2023ལོའི་ཟླ་12པའི་ཚེས་18ཉིན། ཁྲེང་ཏུའུ་གྲོང་ཁྱེར་མཛེས་རྩལ་ཁང་ཆེན་དུ་སི་ཁྲོན་ཞིང་ཆེན་གྱི་ཐང་ག་དང་ཡིག་གཟུགས་སྒྱུ་རྩལ་ཡར་སྐུལ་ཚོགས་འདུ་ཐེངས་དང་པོ་འཚོགས། ཐེངས་འདིར་ཡིག་གཟུགས་དང་ཐང་གའི་ལག་རྩལ་པ་རྒྱ་བོད་གཉིས་ཀྱི་ཕུལ་བྱུང་མི་སྣ་མང་པོ་མཉམ་འཛོམས་བྱུང་ཡོད།
ཚོགས་འདུའི་སྙིང་དོན་ནི་ཏང་གི་ཚོགས་ཆེན་བཅོ་བརྒྱད་པ་ཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མི་རིགས་ཀྱི་ཕུལ་བྱུང་སྲོལ་རྒྱུན་རིག་གནས་སྲུང་སྐྱོང་དང་ཚད་མཐོའི་མཐོང་ཆེན་བྱས་པར་བརྒྱུད། ཁོང་གིས་ལོ་རྒྱུས་ཀྱི་དུས་རིམ་ནས་མི་རིགས་རིག་གནས་ཀྱི་ཁྲག་རྒྱུན་རྒྱུན་མཐུད་ནས་མདུན་སྐྱོད་བྱེད་འགོ་བརྩམས་པ་དེ། ང་ཚོའི་གཞི་ནས་ལས་དོན་ཡག་པོ་སྒྲུབ་ཐུབ་པའི་རྟེན་འབྲེལ་ཉིན་དེ་ནས་འགོ་རྩོམ་སྟེ་འགྲིག་པ་དང་། ཐང་ག་དང་ཡིག་གཟུགས་མཛེས་རིས་སྒྱུ་རྩལ་ནི་ལོ་རྒྱུས་ཀྱི་རང་བཞིན་ལྡན་པའི་མི་རིགས་ཀྱི་རིག་གནས་ཡིན་ལ། དེ་ཡང་བོད་མི་རིགས་ཀྱི་རིག་གནས་དང་ལག་རྩལ་ལ་མཁས་པ་འདེམ་པའི་བློ་གྲོས་གཅིག་ཏུ་འདུས་པའི་གོ་སྐབས་གསར་པ་ཞིག་དམ་འཛིན་བྱེད་པའི་ལོ་རྒྱུས་ཀྱི་རིན་ཐང་ལྡན་པ་དང་། རིག་གནས་ཀྱི་རིན་ཐང་ཧ་ཅང་ཚད་མཐོན་པོ་མཐོང་བཞིན་པ་ཡིན་ལ། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་གྲུབ་ཆ་གལ་ཆེན་ཞིག་ཀྱང་རེད།
ཐང་ག་དང་ཡིག་གཟུགས་ནི་བརྗོད་དོན་མཉམ་འདྲེས་སུ་གཅིག་གྲོགས་གཅིག་གི་ཟླ་ལ་སླེབས་པའི་རིག་གནས་ཀྱི་གྲུབ་ཆ་ཞིག་ཡིན་ལ། ཐང་གའི་རི་མོ་དང་ཚོན་མདངས་ཀྱིས་སྣོད་བཅུད་ཀྱི་མཚོན་དོན་མངོན་པར་མ་ཟད། འཁོར་འདས་ཀྱི་གྲུབ་ཆ་མཚོན་པའི་སྒྱུ་རྩལ་གྱི་རང་བཞིན་ལྡན་ལ། དེ་ཡང་ཕྱི་སྣོད་འཇིག་རྟེན་གྱི་བཀོད་པ་རྫོགས་པའི་སྣང་ཆ་རི་རབ་ཁང་ཁྱིམ་རྩི་ཤིང་ནགས་ཚལ་སོགས་འདུས་བྱས་ཀྱི་ཆོས་རྣམས་གསལ་ཞིང་། ནང་བཅུད་སེམས་ཅན་གྱི་རྒྱུད་ཀྱིས་བསྡུས་པའི་ཁམས་དབང་བསམ་པ་བག་ལ་ཉལ་བ་སོགས་མཚོན་ཐབས་སུ་སྒྱུ་རྩལ་གྱི་ལམ་རྟེན་འབྲེལ་ལུས་འབྱུང་གི་རྣམ་པ་མཚོན་པར་བྱས་པ་ཞིག་ཡིན། ཡིག་གཟུགས་ཀྱིས་ཀྱང་བརྗོད་བྱར་ཤེས་བྱའི་ཆོས་ཐམས་ཅད་མིང་ཚིག་ཡི་གེའི་རང་གཟུགས་སུ་ཤར་བའི་བྱེད་ལས་བརྗོད་དོན་རྣམ་པ་མཚོན་པའི་སྐད་ཆའི་གདངས་སུ་གྲུབ་པའི་བརྗོད་བྱེད་དབྱངས་གསལ་གྱི་རྣམ་པ་སྣང་བ་དེ་ཡིན། དེ་ལྟར་ཉིན་དེ་ནི་རང་རེའི་མི་རིགས་ཀྱི་ཁྲག་རྩ་ལས་རྒྱུ་བའི་རིག་གནས་ཀྱི་ཟུངས་ཁྲག་ཉམས་པ་སླར་གསོ་དང་མི་ཉམས་གོང་སྤེལ་དུ་བཏང་བའི་རིག་གནས་དང་ལོ་རྒྱུས་ཀྱི་རང་བཞིན་ལྡན་པའི་འགྲེམས་སྟོན་ཆེན་མོའི་མཛད་སྒོའི་ཐོག་ཕེབས་པའི་ཚོགས་མི་ཡོངས་ཀྱི་སེམས་ཁམས་སུ་རིག་གནས་དང་ལོ་རྒྱུས་ཀྱི་དཔལ་ཡོན་རྫོགས་ཤིང་། སྤོབས་སེམས་དང་འཛུམ་མདངས་ཀྱིས་ཁེངས་པའི་བརྗོད་མི་ཤེས་པའི་དགའ་སྤྲོའི་སྣང་བ་འབུམ་གྱི་བསུས་པར་མངོན་ཡོད། །