ངོ་སྤྲོད་མདོར་བསྡུས།
བསོད་ནམས་དར་རྒྱས་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་སེལ་ཤུལ་རྫོང་གི་འབྲོག་ཁྱིམ་དཀྱུས་མ་ཞིག་ཏུ་སྐྱེས་ཤིང་། ཆུང་དུས་ནས་ཨ་ཕའི་རྟ་ཐོག་དང་ཨ་མའི་གླུ་སྐད་ཀྱི་ཁྲོད་ནས་འཚར་ལོངས་བྱུང་། 2000ལོར་དམག་ཏུ་ཞུགས་པ་དང་། 2002ལོར་དམག་ཁོངས་ནས་ཕྱིར་བུད། ད་ལྟ་ཁོང་ཉིད་འདབ་པ་རྫོང་ཉི་སྟེང་ལྗོངས་ཁུལ་དོ་དམ་ཅུས་སུ་ལས་གཉེར་བྱེད་བཞིན་ཡོད་ཅིང་། སྔ་གཞུག་ཏུ་སི་ཁྲོན་སློབ་ཆེན་གྱི་ཕུལ་བྱུང་དང་བླངས་པ་དང་། འདབ་པའི་ཉི་སྟེང་ལྗོངས་ཁུལ་གྱི་མི་རིགས་མཐུན་སྒྲིལ་སྔོན་ཐོན་མི་སྣ་སོགས་ཀྱི་བྱ་དགའ་ཐོབ་པར་མ་ཟད། ཁོས་འགན་འཁུར་བཞིན་པའི་གུང་གཞོན་ཚོགས་པའི་ཨུ་ཡོན་ལྷན་ཁང་ལ་གུང་གཞོན་ཚོགས་པའི་སི་ཁྲོན་ཞིང་ཆེན་གྱི“ལྔ་བཞིའི་དར་དམར་གྱི་གུང་གཞོན་ཚོགས་པའི་ཀྲི་པུའུ”ཡི་གཟི་བརྗིད་མཚན་སྙན་ཐོབ་པ་དང་། 2015ལོར། འདབ་པའི་ཉི་སྟེང་གི་གཞུང་ཕྱོགས་ཡུལ་སྐོར་ཕོ་ཉར་བདམས་པ་རེད།
བཅར་འདྲིའི་ལེའུ།
གསར་འགོད་པ། ཁམས་བཟང་། ཐོག་མར་ཁྱེད་རང་དམག་ཏུ་ཞུགས་པའི་སྐོར་གྱི་གཏམ་རྒྱུད་དེ་ཅིག་གླེང་རོགས་ལགས།
བསོད་ནམས་དར་རྒྱས། ལགས་སོ། །ངའི་ཨ་ཕ་ལགས་སྔོན་ཆད་དམག་བྱས་མྱོང་མོད། དམག་ཁོངས་ནས་ཕྱིར་འཐེན་བྱས་རྗེས་ཕ་ཡུལ་གྱི་རྩྭ་རར་མཚམས་རྟོག་འབྱེད་པའི་ལས་དོན་སྒྲུབ་བཞིན་པ་རེད། 1996ལོར། དཀར་མཛེས་ཁུལ་གྱི་སེལ་ཤུལ་རྫོང་དང་གསེར་རྟ་རྫོང་། སྡེ་དགེ་རྫོང་སོགས་ཀྱི་རྫོང་ཁག་11ལ་གངས་སྐྱོན་ཆེན་པོ་བྱུང་ཞིང་། ངའི་ཨ་ཕ་གངས་འཁྱག་ཁྲོད་དུ་རྟ་ལ་ཞོན་ནས་ཕར་ཚུར་དངོས་པོ་སྐྱེལ་བའི་སྣང་བརྙན་དེ་ངའི་སེམས་ནས་བརྗེད་རྒྱུ་མི་འདུག །སྐབས་དེར་ང་ལོ་10རེད། 2000ལོའི་དགུན་ཁར། ངས་ཨ་ཕ་ལགས་ཀྱི་ཞབས་རྗེས་སྙེག་སྟེ་དམག་ཏུ་ཞུགས་པ་དང་། སྦྱོང་བརྡར་དང་གྲུབ་འབྲས་ཀྱང་རེ་འགའ་ཐོབ་མྱོང་།
གསར་འགོད་པ། དེ་སྔོན་ཁྱེད་རང་ཆེད་ལས་གླུ་གཞས་སྒྱུ་རྩལ་པ་བྱས་མོད། རྒྱུ་རྐྱེན་ཅི་ཞིག་གིས་ཕྱིར་ཕ་ཡུལ་དུ་ལོག་པ་ཡིན།
བསོད་ནམས་དར་རྒྱས། ང་ནི་ཕ་ཡུལ་དང་བྲལ་ནས་གཞན་ཡུལ་འགྲིམ་ཞིང་སླར་ཡང་རང་ཡུལ་དུ་ལོག་པ་ཞིག་ཡིན། དམག་ཁོངས་ནས་ཕྱིར་འཐེན་རྗེས་སི་ཁྲོན་སློབ་ཆེན་གྱི་རྩོམ་རིག་དང་གསར་འགྱུར་སློབ་གླིང་དུ་སྐད་གདངས་དང་རོལ་དབྱངས་སློབ་གསོའི་ཆེད་ལས་སློབ་སྦྱོང་བྱས་པ་དང་། སློབ་མཐར་ཕྱིན་རྗེས་ཆེད་ལས་ཀྱི་གླུ་པ་བྱས་ནས། འགྲན་སྡུར་དང་གར་སྟེགས་གང་མང་ཐོག་སྐྱོད་མྱོང་། བྱ་དགའ་དང་གདེང་འཇོག་ཀྱང་དེ་ཚད་ཐོབ་མྱོང་ཡོད་དེ། གླུ་གཞས་སྒྱུ་རྩལ་འགྲིམ་པའི་ལམ་བུ་དེ་ནས་ཚོང་ལས་ཅན་གྱི་འཁྲབ་སྟོན་ཇེ་མང་ནས་ཇེ་མང་རེད། དེའི་འཚོ་བ་དེ་ང་ལ་འཚམས་པོ་མི་འདུག །ལྷག་པར་དུ་རང་གི་ཆེས་ཐོག་མའི་འདུན་པ་དང་ཕུགས་བསམ་དང་ཡེ་ནས་འདྲ་པོ་མི་འདུག །རྒྱུ་མཚན་དེ་འདྲ་ཞིག་གིས་ཕ་ཡུལ་དུ་ལོག་སྟེ། རོལ་མོ་གསར་རྩོམ་གྱི་དཀའ་ཁག་གདོང་དུ་ལེན་ཞོར་སྤྱི་ཕན་གྱི་ལས་ཀའི་ཁྲོད་ཞུགས་པ་ཡིན།
གསར་འགོད་པ། འོ་ན་ཁྱེད་རང་གིས་སྤྱི་ཕན་ལས་དོན་སྐོར་ནས་ལས་ཀ་ཅི་འདྲ་བསྒྲུབ་པ་ཡིན་ལགས།
བསོད་ནམས་དར་རྒྱས། ངའི་ཕ་ཡུལ་སེར་ཤུལ་རྫོང་ལ་མཚོན་ན“ཀྲུང་ཧྭའི་ཆུ་མཛོད”ཅེས་པའི་མཚན་སྙན་ལྡན་ཞིང་སྐྱེ་ཁམས་ཀྱི་གནས་བབ་གལ་ཆེན་ཡོད། རེད་དེ་རྩྭ་ཐང་དང་སྔོ་ཁེབས་ལ་བྱི་ལོང་དང་ཨ་བྲའི་གནོད་འཚེ་ཆེན་པོ་ཐེབས་ཀྱི་ཡོད། དང་ཐོག་ངས་བློས་མཐུན་གྲོགས་པོ་འགའ་དང་མཉམ་དུ་རྩྭ་ཐང་སྐྱེ་ཁམས་བཅོས་སྐྱོང་གི་དང་བླངས་རུ་ཁག་ཆུང་ཆུང་ཞིག་བཙུགས་ཏེ། སེར་ཤུལ་དང་དབོན་པོ། འཇུ་སྒར་སོགས་ཀྱི་ཤང་དང་གྲོང་རྡལ་གྱི་ཁོངས་སུ་བཅར་འདྲི་དྲིལ་བསྒྲགས་དང་། གླག་ཚང་བཟོ་བ་དང་ཝ་རིགས་སྐྱེ་སྤེལ་སོགས་ཀྱི་བྱི་ལོང་དང་ཨ་བྲའི་གནོད་འཚེ་འགོག་པའི་ལས་ཀ་གང་མང་བསྒྲུབས་པ་ཡིན། ད་བར་ལོ་བཅུ་ལྷག་ཟིན་ཞིང་དང་བླངས་རུ་ཁག་ཏུ་ཞུགས་མཁན་མི་ཐེངས་ཁྲི་3ལྷག་ཡོད་ཅིང་། རྩྭ་ཐང་སྐྱེ་ཁམས་ལེགས་བཅོས་ཆེན་པོ་བྱུང་ཡོད་རེད།
དེ་དང་དེ་ལྟ་བུའི་སྤྱི་ཕན་གྱི་ལས་ཀ་ནི་རང་ནུས་ཅི་ལྕོགས་ཀྱིས་སྒྲུབ་བཞིན་ཡོད། 2012ལོར“རིན་མེད་གུང་ཟས”ཀྱི་སྤྱི་ཕན་རྣམ་གྲངས་ལ་འབོད་སྐུལ་བྱས་ཏེ། སློབ་ཆུང་15ལ“རིན་མེད་གུང་ཟས”སྤྲད་ཐུབ་པ་དང་། 2013ལོར་དཀར་མཛེས་ཁུལ་གྱི“ཆུ་ཐིགས་ཀྱི་སྤྱི་ཕན”ཞེས་པ་སོགས་རྩ་འཛུགས་དང་སྣེ་ཁྲིད་བྱས་པ་ཡིན།
