རྫོགས་ལྡན་དབྱར་གྱི་དུས་ཚིགས་བཟང་པོ་འདིར། ཀན་ལྷོ་རྩྭ་ཐང་ཆེན་མོར་ཆས་ཏེ། མིག་གིས་རྒྱང་ལ་བལྟས་ན་སྔོ་ལྗང་གཡུ་ཡི་རྦ་རླབས་འཕྱུར་ཞིང་སྐྱེ་སྟོབས་ཀྱི་དཔལ་འབར། རྩྭ་ཆུ་གཉིས་འཛོམས་ཀྱི་སྣོད་བཅུད་ཁོར་ཡུག་མཐོང་དུས་སྦགས་མེད་འཕེལ་རྒྱས་དང་སྐྱེ་ཁམས་དཔལ་ཡོན་གྱི་གྲུབ་འབྲས་ངང་གིས་ཚོར་ཐུབ།
སྤྱི་ཟླ་8པའི་ཚེས་16ཉིན་ནས་ཚེས་17ཉིན་བར། གསར་འགོད་པ་ཀན་ལྷོའི་དེང་རབས་ཅན་སྐུལ་སྤེལ་ལ་དམིགས་ཏེ། ཚོན་དགུའི་ཤམ་བྷ་ལར་སྐྱོད་པའི་བཅར་འདྲི་བྱེད་སྒོར་ཞུགས་ཏེ། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་གྱིས“ལྔ་མེད་ཀན་ལྷོ”ཡི་གསར་སྐྲུན་བྱ་ཐབས་ཟབ་སྤེལ་དང་། སྐྱེ་ཁམས་ཐོན་ཁུངས་དང་ཡུལ་སྐོར་དཔེ་སྟོན་གྲོང་ཚོ་འཛུགས་སྐྲུན་བེད་སྤྱོད་གང་ལེགས་བྱས་ཏེ། ཞིང་འབྲོག་མང་ཚོགས་ཀྱི་འཚོ་བ་ཇེ་བཟང་དང་དཔལ་འབྱོར་ཡོང་འབབ་ཇེ་ལེགས་སུ་བཏང་དང་གཏོང་བཞིན་པར་མྱོང་ཚོར་ཟབ་མོ་སྐྱེས།
རིག་གནས་ཡུལ་སྐོར་མཉམ་འདྲེས་ཀྱིས་ལྗང་མདོག་འཕེལ་རྒྱས་ལ་གསོན་ཤུགས་བསྩལ།
བསང་ཆུ་རྫོང་ཨ་མཆོག་གྲོང་རྡལ་རྔ་རྒོད་གྲོང་ཚོ་ནི་ཨ་མྱེ་གོང་སྔོན་གྱི་འདབས་སུ་ཆགས་ཤིང་། གྲོང་ཚོའི་དུད་ཚང་མང་པོས་གནས་ཚང་གི་ཞོར་ལས་ལ་འབད་བཞིན་འདུག །གནས་ཚང་ཞིག་གི་ནང་དུ་ཕྱིན་པ་ན་སྦྱིན་བདག་རྟ་མགྲིན་དབང་རྒྱལ་གྱིས་གསར་འགོད་པར་ཁྱིམ་ཚང་ཡོང་འབབ་སྐོར་གྱི་ཁ་བརྡ་བྱས། ཁོས་བཤད་རྒྱུར། 2018ལོར། གྲོང་ཨུས་ང་ཚོར་གནས་ཚང་གཉེར་དགོས་པའི་རེ་བ་ཡང་ཡང་བཏོན་རྗེས། ང་ཚོས་ད་གཟོད་ལས་ཀ་འདི་འགོ་བཟུང་བ་ཡིན། འགྲོ་གྲོན་སྐར་མ་གང་ཡང་གཏོང་མ་དགོས་པར་མ་ཟད། མགྲོན་པོའང་ཡུལ་སྐོར་སྤྱི་གཉེར་ཁང་གིས་མངགས་གཏོང་བྱེད་བཞིན་འདུག །ང་ཚོས་འཕྲོད་བསྟེན་སྐོར་ནས་གཟབ་གཟབ་བྱས་ན་དེ་བས་ཆོག་ཅེས་ཟེར།
