སྨྱན་སྦྱོར་གསར་པའི་དུས་རབས་ཀྱི་གསར་འགྱུར་ཁྱབ་སྤེལ་ཐབས་ལམ།

དེང་གི་དུས་འདིར་དེང་རབས་ཆ་འཕྲིན་ལག་རྩལ་གྱི་རམ་འདེགས་འོག་མི་རྣམས་ཀྱི་གསར་འགྱུར་བསྡུ་ལེན་བྱེད་སྟངས་ལ་འགྱུར་ལྡོག་ཆེན་པོ་བྱུང་འདུག །ལྷག་པར་དུ་བོད་འབྲེལ་ས་ཁུལ་གྱི་དཔལ་འབྱོར་འཕེལ་རྒྱས་དང་རྨང་གཞིའི་སྒྲིག་བཀོད་ཀྱི་ཆ་རྐྱེན་རིམ་བཞིན་ཇེ་ལེགས་སུ་ཕྱིན་པ་དང་བསྟུན་ནས་སྤྱི་བྱིངས་སྨྱན་སྦྱོར་（大众传媒）དེ་ཁྱབ་གདལ་ཇེ་མགྱོགས་སུ་ཕྱིན་པ་དང་། བོད་རིགས་མང་ཚོགས་ཀྱི་ཆ་འཕྲིན་བསྡུ་ལེན་གྱི་ཁོར་ཡུག་ཉིན་བཞིན་ཕུན་སུམ་ཇེ་ཚོགས་སུ་ཕྱིན་ཏེ། སྤྱི་བྱིངས་སྨྱན་སྦྱོར་དེ་ཁོང་ཚོའི་འཚོ་བའི་ནང་རིམ་བཞིན་གལ་ཆེར་འགྲོ་བཞིན་ཡོད། ཆ་འཕྲིན་གྱི་འབྱོར་ལམ་ཇེ་མང་དུ་སོང་བ་དེས་མང་ཚོགས་ཀྱི་འཚོ་བའི་ཁྲོད་དུ་བདེན་རྫུན་གཉིས་ལྡན་གྱི་ཆ་འཕྲིན་སྣ་མང་འབྱོར་བའི་སྣང་ཚུལ་བྱུང་དང་འབྱུང་བཞིན་ཡོད། དེར་བརྟེན་གསར་འགྱུར་ལས་བྱེད་མི་སྣས་གསར་འགྱུར་ཁྱབ་སྤེལ་ཁོར་ཡུག་ལེགས་སུ་གཏོང་བ་དང་གསར་འགྱུར་གྱི་སྤུས་ཚད་མཐོ་རུ་གཏོང་དགོས་ན་ཁྱབ་སྤེལ་གྱི་ཐབས་ལམ་ནས་འགོ་བཙུགས་ཏེ་ཁྱབ་སྤེལ་གྱི་འདུ་ཤེས་དང་བྱ་ཐབས་གསར་བརྗེ་བྱས་ནས་མང་ཚོགས་ཀྱི་སྣ་མང་ཅན་གྱི་དགོས་མཁོ་སྐོང་བ་དང་སྤྱི་ཚོགས་ལ་སྤུས་ལེགས་ཀྱི་གསར་འགྱུར་ནང་དོན་མཁོ་འདོན་བྱ་རྒྱུ་ཤིན་ཏུ་གལ་ཆེ་བར་སྙམ།

