བརྗོད་དོན་གཙོ་བོའི་སློབ་གསོའི་དམིགས་འབེན་ལས་འགན་དམ་པོར་འཛིན་པ།

“ཐེངས་འདིའི་བརྗོད་དོན་གཙོ་བོའི་སློབ་གསོ་སྤེལ་བའི་རྩ་བའི་ལས་འགན་ནི་སློབ་སྦྱོང་བསམ་གཞིག་བེད་སྤྱོད་གསུམ་གཅིག་འབྲེལ་བྱེད་པ་དང་། ཤེས་ཡོན་དད་སེམས་བྱ་སྤྱོད་གསུམ་གཅིག་གྱུར་ཡོང་རྒྱུ་རྒྱུན་འཁྱོངས་བྱས་ཏེ། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དེ་ཕུགས་བསམ་བརྟན་དུ་གཏོང་བ་དང་། ཏང་གཤིས་སྦྱོང་བརྡར། ལག་ལེན་ལ་མཛུབ་སྟོན། ལས་ཀར་སྐུལ་འདེད་གཏོང་བ་བཅས་ཀྱི་སྟོབས་ཤུགས་ཆེན་པོར་བསྒྱུར་ནས། ཏང་ཡོངས་ཀྱིས་ཐོག་མཐའ་བར་གསུམ་དུ་བསམ་བློ་གཅིག་གྱུར་དང་། འདོད་བློ་བརྟན་པོ། བྱ་སྤྱོད་མཐུན་སྦྱོར། འཐབ་འཛིང་གི་ནུས་སྟོབས་ཆེན་པོ་བཅས་མཐའ་འཁྱོངས་ཐུབ་པར་བྱེད་དགོས་པ་དང་། སློབ་སྦྱོང་ལ་བརྟེན་ནས་བླ་སྲོག་གསོ་བ་དང་། སློབ་སྦྱོང་ལ་བརྟེན་ནས་བློ་གྲོས་འཕེལ་བ། སློབ་སྦྱོང་ལ་བརྟེན་ནས་སྤྱོད་ངན་སྲོང་བ། སློབ་སྦྱོང་ལ་བརྟེན་ནས་ལས་ཀར་སྐུལ་འདེད་བཅས་བྱེད་པའི་ཐད་ཕན་འབྲས་ངོ་མ་ཐོབ་པར་བརྩོན་དགོས།” ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོའི་ལས་དོན་ཚོགས་འདུའི་ཐོག །སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐེངས་འདིའི་བརྗོད་དོན་གཙོ་བོའི་སློབ་གསོའི་རྩ་བའི་ལས་འགན་རྒྱས་བཤད་གཏིང་ཟབ་གནང་བ་དང་ཆབས་ཅིག་ཕྱོགས་5ཡི་ཐད་ཀྱི་བྱེ་བྲག་གི་དམིགས་འབེན་ཁ་གསལ་བཏོན་གནང་བས། བསམ་བློའི་རང་བཞིན་དང་། དམིགས་སའི་རང་བཞིན། མཛུབ་སྟོན་རང་བཞིན་བཅས་ཟབ་མོ་ལྡན་ཞིང་བརྗོད་དོན་གཙོ་བོའི་སློབ་གསོ་གཏིང་ཟབ་དང་ཏན་ཏིག་ངང་སྤེལ་རྒྱུར་ཁ་ཕྱོགས་དང་ཐབས་ལམ་གསལ་སྟོན་གནང་ཡོད།

སློབ་སྦྱོང་བསམ་གཞིག་བེད་སྤྱོད་གསུམ་གཅིག་འབྲེལ་བྱེད་པ་དང་། ཤེས་ཡོན་དད་སེམས་བྱ་སྤྱོད་གསུམ་གཅིག་གྱུར་ཡོང་བ་ཞེས་པ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་ཐེངས་མང་གནང་བའི་རིགས་པའི་གཞུང་ལུགས་སློབ་སྦྱོང་བྱེད་ཐབས་ཤིག་ཡིན་ཞིང་། དེའི་ཐོག་ནས་རྩོད་སྒྲུབ་དངོས་གཙོའི་རིང་ལུགས་ཀྱི་ཤེས་རྟོགས་སྨྲ་བ་དང་། ལག་ལེན་སྨྲ་བ། བརྟག་ཐབས་སྨྲ་བ་བཅས་ཚད་མཐོའི་གཅིག་གྱུར་མཚོན་པ་ལ། ངེས་པར་དུ་བརྗོད་དོན་གཙོ་བོའི་སློབ་གསོའི་བརྒྱུད་རིམ་ཧྲིལ་པོར་ཁྱབ་པར་བྱེད་དགོས། སློབ་སྦྱོང་གི་དམིགས་ཡུལ་ནི་བེད་སྤྱོད་གཏོང་རྒྱུ་དེ་ཡིན་ཞིང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དེ་རང་སྣང་གི་འཇིག་རྟེན་དང་ཕྱི་རོལ་ཡུལ་གྱི་འཇིག་རྟེན་བསྒྱུར་བཀོད་བྱེད་པའི་བསམ་བློའི་མཚོན་ཆ་སྟོབས་ཆེན་ཞིག་ཏུ་འགྱུར་བ་བྱས་ནས། ཏང་གཤིས་བློ་སྦྱོང་མཐོ་རུ་གཏོང་བ་དང་བྱ་གཞག་འཕེལ་རྒྱས་ལ་སྐུལ་འདེད་བཏང་སྟེ། ཏང་ཡོན་དང་ལས་བྱེད་པས་ཏང་གི་གསར་གཏོད་རིགས་པའི་གཞུང་ལུགས་ཀྱི་ཆབ་སྲིད་ཀྱི་ངོས་འཛིན་དང་། བསམ་བློའི་ངོས་འཛིན། གཞུང་ལུགས་ཀྱི་ངོས་འཛིན། བརྩེ་སེམས་ཀྱི་ངོས་འཛིན་བཅས་རྒྱུན་ཆད་མེད་པར་ཟབ་ཏུ་བཏང་ནས། ཏང་ཡོངས་ཀྱིས་བསམ་བློ་ཕྱོགས་གཅིག་ཏུ་གཏོང་བ་དང་ནུས་ཤུགས་ཕྱོགས་གཅིག་ཏུ་བཏོན་ནས་ཐུན་མོང་ཐོག་ཏང་འདི་ཉིད་འཐབ་ན་མི་རྒྱལ་བ་མེད་པ་དང་རྒོལ་ན་མི་ཐུབ་པ་མེད་པའི་ངར་ལྕགས་ལྟ་བུ་ཞིག་ཆགས་པ་བྱེད་དགོས། སློབ་སྦྱོང་ལ་བརྟེན་ནས་བླ་སྲོག་གསོ་བ་དང་། སློབ་སྦྱོང་ལ་བརྟེན་ནས་བློ་གྲོས་འཕེལ་བ། སློབ་སྦྱོང་ལ་བརྟེན་ནས་སྤྱོད་ངན་སྲོང་བ། སློབ་སྦྱོང་ལ་བརྟེན་ནས་ལས་ཀར་སྐུལ་འདེད་བཅས་ཀྱི་ཐད་ལ་ཤུགས་བརྒྱབ་ནས་ཟབ་སྤེལ་དང་། ནང་འགྱུར། གཞན་སྒྱུར་བཅས་ཀྱི་ལས་དོན་ཡག་པོ་བསྒྲུབས་ཏེ། ཏང་གི་གསར་གཏོད་རིགས་པའི་གཞུང་ལུགས་སེམས་སུ་འཇགས་པ་དང་བྱ་སྤྱོད་དུ་འཁྱོལ་བ། བསམ་བློའི་ཐོག་གཞི་སྒྱུར་རྩ་སྒྱུར་དང་ལུས་གསོ་ཟུངས་སྐྱེད། ནུས་པ་དང་འཇོན་ཐང་སྦྱོང་ཐུབ་པ། སྲོལ་གསར་སྲོལ་བཟང་སྦྱོང་ཐུབ་པ། གཞུང་ལུགས་སློབ་སྦྱོང་དང་། ཆབ་སྲིད་ཀྱི་བྱང་ཚད། ནུས་པ་དང་འཇོན་ཐང་། འགན་འཁྲི་འཁུར་ལེན། ལས་ཀའི་སྤྱོད་ཚུལ། སྤྱོད་གཙང་རང་གཅུན་སོགས་ཐད་ཀྱི་གནད་དོན་ཐག་གཅོད་ཤུགས་ཆེན་བྱས་ཐོག །ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་ཏུ་སྤེལ་བ་དང་། བརྗོད་དོན་གཙོ་བོའི་སློབ་གསོར་ཕན་འབྲས་ངོ་མ་ཐོབ་པར་སྐུལ་འདེད་གཏོང་དགོས།

