བརྗོད་དོན་གཙོ་བོའི་སློབ་གསོའི་སྤྱིའི་བླང་བྱ་ཁོང་དུ་བརྟན་པོར་ཆུད་པ།

“ཐེངས་འདིའི་བརྗོད་དོན་གཙོ་བོའི་སློབ་གསོའི་སྤྱིའི་བླང་བྱ་ནི་‘དགོངས་པ་སློབ་སྦྱོང་བྱེད་པ་དང་། ཏང་གཤིས་ཆེ་རུ་སྐྱེད་པ། ལག་ལེན་གཙོ་བོར་འདོན་པ། ལེགས་སྐྱེས་གསར་པ་འབུལ་བ་’བཅས་རེད།” 2023ལོའི་ཟླ་4ཚེས་3ཉིན་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོའི་ལས་དོན་ཚོགས་འདུ་པེ་ཅིན་དུ་འཚོགས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གསུང་བཤད་གལ་ཆེན་གནང་ནས་བརྗོད་དོན་གཙོ་བོའི་སློབ་གསོའི་སྤྱིའི་བླང་བྱར་འགྲེལ་བཤད་གཏིང་ཟབ་གནང་བ་རེད། དགོངས་པ་སློབ་སྦྱོང་བྱེད་པ་དང་། ཏང་གཤིས་ཆེ་རུ་སྐྱེད་པ། ལག་ལེན་གཙོ་བོར་འདོན་པ། ལེགས་སྐྱེས་གསར་པ་འབུལ་བ་བཅས་ཀྱི་ཐོག་ནས་ང་ཚོའི་ཏང་གི་ངོས་འཛིན་དང་ལག་ལེན་ཟུང་འབྲེལ་དང་། རིགས་པའི་གཞུང་ལུགས་དང་དོན་དངོས་ཕན་ཚུན་ཟུང་འབྲེལ། རང་སྣང་གི་འཇིག་རྟེན་བསྒྱུར་བཀོད་དང་ཕྱི་རོལ་ཡུལ་གྱི་འཇིག་རྟེན་བསྒྱུར་བཀོད་ཕན་ཚུན་གཅིག་གྱུར་བཅས་ཀྱི་ཐོག་མཐའ་བར་གསུམ་གྱི་བླང་བྱ་མཚོན་ཡོད་པས་དེ་ནི་འབྲེལ་བ་དམ་ཟབ་དང་། ཕན་ཚུན་འབྲེལ་མཐུད། ནང་གནས་གཅིག་གྱུར་བཅས་ཀྱི་ཚོགས་སྤྱི་ཞིག་ཡིན་པས་སྤྱིའི་བླང་བྱ་དེ་ཐེངས་འདིའི་བརྗོད་དོན་གཙོ་བོའི་སློབ་གསོའི་བརྒྱུད་རིམ་ཧྲིལ་པོར་ཁྱབ་པ་བྱེད་དགོས།

དགོངས་པ་སློབ་སྦྱོང་བྱས་ནས་ཏང་གི་གསར་གཏོད་རིགས་པའི་གཞུང་ལུགས་ལ་ཆབ་སྲིད་ཀྱི་ངོས་འཛིན་གཅིག་མཐུན་དང་། བསམ་བློའི་ངོས་འཛིན་གཅིག་མཐུན། རིགས་པའི་གཞུང་ལུགས་ཀྱི་ངོས་འཛིན་གཅིག་མཐུན། བརྩེ་དུང་གི་ངོས་འཛིན་གཅིག་མཐུན་བཅས་རྒྱུན་ཆད་མེད་པར་ཟབ་ཏུ་གཏོང་དགོས། ཟླ་4ཚེས་3ཉིན་ནས་བཟུང་། ཀྲུང་གུང་ཀྲུང་དབྱང་ཚད་ལྡན་ཡིག་ཆ་རྩོམ་སྒྲིག་ཨུ་ཡོན་ལྷན་ཁང་གིས་རྩོམ་སྒྲིག་བྱས་པའི་《ཞི་ཅིན་ཕིང་གི་གསུང་རྩོམ་གཅེས་བསྒྲིགས་ཀློག་དེབ་》བམ་པོ་དང་པོ་དང་བམ་པོ་གཉིས་པ་རྒྱལ་ཡོངས་སུ་འགྲེམ་སྤེལ་བྱས། འདི་ནི་ཏང་དང་རྒྱལ་ཁབ་ཀྱི་ཆབ་སྲིད་འཚོ་བའི་ཁྲོད་ཀྱི་དོན་ཆེན་ཞིག་ཡིན་ལ། རྒྱལ་ཡོངས་ཀྱི་ས་གནས་སོ་སོར་མྱུར་དུ་སློབ་སྦྱོང་གི་ཚ་རླབས་ཤིག་འཕྱུར། 《ཞི་ཅིན་ཕིང་གི་གསུང་རྩོམ་གཅེས་བསྒྲིགས་ཀློག་དེབ་》ཞེས་པའི་ནང་2012ལོའི་ཟླ་11པ་ནས་2022ལོའི་ཟླ་10པའི་བར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་རྩོམ་གལ་ཆེན་ནང་དུ་སྡུད་པ་དང་། དེ་ནི་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱེད་པའི་དབང་གྲགས་ལྡན་པའི་སློབ་དེབ་ཅིག་རེད།

