སེམས་པ་གངས་ལ་ཆགས་པའི་གངས་དགའ།

སྔོན་འགྲོའི་གཏམ།

2017ལོ་ཡས་མས་སུ་ཁམས་པའི་བརྙན་ཁང་གི་འཆད་ཁྲིད་སྒྲོན་མེའི་ལེ་ཚན་བརྒྱུད་ནས་བོད་ལྗོངས་ཉིང་ཁྲི་ས་ཁུལ་གྱི་དམངས་སྲོལ་རིག་གནས་ཀྱི་མུ་འབྲེལ་འཆད་ཁྲིད་ཁག་ཅིག་ཉོན་རྒྱུའི་གོ་སྐབས་བྱུང་བ་དང་། དེའི་རྗེས་སུ《ཉིང་ཁྲིའི་ས་ཁོངས་རིག་གནས་དཔེ་ཚོགས》དང་《སྤོ་བོའི་ལོ་རྒྱུས》སོགས་ས་གནས་དེ་དང་འབྲེལ་བའི་དཔེ་དེབ་ཁ་ཤས་ཞལ་ཕྱེ་རྒྱུའི་གོ་སྐབས་རྙེད་པས། དམིགས་བསལ་གྱི་ཁྱད་ཆོས་ལྡན་པའི་ས་གནས་དེ་ལ་རྒྱུས་ལོན་ཕྲན་བུ་བྱུང་། འོན་ཀྱང་སྐབས་དེར་འཆད་ཁྲིད་གནང་མཁན་དང་དཔེ་དེབ་མཛད་མཁན་ལ་དོ་སྣང་ཆེན་པོ་མ་བྱས་མོད། རྗེས་སུ་ལས་ཀའི་གོ་རིམ་ཁྲོད་ཁོང་གི་མཚན་ཡང་ཡང་ཐོས་པས། སེམས་ལ་བག་ཆགས་ཟབ་མོ་ཞིག་ཐེབས་སོང་། ད་ཐེངས་གསེར་ལས་དཀོན་པའི་གོ་སྐབས་ཤིག་རྙེད་ནས་སྔོན་ཆོད་མཚན་ཡང་ཡང་ཐོས་མྱོང་བའི་བོད་ཀྱི་དམངས་ཁྲོད་རིག་གནས་ཞིབ་འཇུག་པ་ཕུར་བུ་རྡོ་རྗེ་ལགས་ལ་ཁོང་གི་སྐུ་ཚེ་གང་པོའི་མཛད་ཕྲིན་ཐད་བཅར་འདྲི་བྱས་པ་ཡིན་ལ། ཁོང་གིས་ལས་གནས་དཀྱུས་མ་ཞིག་ནས་བོད་ཀྱི་དམངས་ཁྲོད་རིག་གནས་འཛིན་སྐྱོང་སྤེལ་གསུམ་ལ་ནུས་ཤུགས་ཡོད་རྒུ་ཕྱུང་བ་དང་། ལྷག་པར་དུ་ཉིང་ཁྲིའི་ས་ཁུལ་གྱི་དམངས་སྲོལ་རིག་གནས་འཛིན་སྐྱོང་སྤེལ་གསུམ་ལ་བྱས་རྗེས་གཞལ་ཐབས་བྲལ་བ་བཞག་འདུག །

