གཡོན་རུའི་བསླབ་བྱའི་པར་གཞི་ངོ་སྤྲོད།

[གནད་བསྡུས] བོད་ལ་ཆེས་སྔ་མོ་ཞིག་ནས་ལེགས་བཤད་དང་བསླབ་བྱའི་བརྩམས་ཆོས་བགྲང་ལས་འདས་པ་བྱུང་ཡོད་ལ། དེས་བོད་ཀྱི་སྤྱི་ཚོགས་ལ་དགེ་མཚན་ལྡན་པའི་ནུས་པ་གཏིང་ཟབ་ལ་རྒྱ་ཆེ་བ་ཞིག་ཐོན་ཡོད། དེ་ཡང་གཡོན་རུའི་བསླབ་བྱ་ཞེས་པ་ནི་གཡོན་རུ་སྙན་གྲགས་རྒྱ་མཚོས་མཛད་པའི་སྡོམ་པ་གསུམ་གྱི་བསླབ་བྱ་ཞིག་ཡིན་ལ། དེར་སྡོམ་པ་གསུམ་གྱི་ངོ་བོ་དང་རབ་དབྱེ་མཚན་ཉིད་སོགས་བསྟན་ཏེ། གཙོ་བོར་སྡོམ་པ་དེ་དང་དེའི་སྐབས་སུ་བསྟན་པའི་བསྲུང་བྱ་རྣམས་རྒྱས་པར་བསྟན་ཡོད་དོ། ། བསླབ་བྱ་གང་དེ་ཐོག་མར་ལག་བྲིས་ཀྱི་རྣམ་པས་དར་ཁྱབ་བྱུང་ཞིང་། གཡོན་རུའི་སྤྲུལ་སྐུ་བློ་བཟང་བསྟན་པ་རྒྱ་མཚོའི་སྐུ་ཚེ་སྨད་ཙམ་ལ། ཏང་གི་ཡང་དག་པའི་ཆོས་ལུགས་སྲིད་ཇུས་དངོས་འབེབས་ལག་བསྟར་བྱས་ཏེ། བསྟན་པ་ཡང་དར་གྱི་དུས་མགོ་ཙམ་ལ་ཤིང་པར་དུ་བཏབ་ཅིང་།

མདོ་སྨད་ཕྱོགས་ཀྱི་དགོན་སྡེ་མང་པོར་བཀྲམ་པའི་གནས་ཚུལ་དང་དེ་བཞིན་ཤིང་པར་དུ་བཏབ་པའི་བསླབ་བྱ་འདི་ཉིད་ཀྱི་ཡིག་གཟུགས་དང་པར་རྐོ་པའི་ལོ་རྒྱུས་སོགས་ལ་ཡིག་ཚང་ཞིབ་འཇུག་གི་རིན་ཐང་སོགས་ཡོད་པར་བསྒྲུབས་ཡོད། འདི་ནི་ཡུལ་དངོས་བརྟག་དཔྱད་ཀྱི་ཐབས་ལམ་ལ་བརྟེན་ནས་ཞིབ་ཏུ་དཔྱད་པའི་འབྲས་བུར་མཐོང་ཆོག

[གནད་ཚིག] བློ་བཟང་སྙན་གྲགས། གཡོན་རུའི་བསླབ་བྱ། གནའ་དཔེ། ཤུལ་བཞག

དང་པོ། མཛད་པ་པོའི་ལོ་རྒྱུས་མདོར་བསྡུས།

མཛད་པ་པོའི་ལོ་རྒྱུས་སྐོར་ལ། མདོ་སྨད་གཡོན་རུའི་ལོ་རྒྱུས་ལས། གཡོན་རུ་ཚང་སྐུ་ཕྲེང་བདུན་པ་བློ་བཟང་སྙན་གྲགས་རྒྱ་མཚོ་ནི་བོད་རབ་བྱུང་བཅུ་བཞི་པའི་ཆུ་སྦྲུལ（1833ལོ）ལོར་གཡོན་རུ་སྡེ་བར་ཡབ་ཚེ་ཐར་དང་ཡུམ་མཁའ་འགྲོ་གཉིས་ཀྱི་སྲས་སུ་སྐུ་འཁྲུངས། ལཱ་མོ་བདེ་ཆེན་དགོན་དུ་སློབ་གཉེར་གནང་། དཔོན་སློབ་གསེར་ཁང་པ། ཐར་ཤུལ་དཔོན་སློབ་སོགས་ལས་ཆོས་གསན། བཀྲ་ཤིས་འཁྱིལ་དུ་རྗེ་ཤེས་རབ་རྒྱ་མཚོའི་ཞབས་ལ་གཏུགས། མཁས་གྲུབ་ཆེན་པོ་ཤིང་བཟའ་རྡོ་རྗེ་འཆང་གི་དྲུང་དུ་མདོ་སྔགས་ཀྱི་གཞུང་ལས་བརྩམས་པའི་དྲི་བ་མང་དུ་ཞུས། དེ་མིན་ཀུན་རིག་དབང་ཆེན། གྲུབ་ཆེན་དྲིལ་བུ་པའི་ལུགས་ཀྱི་བདེ་མཆོག་གི་ཕྱི་དཀྱིལ་ལྷ་ལྔའི་དབང་། ལུས་དཀྱིལ་ལྷ་རེ་གཉིས་པའི་དབང་།རི་བོ་དགེ་ལུགས་པའི་ཟབ་ཆོས་ཐུན་མོང་མ་ཡིན་པ་སྔགས་བླ་མེད་ཀྱི་རྫོགས་རིམ་ཆེན་པོ་བརྒྱད་ཀྱི་ཁྲིད་རྒྱུན། རྗེ་ཙོང་ཁ་པས་རྗེ་བཙུན་སྣར་ཐང་པ་ཤེས་རབ་སེང་གེ་ལ་སྙན་བརྒྱུད་དུ་བསྩལ་པའི་གསང་འདུས་འཕགས་ལུགས་ཀྱི་རྫོགས་རིམ་རིམ་ལྔ། གསང་འདུས་འཇམ་པའི་རྡོ་རྗེའི་རྫོགས་རིམ་ཐིག་ལེ་བཞི་ལྡན། བདེ་མཆོག་ལཱུ་ཨི་པའི་རྫོགས་རིམ་རིམ་ལྔ། འཇིགས་བྱེད་རྫོགས་རིམ་རྣལ་འབྱོར་བཞི། འཁོར་ཆེན་རྫོགས་རིམ་བྱིན་རླབས་བཞི་ལྡན། དུས་འཁོར་རྫོགས་རིམ་སྦྱོར་བ་ཡན་ལག་དྲུག