མི་རིགས་ཤིག་དུས་རབས་ཀྱི་མདུན་གྲལ་དུ་སྐྱོད་དགོས་ན། རིགས་པའི་གཞུང་ལུགས་ཀྱི་བསམ་གཞིག་སྐད་ཅིག་ཙམ་ལ་ཡང་མེད་མི་རུང་ལ། བསམ་བློའི་ཁྲིད་སྟོན་ཡང་དག་པ་སྐད་ཅིག་ཙམ་ལ་ཡང་མེད་མི་རུང་། ཀྲུང་གོའི་གུང་ཁྲན་ཏང་འཇོན་པོ་ཡོད་དོན་ག་རེ་ཡིན་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཡག་པོ་ཡོད་དོན་ག་རེ་ཡིན་ཞེ་ན། དེ་མཐར་གཏུགས་ནས་བཤད་ན་མར་ཁེ་སིའི་རིང་ལུགས་འཕེར་པོ་ཡོད་པ་དང་། ཀྲུང་གོ་ཅན་དང་དུས་རབས་ཅན་གྱི་མར་ཁེ་སིའི་རིང་ལུགས་འཕེར་པོ་ཡོད་པའི་རྐྱེན་གྱིས་རེད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྐུ་ཚབ་གཙོ་བོ་གནང་བའི་ཀྲུང་གོའི་གུང་ཁྲན་ཏང་མིས་མར་ཁེ་སིའི་རིང་ལུགས་ཀྱི་གཞི་རྩའི་རྩ་བའི་རིགས་པ་དེ་ཀྲུང་གོའི་དོན་དངོས་དང་ཟུང་འབྲེལ་དང་། ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་དང་ཟུང་འབྲེལ་བྱ་རྒྱུ་རྒྱུན་འཁྱོངས་བྱས་ནས་ཏང་དབུ་བརྙེས་ཚུན་གྱི་ལོ་རྒྱུས་ཀྱི་ཉམས་མྱོང་ཕྱོགས་བསྡོམས་གཏིང་ཟབ་དང་བེད་སྤྱོད་གང་ལེགས་བྱས་ཏེ་དོན་དངོས་གསར་པར་གཞིགས་ནས་ཀྲུང་གོའི་དྲི་བ་དང་། འཛམ་གླིང་གི་དྲི་བ། མི་དམངས་ཀྱི་དྲི་བ། དུས་རབས་ཀྱི་དྲི་བ་བཅས་ལ་ཚན་རིག་དང་མཐུན་པར་ལན་བཏབ་སྟེ་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་གསར་གཏོད་བྱས་པ་དང་། མར་ཁེ་སིའི་རིང་ལུགས་ཀྲུང་གོ་ཅན་གྱི་དུས་རབས་གསར་པའི་འཕུར་མཆོང་མངོན་འགྱུར་བྱུང་བ་རེད། རྒྱུན་འཁྱོངས་ལྷོད་མེད་ངང་གསར་གཏོད་ཀྱི་རིགས་པའི་གཞུང་ལུགས་ལ་བརྟེན་ནས་བསམ་བློར་དྲག་ཆས་སྤྲས་པ་དང་། ལག་ལེན་ལ་མཛུབ་སྟོན། ལས་ཀར་སྐུལ་འདེད་གཏོང་བ་བཅས་བྱས་པ་དང་། ཏང་དང་རྒྱལ་ཁབ་ཀྱི་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པ་དང་ལོ་རྒྱུས་རང་བཞིན་གྱི་འཕོ་འགྱུར་བྱུང་བ། རང་རྒྱལ་འདི་ཉིད་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་འཐབ་ལམ་གསར་པའི་ཐོག་སྐྱོད་པར་སྐུལ་འདེད་བཏང་བ། ཀྲུང་གོའི་ལུགས་ཀྱི་དེང་རབས་ཅན་ལ་བདེ་བླག་ངང་སྐུལ་འདེད་དང་རྒྱ་སྐྱེད་བཏང་བ། མིའི་རིགས་ཀྱི་ཤེས་དཔལ་གྱི་རྣམ་པ་གསར་པ་གཏོད་པ་བཅས་བྱས་པས། ཀྲུང་ཧྭ་མི་རིགས་ཡར་ལངས་པ་དང་ཕྱུག་པོར་གྱུར་པ་ནས་སྟོབས་ལྡན་དུ་གྱུར་པའི་འཕུར་མཆོང་རླབས་པོ་ཆེ་བསུ་ཡོང་སྟེ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱ་རྒྱུ་དེ་ལྡོག་ཐབས་མེད་པའི་ལོ་རྒྱུས་ཀྱི་འཕེལ་རིམ་དུ་སླེབས་ཡོད། དུས་རབས་གསར་པའི་ལོ་ངོ་བཅུའི་འཕོ་འགྱུར་རླབས་པོ་ཆེའི་ཆེས་རྩ་བར་གྱུར་པའི་རྒྱུ་རྐྱེན་ནི་ཞི་ཅིན་ཕིང་ཏང་ཀྲུང་དབྱང་གི་སྲོག་ཤིང་དང་། ཏང་ཡོངས་ཀྱི་སྲོག་ཤིང་དུ་གྱུར་པའི་ཕྱོགས་སྟོན་ལམ་ཁྲིད་གནང་བ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་ཚན་རིག་དང་མཐུན་པའི་མཛུབ་ཁྲིད་གནང་བར་ཐུག་ཡོད།

