ཏང་འཛུགས་སྐྲུན་བྱ་རྒྱུ་དེ་ལས་གྲྭ་རླབས་པོ་ཆེ་ཞིག་ཏུ་བརྩིས་ནས་སྐུལ་སྤེལ་གཏོང་བ་མ་ཟད། ཐོག་མཐའ་བར་གསུམ་དུ་ཏང་གིས་ཏང་དོ་དམ་དང་ཏང་ནན་སྐྱོང་བྱེད་པའི་རྩ་དོན་དང་བྱེད་ཕྱོགས་རྒྱུན་འཁྱོངས་བྱ་རྒྱུ་ནི་ང་ཚོའི་ཏང་གི་གསར་གཏོད་ཆེན་པོ་ཞིག་ཡིན་ལ། ཏང་འཛུགས་རྒྱལ་འཛུགས་དང་ཏང་དར་རྒྱལ་དར་གྱི་ཐབས་མཆོག་གལ་ཆེན་ཞིག་ཀྱང་ཡིན། ལོ་ངོ་100ལྷག་གི་ཏང་གི་ལོ་རྒྱུས་ལ་ཕྱིར་མིག་བལྟས་ཚེ། ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་རྒྱུན་མཐུད་འབད་འཐབ་བྱས་པ་དང་། ཀྲུང་ཧྭ་མི་རིགས་ཡར་ལངས་པ་དང་ཕྱུག་པོར་གྱུར་པ་ནས་སྟོབས་ལྡན་དུ་གྱུར་པའི་བར་གྱི་འཕུར་མཆོང་རླབས་པོ་ཆེ་བྱུང་བ་རེད། འཕུར་མཆོང་རླབས་པོ་ཆེ་འདི་ནི་སྤྱི་ཚོགས་བསྒྱུར་བཀོད་བྱེད་པའི་བྱ་གཞག་རླབས་པོ་ཆེ་ཡིན་ལ། དུས་མཚུངས་སུ་རང་ངོས་བསྒྱུར་བཀོད་བྱེད་པའི་ལས་གྲྭ་རླབས་པོ་ཆེ་ཞིག་ཀྱང་ཡིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ང་ཚོས་ཕྱོགས་ཡོངས་ནས་ཏང་ནན་སྐྱོང་བྱ་རྒྱུ་དེ་དུས་རབས་གསར་པའི་ཏང་འཛུགས་སྐྲུན་གྱི་མངོན་གསལ་དོད་པའི་བརྗོད་དོན་གཙོ་བོར་བརྩིས་ནས། གསར་གཏོད་ཀྱི་འདུ་ཤེས་རབ་དང་རིམ་པ་ཞིག་བཏོན་པ་དང་། འཕོ་འགྱུར་གྱི་ལག་ལེན་རབ་དང་རིམ་པ་ལག་བསྟར་བྱས་པ། ལམ་ལུགས་དང་ཚད་གཞི་རབ་དང་རིམ་པ་ཞིག་འཐུས་སྒོ་ཚང་དུ་བཏང་བ་བཅས་བྱས་ཐོག །ཏང་འཛུགས་སྐྲུན་གྱི་ལས་གྲྭ་རླབས་པོ་ཆེ་འདི་རྒྱུན་ཆད་མེད་པར་འཕེལ་རྒྱས་གཏིང་ཟབ་ཏུ་འགྲོ་བར་སྐུལ་འདེད་བཏང་སྟེ་ཕྱོགས་ཡོངས་ནས་ཏང་ནན་སྐྱོང་བྱེད་པའི་མ་ལག་རགས་ཙམ་བསྐྲུན་ཡོད།
