2023ལོའི་ཟླ་12ཚེས་31ཉིན་གྱི་སྔ་དྲོའི་ཆུ་ཚོད་8པར། ལི་རྫོང་པི་ཕུང་ལུང་པའི་ཡུལ་སྐོར་མཛེས་ལྗོངས་ཁུལ་དུ་ཡུལ་སྐོར་བ་སྣེ་ལེན་བྱེད་ཚད་ས་ཡ་གཅིག་ལ་སླེབས་ནས། ལོ་རྒྱུས་ཀྱི་ཟིན་ཐོ་གསར་པ་བཏོད་ཅིང་། དེ་ནི་མཛེས་ལྗོངས་ཁུལ་ལས་གཉེར་བྱས་ཚུན་ཡུལ་སྐོར་བའི་ལོ་རེའི་སྣེ་ལེན་བྱེད་ཚད་ས་ཡའི་འགག་སྒོ་ཆེན་པོ་ལས་ཐོག་མར་བརྒལ་བའི་ཉིན་ཞིག་རེད་ལ། གཟི་རྩ་སྡེ་དགུ་དང་གསེར་མཚོ། རི་བོ་སྐུ་བླའི་མཛེས་ལྗོངས་ཁུལ་གསུམ་ཕུད་པའི་རྔ་བ་ཁུལ་གྱི་ཡུལ་སྐོར་བ་སྣེ་ལེན་བྱེད་ཚད་མི་ཐེངས་ས་ཡ་ལས་བརྒལ་བའི་ཡུལ་སྐོར་མཛེས་ལྗོངས་ཁུལ་བཞི་པར་གྱུར།
སྤྱི་ལོ་གསར་ཚེས་ཀྱི་ཉིན་གསུམ་གྱི་གུང་གསེང་རིང་། རྔ་བ་ཁུལ་གྱིས་རིམ་རྩིས་བྱས་ན་ཡུལ་སྐོར་བ་མི་ཐེངས་40.8537སྣེ་ལེན་བྱས་ཤིང་། ཡུལ་སྐོར་གྱི་ཡོང་སྒོ་དམངས་སྒོར་དུང་ཕྱུར་3.22བྱུང་བ་དང་། 2023ལོའི་དུས་མཚུངས་ལས་སོ་སོར་49.03%དང་56.55%འཕར་ཡོད། དེ་ལས་གཟི་རྩ་སྡེ་དགུ་དང་། གསེར་མཚོ། རི་བོ་སྐུ་བླ། ཏ་ཁོག་འཁྱགས་རོམ་བཅས་མཛེས་ལྗོངས་ཁུལ་ཆེན་པོ་བཞི་རུ་ཡུལ་སྐོར་བ་མི་ཐེངས་63854སྣེ་ལེན་བྱས་པ་དང་། སྒོ་འཛིན་གྱི་ཡོང་སྒོ་དམངས་སྒོར་ཁྲི་277.36ལོན་ཡོད། 2023ལོའི་དུས་མཚུངས་ལས་སོ་སོར་150.47%དང་134.87%འཕར་ཡོད་ལ། ལི་རྫོང་པི་ཕུང་ལུང་པའི་ལྗོངས་ཁུལ་གྱིས་ཡུལ་སྐོར་བ་སྣེ་ལེན་བྱེད་ཚད་ས་ཡ་གཅིག་ལས་བརྒལ་བ་དང་།
ཆེས་མང་དུས་ཉིན་རེར་ཡུལ་སྐོར་བ་17374སྣེ་ལེན་བྱས་ཡོད། ཏ་ཁོག་འཁྱགས་རོམ་ལྗོངས་ཁུལ་དུ་བསྟུད་མར་ཉིན་གཉིས་ཀྱི་རིང་ལ་ཉིན་རེར་ཡུལ་སྐོར་བ་5000སྣེ་ལེན་བྱས་ཤིང་། ལོ་ཧྲིལ་པོའི་ཡུལ་སྐོར་བ་མི་ཐེངས་ཁྲི་25ལས་བརྒལ་ཏེ་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད། །