2023ལོའི་ཟླ་དང་པོའི་ཚེས་1ཉིན། ཀྲུང་གོའི་ལྕགས་ལམ་མཚོ་བོད་ཚོགས་པ་ཚད་ཡོད་སྤྱི་གཉེར་ཁང་（གཤམ་དུ“མཚོ་བོད་ཚོགས་པ་སྤྱི་གཉེར་ཁང་”ཞེས་བསྡུ་རྒྱུ）གིས་གནས་ཚུལ་སྤེལ་གསལ། 2023ལོར་མཚོ་བོད་ལྕགས་ལམ་བརྒྱུད་བོད་ལྗོངས་ནས་འགྲུལ་པ་མི་ཐེངས་ཁྲི་295.9སྐྱེལ་འདྲེན་བྱས་ཡོད་པ་དང་། དེའི་ནང་བོད་ལྗོངས་སུ་ཚུར་འོང་མཁན་འགྲུལ་པ་མི་ཐེངས་ཁྲི་153.3དང་། བོད་ལྗོངས་ནས་ཕྱིར་འགྲོ་མཁན་འགྲུལ་པ་མི་ཐེངས་ཁྲི་142.6ཟིན་ཡོད། 2018ལོའི་ལོ་རྒྱུས་ཀྱི་མཐོ་ཚད་དང་བསྡུར་ན་དེ་ལས་སོ་སོ་མི་ཐེངས་ཁྲི་36.6དང་། མི་ཐེངས་ཁྲི་26.6དང་མི་ཐེངས་ཁྲི་10.1བཅས་ལ་བརྒལ་ཡོད།
2006ལོའི་ཟླ་7པའི་ཚེས་1ཉིན། མཚོ་བོད་ལྕགས་ལམ་གྱི་ལམ་ཐིག་ཧྲིལ་པོར་མེ་འཁོར་ཤར་གཏོང་ཐུབ་ནས་བོད་ལྗོངས་སུ་ལྕགས་ལམ་མེད་པའི་ལོ་རྒྱུས་མཇུག་བསྒྲིལ་བ་དང་། དེ་ནི་འཛམ་གླིང་ཐོག་ས་བབ་མཐོ་ཤོས་དང་ལམ་ཐག་རིང་ཤོས། མྱུར་ཚད་མགྱོགས་ཤོས་བཅས་ཀྱི་མཐོ་སྒང་གི་ལྕགས་ལམ་ཞིག་ཏུ་གྱུར།
དེའི་རྗེས་སུ་མཚོ་བོད་ལྕགས་ལམ་འཛུགས་སྐྲུན་འཕེལ་རྒྱས་ཇེ་མགྱོགས་ཕྱིན་ཞིང་། 2014ལོའི་ཟླ་8པའི་ཚེས་15ཉིན། ལྷ་གཞིས་ལྕགས་ལམ་ནས་མེ་འཁོར་ཤར་གཏོང་ཐུབ་པ་དེས་བོད་ལྗོངས་ལྷོ་ནུབ་ས་ཁུལ་གྱི་གཞུང་ལམ་སྐྱེལ་འདྲེན་ཁོ་ནར་བརྟེན་པའི་རྣམ་པར་འགྱུར་ལྡོག་བཏང་ནས། ལྷ་ས་དང་གཞིས་ཀ་རྩེ་གཉིས་བར་གཞུང་ལམ་ཐོག་སྐྱེལ་འདྲེན་བྱེད་ཡུན་ཆུ་ཚོད་6དགོས་པ་དེ་ལྕགས་ལམ་ཐོག་སྐྱེལ་འདྲེན་བྱེད་ཡུན་ཆུ་ཚོད་2དང་སྐར་མ་21བར་ཇེ་ཐུང་དུ་བཏང་བ་རེད། 2021ལོའི་ཟླ་6པའི་ཚེས་25ཉིན། བོད་ལྗོངས་ཀྱི་མཐོ་སྒང་གི་གློག་ཤུགས་ཅན་གྱི་ལྕགས་ལམ་ཐོག་མ་སྟེ་ལྷ་ཉིང་ལྕགས་ལམ་ཤར་གཏོང་ལས་གཉེར་བྱས་ནས། བོད་ལྗོངས་ཤར་ལྷོའི་ས་ཁུལ་དུ་ལྕགས་ལམ་མེད་པའི་ལོ་རྒྱུས་མཇུག་བསྒྲིལ་བ་རེད།
མཚོ་བོད་ཚོགས་པ་སྤྱི་གཉེར་ཁང་འགྲུལ་ཟོག་དོ་དམ་པུའུ་ཡི་ཀྲུའུ་རེན་གཞོན་པ་ལི་ཅ་ཡིས་2023ལོར་བོད་ལྗོངས་ནས་སྐྱེལ་འདྲེན་བྱས་པའི་འགྲུལ་པའི་མི་གྲངས་དེ་ལོ་སྔོན་མ་ལས་མངོན་གསལ་དོད་པོས་མང་དུ་ཕྱིན་པ་དང་། འགྲུལ་པ་མང་བའི་སྐབས་ཀྱི་འགྲོ་འདུག་དགོས་མཁོ་ལ་ཁ་གཏད་ཧུར་ཐག་གཅོག་ཆེད། ཁྱོན་བསྡོམས་འགྲུལ་སྐྱེལ་མེ་འཁོར་ཐེངས་4214ཁ་སྣོན་བྱས་པ་དང་། 2019ལོ་དང་བསྡུར་ན་ཐེངས་1416ཇེ་མང་བཏང་ཡོད་ཅིང་། དེ་ལས་བོད་ལྗོངས་སུ་སྐྱེལ་འདྲེན་བྱེད་ཚད་ཐེངས་1107དང་། ལྷ་ཉིང་ལྕགས་ལམ་ཐོག་ཐེངས་624དང་། ལྷ་གཞིས་ལྕགས་ལམ་ཐོག་ཐེངས་738ཁ་སྣོན་བྱས་ཡོད་ཅེས་ངོ་སྤྲོད་བྱས།
ཤེས་རྟོགས་བྱུང་བར་གཞིགས་ན། མཚོ་བོད་ལྕགས་ལམ་གྱི་ལམ་ཐིག་ཧྲིལ་པོ་ཤར་གཏོང་ཐུབ་པ་ནས་བཟུང་། ཟི་ལིང་བབས་ཚུགས་ནས་ས་གནས་ཁག་ཏུ་སྐྱོད་པའི་ཐད་སྐྱོད་མེ་འཁོར་གྱིས་ཀྲུང་གོའི་ཞིང་ཆེན་གྱི་གྲོང་ཁྱེར་གཙོ་བོ་དང་ཐད་གཏོགས་གྲོང་ཁྱེར་29ཁེབས་ཤིང་། ཤར་གཏོང་ཐུབ་ཚད་83%ཟིན་པ་དང་། ལྷ་ས་བབས་ཚུགས་ནས་ས་གནས་ཁག་ཏུ་སྐྱོད་པའི་ཐད་སྐྱོད་མེ་འཁོར་གྱིས་ཀྲུང་གོའི་ཞིང་ཆེན་གྱི་གྲོང་ཁྱེར་གཙོ་བོ་12ཁེབས་ཤིང་། ཤར་གཏོང་ཐུབ་ཚད་40%ཟིན་ཡོད་པ་རེད། །