ཕྱོགས་ཡོངས་ནས་ཏང་ནན་སྐྱོང་བྱེད་པའི་མ་ལག་འཛུགས་རྒྱུ་ནི་ཁྱོན་ཡོངས་རང་བཞིན་དང་གསར་གཏོད་རང་བཞིན་ལྡན་པའི་ལས་དོན་ཞིག་ཡིན། དུས་རབས་གསར་པའི་ལོ་ངོ་10ཡི་ནང་། ང་ཚོའི་ཏང་གིས་རང་ངོས་གསར་བརྗེའི་ཆོས་ཉིད་ལ་ངོས་འཛིན་རྒྱུན་ཆད་མེད་པར་གཏིང་ཟབ་ཏུ་བཏང་བ་དང་། ཏང་འཛུགས་སྐྲུན་གྱི་རིགས་པའི་གཞུང་ལུགས་གསར་གཏོད་དང་ལག་ལེན་གསར་གཏོད། ལམ་ལུགས་གསར་གཏོད་བཅས་ལ་རྒྱུན་ཆད་མེད་པར་སྐུལ་འདེད་བཏང་ནས། ཕྱོགས་ཡོངས་ནས་ཏང་ནན་སྐྱོང་བྱེད་པའི་མ་ལག་སྐྲུན་པའི་ཐད་གྲུབ་འབྲས་ཕུན་སུམ་ཚོགས་པ་བསགས་ཡོད། ང་ཚོས་ཏང་གི་ཆབ་སྲིད་འཛུགས་སྐྲུན་ནི་ཏང་གི་རྩ་བའི་རང་བཞིན་གྱི་འཛུགས་སྐྲུན་ཞིག་ཏུ་བརྩིས་ནས་ཐོག་མཐའ་བར་གསུམ་དུ་ཨང་དང་པོར་བཞག་སྟེ། དར་ཆ་གསལ་སྒྲེང་གིས་ཏང་གི་འགོ་ཁྲིད་རྒྱུན་འཁྱོངས་དང་དེར་ཤུགས་རྒྱག་པ་དང་། ཏང་ནང་ཁུལ་གྱི་ཆབ་སྲིད་འཚོ་བ་ནན་དུ་གཏོང་བ། ཆབ་སྲིད་ཀྱི་སྐྱེ་ཁམས་གཙང་སྒྱུར་དང་སླར་གསོ་བྱེད་པ། ཏང་ཡོངས་ཀྱི་“འདུ་ཤེས་བཞི་”ཆེ་རུ་སྐྱེད་པ་དང་། “གདེང་ཚོད་བཞི་”བརྟན་དུ་གཏོང་བ། “སྲུང་སྐྱོང་གཉིས་”བྱེད་ཐུབ་པ། ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་དམ་ཟབ་བཅས་བྱས་ནས་ཏང་གི་མཐུན་སྒྲིལ་གཅིག་གྱུར་མངོན་འགྱུར་ཡོང་བར་བྱེད་དགོས། ང་ཚོས་བསམ་བློ་འཛུགས་སྐྲུན་ནི་ཏང་གི་རྨང་གཞིའི་རང་བཞིན་གྱི་འཛུགས་སྐྲུན་ལ་བརྩིས་ནས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པར་བརྟེན་ནས་བློ་སྒྲིམ་སེམས་སྐྱེད་དང་། ཏང་འཛུགས་སྐྲུན་གྱི་སྙིང་སྟོབས་རླབས་པོ་ཆེ་དར་སྤེལ་གཏོང་བ། ཏང་ནང་ཁུལ་གྱི་གཅིག་སྡུད་སློབ་གསོ་རྒྱུན་མཐུད་སྤེལ་བ་བཅས་བྱས་ཏེ། ཏང་ཡོན་དང་ལས་བྱེད་པར་བསམ་པའི་ཐོག་གི་ཀལ་གསབ་པ་དང་གུང་ཁྲན་ཏང་མིའི་བསམ་པའི་ཁྱིམ་གཞིས་བརྟན་སྲུང་བྱེད་དགོས། ང་ཚོས་དུས་རབས་གསར་པའི་ཏང་གི་རྩ་འཛུགས་ལམ་ཕྱོགས་བཏོན་པ་དང་རྒྱུན་འཁྱོངས་བྱས་ཏེ་རྩ་འཛུགས་མ་ལག་འཛུགས་སྐྲུན་གཙོ་གནད་དུ་བཟུང་ནས་ཏང་རྩ་འཛུགས་ཀྱི་ཆབ་སྲིད་ནུས་པ་དང་རྩ་འཛུགས་ནུས་པ་ཆེ་རུ་གཏོང་བ་དང་། ནུས་མེད་ཟབ་ཟོབ་ཀྱི་ཏང་རྩ་འཛུགས་དག་ཐེར་བྱེད་པ། རིམ་པ་ཁག་གི་ཏང་རྩ་འཛུགས་ཕྱོགས་ཡོངས་ནས་ཡར་ཐོན་དང་ཕྱོགས་ཡོངས་ནས་ཉམས་སད་ཐེག་ཐུབ་པར་སྐུལ་འདེད་གཏོང་བ། ཏང་གིས་ལས་བྱེད་པར་དོ་དམ་བྱེད་པའི་རྩ་དོན་རྒྱུན་འཁྱོངས་བྱེད་པ། དུས་རབས་གསར་པའི་ལས་བྱེད་པ་བཟང་པོའི་ཚད་གཞི་རྒྱུན་འཁྱོངས་བཅས་བྱས་ནས། སེམས་དཀར་བློ་དཀར་དང་སྤྱོད་པ་གཙང་མ། འགན་འཁྲི་འཁུར་ཕོད་པ་བཅས་ཀྱི་བྱང་ཚད་མཐོ་བའི་ལས་བྱེད་པའི་དཔུང་སྡེ་གསོ་སྐྱོང་བྱེད་དགོས། ང་ཚོས་ཀྲུང་དབྱང་གི་གཏན་འབེབས་དོན་ཚན་བརྒྱད་གཏན་འཁེལ་དང་དོན་འཁྱོལ་བྱེད་པར་བརྟེན་ནས་འགོ་རྩོམ་པ་དང་། གཟེར་མ་འདེབས་པའི་སྙིང་སྟོབས་ཀྱིས་“སྤྱོད་ཚུལ་བཞི་”ཡོ་བསྲང་བྱེད་པ། ཁྱད་དབང་གི་བསམ་བློ་དང་ཁྱད་དབང་གི་སྣང་ཚུལ་ལ་ངོ་རྒོལ་མཐའ་གཅིག་ཏུ་བྱེད་པ། རྡོ་ལ་རྐང་རྗེས་འཇོག་པ་དང་ལྕགས་ལ་ལག་རྗེས་འཇོག་པ་ལྟ་བུའི་སྒོ་ནས་ཡུན་རིང་བཀག་འགོག་བྱེད་མ་ཐུབ་པའི་སྤྱོད་ངན་ཁ་ཤས་བཀག་འགོག་བྱས་པ་དང་། ལོ་མང་རིང་སེལ་མ་ཐུབ་པའི་བཅོས་དཀའི་གཅོང་ནད་ཁ་ཤས་བཅོས་སྐྱོང་བཅས་བྱས་ཏེ། སྤྱོད་ཚུལ་འཛུགས་སྐྲུན་གྱི་རྣམ་པ་གསར་པར་བརྟེན་ནས་མི་དམངས་མང་ཚོགས་ཀྱི་ཡིད་ཆེས་དང་བརྩི་བཀུར་ཐོབ་པར་བྱས་ཡོད། ང་ཚོས་སྒྲིག་ཁྲིམས་འཛུགས་སྐྲུན་དེ་ཏང་འཛུགས་སྐྲུན་གྱི་སྤྱིའི་བཀོད་པའི་ནང་བཅུག་ནས་སྒྲིག་ཁྲིམས་ནི་བཅའ་ཁྲིམས་ལས་ནན་པ་དང་སྒྲིག་ཁྲིམས་ནི་བཅའ་ཁྲིམས་ཀྱི་སྔོན་ལ་འཇོག་རྒྱུ་རྒྱུན་འཁྱོངས་བྱས་ནས། ཏང་གི་ཆབ་སྲིད་ཀྱི་སྒྲིག་ཁྲིམས་དང་ཆབ་སྲིད་ཀྱི་སྒྲིག་ལམ་དྲང་ནན་དུ་བཏང་སྟེ། རྩ་འཛུགས་ཀྱི་སྒྲིག་ཁྲིམས་དང་སྤྱོད་གཙང་གི་སྒྲིག་ཁྲིམས། མང་ཚོགས་ཀྱི་སྒྲིག་ཁྲིམས། ལས་དོན་གྱི་སྒྲིག་ཁྲིམས། འཚོ་བའི་སྒྲིག་ཁྲིམས་བཅས་ཕྱོགས་ཡོངས་ནས་ནན་དུ་གཏོང་རྒྱུར་སྐུལ་ཁྲིད་བྱེད་པ་དང་། སྒྲིག་ཁྲིམས་དྲང་ནན་དུ་གཏོང་བར་བརྟེན་ནས་ཏང་ཡོན་དང་ལས་བྱེད་པའི་འགན་དབང་སྤྱོད་པ་ཚད་ལྡན་དུ་གཏོང་བ་དང་། སྔ་ཙམ་ནས་དམ་འཛིན་དང་ཆུང་ཙག་ནས་དམ་འཛིན་བྱེད་པ། ཆུང་ས་ཕྲ་ས་ནས་སྔོན་འགོག་བྱེད་པ། “རྣམ་པ་བཞི་”བེད་སྤྱོད་གནད་འཁེལ་བཅས་བྱས་ཏེ། ཏང་ཡོན་དང་ལས་བྱེད་པར་ཏང་གི་དོ་དམ་ནན་པོ་དང་བརྩེ་བ་ཟབ་མོ་དེ་དངོས་སུ་ཚོར་དུ་འཇུག་དགོས། ང་ཚོས་ལམ་ལུགས་འཛུགས་སྐྲུན་དེ་ཏང་གི་འཛུགས་སྐྲུན་ཁག་ལ་ཁྱབ་པར་བྱས་པ་དང་། དུས་བསྟུན་མདུན་སྐྱོད་ཀྱིས་ཏང་གི་སྒྲིག་ཡིག་འཐུས་སྒོ་ཚང་དུ་བཏང་བ། ཏང་གི་འགོ་ཁྲིད་དང་ཏང་འཛུགས་སྐྲུན་ལ་ཤུགས་རྒྱག་པར་དམིགས་ནས་ལམ་ལུགས་གསར་གཏོད་ལ་སྐུལ་འདེད་བཏང་སྟེ། ཏང་ནང་ཁུལ་གྱི་ཁྲིམས་སྲོལ་མ་ལག་ཅུང་འཐུས་སྒོ་ཚང་བ་ཞིག་ཆགས་པ་དང་། ཏང་དང་རྒྱལ་ཁབ་ཀྱི་ལྟ་སྐུལ་མ་ལག་གི་“ཀ་བཞི་གདུང་བརྒྱད་”འཛུགས་པ། དབང་ཆ་དེ་ལམ་ལུགས་ཀྱི་གཟེབ་ནང་དུ་བཅུག་པ་བཅས་བྱས་ཏེ། དུས་རབས་གསར་པའི་ཏང་འཛུགས་སྐྲུན་ལ་རྩ་བའི་རང་བཞིན་དང་སྤྱི་ཡོངས་རང་བཞིན། བརྟན་བརླིང་རང་བཞིན། ཡུན་རིང་རང་བཞིན་བཅས་ཀྱི་འགན་ལེན་བྱས་ཡོད། ང་ཚོས་ལོ་རྒྱུས་ཐོག་བྱུང་མྱོང་མེད་པའི་རུལ་སུངས་ལ་ངོ་རྒོལ་བྱེད་པའི་འཐབ་རྩོད་སྤེལ་ནས་བཀག་སྡོམ་ཁུལ་མེད་པ་དང་། ཡོངས་སུ་ཁྱབ་པ། བཟོད་སྒོམ་སྤུ་ཙམ་ཡང་མི་བྱེད་པ། རུལ་སུངས་བྱེད་མི་ཕོད་པ། རུལ་སུངས་བྱེད་མི་ནུས་པ། རུལ་སུངས་བྱེད་མི་འདོད་པ་བཅས་གཞི་གཅིག་ཏུ་སྐུལ་འདེད་གཏོང་རྒྱུ་རྒྱུན་འཁྱོངས་བྱས་པ་དང་། “སྟག་རྡུང་”དང་“སྦྲང་གསོད།” “ཝ་རྔོན་”བཅས་ཐབས་མང་མཉམ་སྤྱོད་ཀྱིས་རུལ་སུངས་པ་འབོར་ཆེན་ཞིག་ཞིབ་བཤེར་ཐག་གཅོད་བྱས་ཡོད། ཏང་ནང་ཁུལ་གྱི་ཆབ་སྲིད་ཀྱི་མངོན་མེད་རྐྱེན་ངན་ཚབས་ཆེན་མེད་པར་བཟོས་པ་དང་། རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལ་རྣམ་གནོན་རང་བཞིན་གྱི་རྒྱལ་ཁ་བླངས་པ་མ་ཟད་ཕྱོགས་ཡོངས་ནས་སྲ་བརྟན་དུ་བཏང་བས་ཀྲུང་གོའི་ཁྱད་ཆོས་ལྡན་པའི་རུལ་སུངས་ལ་ངོ་རྒོལ་བྱེད་པའི་ལམ་བུ་ཞིག་བཏོད་ཐུབ་ཡོད། འཛམ་གླིང་ཡོངས་ལ་བལྟས་ན། ཀྲུང་གོའི་གུང་ཁྲན་ཏང་ནང་བཞིན་རང་ངོས་འཛུགས་སྐྲུན་བྱེད་པར་དེ་འདྲའི་སྒམ་བརླིང་དང་གཟབ་ནན་བྱེད་མཁན་དང་། དེ་འདྲའི་ཚད་མཐོ་བའི་རང་རྟོགས་ཀྱིས་ཚན་རིག་དང་མཐུན་པའི་རྣམ་འགྱུར་དང་མ་ལག་ཅན་གྱི་བྱེད་སྟངས་ལ་བརྟེན་ནས་རང་ངོས་གསར་བརྗེར་སྐུལ་འདེད་གཏོང་ཐུབ་པའི་སྲིད་ཏང་གཅིག་ཀྱང་མེད། འདི་ནི་ང་ཚོའི་ཏང་གི་མངོན་གསལ་དོད་པའི་དགེ་མཚན་ཡིན་ལ། དུས་རབས་ཀྱི་སྣེ་ཁྲིད་དེ་རྒྱལ་ཁ་ལེན་པའི་ཐབས་ལམ་ཡང་ཡིན། ཕྱོགས་ཡོངས་ནས་ཏང་ནན་སྐྱོང་བྱས་པས་མི་དམངས་མང་ཚོགས་ཀྱི་རྒྱབ་སྐྱོར་བརྟན་པོ་དང་ཁས་ལེན་ཐོབ་ཡོད། 2022ལོའི་རྒྱལ་ཁབ་བསྡོམས་རྩིས་ཅུས་ཀྱི་དམངས་འདོད་བརྟག་དཔྱད་ལས་མངོན་པ་ལྟར་ན། ཕྱོགས་ཡོངས་ནས་ཏང་ནན་སྐྱོང་དང་ཏང་སྲོལ་སྲིད་གཙང་འཛུགས་སྐྲུན། རུལ་སུངས་ལ་ངོ་རྒོལ་བྱེད་པའི་ལས་དོན་བཅས་ཀྱི་ཕན་འབྲས་ཐད་མང་ཚོགས་97.4%ལ་བློ་ཡིད་ཚིམ་པོ་བྱུང་བ་དང་། 2012ལོ་ལས་བརྒྱ་ཆའི་གྲངས་22.4མཐོ་རུ་ཕྱིན་ཡོད།
ཕྱོགས་ཡོངས་ནས་ཏང་ནན་སྐྱོང་བྱེད་པའི་མ་ལག་འཐུས་ཚང་དུ་གཏོང་རྒྱུ་ནི་ཏང་གི་ཚོགས་ཆེན་ཉི་ཤུ་པའི་ཐོག་བཏོན་པའི་དུས་རབས་གསར་པའི་ཏང་འཛུགས་སྐྲུན་ལ་ཤུགས་རྒྱག་པའི་བྱེད་ཐབས་གལ་ཆེན་ཞིག་ཡིན། ཕྱོགས་ཡོངས་ནས་ཏང་ནན་སྐྱོང་བྱེད་པའི་མ་ལག་ནི་ནང་དོན་ཕུན་སུམ་ཚོགས་པ་དང་ནུས་པ་ཆ་ཚང་བ། ཚན་རིག་དང་མཐུན་པ། འཁོར་སྐྱོད་ནུས་ཆེ་བཅས་ཀྱི་འགུལ་རྣམ་མ་ལག་ཅིག་ཡིན། མ་ལག་འདི་འཐུས་སྒོ་ཚང་དུ་གཏོང་བར་ང་ཚོས་ལམ་ལུགས་ལ་བརྟེན་ནས་ཏང་སྐྱོང་བ་དང་སྒྲིག་སྲོལ་ལ་བརྟེན་ནས་ཏང་སྐྱོང་རྒྱུ་རྒྱུན་འཁྱོངས་བྱས་ཏེ། ཏང་གི་ཕྱོགས་སོ་སོའི་འཛུགས་སྐྲུན་སྦྲེལ་མཐུད་ནུས་ལྡན་དང་མཉམ་འགུལ་འདུས་གྲུབ། མཉམ་སྡེབ་མཐུན་སྦྱོར་བཅས་དེ་བས་མངོན་གསལ་དོད་པོ་ཡོང་བ་དང་། སྒྲིག་སྲོལ་ལམ་སྲོལ་འཐུས་སྒོ་ཚང་དུ་གཏོང་བ་དང་ཁྲིམས་སྲོལ་ལམ་ལུགས་ཚན་རིག་དང་མཐུན་ལ་ནུས་ལྡན་ཡོང་རྒྱུ་དེ་བས་མངོན་གསལ་དོད་པོ་ཡོང་བ། བཅོས་སྐྱོང་གི་འདུ་ཤེས་དང་མ་ལག་གི་འདུ་ཤེས། རྩོད་སྒྲུབ་ཀྱི་བསམ་གཞིགས་བཅས་ལ་བརྟེན་ནས་ཏང་དོ་དམ་དང་ཏང་བཅོས་སྐྱོང་དང་ཏང་འཛུགས་སྐྲུན་བྱ་རྒྱུ་དེ་བས་མངོན་གསལ་དོད་པོ་ཡོང་བ་བཅས་བྱེད་དགོས། ནང་དོན་ཐད་ཡོངས་སུ་ཁྱབ་རྒྱུ་རྒྱུན་འཁྱོངས་དང་། ཏང་གི་འཛུགས་སྐྲུན་དེ་གང་དུ་སྐུལ་འདེད་བཏང་ཡོད་ན། ཕྱོགས་ཡོངས་ནས་ཏང་ནན་སྐྱོང་བྱེད་པའི་མ་ལག་དེ་གང་དུ་འཛུགས་དགོས། ཏང་གི་ཆབ་སྲིད་འཛུགས་སྐྲུན་དང་བསམ་བློ་འཛུགས་སྐྲུན། རྩ་འཛུགས་འཛུགས་སྐྲུན། སྤྱོད་ཚུལ་འཛུགས་སྐྲུན། སྒྲིག་ཁྲིམས་འཛུགས་སྐྲུན་བཅས་ཡིན་པའམ། ཡང་ན་ལམ་ལུགས་འཛུགས་སྐྲུན་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་གང་ཞིག་ཡིན་རུང་ཚང་མས་ཕྱོགས་ཡོངས་ནས་ཏང་ནན་སྐྱོང་བྱེད་པའི་འཐབ་ཇུས་བྱེད་ཕྱོགས་རང་རྟོགས་ངང་ལག་བསྟར་བྱས་པ་ལས། ཕྱོགས་ཡོངས་ནས་ཏང་ནན་སྐྱོང་བྱ་རྒྱུ་དེ་སྤྱོད་སྲོང་དང་སྒྲིག་ནན། རུལ་སུངས་ལ་ངོ་རྒོལ་བྱེད་པ་ཁོ་ན་ཙམ་དུ་བསྡད་མི་རུང་། བྱ་ཡུལ་གྱི་ཐད་ཕྱོགས་ཡོངས་ལ་ཁྱབ་རྒྱུ་རྒྱུན་འཁྱོངས་བྱས་ཏེ། ཏང་གི་རིམ་ཁག་རྩ་འཛུགས་དང་ཏང་ཡོན་ཡོངས་ལ་ཕྱོགས་ནས་ཏང་ཡོངས་དོ་དམ་དང་ཏང་ཡོངས་བཅོས་སྐྱོང་ཐུབ་པར་བྱས་ཏེ། གཙོ་གནད་དུ་“འགག་རྩའི་ཉུང་ཤས་”དམ་འཛིན་ཡག་པོ་བྱེད་པ་དང་། ཏང་ཡོན་འགོ་ཁྲིད་ལས་བྱེད་པ་དང་ལྷག་པར་དུ་མཐོ་རིམ་ལས་བྱེད་པ་དང་“འགོ་ཁྲིད་པ་དང་པོ་”