ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་དགོས།

རྒྱལ་ཁབ་ཅིག་དེང་རབས་ཅན་གྱི་ཕྱོགས་སུ་སྐྱོད་པར་དེང་རབས་ཅན་གྱི་སྤྱིར་བཏང་གི་ཆོས་ཉིད་ལ་བརྩི་སྲུང་ཞུ་དགོས་པ་དང་། རང་རྒྱལ་ཁབ་ཀྱི་དོན་དངོས་དང་འཚམ་དགོས་ལ། རང་རྒྱལ་ཁབ་ཀྱི་ཁྱད་ཆོས་དེ་བས་ཀྱང་ལྡན་དགོས།”

“ཀྲུང་གོའི་ལུགས་ཀྱི་དེང་རབས་ཅན་ལ་རྒྱལ་ཁབ་ཁག་གི་དེང་རབས་ཅན་གྱི་ཐུན་མོང་གི་ཁྱད་ཆོས་ལྡན་ལ། རང་ཉིད་རྒྱལ་ཁབ་ཀྱི་གནས་ཚུལ་ལ་བརྟེན་པའི་མངོན་གསལ་དོད་པོའི་ཁྱད་ཆོས་དེ་བས་ཀྱང་ལྡན་ཡོད།”

“ལག་ལེན་གྱི་ཐོག་ནས་ར་འཕྲོད་བྱུང་དོན། ཀྲུང་གོའི་ལུགས་ཀྱི་སྤྱི་ཚོགས་རིང་ལུགས་དེང་རབས་ཅན་གྱི་ཡང་དག་པའི་འགྲོ་ལམ་ཐོག་བསྐྱོད་པ་ནི་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་ཡོང་བའི་ཡང་དག་པའི་འགྲོ་ལམ་ཉག་ཅིག་ཡིན།”

2023ལོའི་ཟླ་2ཚེས་7ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་ཨུ་ཡོན་ལྷན་ཁང་དུ་གསར་དུ་ཞུགས་པའི་ཨུ་ཡོན་དང་རྗེས་སྣོན་ཨུ་ཡོན། ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་བསྟར་བྱེད་པའི་བགྲོ་གླེང་འཛིན་གྲྭའི་ཐོག་གསུང་བཤད་གལ་ཆེན་གནང་སྟེ། ཀྲུང་གོའི་ལུགས་ཀྱི་དེང་རབས་ཅན་གྱི་རིགས་པའི་གཞུང་ལུགས་དང་ལག་ལེན་གྱི་གནད་དོན་གལ་ཆེན་རབ་དང་རིམ་པ་རྒྱས་བཤད་གཏིང་ཟབ་གནང་བས། ཀྲུང་གོའི་ལུགས་ཀྱི་དེང་རབས་ཅན་གྱི་རིགས་པའི་གཞུང་ལུགས་ཕུན་སུམ་ཇེ་ཚོགས་དང་འཕེལ་རྒྱས་ཆེན་པོ་བཏང་ཡོད། 《ཀྲུང་གོའི་ལུགས་ཀྱི་དེང་རབས་ཅན་ནི་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་ཡངས་ཤིང་རྒྱ་ཆེ་བའི་འགྲོ་ལམ་ཡིན་》ཞེས་པའི་རྩོམ་ཡིག་འདི་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་ཆ་ཤས་ཤིག་ཡིན། རྩོམ་ཡིག་གལ་ཆེན་འདིའི་ནང་སྤྱི་ཁྱབ་ཧྲུའུ་ཅི་ཡིས་“མི་འབོར་གྱི་གཞི་ཁྱོན་ཧ་ཅང་ཆེ་བའི་དེང་རབས་ཅན་”དང་། “མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བའི་དེང་རབས་ཅན།” “དངོས་པོའི་དཔལ་ཡོན་དང་བསམ་པའི་དཔལ་ཡོན་ཕན་ཚུན་མཐུན་སྦྱོར་བྱེད་པའི་དེང་རབས་ཅན།” “མི་དང་རང་བྱུང་ཁམས་ཞི་མཐུན་མཉམ་གནས་ཀྱི་དེང་རབས་ཅན།” “ཞི་བའི་འཕེལ་རྒྱས་ཀྱི་ལམ་བུའི་ཐོག་བསྐྱོད་པའི་དེང་རབས་ཅན་”བཅས་ཕྱོགས་5ཡི་ཐད་ནས་ཀྲུང་གོའི་ལུགས་ཀྱི་དེང་རབས་ཅན་གྱི་ཀྲུང་གོའི་ཁྱད་ཆོས་ལ་རྒྱས་འགྲེལ་གཏིང་ཟབ་གནང་ཡོད། ཚན་རིག་དང་མཐུན་པའི་སྒོ་ནས་“ཀྲུང་གོའི་ཁྱད་ཆོས་དེ་གྲུབ་འབྲས་ལྡན་པའི་ལག་ལེན་དུ་བསྒྱུར་བ་”དང་། “མངོན་གསལ་དོད་པའི་ཁྱད་ཆོས་དེ་ཐུན་མོང་མ་ཡིན་པའི་དགེ་མཚན་དུ་བསྒྱུར་བའི་”མངོན་འགྱུར་ཐབས་ལམ་གསལ་སྟོན་གནང་བས། ཆབ་སྲིད་རང་བཞིན་དང་རིགས་པའི་གཞུང་ལུགས་ཀྱི་རང་བཞིན། དམིགས་གཏད་ཀྱི་རང་བཞིན། སློབ་སྟོན་རང་བཞིན་བཅས་ཤུགས་ཆེན་ལྡན་ཡོད།

ཏང་གི་ཚོགས་ཆེན་ཉི་ཤུ་པའི་སྙན་ཞུའི་ནང་གསལ་པོར་བསྟན་དོན། དུས་རབས་གསར་པ་དང་འཐབ་ལམ་གསར་པའི་ཀྲུང་གོའི་གུང་ཁྲན་ཏང་གི་ལྟེ་བའི་ལས་འགན་ནི་“རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་བསྐྲུན་ཚར་བར་བྱེད་པ་དང་། ལོ་བརྒྱ་གཉིས་པའི་འབད་འཐབ་དམིགས་འབེན་མངོན་འགྱུར་བྱེད་པ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་བ་བཅས་ཡིན།” རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་བརྗིད་ཆེ་བའི་དམིགས་འབེན་གྱིས་མི་རྣམས་ལ་སྐུལ་ལྕག་ཐེབས་སུ་འཇུག་པ་དང་དཔའ་མཛངས་རྟུལ་ཕོད་ཀྱིས་མདུན་དུ་སྐྱོད་པའི་སྙིང་སྟོབས་སྟེར་གྱི་ཡོད། འོད་སྟོང་ལྡན་པའི་མདུན་ལྗོངས་ནི་ལས་འགན་ལྕི་ཞིང་ལམ་ཐག་རིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྩོམ་ཡིག་གལ་ཆེན་འདིའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱ་རྒྱུ་དེ་ཏང་གི་ཚོགས་ཆེན་ཉི་ཤུ་པའི་དགོངས་དོན་དང་སྤྱི་ཁྱབ་ཧྲུའུ་ཅིའི་གསུང་བཤད་གལ་ཆེན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱ་རྒྱུ་དང་ཟུང་འབྲེལ་དང་། ཏང་ཡོངས་སུ་སྤེལ་བཞིན་པའི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱེད་པའི་བརྗོད་དོན་གཙོ་བོའི་སློབ་གསོ་དང་ཟུང་འབྲེལ་བྱས་ཏེ། བློ་བརྟན་འགྱུར་མེད་ངང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སྤྱད་དེ་བློ་སྒྲིམ་སེམས་སྐྱེད་དང་། བློ་བརྟན་འགྱུར་མེད་ངང་རང་ཉིད་ཀྱི་ལམ་བུར་བསྐྱོད་པ། བློ་རྩེ་གཅིག་སྒྲིམ་ངང་རང་ཉིད་ཀྱི་ལས་དོན་ཡག་པོ་བསྒྲུབས་པ་བཅས་བྱས་ནས་ཀྲུང་གོའི་ལུགས་ཀྱི་དེང་རབས་ཅན་གྱི་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་ཡང་དག་པའི་འགྲོ་ལམ་ཉག་ཅིག་འདི་དེད་ནས་གོམ་སྟབས་ཆེན་པོས་མདུན་སྐྱོད་བྱེད་པ་དང་། ཀྲུང་གོའི་ལུགས་ཀྱི་དེང་རབས་ཅན་གྱི་མཛེས་སྡུག་ལྡན་པའི་མདུན་ལྗོངས་དེ་གོམ་པ་རེ་རེ་བཞིན་དོན་དངོས་སུ་འགྱུར་བ་བྱེད་དགོས།

“ཀྲུང་གོའི་ལུགས་ཀྱི་དེང་རབས་ཅན་ཤར་གཏོང་ཐུབ་པ་དང་བརྟན་པོ་ཡོང་བ།”

“ཚང་མ་ཁྲེང་ཏུའུ་ཡི་ཁྲོམ་གཞུང་དུ་ཕེབས་ནས་ཀྲུང་གོའི་ལུགས་ཀྱི་དེང་རབས་ཅན་གྱི་རྣམ་པ་ཁྲི་སྟོང་མང་པོ་ཉམས་སུ་མྱོང་བ་དང་མཉམ་སྤྱོད་བྱེད་པར་དགའ་བསུ་ཞུ་རྒྱུ་ཡིན།” 2023ལོའི་ཟླ་7ཚེས་28ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁྲེང་ཏུའུ་ཡི་སྐབས་31པའི་འཛམ་གླིང་སློབ་ཆེན་སློབ་མའི་དབྱར་དུས་ལུས་རྩལ་འགྲན་ཚོགས་ཀྱི་འགོ་ཚུགས་མཛད་སྒོར་ཞུགས་མཁན་གྱི་རྒྱལ་སྤྱིའི་སྐུ་མགྲོན་ལ་ལྷག་བསམ་ཟོལ་མེད་ཀྱིས་གདན་ཞུ་གནང་།

ཁུན་ཕེང་གིས་གཤོག་ཟུང་བརྐྱངས་འདྲའི་ཀོང་ཏུང་དང་ཞང་ཀང་། ཨའོ་མོན་བཅས་ཀྱི་ཁུག་ཆེན་ཁུལ་དུ་ཟམ་ཆེན་མཐོན་པོ་བཞེངས་ཤིང་མྱུར་བགྲོད་མེ་འཁོར་འཕུར་བ་ལྟར་རྒྱུག། ཡར་ངོའི་ཟླ་ལྟར་འཕེལ་བའི་ཞུང་ཨན་ཁུལ་གསར་དུ། འཕྲུལ་ཆས་ཀྱི་ལྡིར་སྒྲ་གྲག་ཅིང་ལྕོག་མཐོ་ལྗིད་འདེགས་འཕྲུལ་འཁོར་ཚར་དུ་དངར། ཡུལ་ལྗོངས་རི་མོ་ལྟར་མཛེས་པའི་ཝུའུ་ལིའང་སུའུ་མཚོ་རུ། བྱ་བརྒྱ་གར་དུ་རྩེན་ཞིང་རྦ་རླབས་གཡོ། འབད་བརྩོན་ཆེན་པོས་གྲུ་གཡོར་བསྒྲེངས་བའི་འབྲི་ཆུའི་ཟུར་གསུམ་གླིང་དུ། གཙང་པོ་དང་རྒྱ་མཚོ་འདྲེས་ཤིང་ཆུ་བོ་དང་མཚེའུ་གཅིག་ཏུ་སྦྲེལ། སྤྱི་ལེ་གྲུ་བཞི་མ་ཁྲི་960ལྷག་ཙམ་ཡོད་པའི་ཀྲུང་གོའི་ས་གཞི་ཆེན་མོར་རྒྱང་ལྟ་བྱས་ཚེ། གང་སར་དཔའ་ངར་ཆེར་སྐྱེད་ཀྱིས་མདུན་སྐྱོད་དང་སྐྱེ་སྟོབས་ཀྱི་དཔལ་འབར་བའི་རྣམ་པ་མངོན་པ་དང་། ཀྲུང་གོའི་མི་དམངས་དུང་ཕྱུར་14ལྷག་ཙམ་དེང་རབས་ཅན་གྱི་རྒྱལ་ཁབ་སྟོབས་ལྡན་དུ་ཕྱོགས་པའི་ཡངས་ཤིང་རྒྱ་ཆེ་བའི་འགྲོ་ལམ་དུ་བསྐྱོད་ཀྱི་ཡོད།

