ཀྲུང་གོའི་ལུགས་ཀྱི་དེང་རབས་ཅན་ནི་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་ཡངས་ཤིང་རྒྱ་ཆེ་བའི་འགྲོ་ལམ་ཡིན།

རྒྱལ་ཁབ་ཅིག་གིས་དེང་རབས་ཅན་གྱི་འགྲོ་ལམ་ཅི་འདྲ་ཞིག་འདེམས་རྒྱུ་ནི་དེའི་ལོ་རྒྱུས་ཀྱི་སྲོལ་རྒྱུན་དང་། སྤྱི་ཚོགས་ཀྱི་ལམ་ལུགས། འཕེལ་རྒྱས་ཀྱི་ཆ་རྐྱེན། ཕྱི་རོལ་གྱི་ཁོར་ཡུག་སོགས་རྒྱུ་རྐྱེན་མང་པོར་རག་ལས་ཡོད། རྒྱལ་ཁབ་ཀྱི་གནས་ཚུལ་མི་འདྲ་ལ་དེང་རབས་ཅན་གྱི་ཐབས་ལམ་ཡང་མི་འདྲ། ལག་ལེན་གྱི་ཐོག་ནས་ར་འཕྲོད་བྱུང་དོན། རྒྱལ་ཁབ་ཅིག་དེང་རབས་ཅན་གྱི་ཕྱོགས་སུ་སྐྱོད་པར་དེང་རབས་ཅན་གྱི་སྤྱིར་བཏང་གི་ཆོས་ཉིད་ལ་བརྩི་སྲུང་ཞུ་དགོས་པ་དང་། རང་རྒྱལ་ཁབ་ཀྱི་དོན་དངོས་དང་འཚམ་དགོས་ལ། རང་རྒྱལ་ཁབ་ཀྱི་ཁྱད་ཆོས་དེ་བས་ཀྱང་ལྡན་དགོས། ཀྲུང་གོའི་ལུགས་ཀྱི་དེང་རབས་ཅན་ལ་རྒྱལ་ཁབ་ཁག་གི་དེང་རབས་ཅན་གྱི་ཐུན་མོང་གི་ཁྱད་ཆོས་ལྡན་ལ། རང་ཉིད་རྒྱལ་ཁབ་ཀྱི་གནས་ཚུལ་ལ་བརྟེན་པའི་མངོན་གསལ་དོད་པོའི་ཁྱད་ཆོས་དེ་བས་ཀྱང་ལྡན་ཡོད། ཏང་གི་ཚོགས་ཆེན་ཉི་ཤུ་པའི་སྙན་ཞུའི་ནང་ཀྲུང་གོའི་ལུགས་ཀྱི་དེང་རབས་ཅན་གྱི་ཕྱོགས་5ཡི་ཐད་ཀྱི་ཀྲུང་གོའི་ཁྱད་ཆོས་སྙིང་བསྡུས་བྱས་ཡོད་ལ། ཀྲུང་གོའི་ལུགས་ཀྱི་དེང་རབས་ཅན་གྱི་ཚན་རིག་གི་ནང་དོན་ཡང་གསལ་སྟོན་གཏིང་ཟབ་བྱས་ཡོད། འདི་ནི་རིགས་པའི་གཞུང་ལུགས་ཀྱི་སྙིང་བསྡུས་ཡིན་ལ། ལག་ལེན་གྱི་བླང་བྱ་ཡང་ཡིན་པས། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་འཛུགས་བསྐྲུན་ཚར་བར་བྱེད་པ་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་ཡོང་བར་ཡངས་ཤིང་རྒྱ་ཆེ་བའི་འགྲོ་ལམ་ཞིག་གསལ་སྟོན་བྱས་ཡོད།

ཡངས་ཤིང་རྒྱ་ཆེ་བའི་འགྲོ་ལམ་ནི་ཐང་བདེ་པོ་ཞིག་ཡིན་ཟེར་བ་མིན། ཀྲུང་གོའི་ལུགས་ཀྱི་དེང་རབས་ཅན་གྱི་ཕྱོགས་5ཡི་ཐད་ཀྱི་ཀྲུང་གོའི་ཁྱད་ཆོས་དེ་གྲུབ་འབྲས་ལྡན་པའི་ལག་ལེན་དུ་འགྱུར་བ་དང་། མངོན་གསལ་དོད་པོའི་ཁྱད་ཆོས་དེ་ཐུན་མོང་མ་ཡིན་པའི་དགེ་མཚན་དུ་འགྱུར་བ་བྱེད་པར་དཀའ་སྤྱད་འབད་བརྩོན་བྱེད་དགོས།

