འདན་མའི་བུ་མོའི་ནག་སྣུམ་མགོ་སྐྱེས་རྒྱ་ལྕང་ལོ་མའི་ལན་བུ་མཛེས། །
བྲང་སྐྱེས་འབུར་གོང་རབ་དཀར་འོ་འཛིན་དུང་གི་བུམ་པ་ཆ་གཅིག་འགྲིག། །
ཞལ་གྱི་པདྨོ་འཛུམ་དཀར་འཕྲོ་བའི་མུ་ཏིག་དོག་པའི་ཚེམས་ཕྲེང་བསྟར། །
ཁྲ་ཆུང་མིག་གིས་ལྕགས་ཀྱུས་བཏབ་ཅིང་རྫི་མ་འཁྲབ་པའི་བརྡ་ལ་མཁས། །
མཛངས་མའི་མཛེས་ཞལ་མཁུར་ཚོས་དམར་བའི་ཐུན་མཚམས་གསར་པའི་མདངས་ཀྱིས་འཁྱུད། །
མགྲིན་པའི་འོ་མཚོའི་རླབས་ཀྱིས་སྒྲ་འབྱིན་སྙན་ཚིག་དྲི་ཟའི་རོལ་མོ་བཀྲོལ། །
ལྡེམ་འགྲོས་རླུང་གི་གཤོག་རྩལ་གཡོ་བའི་ལུས་ཀྱི་ལྕུག་ཕྲན་མཚར་སྡུག་རྫོགས། །
ཉག་མ་གཅིག་གིས་ཕྲ་ལ་འཁྲིལ་བའི་རྐེད་སྐབས་ཡོད་མེད་འཕྱང་མོ་ཉུག །
དྲན་པའི་སྙིང་གི་སྦུ་གུར་དྲངས་པའི་དུང་སེམས་ཟླ་བའི་བཞིན་བཟང་མ། །
ལང་ཚོའི་ཆང་གིས་ཉིན་མཚན་མྱོས་པའི་མདའ་ལྔའི་མེ་ཏོག་སྤྲིངས་ལ་མཁས། །
དགའ་བའི་བསུང་ངད་རྟག་ཏུ་སྤྲོ་བའི་གངས་དཀར་སེམས་ཀྱི་ཕ་ས་འདིར། །
དུང་སེམས་འདྲེས་པའི་ཆུ་དང་འོ་མའི་རྒྱ་མཚོའི་རླབས་རྒྱུན་དལ་ཅིག་འགག །
ལང་ཚོའི་རྦ་རླབས་བ་ལ་ཧ་ཡི་རྟ་མཆོག་འགྲོས་ལྡན་འགྲན་པའི་དབུས། །
རྒྱ་སེ་མེ་ཏོག་རྐང་གཅིག་བཞད་པའི་འདན་མའི་ན་ཆུང་སྒྲོལ་མའི་ཞལ། །
ནུབ་གཅིག་གཟིམ་མལ་རྨི་ལམ་དག་ཞིང་པོ་ཊ་ལ་ཡི་གནས་མཆོག་ནས། །
སྙན་ངག་བདུད་རྩིའི་བཏུང་བ་འཇོ་བའི་དྲན་པའི་ཁྱེའུས་གྲོགས་སུ་འགུག །
དྭངས་མའི་རྩེར་སོན་འཆར་བྱེད་དབང་པོ་མིག་གི་རྒྱལ་མོས་མཐོངས་སུ་ཕྱེས། །
སྨྲ་མཁས་ངག་གིས་གཏམ་གྱི་མཛའ་མོ་ཐོས་འཛིན་བུ་ལ་སྦྱིན་མཁས་མ། །
སྦྱར་བྱུང་ངད་ལྡན་དྲི་བཟང་དཀུས་པའི་སྣ་ཡི་རྣམ་ཤེས་དབང་བསྒྱུར་མ། །
པདྨའི་མཆུ་སྦྱོར་ཞིམ་པའི་འགྲམ་ཆང་ལྕེ་འོག་བདུད་རྩི་འབེབས་མཁས་མ། །
དྲན་པའི་ཡོལ་བ་ཕྱེས་པའི་ངོགས་སུ་འདབ་ལྡན་སྟོང་གིས་མཚར་སྡུག་ཞིག། །
རྐང་དྲུག་བུང་བ་འབུམ་གྱིས་འཕྲུལ་མངའ་རྫི་མ་འཁྲབ་པའི་གར་ལ་མཁས། །
སྐར་ཚོགས་བྱེ་བས་བྱུགས་པའི་མཛེས་སྡུག་གཅིག་ཏུ་སྤུངས་པའི་སྨན་ཆུང་མ། །
སེམས་ཀྱི་བརྟན་པ་ཅིག་ཅར་འཕྲོག་པའི་འདན་སྲས་ཡིད་ཀྱི་ལྷ་མོ་ལགས། །
སུམ་ཅུ་རྩ་གསུམ་མཐོ་རིས་བུ་མོས་མཛེས་སྡུག་འཕྲོག་པའི་དཔའ་མོའི་གཟུགས། །
དྲི་ཟའི་རྒྱལ་མོའི་མགྲིན་པ་ཟག་པའི་དབྱངས་ཀྱི་ཐིག་ལེ་མཆོག་མ་ཞིག །
བརྟན་གཡོ་ཀུན་ལ་མིག་གི་བདུད་རྩིའི་ལོངས་སྤྱོད་འབེབས་མཁས་རྗེས་ཆགས་མས། །
སྒྱུ་མའི་སེམས་ལ་ལས་ཀྱི་བག་ཆགས་བག་ལ་ཉལ་བ་ལན་གཅིག་སློང་། །
བཙན་པོའི་ཐུགས་ཀྱི་ལང་ཚོ་སྨིན་པའི་སྨན་མཆོག་ཀོང་ཇོ་ཛ་ན་མོས། །
རྣམ་དཀར་ཐུགས་བསྐྱེད་བོད་ཡུལ་མུན་གླིང་མཐའ་འདུལ་དྲེད་པ་ཟིལ་གནོན་གྱིས། །
གདུག་པའི་སྲིན་མོ་གན་རྐྱལ་འགྱེལ་བའི་ནོར་འཛིན་གྲུ་མོ་གཡས་པ་རུ། །
འཕགས་མའི་ཞལ་སྐྱིན་འདན་ཡུལ་མཛེས་མའི་ལང་ཚོའི་ས་བོན་བསྐྲུན་ཞེས་གྲགས། །
ཁོ་བོའི་ཤེས་རབ་མིག་འདིའི་ཁྱོན་དུ་ཁྱེད་ཀྱི་མཚར་སྡུག་གཟི་བྱིན་ཀུན། །
ལྷག་མ་མེད་པ་ཆུད་པར་གྱུར་ཀྱང་སྨྲ་བྱེད་གཏམ་གྱི་སྒོ་མོ་འདིས། །
བརྗོད་པའི་ངག་ལ་རྫོགས་མཐའ་མེད་པས་ཐོས་ཆུང་རྣ་བའི་བུ་ག་རུ། །
ཤོང་ཚད་ཙམ་དུ་རན་པར་སྨྲ་འདི་མཚོ་བྱུང་ལྷ་མོས་ངག་ནས་དྲངས། །