དེང་རབས་ཅན་མངོན་འགྱུར་བྱ་རྒྱུ་ནི་ཉེ་རབས་ནས་བཟུང་ཀྲུང་གོའི་མི་དམངས་ཀྱིས་འབད་བརྩོན་ལྷོད་མེད་བྱ་རྒྱུའི་ཕུགས་འདུན་ཡིན་ཞིང་། ཀྲུང་གོའི་ལུགས་ཀྱི་དེང་རབས་ཅན་ནི་ང་ཚོའི་ཏང་གིས་རྒྱལ་ཡོངས་མི་རིགས་ཁག་གི་མི་དམངས་ལ་འགོ་ཁྲིད་བྱས་ཏེ་ཡུན་རིང་པོའི་འཚོལ་ཞིབ་དང་ལག་ལེན་ནང་དཀའ་སྡུག་ཚད་མེད་མྱངས་པ་དང་རིན་དོད་ཧ་ཅང་ཆེན་པོ་བཏང་ནས་ཐོབ་པའི་གྲུབ་འབྲས་གལ་ཆེན་ཞིག་ཡིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱི་སྣེ་ཁྲིད་དེ་ཞུན་བརྡར་མདུན་སྐྱོད་བྱས་པ་དང་། ཀྲུང་གོ་གསར་པ་དབུ་བརྙེས་པ་དང་ལྷག་པར་དུ་བསྒྱུར་བཅོས་སྒོ་འབྱེད་བྱས་ཚུན་གྱི་ཡུན་རིང་པོའི་འཚོལ་ཞིབ་དང་ལག་ལེན་གྱི་རྨང་གཞིའི་སྟེང་ངོས་འཛིན་ཐད་རྒྱུན་ཆད་མེད་པར་གཏིང་ཟབ་ཏུ་བཏང་བ་དང་། འཐབ་ཇུས་ཐད་རྒྱུན་ཆད་མེད་པར་འཐུས་སྒོ་ཚང་དུ་བཏང་བ། ལག་ལེན་ཐད་རྒྱུན་ཆད་མེད་པར་ཕུན་སུམ་ཇེ་ཚོགས་སུ་བཏང་བ་བཅས་ཀྲུང་གོའི་ལུགས་ཀྱི་དེང་རབས་ཅན་ལ་བདེ་བླག་ངང་སྐུལ་འདེད་གཏོང་བ་དང་རྒྱ་སྐྱེད་བཏང་ཡོད།

ཏང་གི་ཚོགས་ཆེན་ཉི་ཤུ་པའི་སྙན་ཞུའི་ནང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པ་དང་། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་སྐུལ་འདེད་གཏོང་བའི་བརྗིད་ཆེའི་འཆར་གཞི་བཀོད་པ་དང་། ཀྲུང་གོའི་ལུགས་ཀྱི་དེང་རབས་ཅན་གྱི་རིགས་པའི་གཞུང་ལུགས་སྙིང་བསྡུས་ཀྱིས་བཏོན་པ་མ་ཟད་གཏིང་ཟབ་མོའི་སྒོ་ནས་རྒྱས་འགྲེལ་བྱས་པ་སྟེ། ཀྲུང་གོའི་ལུགས་ཀྱི་དེང་རབས་ཅན་གྱི་ཀྲུང་གོའི་ཁྱད་ཆོས་དང་། ངོ་བོའི་བླང་བྱ། ངེས་པར་དུ་ཁོང་དུ་བརྟན་པོར་ཆུད་དགོས་པའི་རྩ་དོན་གལ་ཆེན་བཅས་ལ་ཚན་རིག་དང་མཐུན་པའི་སྒོ་ནས་རྒྱས་འགྲེལ་བྱས་པ་རེད། དེའི་རྗེས་སུ་ཚོགས་འདུ་གལ་ཆེན་དང་ཡུལ་དུས་གལ་ཆེན་རབ་དང་རིམ་པར་སྤྱི་ཁྱབ་ཧྲུའུ་ཅིས་ཡང་བསམ་བློ་གསར་པ་དང་ལྟ་བ་གསར་པ། ཆོད་གཏམ་གསར་པ་བཅས་རབ་དང་རིམ་པ་བཏོན་ནས་ཀྲུང་གོའི་ལུགས་ཀྱི་དེང་རབས་ཅན་གྱི་གལ་ཆེ་བའི་རིགས་པའི་གཞུང་ལུགས་དང་ལག་ལེན་གྱི་གནད་དོན་ལ་རྒྱུད་རིམ་ལྡན་པའི་སྒོ་ནས་རྒྱས་འགྲེལ་གནང་བ་རེད།

——ཀྲུང་གོའི་ལུགས་ཀྱི་དེང་རབས་ཅན་གྱི་ངོ་བོ་གཏན་འཁེལ་སྐོར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ཀྲུང་གོའི་ལུགས་ཀྱི་དེང་རབས་ཅན་ནི་ཀྲུང་གོའི་གུང་ཁྲན་ཏང་གིས་འགོ་ཁྲིད་བྱེད་པའི་སྤྱི་ཚོགས་རིང་ལུགས་ཀྱི་དེང་རབས་ཅན་ཡིན་པ་”དང་། “ཏང་གི་འགོ་ཁྲིད་ནི་ཀྲུང་གོའི་ལུགས་ཀྱི་དེང་རབས་ཅན་གྱི་རྩ་བའི་ཁ་ཕྱོགས་དང་མདུན་ལམ་ལས་དབང་། མཐའ་མཇུག་གི་རྒྱལ་ཕམ་སོགས་དང་ཐད་ཀར་འབྲེལ་བ་ཡོད་”ཅེས་ནན་གསུང་གནང་བ་དང་། “ཏང་གི་འགོ་ཁྲིད་ཀྱིས་ཀྲུང་གོའི་ལུགས་ཀྱི་དེང་རབས་ཅན་གྱི་རྩ་བའི་ངོ་བོ་གཏན་འཁེལ་བྱེད་པ་”དང་། “ཏང་གི་འགོ་ཁྲིད་ཀྱིས་ཀྲུང་གོའི་ལུགས་ཀྱི་དེང་རབས་ཅན་གྱི་འབད་འཐབ་དམིགས་འབེན་བརྟན་པོའི་སྒོ་ནས་རྒྱང་རིང་དུ་སྐྱོད་རྒྱུ་འགན་ལེན་བྱེད་ཅིང་།” “ཏང་གི་འགོ་ཁྲིད་ཀྱིས་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་བྱེད་པར་སྒུལ་ཤུགས་ཆེན་པོ་འཕེལ་བར་བྱེད་ལ།” “ཏང་གི་འགོ་ཁྲིད་ཀྱིས་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་བྱེད་པའི་སྟོབས་ཤུགས་ཆེན་པོ་གཅིག་ཏུ་བསྒྲིལ་ཡོད”ཅེས་ནན་གསུང་གནང་ཡོད།

——ཀྲུང་གོའི་ལུགས་ཀྱི་དེང་རབས་ཅན་གྱི་ཀྲུང་གོའི་ཁྱད་ཆོས་སྐོར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གོའི་ལུགས་ཀྱི་དེང་རབས་ཅན་ནི་“མི་འབོར་གྱི་གཞི་ཁྱོན་ཧ་ཅང་ཆེ་བའི་དེང་རབས་ཅན་དང་། མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བའི་དེང་རབས་ཅན། དངོས་པོའི་དཔལ་ཡོན་དང་བསམ་པའི་དཔལ་ཡོན་མཐུན་སྦྱོར་བྱེད་པའི་དེང་རབས་ཅན། མི་དང་རང་བྱུང་ཁམས་ཞི་མཐུན་མཉམ་གནས་ཀྱི་དེང་རབས་ཅན། ཞི་བའི་འཕེལ་རྒྱས་ཀྱི་ལམ་བུའི་ཐོག་བསྐྱོད་པའི་དེང་རབས་ཅན་བཅས་ཡིན་”ཞེས་ནན་གསུང་གནང་བ་དང་། “འདི་ནི་རིགས་པའི་གཞུང་ལུགས་སྙིང་བསྡུས་བྱས་པ་ཞིག་ཡིན་ལ། ལག་ལེན་གྱི་བླང་བྱའང་ཡིན་པས། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་འཛུགས་སྐྲུན་བྱེད་པ་དང་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་ཡོང་བར་ཡངས་ཤིང་རྒྱ་ཆེ་བའི་འགྲོ་ལམ་ཞིག་གསལ་སྟོན་བྱས་ཡོད་”ཅེས་ནན་གསུང་གནང་ཡོད།

——ཀྲུང་གོའི་ལུགས་ཀྱི་དེང་རབས་ཅན་གྱི་ངོ་བོའི་བླང་བྱ་སྐོར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ཀྲུང་གོའི་ལུགས་ཀྱི་དེང་རབས་ཅན་གྱི་ངོ་བོའི་བླང་བྱ་ནི། ཀྲུང་གོའི་གུང་ཁྲན་ཏང་གི་འགོ་ཁྲིད་རྒྱུན་འཁྱོངས་བྱེད་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་བྱེད་པ། སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་པ། བརྒྱུད་རིམ་ཧྲིལ་པོའི་མི་དམངས་དམངས་གཙོ་འཕེལ་རྒྱས་གཏོང་བ། མི་དམངས་ཀྱི་བསམ་པའི་འཇིག་རྟེན་ཕུན་སུམ་ཚོགས་སུ་གཏོང་བ། མི་དམངས་ཡོངས་རྫོགས་མཉམ་དུ་ཕྱུག་འགྱུར་ཡོང་བར་བྱེད་པ། མི་དང་རང་བྱུང་ཁམས་ཞི་མཐུན་མཉམ་གནས་ཡོང་བར་སྐུལ་འདེད་གཏོང་བ། མིའི་རིགས་ཀྱི་ལས་དབང་གཅིག་མཐུན་ཚོགས་པ་བསྐྲུན་པར་སྐུལ་འདེད་གཏོང་བ། མིའི་རིགས་ཀྱི་ཤེས་དཔལ་གྱི་རྣམ་པ་གསར་པ་གཏོད་པ་བཅས་ཡིན་”ཞེས་ནན་གསུང་གནང་བ་དང་། “སྙིང་བསྡུས་འདི་ནི་ཏང་གིས་རང་རྒྱལ་དང་འཛམ་གླིང་གི་རྒྱལ་ཁབ་གཞན་དག་གི་དེང་རབས་ཅན་འཛུགས་སྐྲུན་བྱེད་པའི་ལོ་རྒྱུས་ཀྱི་ཉམས་མྱོང་ཕྱོགས་བསྡོམས་གཏིང་ཟབ་བྱས་ཏེ། རང་རྒྱལ་ལྟ་བུའི་ཤར་ཕྱོགས་ཀྱི་རྒྱལ་ཁབ་ཆེན་པོ་ཞིག་གིས་ཇི་ལྟར་བྱས་ནས་མགྱོགས་མྱུར་ངང་དེང་རབས་ཅན་དུ་མངོན་འགྱུར་ཡོང་བ་བྱེད་པའི་ངོས་འཛིན་ཐད་རྒྱུན་ཆད་མེད་པར་གཏིང་ཟབ་ཏུ་གཏོང་བ་དང་འཐབ་ཇུས་ཐད་རྒྱུན་ཆད་མེད་པར་འཐུས་སྒོ་ཚང་དུ་གཏོང་བ། ལག་ལེན་རྒྱུན་ཆད་མེད་པར་ཕུན་སུམ་ཇེ་ཚོགས་སུ་བཏང་བ་བཅས་ལས་བྱུང་བའི་བསམ་བློ་དང་རིགས་པའི་གཞུང་ལུགས་ཀྱི་ཉིང་བཅུད་ཡིན་ལ། ང་ཚོས་གོ་བ་གཏིང་ཟབ་ལེན་པ་དང་རྒྱུད་རིམ་ལྡན་པའི་སྒོ་ནས་ཁོང་དུ་ཆུད་པ་དང་། ལྷག་པར་དུ་ངོ་བོའི་བླང་བྱ་འདི་ལས་དོན་ཁག་གི་ནང་དོན་ཐོག་ཏུ་འཁྱོལ་བར་བྱེད་དགོས་”ཞེས་ནན་གསུང་གནང་ཡོད།

