མི་སྣའི་བྱ་བྱེད་འབྲི་སྟངས་གླེང་བ།

[གནད་བསྡུས] གསོན་ཉམས་ལྡན་ཞིང་དཔེ་རུ་བཀོད་པའི་ཚིག་དང་སྐད་ཆ་ལ་བརྟེན་ནས་མི་སྣའི་བྱ་བྱེད་ཞིབ་ཅིང་ཕྲ་བའི་སྒོ་ནས་བྲིས་ན། རྩོམ་ཡིག་གི་ཤན་སྟོབས་ཇེ་དྲག་ཏུ་གཏོང་བ་དང་། རྩོམ་གྱི་བརྗོད་བྱའི་སྙིང་བོ་འབུར་དུ་ཐོན་པར་བྱེད་ཐུབ། དེའི་རྐྱེན། དཔྱད་རྩོམ་འདིར་མི་སྣའི་བྱ་བྱེད་ཞིབ་འབྲི་བྱེད་ཐབས་གསུམ་བརྗོད་པ་ལ། ལེགས་རྩོམ་རེ་འགའ་ལས་དཔེར་བརྗོད་བདམས་ཏེ་དཔྱད་པ་བཏང་ཡོད།

[གནད་ཚིག] བྱ་བྱེད། མི་སྣ། ཞིབ་འབྲི།

བྱ་བྱེད་ཞིབ་འབྲི་ཞེས་པ་ནི་མི་སྣའི་བྱ་སྤྱོད་དང་འགུལ་སྟངས་སོགས་ཞིབ་འབྲི་བྱེད་པ་ལ་ཟེར། མི་སྣས་བྱ་བ་སྒྲུབ་བཞིན་པ་དང་དེ་སྒྲུབ་པའི་བརྒྱུད་རིམ་སོགས་ཞིབ་འབྲི་བྱས་པ་བརྒྱུད་ནས། མི་སྣའི་གཤིས་ཀའི་ཁྱད་ཆོས་དང་བསམ་པའི་འཁྱེར་སོ་སོགས་མཚོན་པ་དང་།མི་སྣའི་བསམ་བློ་དང་། གཤིས་རྒྱུད། སེམས་ཁམས། གོམས་གཤིས་སོགས་ཀྱི་ཁྱད་ཆོས་འབུར་དུ་ཐོན་པར་བྱེད་དགོས་པ་དེ་ཡིན། དེ་ཡང་མཐར་གཏུགས་ན་རང་བྱུང་ཁོར་ཡུག་དང་སྤྱི་ཚོགས་ཁོར་ཡུག་མི་འདྲ་བའི་ཁྲོད་མི་སྣའི་རང་གཤིས་མི་འདྲ་བ་རྣམས་འབུར་དུ་ཐོན་པར་བྱས་ཏེ། རང་རྐྱ་འཕེར་བའི་མི་སྣ་གང་རུང་གི་སྣང་བརྙན་གསོན་པོ་ཞིག་ཀློག་པ་པོའི་མིག་ལམ་དུ་ཧྲིལ་གྱིས་སྟོན་པར་བྱེད་པ་དེ་ཡིན་པས། གཙོ་བོ་མི་སྣའི་གཤིས་ཀ་དང་བསམ་བློ་མཚོན་པའི་ཐད་ལ་ཆེས་མངོན་གསལ་གྱི་ཁྱད་ཆོས་ལྡན་པའི་བྱ་བྱེད་དག་གནད་དུ་བཟུང་ནས་འབྲི་དགོས་པ་དང་། བྱ་སྤྱོད་དང་སེམས་འགྱུ་མཚོན་པའི་མིང་དང་ཚིག་དག་འོས་འཚམ་གྱིས་གདམ་གསེས་ཡོད་པའི་སྒོ་ནས་བཀོལ་ཏེ། མི་སྣའི་སྣང་བརྙན་གཟུགས་ཅན་བཞིན་དུ་མཚོན་པར་བྱེད་པ་ལ་རམ་འདེགས་ཀྱི་ནུས་པ་འདོན་དགོས་པ་དེ་ཡིན། མི་སྣའི་བྱ་བྱེད་ཞིབ་འབྲི་བྱེད་པ་ནི་མི་སྣའི་རང་གཤིས་མངོན་པར་བྱེད་པ་དང་མི་སྣའི་སྣང་བརྙན་གསར་བཞེངས་བྱེད་པའི་ཐབས་ལམ་གཙོ་བོ་ཞིག་ཡིན། དེ་བས་མི་སྣའི་བྱ་བྱེད་ཇི་ལྟར་ཞིབ་འབྲི་བྱེད་དགོས་ཤེ་ན།

