བོད་ཡིག་སྦྱོང་བ་དང་རྩམ་པ་བརྫི་བ། བོད་ཆས་གྱོན་པ། གེ་སར་རིག་གནས་ལ་རྒྱུས་ལོན་བྱེད་པ་སོགས། བོད་ཀྱི་རིག་གནས་ལ་ཉམས་ཞིབ་བྱེད་མཁན་ཇེ་མང་ནས་ཇེ་མང་འགྲོ་བཞིན་ཡོད།
2023ལོའི་ཟླ་6པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རིག་གནས་འཛིན་སྐྱོང་སྤེལ་གསུམ་གྱི་བཞུགས་མོལ་ཚོགས་འདུ་ཐོག །སྔར་ལས་ལྷག་པའི་སྒོ་ནས་རིག་གནས་ཀྱི་འགན་འཁྲི་གསར་པ་ཕྲག་ཏུ་ལེན་དགོས་ཞེས་གསུངས་པས། རིག་གནས་འཛིན་སྐྱོང་སྤེལ་གསུམ་གྱི་བྱ་གཞག་སྔར་བས་དར་ཞིང་རྒྱས།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐེངས་མང་པོར་རིག་གནས་རྒྱུན་འཛིན་དང་སྲུང་སྐྱོང་ཐད་ནས་གསུང་བཤད་གལ་ཆེན་གནང་ནས། གྲངས་ཉུང་མི་རིགས་ཀྱི་རིག་གནས་སྲུང་སྐྱོང་དང་རྒྱུན་འཛིན་ལ་མཐོང་ཆེན་བྱེད་དགོས་ཞེས་གསུངས། བོད་ཀྱི་རིག་གནས་ནི་ཀྲུང་ཧྭའི་སྲོལ་རྒྱུན་རིག་གནས་ཀྱི་གྲུབ་ཆ་ཞིག་ཡིན་ལ། སྤྱི་ཚོགས་ལས་རིགས་སོ་སོའི་ཐུན་མོང་འབད་བརྩོན་འོག །བོད་ཀྱི་རིག་གནས་སྔར་ལས་དར་ཁྱབ་འགྲོ་བཞིན་ཡོད།
བོད་ཀྱི་སྲོལ་རྒྱུན་རིག་གནས་ནམ་རྒྱུན་འཚོ་བའི་ཁྲོད་ན་མཛེས།
2023ལོའི་ཟླ་12པའི་ཚེས་16ཉིན། གཡང་སྐྱིད་དང་རུ་མི་ཚོ་ཁྲེང་ཏུའུ་ཅིན་ཝེ་ལྟེ་གནས་ཉེ་འགྲམ་གྱི་ཐང་ཆེན་ཐོག་འཛོམས་ནས་སྐོར་བྲོ་འཁྲབ། མི་རིགས་སོ་སོའི་མང་ཚོགས་བརྒྱ་ཕྲག་ལྷག་དེའི་ནང་དུ་ཞུགས་ནས། ཚང་མས་སྐོར་བྲོའི་སྟངས་སྟབས་ཉམས་ལེན་བྱས།
གོ་ལྔ་ལོའི་བོད་རིགས་བུ་མོ་གཡང་སྐྱིད་ནི་རྔ་བ་ཁུལ་ཆུ་ཆེན་རྫོང་ནས་ཡིན་ལ། 2014ལོར་མོ་རང་ཕ་ཡུལ་དང་གྱེས་ནས་ཁྲེང་ཏུའུ་ལ་སློབ་གཉེར་དུ་ཕྱིན་ཞིང། རྗེས་སུ་ཁྲེང་ཏུའུ་ནས་བྱིས་གཉོར་ཁང་གི་དགེ་རྒན་ཞིག་ཏུ་གྱུར། མོ་རང་བོད་ཀྱི་སྲོལ་རྒྱུན་ཞབས་བྲོ་ལ་དགའ་ཞེན་ཆེ་བས། འབྲེལ་དྲའི་ཐོག་ནས་རང་ཉིད་ཀྱི་ཞབས་བྲོའི་བརྙན་རིས་མཉམ་སྤྱོད་བྱེད་པར་དགའ། 