གནས་ཆེན་དུང་རལ་བྲག་དཀར་ནི་དར་རྩེ་མདོ་ནས་ལེ་དབར་486.3གྱིས་ཆོད་པའི་དཔལ་ཡུལ་རྫོང་ཁྲོྃ་ཐར་ཆུས་འབའ་ཆུང་ཡུལ་ཤོག་དང་ཤིན་ཏུ་ཉེ་བའི་ས་ཆར་མཚོ་འཕགས་སྨི་3940ལྷག་ཡོད་པའི་ཁྲོྃ་ཆུ་རྒྱུད་པའི་གཡས་ཟུར་ཞལ་ནུབ་ཏུ་ཕྱོགས་ནས་གནས་ཡོད་ལ། སྤང་ནགས་འདྲེས་མའི་ལུང་པའི་འགྲམ་ངོགས་གནས་ཆེན་བྲག་རི་དཀར་པོ་སྤྲིན་དཀར་གྱི་ཕུང་པོ་ཐང་ལ་ལྷུང་བ་ལྟ་བུའི་མཛེས་སྡུག་དང་བརྗིད་ཉམས་གཅིག་ཏུ་སོང་བའི་གནས་ཆེན་ཞིག་ཡིན་ལ། དེ་ཡང་འགྲོ་འདུལ་དཔའ་བོ་རྡོ་རྗེའི་ཞལ་སྔར་ནས། ཁྲོྃ་ཡུལ་དགེ་བཅུ་འཛོམས་པ་ས་ཡི་ཐིག །གནས་ཆེན་ལྔ་ཡི་ཡ་གྱལ་དུང་རལ་བྲག །པད་འབྱུང་བྱང་སེམས་རིག་པ་འཛིན་རྣམས་ཀྱིས། །བྱིན་རླབས་དབབ་ནས་རབ་ཏུ་གནས་པར་མཛད། །ཅེས་གསུངས་པ་ལྟར། བཀྲ་ཤིས་ཁྲོྃ་གྱི་ཡུལ་ལྗོངས་དབྱར་དུས་སུ་གཡུ་གཞོང་སྔོན་པོ་ཐང་ལ་བཀྲམ་པ་ལྟ་བུ་ལ་མེ་ཏོག་སྣ་བརྒྱའི་བཀྲག་མདངས་མཚེར་ཞིང་རང་བྱུང་ཁམས་ཀྱི་སྤོས་ངད་ལྡང་བའི་རི་ལུང་ནགས་ཚལ་གྱི་ས་ཡི་དཀྱིལ་འཁོར་བབ་ཆགས་ཤིང་དྲན་པའི་དབང་པོ་ཉེ་བར་འཕྲོག་པའི་ཤར་དུ་ཨ་འཛོམས་འོད་གསལ་ཐེག་མཆོག་གླིང་གི་དུང་དཀར་སྒང་དང་ཞལ་སྤྲོད་ལྟ་བུའི་དུང་རལ་བྲག་དཀར་གྱིས་གཙོའི་གསེར་རི་དང་དངུལ་རི་སོགས་རིན་ཆེན་རིགས་སྣ་ཚོགས་ཀྱིས་གཏམ་ཞིང་གཏེར་གྱིས་ཕྱུག་པའི་འགར་ལུང་དང་སྟོང་མདའ་ལུང་པ། ཁྲོྃ་དགེ་ལུང་པ་སོགས་སུ་དལ་གྱིས་བཞུར་བའི་གཙང་པོའི་འགྲམ་ངོགས་སུ་གསེར་གྱི་བྱེ་མ་འདྲེན་པའི་རི་ལུང་ཐམས་ཅད་དྭངས་གཙང་གི་འབབ་ལྡན་དགའ་མའི་ཆུ་རྒྱུན་གཅིག་ཏུ་གཞོལ་ཞིང་གནས་ཆེན་དེའི་གཡས་གཡོན་དང་མདུན