གཅིག བྱ་ཚིག་བཀོལ་ནས་མི་སྣའི་བྱ་བྱེད་ཞིབ་འབྲི་བྱེད་ཐབས།

“ང་ཚོས་དོན་གང་ཞིག་སྣང་བརྙན་གྱི་སྒོ་ནས་སྟོན་དགོས་ན་བྱ་ཚིག་རེ་རེ་དང་ཐ་སྙད་རེ་རེ་འདེམ་གསེས་བྱེད་དགོས”①ཞེས་གསུངས་པ་ལྟར། བྱ་ཚིག་བཀོལ་ཤེས་ན་མི་སྣའི་གཤིས་ཀའི་ཁྱད་ཆོས་ལེགས་པར་མཚོན་ཐུབ་ལ། མི་སྣ་བར་གྱི་བརྩེ་དུང་སྔར་བས་ལེགས་པར་བརྒྱུད་སྤྲོད་བྱེད་ཐུབ་པ་དང་། མི་སྣའི་སེམས་ཀྱི་འགྱུར་བ་སྔར་བས་ལེགས་པར་མཚོན་ཐུབ། དེར་བརྟེན། མི་སྣའི་སྣང་བརྙན་བཞེངས་སྐྲུན་བྱེད་སྐབས། བྱ་ཚིག་གི་བཀོལ་སྤྱོད་ཐད་ཧུར་བརྩོན་བྱས་ན། མི་སྣའི་སྣང་བརྙན་ཡང་དག་པའི་སྒོ་ནས་ཞིབ་འབྲི་བྱེད་ཐུབ། འདིའི་སྐབས་ཀྱི་ཡང་དག་པ་ཞེས་པ་ནི་གཅིག་ནས་མི་སྣའི་ཁྱད་ཆོས་མཚོན་ཐུབ་ལ། གཉིས་ནས་འཚོ་བའི་དོན་དངོས་དང་མཐུན་པ་ཞིག་ཡིན་དགོས་པ་དེ་རེད། མི་སྣ་མི་འདྲ་བ་དེ་ཁོར་ཡུག་མི་འདྲ་བའི་ནང་དེའི་བྱ་བྱེད་ཀྱི་ཁྱད་ཆོས་ཀྱང་མི་འདྲ། མི་སྣའི་བྱ་བྱེད་འབྲི་སྐབས་དངོས་ཐོག་བདེན་འཚོལ་བྱེད་དགོས་ཏེ། མི་སྣས་བྱ་བ་ཇི་ལྟར་ལས་ན་དེ་ལྟར་བྲིས་ནས་འཚོ་བ་དངོས་ཇི་མ་ཇི་བཞིན་མཚོན་པར་བྱེད་དགོས། རྩོམ་ཡིག་འབྲི་སྐབས་ཡིག་འབྲུ་བསྡུས་ཤིང་གནད་ལ་ཁེལ་བའི་རྨང་གཞིའི་ཐོག མི་སྣའི་བྱ་བྱེད་རྣམ་འགྱུར་ལེགས་པར་བཟུང་ནས་མི་སྣའི་རང་གཤིས་མངོན་གསལ་དོད་པོས་མཚོན་ཐུབ་དགོས། དེ་བས་དུས་རྒྱུན་གྱི་འཚོ་བའི་ཁྲོད་དུ། ང་ཚོས་ཉེ་འཁོར་གྱི་མི་སོ་སོའི་བྱ་བྱེད་ལ་ལྟ་ཞིབ་ཡག་པོ་བྱས་ཏེ།ཁོ་ཚོའི་ཁྱད་ཆོས་ལེགས་པོར་བརྟགས་ནས་ནན་ཏན་གྱིས་ཞིབ་འབྲི་བྱས་ཏེ། མི་སྣའི་སྣང་བརྙན་ལ་སྔར་བས་གསོན་ཤུགས་ལྡན་པར་བྱ་དགོས། དཔེར་ན། ཀྲུའུ་ཚི་ཆིང་གི 《རྒྱབ་གཟུགས》 ལས།“（ཁོས）ལྗིད་ཏིག་ཏིག་གི་གོམ་པ་འཁྱར་འཁྱོར་དུ་སྤོ་བཞིན་ལྕགས་ལམ་གྱི་འགྲམ་དུ་སོང་། ལུས་པོ་སྒུར་ནས་དལ་བ་དལ་བོར་མར་བབས་ན། དེ་འདྲའི་དཀའ་བ་མེད་ཀྱང་། ཁོང་ལྕགས་ལམ་བརྒལ་ནས་འབབ་ཚིགས་སྟེགས་བུའི་ཐོག་ཏུ་འགྲོ་བ་ནི་སླ་མོ་ཞིག་ག་ལ་ཡིན། ཁོང་གིས་ཕྱག་ཟུང་ལ་བརྟེན་ནས་ཡར་འགོས་ཤིང་ཞབས་གཉིས་ཡར་བསྐུམས་པ་ན།ཁོང་གི་ཤུན་ཏུ་རྒྱགས་པའི་སྐུ་གཡོན་དུ་ཅུང་ཟད་གསེག་འདུག་ལ། དེར་བལྟས་ན་ངལ་བ་ཁྱད་གསོད་བྱེད་པའི་ངང་ཚུལ་ཝ་ལེར་མཐོང་ཐུབ།དུས་དེར་བདག་གིས་ཁོང་གི་རྒྱབ་གཟུགས་མཐོང་ནས་ཁྲ་ཆུང་མིག་ལས་མཆི་མའི་ཐིགས་པ་དབང་མེད་དུ་ལྷུང་།”ཞེས་པའི་ཚན་པ་འདིའི་ནང་བརྗོད་པར་བྱ་བ་ནི་རྩོམ་པ་པོས་ཨ་ཕ་ཚ་ལུ་མ་ཉོ་བར་འགྲོ་དུས། ཁོང་གི་ལུས་རྒྱགས་པོ་ཡིན་པས་འགྲོ་འདུག་སྟབས་མི་བདེ་ནའང་བུ་ལ་ཚ་ལུ་མ་ཉོ་བའི་ཆེད་དུ་ལྕགས་ལམ་ཐོག་ནས་མར་བབས་པ་དང་།

