ནམ་རྒྱུན་ང་ཚོས་རྩིས་འཁོར་གྱི་ལོ་རྒྱུས་བཤད་པའི་སྐབས་སུ་གནའ་རབས་ཀྱི་ཐག་མདུད་དང་རྩིས་གཞོང་སོགས་དེའི་ལོ་རྒྱུས་ཀྱི་ཆ་ཤས་ཤིག་ཏུ་བརྩི་བཞིན་ཡོད་མོད། དེང་རབས་ཀྱི་གློག་རྡུལ་རྩིས་འཁོར་ནི་དུས་རབས་20པའི་དུས་འགོར་འགོ་བརྩམས་པ་ཡིན་པས་ད་ལྟའི་བར་མི་ལོ་བརྒྱ་མ་གཏོགས་འགོར་མེད། དེའི་བར་རྩིས་འཁོར་རིག་པར་བསམ་ཡུལ་ལས་འདས་པའི་འཕེལ་རྒྱས་ཆེན་པོ་བྱུང་བ་དང་། རྩིས་འཁོར་རིག་པའི་དཔེ་དེབ་ཀྱི་གྲངས་འབོར་དེ་རིག་ཚན་གཞན་དག་བསྡོམས་པས་གྲངས་ལས་བརྒལ་བ་ཟིན་ཡོད། དེང་སང་སྤྱི་ཚོགས་ཐོག་ལས་རིགས་ཚང་མ་རྩིས་འཁོར་དང་ཁ་འབྲལ་ཐབས་མེད།
དེ་ཐེངས་ང་ཚོས་ཕྱོགས་གཉིས་ནས་རྩིས་འཁོར་སློབ་སྦྱོང་གི་ཁ་ཕྱོགས་ངོ་སྤྲོད་བྱ་རྒྱུ་ཡིན་ཏེ། གཅིག་ནི་སྲོལ་རྒྱུན་ལས་རིགས་ཁྲོད་ཀྱི་རྩིས་འཁོར་བཀོལ་སྤྱོད་དང་གཉིས་ནི་ཆེད་ལས་ཀྱི་རྩིས་འཁོར་ཆེད་མཉེན་པ་ཡིན།
སྲོལ་རྒྱུན་གྱི་ལས་རིགས་ཁྲོད་དུ་ང་ཚོས་ཤེས་དགོས་པ་ལ་རྩིས་འཁོར་སྒོ་འབྱེད་པ་དང་། ཡིག་ཆའི་འདྲ་བཟོ་དང་བསུབ་དོར། མཉེན་ཆས་ཀྱི་སྒྲིག་སྦྱོར་དང་བསུབ་དོར་སོགས་རྩིས་འཁོར་གྱི་གཞི་རྩའི་བཀོལ་སྤྱོད། དེའི་ཐོག་སྐད་འཕྲིན་དང་ཡིག་སྒམ་སོགས་རྒྱུན་སྤྱོད་མཉེན་ཆས་ཁ་ཤས་ཀྱི་བེད་སྤྱོད། Officeཡང་ན་Wordསོགས་གཞུང་སྒྲུབ་མཉེན་ཆས་ཀྱི་བཀོལ་སྤྱོད་སོགས་ཤེས་དགོས། ལས་རིགས་གང་ཞིག་ཡིན་རུང་། རྩིས་འཁོར་གྱི་རྨང་གཞིའི་ཤེས་བྱ་འདི་དག་བྱང་ཆུབ་པ་ཤེས་དགོས། ང་ཚོས་འཛུགས་སྐྲུན་ཇུས་འགོད་དང་སྙོམས་ངོས་ཇུས་འགོད། བརྙན་འཕྲིན་སྒྲིག་སྦྱོར་སོགས་ལས་རིགས་གསུམ་དཔེར་བཞག་ནས་ལས་རིགས་དེར་མཁོ་བའི་མཉེན་ཆས་འགའ་ཤས་ངོ་སྤྲོད་བྱ་རྒྱུ་ཡིན།
༡ འཛུགས་སྐྲུན་ཇུས་འགོད། ལས་རིགས་འདིས་AutoCADངེས་པར་དུ་ཁོང་དུ་ཆུད་དགོས། དེ་ནི་འཛུགས་སྐྲུན་གྱི་ངོས་སྙོམས་རི་མོ་གསར་འཛུགས་དང་བཟོ་བཅོས་བྱེད་ཆས་ཡིན། འཛུགས་སྐྲུན་གྱི་ཚད་གཞི་མི་ནོར་བ་མཉེན་ཆས་དེ་ལ་བརྟེན་དགོས། SketchUpདང་3dsMaxསོགས་རྩ་གསུམ་མཉེན་ཆས་བཀོལ་ནས་འཛུགས་བསྐྲུན་གྱི་དཔེ་དབྱིབས་ཇུས་འགོད་བྱེད་ཐུབ་པར་མ་ཟད། རྩ་གསུམ་གསལ་རིས་འུད་སྒྲོག་བྱས་ནས་ཇུས་འགོད་ཀྱི་མཐའ་མའི་རྣམ་པ་ལ་ལྟ་ཞིབ་བྱེད་ཐུབ། གལ་ཏེ་ཁྱོད་ཀྱིས་འཛུགས་སྐྲུན་ལས་རིགས་ལ་བཞུགས་འདོད་ཡོད་ན། AutoCADབྱང་ཆུབ་པའི་རྨང་གཞིའི་ཐོག