ཏང་གི་རིགས་པའི་གཞུང་ལུགས་གསར་གཏོད་ཀྱི་གོམ་པ་གང་མདུན་དུ་སྤོས་ན། རིགས་པའི་གཞུང་ལུགས་ཀྱི་དྲག་ཆས་ཀྱང་གོམ་པ་གང་མདུན་དུ་སྤོ་དགོས། ཏང་གི་ཚོགས་ཆེན་ཉི་ཤུ་པའི་སྙན་ཞུ་ལས་བསྟན་དོན། རྒྱུན་འཁྱོངས་ལྷོད་མེད་ངང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་བློ་སྒྲིལ་སེམས་སྐྱེད་དང་། རྫོང་དང་ཁྲུའུ་རིམ་པ་ཡན་གྱི་འགོ་ཁྲིད་ལས་བྱེད་པ་གཙོ་གནད་དུ་བཟུང་སྟེ་ཏང་ཡོངས་སུ་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོ་གཏིང་ཟབ་ཏུ་སྤེལ་དགོས་པའི་བླང་བྱ་ཁ་གསལ་བཏོན་ཡོད། དགོངས་པ་སློབ་སྦྱོང་བྱེད་པ་ཞེས་པ་ནི། ཕྱོགས་ཡོངས་ནས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་གོ་བ་ལེན་པ་དང་། དགོངས་པ་དེའི་གཞི་རྩའི་ལྟ་བ་དང་ཚན་རིག་གི་མ་ལག་ནང་བྱན་ཆུད་པ། དགོངས་པ་དེའི་འཇིག་རྟེན་ལྟ་བ་དང་བརྟག་ཐབས་སྨྲ་བ་ཤེས་རྟོགས། དེའི་ནང་ཁྱབ་པའི་ལངས་ཕྱོགས་དང་ལྟ་བ་དང་བྱེད་ཐབས་རྒྱུན་འཁྱོངས་དང་བེད་སྤྱོད་ཡག་པོ། ཏང་གི་གསར་གཏོད་རིགས་པའི་གཞུང་ལུགས་སྐོར་གྱི་ཆབ་སྲིད་ཀྱི་ངོས་འཛིན་གཅིག་མཐུན་དང་། བསམ་བློའི་ངོས་འཛིན་གཅིག་མཐུན། རིགས་པའི་གཞུང་ལུགས་ཀྱི་ངོས་འཛིན་གཅིག་མཐུན། བརྩེ་དུང་གི་ངོས་འཛིན་གཅིག་མཐུན་བཅས་རྒྱུན་ཆད་མེད་པར་ཆེ་རུ་གཏོང་བ། མར་ཁེ་སིའི་རིང་ལུགས་ཀྱི་འཇོན་ཐང་ལེགས་ཤོས་དངོས་འབྲེལ་ཁོང་དུ་ཆུད་པ། རང་རྟོགས་ངང་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སྤྱད་དེ་ལས་དོན་ཁག་ལ་མཛུབ་སྟོན་བཅས་བྱེད་དགོས་པ་དེ་ཡིན།

ཏང་གཤིས་ཆེ་རུ་སྐྱེད་པ་སྟེ་ཐོག་མཐའ་བར་གསུམ་དུ་གུང་ཁྲན་ཏང་མིའི་ཆབ་སྲིད་ཀྱི་རང་བཞིན་མཐའ་འཁྱོངས་བྱེད་དགོས། 1938ལོར། བློ་མཐུན་མའོ་ཙེ་ཏུང་གིས་ཡན་ཨན་ལྗར་འགོག་དམག་སྲིད་སློབ་ཆེན་དུ་“ལྗར་འགོག་དམག་སྲིད་སློབ་ཆེན་དུ་ཅི་ཞིག་སློབ་སྦྱོང་བྱེད་དགོས་”ཞེས་པར་ལན་འདེབས་སྐབས་བསྟན་དོན། “ཐོག་མར་ཆབ་སྲིད་ཀྱི་ཁ་ཕྱོགས་ཤིག་སྦྱོང་དགོས།” སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཡན་ཨན་གསར་བརྗེའི་དྲན་གསོ་གནས་མཇལ་དུ་གསུང་ཚིག་འདི་དྲངས་ཏེ། ཡན་ཨན་གྱི་སྙིང་སྟོབས་སློབ་སྦྱོང་དང་དར་སྤེལ་གཏོང་བའི་སྙིང་བཅུད་རྒྱས་བཤད་གཏིང་ཟབ་གནང་ཡོད། ལོ་རྒྱུས་དང་དོན་དངོས་ཀྱི་ཐོག་ནས་མཚོན་དོན། རིགས་པའི་གཞུང་ལུགས་སློབ་སྦྱོང་གཏིང་ཟབ་དང་མཐར་ཕྱིན་པ་མ་བྱས་ན། བསམ་བློ་གཅིག་གྱུར་ཡོང་བར་རྨང་གཞི་མེད་པ་དང་། ཏང་གི་མཐུན་སྒྲིལ་གཅིག་གྱུར་ལ་ཤུགས་རྐྱེན་ཚབས་ཆེན་ཐེབས་ངེས། བརྗོད་དོན་གཙོ་བོའི་སློབ་གསོའི་ལས་དོན་ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་གནང་དོན། “ཐེངས་འདིའི་བརྗོད་དོན་གཙོ་བོའི་སློབ་གསོ་སྤེལ་བར་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་དང་ཏན་ཏིག་ངང་བྱེད་པའི་ཐད་ཤུགས་རྒྱག་པ་དང་། ཏང་ཡོན་དང་ལས་བྱེད་པར་ཁྲིད་སྟོན་བྱས་ཏེ་བསམ་བློའི་ཐོག་ནས་གཞི་སྒྱུར་རྩ་སྒྱུར་དང་ལུས་གསོ་ཟུངས་སྐྱེད། ཆབ་སྲིད་བརྡར་ཤ་གཅོད་ནུས་དང་། ཆབ་སྲིད་ངེས་ཤེས་འདྲོང་ནུས། ཆབ་སྲིད་ལག་བསྟར་བྱེད་ནུས་བཅས་རྒྱུན་ཆད་མེད་པར་ཆེ་རུ་གཏོང་བ། ‘འདུ་ཤེས་བཞི་’ཆེ་རུ་སྐྱེད་པ་དང་། ‘གདེང་ཚོད་བཞི་’བརྟན་དུ་གཏོང་བ། ‘སྲུང་སྐྱོང་གཉིས་ ’བྱེད་ཐུབ་པ། བསམ་བློ་དང་ཆབ་སྲིད་དང་བྱ་སྤྱོད་གསུམ་ཐད་ནས་ཐོག་མཐའ་བར་གསུམ་དུ་ཏང་ཀྲུང་དབྱང་དང་ཚད་མཐོའི་གཅིག་གྱུར་ཡོང་བ། བསམ་བློ་ཕྱོགས་གཅིག་ཏུ་གཏོང་བ་དང་སྟོབས་ཤུགས་ཕྱོགས་གཅིག་ཏུ་འདོན་པ་བཅས་བྱས་ཏེ། ཐུན་མོང་ཐོག་ཏང་ཉིད་ཕམ་པ་མེད་པའི་ངར་ལྕགས་ལྟར་སྲ་མཁྲེགས་ཆེ་བ་ཞིག་ཏུ་གསོ་སྐྱོང་བྱེད་དགོས།”