་རྒྱབ་འདབ་ཞོལ་སོགས་ནས་དལ་གྱི་རྒྱུ་བ་དང་བྲག་དཀར་དེའི་གཡས་གཡོན་གཉིས་སུ་མཁའ་ལྡིང་གི་གཤོག་པ་རྐྱོང་འདྲའི་ནགས་ཚལ་གྱི་སྒྲོ་མདངས་ངོམས་པའི་དབུས་སུ། བྲག་དཀར་དུང་གི་གཞལ་ཡས་སུ་བསྐལ་པ་སྟོང་གི་མི་འཇིགས་པའི་བྲག་རིའི་བྱ་སྐྱིབས་སུ་རྣལ་འབྱོར་ཕོ་མོ་རྣམས་ཀྱིས་ཞི་བའི་ཏིང་ངེ་འཛིན་ལ་ཐུགས་མཉམ་པར་བཞག་ཅིང་བཞུགས་པ་དང་། དབུས་རི་ཟངས་མདོག་དཔལ་རིའི་ཕོ་བྲང་གི་གནས་དང་། དེའི་རྩ་བར་མཁའ་དབྱིངས་མཚན་མའི་ངོ་མཚར་ཕུག་ནི་དམོད་པ་དྲག་སྔགས་ཀྱི་གནས་དང་། གཡས་རིར་རྩྭ་རིའི་གནས་ཀྱི་བཀོད་པ་ཚང་ཞིང་། གཞན་ཡང་མཚོ་རྒྱལ་བཞུགས་པའི་ཕུག་དང་།སྒྲོལ་མའི་ཕུག །བཙན་ཕུག་དང་གནོད་སྦྱིན་ཕུག །
ཞིང་སྐྱོང་ལྕམ་དྲལ་ཕུག་དང་། ཤིན་ཏུ་སྦས་ཕུག་གསུམ་སོགས་ཕུག་པ་ལྷ་ཁང་འདྲ་བ་དུ་མ་ཡོད་ཅིང་། དབུས་ཀྱི་གཡས་ཕྱོགས་སུ་གནས་མཆོག་རི་བོ་ཏ་ལའི་བཀོད་པ་ཚང་ཞིང་། བྱེ་བྲག་ཏུ་བཻ་རོའི་བསྒྲུབས་ཕུག་དང་། དཔལ་གྱི་དབང་ཕྱུག་གི་ཕུར་པ་བསྒྲུབས་པའི་ཕུག་ཆུང་དང་། རྨ་ཐོག་རིན་ཆེན་གྲུབ་པའི་བསྒྲུབས་ཆུ། ངོ་མཚར་རྡོ་ཡི་ཟ་ཚོགས་དབྱིབས་དང་ཁ་དོག་མི་འདྲ་བ་དུ་མ་ཞིག་ཡོད། ལྷོ་ཕྱོགས་ན་གཏུམ་དྲག་རོལ་པའི་དཀྱིལ་འཁོར་གྱི་བཀོད་པ་ཚང་ཞིང་། ཐར་དང་མ་ཐར་ཅི་རིགས་བྱུང་བའི་ཕུག་པ་དགུ་དང་།
བྱང་ཤར་མཚམས་ན་ལས་བཞིའི་དཀྱིལ་འཁོར་གྱི་བཀོད་པ་ཡོངས་སུ་རྫོགས་པ། གཡོན་རིར་རྩྭ་འདྲའི་གསང་ཕུག་ཏུ་རྒྱུད་སྡེ་གོང་འོག་གི་སྐུ་དང་ཡིག་འབྲུ་དབྱིབས་དང་ཁ་དོག་སོགས་ཀྱི་ཚུལ་དུ་བཞུགས་ཡོད་ལ། གནས་རི་དེའི་ནགས་ཚལ་དུ་རྒྱལ་ཁབ་རིམ་པའི་སྲུང་སྐྱོབ་ཀྱི་ཁོངས་གཏོགས་རི་སྐྱེས་སྲོག་ཆགས་ཀྱི་རིགས་ཤྭ་ཁྱུ་བརྒྱ་ཕྲག་མང་པོ་འཚོ་གནས་བྱས་ཡོད་ལ། གཞན་ཡང་གླ་བ་དང་བྱ་གག །རི་བོང་། དགོ་བ། རི་བྱི་སོགས་རྩྭ་གཟན་གྱི་རིགས་དང་། གཟིག་དང་གཡི་གྲུམ་སོགས་ཤ་གཟན་གྱི་རིགས་དེ་དག་གིས་ལ་ཡན་དུ་རྩྭ་ཟ་ཞིང་ལུང་ཡན་དུ་ཆུ་བཏུང་ནས་བག་ཡངས་སུ་རྒྱུ་བ་དང་། ནགས་ཚལ་གྱི་སྡོང་པོ་དང་ཡལ་ག་རྣམས་སུ་སྤྲ་དང་སྤྲེའུའི་ཡང་རྩལ་འགྲན་ཞིང་འདབ་ཆགས་ཀྱི་རིགས་རྒོད་དང་གླག་ཕོ་རོག་ཕུག་རོན་འུག་པ་ནེའུ་ལེ་སྲིན་བྱ་དང་། འཇོལ་མོ་དང་ཁི་ལེ་རྒྱ་བྱ་སོགས་འདབ་ཆགས་སྣ་ཚོགས་གཤོག་རྩལ་ངོམས་ཤིང་སྐད་སྙན་སྣ་ཚོགས་འབྱིན་པས་རྣ་བའི་བདུད་རྩིར་གྱུར་པ་སོགས་ངོ་མཚར་གྱི་བཀོད་པ་ཕུན་སུམ་ཚོགས་པ་དང་། ཁྱད་པར་དུ་ལུག་ལོའི་དུས་སུ་རྒྱ་དཀར་ནག་སོགས་འཛམ་བུ་གླིང་གི་གནས་བདག་དང་གནས་ཕྲན་རྣམས་འདིར་འདུས་པའི་འགྱུར་ཁྱད་དང་བསྟུན་ནས་རྒྱ་ཆེའི་མང་ཚོགས་རྣམས་ཀྱིས་གནས་མཇལ་ལྷ་བསང་ཕྱག་བསྐོར་སོགས་དགའ་སྟོན་ལ་རོལ་ཞིང་། རྟ་རྩལ་འགྲན་པ་དང་ཤེད་ཤུགས་ངོམ་པ་དང་གླུ་ལེན་ཞིང་ཞབས་བྲོ་འཁྲབ་ཅིང་། དགོན་སྡེ་ཁག་གིས་ཡུལ་ལྷ་གསོ་བ་དང་། གཏོར་མ་འབུལ་ཞིང་ཚོགས་འཁོར་བསྐོར་བ་སོགས་ཀྱི་ལོ་རྒྱུས་ཡོད་པར་གྲགས། དེང་དུས་ཡུལ་སྐོར་ལས་རིགས་འཕེལ་རྒྱས་གཏོང་ཆེད་རྒྱལ་ཁབ་ཀྱིས་རོགས་སྐྱོར་བྱས་ཏེ་ས་གནས་འདིར་ཡུལ་སྐོར་ས་ཚུགས་ཀྱི་ལས་གཞི་འཛུགས་བསྐྲུན་བྱ་རྒྱུའི་འཆར་འགོད་གནང་བཞིན་པ་དང་བཅས་མ་འོངས་པའི་ཁེ་ཕན་ནི་སང་ཉིན་གི་ཉི་མ་དང་ལྷན་དུ་འཆར་ངེས་པའི་དགོངས་འཆར་ལྷུག་སྩོལ་གནང་བཞིན་པ་བཅས་ལགས་སོ།