SketchUpཡང་ན་3dsMaxནང་གི་གཅིག་འདེམས་ནས་སློབ་སྦྱོང་བྱ་ཆོག
༢ ངོས་མཉམ་ཇུས་འགོད། ངོས་མཉམ་ཇུས་འགོད་པས་ཤེས་དགོས་པའི་མཉེན་ཆས་གཉིས་ནི་Photoshopདང་Ilustratorཡིན། Photoshopགཙོ་བོ་པར་ཆས་རི་མོ་བཟོ་བཅོས་བྱེད་ཆས་དང་Illustrator ཕྱོགས་ཚད་རི་མོ་ཇུས་འགོད་བྱེད་ཆས་ཡིན། མཉེན་ཆས་འདི་གཉིས་ཀྱི་འཇུག་སྒོ་ལ་དཀའ་ལས་ཆེན་པོ་མེད་མོད། འོན་ཀྱང་མཁས་པ་ཆགས་དགོས་ན་དུས་ཡུན་རིང་པོར་སྦྱོང་བརྡར་བྱེད་དགོས།
༣ བརྙན་ཟློས་དྲས་སྒྲིག་ལས་རིགས་ལ་ཆེད་ལས་བརྙན་རིས་དྲས་སྒྲིག་མཉེན་ཆས་Adobe Premiereའདི་ཁོང་དུ་ཆུད་དགོས། གལ་ཏེ་ཁྱེད་རང་ཀུ་ཤུ་རྟགས་ཅན་གྱི་རྩིས་འཕྲུལ་བཀོལ་མཁན་ཡིན་ན། Final Cutའདེམས་ནའང་ཆོག །གལ་ཏེ་ཆེད་ལས་ཀྱི་བརྙན་རིས་དྲས་སྒྲིག་པ་མིན་ན། བེད་སྤྱོད་ཧ་ཅང་སྟབས་བདེ་བའི་iMovieདང་ཅེན་ཡིན་(剪映)འདི་གཉིས་གང་རུང་གཅིག་སློབ་སྦྱོང་བྱ་ཆོག
གཤམ་ནས་ང་ཚོས་རྩིས་འཁོར་ཆེད་ལས་པའི་ཕྱོགས་ནས་ངོ་སྤྲོད་བྱ་རྒྱུ་ཡིན། དེ་ལ་སྲ་ཆས་བཟོ་བཀོད་པ་དང་མཉེན་ཆས་བཟོ་བཀོད་པ་གཉིས་སུ་དབྱེ་ཆོག །སྲ་ཆས་བཟོ་བཀོད་པས་གློག་ལམ་དང་ཉིང་ལྷེབ། བརྡ་རྟགས། ཕྲ་འཇུག་རྣམ་པའི་མ་ལག་སོགས་སྲ་ཆས་ཐད་ཀྱི་ཤེས་བྱ་གང་མང་ཞིག་ཤེས་དགོས་པས། ལོ་མང་པོའི་ཆེད་ལས་སློབ་སྦྱོང་དགོས་པས་ང་ཚོས་དེ་རིང་ཞིབ་ཕྲ་ཞུ་རྒྱུ་མིན། གཙོ་བོ་ངོ་སྤྲོད་ཞུ་རྒྱུར་རྩིས་འཁོར་མཉེན་ཆས་བཟོ་བཀོད་པའི་ལས་རིགས་གཙོ་བོ་ཁ་ཤས་ཡིན།
༡ མདུན་སྣེ་བཟོ་བཀོད་པ། ལས་རིགས་འདིས་སྤྱོད་མཁན་གྱི་མཐུད་ངོས་དང་ཉམས་ལེན་ལ་དམིགས་ནས། HTMLདང་CSS JavaScriptསོགས་མདུན་སྣེའི་ལག་རྩལ་ལ་སྤྱད་ནས་དྲ་ཚིགས་དང་ཁ་པར་མཉེན་ཆས་ཀྱི་ཇུས་འགོད་དང་གསར་བཟོ་བྱེད་པ། ལས་རིགས་འདི་ལོ་འདི་དག་ནང་འཕེལ་རྒྱས་ཆེན་པོ་བྱུང་ཡོད་པ་དང་མཉེན་ཆས་བཟོ་བཀོད་པའི་ལས་རིགས་ནང་མི་གྲངས་མང་ཤོས་དེ་ཡིན།