གཅིག །གསར་འགྱུར་ཁྱབ་སྤེལ་ཐད་འཕྲད་པའི་གནད་དོན།

རང་རྒྱལ་གྱི་ཆ་འཕྲིན་ལག་རྩལ་རྒྱུན་ཆད་མེད་པར་འཕེལ་རྒྱས་བྱུང་བ་དང་བསྟུན་ནས་མཉམ་འབྲེལ་དྲ་བ་ནི་མི་རྣམས་ཀྱི་འཚོ་བའི་གྲུབ་ཆ་གལ་ཆེན་ཞིག་ཏུ་གྱུར་ཡོད། སྨྱན་སྦྱོར་གསར་པའི་དུས་རབས་སུ་མི་རྣམས་ཀྱིས་དུས་དང་རྣམ་པ་ཀུན་ཏུ་སྒུལ་བདེའི་སྒྲིག་ཆས་ལ་བརྟེན་ནས་དྲ་རྒྱའི་ཐོག་སྐབས་དོན་གསར་འགྱུར་ལ་ཤེས་རྟོགས་དང་རྒྱུས་ལོན་བྱེད་བཞིན་ཡོད། བོད་འབྲེལ་ས་ཁུལ་ཁྱོན་ཡོངས་ནས་བརྗོད་ཚེ་སྲོལ་རྒྱུན་སྨྱན་སྦྱོར་ལ་ཡུལ་དུས་ཀྱི་ཤུགས་རྐྱེན་ཐེབས་ནས་གསར་འགྱུར་ཁྱབ་སྤེལ་དང་བརྒྱུད་བསྒྲགས་ཀྱི་ནུས་པའང་དེ་སྔོན་དང་བསྡུར་ན་བཀག་རྒྱ་ཆེན་པོ་ཐེབས་འདུག །སྨྱན་སྦྱོར་གསར་པ་འགོག་ཐབས་མེད་པའི་ངང་འཕེལ་རྒྱས་ཆེན་པོ་འགྲོ་བཞིན་ཡོད། ལྷག་པར་དུ་དཀའ་གནད་དང་དོ་ཁུར་བྱེད་མཁན་མང་བ། གཞན་ཀློག་པ་པོས་གསར་འགྱུར་ལྟ་ཀློག་གི་གོམས་གཤིས་དང་ལྟ་ཀློག་གི་རེ་བ་ཡང་མུ་མཐུད་དུ་འགྱུར་ལྡོག་འབྱུང་བཞིན་ཡོད་པ་རེད། སྤྱི་ཚོགས་འཚོ་བ་མགྱོགས་མྱུར་ཅན་དུ་འགྱུར་བ་དེས་མི་རྣམས་ཆག་གྲུམ་ཅན་གྱི་དཔེ་ཀློག་ལ་གོམས་སུ་བཅུག་པ་དང་། ཆ་འཕྲིན་བསྡུ་ལེན་བྱེད་སྐབས་གོ་ཆོད་རང་བཞིན་དང་། སྟབས་བདེའི་རང་བཞིན། མཉམ་འགུལ་རང་བཞིན་བཅས་ལ་སྔར་ལས་དོ་སྣང་ཆེན་པོ་བྱེད་བཞིན་ཡོད། དུས་མཚུངས་སུ་གསར་འགྱུར་གྱི་དོན་དངོས་རང་བཞིན་དང་དེའི་རིན་ཐང་གི་ཁྲིད་ཕྱོགས་ལའང་བླང་བྱ་སྔར་ལས་མཐོ་བ་བཏོན་ཡོད།

གཉིས། གསར་འགྱུར་ཁྱབ་སྤེལ་གྱི་ཐབས་ལམ་གསར་པ་སྔོག་འདོན་བྱ་དགོས།

1.གསར་དར་སྨྱན་སྦྱོར་མཉམ་འདྲེས་བྱས་ནས་གསར་འགྱུར་ཁྱབ་སྤེལ་གྱི་ཐབས་ལམ་ཕུན་སུམ་ཚོགས་པར་གཏོང་དགོས།