ངོ་སྤྲོད་བསྡུས་པ།

དགེ་རྒན་ཆེན་མོ་ཕུར་བུ་རྡོ་རྗེ་ནི་1955ལོར་བོད་རང་སྐྱོང་ལྗོངས་ཉིང་ཁྲི་ས་ཁུལ་སྤོ་བོ་རྫོང་རྡོ་རྗེ་ཡུལ་ཚོའི་ཁྱིམ་ཚང་དཀྱུས་མ་ཞིག་ཏུ་འཁྲུངས་པ་དང་། ཕ་མེས་བཟང་པོའི་འབད་འབུངས་ཡར་བརྩོན་གྱི་བསམ་བློའི་ཀུན་སློང་འོག །མི་འགྱངས་བར་སློབ་གྲྭ་ཆེ་འབྲིང་ཆུང་གསུམ་འགྲིམས་ནས་མཁས་པའི་གོ་འཕང་ཟིན། སྔར་ཉིང་ཁྲི་ས་ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་སོགས་ཀྱི་གོ་གནས་བཞེས་པ་དང་། བོད་ལྗོངས་དམངས་ཁྲོད་རིག་རྩལ་པའི་ལྷན་ཚོགས་ཀྱི་ཀྲུའུ་ཞི་གཞོན་པ་དང་བོད་ལྗོངས་དངོས་མིན་རིག་གནས་ཤུལ་བཞག་རིག་གནས་ཆེད་མཁས་ཨུ་ལྷན་གྱི་ཁོངས་མིའི་འགན་ཁུར་མྱོང་ཞིང་། རྒན་ཡོལ་ཞུས་རྗེས《ཉིང་ཁྲིའི་ས་ཁོངས་རིག་གནས་དཔེ་ཚོགས》རྒྱུན་ལས་སྤྱི་ཁྱབ་རྩོམ་སྒྲིག་པ་གཞོན་པ་དང་སྤྱི་ཁྱབ་རྩོམ་སྒྲིག་ཁང་གི་ཀྲུའུ་རེན་དང་གཙོ་སྒྲིག་པར་གདན་ཞུས་བྱས་ནས་འགན་བཞེས་ཡོད་ལ། 《ཀྲུང་གོའི་བོད་ལྗོངས》དུས་དེབ་ཀྱི་གདན་ཞུས་འཕྲིན་སྤེལ་བའི་འགན་ཡང་འཁུར་མུས་ཡིན།

ཁོང་གིས་ལས་ཞོར་གྱི་དུས་ཚོད་བེད་སྤྱད་ནས་སྔ་རྗེས་སུ《སྤོ་བོའི་ལོ་རྒྱུས》དང་《བོད་ཀྱི་དམངས་གཞས་ཕྱོགས་བསྒྲིགས》《སྤོ་ཡུལ་གྱི་དམངས་གཞས》《སྤོ་ཡུལ་གྱི་དམངས་ཁྲོད་གཏམ་རྒྱུད་ཕྱོགས་བསྒྲིགས》《བྱིས་སྒྲུང་ཕྱོགས་བསྒྲིགས་སྟེ། གསེར་གྱི་སྟོན་པའི་སྐུ》《ཤན་འདན་སྟག་མོ་ནང་འཁྲུག》《གངས་ལྗོངས་ས་མཐོའི་འོད་འཚེར་བའི་མུ་ཏིག་སྟེ། ཉིང་ཁྲི（རྒྱ་ཡིག）》《སྤོ་ཡུལ་གྱི་དམངས་ཁྲོད་གཏམ་དཔེ》《རྫ་ཡུལ་གྱི་དམངས་ཁྲོད་བྲོ་ཚིག》《སྤོ་ཡུལ་གྱི་དམངས་སྲོལ་རིག་གནས》《སྤོ་བོའི་དམངས་ཁྲོད་རྩོམ་རིག（རྒྱ་ཡིག）》སོགས་དཔེ་དེབ་བཅུ་ལྷག་པར་སྐྲུན་འགྲེམས་སྤེལ་གནང་བ་དང་། ཁོང་གིས་གཙོ་བསྒྲིགས་མཛད་པའི《ཉིང་ཁྲིའི་ས་ཁོངས་རིག་གནས་དཔེ་ཚོགས》བོད་ཡིག་དང་རྒྱ་ཡིག་གི་པར་མ་ལ་བསྡོམས་པས་དཔེ་དེབ་23ཡོད་པ་དང་། མི་དམངས་དཔེ་སྐྲུན་ཁང་དང་བོད་ལྗོངས་མི་དམངས་དཔེ་སྐྲུན་ཁང་གི་པར་བསྐྲུན་འགྲེམས་སྤེལ་བྱས། གཞན་ཡང་ལོ་མང་རིང་འབད་པ་ལྷོད་མེད་ཀྱིས་རྩོམ་འབྲིའི་བྱ་བར་གཞོལ་ཏེ《ཀྲུང་གོའི་བོད་ལྗོངས》དང་། 《བོད་ཀྱི་རྩོམ་རིག་སྒྱུ་རྩལ》《གངས་ལྗོངས་ཉི་གཞོན》《བོད་ཀྱི་དམངས་ཁྲོད་རྩོམ་རིག་སྤང་རྒྱན་མེ་ཏོག》《བོད་ལྗོངས་ཉིན་རེའི་ཚགས་པར》སོགས་དུས་དེབ་དང་ཚགས་པར་ཐོག་རྩོམ་ཡིག་དང་དཔྱད་བརྗོད་སོགས་བརྒྱ་ལ་ཉེ་བ་སྤེལ་ཡོད།