༢ མཇུག་སྣེ་བཟོ་བཀོད་པ། ཞབས་ཞུ་འཕྲུལ་ཆས་ཀྱི་མཉེན་ཆས་དང་གཞི་གྲངས་མཛོད་སོགས་གསར་བཟོ་དང་སྒུལ་སྲུང་བྱ་རྒྱུ་འགན་ཁུར་དང་། Java Python PHP Rubyསོགས་མཇུག་སྣེའི་སྐད་རིགས་གང་རུང་ཞིག་ཁོང་དུ་ཆུད་དགོས་པར་མ་ཟད། Linuxརྒྱུད་ཁུངས་ལ་རྒྱུས་མངའ་ཡོད་དགོས།
༣ སྤོ་འགུལ་ཉེར་སྤྱོད་བཟོ་བཀོད་པ། སྤོ་འགུལ་ཉེར་སྤྱོད་བྱ་རིམ་གསར་སྤེལ་བྱེད་པར་བློ་རྩེ་གཅིག་ཏུ་གཞོལ་ནས། ཀུ་ཤུ་ཁ་པར་གྱི་མ་ལག་iOSདང་Android རྒྱུད་ཁུངས་སྟེང་གི་ཉེར་སྤྱོད་བྱ་རིམ་གསར་བཟོ་བྱེད་པ། འདི་ནི་ཁ་པར་གཅིག་པུར་ལ་དམིགས་པའི་ལས་རིགས་ཤིག་ཡིན།
༤ གཞི་གྲངས་མཛོད་གསར་སྤེལ་དང་དོ་དམ། གཞི་གྲངས་མཛོད་ཇུས་འགོད་དང་གསར་བཟོ། དོ་དམ་སོགས་འགན་ཁུར་དགོས་པ་དང་། གཞི་གྲངས་ཀྱི་འཛུགས་སྐྲུན་དཔེ་དབྱིབས་དང་འཚོལ་བཤེར་ལེགས་འགྱུར་དང་གཞི་གྲངས་ཀྱི་བདེ་འཇགས་སོགས་ཀྱི་ཤེས་བྱ་ཤེས་དགོས།
༥ མིས་བཟོས་རིག་སྟོབས་དང་འཕྲུལ་ཆས་སློབ་སྦྱོང་། སྐད་རིགས་ཆེན་པོའི་དཔེ་དབྱིབས་ཇུས་འགོད་དང་སྦྱོང་བརྡར་བྱེད་པ་དང་གཞི་གྲངས་ཆེན་པོ་ཐག་གཅོད་བྱེད་པ་བརྒྱུད་ནས། འཕྲུལ་ཆས་ཀྱི་རང་འགུལ་ཅན་དང་རིག་ནུས་ཅན་མངོན་འགྱུར་བྱེད་པ། ལས་རིགས་འདི་ནི་གསར་བྱུང་ལས་རིགས་ཤིག་ཡིན་པ་དང་། མ་འོངས་པའི་རྩིས་འཕྲུལ་ལས་རིགས་ཚ་ཤོས་འགྱུར་བར་ཐེ་ཚོམ་མེད།
ང་ཚོས་སློབ་གྲྭ་དང་རྩིས་འཁོར་གསོ་སྦྱོང་འཛིན་གྲྭ་སོགས་ནས་སློབ་སྦྱོང་བྱེད་ཆོག་པར་མ་ཟད། དྲ་ཐོག་ནས་ཤེས་བྱ་དེ་དག་ལ་སློབ་སྦྱོང་བྱེད་ཆོག །འོས་སྦྱོར་བྱ་རྒྱུའི་དྲ་ཐོག་སློབ་གྲྭ་ལ་ཀྲུང་གོའི་སློབ་ཆེན་MOOCདང་མུའུ་ཁོའི་སློབ་ཁྲིད་དྲ་བ་གཉིས་ཡོད། ཀྲུང་གོའི་སློབ་ཆེན་MOOCནང་ལ་རིན་མེད་ཀྱི་ཀྲུང་གོའི་སློབ་ཆེན་གྱི་སློབ་ཚན་མང་པོ་འདུས་ཡོད་པར་མ་ཟད་རྩིས་འཁོར་ཆེད་ལས་ཀྱི་སློབ་ཚན་མང་པོ་ཡོད། མུའུ་ཁོའི་སློབ་ཚན་དྲ་བ་ནི་རྩིས་འཁོར་ཆེད་ལས་པས་སློབ་སྦྱོང་བྱེད་སའི་དྲ་ཚིགས་ཤིག་ཡིན། རྩིས་འཁོར་གྱི་སློབ་ཚན་གསར་པ་དང་ལས་གཞི་ལ་དམིགས་པའི་སློབ་ཚན་གང་མང་འདུས་ཡོད། །