“རིག་གནས་ནི་རྒྱལ་ཁབ་ཀྱི་རྩ་བ་དང་རྒྱལ་ཁབ་ཀྱི་ལས་དབང་ལ་འབྲེལ་ཡོད། ངས་རྒྱུན་པར་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིག་གནས་འཛུགས་སྐྲུན་ལ་སྐུལ་འདེད་གཏོང་བ་དང་ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་འཛུགས་སྐྲུན་བྱེད་པའི་བརྗོད་གཞི་གལ་ཆེན་འདིར་བསམ་གཞིགས་བྱེད་ཀྱི་ཡོད། དེ་ཡང་ཐེངས་འདིའི་བཞུགས་མོལ་ཚོགས་འདུ་འཚོགས་པའི་དམིགས་ཡུལ་ཡིན།”
“འགོ་རྩོམ་ས་གསར་པའི་ཐོག་རིག་གནས་དར་རྒྱས་ཡོང་བར་སྐུལ་འདེད་གཏོང་བ་དང་། རིག་གནས་རྒྱལ་ཁབ་སྟོབས་ལྡན་འཛུགས་སྐྲུན་བྱེད་པ། ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་འཛུགས་སྐྲུན་བྱེད་པ་བཅས་ལ་སྐུལ་འདེད་གཏོང་རྒྱུ་ནི་ང་ཚོའི་དུས་རབས་གསར་པའི་རིག་གནས་ཀྱི་འགན་འཁྲི་གསར་པ་ཞིག་རེད། རིག་གནས་ཀྱི་གདེང་ཚོད་བརྟན་དུ་གཏོང་བ་དང་། འགན་འཁྲི་འཁུར་བ། འབད་འབུངས་ཡར་བརྩོན་བཅས་བྱས་ཏེ་ཐུན་མོང་ཐོག་ང་ཚོའི་དུས་རབས་འདིའི་རིག་གནས་གསར་པ་བསྐྲུན་པར་འབད་བརྩོན་བྱས་ནས་ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་བསྐྲུན་དགོས།”
2023ལོའི་ཟླ་6ཚེས་2ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རིག་གནས་རྒྱུན་འཛིན་དང་འཕེལ་རྒྱས་སྐོར་གྱི་བཞུགས་མོལ་ཚོགས་འདུའི་ཐོག་གནང་བའི་གསུང་བཤད་གལ་ཆེན་དེ་ནི་རྒྱལ་ཁབ་སྟོབས་ལྡན་གཏོང་བ་དང་མི་རིགས་བསྐྱར་དར་ཡོང་བར་དམིགས་པ་དང་། ཀྲུང་ཧྭའི་རིག་གནས་རྒྱུན་མཐུད་དང་དེང་རབས་ཀྱི་ཤེས་དཔལ་བསྐྲུན་རྒྱུར་གཞི་ཚུགས་ཏེ། ཀྲུང་ཧྭའི་རིག་གནས་རྒྱུན་འཛིན་དང་འཕེལ་རྒྱས་སྐོར་གྱི་རིགས་པའི་གཞུང་ལུགས་གལ་ཆེན་དང་དོན་དངོས་ཀྱི་གནད་དོན་རབ་དང་རིམ་པར་གཏིང་ཟབ་ཅིང་རྒྱུད་རིམ་ལྡན་པའི་ངང་རྒྱས་བཤད་གནང་བ་ཞིག་རེད། དེ་ནི་མར་ཁེ་སིའི་རིང་ལུགས་ཀྱི་བདེན་དོན་གྱི་འོད་ཟེར་འཕྲོ་བ་དང་ཀྲུང་ཧྭའི་རིག་གནས་ཀྱི་དམིགས་བསལ་ཁྱད་ཆོས་མངོན་པའི་ཡིག་ཆ་རྩ་ཆེན་ཞིག་ཡིན་ལ། ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་དང་སྤྱི་ཚོགས་རིང་ལུགས་ཀྱི་རྒྱལ་ཁབ་སྟོབས་ལྡན་འཛུགས་སྐྲུན་བྱེད་པའི་བྱ་སྤྱོད་ཀྱི་ཕྱོགས་སྟོན་ཞིག་ཀྱང་ཡིན། དེས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིག་གནས་འཛུགས་སྐྲུན་ལ་རྒྱ་ཆེ་ཞིང་གཏིང་ཟབ་པའི་ཤུགས་རྐྱེན་ཐེབས་ངེས་ཡིན།
ག་དུས་ཡིན་རུང་རིག་གནས་དར་ཞིང་རྒྱས་པ་ནི་མི་རིགས་ཤིག་བསྐྱར་དར་ཡོང་བའི་འདེགས་སྐྱོར་ཆེན་པོ་ཡིན་ལ། ག་དུས་ཡིན་རུང་རིག་གནས་ཕུན་སུམ་ཚོགས་པ་ནི་དུས་རབས་ཤིག་ཡར་ཐོན་ཡོང་བའི་མཚོན་རྟགས་མངོན་གསལ་ཞིག་ཡིན། “རྫོགས་ལྡན་དུས་སུ་བསྟན་བཅོས་རྩོམ་པའི་ལས་ལ་བརྩོན། ང་ཚོའི་དུས་རབས་འདིར་རྒྱལ་ཁབ་དར་རྒྱས་དང་སྤྱི་ཚོགས་དུས་བདེ་བརྟན་བརླིང་ཡིན་ལ། མི་རིགས་ཀྱི་རིག་གནས་རྒྱུན་འཛིན་བྱེད་པའི་འདུན་པ་དང་ནུས་པ་ཡོད་པས་དོན་ཆེན་དེ་ཡག་པོར་བསྒྲུབ་དགོས།” ཀྲུང་གོའི་རྒྱལ་ཁབ་པར་གཞི་ཁང་ཀྲུང་དབྱང་སྤྱི་ཁྱབ་ཁང་དུ་རྟོག་ཞིབ་གནང་སྐབས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ངས་སེམས་ཁུར་ཆེ་ཤོས་བྱེད་ས་ནི་ཀྲུང་ཧྭའི་ཤེས་དཔལ་གྱིས་ལོ་རྒྱུས་ཡུན་རིང་ཁྲོད་ཤུལ་དུ་བཞག་པའི་གཅེས་ནོར་ཡིན། ཀྲུང་ཧྭ་མི་རིགས་ཀྱི་རྩ་ཆེའི་བསྟན་བཅོས་ཁག་ཅིག་ལོ་ཟླའི་ཆར་རླུང་ནང་མེད་པར་གྱུར་ཟིན། ཤུལ་དུ་ལུས་པའི་གཅེས་ནོར་དེ་དག་ལ་ངེས་པར་དུ་ཐབས་བརྒྱ་ཇུས་སྟོང་གིས་སྲུང་སྐྱོང་ཡག་པོ་དང་གཅེས་སྤྲས་ཡག་པོ་བྱས་ནས་འཛམ་གླིང་ཐོག་རྒྱུན་ཆད་མ་མྱོང་བའི་ཤེས་དཔལ་གཅིག་པུ་འདི་ཉིད་མུ་མཐུད་རྒྱུན་འཛིན་བྱེད་དགོས་”ཞེས་ཚིག་ནན་ཞིང་དོན་ཟབ་པོའི་ངང་གསུངས། བཀའ་གསུང་སྙན་མོ་འདི་ལས་སྤྱི་ཁྱབ་ཧྲུའུ་ཅིས་རིག་གནས་ལ་བཅངས་པའི་བརྩེ་སེམས་ཟབ་མོ་མཚོན་ཡོད།
