ས་མགོ་ལོག།གནམ་མགོ་ལོག།གནའ་སྔ་མོ་སྔ་མོ་ཞིག་ལ་ཁྱེད་ནི་མཚོ་སྔོན་རླུང་འཕྲིན་ནས་རྟ་བོ་ལ་ཁ་བ་ཆེན་པོ་འབབ་བཞིན་འདུག་ཅེས་ཐོག་མར་མིང་དེ་ཐོས་པ་ནི་ཕྲན་ལ་མཚོན་ན་ཆེས་ཟབ་པའི་བག་ཆགས་ཤིག་ཡིན་ལ།དུས་ད་ལྟ་ང་ལ་ཆེས་རྒྱུས་མངའ་ཡོད་པའི་གནས་མཆོག་དེ་ཡང་ཁྱེད་ཉིད་ཡིན།སྤྱི་ལོ་ཉིས་སྟོང་ལྔ་ལོ་ནས་ཉིས་སྟོང་ཉེར་གཉིས་བར་དུ་མི་ལོ་བཅུ་བདུན་འགོར་སོང་།མི་ལོ་བཅུ་བདུན་རིང་ལ་ངས་ཁྱེད་ལ་བློ་སེམས་དཀར་དཀར་དང་ནུས་པ་ཅི་ཡོད་ཀྱིས་ཞབས་འདེགས་ཀྱི་ཚུལ་དུ་རང་གི་ཚེ་སྲོག་ལས་ལྷག་པའི་ཀ་ཁའི་དབྱངས་རྟ་དང་ཕ་མེས་ཀྱི་སྲོལ་རྒྱུན་བསླབ་པར་མ་ཟད།ད་དུང་དྭ་ཕྲུག་དང་དབུལ་ཕོངས་ཀྱི་བྱིས་པར་འུ་ཅག་ཐུན་མོང་གི་བུ་ཕྲུག་ཇི་བཞིན་གཉོར་སྐྱོང་བྱས་པ་ནི་ངས་རང་གི་ཚོགས་བསགས་ཡག་པོ་ཞིག་དང་བསོད་ནམས་ཀྱི་རྒྱུ་ཆེན་པོ་ཞིག་ཏུ་ངོས་འཛིན་བྱེད་བཞིན་ཡོད།
རེད་དེ། ང་ནི་ས་མགོ་ལོག གནམ་མགོ་ལོག་གི་དབྱར་རྩྭ་དགུན་འབུ་ལ་སྲེད་པའི་ཚོང་པ་དེ་མིན་ལ། ཨ་མྱེས་རྨ་རྒྱལ་གངས་རིའི་གཏེར་ཁ་ལ་རྔམ་པའི་གཏེ་བོ་དེ་ཡང་ཡེ་ནས་མིན། ང་ནི་གཉོམ་ཆུང་དང་ཁེར་རྐྱང་དུ་ལྷག་པའི་དྭ་ཕྲུག་རྣམས་ཀྱི་སེམས་པའི་ཁེན་ས་ཙམ་དང་མགོ་ལོག་རྟ་བོ་གྲོང་ན་རྟག་པར་ཁེར་རྐྱང་དུ་གནས་པའི་ཡུལ་འཁྱར་བ་དེ་ཡིན།
མི་ལོ་བཅུ་བདུན་གྱི་རིང་ལ།ང་ལ་མཚོན་ན་གཞན་གྱི་སྨོན་སའི་རྒྱུ་འབྱོར་མེད་ལ།ཐོབ་དང་གོ་སའང་མེད།བྱིས་པ་རེ་རེའི་འབྱུང་འགྱུར་གྱི་ཕུགས་བསམ་དང་བདེ་ཐང་གི་འཚར་ལོངས་ནི་ངའི་མི་ཚེའི་ཁྲོད་ཀྱི་ཆེས་གྱ་ནོམ་པའི་རྒྱུ་ནོར་དུ་སེམས་ཡོད།ད་ནི་ཕྱིར་འདང་ཞིག་བརྒྱབ་ན།མི་ལོ་བཅུ་བདུན་ཤེས་མེད་ཚོར་མེད་ངང་འདི་ལྟར་འདས་སོང་།མི་ཞིག་གི་མི་ཚེའི་ཁྲོད་དུ་ལོ་ངོ་བཅུ་བདུན་ག་ཚོད་ཅིག་ཡོད་སྲིད།གལ་ཏེ་ང་ལ་ད་རུང་བློ་ཡིད་ཚིམ་པའི་མི་ལོ་བཅུ་བདུན་རེ་ལྷག་ཡོད་ཚེ།ངས་སྔར་བཞིན་ལ་ལུང་མང་པོ་བརྒལ་ནས་ཉམ་ཆུང་གི་དྭ་ཕྲུག་བྱིས་པ་མང་པོ་ཞིག་ལ་རང་ཁ་རང་གསོ་ཐུབ་པའི་སློབ་གསོའི་ལམ་བུ་ཞིག་འཚོལ་དུ་འཇུག་བསམ།
