དེ་ཡང་ཀོང་ཏུང་ཞིང་ཆེན་ཀྲན་ཅང་ལེ་ཀྲུའུ་གྲོང་ཁྱེར་ཆིང་ཏུའོ་གྲོང་རྡལ་དུ་ནམ་མཁའ་གཡའ་དག་ཅིང་། ཕར་བལྟས་ན་མཁའ་མཐའི་ལིའུ་ཧྲ་མཚོ་འགག་དང་གཅིག་འདྲེས་སུ་ཆགས་པ་དང་གཉིས་སུ་མེད། ཉ་ལས་གྲུ་ཁ་ནས་བསྐྱོད་དེ་མཚོ་ལེ་6ཙམ་ཕྱིན་པ་ན་ངར་ལྕགས་ཀྱི་སྒྲིག་ཆས་སྔོ་དཀར་འདྲེས་མ་ཞིག་མཐོང་བ་དང་། དེ་ནི་ཀྲན་ཅང་གྲོང་ཁྱེར་གྱི་རྒྱ་མཚོའི་གསོ་སྤེལ་ལས་སྟེགས་ཐོག་མ་སྟེ་ཧེ་ཝུའེ་ཨང་རྟགས་དང་པོ་ཡིན་ཏེ། 2022ལོའི་ཟླ་4པར་དངོས་སུ་སྤྱོད་འགོ་ཚུགས་པ་དང་། གསོ་སྤེལ་གྱི་ཆུ་ཚད་སྨི་གྲུ་བཞི་ལྷམ་པ་ཁྲི་1.5ཟིན་ཡོད། མཚོ་ཁོངས་སུ་ཉེ་བའི་ཧེ་ཝུའེ་ཨང་རྟགས་གཉིས་པའང་ད་ལོའི་ཟླ་6པའི་ཚེས་20ཉིན་དངོས་སུ་ཆུ་ཐོག་ཏུ་བསྐྱོད་ཅིང་། རང་སྒུལ་འབྲིད་ཟས་དང་དྲ་ལམ་ལྟ་སྐུལ་སོགས་ཀྱི་རིག་ནུས་སྒྲིག་ཆས་ཡོད་པར་མ་ཟད། རིམ་པ་15ཅན་གྱི་མཚོ་རླུང་འགོག་ཐུབ་པ་དང་། ངལ་ནུས་60%གྲོན་ཆུང་བྱས་ཏེ། གསོ་སྤེལ་གྱི་ཆུ་ཚད་ལྡབ་འགྱུར་མངོན་འགྱུར་བྱུང་བས། གསོ་སྤེལ་གྱི་འཁོར་ཡུན་གཅིག་ལ་ཉ་རིགས་ཐོན་འབབ་སྤྱི་རྒྱ་ཁྲི་50ལོན་ཐུབ།
ཆུ་ཐོག་གསོ་སྤེལ་དེ་རྒྱ་མཚོའི་གཏིང་ཟབ་ས་དང་རྒྱང་རིང་སར་བསྐྱོད་པ་དང་བསྟུན། རྒྱ་འགྲེམ་པའི་སྲོལ་རྒྱུན་ཉ་ལས་དེ་ཚན་རིག་སྒྲིག་ཆས་རབ་དང་རིམ་པས་ཚབ་བྱས་ཤིང་། ཧེ་ཝུའེ་ཨང་རྟགས་དང་པོ་དང་ཧེ་ཝུའེ་ཨང་རྟགས་གཉིས་པས་ཀྲན་ཅང་གིས་རྒྱ་མཚོའི་གཏིང་ཟབ་ས་དང་རྒྱང་རིང་སར་སྤྲི་དཀར་གྱི་བཅུད་ལེན་པར་རྨང་གཞི་བརྟན་པོ་བཏིང་ཡོད།
ད་ལོའི་ཟླ་4པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀོང་ཏུང་ཞིང་ཆེན་ཀྲན་ཅང་གྲོང་ཁྱེར་ཏུང་ཧའེ་གླིང་ཕྲན་དུ་གནས་པའི་རྒྱལ་ཁབ་ཀྱི་863ཇུས་འགོད་ཀྱི་རྣམ་གྲངས་ཏེ་མཚོ་ཆུའི་གསོ་སྤེལ་ཡན་ལག་རྣམ་གྲངས་རྟེན་གཞི་རུ་གཟིགས་ཞིབ་གནང་སྐབས། ཀྲུང་གོ་ནི་མི་གྲངས་དུང་ཕྱུར་14ལྡན་པའི་རྒྱལ་ཁབ་ཆེན་པོ་ཞིག་ཡིན་ཏེ། ལྟོ་རྒྱགས་ཀྱི་གནད་དོན་ཐག་གཅོད་ལེགས་པོ་དང་། འབྲུ་རིགས་བདེ་འཇགས་ལ་འགན་སྲུང་བྱེད་དགོས་ན། ཟས་རིགས་ཆེན་པོའི་འདུ་ཤེས་འཛུགས་དགོས་ཏེ། སྐམ་ས་ནས་ཟས་རིགས་འཚོལ་དགོས་པར་མ་ཟད་རྒྱ་མཚོ་རུའང་ཟས་རིགས་འཚོལ་བ་དང་། མཚོ་ཐོག་གི་འབྲོག་ར་དང་རྒྱ་མཚོའི་འབྲུ་མཛོད་བསྐྲུན་དགོས་པ་དང་། རྒྱ་མཚོའི་གསོ་སྤེལ་སྒྲིག་ཆས་དང་རིག་ནུས་ཉ་ལས་རྒྱ་ཆེར་སྤེལ་ཏེ། རྒྱ་མཚོའི་ཉ་ལས་དེ་ཆ་འཕྲིན་ཅན་དང་རིག་ནུས་ཅན། དེང་རབས་ཅན་དུ་རིམ་སྒྱུར་བྱེད་དགོས་པ་བསྟན།
ཀྲང་ཅང་གི་བྱ་ཐབས་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་ནང་ལྟར་ལག་བསྟར་བྱས་པ་ཡིན་ཏེ། ཀྲན་ཅང་གྲོང་ཁྱེར་གྱི་འབྲེལ་ཡོད་འགན་ཁུར་པའི་མཚམས་སྦྱོར་ལྟར་ན། ཧེ་ཝུའེ་ཨང་རྟགས་གསུམ་པ་ནི་མིག་སྔར་འཛུགས་སྐྲུན་བྱེད་བཞིན་ཡོད་དེ། ཧེ་ཝུའེ་ཡི་ཉ་ལས་ཀྱི་རྣམ་གྲངས་རབ་དང་རིམ་པ་ཐོན་སྐྱེད་བྱས་པ་དང་བསྟུན། ཀྲན་ཅང་དང་ཐ་ན་ཀོང་ཏུང་མཚོ་ཁོངས་སུ་ཆུ་ལས་གསོ་སྤེལ་སྔར་བས་ཇེ་ལེགས་ཇེ་རྒྱས་དང་རིག་ནུས་ཅན་དུ་གཏོང་བའི་ཚ་རླབས་གསར་པ་ཞིག་འཕྱུར་ཞིང་། བརྗིད་ཉམས་ལྡན་པའི་མཚོ་ཐོག་གི་འབྲུ་མཛོད་ཅིག་བསྐྲུན་ཡོད་པ་རེད། །