རྒྱལ་ཁབ་ཅིག་གི་བླ་སྲོག་ནི། །རིག་པར་བརྟེན་ནས་བྱུང་བ་དང་། །རིག་པར་བརྟེན་ནས་བསྐྲུན་པ་ལགས། །སྔོན་ཐོན་རིག་གནས་ཀྱི་སྣེ་ཁྲིད་ལེགས་པོ་མེད་པ་དང་། མི་དམངས་ཀྱི་བསམ་པའི་འཇིག་རྟེན་ཕུན་སུམ་ཚོགས་པོ་མེད་པ། མི་རིགས་ཀྱི་བསམ་པའི་སྟོབས་ཤུགས་རྒྱུན་ཆད་མེད་པར་ཆེ་རུ་ཕྱིན་མེད་པ་བཅས་ཡིན་ན། རྒྱལ་ཁབ་ཅིག་དང་མི་རིགས་ཤིག་འཛམ་གླིང་མི་རིགས་མང་པོའི་ཁྲོད་དུ་འགྱིང་ངེར་ལངས་མི་ཐུབ། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རིག་གནས་འཛུགས་སྐྲུན་བྱ་རྒྱུ་དེ་རྒྱལ་སྲིད་སྐྱོང་བའི་མངོན་གསལ་དོད་པོའི་གོ་གནས་སུ་བཞག་ཅིང་། སྐུ་ངོ་མས་བཀོད་འདོམས་དང་སྐུ་ངོ་མས་བཀོད་སྒྲིག་གནང་ནས་གྲོས་ཚོགས་གལ་ཆེན་རབ་དང་རིམ་པ་འཚོགས་ཤིང་། གསུང་བཤད་གལ་ཆེན་རབ་དང་རིམ་པ་གནང་ལ། ཇུས་གཅོད་གལ་ཆེན་རབ་དང་རིམ་པ་གནང་། རིག་གནས་འཛུགས་སྐྲུན་བྱེད་པའི་ཆོས་ཉིད་རང་བཞིན་གྱི་ངོས་འཛིན་རྒྱུན་ཆད་མེད་པར་གཏིང་ཟབ་ཏུ་བཏང་ནས་བསམ་བློ་གསར་པ་དང་། ལྟ་བ་གསར་པ། ཆོད་གཏམ་གསར་པ་བཅས་རབ་དང་རིམ་པ་བཏོན་པ་སྟེ། ཏང་གིས་བསམ་པའི་རིག་གནས་དྲིལ་བསྒྲགས་ལས་དོན་ལ་ཕྱོགས་ཡོངས་ནས་འགོ་ཁྲིད་བྱ་རྒྱུ་རྒྱུན་འཁྱོངས་དང་དེར་ཤུགས་རྒྱག་དགོས་པ་ནན་གསུང་གནང་བ་དང་། འདུ་ཤེས་འཛིན་སྟངས་ཀྱི་ཁྱབ་ཁོངས་ནང་མར་ཁེ་སིའི་རིང་ལུགས་ཀྱི་སློབ་སྟོན་གོ་གནས་རྒྱུན་འཁྱོངས་བྱེད་དགོས་པའི་རྩ་བའི་ལམ་ལུགས་ནན་གསུང་གནང་བ། རིག་གནས་ཀྱི་གདེང་ཚོད་རྒྱུན་འཁྱོངས་བྱེད་དགོས་པ་ནན་གསུང་གནང་བ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བས་རིག་གནས་འཛུགས་སྐྲུན་ལ་ཁྲིད་སྟོན་བྱེད་དགོས་པ་ནན་གསུང་གནང་བ། ཀྲུང་གོའི་ཁྱད་ཆོས་ལྡན་པའི་མཚན་ཉིད་རིག་པ་དང་སྤྱི་ཚོགས་ཚན་རིག་མགྱོགས་པོར་འཛུགས་སྐྲུན་བྱེད་དགོས་པ་ནན་གསུང་གནང་བ། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ལ་གསར་གཏོད་རང་བཞིན་གྱི་སྤོ་སྒྱུར་དང་གསར་སྤེལ་རང་བཞིན་གྱི་འཕེལ་རྒྱས་ཡོང་བར་སྐུལ་འདེད་གཏོང་དགོས་པ་ནན་གསུང་གནང་བ། གསར་འགྱུར་གླེང་ཕྱོགས་ཀྱི་བརྒྱུད་བསྒྲགས་ནུས་པ་དང་ཤུགས་རྐྱེན་བཟོ་ནུས་དང་སྤྱི་པའི་ཡིད་རྟོན་ནུས་པ་བཅས་ཇེ་མཐོར་གཏོང་དགོས་པ་ནན་གསུང་གནང་བ། མི་དམངས་ལྟེ་བར་འཛིན་པའི་གསར་རྩོམ་གྱི་ཁྲིད་ཕྱོགས་རྒྱུན་འཁྱོངས་བྱེད་དགོས་པ་ནན་གསུང་གནང་བ། རང་ཉིད་ཀྱི་ཚེ་སྲོག་ལ་གཅེས་སྤྲས་བྱེད་པ་ལྟར་ལོ་རྒྱུས་རིག་གནས་ཤུལ་བཞག་ལ་སྲུང་སྐྱོབ་བྱེད་དགོས་པ་ནན་གསུང་གནང་བ། ཀྲུང་གོའི་ལུགས་ཀྱི་དེང་རབས་ཅན་ནི་དངོས་པོའི་དཔལ་ཡོན་དང་བསམ་པའི་དཔལ་ཡོན་གཉིས་མཐུན་སྦྱོར་ཡོང་བའི་དེང་རབས་ཅན་ཡིན་པ་ནན་གསུང་གནང་བ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་དགོས་པ་ནན་གསུང་གནང་བ། མཉམ་སྦྲེལ་དྲ་རྒྱའི་འགག་སྒོ་འདི་སྒྲོལ་མ་ཐུབ་ཚེ་ཡུན་རིང་སྲིད་སྐྱོང་བའི་འགག་སྒོ་དེ་སྒྲོལ་མི་ཐུབ་པ་ནན་གསུང་གནང་བ། རྒྱལ་ཁབ་ཀྱི་རིག་གནས་མཉེན་སྟོབས་དང་ཀྲུང་ཧྭའི་རིག་གནས་ཤུགས་རྐྱེན་བཟོ་ནུས་ཇེ་ཆེར་གཏོང་དགོས་པ་ནན་གསུང་གནང་བ། མིའི་རིགས་ཀྱི་ཐུན་མོང་རིན་ཐང་དར་སྤེལ་གཏོང་དགོས་པ་ནན་གསུང་གནང་བ་སོགས་ལྟ་བུ་ཡིན། བསམ་བློ་གསར་པ་དང་། ལྟ་བ་གསར་པ། ཆོད་གཏམ་གསར་པ་འདི་དག་གི་ནང་དོན་ཧ་ཅང་ཕུན་སུམ་ཚོགས་པོ་ཡོད་པ་དང་བསམ་བློ་ཧ་ཅང་གཏིང་ཟབ་མོ་ཡིན་ཞིང་། འདི་ནི་དུས་རབས་གསར་པར་ཏང་གིས་རིག་གནས་འཛུགས་སྐྲུན་ལ་འགོ་ཁྲིད་བྱེད་པའི་ལག་ལེན་དང་ཉམས་མྱོང་གི་རིགས་པའི་གཞུང་ལུགས་ཀྱི་ཕྱོགས་བསྡོམས་ཤིག་དང་། ང་ཚོའི་ཏང་གི་རིག་གནས་ཀྱི་འགན་འཁྲི་འཁུར་སེམས་ཆེན་པོ་དང་རིག་གནས་ཀྱི་གདེང་ཚོད་ཆེན་པོ་གཅིག་སྡུད་ཐོག་མཚོན་པ་ཞིག་ཡིན་ལ། རིག་གནས་རྒྱུན་འཛིན་འཕེལ་རྒྱས་དང་དར་རྒྱས་ཕུན་ཚོགས་ཡོང་བར་སྐུལ་འདེད་གཏོང་བའི་རྩ་བའི་ཕྱོགས་སྟོན་ཡང་ཡིན།
དེ་རིང་ཀྲུང་ཧྭའི་ས་གཞི་ཆེན་མོར་བལྟས་ཚེ། ཤེས་དཔལ་གྱི་འོད་ཟེར་གྱིས་བསྐྱར་དར་གྱི་ལམ་བུ་གསལ་བར་བྱེད་པ་དང་། ཀྲུང་ཧྭའི་རིག་གནས་ཀྱི་ཁྲག་རྒྱུན་འདི་རྒྱུན་མཐུད་ངང་རྒྱ་ཆེར་དར་ཁྱབ་བྱུང་ཞིང་། ཀྲུང་གོའི་སྙིང་སྟོབས་དང་། ཀྲུང་གོའི་རིན་ཐང་། ཀྲུང་གོའི་སྟོབས་ཤུགས་བཅས་ཀྱི་བརྗིད་ཆེའི་རྣམ་པ་གང་ལེགས་མངོན་ཡོད། ཀྲུང་གོའི་མི་དམངས་ཀྱི་མདུན་སྐྱོད་སྒུལ་ཤུགས་དེ་བས་ཆེ་བ་དང་། འབད་འཐབ་ཀྱི་སྙིང་སྟོབས་དེ་བས་ཆེ་བ། རྒྱལ་ཁ་འཐོབ་ངེས་ཀྱི་ཡིད་ཆེས་དེ་བས་བརྟན་ཞིང་། ལོ་རྒྱུས་ཀྱི་རང་རྟོགས་དང་རང་དབང་གི་སྙིང་སྟོབས་དེ་བས་ཆེ་བ་མངོན་ཡོད། ཀྲུང་གོའི་ས་གཞི་ཆེན་མོར་“རིག་གནས་དར་ཞིང་རྒྱལ་ཁབ་དར་བ་དང་། རིག་གནས་སྟོབས་ལྡན་ཡིན་པས་མི་རིགས་སྟོབས་ལྡན་ཡིན་པའི་”གསོན་ཉམས་ལྡན་པའི་མཛེས་ལྗོངས་ཤིག་མངོན་ཞིང་། སྤྱི་ཚོགས་རིང་ལུགས་ཀྱི་རིག་གནས་རྒྱལ་ཁབ་སྟོབས་ལྡན་འཛུགས་སྐྲུན་བྱེད་པར་སྐུལ་འདེད་གཏོང་བའི་གོམ་པ་བརྟན་པོར་སྤོས་ཏེ། དུས་རབས་གསར་པར་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་བ་དང་། ཏང་དང་རྒྱལ་ཁབ་ཀྱི་ལས་དོན་འཕེལ་རྒྱས་ཡོང་བའི་རྣམ་པ་གསར་པ་གཏོད་ཆེད་དྲང་ནུས་སྟོབས་ཆེན་འདོན་སྤྲོད་བྱས་ཡོད།