མ་རྒྱུད་ཀུན་ལ་སྦྱར་ཆོག་པ་ནཱ་རོ་ཆོས་དྲུག་གི་ཁྲིད་སོགས་དབང་བཀའ་མང་དུ་ཞུས་པས་རྗེ་དེ་ཉིད་ཀྱི་ཐུགས་སྲས་ཆེན་པོར་གྱུར། ལཱ་མོ་གྲགས་རྒན་ཚང་གི་ཡོངས་འཛིན་དུ་བཞུགས་ཏེ་ཁོང་ལ་ཡི་གེ་སྦྱོར་ཀློག བསྡུས་གྲྭ་བློ་རྟགས། ལམ་རིམ་བློ་སྦྱོང་སོགས་ཀྱི་ཁྲིད་དང་རྡོ་རྗེ་ཕྲེང་བའི་དབང་། བརྒྱད་སྟོང་པ། ལམ་རིམ་ཆེན་མོ། འགྲེལ་པ་བཞི་སྦྲགས་ཀྱི་བཤད་ལུང་སོགས་མང་དུ་བསྩལ། སྐུ་ཕྱོགས་ཤིང་བཟའ་རྡོ་རྗེ་འཆང་སྐུ་མྱ་ངན་ལས་འདས་དུས་ཐུགས་དམ་གསལ་འདེབས་དང། སྤྲུལ་སྐུ་མྱུར་འབྱོན་ཡང་བརྩམས། མགུར་དང་བདེ་ཆེན་གྱི་ཁྲིར་ལོ་མང་པོར་བཞུགས། བདེ་ཆེན་ཁྲི་རབས་སོ་གསུམ་པའོ། །ལོ་རྒྱུས་སུ་སྣང་རའི་སྟོང་དཔོན་བློ་བཟང་ཉི་མ་དང་འགལ་སྡུམ་པ་བན་ཐར་གཉིས་མ་འཆམ་པར་གཡོན་རུ་ཚང་བློ་བཟང་སྙན་གྲགས་རྒྱ་མཚོས་ཞི་བའི་ཐབས་ཀྱིས་འགལ་སྡུམ་བྱས་ཏེ་སྡེ་མི་ཡོངས་རྫོགས་སྲོག་ཉན་ལས་ཐར་བའི་ལམ་དུ་བཀོད་པས། དེ་དུས་སྐྱ་སེར་མང་ཚོགས་བྱིངས་ནས་ཁོང་ལ་རྗེས་སུ་ཡི་རང་བྱས་པར་གྲགས། དུས་སྐབས་དེར་ཡུལ་ཕྱོགས་འདི་ན་གཡོན་རུ་དཔོན་སློབ་རྗེ་བཙུན་བློ་བཟང་སྙན་གྲགས་དཔལ་བཟང་པོའི་འཕྲིན་ལས་ཆེས་ཆེར་རྒྱས་ཡོད་པས་ཀུན་གྱིས་སྤྱི་བོའི་གཙུག་ཏུ་བཀུར་ཏེ་སྣང་ར་གསེར་ཁང་དུ་ཁོང་གི་ཕྱག་ལས་གནང་སའི་གཟིམ་ཁང་ཞིག་གསར་དུ་བཞེངས་པ་དང་ཁོང་སྤྱན་དྲངས་ཏེ་ལོ་དུ་མར་བླ་དཔོན་གཉིས་ཀྱི་ཚབ་མཛད་ནས་བཞུགས་ཟེར།