“ཤིང་འཛུགས་མཁན་གྱིས་ངེས་པར་དུ་རྩ་བ་གསོ་དགོས་ལ། སྤྱོད་བཟང་སྐྱོང་མཁན་གྱིས་ངེས་པར་དུ་སེམས་གསོ་དགོས།” ཏང་གཤིས་ནི་ཏང་ཡོན་དང་ལས་བྱེད་པས་རང་ཚུགས་ཐུབ་པ། བྱ་གཞག་སྒྲུབ་ཐུབ་པ། གཏམ་གྱི་དགེ་ཐོན་པ། སྤྱོད་བཟང་རྒྱུད་ལ་འཇགས་པ་བཅས་བྱེད་པའི་རྨང་རྡོ་ལྟ་བུ་ཡིན། མི་ཅི་འདྲ་ཞིག་ཡོང་བ་ནི་སྤྱོད་པར་ཐུག་པ་དང་། ཏང་ཡོན་ཅི་འདྲ་ཞིག་ཡོང་བ་ནི་ཏང་གཤིས་ལ་ཐུག་ཡོད། ཏང་གཤིས་ནི་ཏང་ལོ་མང་དུ་སོང་བ་དང་བསྟུན་ནས་རང་ཤུགས་སུ་ཆེ་རུ་འགྲོ་མི་སྲིད་ལ། གོ་གནས་འཕར་བ་དང་བསྟུན་ནས་རང་བཞིན་གྱིས་ཆེ་རུ་ཡང་འགྲོ་མི་སྲིད་པས། ངེས་པར་དུ་ཏང་ནང་གི་འཚོ་བའི་སྦྱོང་བརྡར་ནན་པོའི་ཁྲོད་ནས་རྒྱུན་ཆད་མེད་པར་ཤུགས་ཆེ་རུ་གཏོང་དགོས། བློ་མཐུན་མའོ་ཙེ་ཏུང་གིས་བསྟན་མྱོང་དོན། ཏང་གཤིས་ཀྱི་གནད་དོན་ནི་གནད་དོན་གལ་ཆེན་ཞིག་ཡིན་པས། “འབྲིང་རིམ་ཡན་གྱི་ལས་བྱེད་པར་ཞིབ་བཤེར་བྱེད་དགོས་ལ། ལས་བྱེད་པ་སྲ་བརྟན་བྱུང་ན། ཏང་ཉིད་ད་གཟོད་སྲ་བརྟན་དུ་ཡོང་ཐུབ།” 1941ལོར། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱིས་《ཏང་གཤིས་ཆེ་རུ་སྐྱེད་པའི་སྐོར་གྱི་ཆོད་དོན་》ལ་ཆེད་དུ་གྲོས་འཆམ་བྱུང་ནས་བསྟན་དོན། “དེ་རིང་ཏང་སྲ་བརྟན་དུ་གཏོང་བའི་ལས་ཀ་གཙོ་བོ་ནི་ཏང་ཡོངས་ཀྱི་ཏང་ཡོན་དང་། ལྷག་པར་དུ་ལས་བྱེད་པ་ཏང་ཡོན་རྣམས་ལ་རང་ཉིད་ཀྱི་ཏང་གཤིས་སྦྱོང་བརྡར་བྱེད་ཤུགས་སྔར་བས་ཆེ་རུ་གཏོང་བ་དང་། སྒེར་གྱི་ཁེ་ཕན་དེ་ཏང་ཡོངས་ཀྱི་ཁེ་ཕན་ལ་བསྟུན་པ། ཏང་རེ་འགའི་གྲུབ་ཚུལ་ཁག་གི་ཁེ་ཕན་དེ་ཏང་ཡོངས་ཀྱི་ཁེ་ཕན་ལ་བསྟུན་པ་བཅས་བྱས་ཏེ། ཏང་ཡོངས་མཐུན་སྒྲིལ་བྱས་ནས་མི་གཅིག་ལྟ་བུ་ཡོང་ཐུབ་པ་བྱེད་དགོས།” དུས་རབས་གསར་པར་སླེབས་སྐབས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཏང་གཤིས་ཀྱི་གནད་དོན་ལ་ཚད་མཐོའི་མཐོང་ཆེན་གནང་ནས་བསྟན་དོན། “ངས་རྟག་ཏུ་གུང་ཁྲན་ཏང་མིའི་‘སེམས་སྦྱོང་’བྱེད་དགོས་པ་དང་། སློབ་སྦྱོང་དང་བསམ་གཞིག་དང་བེད་སྤྱོད་གསུམ་གཅིག་འབྲེལ་བྱེད་པ་དང་། ཤེས་ཡོན་དད་སེམས་བྱ་སྤྱོད་གསུམ་གཅིག་གྱུར་ཡོང་རྒྱུ་རྒྱུན་འཁྱོངས་བྱེད་དགོས་ཞེས་བརྗོད་པའི་དམིགས་ཡུལ་གལ་ཆེན་ཞིག་ནི་ཏང་ཡོན་ལས་བྱེད་པའི་ཕུགས་བསམ་དང་དད་སེམས་བརྟན་དུ་གཏོང་བ་དང་ཏང་གཤིས་ཆེ་རུ་སྐྱེད་དགོས་པའི་བླང་བྱ་འདོན་རྒྱུ་དེ་རེད།” སྤྱི་ཁྱབ་ཧྲུའུ་ཅིས་ནན་གསུང་གནང་དོན། “ང་ཚོ་གུང་ཁྲན་ཏང་མིས་ཏང་གཤིས་སྦྱོང་བརྡར་བྱེད་པར་ཐོག་མར་གུང་ཁྲན་རིང་ལུགས་ཀྱི་ཕུགས་བསམ་ཆེན་པོ་དང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཐུན་མོང་གི་ཕུགས་བསམ་བརྟན་པོ་ཡོང་བ་བྱ་རྒྱུ་དེ་ཡིན།”