དང་པོ། མི་འབོར་གྱི་གཞི་ཁྱོན་ཧ་ཅང་ཆེ་བའི་དེང་རབས་ཅན། འདི་ནི་ཀྲུང་གོའི་ལུགས་ཀྱི་དེང་རབས་ཅན་གྱི་མངོན་གསལ་དོད་པོའི་ཁྱད་ཆོས་ཤིག་རེད། མི་འབོར་གྱི་གཞི་ཁྱོན་མི་འདྲ་བས་དེང་རབས་ཅན་གྱི་ལས་འགན་ཡང་མི་འདྲ་ལ། དེའི་དཀའ་ཚེགས་རང་བཞིན་དང་རྙོག་འཛིང་རང་བཞིན་ཡང་མི་འདྲ། འཕེལ་རྒྱས་གཏོང་ཐབས་དང་སྐུལ་སྤེལ་བྱེད་སྟངས་ལ་ཡང་རང་ཉིད་ཀྱི་ཁྱད་ཆོས་ཡོད་ངེས་རེད། ད་ལྟ་འཛམ་གླིང་ཡོངས་སུ་དེང་རབས་ཅན་དུ་འགྱུར་བའི་རྒྱལ་ཁབ་ཀྱང་20ལྷག་ལས་མེད་པ་དང་། མི་གྲངས་བསྡོམས་འབོར་དུང་ཕྱུར་10ཡས་མས་ཡིན། ཀྲུང་གོའི་མི་འབོར་དུང་ཕྱུར་14ལྷག་དེང་རབས་ཅན་དུ་བསྐྱོད་ན། གཞི་ཁྱོན་དེ་ད་ཡོད་དར་རྒྱས་ཆེ་བའི་རྒྱལ་ཁབ་ཀྱི་མི་འབོར་བསྡོམས་འབོར་ལས་བརྒལ་བའི་རྐྱེན་གྱིས། དེང་རབས་ཅན་གྱི་འཛམ་གླིང་གི་མངའ་ཁོངས་ལ་འགྱུར་ལྡོག་ཧ་ཅང་ཆེན་པོ་ཐེབས་རྒྱུ་རེད། འདི་ནི་མིའི་རིགས་ཀྱི་ལོ་རྒྱུས་ཐོག་གཞི་ཁྱོན་ཆེ་ཤོས་ཀྱི་དེང་རབས་ཅན་ཞིག་ཡིན་ལ་དཀའ་གནད་ཆེ་ཤོས་ཀྱི་དེང་རབས་ཅན་ཞིག་ཀྱང་རེད།

གཞི་ཁྱོན་ཤིན་ཏུ་ཆེ་བའི་མི་འབོར་གྱིས་འདང་ངེས་ཀྱི་མི་ཤུགས་ཐོན་ཁུངས་དང་ཚད་བརྒལ་ཆེ་རིགས་ཀྱི་ཚོང་ར་མཁོ་འདོན་བྱེད་ཐུབ་པ་མ་ཟད། དཀའ་གནད་དང་འགྲན་སློང་རབ་དང་རིམ་པ་ཞིག་ཀྱང་ཁྱེར་ཡོང་བ་རེད། མི་གྲངས་དུང་ཕྱུར་14ལྷག་གི་ལྟོ་གོས་ཀྱི་གནད་དོན་ཐག་གཅོད་རྒྱུ་ཁོ་ན་དེ་འགྲན་སློང་ཆུང་ཆུང་ཞིག་མ་རེད། ད་དུང་ལས་ཞུགས་དང་། བགོ་བཤའ། སློབ་གསོ། སྨན་བཅོས། སྡོད་ཁང་། རྒན་གསོ། བུ་བཅོལ་སོགས་ཀྱི་གནད་དོན་གང་ཞིག་ཡིན་རུང་ཐག་གཅོད་བྱ་རྒྱུ་དེ་ནི་ལས་སླ་པོ་ཞིག་མ་རེད། གནད་དོན་གང་འདྲ་ཞིག་ཡིན་རུང་དེ་དང་འབྲེལ་བའི་མི་ཚོགས་ནི་གནམ་རིག་སྐར་རྩིས་ལྟ་བུ་ཧ་ཅང་མང་བ་རེད། ང་ཚོས་གནད་དོན་ལ་བསམ་བློ་གཏོང་བ་དང་། ཐབས་ཇུས་འགོད་པ། བྱ་བ་སྒྲུབ་པ་བཅས་བྱེད་སྐབས་དང་ཐོག་མི་འབོར་གྱི་གཞི་གྲངས་ཀྱི་གནད་དོན་ལ་བསམ་བློ་གཏོང་བ་དང་། རང་རྒྱལ་གྱི་གྲོང་ཁྱེར་དང་གྲོང་གསེབ་ཁག་བར་གྱི་ས་ཁོངས་འཕེལ་རྒྱས་ཆུ་ཚད་ཀྱི་ཧེ་བག་ཆེ་བ་སོགས་དོན་དངོས་ལ་བསམ་བློ་གཏོང་དགོས་ཤིང་། མཐོ་འདོད་ཆེན་པོ་བྱེད་མི་རུང་ལ་རྙིང་ཞེན་བག་འཁུམས་ཀྱང་བྱེད་མི་རུང་བར། ལོ་རྒྱུས་ཀྱི་ངང་རྒྱུད་རིང་པོ་མཐའ་འཁྱོངས་བྱས་ནས་བརྟན་ཐོག་ཡར་འཕེལ་དང་། རིམ་བགྲོད་གོང་འཕེལ། རྒྱུན་མཐུད་སྐུལ་འདེད་བཅས་བྱེད་དགོས།