གསར་འགོད་པ། དངོས་གནས་རླབས་ཆེན་པོ་རེད། བཀའ་དྲིན་ཞུ། 2015ལོར། ཁྱེད་རང་འདབ་པའི་ཉི་སྟེང་གི་གཞུང་ཕྱོགས་ཀྱི་ཡུལ་སྐོར་ཕོ་ཉར་བདམས་འདུག །དེའི་སྐོར་ནས་ལས་དོན་ཅི་འདྲ་སྤེལ་ཡོད་ལགས།
བསོད་ནམས་དར་རྒྱས། དང་ཐོག་ངས་མི་རིགས་མཐུན་སྒྲིལ་དང་ཁོར་ཡུག་སྲུང་སྐྱོབ་ཀྱི་ལས་དོན་ཁྲོད་ཟབ་ཞུགས་བྱ་ཆེད། འདབ་པ་རྫོང་ཉི་སྟེང་ལྗོངས་ཁུལ་དོ་དམ་ཅུས་ཀྱི་ལས་སྒྲུབ་མི་སྣ་ཞིག་ཏུ་གྱུར་ཞིང་། དོན་སྙིང་ལྡན་པའི་ལས་ཀ་མང་པོ་ཞིག་སྒྲུབ་བཞིན་ཡོད། འདབ་པའི་ཉི་སྟེང་ནི་ཞིང་ཆེན་ཡོངས་ཀྱི་5Aརིམ་པའི་ལྗོངས་ཁུལ་རེད། ང་ཚོ་སྲིད་ཇུས་དྲིལ་བསྒྲགས་དང་བླངས་པའི་ཆ་ནས་ཉེ་འཁོར་གྱི་གྲོང་ཚོ་དང་། གཞིས་ཁུལ་དུ་མི་རིགས་སྲིད་ཇུས་དང་ཁྲིམས་སྲོལ་དྲིལ་བསྒྲགས་དང་། དམངས་ཕན་ཞབས་ཞུ། སྤྱི་ཕན་བྱེད་སྒོ་སོགས་སྒྲུབ་བཞིན་ཡོད།
གསར་འགོད་པ། ཁྱེད་རང་གིས་སྒྲུབ་བཞིན་པའི་ཞབས་ཞུའི་ལས་རིགས་དེ་དང་གླུ་གཞས་གསར་རྩོམ་བར་ལ་འབྲེལ་བ་ཅི་འདྲ་འདུག
བསོད་ནམས་དར་རྒྱས། ལོ་འདི་ཤས་རིང་ལ། ང་ཚོས་ལྗོངས་ཁུལ་གྱི་རིག་གནས་ཡུལ་སྐོར་མཉམ་འདྲེས་འཕེལ་རྒྱས་ཀྱི་བསམ་གཞིགས་ལ་དམིགས་ནས། གླུ་གཞས་ཆེད་བསྒྲིགས་གསར་རྩོམ་བྱས་པ་དང་། ང་རང་མི་སྒེར་གྱི་གླུ་གཞས་གསར་རྩོམ་ཐད་ལའང་གར་སྟེགས་ཆེན་པོ་བསྐྲུན་ཡོད། དེ་བཞིན་རྒྱལ་ཁབ་ཕྱི་ནང་གི་གར་སྟེགས་སུ་བུད་དེ་མི་རིགས་རིག་གནས་དང་སྒོས་སུ་ཕ་ཡུལ་གྱི་ཡུལ་སྐོར་ཁྱབ་བསྒྲགས་བྱས་ཡོད། དེ་ཡང་རིག་གནས་ནི་ཡུལ་སྐོར་གྱི་རྣམ་ཤེས་ཡིན་ཞེས་བཤད་ཆོག་ཆོག་ཡིན་ཞིང་། ང་རང་གིས་ཕུགས་འདུན་གླུ་ལ་གྱེར་བཞིན་ཕ་ཡུལ་སེམས་ཀྱིས་སྲུང་བཞིན་ཡོད་ལགས། །
གསར་འགོད་པ། ལགས་སོ་བཀའ་དྲིན་ཆེ། ཁྱེད་ཀྱིས་ཐོག་མའི་ཀུན་སློང་རྣམ་དག་དེ་མ་བོར་དེ་ཕ་ཡུལ་ལུང་པར་རང་ནུས་ཅི་ལྕོགས་ཀྱིས་སྲི་ཞུ་སྒྲུབ་པར་བཀའ་དྲིན་ཞུ། ལས་བཟང་པོ་འདི་མུ་ནས་མུ་རུ་བསྐྱོང་ཐུབ་པའི་བཀྲ་ཤིས་སྨོན་འདུན་ཞུ། །