2015ལོ་ནས་བཟུང་། ཀན་ལྷོ་ཡིས་སྐྱེ་ཁམས་དཔལ་ཡོན་གྱི་འབྱོར་འབྲིང་གྲོང་ཚོ་རྒྱ་ཆེར་འཛུགས་སྐྲུན་བྱས་ཏེ། ཞིང་འབྲོག་གྲོང་ཚོའི་རྨང་གཞིའི་ཆ་རྐྱེན་ལེགས་བཅོས་དང་ཞིང་འབྲོག་གྲོང་ཚོའི་དཔལ་འབྱོར་འཕེལ་རྒྱས་ཤུགས་ཆེར་བཏང་ནས། ཞིང་འབྲོག་གྲོང་ཚོའི་རྣམ་པ་གསར་པར་བསྒྱུར།
ཨ་མཆོག་གྲོང་རྡལ་གྱི་གྲོང་དཔོན་གདུགས་དཀར་ཚེ་རིང་གིས་བཤད་རྒྱུར། ཉེ་བའི་ལོ་ཤས་རིང་། ང་ཚོས་ཕྱོགས་གསུམ་པའི་སྤྱི་གཉེར་ཁང་ནང་འདྲེན་བྱས་ནས་མ་དངུལ་སྒོར་ཁྲི་2000ལྷག་གཏོང་འཇོག་བྱས་ཏེ། རྔ་རྒོད་གནས་ཚང་གྲོང་ཚོ་དང་ཨ་མྱེ་གོང་སྔོན་སྦྲ་གུར་གླིང་། མེ་ཏོག་སྣ་བརྒྱའི་སྐྱེ་ཁམས་གླིང་བསྐྲུན་ཡོད། ཡུལ་སྐོར་གྱི་རྨང་གཞིའི་སྒྲིག་ཆས་དང་ཞབས་ཞུའི་ནུས་པ་སྔར་བས་འཐུས་སྒོ་ཇེ་ཚང་རེད།
ལྷག་པར་དུ་མཛོད་དགེ་སྨད་མ་གྲོང་རྡལ་གྱི་རྔོག་དཀར་གྲོང་ཚོ་ནི་ཀན་ལྷོའི་རིག་གནས་ཡུལ་སྐོར་དཔེ་སྟོན་གྲོང་ཚོ་17གྱི་ནང་གསེས་སུ་ཚུད་ཡོད་ཅིང་། རང་བྱུང་ཁོར་ཡུག་དང་ཡུལ་སྲོལ་རིག་གནས་ཁྱད་ཆོས་ལ་བརྟེན་ནས་ཡུལ་སྐོར་པའི་ཡིད་ཀྱི་དང་བ་འདྲེན་བཞིན་ཡོད།
མཛོད་དགེ་སྨད་མ་གྲོང་རྡལ་གྱི་གྲོང་གསེབ་དར་རྒྱས་ལས་དོན་ས་ཚིགས་ཀྱི་འགོ་གཙོ་གཞོན་པ་ཚེ་རིང་བཀྲ་ཤིས་ཀྱི་བཤད་རྒྱུར། གྲོང་ཚོ་འདིར་ད་ལྟ་གནས་ཚང་22ཡོད། སྲིད་གཞུང་གིས་མ་དངུལ་བཏང་བ་དང་། དུད་ཁྱིམ་སོ་སོས་རང་གི་གཞིས་ས་རྐང་ཞུགས་བྱས་ཡོད། ཀན་ལྷོ་ཁུལ་གྱི“གཅིག་བཅུ་བརྒྱ་སྟོང་ཁྲི”ཡི་རྣམ་གྲངས་ཀྱི་རོགས་འདེགས་འོག །
རྔོག་དཀར་གྲོང་ཚོར་སྐྱེ་ཁམས་བདེ་སྡོད་ཀྱི་གཞིས་ཁྱིམ་སྐྲུན་ཞིང་། གྲོང་ཚོའི་ཁོར་ཡུག་དང་བཅོས་སྐྱོང་ནུས་པར་འཕོ་འགྱུར་ཆེན་པོ་བྱུང་།
སྐྱེ་ཁམས་དཔལ་ཡོན་འཛུགས་སྐྲུན་གྱིས་ལྗང་མདོག་འཕེལ་རྒྱས་ཀྱི་ལེའུ་གསར་པ་བརྩམས།