2021ལོར། གཡང་སྐྱིད་དང་དཀར་མཛེས་ཁུལ་སེར་ཤུལ་རྫོང་གི་བློ་བཟང་རིག་གྲགས། དཀར་མཛེས་ཁུལ་སྡེ་དགེ་རྫོང་གི་བཀྲ་ཤིས་ཚེ་རིང་གསུམ་གྱིས་བྲོ་ར་ཁྲ་མོ་ཞེས་པའི་སྐོར་བྲོའི་རུ་ཁག་བཙུགས། ཁོ་ཚོས་དངུལ་བསྡུ་རུབ་བྱས་ཏེ་སྒྲ་སྒམ་དང་གློག་སྒྲོན་ཉོས་ཏེ། ཉིན་ལྟར་ཁྲེང་ཏུའུ་ཅིན་ཝེ་ལྟེ་གནས་འགྲམ་གྱི་ཐང་ཆེན་དུ་ཞབས་བྲོ་འཁྲབ། འབྲེལ་དྲ་སོགས་ལ་བརྟེན་ནས་ཁོ་ཚོའི་སྙན་གྲགས་རྒྱས་ནས། ཞབས་བྲོ་ལ་དགའ་བའི་མི་མང་པོ་ཞིག་གི་སེམས་པ་བཀུག་ཅིང་། ཞེན་མི་འགའ་རེ་པེ་ཅིན་དང་ཧྲང་ཧའེ། དེ་མིན་ཕྱི་རྒྱལ་སོགས་ནས་ཆེད་དུ་ལྟད་མོར་ལྟ་རུ་ཕེབས་འདུག
གཡང་སྐྱིད་ཀྱིས་བཤད་པ་ལྟར་ན། སྐོར་བྲོ་ནི་རྒྱལ་ཁབ་རིམ་པའི་དངོས་མིན་རིག་གནས་ཤུལ་བཞག་ཡིན་པས། ཚང་མས་དེའི་ནང་ནས་བོད་རིགས་སྤུན་ཟླའི་བརྩེ་སེམས་དང་བོད་ཀྱི་རིག་གནས་ཉམས་ལེན་ཐུབ་པའི་རེ་བ་བཟུང་ཡོད་ཟེར། མོ་རང་གིས་སྐོར་བྲོ་ལྟ་བུའི་བོད་ཀྱི་རིག་གནས་ཁྱད་ཆོས་འབུར་དུ་བཏོད་པའི་ཞབས་བྲོ་འདི་རང་ཉིད་ཀྱི་ལས་ཀའི་ཁྲོད་དུ་བཞག་ན་བསམ་ཡོད།
འདི་ནི་བོད་ཀྱི་རིག་གནས་ཀྱི་ཉིན་རྒྱུན་འཚོ་བའི་ཁྲོད་ཀྱི་མཚོན་བྱེད་ཙམ་ཡིན་པར་མ་ཟད། བོད་ཀྱི་རིག་གནས་རྒྱ་ཁྱབ་ཕྱིན་ནས་མི་མང་པོ་ཞིག་གི་དགའ་བསུ་ཐོབ་པའི་མཚོན་རྟགས་གལ་ཆེན་ཞིག་རེད།
རིག་གནས་ལ་གསར་གཏོད་ཁྲོད་ནས་སྐྱེ་སྟོབས་ཀྱི་དཔལ་འབར།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འགོ་འཛུགས་ས་གསར་པའི་ཐོག་རིག་གནས་དར་རྒྱས་ལ་མུ་མཐུད་སྐུལ་འདེད་གཏོང་བ་དང་། རིག་གནས་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པ་དང་ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་འཛུགས་སྐྱོང་བྱ་རྒྱུ་ནི་ང་ཚོའི་དུས་རབས་གསར་པའི་རིག་གནས་ཀྱི་ལས་འགན་གསར་པ་ཞིག་ཡིན་ཞེས་གསུངས་མྱོང་ལ། ཁོང་གིས་ད་དུང་ཀྲུང་ཧྭའི་རིག་གནས་རྒྱུན་འཛིན་ལ་ཤུགས་རྒྱག་པ་དང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་གསར་གཏོད་རང་བཞིན་གྱི་གཞན་སྒྱུར་དང་གསར་གཏོད་རང་བཞིན་གྱི་འཕེལ་རྒྱས་ལ་སྐུལ་འདེད་གཏོང་དགོས་ཞེས་ནན་བཤད་གནང་ཡོད།