ཁོང་གིས་བསྒྲིགས་པའི《བོད་ཀྱི་དམངས་གཞས་ཕྱོགས་བསྒྲིགས》ལ་རྒྱལ་ཡོངས་ཕུལ་བྱུང་དམངས་ཁྲོད་རྩོམ་རིག་བརྩམས་ཆོས་ཀྱི་བྱ་དགའ་ཨང་གསུམ་པ་ཐོབ་པ་དང་། ཁོང་གིས་གཙོ་བསྒྲིགས་མཛད་པའི《ཉིང་ཁྲིའི་དམངས་གཞས་གཅེས་བཏུས》ལ“ཀྲུང་གོའི་དམངས་ཁྲོད་རྩོམ་རིག་སྐབས་བཅུ་གསུམ་པའི་རི་བོའི་མེ་ཏོག་བྱ་དགའི”ཁྲོད་ཕུལ་བྱུང་བྱ་དགའ་ཐོབ། ཁོང་གིས་འགྲེལ་བཤད་བྲིས་ཤིང་འཁྲབ་ཁྲིད་བྱས་པའི《ཤིས་པ་གྲོང་ཚོའི་དོམ་དང་དོམ་ཁྱིའི་རོལ་རྩེད་དུས་སྟོན》ལ“རྒྱལ་ཡོངས་དམངས་སྲོལ་དམངས་ཁྲོད་སྒྱུ་རྩལ་འདྲ་བརྙན་བརྩམས་ཆོས་འགྲེམས་སྟོན”ཁྲོད་བྱ་དགའ་ཨང་གསུམ་པ་ཐོབ། ཁོང་“རྒྱལ་ཁབ་སྒྱུ་རྩལ་ཚན་རིག་གཙོ་གནད་ལས་གཞི་སྟེ། ཀྲུང་གོའི་དམངས་ཁྲོད་རྩོམ་རིག་ཕྱོགས་བསྒྲིགས་གསུམ་རྩོམ་སྒྲིག་ལས་ཀའི”སྔོན་ཐོན་མི་སྣ་རུ་བདམས་པ་དང་། ཀྲུང་གོའི་རིག་རྩལ་མཉམ་འབྲེལ་ལྷན་ཚོགས་ཀྱིས“སྤྱོད་བཟང་སྒྱུ་རྩལ་ཟུང་ལྡན་གྱི་དམངས་ཁྲོད་སྒྱུ་རྩལ་པའི”མཚན་སྙན་བསྩལ་ཡོད། ། 

དྲི་བ་དྲིས་ལན།

གསར་འགོད་པ། ཁྱེད་ཀྱི་སློབ་སྦྱོང་གི་བརྒྱུད་རིམ་རགས་བསྡུས་ཤིག་གསུང་རོགས།

ཕུར་བུ་རྡོ་རྗེ། ང་རང་ཆུང་དུས་སློབ་སྦྱོང་གི་ཆ་རྐྱེན་ལེགས་པོ་མེད་ཀྱང་། རང་སྦྱོང་ལ་འབད་པ་ལྷོད་མེད་བྱས་པས། ཐིགས་པ་བསགས་པའི་རྒྱ་མཚོ་ཟེར་བའི་དཔེ་བཞིན་ཤེས་ཡོན་ཕྲན་བུ་གསོག་འཇོག་ཐུབ་ནས། མཐའ་མཇུག་དཔེ་དེབ་རེ་གཉིས་འབྲི་ཐུབ་པ་བྱུང་། སྔ་རྗེས་སུ་བོད་ལྗོངས་དགེ་འོས་སློབ་གྲྭ་དང་བོད་ལྗོངས་སློབ་གྲྭ་ཆེན་མོ་སོགས་འགྲིམས་ཏེ། མཁས་དབང་བཀྲ་ཤིས་རིན་ཆེན་དང་། དུང་དཀར་བློ་བཟང་འཕྲིན་ལས། ཁྲོ་རུ་ཚེ་རྣམ་སོགས་དགེ་རྒན་ཆེན་མོ་དུ་མའི་སྐུ་མདུན་ནས་སུམ་རྟགས་དག་གསུམ་དང་སྙན་ངག་མངོན་བརྗོད། རྒྱ་བོད་ཡིག་བསྒྱུར། དེང་རབས་རྩོམ་རིག །བོད་ཀྱི་ལོ་རྒྱུས་སོགས་ལ་འབད་འབུངས་རྡོ་རུས་ཐུག་པ་བྱས་ཤིང་། མདོར་ན་ལྟོ་སྐྱ་གོས་ཧྲུལ་གྱིས་རྟག་གུས་བརྩོན་པ་མ་བཏང་།