ལིན་ཐང་རྫོང་འགོ་ནང་ཐང་གི་རང་བྱུང་ལྗོངས་ཁུལ་གྱི་ཡུལ་ལྗོངས་ལྟ་ན་སྡུག་ཅིང་། མི་ཆོས་རིག་གནས་ཀྱི་ནང་དོན་གཏིང་ཟབ། ལྷག་པར་དུ་ལོ་རྒྱུས་སུ་མི་རིགས་སོ་སོ་འགྲོ་འོང་དང་སྤེལ་རེས། མཉམ་འདྲེས་ཀྱི་བགྲོད་ལམ་གལ་ཆེན་ཞིག་ཀྱང་ཡིན།
ཉེ་བའི་ལོ་ཤས་རིང་། ལིན་ཐང་རྫོང་འགོ་ནང་ཐང་གྲོང་རྡལ་ཁྲི་ཀུའོ་གྲོང་ཚོས་ཐོན་ཁུངས་ཀྱི་ལེགས་ཆར་བརྟེན་ནས། “གཅིག་བཅུ་བརྒྱ་སྟོང་ཁྲི”ཞེས་པའི་རྣམ་གྲངས་ཀྱིས་འཐེན་ཤུགས་དང་། མཛེས་པའི་གྲོང་གསེབ་འཛུགས་སྐྲུན་གྱི་དམིགས་འབེན། “ལྗོངས་ཁུལ་དང་གྲོང་ཚོ་མཉམ་འགུལ། གྲོང་ཁྱེར་དང་གྲོང་གསེབ་ཟུང་སྦྲེལ། གཅིག་འདོམས་སྐུལ་འདེད”བཅས་ཀྱི་རིགས་ལམ་བྱས་ཤིང་། ཐོན་ལས་གསོ་སྤེལ་གྱི་གསར་གཏོད་བྱ་ཡུལ་བྱས་ནས་གྲོང་གསེབ་ཡུལ་སྐོར་འཕེལ་རྒྱས་གང་ལེགས་བཏང་བ་དང་། མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་ཁོར་ཡུག་བསྐྲུན་གང་ཐུབ་བྱས་ཏེ། སྔ་གཞུག་ཏུ་རྒྱལ་ཡོངས་ཡུལ་སྐོར་འབྱོར་འབྲིང་དང་། ཀྲུང་གོའི་གྲོང་གསེབ་ཡུལ་སྐོར་དཔེ་སྟོན་གྲོང་ཚོ། ཀན་ལྷོ་ཁུལ་གྱི་དཔལ་ཡོན་གྲོང་ཚོ་སོགས་ཀྱི་མཚན་སྙན་གཟེངས་རྟགས་ཐོབ་ཡོད།
ཁྲི་ཀུའོ་གྲོང་ཚོའི་ཏང་ཀྲི་པུའུ་ཧྲུའུ་ཅི་དབྱེ་ཞའོ་པིན་གྱིས་བཤད་རྒྱུར། གྲོང་ཚོ་འདི་གནས་སྤོར་བྱས་རྗེས་གྲོང་མིའི་འཚོ་བར་འགྱུར་ལྡོག་ཆེན་པོ་བྱུང་ཡོད། ལྷག་པར་དུ་གྲོང་མིའི་སྐྱེ་ཁམས་འདུ་ཤེས་མཐོར་འདེགས་གཏོང་ཆེད། གྲོང་ཚོའི་ཏང་ཡོན་ལས་བྱེད་པ་རྣམས་རྒྱུན་པར་ཁྱིམ་ཚང་སོ་སོའི་ཁང་པའི་ཕྱི་ནང་ཕྱགས་རྡལ་བྱེད་རོགས་བྱས་ཏེ། གཅིག་ནས་སྣེ་ཁྲིད་ཀྱི་ནུས་པ་དང་། གཉིས་ནས་སྐྱེ་ཁམས་འདུ་ཤེས་དྲིལ་བསྒྲགས་ཀྱི་ནུས་པ་ཐོན་བཞིན་ཡོད་པ་རེད། ད་ལྟ། གྲོང་ཚོ་འདིའི་གཞུང་ལམ་དང་སྡོད་ཁང་། སྐྱེ་ཁམས་བཅས་ཕྱོགས་གང་ཐད་ནས་ཇེ་ལེགས་སུ་ཕྱིན་ཡོད་ཅེས་ཟེར།