གཉིས་པ། མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བའི་དེང་རབས་ཅན། འདི་ནི་ཀྲུང་གོའི་ལུགས་ཀྱི་དེང་རབས་ཅན་གྱི་ངོ་བོའི་ཁྱད་ཆོས་ཤིག་ཡིན་ལ་ནུབ་ཕྱོགས་དེང་རབས་ཅན་དང་མི་འདྲ་བའི་མཚོན་རྟགས་མངོན་གསལ་དོད་པོ་ཞིག་ཀྱང་ཡིན། ནུབ་ཕྱོགས་དེང་རབས་ཅན་གྱི་སྐྱོན་ཆ་ཆེ་ཤོས་ནི་མ་རྩ་ལྟེ་བར་འཛིན་པ་ལས་མི་དམངས་ལྟེ་བར་འཛིན་པ་མ་ཡིན་པ་དང་། མ་རྩའི་ཁེ་ཕན་ཆེ་ཤོས་དོན་གཉེར་བྱེད་པ་ལས་མི་མང་ཆེ་བའི་ཁེ་ཕན་ལ་ཞབས་འདེགས་ཞུ་བ་མ་ཡིན་པས། དབུལ་ཕྱུག་གི་ཧེ་བག་ཆེ་བ་དང་མཐའ་གཉིས་སུ་གྱེས་ཚུལ་ཧ་ཅང་ཚབས་ཆེ་བ་རེད། འཕེལ་རྒྱས་འགྲོ་བཞིན་པའི་རྒྱལ་ཁབ་ཁ་ཤས་དེང་རབས་ཅན་དུ་འགྱུར་བའི་བརྒྱུད་རིམ་ཁྲོད་དུ་དར་རྒྱས་ཆེ་བའི་རྒྱལ་ཁབ་ཀྱི་ཚད་གཞི་དང་ཐག་ཉེ་མོད། འོན་ཀྱང་“ཡོང་འབབ་འབྲིང་གྲས་ཀྱི་དོང་རྙིའི་”ནང་དུ་ལྷུང་བ་དང་། དུས་ཡུན་རིང་པོར་འཕེལ་མེད་སོར་གནས་སུ་གྱར་བ། ཐ་ན་ཕྱི་ནུར་ཚབས་ཆེན་བྱུང་བ་སོགས་ཀྱི་རྒྱུ་རྐྱེན་གཙོ་བོ་ཞིག་ནི་མཐའ་གཉིས་སུ་གྱེས་པའི་རིགས་དང་རིམ་གྲས་སྲ་འགྱུར་གྱི་གནད་དོན་ཐག་གཅོད་ལེགས་པོ་མ་བྱེད་པའི་རྐྱེན་གྱིས་རེད།

ཀྲུང་གོའི་ལུགས་ཀྱི་དེང་རབས་ཅན་གྱི་འཕེལ་རྒྱས་ནི་མི་དམངས་ཀྱི་ཆེད་དུ་ཡིན་པ་དང་། མི་དམངས་ལ་བརྟེན་ནས་འཕེལ་རྒྱས་གཏོང་བ། འཕེལ་རྒྱས་ཀྱི་གྲུབ་འབྲས་མི་དམངས་ཀྱིས་མཉམ་དུ་ལོངས་སྤྱོད་བྱེད་པ་བཅས་རྒྱུན་འཁྱོངས་བྱས་ཏེ། མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བར་སྐུལ་འདེད་གཏོང་བའི་ཐད་ཡར་རྒྱས་ཆེན་པོ་བྱུང་བ་དང་། ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་དབུལ་བྲལ་འགག་སྒྲོལ་གྱི་དམག་འཐབ་ལ་རྒྱལ་ཁ་ཐོབ་ནས་གྲོང་གསེབ་ཀྱི་དབུལ་ཕོངས་མི་འབོར་དུང་ཕྱུར་1ཙམ་དབུལ་སྒྲོལ་ཐུབ་པ་བྱུང་ཡོད། ད་ལྟ་ང་ཚོར་མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བར་སྐུལ་སྤེལ་གཏོང་བའི་བསམ་བློའི་འདུ་ཤེས་དང་། ལམ་ལུགས་བཀོད་སྒྲིག །སྲིད་ཇུས་དང་བྱེད་ཐབས་བཅས་ཆ་ཚང་ཞིག་ཆགས་ཡོད། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་། “སྒོ་ངའི་བག་ལེབ་”ཆེན་པོ་བཟོ་བའི་དུས་མཚུངས་སུ། “སྒོ་ངའི་བག་ལེབ་”སྔར་བས་ལེགས་པོ་བགོས་ཏེ་ལས་ཞུགས་དང་། བགོ་བཤའ། སློབ་གསོ། སྨན་བཅོས། སྡོད་ཁང་། རྒན་གསོ། བུ་བཅོལ་སོགས་དམངས་འཚོའི་གནད་དོན་ཤུགས་ཆེན་པོས་ཐག་གཅོད་བྱེད་པ་དང་། བགོ་བཤའ་ཐེངས་གསུམ་དང་ཆ་འགྲིག་པའི་ལམ་ལུགས་མ་ལག་འཛུགས་པ། ཡོང་འབབ་བགོ་བཤའི་སྒྲིག་རིམ་ཚད་ལྡན་དུ་གཏོང་བ། རྒྱུ་ནོར་གསོག་འཇོག་ལམ་སྲོལ་ཚད་ལྡན་དུ་གཏོང་བ། མ་རྩ་སྐྱོན་བྲལ་ངང་འཕེལ་རྒྱས་གཏོང་བར་ཁྲིམས་ལྟར་ཁྲིད་སྟོན་དང་ཚད་ལྡན་དུ་གཏོང་བ། ཡོང་འབབ་འབྲིང་གྲས་ཀྱི་ཚོགས་སྤྱི་རིམ་བཞིན་རྒྱ་སྐྱེད་དང་ཡོང་འབབ་བགོ་བཤའི་ཧེ་བག་ཇེ་ཆུང་དུ་གཏོང་བ་བཅས་བྱས་ཏེ། དེང་རབས་ཅན་འཛུགས་སྐྲུན་བྱས་པའི་གྲུབ་འབྲས་ཀྱིས་མི་དམངས་ཡོངས་རྫོགས་ལ་སྔར་ལས་མང་བ་དང་སྔར་ལས་དྲང་སྙོམས་སྒོས་ཕན་ཐོགས་པར་བྱས་ནས་མཐའ་གཉིས་སུ་གྱེས་པར་མཐའ་གཅིག་ཏུ་སྔོན་འགོག་བྱེད་དགོས། མཉམ་དུ་ཕྱུག་པོར་འགྱུར་བར་བྱ་རྒྱུ་ནི་དུས་ཡུན་རིང་པོའི་ལས་འགན་ཞིག་ཡིན་པས། ངེས་པར་དུ་སྙིང་རུས་གཏན་འཁྱོངས་ཀྱིས་འབད་འབུངས་ལྷོད་མེད་བྱས་ཏེ་རྒྱུན་ཆད་མེད་པར་ཡར་སྐྱེད་གསར་པ་ཡོང་དགོས།

གསུམ་པ། དངོས་པོའི་དཔལ་ཡོན་དང་བསམ་པའི་དཔལ་ཡོན་ཕན་ཚུན་མཐུན་སྦྱོར་བྱེད་པའི་དེང་རབས་ཅན། དངོས་པོ་འབྱོར་ཕྱུག་ཡིན་དགོས་ལ་བསམ་པ་ཡང་འབྱོར་ཕྱུག་ཡིན་དགོས། འདི་ནི་ཀྲུང་གོའི་ལུགས་ཀྱི་དེང་རབས་ཅན་གྱི་བླ་ན་མེད་པའི་དོན་གཉེར་ཞིག་རེད། དངོས་པོ་དབུལ་ཕོངས་ཡིན་པ་སྤྱི་ཚོགས་རིང་ལུགས་མིན་ལ། བསམ་བློ་དབུལ་ཕོངས་ཡིན་པའང་སྤྱི་ཚོགས་རིང་ལུགས་མིན། ནུབ་ཕྱོགས་ཀྱི་སྔ་དུས་ཀྱི་དེང་རབས་ཅན་ནི་ཕྱོགས་གཅིག་ནས་རྒྱུ་ནོར་གྱི་གསོག་འཇོག་ཡིན་པ་དང་། ཕྱོགས་གཅིག་ནས་དད་མོས་ཉམས་པ་དང