ཆབ་སྲིད་ཐད་བརྟན་པོ་ཡོད་པ་དང་ཏང་གཤིས་ཐད་བརྟན་པོ་ཡོད་པ་དེ་གཉིས་ཀ་རིགས་པའི་གཞུང་ལུགས་ཐད་བརྟན་པོ་ཡོང་བ་དང་ཁ་འབྲལ་ཐབས་མེད་པ་དང་། ཏང་ཡོན་དང་ལས་བྱེད་པ་འཚར་ལོངས་ཡོང་བ་བྱེད་པར་ངེས་པར་དུ་མར་ཁེ་སིའི་རིང་ལུགས་ཀྱི་རིགས་པའི་གཞུང་ལུགས་ཀྱིས་དྲག་ཆས་སྤྲས་རྒྱུར་ཤུགས་སྣོན་རྒྱག་དགོས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ལས་ཏང་གིས་རྒྱལ་སྲིད་སྐྱོང་བའི་དགོངས་པ་གལ་ཆེན་ཚུད་ཡོད་པ་མ་ཟད། ཀྲུང་གོའི་གུང་ཁྲན་ཏང་མིའི་ཆབ་སྲིད་ཀྱི་གཤིས་རྒྱུད་དང་། རིན་ཐང་དོན་གཉེར། བསམ་པའི་གོ་འཕང་། སྤྱོད་ཚུལ་སྤྱོད་ལམ་བཅས་ཀྱི་བླང་བྱ་ཡང་ཁྱབ་ཡོད། ཉེ་ཆར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀོང་ཏུང་དུ་རྟོག་ཞིབ་གནང་སྐབས་བསྟན་གནང་དོན། “སློབ་སྦྱོང་ལ་བརྟེན་ནས་བླ་སྲོག་གསོ་བའི་དམིགས་ཡུལ་ནི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་ཟབ་སྤེལ་དང་། ནང་འགྱུར། གཞན་སྒྱུར་བཅས་ཀྱི་ལས་དོན་ཡག་པོ་བསྒྲུབས་ཏེ། བསམ་བློའི་ཐོག་ནས་གཞི་སྒྱུར་རྩ་སྒྱུར་དང་ལུས་གསོ་ཟུངས་སྐྱེད་དང་། དད་པའི་རྨང་གཞི་བརྟན་དུ་གཏོང་བ་དང་། བསམ་པའི་ཐོག་གི་ཀལ་འདང་ངེས་གསོ་བ། བསམ་བློའི་ཁ་ཕྱོགས་བརྟན་པོ་ཡོང་བ་བཅས་བྱེད་དགོས།” ཏང་གཤིས་ཆེ་རུ་སྐྱེད་པ་ཞེས་པ་ནི། རང་རྟོགས་ངང་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སྤྱད་དེ་རང་སྣང་གི་འཇིག་རྟེན་བསྒྱུར་བཀོད་བྱེད་དགོས་པ་དང་། དགོངས་པ་དེའི་ཕུགས་བསམ་དང་དད་སེམས་བརྟན་དུ་གཏོང་བ་དང་། བསམ་བློའི་གོ་འཕང་མཐོ་རུ་གཏོང་བ། ཏང་གཤིས་སྦྱོང་བརྡར་ལ་ཤུགས་སྣོན་རྒྱག་པ་ལ་སོགས་པའི་སྐོར་གྱི་བླང་བྱ་རབ་དང་རིམ་པར་གོ་བ་གཏིང་ཟབ་ལེན་དགོས་པ། ཐོག་མཐའ་བར་གསུམ་དུ་གུང་ཁྲན་ཏང་མིའི་ཆབ་སྲིད་ཀྱི་རང་གཤིས་མཐའ་འཁྱོངས་བྱེད་དགོས་པ་དེ་ཡིན།

