EPUBནི་དབྱིན་ཡིག་གི་གློག་རྡུལ་དཔར་སྐྲུན(Electronic Publication)ཞེས་པའི་བསྡུས་བྲིས་ཡིན། རྩོམ་འདིར་EPUBཡི་འཕེལ་རིམ་དང་དེའི་གྲུབ་ཚུལ། རྒྱུད་ཁུངས་མ་ལག་སོ་སོའི་སྟེང་གི་ཁྱབ་གདལ་གནས་ཚུལ་དང་། གློག་རྡུལ་དཔེ་ཆའི་རྣམ་གཞག་གཞན་དག་དང་ཞིབ་བསྡུར་བྱས་ནས་དེའི་སྐྱོན་ཡོན་སོགས་ངོ་སྤྲོད་ཞུ་རྒྱུ་ཡིན། རྩོམ་ཡིག་འདིའི་ཟུར་གཏོགས་བརྙན་ཐུང་ནང་དུ་Sigilམཉེན་ཆས་བཀོལ་ནས་ཚད་ལྡན་གྱི་EPUBའཕྲུལ་དེབ་བཟོ་སྟངས་སྐོར་ལ་ངོ་སྤྲོད་བྱས་ཡོད་པས། དགོས་མཁོ་ཡོད་མཁན་རྣམས་ཀྱིས་དེ་བརྒྱུད་ནས་གཟིགས་རོགས།
EPUBཡི་འཕེལ་རིམ།
EPUBཚད་གཞི་ནི་རྒྱལ་སྤྱིའི་ཨང་ཀིའི་པར་སྐྲུན་གླེང་སྟེགས་(IDPF)ཀྱིས་གཏན་འབེབས་བྱས་པ་དང་། སྒྲིག་ཆས་དང་མཉེན་ཆས་སྣ་ཚོགས་ལ་གཅིག་གྱུར་གྱི་གློག་རྡུལ་དཔེ་ཆའི་རྣམ་གཞག་འདོན་སྤྲོད་བྱ་རྒྱུར་དམིགས་ནས་བཟོས་པ་ཞིག་ཡིན། 2007ལོར་ཐོག་མར་ཁྱབ་བསྒྲགས་བྱས་པ་ནས་བཟུང་། དེ་ལ་རིམ་འཕར་གལ་ཆེན་ཐེངས་འགའ་བྱུང་མྱོང་།
1.2007ལོར། པར་གཞི་ཐོག་མ་ཁྱབ་བསྒྲགས་དང་རྨང་གཞིའི་སྒྲིག་གཞི་དང་རྣམ་གཞག་མཁོ་འདོན་བྱས་པ།
2.2010ལོར། པར་གཞི་ཐོག་མ་ལ་བཟོ་བཅོས་དང་ནོར་འཁྲུལ་ཁ་ཤས་ཡོ་བསྲང་བྱས་པ།
3.2011ལོར། HTML5དང་CSS3ལ་རྒྱབ་སྐྱོར་བྱས་པ། སྒྲ་དང་གཟུགས་སོགས་འཕྲིན་སྦྱོར་རྣམ་པ་གསར་པ་དང་མཉམ་འགུལ་ནུས་པ་འདོན་སྤྲོད་བྱས་པ་དང་། སྣ་མང་སྐད་རིགས་རྒྱབ་སྐྱོར་ལ་ལེགས་བཅོས་བྱས།
4.2017ལོར། སྤྱོད་རུང་རང་བཞིན་དང་ལྟ་སྤྱོད་སླ་བའི་རང་བཞིན་སྔར་བས་ཆེ་རུ་ཕྱིན་པ་དང་སྒུལ་བདེའི་སྒྲིག་ཆས་དང་འབྱེད་ཕྱོད་མཐོན་པོའི་བརྙན་ཡོལ་ལ་རྒྱབ་སྐྱོར་བྱེད་ཤུགས་ཆེ་རུ་ཕྱིན་པ།
5.2019ལོར། གནད་དོན་ཁ་ཤས་དག་བཅོས་བྱས་པར་མ་ཟད། གསར་བྱུང་པར་རིམ་གྱི་འཆམ་མཐུན་རང་བཞིན་ལ་ཤུགས་སྣོན་བརྒྱབ་པ།