ལས་འགན་གྱིས་ཁ་ཕྱོགས་གཏན་འཁེལ་དང་དམིགས་འབེན་གྱིས་བྱ་སྤྱོད་ལ་སྣེ་ཁྲིད་བྱེད་ཀྱི་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐེངས་འདིའི་བརྗོད་དོན་གཙོ་བོའི་སློབ་གསོ་དེ་ཕྱོགས་5ཡི་ཐད་ཀྱི་དམིགས་འབེན་ལ་སླེབས་དགོས་པའི་ནན་གསུང་གནང་བ་སྟེ། བློ་སྒྲིལ་སེམས་སྐྱེད་དང་རྩ་བ་བརྟན་འཛུགས་པ་དང་། གཤིས་རྒྱུད་སྦྱོང་བརྡར་དང་ལྷག་བསམ་རྣམ་དག་བྱེད་པ། དངོས་སྒྲུབ་འཁུར་ལེན་དང་འཕེལ་རྒྱས་ལ་སྐུལ་འདེད་གཏོང་བ། དགོངས་དོན་ལག་བསྟར་དང་མི་དམངས་ལ་བདེ་སྐྱིད་སྐྲུན་པ། སྤྱོད་གཙང་སྤྱི་གཞོལ་དང་སྲོལ་གསར་གཏོད་པ་བཅས་སོ། ། ཕྱོགས་5ཡི་ཐད་ཀྱི་དམིགས་འབེན་ནི་བརྗོད་དོན་གཙོ་བོའི་སློབ་གསོའི་རྩ་བའི་ལས་འགན་གྱི་ཕྱོགས་མི་འདྲ་བའི་ཐད་ཞིབ་ཕྲ་དང་ཁག་དབྱེ་བྱས་པ་ཞིག་ཡིན་ལ། བརྗོད་དོན་གཙོ་བོའི་སློབ་གསོའི་ཕན་འབྲས་ལ་ཞིབ་བཤེར་བྱེད་པའི་ཚད་གཞི་གལ་ཆེན་ཞིག་ཀྱང་ཡིན་པས་ངེས་པར་དུ་གཞི་རྩར་འཛིན་པ་དང་། སློབ་སྦྱོང་ཟབ་མོ་དང་ཞིབ་བཤེར་ནན་པོ། ལག་ལེན་དངོས་བསྟར། ཕན་འབྲས་དངོས་ཐོབ་བཅས་བྱེད་དགོས།

བློ་སྒྲིལ་སེམས་སྐྱེད་དང་རྩ་བ་བརྟན་པོ་འཛུགས་པ། “མར་ཁེ་སིའི་རིང་ལུགས་ལ་དད་མོས་དང་། སྤྱི་ཚོགས་རིང་ལུགས་དང་གུང་ཁྲན་རིང་ལུགས་ལ་དད་སེམས་འཆང་བ་ནི་གུང་ཁྲན་ཏང་མིའི་ཆབ་སྲིད་ཀྱི་བླ་སྲོག་ཡིན་ལ། གུང་ཁྲན་ཏང་མིས་ཉམས་སད་གང་རུང་ཐེག་ཐུབ་པའི་བསམ་པའི་སྲོག་ཤིང་ཡང་ཡིན།” འདི་ནི་བློ་མཐུན་ཞི་ཅིན་ཕིང་གིས་ཏང་གི་ཚོགས་ཆེན་བཅོ་བརྒྱད་པའི་སྙན་ཞུའི་འཆར་ཟིན་འགོད་སྐབས་ཆེད་དུ་བླང་བྱ་བཏོན་ནས་བྲིས་པའི་གསུང་ཚིག་དུམ་བུ་ཞིག་རེད།

“བྱ་བ་འགྲུབ་དགོས་ན་ངེས་པར་དུ་སེམས་བརྟན་དགོས།” ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“དད་མོས་དང་། དད་སེམས། ཡིད་ཆེས་བཅས་ནི་ག་དུས་ཡིན་ནའང་གལ་འགངས་ཤིན་ཏུ་ཆེ་བ་ཞིག་རེད་”ཅེས་ནན་གསུང་ཐེངས་མང་གནང་ཡོད། ལོ་བརྒྱ་ལྷག་ཙམ་གྱི་ཏང་གི་ལོ་རྒྱུས་ལ་ཕྱི་མིག་ལྟ་སྐབས། ཧང་སངས་དགོས་པ་དང་འགྱུར་ལྡོག་མང་པོ་ཇི་ལྟར་འཕྲད་ཀྱང་། ང་ཚོའི་ཏང་གིས་ཉམས་ཉེས་བརྒྱུད་ནས་རྒྱུན་ཆད་མེད་པར་དཔའ་ངར་ཆེར་བསྐྱེད་དང་ཞུན་ཐིགས་ངར་ལྕགས་སུ་སྦྱངས་པ་ནང་བཞིན་དཀའ་བ་སྤྱད་ཡོད། དེ་དག་གང་ལ་བརྟེན་ཡོད་དམ་ཞེ་ན། མཐར་གཏུགས་ནས་བཤད་ན། ཀྲུང་གོའི་གུང་ཁྲན་ཏང་མི་ཁྲི་སྟོང་མང་པོའི་སེམས་ནང་གི་ཕུགས་བསམ་དང་དད་སེམས་ཐོག་མཐའ་བར་གསུམ་དུ་བརྟན་ཞིང་འགྱུར་བ་མེད་པ་དེ་རེད། ད་ལྟ་ཁྲག་དང་མེའི་ཤི་གསོན་གྱི་ཉམས་སད་ཉུང་དུ་ཕྱིན་ཡོད་མོད། འོན་ཀྱང་ལོ་རྒྱུས་ཀྱི་ཁྱད་ཆོས་གསར་པ་མང་པོ་ལྡན་པའི་འཐབ་རྩོད་རླབས་པོ་ཆེ་སྔར་བཞིན་མུ་མཐུད་བྱེད་ཀྱི་ཡོད། ཐོག་མཐའ་བར་གསུམ་དུ་མར་ཁེ་སིའི་རིང་ལུགས་ལ་དད་མོས་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལ་དད་སེམས། ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་ཡོང་བའི་ཀྲུང་གོའི་ཕུགས་འདུན་མངོན་འགྱུར་ཡོང་བར་ཡིད་ཆེས་བཅས་བརྟན་པོ་བྱས་ན། ད་གཟོད་སྤྲིན་ཚོགས་སྟུག་པོའི་ཁྲོད་ནས་ཁ་ཕྱོགས་གཏན་འཁེལ་དང་། མངར་ཆས་བཏུམ་པའི་སྒྱོགས་མདེལ་གྱི་མདུན་དུ་རིག་པ་སྔར་བཞིན་དྭངས་གསལ། ཐའེ་ཧྲན་གྱིས་མགོ་བོ་མནན་པའི་འོག་ཞུམ་མེད་མདུན་སྐྱོད་བཅས་བྱེད་ཐུབ།