འབབ་ཚིགས་སྟེགས་བུའི་ཐོག་ཏུ་ཡར་འཛེགས་པའི་ངལ་དུབ་ཀྱི་ངང་ཚུལ་ཞིབ་འབྲི་བྱས་ཡོད། དེའི་ཁྲོད་ཀྱི“འགོས”དང“བསྐུམས”“གསེག”སོགས་བྱ་ཚིག་གང་མང་གིས་ཨ་ཕས་བུ་ལ་བཅངས་པའི་ལྷད་མེད་ཀྱི་བརྩེ་དུང་དེ་ཤུགས་ནས་མཚོན་ཡོད་ལ། རྩོམ་པ་པོས་ཨ་ཕས་ཚ་ལུ་མ་ཉོ་སྐབས་ཀྱི་བྱ་བྱེད་འགུལ་སྟངས་སོགས་ཇེ་ཞིབ་ཏུ་བཏང་ནས་བྲིས་ཡོད་པས། འགྲོ་འདུག་སྟབས་མི་བདེ་བའི་ཨ་ཕ་ཞིག་གིས་བུ་ཕྲུག་ལ་བཅངས་པའི་བརྩེ་སེམས་ང་ཚོ་ཀློག་པ་པོའི་ཡིད་ངོར་གློག་བརྙན་བཞིན་འཆར་རྒྱུ་ཡོད་པས། ཚན་པ་ཧྲིལ་བོར་སེམས་འགུལ་ཐེབས་བྱེད་ཀྱི་བརྩེ་བ་ཟབ་མོ་ཞིག་ལྡན་ཡོད་པ་དང་། མི་སྣའི་བྱ་བྱེད་བྲིས་པ་དེས་རྩོམ་གྱི་བརྗོད་བྱའི་སྙིང་བོ་འབུར་དུ་ཐོན་པར་རམ་འདེགས་བྱས་ཡོད།