ཏང་གི་ཚོགས་ཆེན་ཉི་ཤུ་པའི་ཐོག་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་འཛུགས་སྐྲུན་བྱ་རྒྱུ་དང་། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་ཡོང་བར་སྐུལ་འདེད་གཏོང་རྒྱུའི་བརྗིད་ཉམས་ཆེ་བའི་འཆར་འགོད་བྱས་ཡོད། ཀྲུང་གོའི་ལུགས་ཀྱི་དེང་རབས་ཅན་ནི་གནའ་བོའི་ཤེས་དཔལ་རྒྱུན་མཐུད་པའི་དེང་རབས་ཅན་ཡིན་པ་ལས་གནའ་བོའི་ཤེས་དཔལ་མེད་པར་གཏོང་བའི་དེང་རབས་ཅན་མ་ཡིན། ཀྲུང་ཧྭའི་ས་གཞི་ཆེན་མོ་ནས་འཚར་ལོངས་བྱུང་བའི་དེང་རབས་ཅན་ཡིན་པ་ལས་རྒྱལ་ཁབ་གཞན་པའི་དེང་རབས་ཅན་འདྲ་བཤུ་བྱས་པ་ཞིག་མ་ཡིན། དེ་ནི་ཤེས་དཔལ་ལ་གསར་སྒྱུར་བྱས་པའི་གྲུབ་འབྲས་ཡིན་པ་ལས་ཤེས་དཔལ་ལ་གས་ཆག་བྱུང་བའི་ཐོན་དངོས་ཤིག་མ་ཡིན། ཀྲུང་གོའི་ལུགས་ཀྱི་དེང་རབས་ཅན་ནི་ཀྲུང་ཧྭ་མི་རིགས་ཀྱི་དུས་རབས་རྙིང་པའི་ཚེ་སྲོག་གསར་པ་ཡིན་པས། དེས་ཀྲུང་ཧྭའི་ཤེས་དཔལ་ལ་གཟི་འོད་འབར་བའི་སྐུལ་འདེད་གཏོང་ཐུབ་ངེས་རེད།
——ཀྲུང་ཧྭའི་ཤེས་དཔལ་གྱི་མངོན་གསལ་དོད་པའི་ཁྱད་ཆོས་ཁོང་དུ་ཟབ་མོར་ཆུད་དགོས། ཧོ་ནན་ཨན་དབྱང་དབྱིན་ཞུའུ་ཡི་ངོ་མཚར་ལྡན་པའི་གྲི་ཤུལ་ཅན་གྱི་རུས་བརྐོས་ཡི་གེ་ལས་ལོ་ངོ་སྟོང་གི་ལོ་རྒྱུས་བདེན་དཔང་བྱས་ཤིང་། མི་རྣམས་ཀྱིས་“ཀྲུང་གོ་ནི་ཅི་ཞིག་ཡིན་”ཞེས་པར་དུས་རབས་ཀྱི་དྲིས་ལན་ཟམ་མི་འཆད་པར་འཚོལ་ཞིབ་བྱ་རྒྱུར་སྐུལ་སློང་བྱས་ཡོད། ཏང་གི་ཚོགས་ཆེན་ཉི་ཤུ་པ་གྲོལ་ནས་གཟའ་འཁོར་གཅིག་ཀྱང་མ་འགོར་བར། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཉིད་གནས་འདིར་རྟོག་ཞིབ་ཏུ་ཕེབས་ནས་ཟངས་ཆས་དང་། གཡང་ཊིའི་ཡོ་བྱད། རུས་བརྐོས་ཡི་གེ་སོགས་ས་འོག་ནས་བཏོན་པའི་རིག་དངོས་ལ་གཟིགས་མོ་ཞིབ་ཕྲ་གནང་ཞིང་བསྟན་དོན། “དབྱིན་ཞུའུ་ལ་ངས་ཡིད་སྨོན་བྱས་མྱོང་། ཐེངས་འདིའི་ཀྲུང་ཧྭའི་ཤེས་དཔལ་ལ་སློབ་སྦྱོང་དང་རྒྱུས་ལོན་དེ་བས་གཏིང་ཟབ་བྱས་ནས་གནའ་བཟང་དེང་སྤྱོད་ཀྱིས་ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་དེ་བས་ལེགས་པའི་སྒོ་ནས་འཛུགས་སྐྲུན་བྱ་ཆེད་དཔྱད་གཞི་མཁོ་འདོན་བྱེད་དགོས།”
ཀྲུང་གོའི་རིག་གནས་ལ་ལོ་རྒྱུས་རིང་པོ་ལྡན་པ་དང་ཀྲུང་ཧྭའི་ཤེས་དཔལ་རྒྱ་ཆེ་ལ་གཏིང་ཟབ་མོ་ཡིན། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ནི་ཀྲུང་ཧྭའི་ཤེས་དཔལ་གྱི་བློ་གྲོས་ཀྱི་སྙིང་བཅུད་དང་ནུས་ཚད་ཡོད་ས་དེ་ཡིན་ལ། ཀྲུང་ཧྭ་མི་རིགས་ཀྱི་རྩ་བ་དང་བླ་སྲོག་ཡིན་ཞིང་། ང་ཚོས་འཛམ་གླིང་རིག་གནས་ཀྱི་རྦ་རླབས་ཁྲོད་རྐང་པ་བརྟན་པོ་འཛུགས་ཐུབ་པའི་རྨང་གཞིའང་ཡིན། གནམ་འོག་སྤྱི་ལ་དབང་བ་དང་གནམ་འོག་སྤྱི་ལ་སྙོམས་པའི་སྤྱི་ཚོགས་ཀྱི་ཕུགས་བསམ་དང་། དམངས་ནི་རྒྱལ་ཁབ་ཀྱི་རྩ་བ་དང་ཀུན་སྤྱོད་ལ་བརྟེན་ནས་སྲིད་སྐྱོང་བའི་བཅོས་སྐྱོང་བསམ་བློ། མངའ་སྡེ་ཀུན་ལ་ཁྱབ་ཅིང་སྣ་མང་གཞི་གཅིག་ཅན་གྱི་གཅིག་གྱུར་ཆེན་པོའི་སྲོལ་རྒྱུན། རང་ཉིད་ཕུན་སུམ་ཚོགས་པར་གཏོང་བ་དང་། དེ་ནས་ཁྱིམ་ཚང་ལེགས་པར་སྐྱོང་བ། དེ་ནས་རྒྱལ་ཁབ་ལེགས་པར་སྐྱོང་བ། ཐ་མར་གནམ་འོག་བདེ་ལ་འགོད་ཅིང་། དར་རྒུད་གང་བྱུང་ལ་འགན་འཁུར་བའི་རྒྱལ་ཁབ་ཀྱི་བརྩེ་བ། སྤྱོད་བཟང་གིས་ཆོས་ཀུན་ཐེག་པ་དང་ལམ་ཀུན་འབྱེད་པའི་བསམ་པའི་རེ་སྙེག །དམངས་འཚོར་འབྱོར་ཕྱུག་ལྡན་པ་དང་བདེན་ཁེ་གཉིས་ཀར་ལྟ་རྟོག་བྱེད་པའི་དཔལ་འབྱོར་མི་ཆོས། སྣོད་བཅུད་མཉམ་གནས་དང་ཆོས་ཐམས་ཅད་མཉམ་དུ་གནས་པའི་སྐྱེ་ཁམས་འདུ་ཤེས། དངོས་ཐོག་བདེན་འཚོལ་དང་ཤེས་སྤྱོད་གཅིག་མཐུན་གྱི་མཚན་ཉིད་རིག་པའི་བསམ་བློ། ཕྱོགས་གཉིས་ཀྱི་བར་མ་འཛིན་པ་དང་ཞི་གནས་ཞི་མཐུན་གྱི་བསམ་གཞིགས་བྱེད་ཕྱོགས། ཡིད་རྟོན་འཆམ་མཐུན་དང་གཞན་ལ་བྱམས་ཤིང་ཁྱིམ་མཚེས་ལ་བརྩེ་བའི་འབྲེལ་འདྲིས་ཀྱི་ཐབས་ལམ་སོགས་ལྟ་བུའོ། །ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཁྲོད་ཀྱི་གཞི་རྒྱུ་གལ་ཆེན་མང་པོ་ཞིག་ནི་དེང་རབས་མིའི་རིགས་ལ་འཕྲད་པའི་དཀའ་གནད་ཐག་གཅོད་བྱེད་པའི་གསེར་གྱི་ལྡེ་མིག་ལྟ་བུ་ཡིན། དེས་མིའི་རིགས་ཀྱིས་འཇིག་རྟེན་ལ་ངོས་འཛིན་དང་བསྒྱུར་བཀོད་བྱེད་པར་བློ་སྒོ་འབྱེད་ཐུབ་པ་དང་། རྒྱལ་སྲིད་སྐྱོང་ལུགས་ཐད་ལ་བློ་སྒོ་འབྱེད་ཐུབ་ཅིང་། ཀུན་སྤྱོད་འཛུགས་སྐྲུན་ཐད་ལའང་བློ་སྒོ་འབྱེད་ཐུབ་པ་ཡིན།