ཕུགས་བསམ་དང་དད་སེམས་བརྟན་པོ་དེ་ངེས་པར་དུ་མར་ཁེ་སིའི་རིང་ལུགས་ལ་གོ་བ་གཏིང་ཟབ་ལེན་པའི་རྨང་གཞིའི་ཐོག་འཛུགས་དགོས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ནི་དེང་རབས་ཀྱི་ཀྲུང་གོའི་མར་ཁེ་སིའི་རིང་ལུགས་དང་དུས་རབས་ཉེར་གཅིག་པའི་མར་ཁེ་སིའི་རིང་ལུགས་ཡིན་ཞིང་། ཀྲུང་ཧྭའི་རིག་གནས་དང་ཀྲུང་གོའི་སྙིང་སྟོབས་ཀྱི་དུས་རབས་ཀྱི་སྙིང་བཅུད་དང་། ཏང་ཡོན་དང་ལས་བྱེད་པས་ཕུགས་བསམ་དད་སེམས་དང་བསམ་བློའི་གོ་འཕང་ཞུན་བརྡར་བྱེད་པའི་སློབ་དེབ་ཡག་ཤོས་ཤིག་རེད། ཕྱོགས་ཡོངས་དང་། རྒྱུད་རིམ་ལྡན་པ། གཏིང་ཟབ་བཅས་ཀྱི་སྒོ་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་། དགོངས་པ་གལ་ཆེན་འདིའི་ནང་དོན་གཙོ་བོ་ཆ་ཚང་ལ་ཡང་དག་པའི་སྒོ་ནས་ཁོང་དུ་ཆུད་པ་བྱས་ཐོག །ཕྱོགས་ཡོངས་ནས་དགོངས་པ་གལ་ཆེན་འདིའི་འཇིག་རྟེན་ལྟ་བ་དང་བརྟག་ཐབས་སྨྲ་བ་དང་། དེའི་ནང་ཁྱབ་པའི་ལངས་ཕྱོགས་དང་ལྟ་བ་དང་བྱེད་ཐབས་བཅས་ཆ་ཚང་ཁོང་དུ་ཡང་དག་ཆུད་པ་དང་། དགོངས་པ་གལ་ཆེན་འདིའི་གནས་ལུགས་དང་རིགས་པ་དང་མཚན་ཉིད་ལ་གོ་བ་གཏིང་ཟབ་ལེན་ཐུབ་ཚེ། ད་གཟོད་མར་ཁེ་སིའི་རིང་ལུགས་ཀྱི་བསམ་བློའི་གོ་རྟོགས་དང་རིགས་པའི་གཞུང་ལུགས་ཀྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་ཐུབ་པ་དང་། ད་གཟོད་ཕུགས་བསམ་ཆེན་པོ་དང་འབད་འཐབ་དམིགས་འབེན་ལ་རིག་པ་དྭངས་གསལ་ངང་ངོས་འཛིན་དང་དོན་གཉེར་བྱ་རྒྱུ་རྒྱུན་འཁྱོངས་བྱེད་ཐུབ།

དེ་བས་ལེགས་པའི་སྒོ་ནས་དུས་རབས་གསར་པ་དང་འཐབ་ལམ་གསར་པའི་ཐོག་གི་ཏང་གི་ལས་འགན་ཕྲག་ཏུ་འཁུར་དགོས་ན། ཏང་གི་གསར་གཏོད་རིགས་པའི་གཞུང་ལུགས་ལ་བརྟེན་ནས་ཏང་ཡོངས་ལ་དྲག་ཆས་སྤྲས་པ་དང་། ཏང་ཡོན་དང་ལས་བྱེད་པས་དངོས་འབྲེལ་སློབ་སྦྱོང་དངོས་འབྲེལ་ཤེས་པ་དངོས་འབྲེལ་ཡིད་ཆེས་དངོས་འབྲེལ་བཀོལ་སྤྱོད་བཅས་བྱ་རྒྱུར་སྐུལ་འདེད་གཏོང་བ། ཏང་གི་རིན་ཐང་དོན་གཉེར་དང་མདུན་སྐྱོད་ཁ་ཕྱོགས་ལ་ཚད་མཐོའི་ཆབ་སྲིད་ཀྱི་ངོས་ཟིན་གཅིག་མཐུན་ཆེ་རུ་སྐྱེད་པ་བཅས་བྱས་ནས་འཇིག་རྟེན་ལྟ་བ་དང་། མི་ཚེའི་ལྟ་བ། རིན་ཐང་གི་ལྟ་བ་བཅས་ཀྱི་“སྤྱི་ཁྱབ་གློག་སྒོ་”ཡག་པོ་སྤྱོད་དགོས། བློ་སྒྲིལ་སེམས་སྐྱེད་དང་རྩ་བ་བརྟན་པོ་འཛུགས་པར་རྒྱ་ཆེའི་ཏང་ཡོན་དང་ལས་བྱེད་པར་བསམ་བློར་ཞུན་བརྡར་དང་བསམ་པར་ཞུན་བརྡར་ཐེབས་པ། དད་མོས་བརྟན་པོ། དད་སེམས་བརྟན་པོ། ཡིད་ཆེས་བརྟན་པོ་བཅས་ཀྱི་སློབ་གསོ་དང་ཁྲིད་སྟོན་བྱས་ཏེ། ཏང་འཛུགས་སྙིང་སྟོབས་རླབས་པོ་ཆེ་དར་སྤེལ་གཏོང་བར་ངེས་པར་དུ་ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་ངེས་པ་དང་། ངེས་པར་དུ་ཁེངས་སྐྱུང་གཟབ་ནན་དང་དཀའ་སྤྱད་འབད་འཐབ་བྱེད་དགོས་པ་དང་། ངེས་པར་དུ་འཐབ་རྩོད་བྱེད་ཕོད་པ་དང་འཐབ་རྩོད་བྱེད་མཁས་པོ་བྱས་ཏེ་དད་པའི་རྨང་གཞི་བརྟན་འཛུགས་དང་། བསམ་པའི་ཐོག་གི་ཀལ་འདང་ངེས་གསོ་བ། བསམ་བློའི་ཁ་ཕྱོགས་བརྟན་བཟུང་བྱེད་དགོས།

གཤིས་རྒྱུད་སྦྱོང་བརྡར་དང་ལྷག་བསམ་རྣམ་དག་བྱེད་པ། “ང་ཚོས་ཕུལ་བྱུང་གི་ན་གཞོན་ལས་བྱེད་པ་གདམ་གསེས་བྱེད་སྐབས་དོན་ཚན་ཁྲི་སྟོང་མང་པོ་ཡོད་ཀྱང་། དོན་ཚན་དང་པོ་ནི་ཏང་ལ་ལྷག་བསམ་རྣམ་དག་ཡོད་མེད་ལ་ལྟ་རྒྱུ་དེ་རེད། ང་ཚོས་ཕུལ་བྱུང་གི་ན་གཞོན་ལས་བྱེད་པ་གསོ་སྐྱོང་བྱེད་པར་དོན་ཚན་ཁྲི་སྟོང་མང་པོ་ཡོད་ཀྱང་། དོན་ཚན་དང་པོ་ནི་ཁོང་ཚོར་ཏང་ལ་ལྷག་བསམ་རྣམ་དག་བྱེད་དགོས་པའི་སློབ་གསོ་རྒྱག་རྒྱུ་དེ་རེད།” 2018ལོའི་ཟླ་7ཚེས་3ཉིན་རྒྱལ་ཡོངས་རྩ་འཛུགས་ལས་དོན་ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འདི་ལྟར་བྱས་ནས་ལྷག་བསམ་རྣམ་དག་གི་གལ་ཆེའི་རང་བཞིན་ནན་གསུང་གནང་བ་རེད།