གསར་འགོད་པ། བོད་ལྗོངས་ཀོང་པོའི་ཡུལ་གྱི་ཐུན་མིན་རིག་གནས་ཀྱིས་ཁྱེད་ཀྱི་འཚར་ལོངས་ལ་ཤུགས་རྐྱེན་ག་འདྲ་ཐེབས་ཡོད་རྒྱུ་རེད།

ཕུར་བུ་རྡོ་རྗེ། ང་རང་སྐྱེ་ས་འཚར་ས་དང་མི་ཚེ་ཕྱེད་ཀ་བསྐྱལ་ས་སྤོ་བོ་རྫོང་ཡིན་པས། ཕ་ཡུལ་གྱི་རིག་གནས་ཀྱིས་ང་རང་ལ་ཤུགས་རྐྱེན་ཆེན་པོ་ཐེབས་ཡོད། སྤོ་བོ་རྫོང་ནི་ཁམས་ཀྱི་སྟོད་ལ་གནས་ཤིང་ཁམས་པའི་རིག་གནས་ཀྱི་ཤན་ཤུགས་རྒྱ་ཆེན་པོ་ཐེབས་ཡོད། ང་རང་དམངས་ཁྲོད་རིག་གནས་ལ་དགའ་པོ་ཡོད་པ་དང་དམངས་ཁྲོད་རྩོམ་རིག་ཐད་ལས་ཀ་ཕྲན་བུ་བྱེད་ཐུབ་པ་ནི་གེ་སར་རྒྱལ་པོའི་སྒྲུང་དང་འབྲེལ་བ་དམ་ཟབ་ཡོད་དེ། དེས་དམངས་ཁྲོད་རྩོམ་རིག་ལ་དོ་སྣང་དགོས་པའི་དང་བ་འདྲེན་པ་དང་། རྗེས་སུ་སྙན་ངག་དང་རྩོམ་རིག་རྩག་རྩིག་འབྲི་བ་ལ་ཕན་ཐོགས་རྒྱ་ཆེན་པོ་ཐོབ་བྱུང་།

གསར་འགོད་པ། ཁྱེད་ཀྱིས་གཙོ་སྒྲིག་མཛད་པའི《ཉིང་ཁྲིའི་ས་ཁོངས་རིག་གནས་དཔེ་ཚོགས》ཞེས་པ་དེ་ངོ་སྤྲོད་མདོར་བསྡུས་ཞིག་གནང་རོགས།

ཕུར་བུ་རྡོ་རྗེ། 《ཉིང་ཁྲིའི་ས་ཁོངས་རིག་གནས་དཔེ་ཚོགས》ནི་ཉིང་ཁྲི་ས་ཁུལ་སྲིད་གཞུང་གིས་འགྲོ་གྲོན་བཏང་ཞིང་། ས་ཁུལ་སྲིད་གྲོས་ཀྱིས་གཙོ་འགན་ཁུར་ནས་པར་བསྐྲུན་འགྲེམས་སྤེལ་བྱས་པ་ཞིག་རེད། དེ་ལ་རྒྱ་ཡིག་དང་བོད་ཡིག་སོ་སོར་ནང་དོན་ཁག་བརྒྱད་རེ་དང་། རྒྱ་ཡིག་ལ་དཔེ་དེབ་བཅུ་གཅིག་དང་བོད་ཡིག་ལ་དཔེ་དེབ་བཅུ་གཉིས་བཅས་ཁྱོན་བསྡོམས་དཔེ་དེབ་ཉེར་གསུམ་ཡོད་རེད། ནང་དོན་ཁག་བརྒྱད་ཀྱི་ནང་དུ། དང་པོ་ནི་ཉིང་ཁྲིའི་དམངས་གཞས་གཅེས་བསྡུས་དང་། གཉིས་པ་ནི་ཉིང་ཁྲིའི་དམངས་ཁྲོད་སྒྲུང་གཏམ། གསུམ་པ་ནི་ཉིང་ཁྲིའི་གནའ་ཤུལ་རིག་དངོས། བཞི་པ་ནི་ཉིང་ཁྲིའི་ཡུལ་སྲོལ་རིག་གནས། ལྔ་པ་ནི་ཉིང་ཁྲིའི་རི་ཆུ་རིག་གནས། དྲུག་པ་ནི་ཉིང་ཁྲིའི་ལོ་རྒྱུས་བྱུང་བ་བརྗོད་པ། བདུན་པ་ནི་ཉིང་ཁྲིའི་ལོ་རྒྱུས་འཕེལ་འགྱུར། བརྒྱད་པ་ནི་ཉིང་ཁྲིའི་ས་མིང་ལོ་རྒྱུས་རིག་གནས་བརྡ་འགྲེལ་བཅས་རེད། དེབ་ཚོགས་འདི་རུ་རྩ་བའི་ཆ་ནས་ཉིང་ཁྲིའི་ས་གནས་ཀྱི་རིག་གནས་མང་ཆེ་བ་བསྡུ་ཐུབ་ཡོད་རེད།

