀྱི་སྡེ་ཚན་ཁག་གིས་འགོ་ཡག་པོ་ཁྲིད་ཅིང་མིག་དཔེ་བསྟན་དགོས་པ་དང་། བརྗོད་དོན་གཙོ་བོའི་སློབ་གསོ་གཏིང་ཟབ་དང་ཏན་ཏིག་ངང་སྤེལ་བར་དཔེ་སྟོན་སྣེ་ཁྲིད་བྱེད་དགོས། དུས་མཚུངས་སུ། བརྗོད་དོན་གཙོ་བོའི་སློབ་གསོའི་ནང་ལས་ཁུངས་དང་རྒྱུད་ཁོངས་ནང་གི་ལས་བྱེད་པའི་དཔུང་སྡེའི་སློབ་གསོ་དག་ཐེར་དམ་འཛིན་ཡག་པོ་བྱེད་དགོས་པ་དང་། ཆབ་སྲིད་སློབ་གསོ་དང་ཏང་གཤིས་སློབ་གསོར་དངོས་གནས་ཤུགས་རྒྱག་པ་དང་། སྒྲིག་ལམ་ནན་སྲུང་དང་སྒྲིག་ཁྲིམས་སྲོལ་ནན་པོར་བཟོ་བ། སློབ་གསོ་ནན་པོ་བྱས་ནས་བསམ་བློ་གཙང་བ་བཟོ་བ། དག་ཐེར་ནན་པོ་བྱས་ནས་རྩ་འཛུགས་གཙང་མ་བཟོ་བ་བཅས་བྱས་ཏེ། ཏང་ཀྲུང་དབྱང་བློ་བདེ་བ་དང་མི་དམངས་མང་ཚོགས་ཡིད་ཚིམ་པའི་དཔེ་བཟང་ལས་ཁུངས་འཛུགས་སྐྲུན་ཧུར་ཐག་བྱེད་དགོས་པ་དང་། “སྲུང་སྐྱོང་གཉིས་”ལག་ལེན་བྱེད་པའི་གྲལ་བསྟར་དང་པོ་བྱས་ནས་ཡག་པོར་སྐྱོད་དགོས།

གསུམ། བརྗོད་དོན་གཙོ་བོའི་སློབ་གསོའི་འགོ་ཁྲིད་ཤུགས་སྣོན་ཏན་ཏིག་རྒྱག་དགོས།

ཐེངས་འདིའི་བརྗོད་དོན་གཙོ་བོའི་སློབ་གསོ་ནི་སྤྱི་ཡོངས་དང་འབྲེལ་བ་ཡོད་པའི་དོན་ཆེན་ཞིག་ཡིན་པ་དང་། དུས་ཚོད་ཐུང་བ་དང་། ལས་འགན་ལྕི་བ། བླང་བྱ་མཐོ་བ་བཅས་རེད། རིམ་པ་ཁག་གི་ཏང་ཨུ་(ཏང་ཙུའུ)ཡིས་ཚད་མཐོའི་མཐོང་ཆེན་བྱེད་དགོས་པ་དང་། སྒྲིག་འཛུགས་དང་ལག་བསྟར་ཞིབ་ཚགས་བྱས་ཏེ། བརྗོད་དོན་གཙོ་བོའི་སློབ་གསོའི་ལས་འགན་ཁག་ལེགས་འགྲུབ་ཡོང་བ་འགན་ལེན་བྱེད་དགོས།

དང་པོ། འགོ་ཁྲིད་ཀྱི་འགན་འཁྲི་ཁ་གསལ་བཟོ་དགོས། ཐེངས་འདིའི་བརྗོད་དོན་གཙོ་བོའི་སློབ་གསོ་ནི་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ལྷན་ཁང་གི་འགོ་ཁྲིད་འོག་སྤེལ་བ་དང་། ཀྲུང་དབྱང་བརྗོད་དོན་གཙོ་བོའི་སློབ་གསོའི་འགོ་ཁྲིད་ཚོ་ཆུང་དང་དེའི་གཞུང་ལས་ཁང་བཙུགས་ནས་བརྗོད་དོན་གཙོ་བོའི་སློབ་གསོར་འགོ་ཁྲིད་དང་སློབ་སྟོན་བྱེད་པའི་འགན་འཁུར་དགོས། འགོ་ཁྲིད་ཚོ་ཆུང་གི་ཁོངས་མི་དང་ཚན