ཆུ་མོ་རྒྱང་དུ་འབབ་འདོད་ན། །ངེས་པར་ཆུ་འགོ་གཤང་བར་བྱ། །ཞེས་པ་ལྟར། ཕྱོགས་ཡོངས་ནས་ཀྲུང་ཧྭའི་ཤེས་དཔལ་གྱི་ལོ་རྒྱུས་ཤེས་རྟོགས་གཏིང་ཟབ་བྱས་ཚེ་གཞི་ནས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ལ་གསར་གཏོད་རང་བཞིན་གྱི་སྤོ་སྒྱུར་དང་གསར་སྤེལ་རང་བཞིན་གྱི་འཕེལ་རྒྱས་ཡོང་བར་སྐུལ་འདེད་སྔར་བས་ནུས་ལྡན་གཏོང་ཐུབ་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིག་གནས་འཛུགས་སྐྲུན་ལ་སྐུལ་འདེད་ནུས་ལྡན་བཏང་ནས་ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་འཛུགས་སྐྲུན་བྱེད་ཐུབ། རིག་གནས་རྒྱུན་འཛིན་དང་འཕེལ་རྒྱས་ཀྱི་བཞུགས་མོལ་ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་གནང་དོན། “ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ལ་གཞི་རྒྱུ་གལ་ཆེན་མང་པོ་ཡོད་པས་ཀྲུང་ཧྭའི་ཤེས་དཔལ་གྱི་མངོན་གསལ་དོད་པའི་ཁྱད་ཆོས་ཐུན་མོང་ཐོག་གཏོད་དགོས་པ་”མ་ཟད། མངོན་གསལ་དོད་པའི་རྒྱུན་མཐུད་རང་བཞིན་དང་། མངོན་གསལ་དོད་པའི་གསར་གཏོད་རང་བཞིན། མངོན་གསལ་དོད་པའི་གཅིག་གྱུར་རང་བཞིན། མངོན་གསལ་དོད་པའི་ཁོང་ཡངས་རང་བཞིན། མངོན་གསལ་དོད་པའི་ཞི་བདེའི་རང་བཞིན་བཅས་ལ་བརྟེན་ནས་ཀྲུང་ཧྭའི་ཤེས་དཔལ་གྱི་“གནད་ལ་འཁེལ་བའི་བརྙན་རིས་”བརྐོ་འབྲི་བྱེད་དགོས།
མངོན་གསལ་དོད་པའི་རྒྱུན་མཐུད་རང་བཞིན་ལས་རྩ་བའི་ཐོག་ནས་ཀྲུང་ཧྭ་མི་རིགས་རང་ཉིད་ཀྱི་འགྲོ་ལམ་ཐོག་བསྐྱོད་དགོས་ངེས་ཡིན་པ་གཏན་འཁེལ་བྱས་ཡོད། གལ་ཏེ་ཡུན་རིང་བའི་ལོ་རྒྱུས་ཀྱི་རྒྱུན་མཐུད་རང་བཞིན་ལ་བརྟེན་ནས་ཀྲུང་གོ་ཤེས་རྟོགས་མ་བྱས་ན། གནའ་རབས་ཀྱི་ཀྲུང་གོ་ཤེས་རྟོགས་བྱེད་མི་ཐུབ་པ་དང་། དེང་རབས་ཀྱི་ཀྲུང་གོ་ཤེས་རྟོགས་བྱེད་མི་ཐུབ་པ་མ་ཟད། འབྱུང་འགྱུར་གྱི་ཀྲུང་གོ་དེ་བས་ཀྱང་ཤེས་རྟོགས་བྱེད་མི་ཐུབ། མངོན་གསལ་དོད་པའི་གསར་གཏོད་རང་བཞིན་གྱིས་རྩ་བའི་ཐོག་ནས་ཀྲུང་ཧྭ་མི་རིགས་ཀྱིས་བདེན་པ་སྲུང་བ་ལས་རྙིང་ཞེན་མི་སྲུང་བ་དང་གནའ་སྲོལ་བརྩི་བཀུར་བྱེད་པ་ལས་གནའ་ལུགས་བསྐྱར་གསོ་མི་བྱེད་པའི་ཡར་བརྩོན་གྱི་སྙིང་སྟོབས་གཏན་འཁེལ་བྱས་ཡོད་ལ། ཀྲུང་ཧྭ་མི་རིགས་འགྲན་སློང་གསར་པར་མི་སྐྲག་པ་དང་བྱ་དངོས་གསར་པ་དང་ལེན་བྱེད་ཕོད་པའི་ཞུམ་མེད་ཀྱི་གཤིས་རྒྱུད་གཏན་འཁེལ་བྱས་ཡོད། མངོན་གསལ་དོད་པའི་གཅིག་གྱུར་རང་བཞིན་གྱིས་རྩ་བའི་ཐོག་ནས་ཀྲུང་ཧྭ་མི་རིགས་ཀྱི་མི་རིགས་ཁག་གི་རིག་གནས་གཞི་གཅིག་ཏུ་འདྲེས་རྒྱུ་དང་། བར་ཆད་ཚབས་ཆེན་འཕྲད་ཀྱང་གཅིག་སྡུད་བརྟན་པོ་ཡོང་རྒྱུ་རྩ་བའི་ཐོག་ནས་གཏན་འཁེལ་བྱས་པ་དང་། རྒྱལ་ཁབ་ཁ་ཕྲལ་མི་རུང་བ་དང་། རྒྱལ་ཁབ་ཟང་ཟིང་མི་རུང་བ། མི་རིགས་ཁ་འཐོར་མི་རུང་བ། ཤེས་དཔལ་མཚམས་ཆད་མི་རུང་བ་བཅས་ཀྱི་ཐུན་མོང་དད་སེམས་གཏན་འཁེལ་བྱས་ཡོད་ཅིང་། རྒྱལ་ཁབ་གཅིག་གྱུར་བྱ་རྒྱུ་ནི་ནམ་ཡང་ཀྲུང་གོའི་ཁེ་ཕན་གྱི་ཡང་སྙིང་ཡིན་པ་གཏན་འཁེལ་བྱས་པ་དང་། སྲ་ཞིང་བརྟན་པའི་གཅིག་གྱུར་གྱི་རྒྱལ་ཁབ་ཅིག་ནི་མི་རིགས་ཁག་གི་མི་དམངས་ཀྱི་ལས་དབང་གི་འབྱུང་རྩ་ཡིན་པ་གཏན་འཁེལ་བྱས་ཡོད། མངོན་གསལ་དོད་པའི་ཁོང་ཡངས་རང་བཞིན་གྱིས་རྩ་བའི་ཐོག་ནས་ཀྲུང་ཧྭ་མི་རིགས་ཀྱི་འགྲོ་འོང་སྤེལ་རེས་མཉམ་འདྲེས་བཅས་ཀྱི་ལོ་རྒྱུས་ཀྱི་ཁ་ཕྱོགས་གཏན་འཁེལ་བྱས་པ་དང་། ཀྲུང་གོའི་ཆོས་ལུགས་དད་མོས་ཁག་སྣ་མང་མཉམ་གནས་ཀྱི་ཞི་མཐུན་རྣམ་པར་མཆིས་པ་གཏན་འཁེལ་བྱས་ཤིང་། ཀྲུང་ཧྭའི་རིག་གནས་ཀྱིས་འཛམ་གླིང་གི་ཤེས་དཔལ་མཉམ་སྡུད་མཉམ་གསོག་བྱེད་པའི་བློ་རྒྱ་ཆེན་པོ་གཏན་འཁེལ་བྱས་ཡོད། མངོན་གསལ་དོད་པའི་ཞི་བདེའི་རང་བཞིན་གྱིས་རྩ་བའི་ཐོག་ནས་ཀྲུང་གོ་ནི་ཐོག་མཐའ་བར་གསུམ་དུ་འཛམ་གླིང་ཞི་བདེའི་འཛུགས་སྐྲུན་པ་དང་། གོ་ལ་ཧྲིལ་པོའི་འཕེལ་རྒྱས་ལ་ལེགས་སྐྱེས་འབུལ་མཁན། རྒྱལ་སྤྱིའི་སྒྲིག་ལམ་སྲུང་སྐྱོང་བྱེད་མཁན་བཅས་ཡིན་པ་གཏན་འཁེལ་བྱས་པ་དང་། ཀྲུང་གོས་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་རྒྱུ་རྒྱུན་ཆད་མེད་པར་དོན་གཉེར་བྱེད་པ་ལས་རིག་གནས་བཙན་དབང་མི་བྱེད་པ་གཏན་འཁེལ་བྱས་པ་དང་། ཀྲུང་གོས་རང་ཉིད་ཀྱི་རིན་ཐང་འདུ་ཤེས་དང་ཆབ་སྲིད་སྒྲིག་སྲོལ་གཞན་ལ་བཙན་འགེལ་མི་བྱེད་པ་གཏན་འཁེལ་བྱས་ཤིང་། ཀྲུང་གོས་མཉམ་ལས་རྒྱུན་འཁྱོངས་བྱེད་པ་དང་ཁ་གཏད་དུ་མི་ལངས་པ་དང་། “རང་ཕྱོགས་སྲུང་ཞིང་གཞན་ཕྱོགས་རྒོལ་བའི་”ཚོགས་པ་ཆུང་བ་གཏན་ནས་མི་བསྒྲིག་པ་གཏན་འཁེལ་བྱས་ཡོད།