གསར་འགོད་པ། 《ཉིང་ཁྲིའི་ས་ཁོངས་རིག་གནས་དཔེ་ཚོགས》གཙོ་སྒྲིག་མཛད་པའི་མྱོང་ཚོར་ཉུང་ཙམ་གསུང་རོགས།

ཕུར་བུ་རྡོ་རྗེ། དགའ་སྡུག་ཚིམ་གསུམ་བྱུང་།

དང་པོ་དགའ་འོས་པ་སྟེ། སྲིད་གཞུང་དང་སྲིད་གྲོས་ཀྱིས་ང་ལ་ཡིད་ཆེས་གནང་ནས་གཙོ་སྒྲིག་པའི་འགན་ཁུར་བཅུག་པ་དང་། ང་རང་ལའང་དཔེ་དེབ་དེ་འདྲ་ཞིག་རྩོམ་སྒྲིག་བྱ་རྒྱུའི་སེམས་འདུན་ཡོད་པས། བསམ་ཐོག་ལ་རྟ་རྒྱུག་པ་ཟེར་བ་ནང་བཞིན་སེམས་དགའ་པོ་བྱུང་། གཉིས་པ་དཀའ་སྡུག་ཆེ་བ་སྟེ། དཔེ་ཚོགས་དེ་འདྲ་ཞིག་རྩོམ་སྒྲིག་བྱ་རྒྱུ་ནི་རིག་གནས་ཀྱི་ལས་གྲྭ་ཅུང་རྒྱ་ཆེན་པོ་ཞིག་ཡིན་པས། རང་ཉིད་ལ་གནོན་ཤུགས་དང་རང་གི་ཆུ་ཚད་ཀྱིས་མི་འདང་བའི་སེམས་ཁྲལ། གཞན་གྱི་རྒྱབ་སྐྱོར་ཐོབ་མིན་གྱི་ཐེ་ཚོམ་ལ་སོགས་པ་དཀའ་སྡུག་གམ་སེམས་ངལ་མང་པོ་བྱུང་། གསུམ་པ་ཡིད་ཚིམ་པ་སྟེ། སྲིད་གཞུང་གི་མཐོང་ཆེན་དང་མཁས་དབང་གི་མཛུབ་སྟོན། ལས་གྲོགས་ཀྱི་རྒྱབ་སྐྱོབ་བཅས་གྱ་ནོམ་པ་ཐོབ་ནས་མཐར་སྔོན་གྱི་འཆར་གཞི་ལྟར་ལེགས་གྲུབ་བྱུང་བར་མ་ཟད། པར་སྐྲུན་འགྲེམས་སྤེལ་བྱས་པའི་རྗེས་སུ་ཀློག་པ་པོ་དང་མཁས་དབང་རྣམས་ཀྱི་གདེང་འཇོག་ཀྱང་ཡག་པོ་ཐོབ་པས། ཉིང་ཁྲིའི་ཏང་དང་སྲིད་གཞུང་ལ་བྱ་བ་དངོས་ཀྱི་ཐོག་ནས་རྒྱུག་ཤོག་ཡག་པོ་ཞིག་དང་ཉིང་ཁྲིའི་མི་དམངས་ཀྱི་རིག་གནས་བྱ་བཞག་ལ་ལེགས་སྐྱེས་སྤུས་ལེགས་ཤིག་ཕུལ་ཐུབ་པ་བྱུང་སོང་བསམ་ནས་ཡིད་ཚིམ་པོ་བྱུང་།