་པས་འགན་ནུས་དང་བྱེད་ལས་འདོན་སྤེལ་གང་ལེགས་བྱས་ཏེ་མཉམ་འཛིན་མཉམ་སྒྲུབ་བྱེད་པའི་བསྒྲིལ་ཤུགས་ཆགས་པ་བྱེད་དགོས། རིམ་པ་ཁག་གི་ཏང་ཨུ་(ཏང་ཙུའུ)ཡིས་བྱེད་པོའི་འགན་འཁྲི་འཁུར་ནས་བརྗོད་དོན་གཙོ་བོའི་སློབ་གསོ་འཆར་འགོད་ཡག་པོ་དང་། སྒྲིག་འཛུགས་ཡག་པོ། དོན་འཁྱོལ་ཡག་པོ་བཅས་བྱེད་དགོས། ཏང་ཨུ་(ཏང་ཙུའུ་)ཡི་འགན་འཁུར་བློ་མཐུན་གཙོ་བོས་འགན་འཁུར་པ་དང་པོའི་ལས་འགན་དངོས་གནས་བསྒྲུབ་དགོས་པ་དང་། ངོ་ཐོག་ནས་ཇུས་འགོད་དང་། ངོ་བཅར་ནས་བཀོད་འདོམས། ལྟ་སྐུལ་སློབ་སྟོན་བཅས་བྱེད་དགོས་པ་ལས། “ལག་གཡུག་མགོ་བདག་”དང་“བརྒྱུད་མཁན་གཉིས་པ་”བྱེད་མི་ཉན། ཏང་ཨུ་(ཏང་ཙུའུ་)ཡི་ཁོངས་མིས་ལས་གནས་གཅིག་ལ་འགན་འཁྲི་གཉིས་ནན་ཏན་གྱིས་འཁུར་དགོས་པ་དང་། ལས་བགོས་འགན་འཁུར་ཁྱབ་ཁོངས་དང་ལས་བགོས་འགན་འཁུར་སྡེ་ཁག་གིས་བརྗོད་དོན་གཙོ་བོའི་སློབ་གསོ་སྤེལ་བར་སློབ་སྟོན་དང་ལྟ་སྐུལ་བྱེད་ཤུགས་ཆེ་རུ་གཏོང་དགོས། ལས་རིགས་ཁོངས་གཏོགས་ཀྱི་གཙོ་སྐྱོང་སྡེ་ཁག་གིས་རང་ལས་རིགས་དང་རང་ཁོངས་གཏོགས་ཀྱིས་བརྗོད་དོན་གཙོ་བོའི་སློབ་གསོ་སྤེལ་བར་སློབ་སྟོན་བྱེད་ཤུགས་ཆེ་རུ་གཏོང་དགོས། འབྲེལ་ཡོད་སྡེ་ཁག་གིས་འགན་འཁྲི་ཁ་གསལ་དང་རོགས་འདེགས་དམ་ཟབ་བྱེད་དགོས་པ་དང་། རྩ་འཛུགས་ཀྱི་མཛུབ་སྟོན་རྣམ་པ་བཟང་པོ་ཞིག་ཆགས་པ་བྱས་ནས་བརྗོད་དོན་གཙོ་བོའི་སློབ་གསོ་མགོ་བཟང་མཇུག་བཟང་དང་ཕན་འབྲས་ཐོན་པ་བྱེད་དགོས། བརྗོད་དོན་གཙོ་བོའི་སློབ་གསོ་སྤེལ་ཚུལ་དེ་འགོ་ཁྲིད་ཚན་པ་དང་འགོ་ཁྲིད་ལས་བྱེད་པའི་ལོ་འཁོར་དཔྱད་ཞིབ་དང་། ཏང་རྩ་འཛུགས་ཀྱི་ཧྲུའུ་ཅིས་གཞི་རིམ་ཏང་འཛུགས་སྐྲུན་ལས་དོན་སྒྲུབ་ཚུལ་གསལ་ཞུ་གདེང་འཇོག་དཔྱད་ཞིབ་བྱེད་པའི་ནང་དོན་གལ་ཆེན་དུ་འཛིན་དགོས།