དྲ་རྒྱའི་ལག་རྩལ་འཕེལ་རྒྱས་སུ་སོང་བ་དང་བསྟུན། ཆ་འཕྲིན་ཁྱབ་སྤེལ་བྱེད་པའི་ཐབས་ལམ་ཡང་སྔར་ལས་མང་བ་བྱུང་ཡོད། གསར་འགྱུར་ལས་བྱེད་མི་སྣས་གསར་འགྱུར་གྱི་ཤུགས་རྐྱེན་ནུས་པ་དང་ཁྱབ་སྤེལ་ཁྱབ་ཁོངས་རྒྱུན་ཆད་མེད་པར་ཆེ་རུ་གཏོང་འདོད་ན། ངེས་པར་སྨྱན་སྦྱོར་གསར་པའི་ཁྱབ་སྤེལ་ཐབས་ལམ་སྟབས་བསྟུན་གྱིས་སྤྱད་དེ་གསར་འགྱུར་ཁྱབ་སྤེལ་སྣ་མང་ཅན་དུ་འགྱུར་བར་འབད་དགོས། གསར་འགྱུར་སྨྱན་སྦྱོར་གྱིས་མིག་སྔར་དར་ཁྱབ་ཆེ་བའི་རང་ངོས་སྨྱན་སྦྱོར་（自媒体）རྣམ་པར་བརྟེན་ནས་ཁྱབ་སྤེལ་ཐབས་ལམ་རྒྱ་སྐྱེད་གཏང་ཆོག་པར་མ་ཟད། དེ་ཉིད་སྲོལ་རྒྱུན་སྨྱན་སྦྱོར་དང་མཉམ་འདྲེས་བྱེད་པར་ཚོད་ལྟ་ཡང་བྱ་ཆོག །རང་རྒྱལ་གྱིས་ཁྱབ་བསྒྲགས་བྱས་པའི《ཀྲུང་གོའི་མཉམ་འབྲེལ་དྲ་རྒྱའི་འཕེལ་རྒྱས་གནས་ཚུལ་བསྡོམས་རྩིས་སྙན་ཞུ》ཐེངས་50པའི་ཐོག་ནས་2022ལོའི་བར་རང་རྒྱལ་གྱི་དྲ་དམངས་ཀྱི་གྲངས་འབོར་དུང་ཕྱུར་10.51ཟིན་ཡོད་ལ། འདིའི་ཁྲོད་བརྙན་ཐུང་སྤྱོད་མཁན་གྱི་གཞི་ཁྱོན་འཕར་ཚད་མགྱོགས་པ་དང་དྲ་དམངས་སྤྱི་ཡོངས་ཀྱི་91.5%བཟུང་ཡོད་པས་བརྙན་ཐུང་རིམ་བཞིན་རང་རྒྱལ་གྱི་མང་ཚོགས་ལ་ཆ་འཕྲིན་ཐོན་ཁུངས་ཐོབ་པའི་བགྲོད་ལམ་གཙོ་བོར་གྱུར་ཡོད་པ་ཤེས་ཐུབ། དེར་བརྟེན་བོད་འབྲེལ་ས་ཁུལ་གྱི་གསར་འགྱུར་ལས་ཁུངས་ཀྱིས་བརྙན་ཐུང་སྤྱད་དེ་གསར་འགྱུར་ཁྱབ་སྤེལ་བྱེད་སྟངས་རྒྱ་སྐྱེད་གཏོང་རྒྱུར་ཚོད་ལྟ་བྱ་ཆོག །འདི་ལྟར་བྱས་ཚེ་གསར་འགྱུར་ལྟ་ཀློག་མཁན་གྱི་ཚོགས་སྤྱི་ཕུན་སུམ་ཇེ་ཚོགས་སུ་བཏང་བ་མ་ཟད་གསར་འགྱུར་ཁྱབ་སྤེལ་གྱི་རྣམ་པ་གསར་གཏོད་བྱས་པས་གསར་འགྱུར་ཁྱབ་སྤེལ་གྱི་ཁྱབ་ཁོངས་ཀྱང་ཆེ་རུ་ཕྱིན་ཡོད་པ་རེད།

2.སྤྱི་ཚོགས་དང་འབྲེལ་འདྲིས་ཟབ་མོ་བྱས་ནས་ཁྱབ་སྤེལ་གྱི་མཉམ་འགུལ་རང་བཞིན་ཆེ་རུ་གཏོང་དགོས།

