འཚར་ལོངས་ཀྱི་གོ་རིམ་ཁྲོད་འབོར་བཞིན་པའི།
ཁྱོད་ཀྱི་བྱིས་དུས་དང་ལང་ཚོ།
ཁྱོད་ཀྱིས་གསུབ་འགྱིག་གིས་བསུབ་སྟེེ།
ཡང་བསྐྱར་བྲིས་ཆོག་པའི་ལས་བྱ་ལྟ་བུ་ཞིག་མིན་པ་ཨེ་ཤེས།
ཡང་ན་རྒྱུགས་ཤོག་ཐོག་གི་ཁ་སྐོང་ལས་ཀྱང་།
ལན་འདེབས་དཀའ་བའི།
མི་ཚེའི་རྙོག་འཛིང་དང་དཀའ་སྡུག་རེ་རེ།
ཁྱོད་ཀྱི་མདུན་ཐད་དུ་འཚང་ཀ་བརྒྱབ་ནས་ཡོད་པ་ཨེ་ཤེས།
ཁྱོད་ཨ་ཕས་ཉིན་གྱི་སེམས་ཚེགས་ཀྱིས་འཚོས་ཡོད།
ཁྱོད་ཨ་མས་མཚན་གྱི་རྨི་ལམ་གྱིས་སྲུང་ཡོད།
ཆེས་དྭངས་གཙང་གི་རྩྭ་མགོའི་ཟིལ་པ་ལྟ་བུའི།
སེམས་གཤིས་དང་འཛུམ་མདངས།
ཆ་མེད་ཀྱི་མི་ཚོགས་ལ་འདང་མེད་དུ་སྟོན་དུས།
མི་ཚོགས་ཀྱི་ཁ་རླངས་རྫོབ་དྲག་པས།
ཁྱོད་ཀྱི་ནང་སེམས་ནག་ནོག་དྲི་མས་གོས་སོང་ངམ།
ཁྱོད་ཨ་ཕའི་ལོ་ཟླ་གཤར་ཤུལ་གྱི་དཔྲལ་བའི་གཉེར་མདུད་གསེང་གི།
དཀའ་སྡུག་གི་ན་བུན་ཕྱག་མཁན་ཡིན།
ཨ་མའི་སྐྲ་ལོའི་གསེང་གི་ལོ་ཟླའི་ཁ་བ་བཞུ་མཁན་ཡིན།
ཁྱོད་ཀྱི་འཇིག་རྟེན་དུ།
མཚན་ལ་ཨ་མས་བཤད་པའི་གནའ་གཏམ་ནང་གི་སྤྱང་ཀི།
ཉིན་ལ་བར་སྣང་ཁམས་ཀྱི་སྤྲིན་པའི་དབྱིབས་ཀྱིས་འགུལ་ཡོང་ངམ།
དུས་རབས་འདིའི་ནམ་མཁར་དགུ་ཚིགས་ཀྱི་ས་ཁྲ་ཕྱིར་ལྡོག་གིས་འབྲི་དུས།
ཁྱོད་ཚོས་སྐར་ཚོགས་ཀྱི་ལུག་ཁྱུ་གང་དུ་འདེད་བསམ་ཡོད།
ངས་ཁྱོད་ཚོ་མི་གཉིས་ཀྱི་བར་ལ་སྒོར་ལྔ་བྱིན་ཚེ།
ཁྱོད་ཚོས་མི་རེ་ལ་སྒོར་གཉིས་དང་ཟུར་ལྔ་རེ་ཐོབ་པ་ཤེས་འདུག་ཀྱང་།
སྤྱི་ཚོགས་ཀྱི་ཁ་རླངས་མཐུག་པོའི་འོག་ནས།
གཉིས་ཁར་གཉིས་བསྣན་ཡང་བཞི་མི་ཐོབ་པའི་འགལ་འདུ་མང་པོ་འཕྲོ་རིམ་འཕྲོར་
ཁྱོད་ཀྱི་ནང་སེམས་སུ་ཚེར་མའི་མེ་ཏོག་ལྟར་འབུས་ཡོང་བ་ཨེ་ཤེས།
འདི་ནས་བརྩིས་པའི་མི་ལོ་བཅུའི་རྗེས་སུ།
འུ་ཅག་སླར་ཡང་གནས་འདི་ནས་མཇལ་སྲིད་དམ།
དེ་དུས་ཁྱོད་ཚོའི་ཐོག་ཏུ་ད་ལྟའི་གཤིས་ཀ་སྔར་ལྟར་བསྡད་ཡོད་དམ།
སྤྱི་ཚོགས་ཀྱི་ཁ་རླངས་རྫོབ་པོས་ཁྱོད་ཚོ་གཞན་ཞིག་ཏུ་བསྒྱུར་འགྲོའམ། །