གཉིས་པ། ལྟ་སྐུལ་སློབ་སྟོན་ལ་ཤུགས་རྒྱག་དགོས། ཀྲུང་དབྱང་གིས་སློབ་ཁྲིད་ཚོ་ཆུང་མངགས་ནས་བརྗོད་དོན་གཙོ་བོའི་སློབ་གསོ་སྤེལ་ཚུལ་ལ་ལྟ་སྐུལ་སློབ་སྟོན་བྱེད་དགོས། ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་ཀྱི་ཏང་ཨུ་དང་ལས་རིགས་ཁོངས་གཏོགས་ཀྱི་གཙོ་སྐྱོང་སྡེ་ཁག་གི་ཏང་ཙུའུ་(ཏང་ཨུ་)ཡིས་སྐོར་སྐྱོད་སློབ་སྟོན་ཚོ་ཆུང་མངགས་ནས་ཁོངས་གཏོགས་ས་ཁུལ་དང་། སྡེ་ཁག སྡེ་ཚན་བཅས་ལ་ལྟ་སྐུལ་དང་ཁྲིད་སྟོན་བྱེད་ཤུགས་ཆེ་རུ་གཏོང་དགོས། གྲོང་ཁྱེར་དང་རྫོང་རིམ་པ་གཉིས་ཀྱིས་སློབ་སྟོན་ཚོ་ཆུང་མི་འཛུགས་རྒྱུ། རིམ་པ་ཁག་གི་སློབ་སྟོན་ཚོ་ཆུང་་གིས་སྐོར་སྐྱོད་སློབ་སྟོན་དང་། སྐབས་བསྟུན་ཞིབ་བཤེར། གཤམ་ལ་བཅར་འདྲི། བཞུགས་མོལ་བཅར་གླེང་སོགས་ཀྱི་བྱེད་ཐབས་སྤྱད་དེ། ལྟ་སྐུལ་ནན་པོ་དང་སློབ་སྟོན་ངོ་མ་བྱེད་དགོས་པ་དང་། གནད་དོན་གང་ཡོད་བསྟན་དགོས་ལ་ཐག་གཅོད་བྱེད་ཐབས་འཚོལ་རོགས་ཀྱང་བྱེད་དགོས། ས་ཁུལ་མི་འདྲ་བ་དང་། ཁྱབ་ཁོངས་མི་འདྲ་བ། ལས་རིགས་མི་འདྲ་བ་བཅས་ཀྱི་ཁྱད་ཆོས་ལ་དམིགས་ནས་རིགས་དབྱེ་སློབ་སྟོན་བྱེད་དགོས་པ་དང་། གནད་འཁེལ་ཇུས་བསྟར་བྱེད་དགོས་ལ། “གཅིག་དཔེ་བརྒྱ་འགེབས་”བཀག་འགོག་བྱེད་དགོས། ས་ཁུལ་དང་སྡེ་ཁག་དང་སྡེ་ཚན་གྱི་ཏང་ཨུ་(ཏང་ཙུའུ་)ལ་རྒྱབ་རྟེན་དམ་པོར་བྱས་ཏེ་ལས་དོན་བསྒྲུབ་དགོས་པ་དང་། འབྲེལ་གཏུག་དང་སྤེལ་རེས་ལ་ཤུགས་སྣོན་རྒྱག་པ་དང་། དུས་ཐོག་ཏུ་བསམ་འཆར་བརྗེ་རེས་བྱས་ཏེ། གནད་དོན་ཐག་གཅོད་ལ་སྐུལ་འདེད་གཏོང་དགོས། དོ་སྣང་བྱེད་དགོས་པ་ཞིག་ནི། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ནི་ཐེངས་འདིའི་བརྗོད་དོན་གཙོ་བོའི་སློབ་གསོ་ནང་གཙོ་གནད་དུ་བཟུང་ནས་ཞིབ་བཤེར་དང་དག་ཐེར་བྱེད་པའི་གནད་དོན་ཞིག་ཡིན་པས། ཐེངས་འདིའི་བརྗོད་དོན་གཙོ་བོའི་སློབ་གསོ་ལ་ཕྱི་ཚུལ་རིང་ལུགས་གཏན་ནས་སྤེལ་མི་རུང་བ་དང་། རྣམ་པ་ཅན་དང་། ཐབས་ཇུས་ཅན། ཕྱི་ཚུལ་ཅན་བཅས་སྤེལ་མི་རུང་། འབྱུང་སྲིད་པའི་ཕྱི་ཚུལ་རིང་ལུགས་སྣ་ཚོགས་ལ་སྔ་ཙམ་ནས་སྔོན་དཔོག་དང་། ནུས་ལྡན་དུ་འགོན་ཟོན། བློ་རྩ་བརྟན་པོས་ཁྱད་གསོད་བཅས་བྱེད་དགོས།