——ཀྲུང་གོའི་ལུགས་ཀྱི་དེང་རབས་ཅན་གྱིས་ངེས་པར་དུ་དམ་པོར་འཛིན་དགོས་པའི་རྩ་དོན་གལ་ཆེན་སྐོར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་རྒྱུ་ནི་སྔར་བྱུང་མ་མྱོང་བའི་གསར་གཏོད་ཀྱི་རང་བཞིན་ལྡན་པའི་བྱ་གཞག་ཅིག་ཡིན་པ་”དང་། མདུན་སྐྱོད་ཀྱི་ལམ་བུའི་ཐོག་ངེས་པར་དུ་གཤམ་གསལ་གྱི་གལ་ཆེ་བའི་རྩ་དོན་ཁག་དམ་པོར་འཛིན་དགོས་པ་སྟེ། “ཏང་གིས་ཕྱོགས་ཡོངས་ལ་འགོ་ཁྲིད་བྱ་རྒྱུ་རྒྱུན་འཁྱོངས་དང་དེར་ཤུགས་རྒྱག་པ་”དང་། “ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་རྒྱུན་འཁྱོངས།” “མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་རྒྱུན་འཁྱོངས།” “བསྒྱུར་བཅོས་སྒོ་འབྱེད་གཏིང་ཟབ་ཏུ་གཏོང་རྒྱུ་རྒྱུན་འཁྱོངས།” “འཐབ་རྩོད་ཀྱི་སྙིང་སྟོབས་དར་སྤེལ་གཏོང་རྒྱུ་རྒྱུན་འཁྱོངས་བཅས་བྱེད་དགོས་”ཞེས་ནན་གསུང་གནང་ཡོད།

——ཀྲུང་གོའི་ལུགས་ཀྱི་དེང་རབས་ཅན་ནི་མིའི་རིགས་ཀྱི་ཤེས་དཔལ་གྱི་རྣམ་པ་གསར་རྐྱང་ཞིག་ཡིན་པའི་སྐོར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ཀྲུང་གོའི་ལུགས་ཀྱི་དེང་རབས་ཅན་ནི་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་སུ་རྩ་བ་ཚུགས་པ་དང་། ཚན་རིག་སྤྱི་ཚོགས་རིང་ལུགས་ཀྱི་སྔོན་ཐོན་གྱི་ངོ་བོ་མངོན་པ། མིའི་རིགས་ཀྱི་ཤེས་དཔལ་གྱི་གྲུབ་འབྲས་ཕུལ་བྱུང་མཐའ་དག་དཔྱད་གཞིར་འཛིན་པ་དང་བསྡུ་ལེན་བྱེད་པ། མིའི་རིགས་ཀྱི་ཤེས་དཔལ་ཡར་ཐོན་ཡོང་བའི་འཕེལ་རྒྱས་ཀྱི་ཁ་ཕྱོགས་མཚོན་པ་བཅས་བྱས་ཏེ་ནུབ་ཕྱོགས་ཀྱི་དེང་རབས་ཅན་གྱི་དཔེ་དབྱིབས་དང་མི་འདྲ་བའི་རྣམ་པ་གསར་པ་ཞིག་མངོན་ཡོད། འདི་ནི་མིའི་རིགས་ཀྱི་ཤེས་དཔལ་གྱི་རྣམ་པ་གསར་རྐྱང་ཞིག་ཡིན་”ཞེས་ནན་གསུང་གནང་བ་དང་། “ཀྲུང་གོའི་ལུགས་ཀྱི་དེང་རབས་ཅན་གྱིས་‘དེང་རབས་ཅན་=ནུབ་ཕྱོགས་ཅན་’གྱི་བསམ་ཕྱོགས་གཏོར་ནས་དེང་རབས་ཅན་གྱི་རྣམ་པ་གཞན་ཞིག་མངོན་པ་དང་། འཕེལ་རྒྱས་འགྲོ་བཞིན་པའི་རྒྱལ་ཁབ་དེང་རབས་ཅན་གྱི་ཕྱོགས་སུ་སྐྱོད་པའི་ཐབས་ལམ་གདམ་ཀ་རྒྱ་ཆེར་བཏང་སྟེ། མིའི་རིགས་ཀྱིས་སྤྱི་ཚོགས་ཀྱི་ལམ་ལུགས་དེ་བས་ལེགས་པ་འཚོལ་ཞིབ་བྱ་རྒྱུར་ཀྲུང་གོའི་ཇུས་གཞི་མཁོ་འདོན་བྱས་ཡོད་”ཅེས་ནན་གསུང་གནང་ཞིང་། “ཀྲུང་གོའི་ལུགས་ཀྱི་དེང་རབས་ཅན་དེ་མིའི་རིགས་ཀྱི་ཤེས་དཔལ་གྱི་རྣམ་པ་གསར་རྐྱང་ཞིག་ཡིན་པའི་ངོས་ནས་གོ་ལ་ཧྲིལ་པོའི་ཤེས་དཔལ་གཞན་དག་དང་ཕན་ཚུན་དཔྱད་གཞིར་འཛིན་ན། འཛམ་གླིང་ཤེས་རིག་གི་སྐྱེད་ཚལ་སྣ་མང་ཕུན་སུམ་ཇེ་ཚོགས་སུ་གཏོང་ཐུང་ངེས་རེད་”ཅེས་ནན་གསུང་གནང་ཡོད།

——ཀྲུང་གོའི་ལུགས་ཀྱི་དེང་རབས་ཅན་སྐུལ་འདེད་གཏོང་བར་འབྲེལ་བ་གལ་ཆེན་རབ་དང་རིམ་པ་ཐག་གཅོད་ཡང་དག་བྱེད་དགོས་པའི་སྐོར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་རྒྱུ་ནི་རྒྱུད་རིམ་ལྡན་པའི་ལས་གྲྭ་ཞིག་ཡིན་པས་གཅིག་གྱུར་འཆར་འགོད་དང་ཕྱོགས་ཡོངས་ལ་ལྟ་རྟོག །རྒྱུད་རིམ་ལྡན་པའི་ཇུས་འགོད། ཁྱོན་ཡོངས་ལ་སྐུལ་འདེད་གཏོང་བ་བཅས་བྱེད་དགོས་པ་དང་། རྩེ་རིམ་ཇུས་འགོད་དང་ལག་ལེན་འཚོལ་ཞིབ། འཐབ་ཇུས་དང་ཐབས་ཇུས། བདེན་སྲུང་དང་གསར་གཏོད། ལས་ཕྱོད་དང་དྲང་སྙོམས། གསོན་ཤུགས་དང་སྒྲིག་ལམ། རང་སྟོབས་རང་སྤེལ་དང་ཕྱི་ཕྱོགས་ལ་སྒོ་མོ་འབྱེད་པ་སོགས་ཀྱི་འབྲེལ་བ་གལ་ཆེན་རབ་དང་རིམ་པ་ཐག་གཅོད་ཡང་དག་པ་བྱེད་དགོས་”ཞེས་ནན་གསུང་གནང་ཡོད།

——འཛམ་གླིང་གི་“དེང་རབས་ཅན་གྱི་དྲི་བ་”ཡི་ཕྱོགས་ཀྱི་ཀྲུང་གོའི་ཇུས་གཞི་སྐོར། “ང་ཚོར་ཡང་སྙིང་དེང་རབས་ཅན་ཅི་འདྲ་ཞིག་དགོས་སམ། ཇི་ལྟར་བྱས་ན་དེང་རབས་ཅན་མངོན་འགྱུར་བྱེད་ཐུབ་བམ་”ཞེས་པ་སོགས་དེང་རབས་ཅན་གྱི་དྲི་བ་རབ་དང་རིམ་པར་ཁ་གཏད་དེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་གནང་དོན། “མི་དམངས་བླ་ན་མེད་པའི་འདུ་ཤེས་བརྟན་སྲུང་བྱས་ནས་དེང་རབས་ཅན་དུ་འགྱུར་བའི་ཁ་ཕྱོགས་ཀྱི་མི་དམངས་རང་བཞིན་མངོན་གསལ་དོད་དགོས་པ་”དང་། “རང་བཙན་རང་བདག་གི་རྩ་དོན་འཛིན་སྲུང་བྱས་ནས་དེང་རབས་ཅན་གྱི་འགྲོ་ལམ་སྣ་མང་རང་བཞིན་འཚོལ་ཞིབ་བྱེད་དགོས་པ།” “བདེན་སྲུང་གསར་གཏོད་ཀྱི་འདུ་ཤེས་འཆང་ནས་དེང་རབས་ཅན་དུ་འགྱུར་བའི་འཕེལ་རིམ་གྱི་རྒྱུན་མཐུད་རང་བཞིན་མཐའ་འཁྱོངས་བྱེད་དགོས་པ།” “རང་གཞན་གཉིས་ཕན་གྱི་སྙིང་སྟོབས་དར་སྤེལ་བཏང་ནས་དེང་རབས་ཅན་གྱི་གྲུབ་འབྲས་ཀྱི་ཀུན་ཕན་རང་བཞིན་ཆེ་རུ་གཏོང་དགོས་པ།” “འབད་འབུངས་ཡར་བརྩོན་གྱི་ཉམས་འགྱུར་མཐའ་འཁྱོངས་བྱས་ནས་དེང་རབས་ཅན་གྱི་འགོ་ཁྲིད་ཀྱི་བློ་བརྟན་འགྱུར་མེད་རང་བཞིན་འགན་ལེན་བྱེད་དགོས་པ་”བཅས་སོ།།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གསར་གཏོད་རང་བཞིན་ལྡན་པའི་སྒོ་ནས་བཏོན་པ་དང་རྒྱས་འགྲེལ་ཟབ་མོ་གནང་བའི་ཀྲུང་གོའི་ལུགས་ཀྱི་དེང་རབས་ཅན་གྱི་རིགས་པའི་གཞུང་ལུགས་ནི་ཀྲུང་གོའི་རྒྱལ་ཁབ་ཀྱི་གནས་ཚུལ་དང་ཀྲུང་གོའི་དོན་དངོས་ལ་གཞིགས་པའི་རིགས་པའི་གཞུང་ལུགས་ཀྱི་གསར་གཏོད་གལ་ཆེན་དང་། གོ་ལ་ཧྲིལ་པོའི་དེང་རབས་ཅན་གྱི་རིགས་པའི་གཞུང་ལུགས་ཀྱི་གསར་གཏོད་གལ་ཆེན། ཚན་རིག་དང་མཐུན་པའི་སྤྱི་ཚོགས་རིང་ལུགས་ཀྱི་གྲུབ་འབྲས་གལ་ཆེན་གསར་ཤོས་བཅས་ཡིན་ལ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སྔར་བས་ཕུན་སུམ་ཇེ་ཚོགས་དང་འཕེལ་རྒྱས་སུ་བཏང་སྟེ། ཏང་ཡོངས་དང་རྒྱལ་ཡོངས་མི་དམངས་ཀྱིས་ཀྲུང་གོའི་ལུགས་ཀྱི་དེང་རབས་ཅན་ལ་ཡང་དག་པའི་ངོས་འཛིན་དང་སྐུལ་འདེད་གཏོང་བར་རྩ་བའི་གཞི་འཛིན་ས་མཁོ་འདོན་གནང་ཡོད།

“མིའི་རིགས་ཀྱི་ལོ་རྒྱུས་ཐོག་གཞི་ཁྱོན་ཆེ་ཤོས་ཀྱི་དེང་རབས་ཅན།”

“ང་ཚོ་ནི་མི་གྲངས་ཁྲི་བཅུ་ཕྲག་ཁ་ཤས་དང་། མི་གྲངས་ཁྲི་བརྒྱ་ཕྲག་ཁ་ཤས། མི་གྲངས་ཁྲི་སྟོང་ཕྲག་ཁ་ཤས་བཅས་ཀྱི་དེང་རབས་ཅན་དང་མི་འདྲ་ཞིང་། མི་འབོར་དུང་ཕྱུར་14ལྷག་ཙམ་གྱི་དེང་རབས་ཅན་ཡིན།”

2022ལོའི་ཟླ་10ཚེས་17ཉིན། ཏང་གི་ཚོགས་ཆེན་ཉི་ཤུ་པའི་ཀོང་ཞིའི་འཐུས་མི་ཚོགས་པའི་གྲོས་བསྡུར་ནང་ཞུགས་སྐབས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ང་ཚོའི་དེང་རབས་ཅན་ནི་དཀའ་ཁག་ཆེ་ཤོས་ཡིན་ལ་རླབས་ཆེ་ཤོས་ཀྱང་ཡིན་”ཞེས་ཚོར་སྣང་ཟབ་མོའི་སྒོ་ནས་གསུངས།

མི་འབོར་གྱི་གཞི་ཁྱོན་མི་འདྲ་བས་དེང་རབས་ཅན་གྱི་ལས་འགན་ཡང་མི་འདྲ་ལ། དེའི་དཀའ་ཚེགས་རང་བཞིན་དང་རྙོག་འཛིང་རང་བཞིན་ཡང་མི་འདྲ། འཕེལ་རྒྱས་གཏོང་ཐབས་དང་སྐུལ་སྤེལ་བྱེད་སྟངས་ལ་ཡང་རང་ཉིད་ཀྱི་ཁྱད་ཆོས་ཡོད་ངེས་རེད། དུས་རབས་18པའི་དུས་སྨད་དུ་དབྱིན་ཇིས་དེང་རབས་ཅན་འགོ་རྩོམ་སྐབས་མི་འབོར་ནི་ཁྲི་སྟོང་ཕྲག་གི་ཚད་ཡིན་ཞིང་། དུས་རབས་20པའི་རྗེས་སུ་ཨ་མེ་རི་ཀ་རིམ་བཞིན་དེང་རབས་ཅན་གྱི་མདུན་གྲལ་དུ་སླེབས་སྐབས་མི་འབོར་དུང་ཕྱུར་ལས་བརྒལ་བ་དང་། ཀྲུང་གོའི་ལུགས་ཀྱི་དེང་རབས་ཅན་ནི་མི་གྲངས་དུང་ཕྱུར་14ལྷག་གི་དེང་རབས་ཅན་ཡིན། མི་འབོར་གྱི་གཞི་ཁྱོན་ཧ་ཅང་ཆེ་བས་རང་རྒྱལ་གྱི་དེང་རབས་ཅན་ནི་ངེས་པར་དུ་རང་ཉིད་ལ་དབང་བའི་འགྲོ་ལམ་ཞིག་ཏུ་བསྐྱོད་དགོས་པ་ཐག་གིས་བཅད་པ་རེད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་དབུལ་བྲལ་འགག་སྒྲོལ་གྱི་དམག་འཐབ་ལ་རྒྱལ་ཁ་ཐོབ་པ་དང་། གྲོང་གསེབ་ཀྱི་མི་འབོར་དབུལ་པོ་དུང་ཕྱུར་1ཙམ་དབུལ་སྒྲོལ་ཐུབ་ནས་དུས་བཀག་ལྟར་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་ཚར་བྱས་ཡོད། མི་ལྟེ་བར་འཛིན་པའི་གྲོང་ཁྱེར་དང་གྲོང་རྡལ་ཅན་གསར་པར་སྐུལ་འདེད་ཧུར་ཐག་བཏང་ནས་རྒྱུན་སྡོད་མི་འབོར་གྲོང་ཁྱེར་དང་གྲོང་རྡལ་ཅན་དུ་འགྱུར་ཚད་65.2%ཟིན་པ་དང་། མི་འབོར་དུང་ཕྱུར་4ལས་བརྒལ་བའི་འཛམ་གླིང་གི་གཞི་ཁྱོན་ཆེ་ཤོས་ཀྱི་ཡོང་འབབ་འབྲིང་གྲས་ཀྱི་ཚོགས་སྤྱི་ཆགས་ཡོད། སྔར་བས་འཐུས་ཚང་དང་སྔར་བས་སྤུས་ཚད་མཐོ་བའི་ལས་ཞུགས་མངོན་འགྱུར་ཡོང་བར་སྐུལ་འདེད་བཏང་སྟེ། འཛམ་གླིང་ཐོག་གཞི་ཁྱོན་ཆེ་ཤོས་ཀྱི་སློབ་གསོའི་མ་ལག་དང་། སྤྱི་ཚོགས་འགན་སྲུང་མ་ལག །སྨན་བཅོས་འཕྲོད་བསྟེན་མ་ལག་བཅས་བཙུགས་ཡོད། གྲོང་ཁྱེར་དང་གྲོང་རྡལ་དུ་གསར་འཕར་བྱུང་བའི་ལས་ཞུགས་མི་གྲངས་བསྡོམས་པས་དུང་ཕྱུར་1.3ཟིན་པ་དང་། གཞི་རྩའི་རྒན་གསོའི་འགན་བཅོལ་ཁེབས་ཚད་མི་གྲངས་དུང་ཕྱུར་10.57ལ་སླེབས་པ། གཞི་རྩའི་སྨན་བཅོས་འགན་བཅོལ་ཁེབས་ཚད་མི་གྲངས་དུང་ཕྱུར་13.6ལ་སླེབས་པ་བཅས་བྱུང་ནས། མི་དམངས་མང་ཚོགས་ཀྱི་ཐོབ་སྣང་དང་སྐྱིད་སྣང་དང་བདེ་སྣང་བཅས་རྒྱུན་ཆད་མེད་པར་ཇེ་ཆེར་སོང་ཡོད།

མི་འབོར་གྱི་གཞི་ཁྱོན་ཧ་ཅང་ཆེ་བའི་དེང་རབས་ཅན། “འདི་ནི་ཀྲུང་གོའི་ལུགས་ཀྱི་དེང་རབས་ཅན་གྱི་མངོན་གསལ་དོད་པོའི་ཁྱད་ཆོས་ཡིན།” རྩོམ་ཡིག་གལ་ཆེན་འདིའི་ནང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རང་རྒྱལ་གྱི་གཞི་ཁྱོན་ཆེ་བའི་མི་འབོར་གྱི་དགེ་མཚན་དང་འགྲན་སློང་ལ་ཚན་རིག་དང་མཐུན་པའི་སྒོ་ནས་དབྱེ་ཞིབ་གནང་སྟེ། “འདི་ནི་མིའི་རིགས་ཀྱི་ལོ་རྒྱུས་ཐོག་གི་གཞི་ཁྱོན་ཆེ་ཤོས་ཀྱི་དེང་རབས་ཅན་ཞིག་ཡིན་ལ་དཀའ་ཚེགས་ཆེ་ཤོས་ཀྱི་དེང་རབས་ཅན་ཞིག་ཀྱང་རེད་”ཅེས་ནན་གསུང་གནང་ཡོད།

——“དེང་རབས་ཅན་གྱི་འཛམ་གླིང་ས་བཀྲ་ལ་འགྱུར་ལྡོག་གཏོང་བ།” ད་ལྟ་འཛམ་གླིང་ཡོངས་སུ་དེང་རབས་ཅན་དུ་འགྱུར་བའི་རྒྱལ་ཁབ་ཀྱང་20ལྷག་ལས་མེད་པ་དང་། མི་གྲངས་བསྡོམས་འབོར་དུང་ཕྱུར་10ཡས་མས་ཡིན། ཀྲུང་གོའི་མི་འབོར་དུང་ཕྱུར་14ལྷག་དེང་རབས་ཅན་དུ་བསྐྱོད་ན། གཞི་ཁྱོན་དེ་ད་ཡོད་དར་རྒྱས་ཆེ་བའི་རྒྱལ་ཁབ་ཀྱི་མི་འབོར་བསྡོམས་འབོར་ལས་བརྒལ་བའི་རྐྱེན་གྱིས། དེང་རབས་ཅན་གྱི་འཛམ་གླིང་གི་མངའ་ཁོངས་ལ་འགྱུར་ལྡོག་ཧ་ཅང་ཆེན་པོ་ཐེབས་རྒྱུ་ཡིན་པས་མིའི་རིགས་ཀྱི་ལོ་རྒྱུས་ཐོག་ཤུགས་རྐྱེན་གཏིང་ཟབ་ལྡན་པའི་དོན་ཆེན་ཞིག་རེད།

——“དཀའ་གནད་དང་འགྲན་སློང་རབ་དང་རིམ་པ།” ཆེན་པོ་ལ་ཆེན་པོའི་དགེ་མཚན་ཡོད་ལ་ཆེན་པོ་ལ་ཆེན་པོའི་དཀའ་ངལ་ཡང་ཡོད། གཞི་ཁྱོན་ཤིན་ཏུ་ཆེ་བའི་མི་འབོར་གྱིས་འདང་ངེས་ཀྱི་མི་ཤུགས་ཐོན་ཁུངས་དང་ཚད་བརྒལ་ཆེ་རིགས་ཀྱི་ཚོང་ར་མཁོ་འདོན་བྱེད་ཐུབ་པ་མ་ཟད། དཀའ་གནད་དང་འགྲན་སློང་རབ་དང་རིམ་པ་ཞིག་ཀྱང་ཁྱེར་ཡོང་བ་རེད། ཀྲུང་གོའི་གཞི་ཁྱོན་ལྟར་ན། གྲུབ་འབྲས་ཇི་ཙམ་ཆེ་ཡང་མི་གྲངས་དུང་ཕྱུར་14ལྷག་གིས་བགོས་ན་ཧ་ཅང་ཆུང་བ་དང་། གནད་དོན་ཇི་ཙམ་ཆུང་ཡང་མི་གྲངས་དུང་ཕྱུར་14ལྷག་གིས་བསྒྱུར་ན་ཧ་ཅང་ཆེ། དེ་ཡང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་གནང་བ་ལྟར། མི་གྲངས་དུང་ཕྱུར་14ལྷག་གི་ལྟོ་གོས་ཀྱི་གནད་དོན་ཐག་གཅོད་རྒྱུ་ཁོ་ན་དེ་ཡང་འགྲན་སློང་ཆུང་ཆུང་ཞིག་མ་རེད། ད་དུང་ལས་ཞུགས་དང་། བགོ་བཤའ། སློབ་གསོ། སྨན་བཅོས། སྡོད་ཁང་། རྒན་གསོ། བུ་བཅོལ་སོགས་ཀྱི་གནད་དོན་གང་ཞིག་ཡིན་རུང་ཐག་གཅོད་བྱ་རྒྱུ་དེ་ནི་ལས་སླ་པོ་ཞིག་མ་རེད། གནད་དོན་གང་འདྲ་ཞིག་ཡིན་རུང་དེ་དང་འབྲེལ་བའི་མི་ཚོགས་ནི་གནམ་རིག་སྐར་རྩིས་ལྟ་བུ་ཧ་ཅང་མང་བ་རེད།