དེ་བཞིན་ཀན་ལྷོ་ཡིས་དབུལ་གྲོལ་འགག་སྒྲོལ་གྱི་གྲུབ་འབྲས་སྲ་བརྟན་གཏོང་བའི་རྨང་གཞིའི་ཐོག །སྐྱེ་ཁམས་ཞིང་ལས་དང་ཡུལ་སྐོར་ཐོན་ལས། སྐྱེ་ཁམས་སྲུང་སྐྱོབ་སོགས་ཀྱི་བྱ་སྤྱོད་ཆེན་མོ་དྲུག་ལག་བསྟན་ནན་མོ་བྱས་ཏེ། དཔལ་འབྱོར་སྤྱི་ཚོགས་འཕེལ་རྒྱས་ལ་གྲུབ་འབྲས་གསར་པ་བླངས་འདུག
དུས་ད་ལྟ། ཀན་ལྷོའི་གྲོང་ཁྱེར་དང་གྲོང་གསེབ་ཀྱི་རྣམ་པར་གནམ་ས་བླ་འོག་བསྒྱུར་བ་ལྟ་བུའི་འགྱུར་ལྡོག་བྱུང་ཞིང་། ཁུལ་ཡོངས་སུ་སྐྱེ་ཁམས་དཔལ་ཡོན་གྱི་འབྱོར་འབྲིང་གྲོང་ཚོ་མེ་ཏོག་ལྟར་བཞད་དེ། སྲོལ་རྒྱུན་གྱི་ཐོན་སྐྱེད་འཚོ་བ་བྱེད་ཐབས་ལ་འགྱུར་བ་བྱུང་ཡོད། ལྷག་པར་དུ་ཁུལ་ཡོངས་ལ་གད་སྙིགས་མེད་པ་དང་། ཁུལ་ཡོངས་ལ་རྫས་ལུད་མེད་པ། ཁུལ་ཡོངས་ལ་འགྱིག་ཤོག་མེད་པ། ཁུལ་ཡོངས་ལ་སྦགས་བཙོག་མེད་པ། ཁུལ་ཡོངས་ལ་སྤྱི་གནོད་མེད་པ་བཅས་ཀྱི“ལྔ་མེད་ཀན་ལྷོ”ཡི་ཟོང་རྟགས་ཞིང་ཆེན་ཡོངས་སུ་གྲགས་ཡོད།
དུས་ད་ལྟ། ཀན་ལྷོའི་སྤྱི་ཚོགས་འཆམ་མཐུན་བརྟན་བརླིང་། བདེ་འཇགས་དང་ཞི་ལྷོད་ཀྱི་ཁོར་ཡུག་གིས་བཅོས་བསྒྱུར་འཕེལ་རྒྱས་ལ་རྨང་གཞི་བརྟན་པོ་བཞག་པར་མ་ཟད། རིགས་སོ་སོའི་མང་ཚོགས་ཀྱི་བདེ་འཇགས་ཀྱི་ཉམས་སྣང་དང་བློ་ལ་འབབ་ཚད་བསྟུད་མར་ལོ་མང་པོར་ཞིང་ཆེན་ཡོངས་ཀྱི་སྔོན་གྲལ་དུ་ཚུད་འདུག
དུས་ད་ལྟ། ཀན་ལྷོའི་སྐྱེ་ཁམས་འཛུགས་སྐྲུན་གྱིས་ལྗང་མདོག་རིམ་སྒྱུར་ལམ་བུར་ཆ་རྐྱེན་བསྐྲུན་ཏེ། སྐྱེ་ཁམས་མ་ལག་སྲུང་སྐྱོབ་དང་སླར་གསོའི་ཐད་རྒྱུན་མཐུད་སྐུལ་འདེད་བཏང་ནས། “རིག་གནས་ཡུལ་སྐོར་གྱིས་གཙོ་ཁྲིད་དང་། ཐོན་ལས་གསུམ་མཉམ་འདྲེས། སྣ་མང་མཉམ་གནས”ཀྱི་འཕེལ་རྒྱས་ཀྱི་རྣམ་པ་གསར་པ་བཀོད་དེ། ཀན་ལྷོ“དཔལ་འབྱོར་རྗེས་འདེད་པ”ནས“སྐྱེ་ཁམས་སྔོན་སྐྱོད་པ”རུ་རིམ་སྒྱུར་བྱས་སོ།