་རྒྱུ་ལ་རྔམ་སེམས་ཆེ་བ་རེད། ད་ལྟ། ནུབ་ཕྱོགས་རྒྱལ་ཁབ་རིམ་བཞིན་དཀའ་ཁག་གི་གནས་སུ་ལྷུང་བཞིན་ཡོད། རྒྱུ་རྐྱེན་གཙོ་བོ་ཞིག་ནི་མ་རྩ་འདོད་རྔམ་ཅན་དུ་འགྱུར་བའི་རང་གཤིས་འགོག་མི་ཐུབ་པ་དང་། དངོས་པོ་རིང་ལུགས་ཇེ་ཆེར་འགྲོ་བ། བསམ་བློ་ཞན་པ་སོགས་ཀྱི་གཅོང་ནད་སེལ་ཐབས་བྲལ་བར་ཐུག་ཡོད།

ཀྲུང་གོའི་ལུགས་ཀྱི་དེང་རབས་ཅན་ལ་དངོས་པོའི་རྒྱུ་ནོར་ཧ་ཅང་ཕུན་སུམ་ཚོགས་པོ་ཡོད་དགོས་ལ། བསམ་པའི་རྒྱུ་ནོར་ཡང་ཧ་ཅང་ཕུན་སུམ་ཚོགས་པོ་ཡོད་དགོས། བསམ་བློ་དང་རིག་གནས་ཐད་རང་ལ་ཡིད་ཆེས་དང་རང་སྟོབས་ལྡན་པར་བྱེད་དགོས། ཕྱོགས་གཉིས་དམ་འཛིན་དང་ཕྱོགས་གཉིས་ཀ་དམ་འཛིན་ནན་པོ་བྱ་རྒྱུ་རྒྱུན་འཁྱོངས་བྱས་ནས་དངོས་པོའི་དཔལ་ཡོན་དང་བསམ་པའི་དཔལ་ཡོན་ཕན་ཚུན་མཐུན་སྦྱོར་དང་ཕན་ཚུན་སྐུལ་འདེད་གཏོང་རྒྱུར་སྐུལ་སྤེལ་བྱས་ཏེ་མི་དམངས་ཡོངས་ལ་ཐོག་མཐའ་བར་གསུམ་དུ་མཐུན་སྒྲིལ་འབད་འཐབ་ཀྱི་བསམ་བློའི་རྨང་གཞི་དང་། གསར་གཏོད་ཡར་བརྩོན་གྱི་རང་འགུལ་སྙིང་སྟོབས། སྐྱོན་བྲལ་ཡར་བརྩོན་གྱི་རིན་ཐང་དོན་གཉེར་བཅས་ཡོད་པ་བྱེད་དགོས། མི་དམངས་ཀྱི་ཉིན་བཞིན་ཇེ་ཆེར་འགྲོ་བའི་བསམ་པའི་རིག་གནས་ཀྱི་དགོས་མཁོ་དང་བསྟུན་ནས་གོང་བུར་འགྲིལ་ཤུགས་དང་སྣེ་ཁྲིད་ནུས་པ་ཆེན་པོ་ལྡན་པའི་སྤྱི་ཚོགས་རིང་ལུགས་ཀྱི་འདུ་ཤེས་འཛིན་སྟངས་འཛུགས་སྐྲུན་དང་། ཕུགས་བསམ་དང་དད་སེམས་ཀྱི་སློབ་གསོ་དང་“ལོ་རྒྱུས་བཞི་”ཡི་དྲིལ་བསྒྲགས་དང་སློབ་གསོར་ཤུགས་རྒྱག་པ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྐྱེད་སྲིང་དང་དར་སྤེལ། སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་གོང་སྤེལ། རིག་རྩལ་གྱི་ཕུལ་བྱུང་བརྩམས་ཆོས་སྔར་ལས་མང་བ་འདོན་སྤེལ། མི་དམངས་ཀྱི་བསམ་པའི་འཇིག་རྟེན་རྒྱུན་ཆད་མེད་པར་ཕུན་སུམ་ཚོགས་སུ་གཏོང་བ། སྤྱི་ཚོགས་ཡོངས་ཀྱི་དཔལ་ཡོན་གྱི་ཆུ་ཚད་མཐོ་རུ་གཏོང་བ་བཅས་བྱས་ནས་མི་ཕྱོགས་ཡོངས་ནས་འཕེལ་རྒྱས་ཡོང་བར་སྐུལ་འདེད་གཏོང་དགོས།