“གནམ་འོག་ཀུན་སྤྱོད་རབ་ཀྱི་ཁྲོད། ། ལྷག་བསམ་རྣམ་དག་ཀུན་ལས་ལྷག །” ཏང་ལ་ལྷག་བསམ་རྣམ་དག་བྱ་རྒྱུ་ནི་གུང་ཁྲན་ཏང་མིའི་ཆབ་སྲིད་ཀྱི་གཤིས་རྒྱུད་ཨང་དང་པོ་དེ་ཡིན། བརྩམས་སྒྲུང་《ཧུང་ཡན་》ཞེས་པའི་ནང་ལིའུ་སི་དབྱང་གི་མ་དཔེ་སྟེ་ལིའུ་གོ་ཀྲི་ནི་ངོ་ལོག་པས་བཙོངས་ནས་བཙོན་དུ་བཅུག་པ་རེད། མྱུལ་མས་ཁ་ཏ་སློབ་སྟོན་བྱས་པར་ཁོས་ཚིག་ཐག་ཆོད་པོས་“ང་ཤི་སོང་ན་ཏང་ཡོད་པས་ཤི་མེད་པ་དང་མཚུངས། ངས་རྩ་འཛུགས་བཙོངས་པ་ཡིན་ན་གསོན་པོར་བསྡད་ནས་དོན་སྙིང་ཅི་ཞིག་ཡོད་”ཅེས་ལན་བཏབ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གཏམ་རྒྱུད་འདི་ལ་བརྟེན་ནས་ཏང་ཡོངས་ལ་དྲན་སྐུལ་གནང་དོན། “ཏང་ལ་ལྷག་བསམ་རྣམ་དག་ནི་འདི་ལྟར་བྱེད་དགོས་པ་སྟེ། གནས་བབ་བཟང་པོ་དང་གནས་བབ་ངན་པ་གང་ཡིན་རུང་། ཚང་མ་བློ་བརྟན་འགྱུར་མེད་ཀྱིས་ཏང་གི་རྗེས་སུ་འབྲང་དགོས་པ་དང་། ཐེངས་དགུ་འཆི་དགོས་ཀྱང་འགྱོད་པ་མེད་པ་ཞིག་ཡིན་དགོས།”

ལྷག་བསམ་རྣམ་དག་ནི་འབོད་ཚིག་སྟོང་པ་ཞིག་མིན་པར་བྱ་སྤྱོད་ངོ་མའི་ཐོག་ནས་མཚོན་པར་བྱེད་དགོས། ཞི་བདེའི་དུས་སྐབས་སུ་ཏང་ཡོན་དང་ལས་བྱེད་པ་ཏང་ལ་ལྷག་བསམ་རྣམ་དག་ཡིན་མིན་ཞིབ་བཤེར་བྱེད་པའི་ཚད་གཞི་ནི་ཅི་འདྲ་ཞིག་ཡིན་ཞེ་ན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གཙོ་གནད་དུ་“བྱེད་ཐུབ་མིན་བཞི་”ལ་བལྟ་དགོས་ཞེས་ནན་གསུང་གནང་ཡོད་དེ། ཏང་གི་འགོ་ཁྲིད་རྒྱུན་འཁྱོངས་བྱེད་ཐུབ་མིན་དང་། ཏང་ཀྲུང་དབྱང་གི་དབང་གྲགས་དང་གཅིག་སྡུད་གཅིག་གྱུར་གྱི་འགོ་ཁྲིད་སྲུང་སྐྱོང་མཐའ་གཅིག་ཏུ་བྱེད་ཐུབ་མིན། བསམ་བློ་དང་ཆབ་སྲིད་དང་བྱ་སྤྱོད་བཅས་ཀྱི་ཐད་རང་རྟོགས་ངང་ཏང་ཀྲུང་དབྱང་དང་ཚད་མཐོའི་གཅིག་མཐུན་ཡོང་བ་བྱེད་ཐུབ་མིན། ཏང་གི་རིགས་པའི་གཞུང་ལུགས་དང་། ལམ་ཕྱོགས། བྱེད་ཕྱོགས། སྲིད་ཇུས་བཅས་བློ་ཐག་ཆོད་པོས་ལག་ལེན་མཐར་ཕྱིན་བསྟར་ནས་ཏང་ཀྲུང་དབྱང་གི་ཐབས་ཇུས་དང་བཀོད་སྒྲིག་ཇི་མ་ཇི་བཞིན་དོན་ཐོག་ཏུ་འཁྱོལ་ཐུབ་མིན། ཏང་གི་ཆབ་སྲིད་སྒྲིག་ཁྲིམས་དང་ཆབ་སྲིད་སྒྲིག་ལམ་ནན་སྲུང་བྱས་ཏེ་ཆབ་སྲིད་ཐད་ཀྱི་གོ་ཤེས་ཅན་དང་གཞུང་དྲང་ཅན་བྱེད་ཐུབ་མིན། ཏང་དང་མི་དམངས་ཀྱི་བྱ་གཞག་ནི་མཆོག་ཏུ་འཛིན་པ་དང་། རང་རྟོགས་ངང་རྩ་འཛུགས་ཀྱི་ཆོད་དོན་ལག་བསྟར་དང་རྩ་འཛུགས་ཀྱི་བཀོད་སྒྲིག་དང་ལེན་སོགས་བྱེད་ཐུབ་མིན་ལ་ཐུག་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྒྱས་བཤད་གལ་ཆེན་གྱིས་གནས་བབ་གསར་པའི་འོག་ཏང་ལ་ལྷག་བསམ་རྣམ་དག་བྱེད་པའི་གོ་གནས་ཀྱི་ནུས་པ་དང་། ཚན་རིག་དང་མཐུན་པའི་ནང་དོན། ལག་ལེན་གྱི་བླང་བྱ་བཅས་གསལ་བཤད་གཏིང་ཟབ་གནང་ཡོད། གཤིས་རྒྱུད་སྦྱོང་བརྡར་དང་ལྷག་བསམ་རྣམ་དག་བྱེད་པར། རྒྱ་ཆེའི་ཏང་ཡོན་དང་ལས་བྱེད་པར་ཆབ་སྲིད་ཀྱི་གཤིས་རྒྱུད་སྦྱོང་བརྡར་བྱ་རྒྱུའི་སློབ་གསོ་རྒྱག་པ་དང་ཁྲིད་སྟོན་བྱས་ནས། ཆབ་སྲིད་ཀྱི་བརྡར་ཤ་གཅོད་ནུས་དང་། ཆབ་སྲིད་ཀྱི་ངེས་ཤེས་འདྲོང་ནུས། ཆབ་སྲིད་ཀྱི་ལག་བསྟར་ནུས་པ་བཅས་ཟམ་མི་འཆད་པར་མཐོ་རུ་གཏོང་བ་དང་། “གཏན་འཁེལ་གཉིས་”ཀྱི་ཐག་གཅོད་རང་བཞིན་གྱི་དོན་སྙིང་ཁོང་དུ་ཟབ་མོར་ཆུད་པ། “འདུ་ཤེས་བཞི་”ཆེ་རུ་སྐྱེད་པ། “གདེང་ཚོད་བཞི་”བརྟན་དུ་གཏོང་བ། “སྲུང་སྐྱོང་གཉིས་”བྱེད་ཐུབ་པ། ཏང་གི་དར་ཆ་དེ་དར་ཆ་དང་། ཏང་གི་འདོད་བློ་དེ་འདོད་བློ། ཏང་གི་ལས་འགན་དེ་ལས་འགན་དུ་འཛིན་པ་བཅས་བྱས་ཏེ་ཐོག་མཐའ་བར་གསུམ་དུ་ཏང་ལ་ལྷག་བསམ་རྣམ་དག་དང་། མི་དམངས་ལ་ལྷག་བསམ་རྣམ་དག །མར་ཁེ་སིའི་རིང་ལུགས་ལ་ལྷག་བསམ་རྣམ་དག་བཅས་བྱེད་དགོས་པ་དང་། ལྷག་བསམ་རྣམ་དག་གིས་ཏང་ལ་དགའ་ཞེན་དང་། དུས་དང་རྣམ་པ་ཀུན་ཏུ་ཏང་གི་དོན་དུ་སེམས་ཁྲལ། བློ་བརྟན་འགྱུར་མེད་ཀྱིས་ཏང་སྲུང་སྐྱོང་། ནུས་ཤུགས་ཡོད་རྒུས་ཏང་དར་རྒྱས་གཏོང་བ་བཅས་བྱེད་དགོས།