མི་ལོ་བཅུ་བདུན་གྱི་རིང་ལ།ང་རང་ཉིད་ཁྱིམ་ཚང་ཞིག་གི་བཟའ་དཔོན་ནང་བཞིན་སློབ་གྲྭ་འདིའི་གོང་འོག་བར་གསུམ་ཡོངས་ལ་སེམས་ཁུར་དང་དཀའ་སྡུག་གིས་བསྐྱངས་པ་ཡིན་ལ།ཐ་ན་སློབ་གསོའི་ཞོར་དུ་དགེ་སློབ་ཡོངས་ཀྱི་ཟས་ཆུ་ཟ་མ་བཀོད་སྒྲིག་དང་སློབ་རའི་འཛུགས་བསྐྲུན།བྱིས་པ་རེ་རེའི་སྨན་བཅོས་དང་ལོ་རེར་སློབ་བསྡུའི་སྐོར་གྱི་བྱ་བ་སོགས་ཀྱིས་མཚམས་རེར་ཇི་ལྟར་བསྒྲུབས་པའི་ཁ་ཕྱོགས་མེད་པ་བཞིན་ང་རང་སྡུག་ལ་ཐུག་མྱོང་ལ།ཡང་མཚམས་རེར་རྒྱུས་མེད་ཀྱི་ས་ཆ་འདི་འདྲ་ཞིག་ཏུ་རང་ཉིད་གཅིག་པུ་ཡོང་ནས་འདི་འདྲའི་དཀའ་སྡུག་ཅིག་མྱོང་ནས་དགོས་པ་ཅི་ཞིག་ཡོད་དམ་སྙམ་ནས་བློས་གཏོང་གི་བསམ་བློ་ཡང་འཁོར་མྱོང་མོད།ངས་སྔར་བཞིན་བློས་གཏོང་མ་བྱས་པར་རྒྱུན་འཁྱོངས་དང་སྔར་ལས་ལྷག་པའི་སྤོབས་པ་ཆེར་བསྐྱེད་བྱ་དགོས་པའི་དམིགས་ཡུལ་ནི། སློབ་མ་རེ་རེའི་ཁྱིམ་ཚང་གི་རྒྱབ་ལྗོངས་དང་རེ་སྒུག་གི་མིག་ཟུང་ལས་རྙེད་པ་ཡིན།
ལོ་རེ་རེའི་དབྱར་དུས་སུ།ངས་སློབ་གྲྭའི་ནང་ཁུལ་གྱི་བྱ་བ་མཐའ་དག་རྒྱབ་ཏུ་དོར་ནས་མགོ་ལོག་གི་རྫོང་ཁག་སོ་སོར་སློབ་མ་བསྡུ་རུ་འགྲོ་ཐེངས་རེ་རེར་ང་ལ་བརྗོད་མེད་ཀྱི་སྤོབས་པ་ཞིག་དང་སྔར་མེད་ཀྱི་སེམས་ཤུགས་ཤིག་སྩོལ་ཐུབ་པ་ནི། སྙིང་ཉེ་བའི་བྱིས་པ་འདི་དག་གིས་ང་འབྱོར་བར་བསྒུག་ཡོད་པར་མ་ཟད། བྱིས་པ་རེ་རེའི་ཡིད་སྐྱོ་བའི་མི་ཚེའི་རྒྱབ་ལྗོངས་དང་འཚོ་བའི་ཁ་དོག་ལས་ངས་ད་དུང་མུ་མཐུད་དུ་རྒྱུན་སྐྱོང་དང་འབད་པ་བྱ་དགོས་སྙམ་པའི་སེམས་པ་འདི་ལྷོད་ཐུབ་མ་བྱུང་།
ང་རང་ཉིད་ཀྱི་བུ་ཆུང་ཡང་སློབ་གྲྭ་འདི་རུ་བཞག་ནས་ཁོ་ཚོ་དང་མཉམ་དུ་སྐྱིད་སྡུག་གི་འཚོ་བ་མཉམ་རོལ་བྱེད་དུ་འཇུག་པའི་རྒྱུ་རྐྱེན་ཡང་མང་པོ་ཡོད་དེ།གཅིག་ཡིན་ན་སློབ་གྲྭ་འདི་རུ་བསྡུས་པའི་སློབ་མ་རེ་རེ་ནི་ངས་རང་གི་ཤ་ལས་ཆད་པའི་བུ་ཕྲུག་དང་ཁྱད་པར་མེད་པར་བསམ་པ་རྣམ་དག་ཅིག་བཟུང་ཡོད་པས་ཡིན་ལ།གཉིས་ཡིན་ན་ངས་སློབ་གྲྭ་འདི་རུ་ཞུགས་པའི་རང་གི་དགེ་གྲོགས་དག་གི་སློབ་མ་སྐྱོང་སྟངས་དང་རིག་གནས་ཡོན་ཚད་ལ་ཡིད་ཆེས་ཡོད་པས་ཡིན།
མདོར་ན།ངས་རང་ནུས་ཅི་ཡོད་ཀྱིས་གནམ་མགོ་ལོག།ས་མགོ་ལོག་གི་ཡུལ་ནས་འཚར་ལོངས་བྱུང་ཏེ།རང་ཉིད་དང་ཁྲག་རྒྱུད་ཀྱི་འབྲེལ་བ་མེད་ནའང་།ལས་ཀྱི་ཕ་བུ་རུ་གྱུར་པའི་བྱིས་པ་དྲུག་བརྒྱ་ལྷག་དང་མཉམ་དུ་ཀ་ཁའི་དབྱངས་རྟ་གྱེར་ཞོར་སྲིད་པའི་གངས་རྒན་རྨ་རྒྱལ་སྦོམ་རིའི་ས་ཆུ་སྲུང་མཁན་དང་ཡང་ན་ཡུལ་མགོ་ལོག་གི་ངག་རྒྱུན་པ་རེ་ཨེ་ཡོང་བར་རེ་བས་འབད་པ་འདོད་དེའོ། །