དུས་རབས་བཅུ་དགུ་པའི་ལོ་རབས་བདུན་ཅུའི་ནང་ལྷ་ས་སྡེ་བ་དང་ཚོ་བཞིའི་སྦྲུལ་ལྕེ་སྡེ་བ་གཉིས་འགལ་བར་གྱུར་ནས་འཁྲུག་རྩོད་བྱས་ཏེ་ཡུན་རིང་ཕྱིན་པའི་སྐབས། གཡོན་རུ་ཚང་བློ་བཟང་སྙན་གྲགས་རྒྱ་མཚོས་གཞན་ཕན་གྱི་འཕྲིན་ལས་ལ་བརྟེན་ནས་གྱོད་གཞི་འདུམ་པར་མཛད། བདེ་ཆེན་དགོན་པའི་ལུགས་སྲོལ་ལྟར་ན་དཔོན་སློབ་ཀྱི་ཁྲི་པ་ལ་བཞུགས་པའི་དུས་ཡུན་ནི་ལོ་གསུམ་ནས་ལྔ་ཡི་བར་ཡིན་ཡང་། བློ་བཟང་སྙན་གྲགས་རྒྱ་མཚོ་ཁོང་ཉིད་དཔོན་སློབ་ཀྱི་ཁྲི་ལ་ལོ་བཅུ་ཕྲག་རིང་བཞུགས་མྱོང་བར་བཤད། ལཱ་མོ་སྐུ་ཕྲེང་བདུན་པ་དགེ་འདུན་བསྟན་འཛིན་ནོར་བུའི（1873-1927）རྣམ་ཐར་ལྷའི་རྔ་ཆེན་ལས།གསེར་གདུང་ཆེན་མོ་རྟེན་དང་བརྟེན་པ་བཅས་པ་ལོ་འདིར་ལེགས་པར་གྲུབ་པས། ལས་འདིའི་ཐོག་མཐའ་བར་གསུམ་གྱི་བྱ་གཞག་ཀུན་ལ་འགན་ཁུར་ཆེ་བཞེས་སུ་མཛད་པ་པོ་ནི། གཡོན་རུ་དཔོན་སློབ་པ་ཉིད་ཡིན་ཞིང་དེ་ཉིད་ནི་སྤྱིར་བདེ་ཆེན་རང་གི་བསྟན་སྲིད་ལ་རྒྱ་ལ་རུས་ཐོན་ཞིང་། ཁྱད་པར་ལྷ་ཁང་འདིའི་ཐོག་མཐའ་བར་གསུམ་ལ་འགན་ཁུར་ཆེ་བཞེས་ཀྱིས་ལས་གང་ལའང་རྔོ་ཐོགས་པ་བགྱིས་པའི་དྲིན་གཟོར་གསོལ་སྟོན་དྲངས་ཐོག་ཉིད་ཀྱི་བླ་བྲང་དུ་དར་ཆེན། སྤེན་ཁ། སྒེའུ་ཁུང་། སྒོ་ཆེན་ཉིས་བརྩེགས་བཞག་ཆོག་པ་སོགས་ཀྱི་གཟེངས་བསྟོད་ཕུལ་ཞེས་པ་ལྟར་ན། གཡོན་རུ་པ་བློ་བཟང་སྙན་གྲགས་རྒྱ་མཚོ་བདེ་ཆེན་དགོན་པའི་ཁྲི་པ་དཔོན་སློབ་ལ་བཞུགས་པའི་རྗེས་སུ་ཆོས་སྲིད་གཉིས་ཀའི་སྐྱོང་ཁུར་བཞེས་ཏེ་གསེར་གདུང་ཆེན་མོ་བཞེངས་གྲུབ་བྱུང་བར་བརྟེན། ཁོང་གི་མཛད་རྗེས་ལ་ཆེད་དུ་དམིགས་ནས་དགོན་གཞུང་གིས་གསོལ་སྟོན་བཤམས་ནས་བླ་ན་མེད་པའི་གཟེངས་བསྟོད་མཛད། དེ་ནས་བཟུང་ཁོང་གི་ཆེ་རྟགས་བླ་བྲང་གི་ཁར་སྤེན་ཁ་བྱས་ཆོག་པ་དང། སྒེའུ་ཁུང་དང་སྒོ་ཆེན་ཉིས་བརྩེགས་བཞག་ཆོག་པར་བྱས། མཐར་རབ་བྱུང་བཅོ་ལྔ་པའི་ཤིང་ཡོས་ལོར（1915ལོ）གཟུགས་སྐུའི་བཀོད་པ་བསྡུས་པའི་ཚུལ་བསྟན་ཏོ། ། ཞེས་པ་ནི་ཡོངས་གྲགས་ཀྱི་མཛད་པའི་ལོ་རྒྱུས་ཡིན་ཞིང་། གཞན་ཡང་འཕགས་པ་བརྒྱད་སྟོང་པ། ལམ་རིམ་ཆེན་མོ། འགྲེལ་པ་བཞི་སྦྲགས་རྣམས་ཀྱི་ཞལ་ལུང་། རྡོར་ཕྲེང་གི་དབང་སོགས་ཀྱི་འཆད་སྤེལ་རྒྱ་ཆེ། སྡོམ་གསུམ་རྣམ་བཤད་སོགས་བརྩམས་ཆོས་མང་། ཁོང་གི་སྐུ་ཚེ་སྨད་ལ་སྐུ་གོང་མའི་རྣམ་ཐར་བདག་གིར་བཞེས་ཏེ་གསའ་ལུང་སྒོམ་ཁང་དུ་བཞུགས་ནས་བསྙེན་བསྒྲུབས་ཡུན་རིང་མཛད། ཁོང་གི་འཆད་ཉན་གྱི་སློབ་དཔོན་ནི་ཨ་རིག་དགེ་བཤེས་ཆེན་མོ་བྱམས་པ་འོད་ཟེར་ཚང་ཡིན་ཞིང་། ཁོང་གི་སློབ་མ་ལ་གྲགས་རྒན་སྐུ་ཕྲེང་གསུམ་པ་བློ་བཟང་བསྟན་པའི་རྒྱལ་མཚན་དང། རྗེ་གསེར་ཁང་། སུམ་པ་སྤྲུལ་སྐུ། ལཱ་མོ་ཚང་གི་སྐབས་དེའི་བླ་སྤྲུལ་རྒན་གཞོན་ཡོངས་ལའང་དབང་ལུང་མན་ངག་གིས་ཚིམས་པར་མཛད་པ་སོགས་ཀྱང་ད་ལྟའི་བར་ངག་བརྒྱུད་དང་རྣམ་ཐར་འགའ་རུ་གསལ་བ་ཇི་བཞིན་ནོ། །