གཉིས། ཕྲ་ཞིབ་ཀྱི་སྒོ་ནས་མི་སྣའི་བྱ་བྱེད་ཞིབ་འབྲི་བྱེད་ཐབས།

མི་ཞིག་གི་བསམ་བློ་དང་། གཤིས་རྒྱུད། སྤྱོད་ཚུལ་སོགས་རྟག་ཏུ་མི་དེའི་བྱ་བྱེད་ཀྱི་ཐོག་ནས་མཚོན་གྱི་ཡོད། “བྱ་བྱེད་ཕྲ་ཚགས”དེ་དག་གིས་མི་སྣའི་ཁྱད་ཆོས་ལ་སྐབས་རེར་ནུས་པ་ཆེན་པོ་ཐོན་གྱི་ཡོད།“བྱ་བྱེད་ཕྲ་ཚགས”དེ་དག་ནི་མི་སྣའི་བྱ་སྤྱོད་ཀྱི་ཞིབ་ཕྲའི་གནས་ཚུལ་ཡིན། རྩོམ་ཡིག་འབྲི་སྐབས་རྩོམ་པ་པོས་མི་སྣའི་བྱ་བྱེད་ཀྱི་ཞིབ་ཆ་དག་འབྲི་མཁས་པར་བྱས་ཚེ་མི་སྣའི་སྣང་བརྙན་བཞེངས་སྐྲུན་ལ་དེ་བས་བདེན་ཤུགས་ཆེ་ཞིང་གསོན་ཉམས་ལྡན་ལ། མི་སྣའི་རང་གཤིས་ཀྱི་ཁྱད་ཆོས་དེ་བས་མངོན་གསལ་དོད་པོ་ཡོང་ཐུབ་པ་རེད། བྱ་བྱེད་ཞིབ་འབྲི་བྱེད་སྐབས་མི་སྣའི་བྱ་བྱེད་འགུལ་སྟངས་གསལ་བོར་འབྲི་དགོས་པ་མ་ཟད། མི་སྣའི་འགུལ་སྟངས་དང་།རྣམ་འགྱུར། ལུས་ཀྱི་ཉམས་འགྱུར་སོགས་ཟུང་འབྲེལ་བྱས་ནས། བྱ་བྱེད་དེ་དག་གནས་ཚུལ་ཅི་འདྲ་ཞིག་གི་འོག་ཏུ་སྤེལ་བ་དང་ཇི་ལྟར་སྤེལ་བར་བསམ་བློ་གཏོང་དགོས། དཔེར་ན། 《རྗེ་མི་ལའི་རྣམ་འགུར》ལས།“ཨ་མས་ནང་ན་ཡས་རྔོད་ཀྱིན་ཡོད་པས་ཐོས་ནས། ཅི་ཟེར་སྐད་འདི་ནི་ངའི་བུའི་སྐད་འདྲ། ངེད་མ་སྨད་ལས་སྡུག་པ་ནི་ས་ཐོག་ན་མེད་པས། ཁོ་ནི་གླུ་ལེན་མི་ཐང་སྙམ་ནས་ཡིད་མ་ཆེས་པར་བལྟས་པས། ང་ཡིན་པར་ཤེས་ནས་ཧ་ལས་ཏེ། སྐམ་པ་གཡས་སུ་བོར། ཡོས་དཀྲུག་གཡོན་དུ་བོར། ཡོས་རྔོད་འཕྲོ་འཚིག་ཏུ་བཅུག