སྐལ་བཟང་དབང་འདུས་ནི་1985ལོར་སྡེ་དགེ་སྨན་ཤོད་གྲོང་རྡལ་གྱི་ལྷ་བཟོའི་ཁྱིམ་རྒྱུད་ཅིག་ཏུ་སྐྱེས་ཤིང་། ཕ་དང་ཨ་ཁུ་གཉིས་ནི་ལྷ་བཟོ་གྲགས་ཅན་ཐང་བླ་ཚེ་དབང་དང་འཇམ་དཔལ་རྣམ་གཉིས་ཀྱི་དངོས་སློབ་ཡིན། ཁྱིམ་རྒྱུད་ཀྱི་བག་ཆགས་འོག་འབྲིང་རིམ་སློབ་གྲྭ་ནས་མཐར་ཕྱིན་རྗེས་མེས་པོའི་རྗེས་ཤུལ་འཚོལ་ཕྱིར་རི་མོའི་ལམ་དུ་ཞུགས།
བགྲང་བྱ་བཅུ་ལྷག་ལ་སྙིང་རུས་ཆེན་པོས་བོད་ཀྱི་གསོ་བ་རིག་པ་དང་བྲིས་གཟུགས།བོད་བརྒྱུད་ནང་བསྟན་གྱི་ལྷ་སྐུའི་ཐིག་ཆ་ཚད་སོགས་ཀྱི་གསུང་རབ་བསྟན་བཅོས་ལ་སྦྱོང་བརྩོན་བྱས་པས།བོད་ཀྱི་སྲོལ་རྒྱུན་རིག་གནས་ལ་རྒྱུས་ལོན་གཏིང་ཟབ་བྱུང་།དེ་དང་དུས་མཚུངས་སུ།སྡེ་དགེའི་ལྷ་བཟོ་ཚེ་རིང་དཔལ་ལྡན་དང་ཁོང་གི་ཕུལ་བྱུང་སློབ་མ་མང་པོའི་རྗེས་སུ་འབྲངས་ནས་ལྗོངས་ཞིང་ལྔའི་བོད་འབྲེལ་ས་ཁུལ་གྱི་ཁུལ་དང་རྫོང་མང་པོར་བསྐྱོད་དེ། སྲོལ་རྒྱུན་གྱི་རི་མོའི་ལུགས་སོ་སོ་ལ་སློབ་སྦྱོང་བྱས།
2013ལོར། ཆིང་ཧྭ་སློབ་ཆེན་མཛེས་རྩལ་སློབ་གླིང་གི་རི་ཆུའི་རི་མོའི་མཐོ་རིམ་ཞིབ་འཇུག་ཟབ་སྦྱོང་འཛིན་གྲྭར་སློབ་སྦྱོང་བྱེད་པའི་གོ་སྐབས་ཐོབ། དུས་དེ་ནས་བཟུང་། རྒྱལ་ཁབ་ཀྱི་རིམ་པ་དང་པོའི་མཛེས་རྩལ་དགེ་རྒན་ཝང་ཅེ་ཧྲན་དགེ་རྒན་དུ་བསྟེན་ནས་ཀྲུང་གོའི་རི་ཆུའི་རི་མོ་ལ་སློབ་སྦྱོང་བྱེད་འགོ་བརྩམས།
ལོ་ཕྱེད་ཀྱི་ཞིབ་འཇུག་ཟབ་སྦྱོང་དུ་དགེ་རྒན་ཝང་ཅེ་ཧྲན་གྱི་མཛུབ་སྟོན་འོག །ཁོང་གི་སྒྱུ་རྩལ་གསར་རྩོམ་གྱི་བསམ་བསྐྱེད་དང་ཕྱོགས་བསྡུས་ནུས་པའང་རྒྱུན་ཆད་མེད་པར་མཐོ་འདེད་བྱུང་། ཁོང་གིས་ཕྱོགས་གཅིག་ནས་ཀརྨ་སྒར་བྲིས་ལུགས་ཀྱི་སྲོལ་རྒྱུན་ལག་རྩལ་བསྐྱར་སྦྱོང་དང་འཐུས་ཚང་དུ་གཏོང་བར་མ་ཟད། ཕྱོགས་གཞན་ཞིག་ནས་རྒྱ་ལུགས་ཀྱི་སྲོལ་རྒྱུན་རི་མོའི་བཀོད་པ་དང་ཞིབ་བྲིས་རི་མོ། སྣག་ཚའི་རི་མོ་སོགས་ཀྱི་ལག་རྩལ་དེ་བརྗོད་བྱ་གསར་པའི་ཐང་ག་གསར་རྩོམ་ཁྲོད་སྤྱོད་པར་ཚོད་ལྟ་བྱས། ཁོང་སྔར་དཀར་མཛེས་ཁུལ་གྱིས་གཉེར་བའི་གེ་སར་སྟོང་ཐང་ཆེན་མོ་དང་གུ་རུའི་སྟོང་ཐང་ཆེན་མོའི་སྤྱན་འབྱེད་ཀྱི་ལས་གྲལ་དུ་ཞུགས་པར་མ་ཟད། འབྲེལ་ཡོད་དགོན་སྡེ་ཆེ་གྲས་མང་པོའི་ལྡེབས་རིས་འབྲི་བཞེངས་བྱས། 2018ལོར་སི་ཁྲོན་ཞིང་ཆེན་གསེར་གྱི་དོམ་ཁྲའི་སྔོན་ཐོན་མི་སྒེར་གྱི་བྱ་དགའ་ཐོབ། །