གཉིས་པ། པར་གཞིའི་གནས་ཚུལ་དང་ཞིབ་འཇུག་གི་རིན་ཐང་།

གཅིག པར་གཞིའི་གནས་ཚུལ།

ཡོངས་ཁྱབ་ཏུ་གཡོན་རུའི་བསླབ་བྱར་བསྔགས་པའི་བསྟན་བཅོས་འདིའི་མཚན་ཡོངས་ལ། 《འཛིན་ཆོས་སུ་བདེ་བའི་ཕྱིར་སྡོམ་པ་གསུམ་གྱི་ཚིག་ཕྱོགས་གཅིག་ཏུ་བསྒྲིགས་པ་བཞུགས་སོ》ཞེས་དང་། མཚན་གྱི་རྣམ་གྲངས་གཞན་ལ《སྡོམ་པ་གསུམ་གྱི་རྣམ་བཤད་ཉམས་ལེན་རྒྱུན་འཁྱེར》ཞེས་ཀྱང་གསལ། སྔོན་བརྩམས་གྲུབ་པའི་སྐབས་སུ། བསླབ་བྱ་དེ་ཉིད་ཀྱི་མཇུག་བྱང་དུ། སྡོམ་པ་གསུམ་གྱི་རྣམ་བཤད་ཉམས་ལེན་རྒྱུན་འཁྱེར་འདི་ནི་དཀར་པོའི་ཕྱོགས་ལ་བློ་གྲོས་ཀྱི་རྩལ་དང་ལྡན་ཞིང་། སྡོམ་པ་གསུམ་ལ་ཉམས་ལེན་ཆིག་དྲིལ་དུ་བྱེད་པ་རང་གི་སློབ་བུ་དགེ་སློང་དཔལ་ལྡན་སྙན་གྲགས་ཀྱིས་རབ་དཀར་ལྷ་རྫས་དང་བཅས་ཡང་ཡང་བསྐུལ་བ་ལ་བརྟེན་ནས། རང་དང་སྐལ་མཉམ་འགའ་ལ་ཕན་འདོད་དང་། རང་གི་བརྗེད་བྱང་སོགས་ཀྱི་ཆེད་དུ་རྗེ་ཡབ་སྲས་ཀྱི་ལེགས་བཤད་ནས་བཏུས་ཏེ་རིག་གནས་ཆེ་ཆུང་ཕལ་ཆེར་ལ་ཅུང་ཟད་སྦྱངས་པ་སྟེ་བཙུན་པའི་གཟུགས་བརྙན་དཔོན་སློབ་གཡོན་རུའི་མིང་ཅན་གྱིས། རབ་བྱུང་བཅུ་བཞི་པའི་ནང་ལོ་ཉག་མ་དྲུག་པ་དྲག་པོ་ཞེས་པ་ལྕགས་སྤྲེལ་ལོའི་སྣྲོན་ཟླ་བའི་ཡར་ཚེས་བཟང་པོ་ལ་རང་བཟོ་སྤངས་ཏེ་སྦྱར་བའི་ཡི་གེ་པ་ཡང་དགེ་སློང་དེ་ཉིད་ཡིན་ཞིང་། ཞེས་པ་བཞིན། ཁོང་གི་སློབ་བུ་དགེ་སློང་དཔལ་ལྡན་སྙན་གྲགས་ཀྱིས་ཡི་གེར་ཕབ་པ་གཞིར་བྱས་ཏེ། ལག་བྲིས་ཀྱི་རྣམ་པས་དར་ཁྱབ་བྱུང་བར་བཤད། བསྟན་པ་ཡང་དར་གྱི་དུས་མགོ་ཚུགས་ཙམ་སྟེ། ཏང་གི་ཡང་དག་པའི་ཆོས་ལུགས་སྲིད་ཇུས་དངོས་འབེབས་ལག་བསྟར་བྱས་དང་བྱེད་བཞིན་པའི་སྐབས་ཤིག་ཏུ། གཡོན་རུའི་སློབ་དཔོན་སྐུ་ཕྲེང་བརྒྱད་པ་བློ་བཟང་བསྟན་པ་རྒྱ་མཚོས་རྒྱུ་འབྱོར་སོགས་མཐུན་རྐྱེན་ལེགས་པོར་བསྐྲུན་ཏེ། 1983ལོར་བསླབ་བྱ་དེ་ཉིད་ཤིང་པར་དུ་འདེབས་པའི་དབུ་བརྩམས། 1984ལོའི་ཟླ9པའི་ཚེས12ཉིན་གཡོན་རུའི་སློབ་དཔོན་སྐུ་ཕྲེང་བརྒྱད་པ་བློ་བཟང་བསྟན་པ་རྒྱ་མཚོ་ཚང་ཞིང་གཞན་དུ་གཤེགས་པས་བསླབ་བྱ་ཤིང་པར་དུ་འདེབས་པའི་ཐུགས་བཞེད་ལས་འཕྲོ་ཅན་དུ་གྱུར། དེ་ནས་སློབ་དཔོན་ཁོང་གི་དབོན་པོ་དགེ་འདུན་རྒྱ་མཚོ་ལགས་ཀྱིས་བསླབ་བྱ་པར་དུ་འདེབས་པའི་ཕྱག་ལས་ཀྱི་འཕྲོ་ལེགས་པར་བསྐྱངས་པར་མ་ཟད། ལོ་ངོ་གསུམ་ཙམ་གྱི་རིང་ལ་པར་རྩ་བརྐོ་བ་སོགས་ཡོངས་སུ་རྫོགས་པ་ལེགས་པར་གྲུབ་པར་བྱས་ལ། ཁོང་རྡོ་རྗེ་འཆང་ལཱ་མོ་ཡོངས་འཛིན་རིན་པོ་ཆེའི་སྤྱན་སྔར་ཕུལ་ཏེ་ཞུས་དག་སྤྱན་འབེབས་གནང་བ་སོགས་ཚགས་སུ་ཆུད་པའི་རྗེས། མདོ་སྨད་ཕྱོགས་ཀྱི་དགོན་ཆེན་བླ་བྲང་བཀྲ་ཤིས་འཁྱིལ་བ་དང་། བྱ་ཁྱུང་ཐེག་ཆེན་ཡོན་ཏན་དར་རྒྱས་གླིང་། ལྡེ་ཚ་བཀྲ་ཤིས་ཆོས་སྡིངས། ཐར་ཤུལ་དགོན་རྣམ་དག་ཁྲིམས་ལྡན་གླིང་། ལཱ་མོ་བདེ་ཆེན་ཆོས་འཁོར་གླིང་། ར་རྒྱ་དགོན་སོགས་སུ་བཀྲམ་སྟེ་ཁོང་སློབ་དཔོན་རིན་པོ་ཆེའི་ཐུགས་སྨོན་རྫོགས་པའི་བགྱི་བ་ལྷུར་བླངས་སོ། །