རིག་གནས་ཀྱི་འབྱུང་རྩ་མཐུད་ཅིང་། །རིག་གནས་རང་གིས་ལག་ཏུ་འཛིན། །ཀྲུང་ཧྭའི་ཤེས་དཔལ་གྱི་མངོན་གསལ་དོད་པའི་ཁྱད་ཆོས་ལྔ་ཡིས་རྩ་བའི་ཐོག་ནས་ཀྲུང་ཧྭ་མི་རིགས་ཀྱི་འཕེལ་རྒྱས་ཀྱི་འགྲོ་ལམ་དང་། བསམ་པའི་གཤིས་རྒྱུད། ཐུན་མོང་གི་དད་སེམས། ལོ་རྒྱུས་ཀྱི་ཁ་ཕྱོགས། བློ་རྒྱའི་ཆེ་ཆུང་བཅས་གཏན་འཁེལ་བྱས་ཡོད།
——“ཟུང་འབྲེལ་གཉིས་”ཀྱི་དོན་སྙིང་གལ་ཆེན་ཁོང་དུ་ཟབ་མོར་ཆུད་དགོས། ལོ་གཉིས་ཀྱི་སྔོན་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྥུའུ་ཅན་ཝུའུ་དབྱི་ཧྲན་གྱི་ཀྲུའུ་ཞི་ཡོན་ལ་རྟོག་ཞིབ་གནང་སྐབས་གསལ་པོར་བསྟན་གནང་དོན། “གལ་ཏེ་ཀྲུང་ཧྭའི་ལོ་ངོ་ལྔ་སྟོང་གི་ཤེས་དཔལ་མེད་ན། ཀྲུང་གོའི་ཁྱད་ཆོས་ཞེས་པ་ཞིག་གང་ན་ཡོད་དམ། གལ་ཏེ་ཀྲུང་གོའི་ཁྱད་ཆོས་མེད་ཚེ་ང་ཚོ་ད་ལྟའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་འདི་འདྲ་ཞིག་གང་ན་ཡོད་དམ།” ལོ་གཉིས་ཀྱི་རྗེས་སུ་རིག་གནས་རྒྱུན་འཛིན་དང་འཕེལ་རྒྱས་ཀྱི་བཞུགས་མོལ་ཚོགས་འདུའི་ཐོག་སྤྱི་ཁྱབ་ཧྲུའུ་ཅིས་རྒྱས་བཤད་གཏིང་ཟབ་གནང་དོན། “ང་ཚོའི་སྤྱི་ཚོགས་རིང་ལུགས་གཞན་དང་མི་འདྲ་དོན་གང་ཡིན་པ་དང་། སྐྱེ་སྟོབས་ཀྱི་དཔལ་འབར་ཐུབ་དོན་ཅི་ཞིག་ཡིན་ནམ་ཞེ་ན། འགག་རྩ་ནི་ཀྲུང་གོའི་ཁྱད་ཆོས་ལ་ཐུག་ཡོད། ཀྲུང་གོའི་ཁྱད་ཆོས་ཀྱི་འགག་རྩ་ནི་‘ཟུང་འབྲེལ་གཉིས་’ལ་ཐུག་ཡོད།”
སྤྱི་ཁྱབ་ཧྲུའུ་ཅི་ཞི་ཅིན་ཕིང་ཉིད་མར་ཁེ་སིའི་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་བའི་འཐབ་ཇུས་དང་ཁྱོན་ཡོངས་ཀྱི་མཐོ་ཚད་ཐོག་ལངས་ནས་གསར་གཏོད་ཀྱི་རང་བཞིན་ལྡན་པའི་སྒོ་ནས་“ཟུང་འབྲེལ་གཉིས་”བཏོན་པ་སྟེ། མར་ཁེ་སིའི་རིང་ལུགས་ཀྱི་གཞི་རྩའི་རྩ་བའི་རིགས་པ་དེ་ཀྲུང་གོའི་བྱེ་བྲག་གི་དོན་དངོས་དང་ཟུང་འབྲེལ་དང་། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དང་ཟུང་འབྲེལ་བྱེད་དགོས་པ་མ་ཟད། རྒྱས་བཤད་གལ་ཆེན་རབ་དང་རིམ་པ་གནང་ཞིང་། “ཟུང་འབྲེལ་གཉིས་”རྒྱུན་འཁྱོངས་བྱེད་པའི་རྩ་དོན་དང་ཐབས་ཤེས་དང་ཐབས་ལམ་སོགས་གནད་དོན་གལ་ཆེན་རབ་དང་རིམ་པ་རྒྱུད་རིམ་ལྡན་པའི་སྒོ་ནས་རྒྱས་བཤད་གནང་སྟེ་དུས་རབས་གསར་པའི་ཆ་རྐྱེན་འོག་སྔར་ལས་ལྷག་པའི་སྒོ་ནས་མར་ཁེ་སིའི་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་བར་ཁ་ཕྱོགས་གསལ་སྟོན་གནང་བ་དང་སྲུང་བྱ་འདོན་སྤྲོད་བྱས་ཡོད། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ནི་དངོས་ཡོད་ཀྱི་ཀྲུང་གོར་གཞི་ཚུགས་ཡོད་པ་མ་ཟད་ལོ་རྒྱུས་ཀྱི་ཀྲུང་གོར་རྨང་ཚུགས་ནས་མར་ཁེ་སིའི་རིང་ལུགས་ལ་མངོན་གསལ་དོད་པའི་ལག་ལེན་གྱི་ཁྱད་ཆོས་དང་། མི་རིགས་ཀྱི་ཁྱད་ཆོས། དུས་རབས་ཀྱི་ཁྱད་ཆོས་བཅས་ལྡན་པར་བྱས་ཡོད། དེ་ནི་“ཟུང་འབྲེལ་གཉིས་”རྒྱུན་འཁྱོངས་དང་རིགས་པའི་གཞུང་ལུགས་གསར་གཏོད་ལ་སྐུལ་འདེད་གཏོང་ཕོད་པའི་དཔེ་མཚོན་ཞིག་ཡིན་ལ། དེང་རབས་ཀྲུང་གོའི་མར་ཁེ་སིའི་རིང་ལུགས་དང་དུས་རབས་ཉེར་གཅིག་པའི་མར་ཁེ་སིའི་རིང་ལུགས་ཡིན་ལ། ཀྲུང་ཧྭའི་རིག་གནས་དང་ཀྲུང་གོའི་སྙིང་སྟོབས་ཀྱི་དུས་རབས་ཀྱི་སྙིང་བཅུད་ཡིན་པས། མར་ཁེ་སིའི་རིང་ལུགས་ཀྲུང་གོ་ཅན་དང་དུས་རབས་ཅན་དུ་འགྱུར་བའི་འཕུར་མཆོང་གསར་པ་མངོན་འགྱུར་བྱུང་ཡོད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་དོན། “ལོ་ངོ་ལྔ་སྟོང་ལྷག་གི་ཀྲུང་ཧྭའི་ཤེས་དཔལ་གྱི་རྨང་གཞི་བརྟན་པོའི་སྟེང་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་གསར་གཏོད་དང་འཕེལ་རྒྱས་གཏོང་དགོས་ན། མར་ཁེ་སིའི་རིང་ལུགས་ཀྱི་གཞི་རྩའི་རྩ་བའི་