རིག་གནས་ཞིག་ལ་མཚོན་ན་ཆེས་བཟང་བའི་རྒྱུན་འཛིན་ནི་དེའི་རྣམ་པ་དང་བསམ་བློའི་ཉིང་བཅུད་ཁྱབ་སྤེལ་གཏོང་རྒྱུ་དེ་ཡིན་ལ། དུས་རབས་ཀྱི་འགྲོས་དང་བསྟུན་ནས་འཕེལ་རྒྱས་གཏོང་རྒྱུ་ཤིན་ཏུ་ནས་ཀྱང་གལ་ཆེ། གལ་ཏེ་བོད་རིགས་མི་དམངས་ཀྱིས་དད་པའི་མཆོག་ཏུ་བརྩི་བའི་དཔའ་བོ་གང་ཡིན་ཞེ་ན། གེ་སར་རྒྱལ་པོ་ཡིན་པ་སྨོས་མེད་རེད། བོད་རིགས་མང་ཚོགས་ཐུན་མོང་གིས་བཞེངས་པའི་གེ་སར་རྒྱལ་པོའི་སྒྲུང་ནི་རླབས་ཆེ་བའི་དཔའ་བོའི་ལོ་རྒྱུས་སྙན་རྩོམ་རིང་མོ་ཡིན་ལ། གེ་སར་ཟློས་གར་དང་གེ་སར་ཚོན་རིས་རྡོ་བརྐོས། གེ་སར་ཐང་ཀ་སོགས་གེ་སར་རིག་གནས་མང་པོ་ཞིག་སྤྱི་ཚོགས་འཕེལ་རྒྱས་ཀྱི་འགྲོས་དང་བསྟུན་ནས་ཕུན་སུམ་ཇེ་ཚོགས་སུ་འགྲོ་བཞིན་ཡོད།
དུས་རབས་ལ་འགྱུར་ལྡོག་འབྱུང་བཞིན་ཡོད་མོད། འོན་ཀྱང་དཔའ་བོའི་ལོ་རྒྱུས་སྙན་ངག་ཁྲོད་མངོན་པའི་བསམ་པའི་ནང་སྙིང་ལ་འགྱུར་ལྡོག་འབྱུང་མི་སྲིད། 2017ལོར་དཀར་མཛེས་ཁུལ་དཀར་མཛེས་རྫོང་གིས་གེ་སར་རྒྱལ་པོའི་མཁར་གྲོང་དང་གྲོང་ཚོ་བརྒྱའི་ཐོན་ལས་རྟེན་གཞི་འཛུགས་སྐྲུན་བྱེད་འགོ་བཙུགས་པས། གྲོང་མིའི་ཡོང་འབབ་འཕར་བར་མ་ཟད་གེ་སར་རིག་གནས་ལ་སྤྲོ་བ་ཡོད་པའི་ཡུལ་སྐོར་བ་མང་པོའི་ཡིད་དབང་ཡང་བཀུག་ཡོད།
2022ལོར་གེ་སར་ཟློས་གར་རྟ་རྒྱུག་རྒྱལ་འཇོག་པེ་ཅིང་མཁའ་ཟམ་སྒྱུ་རྩལ་ལྟེ་གནས་སུ་འཁྲབ་སྟོན་བྱས་པ་དང་། གསེར་རྟ་རྫོང་གི་ཟློས་གར་ཚོགས་པས་གཡུ་འོད་འབུམ་མེ་འཁྲབ་སྟོན་བྱས་ནས་དགུན་དུས་ཨོ་རྩལ་འགྲན་ཚོགས་ལ་རྟེན་འབྲེལ་ཞུས་ནས་འཛམ་གླིང་ལ་ཀྲུང་གོའི་བོད་ཀྱི་རིག་གནས་ཕུན་སུམ་ཚོགས་པོ་ཡོད་པ་སྟོན་རྒྱུ་དེ་ཡིན་པ་རེད། 