གསར་འགོད་པ། ཁྱེད་ཀྱིས་ལས་ཞོར་དུ་དཔེ་དེབ་མང་པོ་ཞིག་བརྩམས་འདུག་པས། དེ་དག་ལས་མཚོན་བྱེད་རང་བཞིན་ཅན་གྱི་དཔེ་དེབ་ཅིག་ངོ་སྤྲོད་གནང་རོགས།

ཕུར་བུ་རྡོ་རྗེ། 《སྤོ་བོའི་ལོ་རྒྱུས》ཞེས་པའི་དེབ་འདི་ཡིན། དེབ་འདི་1986ལོར་འབྲི་འགོ་བརྩམས་པ་དང་། སྐབས་དེར་རང་ཉིད་ལོ་ན་ཆུང་བ་དང་རྩོམ་སྒྲིག་གི་ཉམས་མྱོང་མེད་པ། ཡོན་ཚད་དམའ་བ་བཅས་ཀྱིས་མི་འདང་ས་དང་ཚད་ལྡན་མིན་པ། འགྱོད་པ་སྐྱེ་དགོས་པའི་ཆ་མང་པོ་ཡོད་ཀྱང་། ད་ལྟ་ཕྱི་མིག་ཅིག་ལྟ་དུས་དེའི་ནང་དུ་དཔྱད་གཞིའི་ཡིག་ཆ་རྩ་ཆེན་མང་པོ་ཞིག་བསྡུ་རུབ་ཐུབ་འདུག །

གསར་འགོད་པ། བོད་ཀྱི་དམངས་ཁྲོད་རིག་གནས་འཚོལ་སྡུད་ཀྱི་དོན་སྙིང་ཉུང་ཙམ་གསུང་རོགས།

ཕུར་བུ་རྡོ་རྗེ། དེ་ཡང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་གང་ལེགས་དང་། རྒྱུན་འཛིན་ཁྲོད་ནས་གོང་འཕེལ་གཏོང་བ་དང་། གོང་འཕེལ་ཁྲོད་ནས་གསར་གཏོད་གཏོང་དགོས་པའི་སྐོར་ལ་མཛུབ་སྟོན་རབ་དང་རིམ་པ་གནང་ཡོད་པ་རེད། བོད་ཀྱི་དམངས་ཁྲོད་རིག་གནས་ནི་རང་རེའི་ཕ་མེས་ཡང་མེས་རྣམ་པས་གསར་གཏོད་མཛད་པའི་སྲོལ་རྒྱུན་རིག་གནས་རྩ་ཆེན་ཞིག་ཡིན་པ་དང་། དེང་རབས་རིག་གནས་སྒྱུ་རྩལ་ཀུན་གྱི་འབྱུང་ཁུངས་དང་མ་ཡུམ་ལྟ་བུ་རེད། ངས་བསམ་ན་དམངས་ཁྲོད་རིག་གནས་ནི་རྒྱ་ཆེའི་ངལ་རྩོལ་མི་དམངས་ཀྱིས་ཐུན་མོང་ཐོག་གསར་གཏོད་དང་རྒྱུན་འཛིན་བྱས་གཤིས། དམངས་ཁྲོད་རིག་གནས་ལ་དགའ་ཞེན་དང་དམངས་ཁྲོད་རིག་གནས་ལ་བརྩི་བཀུར་བྱེད་པ་ནི་ངལ་རྩོལ་མི་དམངས་ལ་དགའ་ཞེན་དང་ངལ་རྩོལ་མི་དམངས་ལ་བརྩི་བཀུར་བྱེད་པ་དང་གཅིག་མཚུངས་རེད།

གསར་འགོད་པ། དམངས་ཁྲོད་རིག་གནས་འཛིན་སྐྱོང་སྤེལ་གསུམ་མཛད་སྐབས་བྱུང་བའི་ཆེས་བརྗེད་པར་དཀའ་བའི་གཏམ་རྒྱུད་ཅིག་ངོ་སྤྲོད་གནང་རོགས།