EPUBདང་འཕྲུལ་དེབ་རྣམ་པ་གཞན་དག་བར་གྱི་ཞིབ་བསྡུར།
དེང་སང་འཕྲུལ་དེབ་རྣམ་གཞག་སྣ་ཚོགས་ཡོད་པ་དང་། ཆེས་མིང་དུ་གྲགས་པའི་རྣམ་གཞག་ནི་AZWདང་MOBI༼Kindleདཔེ་ཀློག་འཕྲུལ་ཆས་ཐོག་གི་འཕྲུལ་དེབ་རྣམ་པ༽ PDFརྣམ་གཞག་སོགས་ཡིན།
1.ཡིག་ཆ་བསྐྱར་སྒྲིག PDFདང་བསྡུར་ན། EPUBནང་གི་ཡི་གེ་བརྙན་ཡོལ་ཆེ་ཆུང་ལ་གཞིགས་ནས་ཡང་བསྐྱར་སྒྲིག་ཆོག་པ་དང་སྔ་ལས་བཟང་བའི་ལྟ་ཀློག་ཉམས་མྱོང་འདོན་སྤྲོད་བྱེད་ཐུབ།
2.འཕྲིན་སྦྱོར་སྣ་མང་། EPUB3ཡིས་སྔ་དུས་ཀྱི་གློག་རྡུལ་དཔེ་ཆའི་རྣམ་གཞག་ནང་འཆར་མི་ཐུབ་པའི་སྒྲ་ཟློས་དང་བརྙན་འཕྲིན་སོགས་འཆར་ཐུབ།
3.ཚད་གཞི་སྒོ་འབྱེད། Amazonཡི་Kindleརྣམ་གཞག་དང་བསྡུར་ན། EPUBནི་སྒོ་འབྱེད་ཀྱི་ཚད་གཞི་ཞིག་ཡིན། རྩ་འཛུགས་རྐྱང་པའི་ཚོད་འཛིན་མི་ཐེབས་པ། རྒྱུད་ཁུངས་དང་སྒྲིག་ཆས་མང་པོའི་སྟེང་ལ་བཀོལ་ཆོག
EPUBགློག་རྡུལ་དཔེ་ཆའི་སྒྲིག་གཞི།
EPUBའཕྲུལ་དེབ་ཀྱི་སྒྲིག་གཞི་ནི་དྲ་ངོས་དང་འདྲ་བ། HTMLདང་CSSརྨང་གཞི་ཐོག་XMLབཀོལ་ནས་དཔེ་ཆའི་གཞི་གྲངས་ལ་མཚན་ཉིད་འཇོག་པ། ཚད་ལྡན་གྱི་EPUBཡིག་ཆའི་ནང་དུ་གཤམ་གྱི་གྲུབ་ཆ་འདུས་དགོས།
1.གཞི་གྲངས(Metadata) དཔེ་ཆའི་མཚན་བྱང་དང་། རྩོམ་པ་པོ། དཔེ་སྐྲུན་ཁང་སོགས་ཞིབ་བརྗོད་བྱེད་པ།
2.རྩིས་ཐོ(Manifest) འཕྲུལ་དེབ་ནང་དུ་འདུས་པའི་ཡིག་ཆ་ཚང་མ།
3.པར་སྒྲིག (Spine) ལྟ་ཀློག་གི་གོ་རིམ་གཏན་འཁེལ་བྱས་ནས། ནང་དོན་རྒྱུན་མཐུད་ཀློག་འདོན་ཐུབ་པ་ཁག་ཐེག་བྱེད་པ།
4.དཀར་ཆག (Table of Control) སྟབས་བདེ་ངང་དཀར་ཆག་དང་ནང་དོན་གཉིས་ཕན་ཚུལ་སྦྲེལ་བ།
5.ནང་དོན་ཡིག་ཆ(Content Files)HTMLརྣམ་པའི་དཔེ་ཆའི་ནང་དོན་དང་། པར་རིས། བརྙན་ཐུང་སོགས།