སྨྱན་སྦྱོར་གསར་པའི་དུས་རབས་སུ་མི་རྣམས་ཀྱིས་དུས་དང་རྣམ་པ་ཀུན་ཏུ་སྒུལ་བདེའི་སྒྲིག་ཆས་དང་མཉམ་འགུལ་མཉེན་ཆས་སྣ་ཚོགས་ལ་བརྟེན་ནས་མི་གཞན་དང་དུས་ཐོག་ཏུ་འབྲེལ་འདྲིས་བྱེད་བཞིན་ཡོད། དྲ་རྒྱས་མི་རྣམས་ལ་དུས་ཚོད་ཀྱི་ཚད་བཀག་ལས་བརྒལ་དུ་བཅུག་ནས་བརྙན་ཤེལ་ལ་བརྟེན་ནས་གཞན་གྱི་ཉེ་འགྲམ་དུ་བྱུང་བའི་དོན་དག་ལ་རྒྱུས་ལོན་བྱེད་དུ་བཅུག །དཔེར་ན་སྤྱི་ཚོགས་འབྲེལ་འདྲིས་སྟེགས་བུའི་ཁྲོད་ཆེས་རྒྱུན་མཐོང་གི་Plogདང་Vlogསོགས་ལྟ་བུ། Plogནི་པར་རིས་པོད་ཁུག་ཡིན་ལ། Vlogནི་བརྙན་འཕྲིན་པོད་ཁུག་ཡིན། བྱེད་ཐབས་འདི་གཉིས་ཀྱི་ནང་དོན་འགྲེམ་སྟོན་གྱི་རྣམ་པ་མི་འདྲ་མོད། འོན་ཀྱང་ཚང་མས་སྤྱི་ཚོགས་འབྲེལ་འདྲིས་དང་ཁྱབ་སྤེལ་གྱི་ཕན་འབྲས་ལེགས་པོ་ཐོན་ཐུབ། ན་གཞོན་ཚོགས་པའི་ཁྲོད་བཀོལ་སྤྱོད་ཀྱི་ཁྱབ་ཁོངས་ཅུང་ཆེ། དེར་བརྟེན་ཚགས་པར་སོགས་སྲོལ་རྒྱུན་གྱི་གསར་འགྱུར་སྨྱན་སྦྱོར་གྱིས་གསར་འགྱུར་ཁྱབ་སྤེལ་རྣམ་པ་གསར་གཏོད་བྱེད་འདོད་ན་Plogདང་Vlogསོགས་ལ་སློབ་སྦྱོང་བྱས་ནས་གསར་འགྱུར་ཁྱབ་སྤེལ་གྱི་སྟེགས་བུ་མང་དུ་བཏང་ནས་གསར་འགྱུར་ཁྱབ་སྤེལ་ཁྲོད་ཀྱི་མཉམ་འགུལ་རང་བཞིན་དང་ཤུགས་རྐྱེན་ཐེབས་ཤུགས་ཆེ་རུ་གཏོང་དགོས།

3.གསར་གཏོད་ཀྱི་འདུ་ཤེས་འཕེལ་རྒྱས་བཏང་ནས་གསར་གཏོད་འཕེལ་རྒྱས་ལ་སྐུལ་མ་གཏོང་དགོས།

སྤྱི་ཚོགས་འཕེལ་རྒྱས་ཀྱི་འགྲོས་དང་བསྟུན་ནས་གསར་འགྱུར་གྱི་བྱ་གཞག་འདི་འཕེལ་རྒྱས་གཏོང་དགོས་ཚེ་གསར་འགྱུར་ལས་དོན་པས་ངེས་པར་དུ་རང་ཉིད་ཀྱི་འདུ་ཤེས་ནས་འགོ་བཙུགས་ཏེ་གསར་འགྱུར་ཁྱབ་སྤེལ་གྱི་ཐབས་ལམ་གསར་བརྗེ་བྱེད་པ་དང་། སྤྱི་ཚོགས་ཀྱི་འཚོ་བ་དངོས་ལ་གཞིགས་ནས་མང་ཚོགས་ཀྱི་དགོས་མཁོ་རྒྱུས་ལོན་བྱས་ནས་ནང་དོན་ལྡན་པ་དང་དོན་སྙིང་ལྡན་པའི་གསར་འགྱུར་རྩོམ་འབྲི་བ་ལ་འབད་དེ། དུས་རབས་ཀྱི་དགོས་མཁོ་དང་དམངས་ཀྱི་དགོས་མཁོ་དང་མཐུན་པ་བྱེད་དགོས་པར་མ་ཟད། དམངས་ཀྱིས་ཆེས་དོ་ཁུར་བྱེད་ས་དང་རྒྱུས་ལོན་བྱེད་འདོད་པའི་གསར་འགྱུར་འགོད་རྒྱུར་བརྩོན་དགོས། དཔེར་ན་དམངས་འཚོའི་གསར་འགྱུར་འགོད་སྐབས་བདེན་པ་བདེན་ཐུབ་དང་ཡིད་རྟོན་རུང་བ་བྱེད་དགོས་པ་དང་། སྐབས་དོན་གསར་འགྱུར་འགོད་སྐབས་གོ་བདེ་ཤེས་སླ་དང་མང་ཚོགས་དང་འབྲེལ་འདྲིས་ཐུབ་པ་བྱས་ཏེ་གསར་འགྱུར་ཁྱབ་སྤེལ་གྱི་རིགས་པའི་གཞུང་ལུགས་འཕེལ་རྒྱས་དང་གསར་གཏོད་བྱེད་པར་སྐུལ་འདེད་གཏོང་དགོས། གཞན་སྨྱན་སྦྱོར་གསར་པ་འདི་འཕེལ་རྒྱས་སྔར་ལས་ལེགས་པ་འབྱུང་འདོད་ན། ཚན་རིག་ལག་རྩལ་ཧུར་ཐག་སྒོས་ནང་འདྲེན་བྱེད་དགོས་ལ། ལག་རྩལ་གསར་གཏོད་དང་སྒྲིག་ཆས་གསར་གཏོད་བྱེད་པར་བརྟེན་ནས་གསར་འགྱུར་ཁྱབ་སྤེལ་བྱེད་ཤུགས་དང་ཁྱབ་སྤེལ་སྤུས་ཚད་མཐོ་རུ་བཏང་སྟེ་མང་ཚོགས་ལ་གསར་འགྱུར་ཉམས་ལེན་སྔར་ལས་ལེགས་པ་བྱ་དགོས།