ཕུར་བུ་རྡོ་རྗེ། ལས་ཀའི་གོ་རིམ་ཁྲོད་གཏམ་རྒྱུད་བརྗེད་དཀའ་བ་མང་པོ་བྱུང་ཡོད་ཀྱང་། དེ་ལས་ཆེས་བརྗེད་དཀའ་བ་ནི་1981ལོར། སྤོ་བོ་རྫོང་དུ་དམངས་ཁྲོད་རིག་གནས་འཚོལ་སྡུད་བྱེད་སྐབས་བྱུང་བའི་གཏམ་རྒྱུད་ཅིག་སྟེ། ཉིན་ཞིག་ཆོས་འཕེལ་ཞེས་པའི་མི་རྒན་ཞིག་གི་གམ་དུ་བཅར་འདྲིར་ཕྱིན་པ་ཡིན། རྒན་པོ་ཆོས་འཕེལ་གྱིས་སུན་སྣང་དང་སྦ་གསང་གཏན་ནས་མེད་པའི་སྒོ་ནས་དམངས་ཁྲོད་སྒྲུང་གཏམ་ཧ་ཅང་རིང་པོ་ཞིག་གསུང་བྱུང་ཡང་། བཤད་མཚམས་མ་འཇོག་སྔོན་ནས་ས་རུབ་པ་མ་ཟད། སྒྲ་ཕབ་འཕྲུལ་ཆས་ཀྱི་སྒྲ་ཐག་ཀྱང་རྫོགས་སོང་། རྗེས་སུ་མུ་མཐུད་དུ་སྒྲ་ཕབ་རྒྱུའི་གོ་སྐབས་ཡོད་ཆགས་བྱས་ནས་ཕྱིར་ལོག་པ་ཡིན། བློ་ཕམ་དགོས་པ་ཞིག་ལ་ཡུན་རིང་མ་འགོར་བར་རྒན་པོ་ཁོང་ཚེ་ལས་འདས་སོང་བའི་གཏམ་ངན་ཐོས་པས། དེ་ནི་ནམ་ཡང་བསུབ་ཐབས་བྲལ་བའི་བློ་འགྱོད་ཆེན་པོ་ཞིག་ཏུ་གྱུར་སོང་།

གསར་འགོད་པ། མ་འོངས་པར་མུ་མཐུད་དུ་བོད་ཀྱི་རིག་གནས་འཛིན་སྐྱོང་སྤེལ་གསུམ་ཐད་ད་དུང་ཕྱག་ལས་ག་འདྲ་གནང་འཆར་ཡོད།

ཕུར་བུ་རྡོ་རྗེ། དེ་སྔོན་རང་ཉིད་ཀྱིས་སྨྱུ་གུ་ལ་བརྟེན་ནས་སྤྱི་ཚོགས་ལ་ཕན་པ་བསྒྲུབས་པ་ཡིན་ཟེར་བ་དང་། རྗེས་སུ་བྱ་བ་ཆེན་པོ་གང་མང་ཞིག་བསྒྲུབ་རྒྱུ་ཡིན་ཟེར་ན། རྒན་ཡོལ་བྱས་ཟིན་པའི་མི་རྒན་གཅིག་གི་ངོས་ནས་བཤད་ན་ཁ་ཕོ་ཆེ་དྲགས་པ་དང་དོན་ལ་གནས་མི་ཐུབ་པའི་སྐད་ཆ་ཞིག་ཆགས་འགྲོ་རྒྱུ་རེད། ཡིན་ནའང་རང་ནུས་ཅི་ཡོད་ཀྱིས་མུ་མཐུད་དུ་རྩོམ་ཡིག་འབྲི་བ་དང་དཔེ་དེབ་བསྒྲིག་རྒྱུ་སོགས་གང་ཐུབ་ཅི་ཐུབ་བྱ་རྒྱུའི་སེམས་ཤུགས་ཡོད་དེ། དགེ་བཤེས་ཆོས་གྲགས་ཀྱིས་མི་ཟས་ཡུན་རིང་བཟས་པའི་རིན་པ་རུ། དེབ་ཆུང་འདི་ཉིད་མིའི་ཡུལ་དུ་བཞག་གསུངས་པ་ལྟར། རང་ཉིད་ཀྱིས་དཔེ་དེབ་རེ་གཉིས་བྲིས་ནས་མི་ཡུལ་དུ་ལེགས་སྐྱེལ་ཕུལ་ཐུབ་པའི་སེམས་ཤུགས་དང་ཡིད་ཆེས་ཡོད། བཀའ་དྲིན་ཆེ།