2023ལོའི་ཟླ་8པར། ཀྲུང་དབྱང་དྲ་འཕྲིན་གཞུང་དོན་ཁང་དྲ་རྒྱའི་ཁྱབ་སྤེལ་ཅུས་ཀྱིས་མཛུབ་ཁྲིད་བྱས་པའི་འགུལ་རིས་གློག་བརྙན་དཀའ་སྡུག་ཟིལ་གྱིས་མནན་པའི་གེ་སར་རྒྱལ་པོ་ཞེས་པ་བསྟན་པ་དང་། གློག་བརྙན་ནང་དཔའ་བོའི་སྙིང་སྟོབས་ཀྱི་སྲོག་ཤིང་སོར་འཇོག་བྱས་ཏེ་འཁྲབ་བྱའི་མི་སྣར་མི་གཤིས་ཅན་དང་། དེང་རབས་ཅན་གྱི་བྱ་ཐབས་སྤྱད་དེ་དཔའ་བོ་འཚར་ལོངས་ཀྱི་ལམ་བུ་མངོན་པར་བྱས་ནས། ལྟད་མོ་བར་གཅེས་པར་འོས་པ་དང་སྐུལ་ལྕག་ལྡན་ལ་ཐུན་མོང་གི་བརྩེ་སེམས་ཆེན་པོ་ཐོན་ཐུབ་པའི་མི་སྣ་གཙོ་བོའི་གཟུགས་བརྙན་ཞིག་གཏོད་གང་ཐུབ་བྱས་ཡོད།
འཇམ་དབྱངས་བློ་གྲོས་ནི་རྒྱལ་ཁབ་རིམ་པའི་དངོས་མིན་རིག་གནས་ཤུལ་བཞག་གི་ཚབ་བྱེད་ལས་གཞི་ཇོ་ནང་སྒྲ་དབྱངས་ཀྱི་རྒྱལ་ཁབ་རིམ་པའི་རྒྱུན་འཛིན་པ་ཡིན་ལ། ཇོ་ནང་སྒྲ་དབྱངས་དང་ཇོ་ནང་ཐང་ག །འཇིམ་བཟོ། རྡོ་བརྐོས། བོད་སྨན་སོགས་སྒྱུ་རྩལ་དང་རིག་གནས་གང་ཅིའི་ཐད་ནས་ཤིན་ཏུ་མཁས་པ་ཞིག་ཡིན།
ལོ་ངོ་བཅུ་ཕྲག་རིང་། འཇམ་དབྱངས་བློ་གྲོས་ཀྱིས་སྲོལ་རྒྱུན་རིག་གནས་ཀྱི་གསར་གཏོད་རང་བཞིན་ལུགས་བསྒྱུར་དང་གསར་གཏོད་རང་བཞིན་གྱི་འཕེལ་རྒྱས་རྒྱུན་འཁྱོངས་བྱས་ནས། གང་ཐུབ་ཅི་ཐུབ་ཀྱིས་དངོས་མིན་རིག་གནས་ཤུལ་བཞག་འཛིན་སྐྱོང་སྤེལ་གསུམ་གྱི་ལས་ལ་གཞོལ་ཞིང་། དངོས་མིན་རིག་གནས་ཤུལ་བཞག་ལས་གཞི་ཉི་ཤུ་ལ་ཉེ་བ་རྩ་འཛུགས་དང་སྔོག་འདོན། སྲུང་སྐྱོང་བྱས་ཡོད་ལ། སྒྲ་དབྱངས་དང་ཇོ་ནང་ཐང་ག །བོད་སྨན་སོགས་བརྒྱུད་སྦྱོང་ཁང་བཅུ་བདུན་བཙུགས་ཡོད།
འདི་ལྟ་བུའི་གསར་གཏོད་ཀྱིས་བོད་ཀྱི་སྲོལ་རྒྱུན་རིག་གནས་ལ་ཚེ་སྲོག་གི་སྟོབས་རྒྱས་སུ་བཅུག་དང་འཇུག་བཞིན་ཡོད།
རིག་གནས་འཛིན་སྐྱོང་གིས་ཀྲུང་ཧྭའི་མི་རིགས་ཐུན་མོང་ཚོགས་པའི་འདུ་ཤེས་བརྟན་དུ་གཏོང་།
ཀྲུང་ཧྭའི་རིག་གནས་ནི་མི་རིགས་ཁག་གི་རིག་གནས་ཐུན་མོང་གིས་གྲུབ་པ་ཡིན་ལ། ལོ་རྒྱུས་ཐོག་ཀྱང་གྲངས་ཉུང་མི་རིགས་དང་རྒྱ་རིགས་ཕན་ཚུན་བར་རིག་གནས་སློབ་སྦྱོང་དང་མི་རིགས་མཉམ་འདྲེས་ཀྱི་དཔེ་མཚོན་གྲགས་ཅན་མང་པོ་ཡོད། མི་རིགས་ཁག་གི་རིག་གནས་འོད་ཟེར་ལམ་ལམ་འཕྲོ་བས་ཀྲུང