དངོས་སྒྲུབ་འཁུར་ལེན་དང་འཕེལ་རྒྱས་ལ་སྐུལ་འདེད་གཏོང་བ། ཟླ་བ་5པར་ཀྲུང་གོའི་ཡུལ་གྲུ་ཀུན་ཏུ་མེ་ཏོག་རྣམ་པར་བཀྲ་ཞིང་གནམ་གཤིས་རབ་ཏུ་སྐྱིད། ཞིང་པས་ཞིང་ལས་ལ་བྲེལ་བ་དང་། ཞིང་ཁ་དང་མུ་ཁ་ཀུན་ཏུ་གསོན་ཤུགས་ཀྱིས་ཁེངས། རྒྱལ་ཁབ་ཆེན་པོའི་བཟོ་རྩལ་གྱིས་ནུས་ཤུགས་ཡོད་རྒུ་བཏོན་ནས་བཟོ་གྲྭ་ཚ་ཚ་འུར་འུར་རུ་གྱུར། ཚན་རྩལ་གསར་གཏོད་ཀྱིས་འགག་སྒྲོལ་ཧུར་ཐག་བྱས་པས་ཚོད་ལྟ་ཁང་གསོན་ཤུགས་རྒྱས་པ་སོགས་འཐབ་ལམ་གསར་པའི་ཐོག་གི་ཀྲུང་གོའི་མི་དམངས་ཀྱིས་རྔུལ་ཆུར་བརྟེན་ནས་ཕུགས་འདུན་མངོན་འགྱུར་དང་དངོས་སྒྲུབ་ལ་བརྟེན་ནས་མདུན་སྐྱོད་བྱེད་ཀྱི་ཡོད།

སྟོང་བཤད་རྒྱལ་ཕུང་། དངོས་སྒྲུབ་རྒྱལ་དར། བློ་མཐུན་མའོ་ཙེ་ཏུང་གིས་“གལ་ཏེ་རིགས་པའི་གཞུང་ལུགས་ཡང་དག་པ་ཞིག་ཡོད་ནའང་། དེར་སྟོང་བཤད་བྱས་ནས་ཟུར་དུ་འཇོག་པ་ལས་ལག་ལེན་མ་བྱས་ན་རིགས་པའི་གཞུང་ལུགས་དེ་ཇི་ཙམ་ལེགས་ཀྱང་སྙིང་པོ་གང་ཡང་མེད་”ཅེས་བསྟན་གནང་མྱོང་། རིགས་པའི་གཞུང་ལུགས་ཀྱི་ཟིལ་ཤུགས་དེ་ལག་ལེན་དུ་བསྟར་ན་ད་གཟོད་འདོན་སྤེལ་བྱེད་ཐུབ། སློབ་སྦྱོང་གི་གྲུབ་འབྲས་ནི་ལག་ལེན་གྱི་ཕན་འབྲས་ལ་བརྟེན་ནས་ཞིབ་བཤེར་བྱེད་དགོས། དུས་རབས་གསར་པའི་ལོ་བཅུའི་ནང་ཏང་དང་རྒྱལ་ཁབ་ཀྱི་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པ་དང་ལོ་རྒྱུས་རང་བཞིན་གྱི་འཕོ་འགྱུར་བྱུང་ནས་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་མངོན་འགྱུར་ཡོང་རྒྱུ་དེ་ནི་ལྡོག་ཐབས་མེད་པའི་ལོ་རྒྱུས་ཀྱི་འཕེལ་རིམ་དུ་སླེབས་ཡོད། འདི་ནི་ཏང་དང་མི་དམངས་ཀྱིས་མཉམ་དུ་དཀའ་སྤྱད་དང་། དངོས་སྒྲུབ། འབད་འཐབ་བཅས་བྱས་ནས་ཐོབ་པ་ཞིག་རེད། “ང་ཚོས་དངོས་སྒྲུབ་ལ་བརྟེན་ནས་འོད་སྟོང་འཕྲོ་བའི་ལོ་རྒྱུས་བཏོད་ཡོད་པས་ད་དུང་དངོས་སྒྲུབ་ལ་བརྟེན་ནས་དེ་བས་དགའ་སྐྱིད་སྡུག་ལྡན་པའི་མ་འོངས་པ་གཏོད་དགོས།” མདུན་སྐྱོད་ཀྱི་འགྲོ་ལམ་ཐོག་སྔར་བྱུང་མྱོང་མེད་པའི་ཞིབ་འཇུག་བྱ་གཞི་གསར་རྐྱང་འབོར་ཆེན་འཕྲད་ངེས་ཡིན་པ་དང་། དཀའ་ངལ་དང་ཉེན་ཁ་སྣ་ཚོགས་འཕྲད་ངེས་ཡིན་ལ། རླུང་འཚུབ་རླབས་འཕྱོ་དང་ཐ་ན་འཇིགས་རུང་དྲག་རླབས་ཀྱི་ཉམས་སད་ཆེན་པོ་མྱོང་ངེས་ཡིན། དེར་བརྟེན་ཐོག་མཐའ་བར་གསུམ་དུ་འབད་འབུངས་ཡར་བརྩོན་དང་། གཞན་གྱི་སྔོན་དུ་བྱེད་ཕོད་པ། དཀའ་ངལ་ཁྱད་གསོད་བཅས་ཀྱི་འབད་འཐབ་ཀྱི་རྣམ་འགྱུར་མཐའ་འཁྱོངས་དང་། འཁུར་ལེན་དང་དོན་གཉེར་ཧུར་ཐག་བྱེད་པ་དང་། འཐབ་རྩོད་བྱེད་ཕོད་པ་དང་བྱེད་མཁས་པོ་བཅས་བྱས་ན། ད་གཟོད་རྒྱལ་ཁབ་སྟོབས་ལྡན་འཛུགས་སྐྲུན་བྱེད་པ་དང་། མི་རིགས་བསྐྱར་དར་ཡོང་བའི་ལོ་རྒྱུས་ཀྱི་བྱ་གཞག་རླབས་པོ་ཆེར་རྒྱལ་ཁའི་ངང་སྐུལ་འདེད་གཏོང་ཐུབ།

ཏང་གི་ཚོགས་ཆེན་ཉི་ཤུ་པའི་ཐོག་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་སྐྲུན་ཚར་བར་བྱེད་པ་དང་། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་རྒྱུའི་བརྗིད་ཉམས་ལྡན་པའི་འཆར་གཞི་བཀོད་པ་དང་། དཔའ་མཛངས་རྟུལ་ཕོད་ཀྱིས་འཐབ་ལམ་གསར་པའི་ཐོག་བསྐྱོད་པའི་དུས་རབས་ཀྱི་དུང་བརྡ་བཏང་ཡོད། དངོས་སྒྲུབ་འཁུར་ལེན་དང་འཕེལ་རྒྱས་ལ་སྐུལ་འདེད་གཏོང་བར་རྒྱ་ཆེའི་ཏང་ཡོན་དང་ལས་བྱེད་པར་སློབ་གསོ་དང་ཁྲིད་སྟོན་བྱས་ཏེ་“རྒྱལ་ཁབ་ཀྱི་དོན་ཆེན་”བློ་ལ་བཅངས་ནས། དུས་རབས་གསར་པ་དང་འཐབ་ལམ་གསར་པའི་ཏང་གི་ལྟེ་བའི་ལས་འགན་ལ་དམ་པོར་དམིགས་ནས་དངོས་འཛིན་དངོས་སྒྲུབ་དང་། ཕན་ནུས་དངོས་སུ་ཐོན་ཐབས་བྱེད་པ། གནད་དོན་ལ་དམིགས་པ། དཀའ་ངལ་ཡོད་པ་ཤེས་བཞིན་དུ་མདུན་སྐྱོད་བྱེད་པ། “དུས་དང་རྣམ་པ་ཀུན་ཏུ་སེམས་ཁྲལ་བྱེད་པའི་”འགན་འཁྲིའི་བསམ་པ་དང་འགན་འཁྲི་ལྷུར་ལེན་གྱི་ཉམས་སྟོབས་ལ་བརྟེན་ནས་ཏང་དང་མི་དམངས་ཀྱི་ཆེད་དུ་འགན་འཁྲི་ཡག་པོ་འཁུར་བ་དང་། རྣམ་པ་གསར་པ་དང་འཁུར་ལེན་གསར་པ་ལ་བརྟེན་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་སྟེ་གྲུབ་འབྲས་གསར་པ་ཐོབ་པ་དང་། ཞུམ་མེད་འཐབ་རྩོད་ལ་བརྟེན་ནས་བྱ་གཞག་འཕེལ་རྒྱས་ཀྱི་གནམ་ས་གསར་པ་གཏོད་པ་བཅས་བྱེད་དགོས།