རིགས་པ་དེ་ཀྲུང་གོའི་བྱེ་བྲག་གི་དོན་དངོས་དང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དང་ཟུང་འབྲེལ་བྱ་རྒྱུ་ནི་ངེས་པར་དུ་བརྒྱུད་དགོས་པའི་འགྲོ་ལམ་ཞིག་ཡིན། དེ་ནི་ང་ཚོས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་འཚོལ་ཞིབ་བྱེད་རིང་ཐོབ་པའི་ཆོས་ཉིད་རང་བཞིན་ལྡན་པའི་ངོས་འཛིན་ཡིན་ལ། ང་ཚོར་རྒྱལ་ཁ་ཐོབ་པའི་ཐབས་མཆོག་ཅིག་ཡིན། ངེས་པར་དུ་ངོས་འཛིན་གཏིང་ཟབ་བྱེད་དགོས་པ་ཞིག་ནི་“ཟུང་འབྲེལ་”གྱི་སྔོན་འགྲོའི་ཆ་རྐྱེན་ནི་ཕན་ཚུན་གཅིག་མཐུན་ཡོང་བ་བྱ་རྒྱུ་དེ་རེད། མར་ཁེ་སིའི་རིང་ལུགས་དང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་འབྱུང་ཁུངས་མི་འདྲ་ཡང་ཕན་ཚུན་བར་ཚད་མཐོའི་གཅིག་མཐུན་རང་བཞིན་ལྡན་ཡོད། ཕན་ཚུན་གཅིག་མཐུན་ཡོང་ན་ད་གཟོད་ཟུང་འབྲེལ་དམ་ཚགས་བྱེད་ཐུབ། “ཟུང་འབྲེལ་”བྱས་པའི་མཇུག་འབྲས་ནི་ཕན་ཚུན་རོགས་རེས་བྱ་རྒྱུ་དེ་རེད། “ཟུང་འབྲེལ་”ནི་སྒྲིག་གཤོམ་བྱེད་པ་མ་ཡིན་ལ། སྟབས་བདེའི་དངོས་ཁམས་ཀྱི་ཚུར་སྣང་ཞིག་ཀྱང་མ་ཡིན་པར། དེ་ནི་རྫས་འགྱུར་གྱི་ཚུར་སྣང་གཏིང་ཟབ་མོ་ཞིག་ཡིན་པས། གཅིག་གྱུར་དམ་ཚགས་ཀྱི་རིག་གནས་ཀྱི་ཚེ་སྲོག་གི་ཕུང་པོ་གསར་པ་ཞིག་བཏོད་དེ། མར་ཁེ་སིའི་རིང་ལུགས་དེ་ཀྲུང་གོའི་རིག་གནས་སུ་གྱུར་པ་དང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དེ་དེང་རབས་ཀྱི་རིག་གནས་སུ་གྱུར་པ་དང་། “ཟུང་འབྲེལ་”ལས་བྱུང་བའི་རིག་གནས་གསར་པ་དེ་ཀྲུང་གོའི་ལུགས་ཀྱི་དེང་རབས་ཅན་གྱི་རིག་གནས་ཀྱི་རྣམ་པ་ཞིག་ཏུ་གྱུར་ཡོད། “ཟུང་འབྲེལ་”གྱིས་འགྲོ་ལམ་གྱི་རྨང་གཞི་བརྟན་དུ་བཏང་ཡོད། ཟིལ་རླབས་དགུང་འཕྱུར་གྱི་ཀྲུང་ཧྭའི་ལོ་ངོ་ལྔ་སྟོང་ལྷག་གི་ཤེས་དཔལ་གྱི་ལོ་རྒྱུས་ལ་གཞི་ཚུགས་ན། གཞི་ནས་ཀྲུང་གོའི་འགྲོ་ལམ་གྱི་ལོ་རྒྱུས་ལྡོག་ཐབས་མེད་པ་དང་། རིག་གནས་ཀྱི་ནང་དོན། ཐུན་མོང་མ་ཡིན་པའི་དགེ་མཚན་བཅས་ཤེས་རྟོགས་བྱེད་ཐུབ། “ཟུང་འབྲེལ་”ལས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་ལ་སྔར་བས་རྒྱ་ཆེ་ཞིང་གཏིང་ཟབ་པའི་ལོ་རྒྱུས་ལྡན་པར་བྱས་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་གྱི་རིག་གནས་རྨང་གཞི་རྒྱ་ཆེར་བཏང་ཡོད། ཀྲུང་གོའི་ལུགས་ཀྱི་དེང་རབས་ཅན་གྱིས་ཀྲུང་ཧྭའི་ཤེས་དཔལ་ལ་དེང་རབས་ཀྱི་སྟོབས་ཤུགས་སྦྱིན་པ་དང་ཀྲུང་ཧྭའི་ཤེས་དཔལ་གྱིས་ཀྲུང་གོའི་ལུགས་ཀྱི་དེང་རབས་ཅན་ལ་རྨང་གཞི་ཟབ་མོ་བཏིང་ཡོད། “ཟུང་འབྲེལ་”གྱིས་གསར་གཏོད་ཀྱི་བར་སྟོང་ཕྱེ་ཡོད། “ཟུང་འབྲེལ་”དེ་ཉིད་མ་གཞི་ནས་གསར་གཏོད་ཅིག་ཡིན་པ་དང་། དུས་མཚུངས་སུ་རིགས་པའི་གཞུང་ལུགས་དང་ལག་ལེན་གསར་གཏོད་ཀྱི་བར་སྟོང་རྒྱ་ཆེན་པོ་ཕྱེ་ནས་ང་ཚོར་བསམ་བློ་དང་རིག་གནས་ཀྱི་རང་དབང་ཐོབ་ཏུ་བཅུག་པ་མ་ཟད། འགྲོ་ལམ་དང་། རིགས་པའི་གཞུང་ལུགས། ལམ་ལུགས་བཅས་ལ་ནུས་པ་ཆེན་པོ་ཐོན་ཡོད། “ཟུང་འབྲེལ་”གྱིས་རིག་གནས་བྱེད་པོའི་རང་བཞིན་སྲ་བརྟན་དུ་བཏང་ཡོད། མར་ཁེ་སིའི་རིང་ལུགས་ཀྱི་ཀྲུང་གོའི་ལེ་ཚན་ནི་ཀྲུང་གོའི་གུང་ཁྲན་ཏང་མིས་རང་ཉིད་ཀྱི་སྟོབས་ཤུགས་ལ་བརྟེན་ནས་ལག་ལེན་བྱས་པ་ལས་ཐོབ་པ་ཞིག་རེད། ལོ་རྒྱུས་དང་ལག་ལེན་ནས་ང་ཚོར་བསྟན་དོན། རང་རྒྱལ་ཁབ་དང་རང་མི་རིགས་ཀྱི་ལོ་རྒྱུས་རིག་གནས་ཀྱི་ཞིང་ས་གཤིན་པོར་ས་བོན་བཏབ་ན། གཞི་ནས་མར་ཁེ་སིའི་རིང་ལུགས་ཀྱི་བདེན་དོན་གྱི་ལྗོན་ཤིང་རྩ་བ་ཚུགས་པ་དང་ལོ་འདབ་རྒྱས་ཐུབ་པ་ཡིན། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་གཏོད་རྒྱུ་དེ་ནི་རིག་གནས་ཀྱི་གཙོ་རྐང་རང་བཞིན་འདིའི་མཚོན་ཚུལ་ནུས་ལྡན་ཞིག་རེད།
