ལོ་ཟླ་ཉི་ཞག་འཐུར་བཞུར་གཙང་པོ་འདྲ། །
ལང་ཚོ་གཉེར་མ་གྱེན་ཟློག་མཁའ་རླངས་འདྲ། །
སྙིང་ལ་འཁྱིལ་བའི་གནའ་གཏམ་ལྗིད་པོ་དེ། །
ཡུན་གྱིས་གྱེས་ཀྱང་ཇེ་གསལ་འདང་ཆེན་ཞིག།།
པིར་རྩལ་སླར་ཡང་བསྒྱུར་བ་སྙན་ངག་ཡིན། །
གཏམ་གྱི་གཏེར་སྒོ་དུས་དྲུག་ནམ་ཞིག་ཕྱེ། །
གོས་ཀྱི་ཁ་དོག་ཉིན་མཚན་ནམ་ཞིག་བརྗེ། །
སྲོག་ལྡན་སུ་ཡིན་རང་རང་མ་འབད་ན། །
ནམ་ཞིག་གོ་སྐབས་གོལ་ནོར་ཤེས་ཤེས་ཁར། །
སྟ་གོན་ཡིག་འབྲུར་རྐོ་བ་སྙན་ངག་ཡིན། །
ཉིན་མོར་ཉི་འོད་འཕྲོ་བ་གཤིས་ལུགས་དང་། །
མཚན་མོར་སྐར་ཚོགས་བཀྲ་ཡང་དེ་ག་ཙམ། །
སྒྱུ་འཕྲུལ་ཀློང་ན་སེར་འོད་རབ་འཕྲོ་དང་། །
གསེང་ལ་དམར་ཙམ་བཞུགས་ཀྱང་དེ་ག་ཙམ། །
མཁྱེན་སྟོབས་ཤེས་རབ་རྒྱས་པ་སྙན་ངག་ཡིན། །