4.ཆེད་ལས་ཤེས་ལྡན་མི་སྣའི་ཚོགས་པ་གསོ་སྐྱོང་བྱས་ནས་དྲང་ཕྱོགས་ཀྱི་རིན་ཐང་ལ་ཁྲིད་སྟོན་བྱེད་ཤུགས་ཆེ་རུ་གཏོང་དགོས།

བྱང་ཚད་མཐོ་བའི་གསར་འགྱུར་ཤེས་ལྡན་མི་སྣས་གསར་འགྱུར་ཁྱབ་སྤེལ་རྣམ་པ་གསར་གཏོད་བྱེད་པར་ནུས་པ་གལ་ཆེན་ཐོན་ཡོད། གསར་འགྱུར་ལས་དོན་པས་མང་ཚོགས་ཀྱི་དགོས་མཁོ་དང་མཐུན་པའི་སྤུས་ཚད་མཐོ་བའི་གསར་འགྱུར་རྩོམ་སྒྲིག་བྱས་ཚེ་གཞི་ནས་གསར་འགྱུར་ཁྱབ་སྤེལ་ལ་རྒྱུན་ཆད་མེད་པར་སྐུལ་འདེད་གཏོང་ཐུབ་པ་དང་གསར་འགྱུར་གྱི་ཤུགས་རྐྱེན་ཐེབས་ཤུགས་ཆེ་རུ་གཏོང་ཐུབ། ཐོག་མར་གསར་འགྱུར་ལས་དོན་པས་གསར་འགྱུར་རྩོམ་སྒྲིག་བྱེད་སྐབས་དངོས་ཐོག་བདེན་འཚོལ་དང་བདེན་པ་བདེན་ཐུབ་དང་ཕན་ནུས་ལྡན་པ་བྱ་དགོས། ཤེས་ལྡན་མི་སྣ་རྨང་གཞིར་བྱས་ཏེ་སྨྱན་སྦྱོར་གསར་པའི་དྲ་རྒྱའི་སྟེགས་བུ་བསྐྲུན་རྒྱུར་སྐུལ་འདེད་གཏོང་དགོས། ཤེས་ལྡན་མི་སྣ་འདེམས་སྒྲུག་བྱེད་སྐབས་དེའི་གསར་འགྱུར་གྱི་ཚོར་སྐྱེན་རང་བཞིན་དང་གསར་གཏོད་བྱེད་ནུས་གཙོ་གནད་དུ་བཟུང་ནས་རྟོག་ཞིབ་བྱ་དགོས་པ་དང་། ཁྱོན་ཡོངས་ཀྱི་མིག་རྒྱང་དང་ཉམས་སད་ཐེག་ཐུབ་པའི་ཆེད་ལས་ལག་རྩལ་ཡོད་དགོས་ཤིང་། སྤུས་ལེགས་ཀྱི་གསར་འགྱུར་འཚོལ་འབྲི་དང་ཁྱབ་བསྒྲགས་མངོན་འགྱུར་བྱས་ཏེ་སྨྱན་སྦྱོར་ལས་སྟེགས་གསར་པ་འཛུགས་སྐྲུན་བྱེད་པར་སྐུལ་འདེད་གཏོང་དགོས།