་ཧྭ་མི་རིགས་ཐུན་མོང་ཚོགས་པའི་འདུ་ཤེས་བརྟན་པོ་གཏོང་བར་རིག་གནས་ཀྱི་རྨང་གཞི་ཡག་པོ་ཡོད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། ཀྲུང་ཧྭ་མི་རིགས་ཐུན་མོང་ཚོགས་པའི་འདུ་ཤེས་བརྟན་པོ་འཛུགས་རྒྱུ་དེ་དུས་རབས་གསར་པའི་ཏང་གི་མི་རིགས་ལས་དོན་གྱི་གཙོ་རྐང་དང་མི་རིགས་ས་ཁུལ་གྱི་ལས་དོན་ཁག་གི་གཙོ་རྐང་དུ་བརྩིས་ནས། ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་བྱེད་པའི་ཡང་དག་པའི་ལམ་བུ་སྔར་བས་རྒྱ་ཆེར་གཏོང་དགོས་ཞེས་བསྟན་ཡོད།
2022ལོའི་ཟླ་6པར། རིག་གནས་དང་ཡུལ་སྐོར་པུའུ་དང་། རྒྱལ་ཁབ་མི་རིགས་དོན་གཅོད་ཨུ་ལྷན། རྒྱལ་ཁབ་འཕེལ་སྒྱུར་ཨུ་ལྷན་བཅས་ཀྱིས་བསམ་འཆར་པར་འགྲེམས་བྱས་ནས། ཡུལ་སྐོར་གྱིས་མི་རིགས་ཁག་འགྲོ་འོང་སྤེལ་རེས་དང་མཉམ་འདྲེས་ལ་སྐུལ་འདེད་གཏོང་བའི་འཆར་གཞི་ལག་བསྟར་བྱ་རྒྱུའི་གཏན་འབེབས་བྱས་པ་དང་། ཡུལ་སྐོར་ལས་རིགས་སྤུས་ཚད་མཐོ་བའི་འཕེལ་རྒྱས་ལ་བརྟེན་ནས་མི་རིགས་ཁག་བར་སྟོང་དང་། རིག་གནས། དཔལ་འབྱོར། སྤྱི་ཚོགས། སེམས་ཁམས་སོགས་ཀྱི་ཐད་ཕྱོགས་ཡོངས་ནས་མཉམ་འདྲེས་ཡོང་བར་སྐུལ་འདེད་བཏང་ཡོད།
2023ལོའི་ཟླ་6པའི་ཚེས་13ཉིན། སི་ཁྲོན་ཞིང་ཆེན་ཡུལ་སྐོར་མཛེས་ལྗོངས་ཁུལ་འཕེལ་རྒྱས་ཚོགས་ཆེན་རྔ་བ་ཁུལ་བཙན་ལྷ་རྫོང་དུ་འཚོགས་ནས། རྒྱལ་རོང་བའི་ཚོན་མདངས་རྣམ་པར་བཀྲ་ཞིང་བསམ་པའི་ཉམས་འགྱུར་མངོན་པའི་གླུ་གར་ཆེ་གྲས་སྐུ་བླ་ལ་དང་འཕྲད་པ་ཞེས་པ་འཁྲབ་སྟོན་བྱས། ཟློས་གར་དེའི་ནང་རྒྱལ་རོང་བོད་རིགས་ཀྱི་ཡུན་རིང་གི་ལོ་རྒྱུས་དང་འོད་སྟོང་འཕྲོ་བའི་རིག་གནས་དང་རྒྱལ་གཅེས་བརྩེ་སེམས་གཙོ་གནད་ཐོག་མངོན་ཡོད་ལ། ས་གནས་དེ་གའི་རིག་གནས་ཡུལ་སྐོར་གྱི་ནང་དོན་ཡང་སྔར་བས་ཕུན་སུམ་ཚོགས་སུ་བཏང་ཡོད།