ལག་ལེན་གཙོ་བོར་འདོན་པ་སྟེ་ཀྲུང་གོའི་ལུགས་ཀྱི་དེང་རབས་ཅན་ལ་འཕེལ་སྐྱེད་གསར་པ་དང་ཐོད་བརྒལ་གསར་པ་ཡོང་བར་སྐུལ་འདེད་གཏོང་དགོས། རིགས་པའི་གཞུང་ལུགས་ཀྱི་རིན་ཐང་ནི་ལག་ལེན་ལ་མཛུབ་སྟོན་བྱ་རྒྱུ་དེ་ཡིན་པ་དང་། རིགས་པའི་གཞུང་ལུགས་ཀྱི་གོ་སྐོན་བློ་འགུག་གི་ནུས་པ་དང་བློ་སེམས་འགུག་པའི་ནུས་པ་ནི་རྩ་བའི་ཐོག་ནས་བཤད་ན་ཚན་རིག་དང་མཐུན་པར་ལག་ལེན་ལ་མཛུབ་སྟོན་བྱེད་པའི་ཁྲོད་མངོན་པའི་བདེན་དོན་གྱི་སྟོབས་ཤུགས་ལས་བྱུང་བ་རེད། མིའི་རིགས་ཀྱི་ལོ་རྒྱུས་ཐོག་གི་གཞི་ཁྱོན་ཆེ་ཤོས་ཀྱི་དབུལ་བྲལ་འགག་སྒྲོལ་དམག་འཐབ་ལ་རྒྱལ་ཁ་ལེན་པ་དང་ལོ་རྒྱུས་ཀྱི་དེབ་ཐེར་ནང་བཀོད་པའི་མི་ཡུལ་གྱི་ངོ་མཚར་བཏོད་པ་རེད། རིམས་ནད་སྔོན་འགོག་ཚོད་འཛིན་ཐད་ཐག་གཅོད་རང་བཞིན་གྱི་རྒྱལ་ཁ་གལ་ཆེན་ཐོབ་པ་དང་མིའི་རིགས་ཀྱི་ཤེས་དཔལ་ལོ་རྒྱུས་ཐོག་འབོར་མང་བའི་རྒྱལ་ཁབ་ཆེན་པོ་བདེ་བླག་ངང་རིམས་ནད་རྒྱ་ཆེར་མཆེད་པ་ལས་ཐར་བའི་ངོ་མཚར་བསྐྲུན། དཔལ་འབྱོར་འཕེལ་རྒྱས་མགྱོགས་མྱུར་བྱུང་བ་དང་སྤྱི་ཚོགས་ཡུན་རིང་བརྟན་བརླིང་ཡོང་བའི་བྱས་རྗེས་ངོ་མཚར་ཅན་ཆེན་པོ་གཉིས་མུ་མཐུད་དུ་བྲིས་པ་སོགས། དུས་རབས་གསར་པའི་ལོ་ངོ་བཅུའི་སྤྱིར་བཏང་མིན་པའི་ལོ་རྒྱུས་དེ་ནི་“རིགས་པའི་གཞུང་ལུགས་མཐར་ཕྱིན་པ་”ཞིག་ནས་“དངོས་པོའི་སྟོབས་ཤུགས་”སུ་བསྒྱུར་བའི་བརྒྱུད་རིམ་ཞིག་ཡིན་ཞིང་། ང་ཚོའི་ཏང་གིས་རིགས་པའི་གཞུང་ལུགས་ཀྱི་དྲག་ཆས་སྤྲས་རྒྱུར་མུ་མཐུད་དུ་ཤུགས་སྣོན་བརྒྱབ་སྟེ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ཉིད་ཀྲུང་ཧྭའི་ས་གཞི་ཆེན་མོར་རྩ་བ་ཚུགས་པ་དང་མེ་ཏོག་བཞད་ནས་གྲུབ་འབྲས་ཐོབ་པར་སྐུལ་འདེད་བཏང་བས་ཏང་དང་རྒྱལ་ཁབ་ཀྱི་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པ་དང་ལོ་རྒྱུས་རང་བཞིན་གྱི་འཕོ་འགྱུར་བྱུང་ཡོད།

དགོངས་པའི་འོད་ཟེར་གྱིས་ཡར་བརྩོན་གྱི་ལམ་བུ་གསལ་བར་བྱས་ཤིང་། ལག་ལེན་རླབས་པོ་ཆེ་ལས་བསམ་བློའི་སྟོབས་ཤུགས་རླབས་པོ་ཆེ་མངོན་ཡོད། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱ་རྒྱུ་ནི་དུས་རབས་གསར་པ་དང་འཐབ་ལམ་གསར་པའི་ཐོག་བྱ་གཞག་འཕེལ་རྒྱས་ཀྱི་རྣམ་པ་གསར་པ་གཏོད་པའི་རྩ་བའི་བླང་བྱ་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་གནང་དོན། “ང་ཚོའི་ལས་བྱེད་པ་ཡར་རྒྱས་དང་། ང་ཚོའི་ཏང་ཡར་རྒྱས། ང་ཚོའི་རྒྱལ་ཁབ་ཡར་རྒྱས། ང་ཚོའི་མི་རིགས་ཡར་རྒྱས་བཅས་ཡོང་དགོས་ན། ངེས་པར་དུ་སློབ་སྦྱོང་གི་དར་སྲོལ་ཆེན་པོ་སྤེལ་དགོས་པ་དང་། ཡང་ནས་ཡང་དུ་སློབ་སྦྱོང་བྱ་རྒྱུ་རྒྱུན་འཁྱོངས་དང་། ཡང་ནས་ཡང་དུ་ལག་ལེན་བྱ་རྒྱུ་རྒྱུན་འཁྱོངས་བྱེད་དགོས།” མིག་སྔར་རང་རྒྱལ་གྱི་འཕེལ་རྒྱས་ལ་འཐབ་ཇུས་ཀྱི་གོ་སྐབས་གསར་པ་དང་། འཐབ་ཇུས་ཀྱི་ལས་འགན་གསར་པ། འཐབ་ཇུས་ཀྱི་དུས་རིམ་གསར་པ། འཐབ་ཇུས་ཀྱི་བླང་བྱ་གསར་པ། འཐབ་ཇུས་ཀྱི་ཁོར་ཡུག་གསར་པ་བཅས་འཕྲད་ཡོད། མགྱོགས་མྱུར་འཕེལ་རྒྱས་ཕྱིན་པའི་ལོ་བརྒྱའི་རིང་བྱུང་མྱོང་མེད་པའི་འཕོ་འགྱུར་ཆེན་པོར་ཁ་གཏད་འཇལ་བ་དང་སྔར་ན་མེད་པའི་བྱ་གཞག་རླབས་པོ་ཆེར་སྐུལ་འདེད་གཏོང་དགོས་ན། ཚན་རིག་དང་མཐུན་པའི་རིགས་པའི་གཞུང་ལུགས་ཀྱིས་བསམ་བློར་དྲག་ཆས་སྤྲས་ན་མ་གཏོགས་དད་མོས་དང་དད་སེམས་བརྟན་དུ་གཏོང་བ་དང་ལོ་རྒྱུས་ཀྱི་རང་དབང་སྟངས་འཛིན་བྱེད་མི་ཐུབ། ལག་ལེན་གཙོ་བོར་འདོན་པ་ཞེས་པ་ནི། རང་རྟོགས་ངང་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ལག་བསྟར་བྱེད་དགོས་པ་དང་། དེ་སྤྱད་དེ་ཕྱི་རོལ་ཡུལ་གྱི་འཇིག་རྟེན་བསྒྱུར་བཀོད་དང་བྱ་གཞག་གོང་འཕེལ་གཏོང་བ་དང་། དེ་སྤྱད་དེ་དུས་རབས་ལ་ལྟ་ཞིབ་དང་ཤེས་རྟོགས་དང་ཁྲིད་སྟོན་བཅས་བྱེད་པ། ཧུར་ཐག་གིས་འགྱུར་ལྡོག་ལ་ངོས་འཛིན་དང་། འགྱུར་ལྡོག་ལ་བསྟུན་པ། འགྱུར་ལྡོག་ཡོང་ཐབས་བྱེད་པ། དཔལ་འབྱོར་དང་སྤྱི་ཚོགས་འཕེལ་རྒྱས་དང་ཏང་འཛུགས་སྐྲུན་ཐད་གནས་པའི་འགལ་བ་དང་གནད་དོན་སྣ་ཚོགས་ཐག་གཅོད། ཉེན་ཁ་ཚབས་ཆེན་འགོག་སེལ། ཀྲུང་གོའི་ལུགས་ཀྱི་དེང་རབས་ཅན་ལ་འཕེལ་སྐྱེད་གསར་པ་དང་ཐོད་བརྒལ་གསར་པ་ཡོང་བར་སྐུལ་འདེད་བཅས་བྱེད་དགོས་པ་དེ་ཡིན།