དོ་དམ་ཡག་པོ་བྱེད་དགོས། ཏང་དོ་དམ་དང་ཏང་བཅོས་སྐྱོང་བྱེད་པའི་ཐད་དམིགས་བསལ་གྱི་ཏང་ཡོན་མེད་པས་ཁུག་ཀྱོག་དང་སྟོང་ཆ་གང་ཡང་མ་ལུས་པ་བྱེད་དགོས། འགན་འཁྲི་དཀྱུས་གཅིག་ཏུ་འཁུར་བ་རྒྱུན་འཁྱོངས་བྱས་ཏེ། རིམ་ཁག་ཏང་ཨུ་(ཏང་ཙུའུ་)ཡིས་ཕྱོགས་ཡོངས་ནས་ཏང་ནན་སྐྱོང་བྱེད་པོའི་འགན་འཁྲི་དང་རིམ་ཁག་སྒྲིག་ཨུའི་ལྟ་སྐུལ་འགན་འཁྲི་ནན་དུ་གཏོང་བ་དང་། རིམ་ཁག་ཏང་ཨུ་(ཏང་ཙུའུ་)ཡི་ཧྲུའུ་ཅིས་འགན་འཁུར་མཁན་དང་པོའི་འགན་འཁྲི་འཁུར་བ། འགོ་ཁྲིད་ཚན་པའི་ཁོངས་མི་གཞན་དག་གིས་“ལས་གནས་གཅིག་ལ་འགན་འཁྲི་གཉིས་”ཏན་ཏིག་འཁུར་བ་བཅས་ལ་སྐུལ་འདེད་བཏང་སྟེ། ཏང་ཡོན་དང་ལས་བྱེད་པ་རེ་རེས་སྤྱོད་འོས་པའི་དབང་ཆ་སྤྱོད་པ་དང་འཁུར་དགོས་པའི་འགན་འཁྲི་འཁུར་དུ་འཇུག་པ། འགན་དབང་འདྲ་མཚུངས་ཐོབ་པ། འགན་འཁྲི་ཤོར་ཚེ་ངེས་པར་དུ་བདའ་འདེད་གཏོང་བ། རིམ་པ་རེ་རེ་བཞིན་གནོན་ཤུགས་སྤྲོད་པ། འགན་འཁྲི་གཅིག་སྣེ་གཅིག་མཐུན། ཏང་དོ་དམ་དང་ཏང་བཅོས་སྐྱོང་གི་འགན་འཁྲི་འཁུར་སེམས་ལ་ཤུགས་སྣོན་ཏན་ཏིག་རྒྱག་པ་བཅས་བྱས་ཏེ། ཏང་ཡོངས་ཀྱིས་ལག་པ་འགུལ་ནས་མཉམ་དུ་དམ་འཛིན་བྱེད་པའི་རྣམ་པ་ལེགས་པོ་སྲ་བརྟན་དང་འཕེལ་རྒྱས་སུ་གཏོང་དགོས། ལམ་ལུགས་ཀྱི་ཐད་ཕྱོགས་ཡོངས་སུ་ཁྱབ་རྒྱུ་རྒྱུན་འཁྱོངས་བྱས་ཏེ་ལམ་ལུགས་འཛུགས་སྐྲུན་གྱི་བླང་བྱ་དེ་ཕྱོགས་ཡོངས་ནས་ཏང་ནན་སྐྱོང་བྱེད་པའི་བརྒྱུད་རིམ་ཧྲིལ་པོ་དང་ཕྱོགས་སོ་སོ། རིམ་པ་སོ་སོ་བཅས་སུ་མངོན་པར་བྱས་ཏེ། ཏང་གི་སྒྲིག་ཡིག་རྩ་བར་འཛིན་པ་དང་དམངས་གཙོ་གཅིག་སྡུད་ལམ་ལུགས་ལྟེ་བར་འཛིན་པ། ཏང་ནང་གི་ཁྲིམས་སྲོལ་ལམ་ལུགས་མ་ལག་རྒྱུན་ཆད་མེད་པར་འཐུས་སྒོ་ཚང་དུ་གཏོང་བ། ཏང་ནང་ཁུལ་གྱི་ཁྲིམས་སྲོལ་གྱི་དབང་གྲགས་རང་བཞིན་དང་ལག་བསྟར་བྱེད་ཤུགས་ཆེ་རུ་གཏོང་བ། ལམ་ལུགས་ལ་བརྟེན་ནས་ཕྱོགས་ཡོངས་ནས་ཏང་ནན་སྐྱོང་བྱེད་པའི་མ་ལག་འབྲེལ་མཐུད་དང་མཉམ་འགུལ་ལ་སྐུལ་འདེད་གཏོང་བ་བཅས་བྱས་ཏེ། ལམ་ལུགས་ལ་བརྟེན་ནས་ཏང་སྐྱོང་བ་དང་ཁྲིམས་སྲོལ་ལ་བརྟེན་ནས་ཏང་སྐྱོང་བ་མངོན་དུ་འགྱུར་བར་བྱེད་དགོས།