ལག་པ་གཡས་སུ་ཡོག་པ་ཞིག་ཁྱེར། གཡོན་དུ་ཐལ་བ་སྤར་མོ་གང་ཁྱེར།སྐས་རིང་བ་ལས་བབས། ཐུང་བ་ལས་མཆོངས་ནས་ཕྱིར་ཐོན་བྱུང་སྟེ། ཐལ་བ་དེ་གདོང་ལ་བཏབ། ཡོག་པ་དེས་མགོ་ལ་ལན་འགའ་བརྒྱབ་ནས། ཡབ་མི་ལ་ཤེས་རབ་རྒྱལ་མཚན་ལ་བུ་འདི་འདྲ་སྐྱེས་སོ། ། ཁྱེད་རབས་ཆད་གདའ་བ། ངེད་མ་སྨད་ཀྱི་ལས་སྐལ་ལ་གཟིགས་དང་ཟེར་ཨ་མ་ཡུད་ཅིག་བརྒྱལ་ནས་འགྱེལ་འདུག་པའི་ཚེ།”ཞེས་པའི་ཚན་པ་འདིར་ཡུམ་མྱང་ཚ་དཀར་རྒྱན་གྱིས་རང་གི་བུ་ཐོས་པ་དགས་གླུ་ལེན་བཞིན་ཡོང་བའི་བྱ་བྱེད་དེ་མཐོང་མ་ཐག ཡིད་གཏིང་ནས་མ་དགའ་བར་ཁོང་ཁྲོ་ནི་ཐོལ་གྱིས་འཕྱུར་བའི་མེ་རི་བཞིན་གཞོམ་ཐབས་མེད་པར་གྱུར་ནས། དེ་མ་ཐག་མཆོངས་ནས་ཐོན་ཏེ་ཐོས་པ་དགར་གཅར་རྡུང་བྱས་པ་དང་། ཁོང་ཁྲོ་དང་སྡུག་བསྔལ་མཉམ་དུ་སྐྱེས་པའི་དབང་གིས་རང་ཉིད་ཀྱི་དྲན་པའང་འཐོར་བའི་སྐབས་དེའི་ཉམ་ཐག་དང་། སྡུག་བསྔལ་སོགས་འཚོ་བའི་མནར་གཅོད་ལས་བྱུང་བའི་འུ་ཐུག་ཐབས་ཟད་ཀྱི་བྱ་བྱེད་ཞིབ་བྲིས་བྱས་ཡོད། དེའི་ཁྲོད་ཡུམ་མྱང་ཚ་དཀར་རྒྱན་གྱིས་ཡོས་རྔོད་སྐབས་བུ་ཐོས་པ་དགས་གླུ་ལེན་པ་གོ་རྗེས་ཀྱི་བྱ་བྱེད་དང་། བུ་ལ་གཅར་རྡུང་བྱེད་སྐབས་ཀྱི་མགོ་མཇུག་བར་གསུམ་གྱི་གོ་རིམ་དང་བྱ་བྱེད་སོགས་ཞིབ་ཅིང་ཕྲ་བའི་སྒོ་ནས་བྲིས་པ་ལ་བརྟེན་ཏེ། ཡུམ་མྱང་ཚ་དཀར་རྒྱན་གྱི་ཡིད་སྐྱོ་བའི་སྣང་བརྙན་དང་། ཨ་ཁུ་དང་ཨ་ནེ་གཉིས་ཀྱིས་ཁོང་མ་སྨད་ལ་མནར་གཅོད་ཚད་མེད་བཏང་བར་སྙིང་ནས་ཞེ་འཁོན་སློག་འདོད་ཀྱི་འདུན་པ་ཤུགས་དྲག་གམ། མྱང་ཚ་དཀར་རྒྱན་གྱི་ཆགས་སྡང་གསལ་བའི་རང་གཤིས་དེ་མོའི་བྱ་བྱེད་ཀྱི་སྟེང་ནས་མངོན་པར་བྱས་ཡོད།