——“ལོ་རྒྱུས་ཀྱི་བཟོད་སེམས་མཐའ་འཁྱོངས་བྱེད་པ།” རང་རྒྱལ་གྱི་མི་འབོར་དུང་ཕྱུར་14ལྷག་ཙམ་སྤྱི་ཡོངས་ནས་དེང་རབས་ཅན་གྱི་སྤྱི་ཚོགས་སུ་བསྐྱོད་པར་དཀའ་ཚེགས་རང་བཞིན་དང་རྙོག་འཛིང་རང་བཞིན་སྔར་བྱུང་མ་མྱོང་བ་ཞིག་ཡོད་པས། འཛམ་གླིང་དུ་སྔར་ཡོད་ཀྱི་དཔེ་དབྱིབས་བརྩི་སྲུང་ཞུ་ས་མེད་པ་དང་། གནད་སྨིན་འཐུས་ཚང་གི་ཉམས་མྱོང་དཔྱད་གཞིར་འཛིན་རྒྱུ་མེད་ལ། ཕྱི་ཕྱོགས་ཀྱི་སྟོབས་ཤུགས་བརྟེན་སའང་མེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་གནང་དོན། “ང་ཚོས་གནད་དོན་ལ་བསམ་བློ་གཏོང་བ་དང་། ཐབས་ཇུས་འགོད་པ། བྱ་བ་སྒྲུབ་པ་བཅས་བྱེད་སྐབས་དང་ཐོག་མི་འབོར་གྱི་གཞི་གྲངས་ཀྱི་གནད་དོན་ལ་བསམ་བློ་གཏོང་བ་དང་། རང་རྒྱལ་གྱི་གྲོང་ཁྱེར་དང་གྲོང་གསེབ་ཁག་བར་གྱི་ས་ཁོངས་འཕེལ་རྒྱས་ཆུ་ཚད་ཀྱི་ཧེ་བག་ཆེ་བ་སོགས་དོན་དངོས་ལ་བསམ་བློ་གཏོང་དགོས་ཤིང་། མཐོ་འདོད་ཆེན་པོ་བྱེད་མི་རུང་ལ་རྙིང་ཞེན་བག་འཁུམས་ཀྱང་བྱེད་མི་རུང་བར། ལོ་རྒྱུས་ཀྱི་ངང་རྒྱུད་རིང་པོ་མཐའ་འཁྱོངས་བྱས་ནས་བརྟན་ཐོག་ཡར་འཕེལ་དང་། རིམ་བགྲོད་གོང་འཕེལ། རྒྱུན་མཐུད་སྐུལ་འདེད་བཅས་བྱེད་དགོས།”

“དེང་རབས་ཅན་འཛུགས་སྐྲུན་བྱས་པའི་གྲུབ་འབྲས་ཀྱིས་མི་དམངས་ཡོངས་རྫོགས་ལ་སྔར་ལས་མང་བ་དང་སྔར་ལས་དྲང་སྙོམས་སྒོས་ཕན་ཐོགས་པར་བྱེད་དགོས།”

“མཉམ་དུ་ཕྱུག་འགྱུར་གྱིས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ངོ་བོའི་བླང་བྱ་མཚོན་ཡོད། ཡིན་ན་ཡང་ཕན་ཚུན་བསྡམས་ནས་སྡིག་སྲིན་ལྟར་སུ་ཡང་འགུལ་མི་ཐུབ་པ་བྱེད་པའང་མིན། མི་ཁག་ཅིག་སྔོན་ལ་ཕྱུག་པོ་ཆགས་རྒྱུར་སྐུལ་མ་གཏོང་དགོས། འོན་ཀྱང་སྐད་ཆ་ཕྱི་མ་དེ་བརྗེད་མི་རུང་། ‘སྔོན་ལ་ཕྱུག་པོ་ཆགས་མཁན་གྱིས་རྗེས་མ་ཕྱུག་པོ་ཆགས་པར་སྐུལ་ཁྲིད་བྱེད་དགོས།’ འདི་ནི་ང་ཚོ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འཕེལ་རྒྱས་འགྲོ་ལམ་དང་མཐུན་པས། ལམ་ཡང་དག་པར་འགྲོ་ན་འདི་ལྟར་འགྲོ་དགོས།”

2023ལོའི་ཟླ་6ཚེས་8ཉིན། ནང་སོག་རང་སྐྱོང་ལྗོངས་ཏང་ཨུ་དང་སྲིད་གཞུང་གི་ལས་དོན་སྙན་ཞུར་གསན་སྐབས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཉམ་དུ་ཕྱུག་འགྱུར་ཐད་རྒྱས་བཤད་གནད་ལ་འཁེལ་བ་གནང་སྟེ། “མི་རིགས་ཁག་གི་མི་དམངས་ཚོ་མཉམ་དུ་ཕྱུག་པོར་འགྱུར་བར་སྐུལ་འདེད་གཏོང་བ་ནི་སྤེལ་བཞིན་ཡོད་པ་དང་འགྲམ་དུ་ཡོད་པ་དངོས་སུ་ཚོར་ཐུབ་པ་བྱེད་དགོས་”ཞེས་ནན་གསུང་གནང་ཡོད།

མཉམ་དུ་ཕྱུག་འགྱུར་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ངོ་བོའི་བླང་བྱ་ཡིན་པ་དང་། སྤྱི་ཚོགས་རིང་ལུགས་དེང་རབས་ཅན་གྱི་དམིགས་འབེན་གལ་ཆེན་ཞིག་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གཏིང་ཟབ་མོའི་སྒོ་ནས་བསྟན་གནང་དོན། “ང་ཚོས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བ་ནི། མཐར་གཏུགས་ན་མི་དམངས་ཡོངས་རྫོགས་མཉམ་དུ་ཕྱུག་འགྱུར་མངོན་འགྱུར་བྱ་རྒྱུ་དེ་རེད།” རྩོམ་ཡིག་གལ་ཆེན་འདིའི་ནང་སྤྱི་ཁྱབ་ཧྲུའུ་ཅི་ཡིས་མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བའི་དེང་རབས་ཅན་ལ་གོམ་གང་མདུན་སྤོས་སྒོས་ནན་གསུང་གནང་བ་སྟེ། “འདི་ནི་ཀྲུང་གོའི་ལུགས་ཀྱི་དེང་རབས་ཅན་གྱི་ངོ་བོའི་ཁྱད་ཆོས་ཤིག་ཡིན་ལ་ནུབ་ཕྱོགས་དེང་རབས་ཅན་དང་མི་འདྲ་བའི་མཚོན་རྟགས་མངོན་གསལ་དོད་པོ་ཞིག་ཀྱང་ཡིན།”

མཉམ་དུ་ཕྱུག་འགྱུར་ནི་མིའི་རིགས་ཀྱི་ཤེས་དཔལ་འཕེལ་རྒྱས་ཁྲོད་ཀྱི་དཀའ་གནད་ཅིག་ཡིན། ནུབ་ཕྱོགས་དེང་རབས་ཅན་གྱི་སྐྱོན་ཆ་ཆེ་ཤོས་ནི་མ་རྩ་ལྟེ་བར་འཛིན་པ་ལས་མི་དམངས་ལྟེ་བར་འཛིན་པ་མ་ཡིན་པ་དང་། མ་རྩའི་ཁེ་ཕན་ཆེ་ཤོས་དོན་གཉེར་བྱེད་པ་ལས་མི་མང་ཆེ་བའི་ཁེ་ཕན་ལ་ཞབས་འདེགས་ཞུ་བ་མ་ཡིན་པས། དབུལ་ཕྱུག་གི་ཧེ་བག་ཆེ་བ་དང་མཐའ་གཉིས་སུ་གྱེས་ཚུལ་ཧ་ཅང་ཚབས་ཆེ་བ་རེད། འཕེལ་རྒྱས་འགྲོ་བཞིན་པའི་རྒྱལ་ཁབ་ཁ་ཤས་དེང་རབས་ཅན་དུ་འགྱུར་བའི་བརྒྱུད་རིམ་ཁྲོད་དར་རྒྱས་ཆེ་བའི་རྒྱལ་ཁབ་ཀྱི་ཚད་གཞི་དང་ཐག་ཉེ་མོད། འོན་ཀྱང་“ཡོང་འབབ་འབྲིང་གྲས་ཀྱི་དོང་རྙིའི་”ནང་དུ་ལྷུང་བ་དང་། དུས་ཡུན་རིང་པོར་འཕེལ་མེད་སོར་གནས་སུ་གྱར་བ། ཐ་ན་ཕྱི་ནུར་ཚབས་ཆེན་བྱུང་བ་སོགས་ཀྱི་རྒྱུ་རྐྱེན་གཙོ་བོ་ཞིག་ནི་མཐའ་གཉིས་སུ་གྱེས་པའི་རིགས་དང་རིམ་གྲས་སྲ་འགྱུར་གྱི་གནད་དོན་ཐག་གཅོད་ལེགས་པོ་མ་བྱེད་པའི་རྐྱེན་གྱིས་རེད།

“རྒྱལ་ཁབ་ཕྱུག་པོར་གྲགས་པ་ནི་མི་དམངས་ཕྱུག་པོ་ཡིན་པས་སོ། །” ཀྲུང་གོའི་ལུགས་ཀྱི་དེང་རབས་ཅན་གྱི་འཕེལ་རྒྱས་ནི་མི་དམངས་ཀྱི་ཆེད་དུ་ཡིན་པ་དང་། མི་དམངས་ལ་བརྟེན་ནས་འཕེལ་རྒྱས་གཏོང་བ། འཕེལ་རྒྱས་ཀྱི་གྲུབ་འབྲས་མི་དམངས་ཀྱིས་མཉམ་དུ་ལོངས་སྤྱོད་བྱེད་པ་བཅས་རྒྱུན་འཁྱོངས་བྱས་ཏེ། མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བར་སྐུལ་འདེད་གཏོང་བའི་ཐད་ཡར་རྒྱས་ཆེན་པོ་བྱུང་ཡོད། ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་མི་དམངས་ཀྱིས་དགའ་སྐྱིད་ལྡན་པའི་འཚོ་བར་བཅངས་པའི་རེ་སྨོན་དེ་འབད་འཐབ་དམིགས་འབེན་དུ་འཛིན་རྒྱུ་རྒྱུན་འཁྱོངས་དང་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་རྒྱུན་འཁྱོངས་བྱས་ནས་རིམ་བཞིན་མི་དམངས་ཡོངས་རྫོགས་མཉམ་དུ་ཕྱུག་འགྱུར་ཡོང་བར་བྱ་རྒྱུ་དེ་བས་མངོན་གསལ་དོད་པོའི་གནས་སུ་བཞག་སྟེ། མཉམ་དུ་ཕྱུག་འགྱུར་ལ་ཕྱོགས་ཡོངས་ནས་འཆར་འགོད་དང་རྒྱུད་རིམ་ལྡན་པའི་ཇུས་འགོད་བྱས་ནས་དུས་ཚོད་རེའུ་མིག་དང་ལམ་ཐིག་རི་མོ་ཁ་གསལ་བཟོས་ཡོད།

