2023ལོའི་ཟླ་12པའི་ཚེས་27ཉིན། སི་ཁྲོན་ཞིང་ཆེན་བོད་ཀྱི་དམངས་གཞས་འཕེལ་རྒྱས་ཡར་སྐུལ་ཚོགས་པའི་2023ལོའི་ལོ་འཁོར་གྲོས་ཚོགས་འཚོགས། ཐེངས་འདིའི་གྲོས་ཚོགས་ཐོག་སི་ཁྲོན་ཞིང་ཆེན་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་འབྲེལ་ཡོད་མི་སྣ་དང་མིང་དུ་གྲགས་པའི་རོལ་མོ་བ། ལས་རིགས་ཆེད་མཁས་པ་སོགས་ཕེབས་ནས། བོད་ཀྱི་དམངས་གཞས་རིག་གནས་ཀྱི་འཛིན་སྐྱོང་སྤེལ་གསུམ་ཐད་ནས་བགྲོ་གླེང་ཞིབ་རྒྱས་གནང་བ་རེད།
སི་ཁྲོན་ཞིང་ཆེན་བོད་ཀྱི་དམངས་གཞས་འཕེལ་རྒྱས་ཡར་སྐུལ་ཚོགས་པས་དུས་དང་རྣམ་པ་ཀུན་དུ་དངོས་མིན་རིག་གནས་ཤུལ་བཞག་རྒྱུན་འཛིན་དང་དར་སྤེལ་གཏོང་བའི་འགན་འཁྲི་ཕྲག་ཏུ་བླངས་ནས། རྒྱུན་ཆད་མེད་པར་དྲང་འཛིན་གསར་གཏོད་བྱས་ཏེ། ཀྲུང་གོའི་བོད་ཀྱི་དམངས་གཞས་འདུ་ཚོགས་དང་ཁྲོན་ནུབ་ཀྱི་དམངས་གཞས་འཚོལ་སྡུད་སོགས་ཚབ་མཚོན་རང་བཞིན་གྱི་རིག་གནས་ཡུལ་སྐོར་བྱ་གཞག་བསྒྲུབས་ནས། ཀུན་གྱི་གདེང་འཇོག་དང་དགའ་བསུ་ཆེན་པོ་ཐོབ། སི་ཁྲོན་ཞིང་ཆེན་གྱི་བོད་ཀྱི་དམངས་གཞས་སྲུང་སྐྱོང་དང་འཕེལ་རྒྱས་སྐོར་གྱི་གཞུང་ཕྱོགས་སྤྱི་ཚོགས་རྩ་འཛུགས་ཤིག་ཡིན་པའི་ཆ་ནས། བོད་ཀྱི་དམངས་གཞས་རིག་གནས་སྔོག་འདོན་དང་སྲུང་སྐྱོང་། བོད་ཀྱི་དམངས་གཞས་སྒྱུ་རྩལ་རྒྱུན་འཛིན་ཁྱབ་སྤེལ་བཏང་ནས། མི་རིགས་རོལ་དབྱངས་ཐོན་ལས་འཕེལ་རྒྱས་གཏོང་བར་འབད་འབུངས་བྱེད་བཞིན་ཡོད། ཁོངས་མི་ཚོས་རང་བདག་གི་སྟེགས་བུ་དང་སྒེར་ངོས་ནས་སྲོལ་རྒྱུན་མི་རིགས་རིག་གནས་ཁྱབ་གདལ་གཏོང་བའི་ལས་ལ་འབད་བཞིན་ཡོད།
2024ལོར། ཡར་སྐུལ་ཚོགས་པས་སྔར་ལས་ལྷག་པའི་སྒོ་ནས་བོད་ཀྱི་དམངས་ཁྲོད་རིག་གནས་སྔོག་འདོན་བྱེད་པ་དང་། རྩམ་དྲི་དང་མར་དྲི་མ་ཡལ་བའི་བོད་ཀྱི་དམངས་ཁྲོད་རིག་གནས་སྒྱུ་རྩལ་སྲུང་སྐྱོང་བྱས་ཏེ། བོད་ཀྱི་དམངས་གཞས་སྒྱུ་རྩལ་གྱི་མཚར་ཉམས་ཁྱབ་སྤེལ་དང་། དམངས་གཞས་རྒྱུན་ཤེས་ཁྱབ་དགལ་བཏང་ནས། བོད་ཀྱི་དམངས་གཞས་འཛིན་སྐྱོང་སྤེལ་གསུམ་ལ་དེ་ལས་ལྷག་པའི་སྤུས་ལེགས་དང་འཐུས་ཚང་གི་དཔེ་མཚོན་སྟེགས་བུ་མཁོ་འདོན་བྱ་རྒྱུ་ཡིན་པ་རེད། །