བཞི་པ། མི་དང་རང་བྱུང་ཁམས་ཞི་མཐུན་མཉམ་གནས་ཀྱི་དེང་རབས་ཅན། རང་བྱུང་ཁམས་ལ་བརྩི་འཇོག་དང་། རང་བྱུང་ཁམས་དང་བསྟུན་པ། རང་བྱུང་ཁམས་སྲུང་སྐྱོབ་བཅས་བྱས་ནས་མི་དང་རང་བྱུང་ཁམས་ཞི་མཐུན་མཉམ་གནས་ཡོང་བར་སྐུལ་འདེད་གཏོང་རྒྱུ་ནི་ཀྲུང་གོའི་ལུགས་ཀྱི་ཁྱད་ཆོས་མངོན་གསལ་དོད་ཤོས་ཤིག་ཡིན། ཉེ་རབས་ནས་བཟུང་ནུབ་ཕྱོགས་རྒྱལ་ཁབ་ཀྱི་དེང་རབས་ཅན་མང་ཆེ་བས་རང་བྱུང་ཐོན་ཁུངས་རང་དགར་འཕྲོག་བཅོམ་དང་སྐྱེ་ཁམས་ཁོར་ཡུག་ལ་གཏོར་བཤིག་ཚབས་ཆེན་གཏོང་བའི་དུས་རིམ་བརྒྱུད་མྱོང་ཞིང་། དངོས་པོའི་རྒྱུ་ནོར་འབོར་ཆེན་གསར་སྐྲུན་བྱེད་པ་དང་དུས་མཚུངས་སུ་ཁོར་ཡུག་སྦགས་བཙོག་དང་ཐོན་ཁུངས་སྟོངས་ཟད་སོགས་ཀྱི་གནད་དོན་ཚབས་ཆེན་རྟག་ཏུ་ཐོན་གྱི་ཡོད། རང་རྒྱལ་གྱི་མི་རེའི་ཆ་སྙོམས་ཀྱི་ནུས་ཁུངས་དང་ཐོན་ཁུངས་ཀྱི་ལྷན་སྐྱེས་ནུས་པ་ཧ་ཅང་མི་འདང་བ་དང་། འཕེལ་རྒྱས་མགྱོགས་སུ་གཏོང་བར་ནུས་ཁུངས་དང་ཐོན་ཁུངས། ཁོར་ཡུག་བཅས་ཀྱི་ཚོད་འཛིན་སྔར་ལས་མང་བ་འཕྲད་ཡོད། འདིས་རང་རྒྱལ་ནུབ་ཕྱོགས་ཅན་གྱི་ལམ་བུ་རྙིང་པར་མི་འགྲོ་བ་ཐག་གིས་བཅད་ཡོད།

ཀྲུང་གོའི་ལུགས་ཀྱི་དེང་རབས་ཅན་གྱིས་རྒྱུན་མཐུད་ངང་འཕེལ་རྒྱས་གཏོང་རྒྱུ་རྒྱུན་འཁྱོངས་དང་། གྲོན་ཆུང་སྔོན་ལ་འཇོག་པ་དང་། སྲུང་སྐྱོབ་སྔོན་ལ་འཇོག་པ། རང་བྱུང་སླར་གསོ་བཅས་གཙོ་བོར་འཛིན་པའི་བྱེད་ཕྱོགས་རྒྱུན་འཁྱོངས་བྱས་ཏེ་བློ་བརྟན་འགྱུར་མེད་ངང་ཐོན་སྐྱེད་འཕེལ་རྒྱས་དང་། འཚོ་བ་ཕྱུག་པོ། སྐྱེ་ཁམས་ལེགས་པོ་བཅས་ཀྱི་ཡ་རབས་ཚུལ་ལྡན་གྱི་འཕེལ་རྒྱས་ལམ་བུའི་ཐོག་བསྐྱོད་དེ་ཀྲུང་ཧྭ་མི་རིགས་རྒྱུན་མཐུད་ངང་འཕེལ་རྒྱས་འགྲོ་བར་ཡངས་ཤིང་རྒྱ་ཆེ་བའི་མདུན་ལམ་བཏོད་ཡོད། རི་སྔོ་ཆུ་དྭངས་ནི་གསེར་རི་དངུལ་རི་ཡིན་པའི་འདུ་ཤེས་བརྟན་པོ་སྐྱེད་པ་དང་ལག་ལེན་བསྟར་ནས་རི་ཆུ་ནགས་ཞིང་མཚེའུ་རྩྭ་བྱེ་བཅས་གཞི་གཅིག་ཏུ་སྲུང་སྐྱོབ་དང་བརྒྱུད་རིམ་ལྡན་པའི་བཅོས་སྐྱོང་བྱ་རྒྱུ་རྒྱུན་འཁྱོངས་བྱས་ཏེ་སྐྱེ་ཁམས་སྔོན་ལ་འཇོག་པ་དང་། གྲོན་ཆུང་ལེགས་བསྡུས་ཞིབ་གཉེར། ལྗང་མདོག་ཐཱན་ཉུང་བཅས་ཀྱི་འཕེལ་རྒྱས་ལ་སྐུལ་འདེད་གཏོང་དགོས། འཕེལ་རྒྱས་གཏོང་སྟངས་ལྗང་མདོག་ཅན་དུ་མགྱོགས་སུ་བསྒྱུར་བ་དང་། སྐྱེ་ཁམས་མ་ལག་གི་སྣ་མང་རང་བཞིན་དང་། བརྟན་བརླིང་རང་བཞིན། རྒྱུན་མཐུད་རང་བཞིན་བཅས་ཆེ་རུ་གཏོང་དགོས། ཐཱན་རྩེར་སོན་དང་ཐཱན་སྙོམ་སྦྱོར་ལ་སྐུལ་འདེད་ཧུར་ཐག་དང་བརྟན་པོ་བཏང་སྟེ་སྤུས་ཚད་མཐོ་བའི་སྐྱེ་ཁམས་ཁོར་ཡུག་ལ་བརྟེན་ནས་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་བྱེད་དགོས།

ལྔ་པ། ཞི་བའི་འཕེལ་རྒྱས་ཀྱི་ལམ་བུའི་ཐོག་བསྐྱོད་པའི་དེང་རབས་ཅན། ཞི་བའི་འཕེལ་རྒྱས་རྒྱུན་འཁྱོངས་བྱས་ནས་འཛམ་གླིང་གི་ཞི་བདེ་དང་འཕེལ་རྒྱས་བློ་བརྟན་འགྱུར་མེད་ངང་སྲུང་སྐྱོང་བྱེད་པའི་ཁྲོད་རང་ངོས་འཕེལ་རྒྱས་དོན་གཉེར་བྱེད་པ་དང་། རང་ངོས་འཕེལ་རྒྱས་ལ་བརྟེན་ནས་འཛམ་གླིང་གི་ཞི་བདེ་དང་འཕེལ་རྒྱས་ལ་དེ་བས་ལེགས་པའི་སྒོ་ནས་སྲུང་སྐྱོང་བྱེད་པ། མིའི་རིགས་ཀྱི་ལས་དབང་གཅིག་མཐུན་ཚོགས་པ་བསྐྲུན་རྒྱུར་སྐུལ་འདེད་གཏོང་བ་བཅས་བྱ་རྒྱུ་ནི་ཀྲུང་གོའི་ལུགས་ཀྱི་དེང་རབས་ཅན་གྱི་མངོན་གསལ་དོད་པོའི་ཁྱད་ཆོས་ཤིག་རེད། ནུབ་ཕྱོགས་རྒྱལ་ཁབ་ཀྱི་དེང་རབས་ཅན་དུ་འགྱུར་བར་དམག་འཁྲུག་དང་། བྲན་གཡོག་ཚོང་བ། མི་སེར་སྤེལ་བ། འཕྲོག་བཅོམ་སོགས་ཁྲག་དྲི་བྲོ་བའི་ནག་ཉེས་ཀྱིས་ཁེངས་ཤིང་། རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་སྡུག་བསྔལ་ཆེན་པོ་བཟོས་ཡོད། ནུབ་ཕྱོགས་བཙན་དབང་རྒྱལ་ཁབ་ཀྱིས་བཙན་འཛུལ་དང་བརྙས་བཅོས་བྱས་པའི་ཡ་ང་བའི་ལོ་རྒྱུས་དེ་ཀྲུང་ཧྭ་མི་རིགས་ཀྱིས་བརྒྱུད་མྱོང་བ་དང་ཞི་བདེ་རྩ་ཆེན་ཡིན་པ་སེམས་གཏིང་ནས་ཤེས་ཀྱི་ཡོད་པས་ནུབ་ཕྱོགས་རྒྱལ་ཁབ་ཀྱི་ལམ་རྙིང་པར་བསྐྱར་ཟློས་གཏན་ནས་བྱེད་མི་སྲིད།

ཀྲུང་གོའི་ལུགས་ཀྱི་དེང་རབས་ཅན་གྱིས་རང་བཙན་རང་བདག་དང་རང་སྟོབས་རང་སྤེལ་རྒྱུན་འཁྱོངས་བྱེད་པ་དང་། མི་དམངས་ཡོངས་ཀྱི་དཀའ་སྤྱད་ངལ་རྩོལ་དང་གསར་གཏོད་གསར་སྐྲུན་ལ་བརྟེན་ནས་རང་ཉིད་འཕེལ་རྒྱས་དང་སྟོབས་ཆེར་གཏོང་བ་དང་། ནང་གནས་ཀྱི་སྒུལ་ཤུགས་སྐུལ་སློང་དང་ཕྱི་ཕྱོགས་ཀྱི་ཐོན་ཁུངས་ཞི་བའི་ངང་བེད་སྤྱོད་བྱ་རྒྱུ་ཟུང་འབྲེལ་བྱེད་པའི་བྱ་