བོད་ས་གནས་ཀྱི་རིག་གནས་སྲུང་སྐྱོང་བྱེད་ཤུགས་ཆེ་རུ་བཏང་ནས། ས་གནས་དེ་གའི་གྲོང་མིར་བོད་རིགས་ཀྱི་རིག་གནས་ཡུལ་སྐོར་རྣམ་གྲངས་གསར་པ་གཏོད་རྒྱུར་ཁྲིད་སྟོན་བྱས་ཏེ། ཡིག་ཐོག་སྙན་ཞུའི་ཆ་རྐྱེན་དང་མཐུན་པའི་དངོས་མིན་ཤུལ་བཞག་བཟོ་ཁང་ལ་ཁ་གསབ་རོགས་དངུལ་སྤྲད་དེ། ས་གནས་ཁག་གི་ཡུལ་སྐོར་བ་ལྟ་སྐོར་དང་སྤེལ་རེས་བྱེད་པར་ཡོང་རྒྱུའི་ཡིད་དབང་བཀུག་ཡོད། ད་ལོ་ནས་བཟུང་ཡུལ་སྐོར་བ་ཁྲི་235ཙམ་ལ་སྣེ་ལེན་ཞུས་པར་ཡུལ་སྐོར་ཐོན་ལས་ལ་ཡོང་འབབ་སྒོར་དུང་ཕྱུར་25.84རག
རང་རེའི་ཞིང་ཆེན་གྱི་བོད་འབྲེལ་ས་ཁུལ་གྱིས་རིག་གནས་ལ་བརྟེན་ནས་ཡུལ་སྐོར་བཏོད་པ་དང་། ཡུལ་སྐོར་ལ་བརྟེན་ནས་རིག་གནས་རྒྱ་ཁྱབ་བཏང་། མི་གཙོ་བོར་འཛིན་པ་དང་གསར་གཏོད་བྱེད་ཕོད་པ། རིག་གནས་ཡུལ་སྐོར་ཐོན་རྫས་གྲགས་ཅན་མང་པོ་བཏོན་ནས། ཀུན་གྱིས་རེ་སྨོན་བྱ་སའི་གནས་མཆོག་ཏུ་གྱུར་ཡོད།
ཀྲུང་དབྱང་གསར་འགྱུར་ཁང་གིས་གསར་འགྱུར་སྤེལ་བར་གཞིགས་ན། ཐོ་ཁེ་ཡོའི་ས་གནས་དེ་གའི་དུས་ཚོད་2023ལོའི་ཟླ་11པའི་ཚེས་1ཉིན། སྐབས་སོ་དྲུག་པའི་ཐ་ཁེ་ཡོ་གློག་བརྙན་དུས་ཆེན་བྱ་དགའ་ཐོབ་པའི་མིང་ཐོ་ཁྱབ་བསྒྲགས་བྱས་པ་དང་། སྐུ་གཤེགས་པའི་ཀྲུང་གོའི་མཚོ་སྔོན་ནས་ཡིན་པའི་བོད་རིགས་འཁྲབ་ཁྲིད་པ་པདྨ་ཚེ་བརྟན་གྱིས་འཁྲབ་ཁྲིད་བྱས་པའི་བོད་སྐད་གློག་བརྙན《གསའ》ལ་སྐབས་སོ་དྲུག་པའི་ཐོ་ཁེ་ཡོ་རྒྱལ་སྤྱིའི་གློག་བརྙན་དུས་ཆེན་གྱི་གློག་བརྙན་ཡག་ཤོས་ཀྱི་བྱ་དགའ་ཆེན་པོ་ཐོབ་པ་རེད། 《གསའ》ཞེས་པའི་གློག་བརྙན་ནང་བོད་རིགས་མང་ཚོགས་ཀྱི་རིག་གནས་དང་འཚོ་བ་དང་དེ་བཞིན་དེང་རབས་ཤེས་དཔལ་གྱིས་དེའི་འཚོ་བ་དང་བསམ་གཞིགས་བྱེད་སྟངས་ལ་འགྱུར་ལྡོག་དང་མཉམ་འདྲེས་བྱུང་ཚུལ་བརྗོད་ཡོད། དེ་ནི་ཀྲུང་གོའི་གཏམ་རྒྱུད་ཡག་པོ་ཤོད་པ་དང་ཀྲུང་གོའི་སྐད་སྒྲ་བརྒྱུད་བསྒྲགས་ཡག་པོ་བྱེད་པའི་གསོན་ཉམས་དོད་པའི་དཔེ་མཚོན་ཞིག་ཡིན་ལ། ཤེས་དཔལ་སྤེལ་རེས་དང་སྦྱོང་རེས་གཏིང་ཟབ་ཏུ་བཏང་ནས་ཀྲུང་ཧྭའི་རིག་གནས་དེ་བས་ལེགས་པའི་སྒོ་ནས་འཛམ་གླིང་ཕྱོགས་སུ་བསྐྱོད་རྒྱུར་སྐུལ་འདེད་གཏོང་། །