“རྫིང་ཆུ་དྭངས་གཙང་འདི་འདྲ་ཡོད་པ་དེ། །ཆུ་འགོའི་འབབ་རྒྱུན་ཆད་མེད་ཡོད་པས་ཡིན། །ཞེས་པ་ལྟར། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ནི་ང་ཚོའི་ཏང་གིས་གཞུང་ལུགས་གསར་གཏོད་བྱེད་པའི་“རྩ་བ་”ཡིན། ཀྲུང་གོའི་གུང་ཁྲན་ཏང་དབུ་བརྙེས་པའི་ཉིན་མོ་ནས་བཟུང་ཀྲུང་གོའི་སྔོན་ཐོན་རིག་གནས་ཀྱི་སྣེ་ཁྲིད་མཁན་དང་ལག་ལེན་མཁན་ཡིན་པ་མ་ཟད། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་བྱེད་མཁན་དང་དར་སྤེལ་གཏོང་མཁན་ཡང་ཡིན། ཐེངས་འདིའི་བཞུགས་མོལ་ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གོམ་གང་མདུན་སྤོས་ཀྱིས་ནན་གསུང་གནང་དོན། “ཟུང་འབྲེལ་གཉིས་པ་”ནི་ཡང་བསྐྱར་བསམ་བློར་བཅིངས་འགྲོལ་བཏང་བ་ཞིག་ཡིན་པས། ང་ཚོས་དེ་བས་རྒྱ་ཆེ་བའི་རིག་གནས་ཀྱི་བར་སྟོང་ནང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་རྩ་ཆེའི་ཐོན་ཁུངས་བེད་སྤྱོད་གང་ལེགས་བྱས་ཏེ་འབྱུང་འགྱུར་ལ་ཁ་ཕྱོགས་པའི་རིགས་པའི་གཞུང་ལུགས་དང་ལམ་ལུགས་གསར་གཏོད་འཚོལ་ཞིབ་བྱེད་དགོས། “ཟུང་འབྲེལ་གཉིས་པ་”ནི་ང་ཚོའི་ཏང་གིས་མར་ཁེ་སིའི་རིང་ལུགས་ཀྲུང་གོ་ཅན་དང་དུས་རབས་ཅན་དུ་འགྱུར་བའི་ལོ་རྒྱུས་ཀྱི་ཉམས་མྱོང་ཕྱོགས་བསྡོམས་གཏིང་ཟབ་བྱས་པ་ཞིག་དང་། ཀྲུང་ཧྭའི་ཤེས་དཔལ་འཕེལ་རྒྱས་ཀྱི་ཆོས་ཉིད་ལ་སྟངས་འཛིན་ཟབ་མོ་བྱས་པ་ཞིག་ཡིན་པས། ང་ཚོའི་ཏང་གིས་ཀྲུང་གོའི་འགྲོ་ལམ་དང་། རིགས་པའི་གཞུང་ལུགས། ལམ་ལུགས་བཅས་ལ་ངོས་འཛིན་བྱེད་པ་དེ་མཐོ་ཚད་གསར་པ་ཞིག་ཏུ་སླེབས་ཡོད་པ་མཚོན་པ་དང་། ང་ཚོའི་ཏང་གི་ལོ་རྒྱུས་ཀྱི་གདེང་ཚོད་དང་རིག་གནས་ཀྱི་གདེང་ཚོད་དེ་མཐོ་ཚད་གསར་པ་ཞིག་ཏུ་སླེབས་ཡོད་པ་མཚོན་ཞིང་། ང་ཚོའི་ཏང་གིས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་བྱེད་པའི་ཁྲོད་རིག་གནས་གསར་གཏོད་ལ་སྐུལ་འདེད་གཏོང་བའི་རང་རྟོགས་རང་བཞིན་དེ་མཐོ་ཚད་གསར་པ་ཞིག་ཏུ་སླེབས་པ་མཚོན་ཡོད།
——རིག་གནས་ཀྱི་ལས་འགན་གསར་པ་སྔར་ལས་ལེགས་པར་འཁུར་རྒྱུ་ཁོང་དུ་ཟབ་མོར་ཆུད་དགོས། “རིག་གནས་ཀྱི་ལས་འགན་གསར་པ་སྔར་ལས་ལེགས་པར་འཁུར་བ་དང་། རིག་གནས་ཀྱི་གདེང་ཚོད་བརྟན་དུ་གཏོང་བ། སྒོ་འབྱེད་ཁོང་ཡངས་ལྡན་པར་བྱེད་པ། བདེན་སྲུང་གསར་གཏོད་རྒྱུན་འཁྱོངས་བྱེད་པ། མི་རིགས་ཡོངས་ཀྱི་རིག་གནས་གསར་གཏོད་ཀྱི་གསོན་ཤུགས་འཕེལ་བར་བྱེད་ཅིང་། ལོ་རྒྱུས་ཀྱི་འགོ་འཛུགས་ས་གསར་པའི་ཐོག་མུ་མཐུད་དུ་རིག་གནས་དར་རྒྱས་ལ་སྐུལ་འདེད་དང་། རིག་གནས་ཀྱི་རྒྱལ་ཁབ་སྟོབས་ལྡན་འཛུགས་སྐྲུན། ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་འཛུགས་སྐྲུན་བཅས་བྱེད་ཅིང་། མིའི་རིགས་ཀྱི་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་རྒྱུར་རྒྱུན་ཆད་མེད་པར་སྐུལ་འདེད་བཏང་ནས་རྒྱལ་ཁབ་སྟོབས་ལྡན་སྐྲུན་པ་དང་མི་རིགས་བསྐྱར་དར་ཡོང་ཆེད་བསམ་པའི་སྟོབས་ཤུགས་ཆེན་པོ་སྤྲོད་དགོས།” 2023ལོའི་ཟླ་6ཚེས་7ཉིན། རིག་གནས་རྒྱལ་ཁབ་སྟོབས་ལྡན་འཛུགས་སྐྲུན་གྱི་མཐོ་རིམ་གླེང་སྟེགས་སྐབས་དང་པོ་འགོ་ཚུགས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྟེན་འབྲེལ་ཞུ་ཡིག་སྤྲིངས་ཤིང་ཏང་ཀྲུང་དབྱང་གི་ཚབ་ཞུས་ཏེ་སྤྲོ་སེམས་འཁོལ་བའི་ངང་རྟེན་འབྲེལ་ཞུས་པ་རེད།
རིག་གནས་ཀྱི་གདེང་ཚོད་ནི་དེ་བས་རྨང་གཞི་ཅན་དང་། དེ་བས་ཁྱབ་རྒྱ་ཆེ་བ། དེ་བས་གཏིང་ཟབ་པ་བཅས་ཀྱི་གདེང་ཚོད་ཡིན་ལ། རྒྱལ་ཁབ་ཅིག་དང་མི་རིགས་ཤིག་འཕེལ་རྒྱས་འགྲོ་བའི་ཁྲོད་ཀྱི་ཆེས་གཞི་རྩར་གྱུར་པ་དང་། ཆེས་གཏིང་ཟབ་པ། ཆེས་རྒྱུན་རིང་བ་བཅས་ཀྱི་སྟོབས་ཤུགས་ཀྱང་ཡིན་པས། རིག་གནས་ཀྱི་གདེང་ཚོད་ཆེན་པོ་མེད་པ་དང་རིག་གནས་དར་རྒྱས་གོང་འཕེལ་མ་བྱུང་ན་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་ཡོང་མི་ཐུབ། སྤྱི་ལེ་གྲུ་བཞི་མ་ཁྲི་960ལྷག་ཟིན་པའི་ཡངས་ཤིང་རྒྱ་ཆེ་བའི་ས་གཞིའི་ཐོག་ལངས་ནས་ཀྲུང་ཧྭ་མི་རིགས་ཀྱིས་འབད་འཐབ་ཡུན་རིང་བྱས་ནས་བསགས་པའི་རིག་གནས་ཀྱི་གསོ་བཅུད་རོལ་ཆོག་པ་དང་། ཀྲུང་གོའི་མི་དམངས་དུང་ཕྱུར་14ལྷག་མཉམ་དུ་འདུས་པའི་སྟོབས་ཤུགས་ཆེན་པོ་ཡོད་པས། ང་ཚོས་རང་ཉིད་ཀྱི་འགྲོ་ལམ་ཐོག་བསྐྱོད་རྒྱུ་རྒྱུན་འཁྱོངས་བྱེད་པར་གར་སྟེགས་ཡངས་ཤིང་རྒྱ་ཆེ་བ་དང་། ལོ་རྒྱུས་ཀྱི་རྨང་གཞི་ཕུན་སུམ་ཚོགས་པ། མདུན་སྐྱོད་ཀྱི་ངེས་ཤུགས་ཚད་མེད་ལྡན་པ་བཅས་རེད། རིག་གནས་ཀྱི་ལས་འགན་གསར་པ་དེ་བས་ལེགས་པའི་སྒོ་ནས་འཁུར་དགོས་ན། རིག་གནས་ཀྱི་གདེང་ཚོད་བརྟན་དུ་གཏོང་བ་དང་། རང་ཉིད་ཀྱི་འགྲོ་ལམ་ཐོག་བསྐྱོད་རྒྱུ་རྒྱུན་འཁྱོངས་བྱེད་པ། ཀྲུང་ཧྭ་མི་རིགས་ཀྱི་ལོ་རྒྱུས་ཀྱི་ལག་ལེན་དང་དེང་རབས་ཀྱི་ལག་ལེན་རླབས་པོ་ཆེ་ལ་གཞི་ཚུགས་པ། ཀྲུང་གོའི་གནས་ལུགས་ལ་བརྟེན་ནས་ཀྲུང་གོའི་ཉམས་མྱོང་ཕྱོགས་བསྡོམས་ཡག་པོ་བྱེད་པ། ཀྲུང་གོའི་ཉམས་མྱོང་དེ་ཀྲུང་གོའི་རིགས་པའི་གཞུང་ལུགས་སུ་མཐོར་འདེགས་བཏང་ནས་བསམ་པའི་ཐོག་གི་རང་ཚུགས་རང་བདག་མངོན་འགྱུར་ཡོང་བ་བཅས་བྱེད་དགོས།