དགོངས་དོན་ལག་བསྟར་དང་མི་དམངས་ལ་བདེ་སྐྱིད་སྐྲུན་པ། “འདི་ནི་ངས་ཐེངས་གསུམ་པར་རྒྱལ་ཁབ་ཀྲུའུ་ཞིའི་བླ་ན་མེད་པའི་འགན་འཁྲི་དེ་འཁུར་བ་དེ་ཡིན། མི་དམངས་ཀྱི་ཡིད་ཆེས་ནི་ང་མདུན་དུ་སྐྱོད་པའི་སྒུལ་ཤུགས་ཆེ་ཤོས་ཡིན་ལ་ངའི་ཕྲག་ཏུ་བབས་པའི་ལྗིད་ཏིག་ཏིག་གི་ལས་འགན་ཡང་ཡིན་”ཞེས་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་གྲོས་ཚོགས་ཐེངས་དང་པོའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྙིང་གཏིང་གི་གསུང་ཚིག་ལས་མི་དམངས་ཀྱི་གཙོ་འཛིན་གྱི་ཐོག་མཐའ་བར་གསུམ་དུ་འགྱུར་བ་མེད་པའི་ལྷག་བསམ་རྣམ་དག་གི་བརྩེ་སེམས་མཚོན་ཡོད།

ང་ཚོའི་ཏང་ནི་མི་དམངས་ཀྱི་ཁྲོད་ནས་བྱུང་བ་དང་། ཏང་གི་རྨང་གཞི་དང་ཁྲག་རྒྱུན་ནི་མི་དམངས་ཀྱི་ཁྲོད་དུ་གནས་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་ཡང་ཡང་གནང་དོན། རྒྱལ་སྲིད་ནི་མི་དམངས་ཡིན་ལ། མི་དམངས་ནི་རྒྱལ་སྲིད་ཡིན། དགུང་ལོ་ཆུང་དུས་ཧོ་པེ་ཀྲེང་ཏིང་དུ་བཞུགས་སྐབས། ཁོང་གིས་རྐང་འཁོར་རྙིང་པ་ཞིག་བཞོན་ནས་རྫོང་ཡོངས་ཀྱི་ཀུང་ཧྲེ་25དང་རུ་ཁག་ཆེན་པོ་220ལྷག་ཙམ་ལ་ཕེབས་ནས་མང་ཚོགས་ཀྱི་བསམ་ཚུལ་གསན་འཇོག་གནང་བ་རེད། ཧྥུའུ་ཅན་ཉིང་ཏེ་རུ་ཁོང་གིས་སྣེ་ཁྲིད་དེ་ཐག་རིང་ལུང་ཁུག་དང་དཀའ་ངལ་ཆེ་ཤོས་ཀྱི་ས་ཆར་ཟབ་ཞུགས་གནང་ནས་མང་ཚོགས་ཀྱི་འཚོ་བ་ཤེས་རྟོགས་གནང་བ་དང་། ཀྲེ་ཅང་དུ་རྒྱ་མཚོའི་རླུང་འཚུབ་ཆེན་པོའི་མདུན་དུ་ཁོང་གིས་མཚན་གང་ལ་མང་ཚོགས་གནས་སྤོ་བྱེད་པར་བཀོད་འདོམས་གནང་བ་དང་གདོང་མཆོང་གྲུ་གཟིངས་ལ་བསྡད་དེ་མང་ཚོགས་ཉེན་ཁའི་གནས་སུ་གྱར་བའི་ས་ཁུལ་དུ་ཐད་ཀར་བསྐྱོད་ཡོད། ཧྲང་ཧའེ་རུ་ཆར་པ་ཆེན་པོའི་དཀྱིལ་དུ་སྡེ་ཁུལ་ནང་བརྟག་ཞིབ་ཏུ་སྐྱོད་སྐབས་གྲོང་མི་ཁ་ཤས་ཀྱིས་གླང་སླས་མ་ཞིག་ཁོང་ལ་ཕུལ་འདོད་བྱེད་སྐབས། ཁོང་གིས་“ཨོ། ངས་ཤེས་སོང་། ཁྱེད་ཀྱིས་ང་མི་དམངས་ལ་ཞབས་འདེགས་ཞུ་མཁན་གྱི་བེའུ་ཞིག་བྱོས་ཟེར་བ་རེད་”ཅེས་གསུངས།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། དབུལ་བྲལ་འགག་སྒྲོལ་དམག་འཐབ་ལ་རྒྱལ་ཁ་ལེན་པ་དང་ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཚར་བར་བྱེད་པ་ནས་ཕྱོགས་ཡོངས་ནས་གྲོང་གསེབ་དར་རྒྱས་ལ་སྐུལ་འདེད་གཏོང་བ་དང་ཐུན་མོང་ཕྱུག་འགྱུར་ལ་སྐུལ་འདེད་ཏན་ཏིག་གཏོང་བའི་བར། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་མི་དམངས་མང་ཚོགས་ཀྱིས་དགའ་སྐྱིད་ལྡན་པའི་འཚོ་བར་བཅངས་པའི་རེ་སྨོན་ཟམ་མི་འཆད་པར་དོན་དངོས་སུ་གྱུར་ནས་མང་ཚོགས་ཀྱི་ཐོབ་སྣང་དང་སྐྱིད་སྣང་དང་བདེ་སྣང་བཅས་དེ་བས་ཆེ་རུ་གཏོང་བ་དང་། དེ་བས་འགན་ལེན་ཐུབ་པ། དེ་བས་རྒྱུན་མཐུད་ཐུབ་པ་བཅས་བྱུང་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“དེང་རབས་ཅན་གྱི་མཇུག་མཐའི་དམིགས་འབེན་ནི་མིའི་རང་དབང་དང་ཕྱོགས་ཡོངས་ཀྱི་འཕེལ་རྒྱས་མངོན་འགྱུར་ཡོང་བ་བྱ་རྒྱུ་དེ་རེད་”ཅེས་ནན་གསུང་གནང་བ་རེད། འཐབ་ལམ་གསར་པའི་ཐོག་མི་དམངས་ལྟེ་བར་འཛིན་རྒྱུ་རྒྱུན་འཁྱོངས་བྱས་ནས། དེང་རབས་ཅན་གྱིས་མི་དམངས་ཀྱི་ཕྱོགས་སོ་སོའི་རེ་འབོད་དང་རིམ་པ་མང་བའི་དགོས་མཁོར་ལན་སྔར་བས་ལན་ཡག་པོ་སློག་ན། ད་གཟོད་ཀྲུང་གོའི་ལུགས་ཀྱི་དེང་རབས་ཅན་གྱི་འགྲོ་ལམ་ནི་སྐྱོད་ཐུབ་པ་དང་བརྟན་པོ་ཡོང་ཐུབ།