6.བཟོ་ལྟའི་རེའུ་མིག(Stylesheets) CSSརྣམ་པའི་འཕྲུལ་དེབ་ཀྱི་བཟོ་ལྟའང་མཐོང་ཚོར་ཚོད་འཛིན་བྱེད་པའི་ཡིག་ཆ།
སྒྲིག་གཞི་འདི་བཀོལ་ནས་འཕྲུལ་དེབ་སྒྲིག་ཆས་མི་འདྲ་བའི་སྟེང་ན་མཐོང་ཚོར་གཅིག་འགྱུར་བྱེད་ཐུབ་པར་མ་ཟད། ཀློག་པ་པོ་མི་སྒེར་གྱི་དགའ་ཕྱོགས་ལྟར་དཔེ་ཀློག་སྒྲིག་བཀོད་ལེགས་སྒྲིག་བྱེད་ཆོག
རྒྱུད་ཁུངས་སོ་སོའི་ཐོག་གི་ཁྱབ་བརྡལ་གནས་ཚུལ།
འཕྲུལ་དེབ་རིགས་འདིའི་ཚད་གཞི་སྒོ་འབྱེད་ཡིན་པས། རྩ་འཛུགས་དང་མི་སྒེར་སུ་ཡིན་རུང་རིན་མེད་ངང་བེད་སྤྱོད་བྱ་ཆོག །རྒྱུད་ཁུངས་མ་ལག་ཐམས་ཅད་ཐོག་ལྟ་ཀློག་བྱེད་ཐུབ། Windowsདང་macOSསོགས་ཀྱི་རྩིས་འཕྲུལ་རྒྱུད་ཁུངས་ཐོག་Calibreདང་Adobe Digital Editionsམཉེན་ཆས་བརྒྱུད་ནང་ཀློག་འདོན་བྱ་ཆོག །ཁ་པར་སོགས་སྤོ་འགུལ་སྒྲིག་ཆས་སྟེང་། ཀུ་ཤུ་དང་ཨན་ཀྲོས་གདོད་མ་ནས་EPUBརྒྱབ་སྐྱོར་ཡོད་པར་མ་ཟད། དཔེ་ཀློག་མཉེན་ཆས་ནང་འཇུག་བྱས་པ་བརྒྱུད་ནས་ཀློག་འདོན་བྱས་ཀྱང་ཆོག །གཞན་དྲ་ངོས་ལག་རྩལ་འཕེལ་རྒྱས་དང་བསྟུན་ནས། དྲ་ཚིགས་ཁ་ཤས་ཀྱིས་ཐད་ཀར་འཕྲུལ་དེབ་དེ་རིགས་ལྟ་ཀློག་བྱེད་ཐུབ་པ་བཟོས་ཡོད།
EPUBརྣམ་པའི་འཕྲུལ་དེབ་དེའི་སྒོ་འབྱེད་རང་བཞིན་གྱི་ཚད་གཞི་དང་། ལས་སྟེགས་ལས་བརྒལ་བའི་འཆམ་མཐུན་རང་བཞིན་དང་སྒྲ་གཟུགས་སོགས་ནང་དོན་ཕུན་སུམ་ཚོགས་པ་འཆར་ཐུབ་པའི་ཁྱད་ཆོས་སོགས་ལ་བརྟེན་ནས། གྲངས་འཛིན་པར་སྐྲུན་ཁྱབ་ཁོངས་ཀྱི་གྲུབ་ཆ་གལ་ཆེན་ཞིག་ཏུ་གྱུར་ཡོད། གྲངས་འཛིན་དཔེ་ཀློག་ཁྱབ་གདལ་རྒྱ་ཇེ་ཆེ་འགྲོ་བ་དང་བརྡ་འཕྲིན་ལག་རྩལ་འཕེལ་རྒྱས་དང་བསྟུན་ནས། EPUBཡི་རྣམ་གཞག་གིས་མུ་མཐུད་དུ་འཕྲུལ་དེབ་ཁྲོམ་ར་ཁྲོད་གོ་གནས་གལ་ཆེན་བཟུང་ཡོད་པར་མ་ཟད། གྲངས་འཛིན་པར་སྐྲུན་ལས་རིགས་ཀྱི་གསར་གཏོད་དང་འཕེལ་རྒྱས་ལ་སྐུལ་འདེད་གཏོང་རྒྱུ་ཡིན་པ་སྨོས་མ་དགོས། །