ཟས་ཞིམ་པོ་བྲོ་རྫས་བརྒྱ་ལས་བྱུང་། ཞེས་པ་ལྟར། ཀྲུང་ཧྭའི་རིག་གནས་ནི་ལོ་རྒྱུས་ཀྱི་ཡིན་ལ་དེང་རབས་ཀྱི་ཡང་ཡིན། མི་རིགས་ཀྱི་ཡིན་ལ་འཛམ་གླིང་གི་ཡང་ཡིན། ད་ལྟ། རྒྱ་མཚོས་ཆུ་བོ་ཐམས་ཅད་བསྡུ་བ་ལྟ་བུའི་བློ་རྒྱ་ལ་བརྟེན་ནས་རིག་གནས་སྤེལ་རེས་ཀྱི་བཀག་རྒྱ་གཏོར་བ་དང་། མཉམ་སྡུད་མཉམ་གསོག་གི་རྣམ་འགྱུར་ཐོག་ནས་རྒྱལ་ཁབ་ཁག་གི་ཤེས་དཔལ་གྱི་སྙིང་བཅུད་བསྡུ་ལེན་བྱས་ཤིང་། གདེང་ཚོད་ཡོད་པ་དང་སྒོ་འབྱེད་ཀྱི་རྣམ་པའི་ཐོག་ནས་ཀྲུང་ཧྭའི་རིག་གནས་ཕྱི་ཕྱོགས་སུ་བསྐྱོད་རྒྱུར་སྐུལ་འདེད་སྔར་བས་ལེགས་པ་བཏང་ཚེ། གཞི་ནས་རྒྱལ་ཁབ་ཁག་གི་ཤེས་དཔལ་དེ་སྤེལ་རེས་དང་ཕན་ཚུན་དཔྱད་གཞིར་འཛིན་པའི་ཁྲོད་ཐུན་མོང་ཐོག་འཕེལ་རྒྱས་འགྲོ་བར་སྐུལ་མ་བཏང་སྟེ་མིའི་རིགས་ཀྱི་ཤེས་དཔལ་གྱི་ལེའུ་གསར་པ་རྩོམ་ཐུབ། རིག་གནས་ཀྱི་ལས་འགན་གསར་པ་སྔར་བས་ལེགས་པར་འཁུར་དགོས་ན། སྒོ་འབྱེད་ཁོང་ཡངས་བྱེད་དགོས་པ་དང་། མར་ཁེ་སིའི་རིང་ལུགས་ཀྲུང་གོ་ཅན་དང་དུས་རབས་ཅན་དུ་འགྱུར་རྒྱུ་རྒྱུན་འཁྱོངས་བྱེད་པ། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་འཛིན་སྐྱོང་སྤེལ་གསུམ་བྱེད་པ། ཕྱི་ནས་ཡོང་བའི་རིག་གནས་རང་ས་ཅན་དུ་འགྱུར་བར་སྐུལ་སྤེལ་བཅས་བྱས་ནས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིག་གནས་ཟམ་མི་འཆད་པར་གསོ་སྐྱོང་དང་གསར་གཏོད་བྱེད་དགོས།
ཤེས་དཔལ་གང་ཞིག་ཡིན་རུང་ཚང་མས་རྒྱལ་ཁབ་ཅིག་དང་མི་རིགས་ཤིག་གི་བསམ་པའི་ཁྲག་རྒྱུན་རྒྱུན་མཐུད་བྱེད་ཀྱི་ཡོད། དེ་ལ་གཅིག་རྒྱུད་གཅིག་འཛིན་དང་མི་རབས་ནས་མི་རབས་བར་སྲུང་སྐྱོང་བྱེད་དགོས་ལ། དུས་བསྟུན་མདུན་སྐྱོད་དང་གསར་གཏོད་དེ་བས་ཀྱང་བྱེད་ཕོད་དགོས། བདེན་སྲུང་གསར་གཏོད་བྱ་རྒྱུ་ནི་ཀྲུང་ཧྭ་མི་རིགས་ཀྱིས་ལོ་ངོ་སྟོང་ཕྲག་ཁ་ཤས་རིང་ཡང་དག་པའི་འགྲོ་ལམ་བརྟན་སྲུང་དང་རྙིང་དོར་གསར་འཛུགས་བྱེད་པའི་རིག་གནས་ཀྱི་སྲོལ་རྒྱུན་རྒྱུན་འཛིན་བྱས་པ་ཞིག་ཡིན་ལ། ང་ཚོའི་ཏང་གིས་ཐོག་མཐའ་བར་གསུམ་དུ་རྒྱུན་འཁྱོངས་བྱེད་བཞིན་པའི་བསམ་བློ་བཅིངས་འགྲོལ་དང་། དངོས་ཐོག་བདེན་འཚོལ། དུས་བསྟུན་མདུན་སྐྱོད། བདེན་འཚོལ་དོན་གཉེར་བཅས་ཀྱི་གཤིས་རྒྱུད་དང་ཡང་ཕན་ཚུན་འབྲེལ་མཐུད་བྱས་པ་ཞིག་ཡིན་པས། དེས་རྒྱུན་འཛིན་དང་འཕེལ་རྒྱས་ཀྱི་རྩོད་སྒྲུབ་གཅིག་གྱུར་མཚོན་ཡོད། རིག་གནས་ཀྱི་ལས་འགན་གསར་པ་སྔར་བས་ལེགས་པའི་སྒོ་ནས་འཁུར་དགོས་ན་བདེན་སྲུང་གསར་གཏོད་རྒྱུན་འཁྱོངས་བྱེད་དགོས་ལ། བདེན་སྲུང་གསར་གཏོད་ཀྱི་སྲོལ་བཟང་དང་ངར་ཤུགས་སྲུང་ནས་ལོ་རྒྱུས་ཀྱི་རིག་གནས་རྒྱུན་འཛིན་དང་དེང་རབས་ཀྱི་བྱས་རྗེས་གསར་པ་འཇོག་དགོས།
ལོ་ཟླ་གཟི་བརྗིད་ཆེ་བ། །རི་ཆུ་དཔང་དུ་གྱུར་ཡོད། །རིག་གནས་ཁྱད་དུ་འཕགས་པ། ། གནའ་དེང་ཟུང་འབྲེལ་བྱས་ཡོད། །ཅེས་པ་ལྟར། “ལོ་རྒྱུས་ཀྱི་རྒྱུན་འཛིན་ཡག་ཤོས་ནི་ལོ་རྒྱུས་གསར་པ་གཏོད་རྒྱུ་དེ་རེད། མིའི་རིགས་ཀྱི་ཤེས་དཔལ་ལ་གུས་བཀུར་ཆེ་ཤོས་ནི་མིའི་རིགས་ཀྱི་ཤེས་དཔལ་གྱི་རྣམ་པ་གསར་པ་གཏོད་རྒྱུ་དེ་རེད།” སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འགྱུར་མེད་སྟོབས་ལྡན་གྱི་གསུང་ཚིག་དེས་ཡུལ་དུས་ལས་བརྒལ་ནས་མདུན་སྐྱོད་ཀྱི་ཁ་ཕྱོགས་མཛུབ་སྟོན་གནང་ཡོད། “གཏན་འཁེལ་གཉིས་”ཀྱི་ཐག་གཅོད་རང་བཞིན་གྱི་དོན་སྙིང་སྔར་བས་ཁོང་དུ་གཏིང་ཟབ་ཆུད་པར་བྱེད་པ་དང། “འདུ་ཤེས་བཞི་”ཆེ་རུ་སྐྱེད་པ། “གདེང་ཚོད་བཞི་”བརྟན་དུ་གཏོང་བ། “སྲུང་སྐྱོང་གཉིས་”བྱེད་ཐུབ་པ་བཅས་བྱས་ནས་བསམ་བློ་དང་བྱ་སྤྱོད་གཉིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་ཐོག་གཅིག་གྱུར་ཡོང་བར་བྱེད་ཅིང་། མངགས་བཅོལ་བློ་ལ་བརྟན་པོར་བཟུང་ནས་རིག་གནས་ཀྱི་ལས་འགན་གསར་པ་སྔར་བས་ལེགས་པའི་སྒོ་ནས་འཁུར་བ་དང་ལག་ལེན་གསར་གཏོད་ཁྲོད་རིག་གནས་གསར་གཏོད་བྱེད་པ་དང་། ལོ་རྒྱུས་ཡར་ཐོན་ཁྲོད་རིག་གནས་ཡར་ཐོན་ཡོང་བ་བྱས་ཏེ་ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་བསྐྲུན་ཆེད་དཔའ་ངར་ཆེན་པོས་མདུན་སྐྱོད་བྱེད་དགོས།
ཕག་མོ་དོན་གྲུབ་ཀྱིས་བསྒྱུར།