གཡོན་རུའི་བསླབ་བྱ་ཤིང་པར་མ་ནི་ཡིག་ཕྲེང་དྲུག་ཅན། ཤོག་རྒྱ་ལ52.3×9.3cmཡོད་ཅིང་། ཁྱོན་ཤོག་ལྡེབ97ཡོད་པར་ཡིག་གྲངས་ཕལ་ཆེར61700ཙམ་འདུག

གཉིས། གཡོན་རུ་བསླབ་བྱའི་པར་རྐོ་པ་དང་པར་བརྐོས་ཀྱི་རྒྱུན།

གཡོན་རུ་བསླབ་བྱའི་པར་རྐོ་པ་ནི་རེབ་གོང་ས་དཀྱིལ་ཟ་ཀི་ཞོལ་མ་ཚོ་བའི་པར་རྐོ་པ་ཆེན་མོ་དཔལ་མཁར་རྒྱལ་ཡིན་ལ། ཁོང་ནིི་རོང་བོ་དགོན་ཆེན་གྱི་གྲྭ་ཚང་དཔར་ཁང་གི་པར་རྐོ་པ་གྲགས་ཆེན་ཨ་ཁུ་འཇམ་དབྱངས་རྒྱ་མཚོའི་དགེ་ཕྲུག་ཡིན། ཨ་ཁུ་འཇམ་དབྱངས་རྒྱ་མཚོ་ནི་གྲྭ་ཚང་དཔར་ཁང་གི་པར་རྐོ་པའི་དགེ་རྒན་ཡིན་པར་མ་ཟད། ད་དུང་ལྷ་དང་དཀྱིལ་འཁོར་བཞེངས་པ་སོགས་རིག་གནས་ཀྱི་སྐོར་མང་པོར་ནང་བྱན་ཆུད་པ་དང་ལག་ལེན་དུ་ཐོན་པ་ཞིག་ཡིན་པས་ཁོང་གི་མཚན་གཞན་ལ་ཤེས་པ་སྣ་དགུ་ཞེས་ཀྱང་འབོད་སྐད།

ཞིབ་འཇུག་པ་ཡུལ་དངོས་རྟག་དཔྱད་དུ་བསྐྱོད་ནས། མགྲོན་ལུང་སྡེ་བའི་རྒྱལ་ཁབ་རིམ་པའི་གཟུགས་འདས་ཤུལ་བཞག་རིག་གནས་ཀྱི་རྒྱུན་འཛིན་པ་དང་པར་རྐོ་པ་ཆེན་མོ་ཤ་བོ་ཐར་ལགས་ལ་བཅར་འདྲི་བྱེད་དུས། ཁོང་གིས་གོང་གསལ་ལོ་རྒྱུས་སྐོར་ཞིབ་གསལ་དུ་གསུངས་པ་མ་ཟད། གྲྭ་ཚང་དཔར་ཁང་གི་པར་རྐོ་པའི་རྒྱུན་གཙོ་བོ་ནི་མགྲོན་ལུང་སྡེ་བ་ནས་བྱུང་བ་དང་།མགྲོན་ལུང་སྡེ་བའི་པར་བརྐོའི་ལག་རྩལ་ནི་ཕལ་ཆེར་སྤྱི་ལོ་དུས་རབས་བཅུ་གསུམ་པར་བྱུང་བའི་བཤད་རྒྱུན་ཡོད་ཅིང་། སྔོན་སྡེ་བ་འདིའི་གྲྭ་པ་དཔལ་བཟང་ཟེར་བ་ཞིག་ཁམས་སྡེ་དགེར་ཕེབས་ནས་པར་བརྐོས་ཀྱི་ཤེས་བྱ་དཔྱིས་ཕྱིན་པར་སྦྱངས་ནས་ཕྱིར་མགྲོན་ལུང་སྡེ་བར་ལོག་ནས་པར་བརྐོས་ཀྱི་ལག་རྩལ་སྤེལ་བར་གསུངས།