ཐབས་ལ་བརྟེན་ནས་རྒྱལ་ཁབ་འཕེལ་རྒྱས་ཡོང་བར་བྱེད་ཅིང་། རྣམ་པ་གང་རུང་གི་ཐོག་ནས་མི་རིགས་གཞན་དག་ལ་གཉའ་གནོན་དང་རྒྱལ་ཁབ་གཞན་གྱི་ཐོན་ཁུངས་དང་རྒྱུ་ནོར་འཕྲོག་བཅོམ་མི་བྱེད་པར། རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་ནུས་པས་ལྕོགས་ཚོད་ཀྱི་རྒྱབ་སྐྱོར་དང་རོགས་རམ་བྱེད་རྒྱུ་ཡིན། ང་ཚོས་ཐོག་མཐའ་བར་གསུམ་དུ་ཞི་བདེ་དང་། འཕེལ་རྒྱས། མཉམ་ལས། མཉམ་ཁེ་བཅས་ཀྱི་དར་ཆ་མཐོན་པོར་སྒྲེང་བ་དང་། གཉིས་ཁེ་གཉིས་ཕན་གྱི་སྒོ་འབྱེད་འཐབ་ཇུས་ལག་བསྟར་བྱས་ཏེ། རྒྱུན་ཆད་མེད་པར་ཀྲུང་གོའི་འཕེལ་རྒྱས་གསར་པས་འཛམ་གླིང་ལ་གོ་སྐབས་གསར་པ་འདོན་སྤྲོད་བྱེད་དགོས། གོ་ལ་ཧྲིལ་པོའི་བཅོས་སྐྱོང་མ་ལག་བསྒྱུར་བཅོས་དང་འཛུགས་སྐྲུན་བྱེད་པར་ཧུར་ཐག་ཞུགས་པ་དང་། ཕྱོགས་མང་རིང་ལུགས་ངོ་མ་ལག་བསྟར་བྱེད་པ། མིའི་རིགས་ཡོངས་ཀྱི་ཐུན་མོང་གི་རིན་ཐང་དར་སྤེལ་གཏོང་བ། གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ་དོན་འཁྱོལ་ཡོང་བར་སྐུལ་འདེད་གཏོང་བ་བཅས་བྱས་ཏེ་མིའི་རིགས་ཞི་བདེ་དང་འཕེལ་རྒྱས་ཡོང་བར་ཧུར་ཐག་གིས་ལེགས་སྐྱེས་སྔར་ལས་ཆེ་བ་འབུལ་དགོས།

ཀྲུང་གོ་གསར་པ་དབུ་བརྙེས་པ་དང་ལྷག་པར་དུ་བསྒྱུར་བཅོས་སྒོ་འབྱེད་བྱས་ཚུན། ང་ཚོས་ལོ་ངོ་བཅུ་ཕྲག་འགའི་དུས་ཚོད་སྤྱད་དེ་ནུབ་ཕྱོགས་ཀྱི་དར་རྒྱས་ཆེ་བའི་རྒྱལ་ཁབ་ཀྱིས་ལོ་ངོ་བརྒྱ་ཕྲག་དུ་མར་བསྐྱོད་མྱོང་བའི་བཟོ་ལས་ཅན་གྱི་ལོ་རྒྱུས་ལམ་བུར་བསྐྱོད་ཚར་ཡོད། དཔལ་འབྱོར་འཕེལ་རྒྱས་མགྱོགས་མྱུར་དང་སྤྱི་ཚོགས་ཡུན་རིང་བརྟན་བརླིང་ཡོང་བའི་བྱས་རྗེས་ངོ་མཚར་གསར་དུ་བསྐྲུན་པས། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་མདུན་ལྗོངས་རྒྱ་ཆེན་པོ་བཏོད་པ་རེད། ལག་ལེན་གྱི་ཐོག་ནས་ར་འཕྲོད་བྱུང་དོན། ཀྲུང་གོའི་ལུགས་ཀྱི་སྤྱི་ཚོགས་རིང་ལུགས་དེང་རབས་ཅན་གྱི་ཡང་དག་པའི་འགྲོ་ལམ་ཐོག་བསྐྱོད་པ་ནི་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་ཡོང་བའི་ཡང་དག་པའི་འགྲོ་ལམ་ཉག་ཅིག་ཡིན།

གནམ་ལྷ་རྒྱལ་གྱིས་བསྒྱུར།