གསུམ་པ། གཅིག་འདོམས་ཀུན་འཛིན་ལ་དོ་སྣང་བྱེད་དགོས། ད་ལོ་ནི་ཕྱོགས་ཡོངས་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་ལག་བསྟར་བྱེད་པའི་ལོ་དང་པོ་ཡིན་པ་དང་། ཏང་དང་རྒྱལ་ཁབ་ཀྱི་སྒྲིག་གཞི་སྒྱུར་བཅོས་ལ་སྐུལ་འདེད་གཏོང་དགོས་པས་ལས་འགན་ལྕི་ལ་གོ་རིམ་མང་བ་ཡིན། ས་ཁུལ་ཁག་དང་སྡེ་ཁག་ཁག་དང་སྡེ་ཚན་ཁག་གིས་ལྟེ་བར་དམིགས་པ་དང་སྤྱི་ཡོངས་ལ་ཞབས་འདེགས་ཞུ་རྒྱུ་རྒྱུན་འཁྱོངས་བྱས་ཏེ། བརྗོད་དོན་གཙོ་བོའི་སློབ་གསོ་སྤེལ་རྒྱུ་དེ་ཏང་ཀྲུང་དབྱང་གི་ཐབས་ཇུས་དང་བཀོད་སྒྲིག་ཁག་ལག་བསྟར་དོན་འཁྱོལ་བྱེད་པ་དང་ཟུང་སྦྲེལ་དང་། རང་ས་ཁུལ་དང་རང་སྡེ་ཁག་དང་རང་སྡེ་ཚན་གྱི་ལྟེ་བའི་ལས་དོན་སྐུལ་སྤེལ་གཏོང་བ་དང་ཟུང་སྦྲེལ། སྒྲིག་གཞི་སྒྱུར་བཅོས་ལ་སྐུལ་འདེད་གཏོང་བ་དང་ཟུང་སྦྲེལ་བཅས་བྱེད་དགོས་པ་དང་། ཕྱོགས་གཉིས་དམ་འཛིན་དང་ཕྱོགས་གཉིས་ལ་སྐུལ་འདེད་བཏང་སྟེ། ཏང་ཡོན་དང་ལས་བྱེད་པས་སློབ་སྦྱོང་དང་ལས་ཀའི་སྤྲོ་སེམས་དེ་འགག་སྒྲོལ་དཀའ་སེལ་དང་ལས་སྒྲུབ་ལས་གཏོད་ཀྱི་སྒུལ་ཤུགས་ཆེན་པོར་འགྱུར་རྒྱུར་སྐུལ་འདེད་གཏོང་དགོས། དོན་དངོས་དང་ཟུང་འབྲེལ་བྱས་ཏེ་བརྗོད་དོན་གཙོ་བོའི་སློབ་གསོ་ཁག་དང་པོ་དང་ཁག་གཉིས་པ་གཅིག་འདོམས་ཀྱིས་བཀོད་སྒྲིག་བྱེད་དགོས་པ་དང་། སྔ་རྗེས་འབྲེལ་མཐུད་དང་གོ་རིམ་ལྡན་པའི་ངང་སྐུལ་འདེད་གཏོང་བར་འགན་ལེན་བྱེད་དགོས།

བཞི་པ། དྲིལ་བསྒྲགས་དང་ཁྲིད་སྟོན་བྱེད་ཤུགས་ཆེ་རུ་གཏོང་དགོས། རིམ་པ་ཁག་གི་ཏང་གི་ཚགས་པར་དང་། ཏང་གི་དུས་དེབ། བརྙན་འཕྲིན་ལས་ཁུངས། ཀུན་ཁྱབ་རླུང་འཕྲིན་ལས་ཁུངས་སོགས་ཀྱི་དྲིལ་བསྒྲགས་བྱེད་ལམ་གཙོ་བོའི་ནུས་པ་འདོན་སྤེལ་གང་ལེགས་དང་། སྨྱན་སྦྱོར་གསར་པ་སྤྱོད་པར་མཐོང་ཆེན་བྱས་ཏེ། ཏང་ཀྲུང་དབྱང་གི་བཀོད་སྒྲིག་དང་བླང་བྱ་གཏིང་ཟབ་ཏུ་དྲིལ་བསྒྲགས་དང་། བརྗོད་དོན་གཙོ་བོའི་སློབ་གསོའི་གནད་ཆེའི་དོན་སྙིང་དང་། དམིགས་འབེན་དང་ལས་འགན། འཕེལ་སྐྱེད་དང་ཕན་འབྲས་བཅས་དྲིལ་བསྒྲགས་བྱེད་དགོས། བྱེད་སྟངས་དང་བྱེད་ཐབས་གསར་དུ་བཏོད་དེ། གཙོ་རྒྱུག་སྨྱན་སྦྱོར་དང་གསར་དར་སྨྱན་སྦྱོར་གྱི་ནུས་པ་འདོན་སྤེལ་གང་ལེགས་དང་། དྲ་ཐོག་གི་གླེང་ཕྱོགས་ལ་དྲང་ཕྱོགས་ནས་སྣེ་ཁྲིད་བྱས་ཏེ། “འུད་བསྟོད་”དང་“འཕྱ་སྨོད་”བཀག་འགོག་བྱ་རྒྱུར་ཡིད་འཇོག་བྱེད་དགོས། དྲང་ཕྱོགས་ཀྱི་དཔེ་མཚོན་དྲིལ་བསྒྲགས་བྱེད་དགོས་པ་དང་། འདྲ་བཟོ་དང་ཁྱབ་གདལ་གཏོང་ཆོག་པའི་ཉམས་མྱོང་བཟང་པོ་དང་བྱེད་ཐབས་ཡག་པོ་ཁག་ཅིག་ཕྱོགས་བསྡོམས་བྱེད་དགོས། ལྡོག་ཕྱོགས་ཀྱི་དཔེ་མཚོན་ལ་དབྱེ་ཞིབ་གཏིང་ཟབ་བྱེད་པ་དང་། གྱོད་དོན་ལ་བརྟེན་ནས་ཁྲིམས་སྲོལ་ནན་པོ་བཟོ་བ་དང་དག་ཐེར་ལ་སྐུལ་འདེད་བྱེད་པའི་ཐོག་ནས་ཉེན་བརྡ་གཏོང་བའི་ནུས་པ་འདོན་སྤེལ་ནུས་ལྡན་བྱེད་དགོས།

བློ་མཐུན་རྣམ་པ། རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་དམིགས་འབེན་རླབས་པོ་ཆེས་མི་ལ་སྐུལ་མ་ཐེབས་ཤིང་ངར་ཤུགས་སློང་བར་བྱེད། ང་ཚོ་མི་རབས་འདིའི་གུང་ཁྲན་ཏང་མི་རྣམས་ཀྱི་འགན་འཁྲི་གཟི་བརྗིད་ལྡན་ལ་ལས་འགན་ལྗིད་མོ་ཡིན། ང་ཚོས་ཐེངས་འདིའི་བརྗོད་དོན་གཙོ་བོའི་སློབ་གསོའི་གོ་སྐབས་དང་བསྟུན་ནས། ཏང་གི་གསར་གཏོད་རིགས་པའི་གཞུང་ལུགས་ཀྱིས་དྲག་ཆས་སྤྲས་པར་ཤུགས་སྣོན་རྒྱག་པ་དང་། ཏང་ཡོངས་ཀྱི་མར་ཁེ་སིའི་རིང་ལུགས་ཀྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ་དང་། ཏང་གི་སྲིད་སྐྱོང་ནུས་པ་དང་འགོ་ཁྲིད་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ། འབད་བརྩོན་ལྷོད་མེད་ཀྱིས་འཐབ་ལམ་གསར་པར་སྐྱོད་པར་སེམས་ཤུགས་གཅིག་སྒྲིལ། ངར་སེམས་ཆེར་སྐྱེད་དང་དཔའ་སྐྱེད་མདུན་སྐྱོད་བཅས་བྱས་ཏེ། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པ་དང་། ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་ཆེད་མཐུན་སྒྲིལ་འབད་འཐབ་བཅས་བྱེད་དགོས།

བསོད་ནམས་དབང་རྒྱལ་གྱིས་བསྒྱུར།