ད་ལྟ། མཉམ་དུ་ཕྱུག་འགྱུར་ལ་སྐུལ་འདེད་ཏན་ཏིག་གཏོང་བའི་ལོ་རྒྱུས་ཀྱི་དུས་རིམ་ཞིག་ལ་སླེབས་ཡོད། ང་ཚོར་མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བར་སྐུལ་སྤེལ་གཏོང་བའི་བསམ་བློའི་འདུ་ཤེས་དང་། ལམ་ལུགས་བཀོད་སྒྲིག །སྲིད་ཇུས་དང་བྱེད་ཐབས་བཅས་ཆ་ཚང་ཞིག་ཆགས་ཡོད། རྩོམ་ཡིག་གལ་ཆེན་འདིའི་ནང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གོམ་གང་མདུན་སྤོས་ཀྱིས་བཀོད་སྒྲིག་གནང་བ་སྟེ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་། “སྒོ་ངའི་བག་ལེབ་”ཆེན་པོ་བཟོ་བའི་དུས་མཚུངས་སུ། “སྒོ་ངའི་བག་ལེབ་”སྔར་བས་ལེགས་པོ་བགོས་ཏེ་ལས་ཞུགས་དང་། བགོ་བཤའ། སློབ་གསོ། སྨན་བཅོས། སྡོད་ཁང་། རྒན་གསོ། བུ་བཅོལ་སོགས་དམངས་འཚོའི་གནད་དོན་ཤུགས་ཆེན་པོས་ཐག་གཅོད་བྱེད་པ་དང་། བགོ་བཤའ་ཐེངས་གསུམ་དང་ཆ་འགྲིག་པའི་ལམ་ལུགས་མ་ལག་འཛུགས་པ། ཡོང་འབབ་བགོ་བཤའི་སྒྲིག་རིམ་ཚད་ལྡན་དུ་གཏོང་བ། རྒྱུ་ནོར་གསོག་འཇོག་ལམ་སྲོལ་ཚད་ལྡན་དུ་གཏོང་བ། མ་རྩ་སྐྱོན་བྲལ་ངང་འཕེལ་རྒྱས་གཏོང་བར་ཁྲིམས་ལྟར་ཁྲིད་སྟོན་དང་ཚད་ལྡན་དུ་གཏོང་བ། ཡོང་འབབ་འབྲིང་གྲས་ཀྱི་ཚོགས་སྤྱི་རིམ་བཞིན་རྒྱ་སྐྱེད་དང་ཡོང་འབབ་བགོ་བཤའི་ཧེ་བག་ཇེ་ཆུང་དུ་གཏོང་བ་བཅས་བྱས་ཏེ། དེང་རབས་ཅན་འཛུགས་སྐྲུན་བྱས་པའི་གྲུབ་འབྲས་ཀྱིས་མི་དམངས་ཡོངས་རྫོགས་ལ་སྔར་ལས་མང་བ་དང་སྔར་ལས་དྲང་སྙོམས་སྒོས་ཕན་ཐོགས་པར་བྱས་ནས་མཐའ་གཉིས་སུ་གྱེས་པར་མཐའ་གཅིག་ཏུ་སྔོན་འགོག་བྱེད་དགོས། དུས་མཚུངས་སུ་མཐོང་དགོས་པ་ཞིག་ནི། མཉམ་དུ་ཕྱུག་འགྱུར་བྱ་རྒྱུ་ནི་དུས་ཡུན་རིང་པོའི་ལས་འགན་ཞིག་ཡིན་པས། བྱེད་ཐེངས་གཅིག་ལ་འགྲུབ་ཐུབ་པ་ཞིག་མིན་པ་དང་། སྒུག་མི་རུང་ལ་བྲེལ་འཚུབ་ཀྱང་བྱེད་མི་རུང་། སྤྱི་ཁྱབ་ཧྲུའུ་ཅི་ཡིས་ནན་གསུང་གནང་དོན། “ངེས་པར་དུ་སྙིང་རུས་གཏན་འཁྱོངས་ཀྱིས་འབད་འབུངས་ལྷོད་མེད་བྱས་ཏེ་རྒྱུན་ཆད་མེད་པར་ཡར་སྐྱེད་གསར་པ་ཡོང་དགོས། ”

“དངོས་པོ་འབྱོར་ཕྱུག་ཡིན་དགོས་ལ་བསམ་པ་ཡང་འབྱོར་ཕྱུག་ཡིན་དགོས།”

“འདི་གར་སྡོད་པ་ནི་བསོད་ནམས་ཆེན་པོ་རེད། གནའ་ཉམས་དོད་ཅིང་གནའ་བོའི་དྲི་བསུང་འཐུལ། གང་ས་གང་དུ་གནའ་ཤུལ་དང་གང་ས་གང་དུ་ཡུལ་ལྗོངས་གྲགས་ཅན། གང་ས་གང་དུ་རིག་གནས་ཡོད། ‘གོམ་པ་བརྒྱའི་ནང་དུ་དྲི་ཞིམ་རྩྭ་མཆོག་ཡོད་’ཅེས་པ་འདི་རུ་བཀོལ་ཆོག །”

2023ལོའི་ཟླ་7ཚེས་6ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཅང་སུའུ་སུའུ་ཀྲོའུ་རུ་གནའ་གྲོང་སྲུང་སྐྱོབ་དང་རིག་གནས་རྒྱུན་འཛིན་ལ་ཡུལ་དངོས་རྟོག་ཞིབ་གནང་སྐབས་གཏིང་ཟབ་མོའི་སྒོ་ནས་བསྟན་གནང་དོན། “ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་འཛུགས་སྐྲུན་བྱ་རྒྱུ་ནི་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་ལྡོག་མེད་ཀྱི་བླང་བྱ་དང་སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་འཛུགས་སྐྲུན་བྱེད་པའི་ནང་དོན་གལ་ཆེན་ཞིག་ཡིན།”

སྙིང་སྟོབས་དབེན་པའི་སྐྱེ་བོས་མགོ་མི་ཐོན། སྙིང་སྟོབས་དབེན་པའི་རྒྱལ་ཁབ་སྟོབས་མི་རྒྱས། ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་མངོན་འགྱུར་བྱེད་པར་དངོས་པོའི་དཔལ་ཡོན་འཕེལ་རྒྱས་ཆེན་པོ་གཏོང་དགོས་ལ། བསམ་པའི་དཔལ་ཡོན་ཡང་འཕེལ་རྒྱས་ཆེན་པོ་གཏོང་དགོས། བསྒྱུར་བཅོས་སྒོ་འབྱེད་ཀྱི་ཐོག་མའི་དུས་སུ། ང་ཚོའི་ཏང་གིས་གསར་གཏོད་ཀྱི་རང་བཞིན་ལྡན་པའི་སྒོ་ནས་དངོས་པོའི་དཔལ་ཡོན་དང་བསམ་པའི་དཔལ་ཡོན་“ཕྱོགས་གཉིས་འཛིན་པ་དང་ཕྱོགས་གཉིས་ཀ་དམ་པོར་འཛིན་དགོས་པའི་”འཐབ་ཇུས་བྱེད་ཕྱོགས་གཏན་འཁེལ་བྱས། ཏང་གི་ཚོགས་ཆེན་ཉི་ཤུ་པའི་སྙན་ཞུའི་ནང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གཏིང་ཟབ་མོའི་སྒོ་ནས་བསྟན་གནང་དོན། “དངོས་པོ་དབུལ་ཕོངས་ཡིན་པ་སྤྱི་ཚོགས་རིང་ལུགས་མིན་ལ། བསམ་བློ་དབུལ་ཕོངས་ཡིན་པའང་སྤྱི་ཚོགས་རིང་ལུགས་མིན།” རྩོམ་ཡིག་གལ་ཆེན་འདིའི་ནང་དུ་སྤྱི་ཁྱབ་ཧྲུའུ་ཅི་ཡིས་གོམ་གང་མདུན་སྤོས་ཀྱིས་བསྟན་གནང་དོན། “དངོས་པོ་འབྱོར་ཕྱུག་ཡིན་དགོས་ལ། བསམ་པ་ཡང་འབྱོར་ཕྱུག་ཡིན་དགོས།”

ཀྲུང་གོའི་ལུགས་ཀྱི་དེང་རབས་ཅན་ནི་དངོས་པོའི་དཔལ་ཡོན་དང་བསམ་པའི་དཔལ་ཡོན་ཕན་ཚུན་མཐུན་སྦྱོར་བྱེད་པའི་དེང་རབས་ཅན་ཡིན་ཞིང་། དམིགས་འབེན་ནི་ཕྱོགས་ཡོངས་ནས་དངོས་པོ་ཕུན་སུམ་ཚོགས་པ་དང་ཕྱོགས་ཡོངས་ནས་མི་འཕེལ་རྒྱས་འགྲོ་བར་སྐུལ་འདེད་གཏོང་རྒྱུ་དེ་ཡིན། ནུབ་ཕྱོགས་ཀྱི་སྔ་དུས་ཀྱི་དེང་རབས་ཅན་ནི་ཕྱོགས་གཅིག་ནས་རྒྱུ་ནོར་གྱི་གསོག་འཇོག་ཡིན་པ་དང་། ཕྱོགས་གཅིག་ནས་དད་མོས་ཉམས་པ་དང་རྒྱུ་ལ་རྔམ་སེམས་ཆེ་བ་དེ་རེད། ད་ལྟ། ནུབ་ཕྱོགས་རྒྱལ་ཁབ་རིམ་བཞིན་དཀའ་ཁག་གི་གནས་སུ་ལྷུང་བཞིན་ཡོད། རྒྱུ་རྐྱེན་གཙོ་བོ་ཞིག་ནི་མ་རྩ་འདོད་རྔམ་ཅན་དུ་འགྱུར་བའི་རང་གཤིས་འགོག་མི་ཐུབ་པ་དང་། དངོས་པོ་རིང་ལུགས་ཇེ་ཆེར་འགྲོ་བ། བསམ་བློ་ཞན་པ་སོགས་ཀྱི་གཅོང་ནད་སེལ་ཐབས་བྲལ་བར་ཐུག་ཡོད། ང་ཚོས་དེང་རབས་ཅན་འཛུགས་སྐྲུན་ལ་སྐུལ་འདེད་གཏོང་བའི་ཁྲོད། སྤྱི་ཚོགས་ཀྱི་ཐོན་སྐྱེད་ནུས་ཤུགས་བཅིངས་འགྲོལ་དང་འཕེལ་རྒྱས་གཏོང་བ་དང་། དཔལ་འབྱོར་རྒྱུན་མཐུད་དང་མགྱོགས་མྱུར་ངང་འཕར་སྣོན་ཡོང་བར་སྐུལ་འདེད་གཏོང་དགོས་པ་ནན་བཤད་བྱས་པ་མ་ཟད། བསམ་པའི་དཔལ་ཡོན་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བརྗོད་གཞིའི་ཁྲོད་དུ་ཡོད་དགོས་པའི་དོན་སྙིང་ཡིན་པའི་ངོས་འཛིན་ཡང་བྱས་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག །ང་ཚོས་དེང་རབས་ཅན་གྱི་དངོས་པོའི་རྨང་གཞི་ཟམ་མི་འཆད་པར་སྲ་བརྟན་དུ་བཏང་ནས་མི་དམངས་ཀྱི་བདེ་སྐྱིད་འཚོ་བའི་དངོས་པོའི་ཆ་རྐྱེན་རྒྱུན་ཆད་མེད་པར་བརྟན་དུ་བཏང་བ་དང་ཆབས་ཅིག །སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་འཕེལ་རྒྱས་ཤུགས་ཆེན་བཏང་བ་དང་། གསར་བརྗེའི་རིག་གནས་དར་སྤེལ་བཏང་བ། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དང་གོང་འཕེལ་བཏང་བ་བཅས་བྱས་པས་མི་དམངས་མང་ཚོགས་ཀྱི་བསམ་བློའི་གོ་རྟོགས་དང་། ཀུན་སྤྱོད་ཀྱི་ཆུ་ཚད། ཤེས་དཔལ་གྱི་བྱང་ཚད། སྤྱི་ཚོགས་ཡ་རབས་ཀྱི་ཆུ་ཚད་བཅས་ཟམ་མི་འཆད་པར་མཐོ་རུ་ཕྱིན་ཡོད། ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་མཐུན་སྒྲིལ་འབད་འཐབ་བྱེད་པའི་ཐུན་མོང་གི་བསམ་བློའི་རྨང་གཞི་སྔར་བས་སྲ་བརྟན་དུ་ཕྱིན་པ་དང་། རྒྱལ་ཁབ་ཀྱི་རིག་གནས་མཉེན་སྟོབས་དང་ཀྲུང་ཧྭའི་རིག་གནས་ཀྱི་ཤུགས་རྐྱེན་མངོན་གསལ་དོད་པོས་ཆེ་རུ་ཕྱིན་ཡོད།