ཕྱོགས་ཡོངས་ནས་ཏང་ནན་སྐྱོང་བྱེད་པའི་མ་ལག་འཐུས་ཚང་དུ་གཏོང་རྒྱུ་ནི་ཏང་ཡོངས་ཀྱི་ཐུན་མོང་གི་འགན་འཁྲི་ཡིན་པས། ངེས་པར་དུ་ཏང་གི་ཆབ་སྲིད་ཀྱི་དགེ་མཚན་དང་། རྩ་འཛུགས་ཀྱི་དགེ་མཚན། ལམ་ལུགས་ཀྱི་དགེ་མཚན་བཅས་འདོན་སྤེལ་གང་ལེགས་བྱེད་དགོས། ཏང་གིས་རང་ངོས་གསར་བརྗེ་བྱས་པའི་ལོ་རྒྱུས་ཀྱི་ཉམས་མྱོང་སྤྱི་དང་ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་ཕྱོགས་ཡོངས་ནས་ཏང་ནན་སྐྱོང་བྱེད་པའི་ཉམས་མྱོང་གསར་པ་གཏིང་ཟབ་མོར་ཁོང་དུ་ཆུད་པ་དང་། གནས་བབ་དང་ལས་འགན་གསར་པར་གཞི་ཚུགས་ནས། ཏང་ཀྲུང་དབྱང་གི་གཅིག་སྡུད་གཅིག་གྱུར་གྱི་འགོ་ཁྲིད་འོག་རང་འགན་རང་འཁུར་དང་གཅིག་གྱུར་མཐུན་སྦྱོར་གྱི་ཏང་དོ་དམ་དང་ཏང་བཅོས་སྐྱོང་གི་འགན་འཁྲིའི་རྣམ་པ་འཐུས་ཚང་དུ་ཆགས་པ་བྱེད་དགོས། བླང་བྱ་ཡོངས་རྫོགས་དང་དགོངས་གཞི་ནན་པོ། བཅོས་སྐྱོང་གི་འདུ་ཤེས་བཅས་ཕྱོགས་ཡོངས་ནས་ཏང་ནན་སྐྱོང་བྱེད་པའི་མ་ལག་འཛུགས་སྐྲུན་ཁྲོད་དོན་འཁྱོལ་བྱས་པ་དང་། ལམ་ལུགས་ཅན་དང་ཚད་ལྡན་ཅན། ཚན་རིག་ཅན་གྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ་དང་། ཕྱོགས་ཡོངས་ནས་ཏང་ནན་སྐྱོང་བྱེད་པའི་ལས་དོན་ཁག་ལ་སྔར་བས་ལེགས་པའི་སྒོ་ནས་དུས་རབས་ཀྱི་རང་བཞིན་མངོན་པ་དང་ཆོས་ཉིད་རང་བཞིན་ཁོང་དུ་ཆུད་པ། གསར་གཏོད་རང་བཞིན་གྱིས་ཕྱུག་པ་བཅས་བྱས་ཏེ་ཏང་དང་རྒྱལ་ཁབ་ཀྱི་བྱ་གཞག་སྐྱོན་བྲལ་ངང་འཕེལ་རྒྱས་སུ་འགྲོ་བར་ཆབ་སྲིད་དང་བསམ་བློ། རྩ་འཛུགས་བཅས་ཀྱི་འགན་ལེན་འདོན་སྤྲོད་བྱེད་དགོས།
སྒྲོལ་མ་མཚོས་བསྒྱུར།