མི་དམངས་ཀྱི་སྣེ་ཁྲིད་དེ་བདེ་སྐྱིད་ཀྱི་འཚོ་བ་སྐྲུན་རྒྱུ་ནི་ང་ཚོའི་ཏང་གི་བློ་བརྟན་འགྱུར་མེད་ཀྱི་འབད་འཐབ་དམིགས་འབེན་ཞིག་རེད། མི་དམངས་ཀྱིས་འཚོ་བ་སྔར་ལས་ལེགས་པོ་སྐྱེལ་ཐུབ་པའི་རེ་སྒུག་གསར་པ་མདུན་དུ་ལྷགས་ཚེ་ང་ཚོས་ཁེངས་དྲེགས་དང་སྒྱིད་ལུག་གཏན་ནས་བྱེད་མི་རུང་། དགོངས་དོན་ལག་བསྟར་དང་མི་དམངས་ལ་བདེ་སྐྱིད་སྐྲུན་པར། རྒྱ་ཆེའི་ཏང་ཡོན་དང་ལས་བྱེད་པར་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་བརྟན་པོ་འཛུགས་རྒྱུའི་སློབ་གསོ་དང་ཁྲིད་སྟོན་བྱེད་པ་དང་། ཐམས་ཅད་མི་དམངས་ཀྱི་ཆེད་དུ་ཡིན་པ་དང་། ཐམས་ཅད་མི་དམངས་ལ་བརྟེན་རྒྱུ་རྒྱུན་འཁྱོངས་བྱེད་པ། རང་རྟོགས་ངང་ཐབས་ཇུས་དམངས་ལ་འདྲི་བ་དང་མཁོ་དགོས་དམངས་ལ་འདྲི་བ། ཐོག་མཐའ་བར་གསུམ་དུ་མི་དམངས་དང་དབུགས་ལམ་གཅིག་གྱུར་དང་། བདེ་སྡུག་མཉམ་མྱོང་། གཅིག་སེམས་གཅིག་སྦྲེལ། “སྒོ་ངའི་བག་ལེབ་”ཆེན་པོར་བཟོས་ནས་དམངས་འཚོའི་བདེ་སྐྱིད་རྒྱུན་ཆད་མེད་པར་ཆེ་རུ་གཏོང་བ་དང་། མི་དམངས་མང་ཚོགས་ཀྱི་བྲེལ་དཀའ་སྡུག་སྨོན་བཞིའི་གནད་དོན་ཐག་གཅོད་གང་ཐུབ་བྱས་ཏེ་དམངས་འཚོར་ཕན་པ་དང་། དམངས་སེམས་དྲོ་བ། དམངས་སེམས་དང་བསྟུན་པ་བཅས་ཀྱི་ལས་དོན་མང་ཚོགས་ཀྱི་སེམས་ལ་ཟུག་ཐུབ་པ་དང་། མི་དམངས་མང་ཚོགས་ཀྱི་ཐོབ་སྣང་དང་སྐྱིད་སྣང་དང་བདེ་སྣང་བཅས་ཆེ་རུ་གཏོང་དགོས།

སྤྱོད་གཙང་སྤྱི་གཞོལ་དང་སྲོལ་གསར་གཏོད་པ། 2022ལོའི་ཟླ་10ཚེས་27ཉིན་ཡན་ཨན་གསར་བརྗེའི་དྲན་གསོ་ཁང་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ཡན་ཨན་དུས་སྐབས་ཀྱི་‘མེད་པ་བཅུའི་’”འགྲེམས་པང་མདུན་དུ་ཕེབས་ནས་གཟིགས་པ་རེད། འགྲེམས་པང་སྟེང་དུ་ཐོག་མར་བཤམས་པའི་“དཔོན་ངན་ཟ་རྔམ་ཅན་མེད་པ་”ཞེས་པ་དེ་བཀྲག་མདངས་ལྷག་པར་འཚེར། སྤྱི་ཁྱབ་ཧྲུའུ་ཅིས་མྱོང་ཚོར་ཟབ་མོའི་སྒོ་ནས་“ལོ་དེ་གར་བློ་མཐུན་མའོ་ཙེ་ཏུང་སོགས་གསར་བརྗེ་པ་རྒན་རབས་ཚོ་ཡན་ཨན་དུ་བཞུགས་ཤིང་། ས་ཕུག་ཏུ་སྡོད་པ་དང་། འབྲུ་རྩིང་ཟ་བ། རས་གོས་གྱོན་པ་བཅས་‘ཡན་ཨན་གྱི་སྤྱོད་ཚུལ་’ལ་བརྟེན་ནས་‘ཞི་ཨན་གྱི་སྤྱོད་ཚུལ་’ཕམ་ཉེས་སུ་བཏང་ཡོད་”ཅེས་གསུངས་པ་རེད། “ཡན་ཨན་གྱི་སྤྱོད་ཚུལ་”གྱིས་“ཞི་ཨན་གྱི་སྤྱོད་ཚུལ་”ཕམ་པར་བཟོ་ཐུབ་པའི་རྒྱུ་མཚན་གང་ཡིན་ནམ་ཞེ་ན། རྒྱུ་རྐྱེན་གཙོ་བོ་ཞིག་ནི་གུང་ཁྲན་ཏང་གི་སྤྱོད་གཙང་དང་གོ་མིན་ཏང་གི་རུལ་སུངས་གཉིས་བསྡུར་ན་ཁྱད་པར་མངོན་གསལ་དོད་པོ་ཡོད་པ་དང་། ཡན་ཨན་ནི་“དམངས་སེམས་བློ་ཁ་ཕྱོགས་སར་”གྱུར་པས་རེད།

སྤྱོད་གཙང་སྲིད་སྐྱོང་བྱས་ན་ད་གཟོད་དམངས་ཀྱི་ཡིད་ཆེས་ཐོབ་པ་དང་དབང་ཆ་དྲང་གཞག་སྤྱད་ན་ད་གཟོད་མི་སེམས་ཐོབ་ཐུབ། སྤྱོད་གཙང་སྤྱི་གཞོལ་ནི་ཀྲུང་གོའི་གུང་ཁྲན་ཏང་མིའི་གཟི་བརྗིད་ལྡན་པའི་སྲོལ་རྒྱུན་དང་སྤྱོད་ཚུལ་བཟང་པོ་ཡིན་པ་དང་། ང་ཚོའི་ཏང་ལ་ཐོག་མཐའ་བར་གསུམ་དུ་མི་དམངས་ཀྱི་བརྩི་བཀུར་ཐོབ་པ་དང་མི་ཕམ་པའི་གནས་སུ་ལངས་ཐུབ་པའི་རྒྱུ་རྐྱེན་གལ་ཆེན་ཞིག་རེད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཏང་ཡོངས་ལ་“སྤྱོད་གཙང་གཞུང་དྲང་གི་ཆབ་སྲིད་རང་བཞིན་ནམ་ཡང་མི་ཉམས་པར་བྱེད་དགོས་”ཞེས་བསླབ་བྱ་ཐེངས་མང་གནང་ཡོད། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཏང་སྲོལ་སྲིད་གཙང་འཛུགས་སྐྲུན་ཐད་འབུར་དུ་ཐོན་པའི་འགལ་ཟླ་དང་གནད་དོན་ལ་ཁ་གཏད་འཇལ་བ་དང་། སྔར་ན་མེད་པའི་བློ་སྟོབས་དང་ངེས་ཤུགས་ལ་བརྟེན་ནས་ཕྱོགས་ཡོངས་ནས་ཏང་ནན་པོས་སྐྱོང་རྒྱུར་སྐུལ་འདེད་བཏང་བ་དང་། ཡུན་རིང་བཀག་འགོག་བྱེད་མ་ཐུབ་པའི་སྤྱོད་ངན་ཁ་ཤས་བཀག་འགོག་བྱས་པ་དང་། ལོ་མང་རིང་སེལ་མ་ཐུབ་པའི་བཅོས་དཀའི་གཅོང་ནད་ཁ་ཤས་བཅོས་སྐྱོང་བྱས་ཏེ། ཏང་དང་། རྒྱལ་ཁབ། དམག་དཔུང་བཅས་ཀྱི་ནང་ཁུལ་དུ་གནས་པའི་མངོན་མེད་རྐྱེན་ངན་ཚབས་ཆེན་གཙང་སེལ་བྱས་པས། ཏང་སྲོལ་དང་སྲིད་སྲོལ་གསར་རྐྱང་དུ་གྱུར་པ་དང་། སྤྱི་ཚོགས་ཀྱི་རྣམ་པ་དང་མི་དམངས་ཀྱི་གོམས་སྲོལ་རྒྱུན་ཆད་མེད་པར་ལེགས་སུ་ཕྱིན་པ། མི་དམངས་ཀྱི་སེམས་ནང་དུ་གནས་པའི་ཏང་གི་སྣང་བརྙན་སླར་ཡང་གསར་སྐྲུན་ཐུབ་པ་བཅས་བྱུང་ཡོད།