“རང་རྒྱལ་གྱི་ས་གཞི་ཆེན་མོའི་སྟེང་ཐོག་བརྩེགས་ཁང་ཆེན་མང་པོ་ཚར་དུ་དངར་བའི་སྐབས་ཀྲུང་ཧྭ་མི་རིགས་ཀྱི་སྙིང་སྟོབས་ཀྱི་ཁང་ཆེན་ཡང་ཀྲོང་ངེར་འགྱིང་དགོས།” སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གཏིང་ཟབ་མོའི་སྒོ་ནས་བསྟན་གནང་དོན། རྩོད་སྒྲུབ་དང་། ཕྱོགས་ཡོངས། དོ་མཉམ་བཅས་ཀྱི་ལྟ་བས་དངོས་པོའི་དཔལ་ཡོན་དང་བསམ་པའི་དཔལ་ཡོན་བར་གྱི་འབྲེལ་བ་ཐག་གཅོད་ཡང་དག་བྱེད་པ་དང་། དངོས་པོའི་དཔལ་ཡོན་འཛུགས་སྐྲུན་དང་བསམ་པའི་དཔལ་ཡོན་འཛུགས་སྐྲུན་གཉིས་ཀ་ལེགས་པོར་སྤེལ་བ། རྒྱལ་ཁབ་ཀྱི་དངོས་པོའི་སྟོབས་ཤུགས་དང་བསམ་པའི་སྟོབས་ཤུགས་གཉིས་ཀ་ཇེ་ཆེར་གཏོང་བ། རྒྱལ་ཡོངས་མི་རིགས་ཁག་གི་མི་དམངས་ཀྱི་དངོས་པོའི་འཚོ་བ་དང་བསམ་པའི་འཚོ་བ་ཚང་མ་ལེགས་བཅོས་བྱུང་་བ་བཅས་ཡིན་ན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བྱ་གཞག་གཞི་ནས་བདེ་བླག་ངང་མདུན་དུ་སྤེལ་ཐུབ། རྩོམ་ཡིག་གལ་ཆེན་འདིའི་ནང་སྤྱི་ཁྱབ་ཧྲུའུ་ཅི་ཡིས་གོམ་གང་མདུན་སྤོས་ཀྱིས་བསྟན་གནང་དོན། “ཀྲུང་གོའི་ལུགས་ཀྱི་དེང་རབས་ཅན་ལ་དངོས་པོའི་རྒྱུ་ནོར་ཧ་ཅང་ཕུན་སུམ་ཚོགས་པོ་ཡོད་དགོས་ལ། བསམ་པའི་རྒྱུ་ནོར་ཡང་ཧ་ཅང་ཕུན་སུམ་ཚོགས་པོ་ཡོད་དགོས།” དེ་ཡང་ཕྱོགས་གཉིས་ནས་བླང་བྱ་གསལ་པོ་བཏོན་པ་སྟེ། ཕྱོགས་གཅིག་ནས་ཕྱོགས་གཉིས་དམ་འཛིན་དང་ཕྱོགས་གཉིས་ཀ་དམ་འཛིན་ནན་པོ་བྱ་རྒྱུ་རྒྱུན་འཁྱོངས་བྱས་ནས་དངོས་པོའི་དཔལ་ཡོན་དང་བསམ་པའི་དཔལ་ཡོན་ཕན་ཚུན་མཐུན་སྦྱོར་དང་ཕན་ཚུན་སྐུལ་འདེད་གཏོང་རྒྱུར་སྐུལ་སྤེལ་བྱས་ཏེ་མི་དམངས་ཡོངས་ལ་ཐོག་མཐའ་བར་གསུམ་དུ་མཐུན་སྒྲིལ་འབད་འཐབ་ཀྱི་བསམ་བློའི་རྨང་གཞི་དང་། གསར་གཏོད་ཡར་བརྩོན་གྱི་རང་འགུལ་སྙིང་སྟོབས། སྐྱོན་བྲལ་ཡར་བརྩོན་གྱི་རིན་ཐང་དོན་གཉེར་བཅས་ཡོད་པ་བྱེད་དགོས། ཕྱོགས་གཞན་ཞིག་ནས་མི་དམངས་ཀྱི་ཉིན་བཞིན་ཇེ་ཆེར་འགྲོ་བའི་བསམ་པའི་རིག་གནས་ཀྱི་དགོས་མཁོ་དང་བསྟུན་ནས་གོང་བུར་འགྲིལ་ཤུགས་དང་སྣེ་ཁྲིད་ནུས་པ་ཆེན་པོ་ལྡན་པའི་སྤྱི་ཚོགས་རིང་ལུགས་ཀྱི་འདུ་ཤེས་འཛིན་སྟངས་འཛུགས་སྐྲུན་དང་། ཕུགས་བསམ་དང་དད་སེམས་ཀྱི་སློབ་གསོ་དང་“ལོ་རྒྱུས་བཞི་”ཡི་དྲིལ་བསྒྲགས་དང་སློབ་གསོར་ཤུགས་རྒྱག་པ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྐྱེད་སྲིང་དང་དར་སྤེལ། སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་གོང་སྤེལ། རིག་རྩལ་གྱི་ཕུལ་བྱུང་བརྩམས་ཆོས་སྔར་ལས་མང་བ་འདོན་སྤེལ། མི་དམངས་ཀྱི་བསམ་པའི་འཇིག་རྟེན་རྒྱུན་ཆད་མེད་པར་ཕུན་སུམ་ཚོགས་སུ་གཏོང་བ། སྤྱི་ཚོགས་ཡོངས་ཀྱི་ཤེས་དཔལ་ཆུ་ཚད་མཐོ་རུ་གཏོང་བ་བཅས་བྱས་ནས་མི་ཕྱོགས་ཡོངས་ནས་འཕེལ་རྒྱས་ཡོང་བར་སྐུལ་འདེད་གཏོང་དགོས།

“སྤུས་ཚད་མཐོ་བའི་སྐྱེ་ཁམས་ཁོར་ཡུག་གིས་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་བྱེད་དགོས།”

“རྒྱུན་མཐུད་འཕེལ་རྒྱས་མངོན་འགྱུར་ཡོང་བར་ངེས་པར་དུ་སྐྱེ་ཁམས་དཔལ་ཡོན་འཛུགས་སྐྲུན་ལ་དམ་འཛིན་ཡག་པོ་བྱེད་དགོས།” “ལམ་རྙིང་པར་སོང་ནས་ཐོན་ཁུངས་ཟད་གྲོན་དང་ཁོར་ཡུག་སྦགས་བཙོག་བཟོ་བ་ནི་རྒྱུན་སྐྱོང་མི་རུང་།”

2012ལོའི་ཟླ་12པར། ཀོང་ཏུང་ལྷོ་ཕྱོགས་ཀྱི་ས་གཞི་ཆེན་མོ་རུ། ཚོགས་ཆེན་བཅོ་བརྒྱད་པ་འཚོགས་རྗེས་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཐེངས་དང་པོར་ས་གནས་སུ་རྟོག་ཞིབ་ཕེབས་སྐབས་སྐྱེ་ཁམས་དཔལ་ཡོན་འཛུགས་སྐྲུན་དམ་འཛིན་ལེགས་པོ་བྱེད་དགོས་པའི་གལ་ཆེའི་རང་བཞིན་རྒྱས་འགྲེལ་གཏིང་ཟབ་གནང་ཡོད།

སྐྱེ་ཁམས་དཔལ་ཡོན་འཛུགས་སྐྲུན་བྱ་རྒྱུ་ནི་ཀྲུང་ཧྭ་མི་རིགས་རྒྱུན་མཐུད་འཕེལ་རྒྱས་གཏོང་བའི་རྩ་བའི་ཇུས་ཆེན་ཞིག་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐོག་མཐའ་བར་གསུམ་དུ་མཛེས་སྡུག་ལྡན་པའི་ཀྲུང་གོ་འཛུགས་སྐྲུན་བྱ་རྒྱུ་དེ་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་མངོན་གསལ་དོད་པའི་གནས་སུ་བཞག་སྟེ། མི་དང་རང་བྱུང་ཁམས་ཞི་མཐུན་མཉམ་གནས་ཀྱི་མཐོ་ཚད་ཐོག་ལངས་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཇུས་འགོད་གནང་བ་དང་། “རི་སྔོ་ཆུ་དྭངས་ནི་གསེར་རི་དངུལ་རི་ཡིན་པ།” “མི་དང་རང་བྱུང་ཁམས་ནི་ཚེ་སྲོག་གཅིག་མཐུན་ཚོགས་པ་ཡིན་པ།” “མཛེས་སྡུག་ལྡན་པའི་ཀྲུང་གོ་འཛུགས་སྐྲུན་བྱ་རྒྱུ་ནི་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་དམིགས་འབེན་གལ་ཆེན་ཡིན་པ་”བཅས་ནན་གསུང་གནང་ཡོད།” རྩོམ་ཡིག་གལ་ཆེན་འདིའི་ནང་སྤྱི་ཁྱབ་ཧྲུའུ་ཅི་ཡིས་གོམ་གང་མདུན་སྤོས་ཀྱིས་བསྟན་གནང་དོན། “རང་བྱུང་ཁམས་ལ་བརྩི་འཇོག་དང་། རང་བྱུང་ཁམས་དང་བསྟུན་པ། རང་བྱུང་ཁམས་སྲུང་སྐྱོབ་བཅས་བྱས་ནས་མི་དང་རང་བྱུང་ཁམས་ཞི་མཐུན་མཉམ་གནས་ཡོང་བར་སྐུལ་འདེད་གཏོང་རྒྱུ་ནི་ཀྲུང་གོའི་ལུགས་ཀྱི་ཁྱད་ཆོས་མངོན་གསལ་དོད་ཤོས་ཤིག་ཡིན།”

མིའི་རིགས་ཀྱི་ཤེས་དཔལ་འཕེལ་རྒྱས་བྱུང་བའི་ལོ་རྒྱུས་ལ་ཕྱོགས་བསྡུས་ཀྱིས་བལྟས་ན། སྐྱེ་ཁམས་དར་ན་དཔལ་ཡོན་དར་བ་དང་། སྐྱེ་ཁམས་ཉམས་ན་དཔལ་ཡོན་ཉམས་པར་འགྱུར། ཉེ་རབས་ནས་བཟུང་ནུབ་ཕྱོགས་རྒྱལ་ཁབ་ཀྱི་དེང་རབས་ཅན་མང་ཆེ་བས་རང་བྱུང་ཐོན་ཁུངས་རང་དགར་འཕྲོག་བཅོམ་དང་སྐྱེ་ཁམས་ཁོར་ཡུག་ལ་གཏོར་བཤིག་ཚབས་ཆེན་གཏོང་བའི་དུས་རིམ་བརྒྱུད་མྱོང་ཞིང་། དངོས་པོའི་རྒྱུ་ནོར་འབོར་ཆེན་གསར་སྐྲུན་བྱེད་པ་དང་དུས་མཚུངས་སུ་ཁོར་ཡུག་སྦགས་བཙོག་དང་ཐོན་ཁུངས་སྟོངས་ཟད་སོགས་ཀྱི་གནད་དོན་ཚབས་ཆེན་རྟག་ཏུ་ཐོན་གྱི་ཡོད། འཕྲལ་གྱི་ཁེ་ཕན་ལ་རྔམས་ནས་གཏན་གྱི་ཁེ་ཕན་བརླག་པའི་འཕེལ་རྒྱས་གཏོང་སྟངས་མཐར་ཐུག་ཅིང་། རང་བྱུང་ལ་བསྟུན་པ་དང་སྐྱེ་ཁམས་སྲུབ་སྐྱོབ་བྱེད་པའི་ལྗང་མདོག་འཕེལ་རྒྱས་ཀྱིས་མ་འོངས་པའི་མདུན་ལམ་གསལ་པོར་བསྟན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རང་རྒྱལ་གྱི་གཞི་རྩའི་གནས་ཚུལ་ལ་གཞིགས་ཏེ། ཀྲུང་ཧྭ་མི་རིགས་རྒྱུན་མཐུད་འཕེལ་རྒྱས་ཡོང་བ་དང་། མིའི་རིགས་ཀྱི་ཤེས་དཔལ་རྒྱུན་མཐུད་ཡར་རྒྱས་ཡོང་བར་སྐུལ་འདེད་གཏོང་བའི་མཐོ་ཚད་ཐོག་ནས་གཏིང་ཟབ་མོར་བསྟན་གནང་དོན། “རང་རྒྱལ་གྱི་མི་རེའི་ཆ་སྙོམས་ཀྱི་ནུས་ཁུངས་དང་ཐོན་ཁུངས་ཀྱི་ལྷན་སྐྱེས་ནུས་པ་ཧ་ཅང་མི་འདང་བ་དང་། འཕེལ་རྒྱས་མགྱོགས་སུ་གཏོང་བར་ནུས་ཁུངས་དང་ཐོན་ཁུངས། ཁོར་ཡུག་བཅས་ཀྱི་ཚོད་འཛིན་སྔར་ལས་མང་བ་འཕྲད་ཡོད། འདིས་རང་རྒྱལ་ནུབ་ཕྱོགས་ཅན་གྱི་ལམ་བུ་རྙིང་པར་མི་འགྲོ་བ་ཐག་གིས་བཅད་ཡོད།”