ལེགས་སྐྱེས་གསར་པ་འབུལ་བ་སྟེ་ལོ་རྒྱུས་དང་མི་དམངས་ཀྱི་ཞིབ་བཤེར་ཐེག་ཐུབ་པའི་གྲུབ་འབྲས་ངོ་མ་གཏོད་པར་འབད་བརྩོན་བྱེད་དགོས། “ད་ལྟ་ནས་བཟུང་དུས་རབས་འདིའི་དུས་དཀྱིལ་བར་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་སྐྲུན་ཚར་བ་བྱ་རྒྱུ་དང་ཕྱོགས་ཡོངས་ནས་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེར་སྐུལ་འདེད་གཏོང་རྒྱུ་ནི་ཏང་ཡོངས་དང་རྒྱལ་ཡོངས་མི་དམངས་ཀྱི་ལྟེ་བའི་ལས་འགན་ཞིག་རེད། སྟོབས་ལྡན་རྒྱལ་ཁབ་འཛུགས་སྐྲུན་དང་མི་རིགས་བསྐྱར་དར་གྱི་རྒྱུག་མཐུད་དབྱུག་པ་ནི་ལོ་རྒྱུས་ཀྱི་སྒོ་ནས་ང་ཚོ་མི་རབས་འདིའི་ཕྲག་ཏུ་བབས་ཡོད།” ཟླ་3ཚེས་13ཉིན་པེ་ཅིན་མི་དམངས་ཚོགས་ཁང་ཆེན་མོར་འཚོགས་པའི་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་གྲོས་ཚོགས་ཐེངས་དང་པོའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་ལས་དཔའ་མཛངས་རྟུལ་ཕོད་ཀྱིས་འཐབ་ལམ་གསར་པའི་ཐོག་སྐྱོད་པ་དང་། དུས་རབས་གསར་པར་ལེགས་སྐྱེས་གསར་པ་འབུལ་རྒྱུའི་སྤྱིའི་སྐུལ་སློང་བཀའ་རྒྱ་བསྒྲགས་པས་ཚོགས་ར་ཡོངས་སུ་འབྲུག་སྒྲ་ལྡིར་བ་ལྟ་བུའི་ཐལ་མོ་རྡེབ་སྒྲས་ཁེངས།