གསུམ། ཚིག་རྒྱན་བཀོལ་ནས་མི་སྣའི་བྱ་བྱེད་ཞིབ་འབྲི་བྱེད་ཐབས།

སློབ་མས་རྩོམ་ཡིག་འབྲི་སྐབས་མི་སྣའི་བྱ་བྱེད་ཞིབ་འབྲི་བྱེད་དུས། འོས་འཚམ་གྱིས་ཚིག་གི་སྦྱོར་བ་ལ་རྒྱན་གྱིས་སྤྲས་ན། བྱ་བྱེད་འགུལ་སྟངས་ཀྱི་ཚད་དང་།མྱུར་ཚད་སོགས་ཞིབ་ཕྲའི་སྒོ་ནས་མཚོན་ཐུབ་པ་དང་།མི་སྣའི་སྣང་བརྙན་གསོན་ཤུགས་ལྡན་ཞིང་རང་གཤིས་ལེགས་པའི་སྒོ་ནས་མཚོན་པར་བྱས་ཏེ། རྩོམ་ཡིག་ལེགས་པོ་ཞིག་འབྲི་ཐུབ་པར་རམ་འདེགས་མི་ཉུང་བ་ཞིག་སྟེར་ཐུབ། དཔེར་ན། དཔེ་འཇོག་བྱེད་མཁས་པར་བྱས་ན་མི་སྣའི་སྣང་བརྙན་ལ་གསོན་ཉམས་ལྷག་ཏུ་ལྡན་པ་དང་།སྤོབས་པ་ཆེན་པོས་སྒྲོ་འདོགས་དང་འུད་བརྗོད་བྱས་ན་།ཀློག་པ་པོ་རྣམས་ལ་བསམ་པའི་འཆར་ཡན་མི་ཉུང་བ་ཞིག་འབྱུང་ཐུབ། ཚིག་རྒྱན་སྣ་མང་བཀོལ་མཁས་པར་བྱས་ན་རྩོམ་ཡིག་གི་ཚིག་སྦྱོར་ལ་སྙན་ཆ་ལྡན་ཞིང་དོན་གྱི་གོ་བ་ལེན་པར་རམ་འདེགས་ཀྱི་ནུས་པ་ལྡན་པ་ཡིན། དཔེར་ན། 《གཞོན་ནུ་ཟླ་མེད་ཀྱི་གཏམ་རྒྱུད》ལས།“ཞེ་སྡང་གིས་མྱོས་པའི་བཞིན་རས་ཁྲག་གིས་བྱུགས་པ་ལྟར་གྱུར་ཅིང་། དཔྲལ་བ་ནས་དཔྲལ་རྩ་གསུམ་བསྒྲེངས། ལག་པ་གཉིས་འདྲིལ་བཞིན་པར་རྟ་མཆོག་དྲག་པོར་སྐྱོད་པའི་ཤུགས་དང་བཅས་ཏེ། རྒྱང་རིང་བོར་གནས་པ་རྣམས་ལ་ནི་གནམ་རུ་རྣ་བའི་བར་དུ་བཀང་སྟེ་མདའ་བོ་ཆེའི་ལས་ལ་སྦྱར། ཉེ་བར་འོངས་པ་རྣམས་ལ་ནི་རལ་གྲི་ཨིནྡྲ་ནཱི་ལའི་ཞགས་ཐག་བརྐྱངས་པ་ལྟ་བུའི་འཕྲུལ་འཁོར་མངོན་པར་འདུ་བྱས་ཏེ། སྟོང་སྡེ་དཔུང་ཚོགས་ཀྱི་དབུས་སུ་ཚམ་ཚོམ་མེད་པར་རྒོལ་བར་ཞུགས་པ་ན། དཔེར་ན་ཉི་མའི་དཀྱིལ་འཁོར་གཅིག་ཉིད་ཤར་བས་རྒྱུ་སྐར་གྲངས་མང་འོད་སྣང་འབྱིན་པའི་མཐུ་མེད་པ་ལྟར་སྣང་བ་འབུམ་ལྡན་གྱི་དཔུང་ཚོགས་དེ་དག་གིས་འགྲན་པར་མ་བཟོད་དེ།”ཞེས་པའི་ཚན་པ་འདི་ལས་དཔའ་བོ་སྲིད་པ་གཞོན་ནུ་གཡུལ་གྱི་སྦྱོར་བ་ལ་ཞུགས་སྐབས་ཀྱི་དཔའ་བོའི་ཁོང་ཁྲོ་རབ་ཏུ་རྒྱས་པའི་གདོང་གི་འཇིགས་རུང་གི་ཉམས་དང་། མིང་གི་ལྷག་མར་གྱུར་པའི་དགྲ་སྡེའི་ཚོགས་ཕམ་པར་བྱས་པའི་བྱ་བྱེད་དང་རྣམ་པ་བྲིས་ཡོད་ལ། དེའི་ཁྲོད་དཔའ་བོ་སྲིད་པ་གཞོན་ནུ་དང་དགྲ་སྡེ་སོགས་ཉི་མ་དང་རྒྱུ་སྐར་སོགས་ཀྱི་དཔེ་རུ་བཀོད་དེ། ཀློག་པ་པོས་ཚིག་དང་དོན་གྱི་ཆ་ལ་གོ་བ་ལེན་པར་རམ་འདེགས་ཆེན་པོ་བྱས་ཡོད་ཐོག ཀློག་པ་པོར་དྲག་པའི་ལས་ལ་སྤྱོད་པའི་གཡུལ་སའི་སྣང་བརྙན་གསོན་པོ་ཞིག་གློག་བརྙན་ཇི་བཞིན་མིག་ལམ་དུ་མངོན་པར་བྱས་ཡོད།