གསུམ། ཞིབ་འཇུག་གི་རིན་ཐང་སོགས།

གོང་གསལ་ལོ་རྒྱུས་གནས་ཚུལ་གཞིར་བཟུང་ནས་དཔྱད་པ་ཅུང་ཟད་བཏང་ན། གཡོན་རུའི་བསླབ་བྱ་འདི་མཛད་པ་པོས་དགོས་དབང་ཁྱད་པར་བ་ལ་དམིགས་ནས་གསར་དུ་མཛད་ནས་བཟུང་འཕྲིན་ལས་ཆེར་རྒྱས་ཏེ་སྙན་གྲགས་ས་ཕྱོགས་མང་པོར་ཁྱབ་པ་ཞིག་ཏུ་གྱུར་མྱོང་ནའང་།

ཡུལ་དུས་ཀྱི་ཚད་བཀག་སྣ་ཚོགས་ཀྱི་དབང་གིས་དུས་ཡུན་ངེས་ཅན་ནང་པར་དུ་འདེབས་མ་ནུས་པར་ལུས། ད་སྐབས་ས་གནས་ཤུལ་བཞག་རིག་གནས་འདི་ས་གནས་གནའ་དཔེ་ཉར་ཚགས་དང་ལེགས་སྒྲིག་སྲུང་སྐྱོབ་ཀྱི་གྲས་སུའང་མ་ཚུད་པར་ལུས་པའི་གནས་སུ་གྱར་ཡོད། གནའ་དཔེ་འདིར་མདོ་སྨད་ཡུལ་གྱི་དུས་སྐབས་ཤིག་གི་ཆོས་རྒྱུན་སློབ་བརྒྱུད་ཀྱི་འཕེལ་འགྱུར་ལ་ཞིབ་འཇུག་བྱེད་པར་ཡིག་ཚང་གི་རིན་ཐང་ཆེས་ཆེར་ལྡན་པ་མ་ཟད། ད་དུང་མདོ་སྨད་ཙོང་ཁའི་ཡུལ་གྱི་ས་གནས་ལོ་རྒྱུས་དང་སྤྱི་ཚོགས་འབྲེལ་འདྲིས་དང་མཉམ་གནས། རིག་གནས་ལག་རྩལ་གྱི་རྒྱུན་འཛིན་དང་ཐ་ན་ཡུལ་ལུང་བྱེ་བྲག་པའི་འཚོ་བའི་གོམས་སྲོལ་སོགས་རིག་ཚན་མང་པོའི་ངོས་ཐད་ནས་ཞིབ་འཇུག་རིན་ཐང་གཞལ་དུ་མེད་པ་ལྡན་པར་འདོད། །

* བཀྲ་ཤིས་ཚེ་བརྟན། གཅན་ཚ་རྫོང་རིག་གནས་ཁང་དུ་ཕྱག་ལས་གནང་བཞིན་ཡོད།

* དོན་གྲུབ་ཚེ་རིང་། མཚོ་སྔོན་དགེ་འོས་སློབ་ཆེན་རིག་གཞུང་དུས་དེབ་རྩོམ་སྒྲིག་ཁང་དུ་ཕྱག་ལས་གནང་བཞིན་ཡོད།