བྱ་གཞག་རླབས་པོ་ཆེ་ནི་ཕུགས་འདུན་ནས་འགོ་ཚུགས་པ་དང་དངོས་སྒྲུབ་ལས་གྲུབ་འབྲས་ཐོབ། དུས་རབས་གསར་པའི་ལོ་ངོ་བཅུའི་འཕོ་འགྱུར་རླབས་པོ་ཆེ་ནི་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་“དཀའ་ཉེན་ཇི་ཙམ་ཆེ་བ་དེ་ཙམ་གྱིས་མདུན་དུ་སྐྱོད་པ་”ལས་བྱུང་བ་དང་། “རྔུལ་ཆུའི་ཐིགས་པ་འདབ་བརྒྱད་ལྷུང་བ་”ནས་བྱུང་བ། རི་ཀླུང་གསར་པར་བསྒྱུར་བའི་སྙིང་སྟོབས་ལས་བྱུང་བ་བཅས་རེད། དེང་རབས་ཀྲུང་གོས་མིའི་རིགས་ཀྱི་ལོ་རྒྱུས་ཐོག་ཆེས་བརྗིད་ཉམས་ལྡན་ལ་ཐུན་མོང་མ་ཡིན་པའི་ལག་ལེན་གསར་གཏོད་བརྒྱུད་ཀྱི་ཡོད། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཡོང་བར་སྐུལ་འདེད་གཏོང་བ་ནི་སྔར་བྱུང་མྱོང་མེད་པའི་གསར་གཏོད་རང་བཞིན་གྱི་བྱ་གཞག་ཅིག་ཡིན་པས། མདུན་སྐྱོད་ཀྱི་འགྲོ་ལམ་ཐོག་སྔར་བྱུང་མྱོང་མེད་པའི་ཞིབ་འཇུག་བྱ་གཞི་གསར་རྐྱང་འབོར་ཆེན་འཕྲད་ངེས་ཡིན་པ་དང་། དཀའ་ངལ་དང་ཉེན་ཁ་སྣ་ཚོགས་འཕྲད་ངེས་ཡིན་ལ། རླུང་འཚུབ་རླབས་འཕྱོ་དང་ཐ་ན་འཇིགས་རུང་དྲག་རླབས་ཀྱི་ཉམས་སད་ཆེན་པོ་མྱོང་ངེས་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་གནང་དོན། “དེང་རབས་ཅན་ནི་གནམ་ནས་ལྷུང་མི་སྲིད་ལ། ལོ་རྒྱུས་ཀྱི་རང་དབང་གི་སྙིང་སྟོབས་དར་སྤེལ་གཏོང་བར་བརྟེན་ནས་བསྒྲུབ་དགོས་པ་ཞིག་རེད།” འཐབ་ལམ་གསར་པའི་ཐོག་ལེགས་སྐྱེས་གསར་པ་འབུལ་བ་ཞེས་པ་ནི། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་ནང་འབད་བརྩོན་ཆེར་སྐྱེད་བྱེད་པའི་བློ་གྲོས་དང་སྟོབས་ཤུགས་བསྡུ་ལེན་བྱེད་དགོས་པ་དང་། དེའི་ནང་གི་འགོ་ཁྲིད་བྱེད་ཐབས་དང་། བསམ་བློ་གཏོང་སྟངས། ལས་ཀ་སྒྲུབ་སྟངས་བཅས་ནང་བྱན་ཆུད་པར་བྱས་ཏེ། རང་འགན་ལྷུར་ལེན་གྱི་ནུས་པ་དང་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ་དང་། སེམས་ཤུགས་གཅིག་སྒྲིལ་གྱིས་འཕེལ་རྒྱས་ལ་སྐུལ་འདེད། ཟམ་མི་འཆད་པར་དོན་འཁྱོལ་དམ་འཛིན། ལས་གནས་ཐོག་ལེགས་སྐྱེས་འབུལ་བ། ལོ་རྒྱུས་དང་མི་དམངས་ཀྱི་ཞིབ་བཤེར་ཐེག་ཐུབ་པའི་གྲུབ་འབྲས་ངོ་མ་གཏོད་གང་ཐུབ་བཅས་བྱེད་དགོས་པ་དེ་ཡིན།

ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་བྱེད་པའི་དམིགས་ཡུལ་ནི་བེད་སྤྱོད་གཏོང་རྒྱུ་དེ་ཡིན་པ་དང་། དགོངས་པ་དེ་རང་སྣང་གི་འཇིག་རྟེན་དང་ཕྱི་རོལ་ཡུལ་གྱི་འཇིག་རྟེན་བསྒྱུར་བཀོད་བྱེད་པའི་བསམ་བློའི་དྲག་ཆས་སྟོབས་ཆེན་ཞིག་ཏུ་འགྱུར་བ་བྱ་རྒྱུ་དེ་རེད། རྒྱ་ཆེའི་ཏང་ཡོན་དང་ལས་བྱེད་པས་ངེས་པར་དུ་སློབ་སྦྱོང་དང་བསམ་གཞིག་དང་བེད་སྤྱོད་གསུམ་གཅིག་འབྲེལ་བྱེད་པ་དང་། ཤེས་ཡོན་དད་སེམས་བྱ་སྤྱོད་གསུམ་གཅིག་གྱུར་ཡོང་རྒྱུ་རྒྱུན་འཁྱོངས་བྱས་ཏེ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དེ་ཏང་གི་ཚོགས་ཆེན་ཉི་ཤུ་པས་བཏོན་པའི་འཐབ་ཇུས་ཀྱི་བཀོད་སྒྲིག་གལ་ཆེན་ལག་བསྟར་དང་དོན་འཁྱོལ་བྱེད་པའི་ཁྲོད་བེད་སྤྱོད་བྱས་ནས་ཕུགས་བསམ་བརྟན་དུ་གཏོང་བ་དང་། ཏང་གཤིས་སྦྱོང་བརྡར། ལག་ལེན་ལ་མཛུབ་སྟོན། ལས་ཀར་སྐུལ་འདེད་གཏོང་བ་བཅས་ཀྱི་སྟོབས་ཤུགས་ཆེན་པོར་བསྒྱུར་དགོས།

འགྲོ་ལམ་ནི་ཕ་བོང་ལྟར་བརྟན་ཞིང་། །འགྲུལ་པ་ནི་རང་དགར་དུ་བསྐྱོད་ཆོག །བློ་བརྟན་པོས་མདུན་དུ་བསྐྱོད་ན། །ལམ་ཐག་རིང་ཡང་སླེབས་ཐུབ་བོ། །ཀྲུང་གོའི་གུང་ཁྲན་ཏང་མིས་སློབ་སྦྱོང་ལ་བརྟེན་ནས་དེ་རིང་བར་དུ་སླེབས་ཡོད་ལ། ད་དུང་ཡང་སློབ་སྦྱོང་ལ་བརྟེན་ནས་མ་འོངས་པར་བསྐྱོད་ངེས་རེད། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་ཡག་པོ་དང་། ཁོང་ཆུད་ཡག་པོ། བེད་སྤྱོད་ཡག་པོ་བཅས་བྱ་རྒྱུ་ནི་ང་ཚོས་མ་འོངས་པའི་ཕྱོགས་སུ་བསྐྱོད་པ་དང་རྒྱལ་ཁ་ནས་རྒྱལ་ཁའི་ཕྱོགས་སུ་བསྐྱོད་པའི་རྩ་བའི་བསམ་བློའི་འགན་ལེན་རེད།

བདེ་སྐྱིད་སྒྲོལ་མས་བསྒྱུར།

(ཀྲུང་དབྱང་མི་རིགས་སློབ་གྲྭ་ཆེན་མོའི་ཀྲུང་གོའི་གྲངས་ཉུང་མི་རིགས་སྐད་ཡིག་རྩོམ་རིག་སློབ་གླིང་།)