2023ལོའི་ཟླ་12པའི་ཚེས་29ཉིན་གྱི་སྔ་དྲོར། སི་ཁྲོན་ཞིང་ཆེན་གྱི་འོད་གློག་དང་ནུས་གསོག་གཉིས་འཛོམས་ཀྱི་གློག་འདོན་རྣམ་གྲངས་ཐོག་མ་སྟེ་དཀར་མཛེས་བོད་རིགས་རང་སྐྱོང་ཁུལ་ཉག་ཆུ་རྫོང་གྲོང་གསུམ་ཡུལ་ཤོག་ཏུ་གནས་པའི་ཧྭ་གློག་ནུས་ཁོངས་གསར་པའི་ཉག་ཆུའི་སྐར་དམར་ལས་རིམ་དང་པོའི་ཆན་ཝ་ཁྲི་50ཟིན་པའི་འོད་གློག་རྣམ་གྲངས་ཀྱིས་རྒྱ་ཁྱབ་གློག་འདོན་འགོ་ཚུགས།
སི་ཁྲོན་ཞིང་ཆེན་གྱི་ནུས་གསོག་མ་ལག་སྒྲིག་སྦྱོར་བྱས་པའི་འོད་གློག་རྣམ་གྲངས་ཐོག་མ་ཡིན་པའི་ཉག་ཆུའི་སྐར་དམར་ལས་རིམ་དང་པོའི་རྣམ་གྲངས་སྤེལ་ཡུལ་ནི་སི་ཁྲོན་ནུབ་རྒྱུད་ས་མཐོའི་མཚོ་འཕགས་སྨི་4200ནས་སྨི་4600བར་གྱི་མཐོ་གྲང་ས་ཁུལ་དུ་གནས་ཡོད་ལ། སྤྱིའི་འཕྲུལ་ཆས་གློག་འདོན་ཚད་ཆན་ཝ་ཁྲི་50ཟིན་པ་དང་ཆན་ཝ་ཆུ་ཚོད་ཁྲི་5ཡི་ནུས་གསོག་མ་ལག་སྒྲིག་སྦྱོར་བྱས་ཡོད། གློག་འདོན་ས་ཚུགས་ཐོན་སྐྱེད་བྱེད་འགོ་ཚུགས་རྗེས་ལོ་ལྟར་ཆན་ཝ་ཆུ་ཚོད་དུང་ཕྱུར་9.17གྱི་དྭངས་གཙང་གློག་ནུས་མཁོ་འདོན་བྱེད་ཐུབ་ཀྱི་ཡོད། རྣམ་གྲངས་ནི་འོད་གློག་སྒྲིག་ཆས་39276དང་། ལྡོག་འགྱུར་འཕྲུལ་ཆས་1727དང་། སྒམ་དབྱིབས་གློག་སྒྱུར་འཕྲུལ་ཆས་167བཅས་ལས་གྲུབ་པ་དང་། ས་མུའུ་12000ལྷག་ཁེབས་པ་དང་། གོང་རིམ་ནས་གློག་འདོན་པ་དང་འོག་རིམ་ནས་ཕྱུགས་ཟོག་འཚོ་སྐྱོང་བྱེད་པའི་འབྲོག་འོད་གཉིས་སྤེལ་གྱི་འཛུགས་སྐྲུན་རྣམ་པ་སྤྱད་ཡོད།
འོད་གློག་དང་ནུས་གསོག་གཉིས་འཛོམས་ཀྱི་གྲངས་རིག་གློག་འདོན་ས་ཚུགས་ཀྱི་སྒྲིག་བཀོད་བྱས་པའི་ལིན་སྐྱུར་ལྕགས་ལིས་ནུས་གསོག་མ་ལག་གསར་པས་འོད་གློག་དེ་ཉི་འོད་ཙམ་ལ་བརྟེན་པ་དང་གློག་ནུས་ཕྱིར་གཏོང་བརྟན་པོ་མེད་པའི་ཞན་ཆ་ནུས་ལྡན་ངང་གསབ་ཐུབ་པར་མ་ཟད། ད་དུང་ནུས་གསོག་མ་ལག་ལ་བརྟེན་ནས་གཏོང་སྤྲོད་སྙོམས་སྒྲིག་དང་ཉི་འོད་འཕྲོ་བརླག་ཉུང་དུ་བཏང་ནས། ནུས་རྒྱུ་གཙང་མ་བསྡུ་ལེན་བྱེད་ནུས་སྔར་བས་ཆེ་རུ་གཏོང་བ་དང་འོད་གློག་མ་གནས་དམའ་རུ་བཏང་སྟེ། མཐོ་གྲང་དང་ས་བབ་མཐོ་བའི་ས་ཁུལ་དུ་འོད་གློག་ས་ཚུགས་འཛུགས་སྐྲུན་བྱེད་པར་ཐག་གཅོད་ཇུས་གཞི་མཁོ་འདོན་བྱས་ཡོད།
ངོ་སྤྲོད་བྱས་པ་ལྟར་ན། སི་ཁྲོན་ཞིང་ཆེན་ནང་ཁུལ་གྱི་ཆུ་ནུས་དང་ཉི་ནུས། རླུང་ནུས། ས་འོག་ཚ་ནུས་བཅས་ཀྱི་ཐོན་ཁུངས་ཧ་ཅང་ཕུན་སུམ་ཚོགས་པ་དང་། ནུས་ཁུངས་གཙང་མ་འཕེལ་རྒྱས་གཏོང་བའི་མདུན་ལྗོངས་རྒྱ་ཆེན་པོ་ཡོད། 2023ལོར་ཧྭ་གློག་སི་ཁྲོན་ས་ཁོངས་ཀྱིས་སི་ཁྲོན་གྱི་མཛེས་ལྗོངས་གློག་ཤུགས་རྟེན་གཞི་ཆེན་པོའི་འཆར་འགོད་འཛུགས་སྐྲུན་ལ་ཁྱོན་ཡོངས་ནས་སྐུལ་འདེད་བཏང་སྟེ། མཛེས་ལྗོངས་གློག་འདོན་འཕྲུལ་འཁོར་ནས་གློག་འདོན་ཚད་ཆན་ཝ་ཁྲི་109.3ཐོན་སྐྱེད་བྱེད་འགོ་ཚུགས་པ་དང་མཛེས་ལྗོངས་གློག་འདོན་དབང་ཆ་ཆན་ཝ་ཁྲི་255.34ཐོབ་པ་དེས་ཞིང་ཆེན་ཡོངས་ཀྱི་སྤྱིའི་གཞི་ཁྱོན་གྱི་16.8%བཟུང་ཡོད། སི་ཁྲོན་གྱི་ནུས་ཁུངས་གྲུབ་ཚུལ་སྣ་མང་གསབ་རེས་དང་ནུས་ཁུངས་བདེ་འཇགས་བརྟན་བརླིང་ཡོང་བར་སྐུལ་འདེད་གང་མགྱོགས་གཏོང་བར་དགེ་མཚན་ལྡན་པའི་ནུས་པ་འདོན་སྤེལ་བྱས་ཡོད། །