གསར་འགྱུར་གནས་པའི་རིན་ཐང་ནི་དུས་ཐོག་དང་དོན་དངོས་ནུས་ལྡན་གྱི་དོན་རྐྱེན་མང་ཚོགས་ལ་སྙན་ཞུ་བྱ་རྒྱུ་དེ་ཡིན། ད་ལྟའི་དུས་རིམ་དུ་གསར་དར་སྨྱན་སྦྱོར་འབོར་ཆེན་ཐོན་པ་དང་། གསར་འགྱུར་གྱི་ནང་དོན་ཁྱབ་སྤེལ་བྱེད་ཚད་མགྱོགས་ཤིང་ཁྱབ་ཁོངས་རྒྱ་ཆེ་མོད། འོན་ཀྱང་དེའི་ནང་དོན་ལ་དགག་ལན་སློག་པ་དང་གཏིང་ཟབ་པོ་མེད་པ། ཚད་ངེས་ཅན་ཞིག་གི་ཐོག་བདེན་པ་བདེན་ཐུབ་དང་ཡང་དག་པའི་རིན་ཐང་གི་ཁྲིད་ཕྱོགས་མེད་པས། སྲོལ་རྒྱུན་སྨྱན་སྦྱོར་གྱིས་གསར་འགྱུར་ཁྱབ་སྤེལ་རྣམ་པ་གསར་གཏོད་བྱེད་པར་ཚོད་ལྟ་བྱེད་སྐབས། ཡང་དག་པའི་རིན་ཐང་ཁྲིད་ཕྱོགས་ལ་ཤུགས་སྣོན་བརྒྱབ་སྟེ། གསར་འགྱུར་སྟབས་བསྟུན་དང་སྟབས་བདེའི་ངང་ཁྱབ་སྤེལ་བྱེད་པ་དང་དུས་མཚུངས་སུ། གཏིང་ཟབ་ཚད་ལྡན་པ་དང་། གསར་འགྱུར་གྱི་རིན་ཐང་དེ་བས་ཀྱང་མཚོན་ཐུབ་པར་བྱ་དགོས། ཕྱོགས་གཅིག་ནས་གསར་འགྱུར་གྱི་རིན་ཐང་ཤུགས་རྐྱེན་ཆེ་རུ་གཏོང་བ་དང་ཕྱོགས་གཞན་ཞིག་ནས་མང་ཚོགས་ལ་དུས་ཐོག་གི་ཆ་འཕྲིན་ཐོབ་པའི་དགོས་མཁོ་སྐོང་ཐུབ། མང་ཚོགས་ཀྱིས་གསར་འགྱུར་ལ་ལྟ་སྐབས་དྲང་ཕྱོགས་ཀྱི་རིན་ཐང་ལྟ་བར་ཁྲིད་སྟོན་བྱས་ཏེ་སྤྱི་ཚོགས་བརྟན་བརླིང་དང་རྒྱུན་མཐུད་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས།

མདོར་ན་སྨྱན་སྦྱོར་གསར་པའི་དུས་རབས་འོག་སྲོལ་རྒྱུན་སྨྱན་སྦྱོར་གྱིས་འཕེལ་རྒྱས་ཀྱི་ཐབས་ལམ་འཚོལ་འདོད་ན་དུས་ཐོག་ཏུ་འདུ་ཤེས་གསར་བརྗེ་དང་འཕེལ་རྒྱས་ཀྱི་དུས་བབ་ལ་འགྱུར་ལྡོག་གཏོང་དགོས། དེར་བརྟེན་གསར་འགྱུར་ལས་བྱེད་པས་ཁྱབ་སྤེལ་གཞུང་ལུགས་དང་། མཉམ་འགུལ་རང་བཞིན། ཆེད་ལས་རང་བཞིན་སོགས་ཀྱི་ཐད་ནས་ཁྱབ་སྤེལ་རྣམ་པ་གསར་གཏོད་བྱེད་པའི་ཐབས་ལམ་འཚོལ་དགོས། གསར་འགྱུར་བརྒྱུད་སྒྲོག་བྱེད་སྐབས་གསར་འགྱུར་ལས་བྱེད་པས་གསར་འགྱུར་གྱི་སྤུས་ཚད་དང་དོན་དངོས་རང་བཞིན་ལ་ཚོད་འཛིན་བྱ་རྒྱུར་ཤུགས་སྣོན་བརྒྱབ་ནས་མི་དམངས་མང་ཚོགས་ལ་དེ་བས་སྤུས་ལེགས་ཀྱི་གསར་འགྱུར་ཞབས་ཞུ་མཁོ་འདོན་བྱས་ཏེ་སྤྱི་ཚོགས་འཕེལ་རྒྱས་ལ་རྒྱུན་ཆད་མེད་པར་སྐུལ་འདེད་གཏོང་དགོས། །