ཆུ་བོར་གྱེན་དུ་གྲུ་གཏོང་བར། །གྲུ་ཤིང་སྤྱད་ནས་བཀན་པར་བྱ། །གལ་ཏེ་གྲུ་ཤིང་ལྷོད་འགྱུར་ན། །ཡུད་ཙམ་གྱིས་ཀྱང་ཐག་རིང་གྱུར། ། མི་དམངས་མང་ཚོགས་ཀྱི་ཡིད་ཆེས་དང་རྒྱབ་སྐྱོར་ནི་ལྷན་སྐྱེས་ཤིག་མིན་ལ་དཀའ་བ་སྤྱོད་ཐེངས་གཅིག་ལ་གཏན་བདེ་ཐོབ་པ་ཞིག་ཀྱང་མིན། ཐོག་མཐའ་བར་གསུམ་དུ་དམངས་སེམས་ཐོབ་པ་དང་དམངས་སེམས་ཡག་པོ་སྲུང་དགོས་ན་ངེས་པར་དུ་ཏང་གི་སྔོན་ཐོན་རང་བཞིན་ཉམས་ཞན་དུ་གཏོང་བ་དང་ཏང་གི་དྭངས་གཙང་རང་བཞིན་ལ་གནོད་འཚེ་གཏོང་བའི་རྒྱུ་རྐྱེན་མཐའ་དག་མཐའ་གཅིག་ཏུ་གཙང་སེལ་བྱས་ནས། ཐོག་མའི་བསམ་འདུན་དང་འགན་འཁྲི་ལས་འགལ་བ་དང་ཏང་གི་རྨང་གཞིར་གཡོ་འགུལ་གཏོང་བའི་ཉེན་ཁ་མཐའ་དག་ལ་དོགས་ཟོན་མཐའ་གཅིག་ཏུ་བྱེད་དགོས། མིག་སྔར། ཏང་འཛུགས་སྐྲུན་དང་ལྷག་པར་དུ་ཏང་སྲོལ་སྲིད་གཙང་འཛུགས་སྐྲུན། རུལ་སུངས་ལ་རྒོལ་བའི་འཐབ་རྩོད་ལ་སྔར་བཞིན་ངན་རེངས་རང་བཞིན་དང་མང་འབྱུང་རང་བཞིན་གྱི་གནད་དོན་མི་ཉུང་བ་ལྷགས་ཡོད་པས། ངེས་པར་དུ་ཏང་གི་རང་ངོས་གསར་བརྗེ་མཐར་ཕྱིན་པར་བྱས་ཏེ། གཏོར་འཛུགས་ཟུང་འབྲེལ་དང་། བདེན་སྐྱོང་ངན་སྤོང་། བདེན་འཚོལ་དོན་གཉེར་དང་མཐུན་སྒྲིལ་འབད་འཐབ་བྱེད་པའི་དུས་རབས་ཀྱི་སྲོལ་གསར་བཙུགས་ཏེ། ལས་བྱེད་པ་གཞུང་དྲང་དང་། སྲིད་གཞུང་སྤྱོད་གཙང་། ཆབ་སྲིད་དྭངས་གསལ་བཅས་ཡོང་བར་ཁག་ཐེག་བྱས་ན། ད་གཟོད་ང་ཚོའི་ཏང་ཐོག་མཐའ་བར་གསུམ་དུ་ཆེས་རྒྱ་ཆེ་བའི་མི་དམངས་ཀྱི་ཁྲོད་དུ་ལངས་ཐུབ་པ་དང་། ཐོག་མཐའ་བར་གསུམ་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བྱ་གཞག་གི་འགོ་ཁྲིད་སྲོག་ཤིང་དུ་འགྱུར་ཐུབ།

“གཞུང་དྲང་ལས་ལེགས་ཉེས་རྟོགས། ། སྤྱོད་གཙང་ལས་ཟིལ་ཤུགས་འཕེལ། །” ཏང་ཡོན་དང་ལས་བྱེད་པས་སྤྱོད་གཙང་སྤྱི་གཞོལ་རྒྱུན་འཁྱོངས་དང་། ཁྱད་དབང་མི་སྤྱོད་པ། སྒེར་ཕན་མི་གཉེར་བ་བཅས་བྱས་ཚེ་ད་གཟོད་རྐེད་པ་དྲང་པོར་སྲོང་ཐུབ། དེ་ལས་ལྡོག་ན། བསླུ་བྲིད་འགོག་མི་ཐུབ་པ་དང་མཐའ་ཚད་སྲུང་མི་ཐུབ་པ། མི་ལ་ལ་རྒྱ་མེད་ཅིང་། ལས་ཀ་སྒྲུབ་ནའང་གདིང་ཤུགས་ཡོད་དཀའ། སྤྱོད་གཙང་སྤྱི་གཞོལ་གྱིས་སྲོལ་གསར་གཏོད་པར་རྒྱ་ཆེའི་ཏང་ཡོན་དང་ལས་བྱེད་པར་སྒྲིག་ཁྲིམས་ཀྱི་འདུ་ཤེས་དང་སྒྲིག་ལམ་གྱི་འདུ་ཤེས་ཆེ་རུ་སྐྱེད་པ་དང་། “སྤྱོད་ཚུལ་བཞི་”མུ་མཐུད་ཡོ་བསྲང་དང་བཅོས་སྐྱོང་བྱེད་པ། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཡོ་བསྲང་བྱེད་རྒྱུ་དེ་སྔར་བས་མངོན་གསལ་དོད་པའི་གོ་གནས་ཐོག་འཇོག་པ། དྲང་གཞག་ངང་དབང་ཆ་སྤྱོད་པ་དང་། ཁྲིམས་ལྟར་དབང་ཆ་སྤྱོད་པ། དམངས་ཀྱི་ཆེད་དུ་དབང་ཆ་སྤྱོད་པ། སྤྱོད་གཙང་ངང་དབང་ཆ་སྤྱོད་པ་བཅས་ཀྱི་སློབ་གསོ་རྒྱག་པ་དང་ཁྲིད་སྟོན་བྱས་ནས། གཙང་མ་གཙང་རྐྱང་གི་བློ་མཐུན་བར་གྱི་འབྲེལ་བ་དང་། བག་ཡོད་ཚུལ་ལྡན་གྱི་གོང་འོག་བར་གྱི་འབྲེལ་བ། མཛའ་མཐུན་ལྷད་མེད་གཅིག་གྱུར་གྱི་སྲིད་ཚོང་བར་གྱི་འབྲེལ་བ་གསར་པ་བཅས་ཆགས་པར་སྐུལ་འདེད་བྱས་ཏེ། ཆབ་སྲིད་ཀྱི་སྐྱེ་ཁམས་ལེགས་པོ་དང་སྤྱི་ཚོགས་ཀྱི་དར་སྲོལ་བཟང་པོའི་སྣེ་ཁྲིད་བྱེད་མཁན་དང་། འཛུགས་སྐྲུན་བྱེད་མཁན་དང་། སྲུང་སྐྱོང་བྱེད་མཁན་བཅས་ཡག་པོ་བྱེད་དགོས།

དགོངས་པའི་སྟོབས་ཤུགས་རླབས་པོ་ཆེར་གོ་བ་བླངས་ནས་སེམས་ཤུགས་གཅིག་སྒྲིལ་གྱིས་ཐུན་མོང་ཐོག་འབད་འཐབ་བྱས་ཏེ་འགྲོ་ལམ་གསར་པ་གཏོད་དགོས། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་སྐོར་དུ་མཐུན་སྒྲིལ་སྔར་ལས་དམ་ཟབ་བྱེད་པ་དང་། རྒྱུན་འཁྱོངས་ལྷོད་མེད་ཀྱི་སྒོ་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་བློ་སྒྲིལ་སེམས་སྐྱེད་བྱས་ན། ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་མཐུན་སྒྲིལ་འབད་འཐབ་བྱེད་པའི་བརྗིད་རྔམ་ལྡན་པའི་སྟོབས་ཤུགས་གཅིག་ཏུ་འགྲིལ་ནས། རྣམ་པ་གསར་པ་དང་བྱ་སྤྱོད་གསར་པས་ལོ་རྒྱུས་ཀྱི་བྱ་གཞག་རླབས་པོ་ཆེ་གསར་པ་གཏོད་ངེས་རེད།

ལྷག་པ་ཚེ་རིང་གིས་བསྒྱུར།