མི་ནི་འགུལ་སྐྱོད་ལ་བརྟེན་ནས་འཚོ་བ་རོལ་བ་དང་། དོན་ཡོངས་རྫོགས་མི་སྣའི་འགུལ་སྐྱོད་ལ་བརྟེན་ནས་བྱུང་བ་ཡིན་པས། མི་སྣའི་བྱ་བྱེད་ཞིབ་འབྲི་མ་བྱས་ན་མི་སྣ་ལེགས་པོ་ཞིག་འབྲི་མི་ཐུབ། ལའོ་ཧྲེ་ཡིས“བྱ་བྱེད་ཞིབ་འབྲི་བྱས་ན་ད་གཟོད་མི་སྣ་ཡར་ལངས་ཐུབ”ཅེས་གསུངས་ཡོད། དེའི་ཐོག་ནས་བྱ་བྱེད་ཞིབ་འབྲི་བྱེད་པ་ནི་མི་སྣའི་སྣང་བརྙན་བཞེངས་སྐྲུན་བྱེད་ཐབས་གལ་ཆེན་ཞིག་ཡིན་པ་མཐོང་ཐུབ། དེས་རྩོམ་ཡིག་གི་བརྗོད་སྙིང་མཚོན་ཐུབ་པ་དང་། དེ་བཞིན་གསོན་ཉམས་ལྡན་ཞིང་དམིགས་བསལ་གྱི་ཁྱད་ཆོས་ཡོད་པའི་མི་སྣའི་སྣང་བརྙན་འབུར་ཐོན་བྱེད་པར་ནུས་པ་གལ་ཆེན་འདོན་ཐུབ། ང་ཚོས་རྩོམ་འབྲི་སྐབས་བྱ་བྱེད་ཞིབ་འབྲི་བྱས་ཏེ། མི་སྣའི་གཤིས་ཀ་དང་གཤིས་ཉམས་སོགས་སྔར་ལས་ལེགས་པར་མཚོན་པར་བྱས་ནས། མི་སྣའི་བསམ་བློའི་རང་གཤིས་དང་བརྩམས་ཆོས་ཀྱི་བརྗོད་བྱའི་སྙིང་བོ་ཀློག་པ་པོའི་མདུན་དུ་གློག་བརྙན་ཇི་བཞིན་འཆར་བར་འཇུག་དགོས། །

དཔྱད་གཞིའི་ཡིག་ཆ།

[1] རིན་ཆེན་བཀྲ་ཤིས། རྩོམ་གྱི་རྣམ་གཞག་རིག་པའི་སྒོ་འབྱེད། [M] མཚོ་སྔོན་མི་རིགས་དཔེ་སྐྲུན་ཁང་། 2022.

[2] རུས་པའི་རྒྱན་ཅན། རྣམ་འབྱོར་གྱི་དབང་ཕྱུག་ཆེན་པོ་མི་

ལ་རས་པའི་རྣམ་མགུར། [M] མཚོ་སྔོན་མི་རིགས་དཔེ་སྐྲུན་ཁང་། 2004.

[3] མདོ་མཁར་ཞབས་དྲུང་ཚེ་རིང་དབང་རྒྱལ། གཞོན་ནུ་ཟླ་མེད་ཀྱི་གཏམ་རྒྱུད། [M] བོད་ལྗོངས་མི་དམངས་དཔེ་སྐྲུན་ཁང་། 2008.