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག །རང་རྒྱལ་གྱི་སྐྱེ་ཁམས་དཔལ་ཡོན་འཛུགས་སྐྲུན་གྱི་རིགས་པའི་གཞུང་ལུགས་དང་ལག་ལེན་ཚང་མར་ལོ་རྒྱུས་རང་བཞིན་དང་། དཀྱོག་མཚམས་རང་བཞིན། ཁྱོན་ཡོངས་རང་བཞིན་བཅས་ཀྱི་འགྱུར་ལྡོག་བྱུང་ནས་གཙོ་གནད་བཅོས་སྒྲིག་ནས་མ་ལག་བཅོས་སྐྱོང་དང་། གཞན་དབང་གིས་ཁ་གཏད་འཇལ་བ་ནས་རང་འགུལ་ངང་ལས་ཀ་སྒྲུབ་པ། གོ་ལ་ཧྲིལ་པོའི་ཁོར་ཡུག་བཅོས་སྐྱོང་ནང་ཞུགས་མཁན་ནས་སྣེ་ཁྲིད་མཁན། ལག་ལེན་འཚོལ་ཞིབ་ནས་ཚན་རིག་དང་མཐུན་པའི་རིགས་པའི་གཞུང་ལུགས་ཀྱིས་མཛུབ་སྟོན་བཅས་བར་འགྱུར་ལྡོག་གལ་ཆེན་བྱུང་ཡོད། འབད་བརྩོན་ལྷོད་མེད་བྱས་པ་བརྒྱུད། རང་རྒྱལ་གྱི་ནམ་མཁའ་སྔར་ལས་གཡའ་དག་ཅིང་ས་གཞི་སྔར་ལས་ལྗང་བ་དང་། ཆུ་བོ་སྔར་ལས་དྭངས་ཤིང་ལེ་དབར་ཁྲི་ཡི་རི་ཀླུང་སྔར་ལས་མཛེས་སྡུག་རྣམ་པར་བཀྲ།

ལག་ལེན་གྱི་ཐོག་ནས་ར་འཕྲོད་བྱུང་དོན། སྐྱེ་ཁམས་ཁོར་ཡུག་སྲུང་སྐྱོབ་དང་དཔལ་འབྱོར་འཕེལ་རྒྱས་ནི་རྩོད་སྒྲུབ་གཅིག་གྱུར་དང་གཅིག་རམ་གཅིག་འདེགས་ཡིན་ཞིང་། སྐྱེ་ཁམས་དཔལ་ཡོན་འཛུགས་སྐྲུན་དང་ལྗང་མདོག་ཐཱན་ཉུང་འཁོར་རྒྱུག་འཕེལ་རྒྱས་ལ་སྐུལ་འདེད་བཏང་ན། མི་དམངས་ཀྱི་ཉིན་བཞིན་ཆེ་རུ་འགྲོ་བཞིན་པའི་མཛེས་སྡུག་ལྡན་པའི་སྐྱེ་ཁམས་ཁོར་ཡུག་གི་དགོས་མཁོ་སྐོང་ཐུབ་པ་མ་ཟད། སྔར་ལས་སྤུས་ཚད་མཐོ་བ་དང་སྔར་ལས་ལས་ཆོད་ཆེ་བ། སྔར་ལས་དྲང་སྙོམས་ཡིན་པ། སྔར་ལས་རྒྱུན་མཐུད་ཐུབ་པ། སྔར་ལས་བདེ་འཇགས་ཡིན་པ་བཅས་ཀྱི་འཕེལ་རྒྱས་མངོན་འགྱུར་ཡོང་བར་སྐུལ་འདེད་བཏང་སྟེ། ཐོན་སྐྱེད་འཕེལ་རྒྱས་དང་འཚོ་བ་ཕྱུག་པོ། སྐྱེ་ཁམས་ལེགས་པོ་བཅས་ཀྱི་ཡ་རབས་ཚུལ་ལྡན་གྱི་འཕེལ་རྒྱས་ལམ་བུའི་ཐོག་བསྐྱོད་ཐུབ། དེ་ཡང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་གནང་བ་ལྟར། “ཀྲུང་གོའི་ལུགས་ཀྱི་དེང་རབས་ཅན་གྱིས་རྒྱུན་མཐུད་ངང་འཕེལ་རྒྱས་གཏོང་རྒྱུ་རྒྱུན་འཁྱོངས་དང་། གྲོན་ཆུང་སྔོན་ལ་འཇོག་པ་དང་། སྲུང་སྐྱོབ་སྔོན་ལ་འཇོག་པ། རང་བྱུང་སླར་གསོ་བཅས་གཙོ་བོར་འཛིན་པའི་བྱེད་ཕྱོགས་རྒྱུན་འཁྱོངས་བྱས་ཏེ་བློ་བརྟན་འགྱུར་མེད་ངང་ཐོན་སྐྱེད་འཕེལ་རྒྱས་དང་། འཚོ་བ་ཕྱུག་པོ། སྐྱེ་ཁམས་ལེགས་པོ་བཅས་ཡ་རབས་ཚུལ་ལྡན་གྱི་འཕེལ་རྒྱས་ལམ་བུའི་ཐོག་བསྐྱོད་དེ་ཀྲུང་ཧྭ་མི་རིགས་རྒྱུན་མཐུད་ངང་འཕེལ་རྒྱས་འགྲོ་བར་ཡངས་ཤིང་རྒྱ་ཆེ་བའི་མདུན་ལམ་བཏོད་ཡོད།”

སྐྱེ་ཁམས་དཔལ་ཡོན་འཛུགས་སྐྲུན་ནི་བྱས་རྗེས་དེང་འདིར་བཞག་ཅིང་ཕན་འབྲས་བསྐལ་བརྒྱར་ཐོན་པ་ཞིག་ཡིན། རྩོམ་ཡིག་གལ་ཆེན་འདིའི་ནང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བླང་བྱ་གསལ་པོ་བཏོན་གནང་དོན། “རི་སྔོ་ཆུ་དྭངས་ནི་གསེར་རི་དངུལ་རི་ཡིན་པའི་འདུ་ཤེས་བརྟན་པོ་སྐྱེད་པ་དང་ལག་ལེན་བསྟར་ནས་རི་ཆུ་ནགས་ཞིང་མཚེའུ་རྩྭ་བྱེ་བཅས་གཞི་གཅིག་ཏུ་སྲུང་སྐྱོབ་དང་བརྒྱུད་རིམ་ལྡན་པའི་བཅོས་སྐྱོང་བྱ་རྒྱུ་རྒྱུན་འཁྱོངས་བྱས་ཏེ་སྐྱེ་ཁམས་སྔོན་ལ་འཇོག་པ་དང་། གྲོན་ཆུང་ལེགས་བསྡུས་ཞིབ་གཉེར། ལྗང་མདོག་ཐཱན་ཉུང་བཅས་ཀྱི་འཕེལ་རྒྱས་ལ་སྐུལ་འདེད་གཏོང་དགོས། འཕེལ་རྒྱས་གཏོང་སྟངས་ལྗང་མདོག་ཅན་དུ་མགྱོགས་སུ་བསྒྱུར་བ་དང་། སྐྱེ་ཁམས་མ་ལག་གི་སྣ་མང་རང་བཞིན་དང་། བརྟན་བརླིང་རང་བཞིན། རྒྱུན་མཐུད་རང་བཞིན་བཅས་ཆེ་རུ་གཏོང་དགོས། ཐཱན་རྩེར་སོན་དང་ཐཱན་སྙོམ་སྦྱོར་ལ་སྐུལ་འདེད་ཧུར་ཐག་དང་བརྟན་པོ་བཏང་སྟེ་སྤུས་ཚད་མཐོ་བའི་སྐྱེ་ཁམས་ཁོར་ཡུག་ལ་བརྟེན་ནས་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་བྱེད་དགོས།”

“མིའི་རིགས་ཀྱི་ཞི་བདེ་དང་འཕེལ་རྒྱས་ཀྱི་ཆེད་དུ་ཧུར་ཐག་གིས་བྱས་རྗེས་སྔར་ལས་ཆེ་བ་འབུལ་དགོས།”

“ང་ཚོས་ཐོག་མཐའ་བར་གསུམ་དུ་རང་གི་ལས་དབང་དེ་རྒྱལ་ཁབ་ཁག་གི་མི་དམངས་ཀྱི་ལས་དབང་དང་དམ་པོར་སྦྲེལ་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་གྲུབ་འབྲས་གསར་པར་བརྟེན་ནས་ཧུར་ཐག་གིས་འཛམ་གླིང་འཕེལ་རྒྱས་ལ་གོ་སྐབས་གསར་པ་མཁོ་འདོན་དང་མིའི་རིགས་ཀྱིས་དེང་རབས་ཅན་གྱི་འགྲོ་ལམ་འཚོལ་ཞིབ་བྱེད་པར་རམ་འདེགས་གསར་པ་མཁོ་འདོན་བྱས་ཏེ། མིའི་རིགས་ཀྱི་སྤྱི་ཚོགས་དེང་རབས་ཅན་གྱི་རིགས་པའི་གཞུང་ལུགས་དང་ལག་ལེན་གསར་གཏོད་ཀྱི་ཆེད་དུ་ལེགས་སྐྱེས་གསར་པ་འབུལ་རྒྱུ་ཡིན།”

2023ལོའི་ཟླ་3ཚེས་15ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཀྲུང་གོའི་གུང་ཁྲན་ཏང་དང་འཛམ་གླིང་སྲིད་ཏང་གི་མཐོ་རིམ་གླེང་མོལ་ཚོགས་འདུར་ཞུགས་པ་དང་། 《ལག་གདང་སྦྲེལ་ནས་དེང་རབས་ཅན་གྱི་ལམ་བུ་བསྐྱོད་》ཅེས་པའི་བཞེད་དོན་གསུང་བཤད་གནང་སྟེ། ཀྲུང་གོའི་གུང་ཁྲན་ཏང་གིས་རྒྱལ་ཁབ་ཁག་གི་སྲིད་ཏང་དང་མཉམ་དུ་རང་ཉིད་རྒྱལ་ཁབ་ཀྱི་ཁྱད་ཆོས་ལྡན་པའི་དེང་རབས་ཅན་གྱི་བྱ་གཞག་ལ་སྐུལ་འདེད་གཏོང་བ་དང་། གོ་ལ་ཧྲིལ་པོའི་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་རྒྱུར་སྐུལ་འདེད་གཏོང་བ། མིའི་རིགས་ཀྱི་ལས་དབང་གཅིག་མཐུན་ཚོགས་པ་བསྐྲུན་པར་སྐུལ་འདེད་གཏོང་བ་སོགས་ཀྱི་ཐོག་ནས་ལྷག་བསམ་ཟོལ་མེད་ཀྱི་བསམ་འདུན་མཚོན་པས། ཚོགས་ཞུགས་སྐུ་མགྲོན་དང་རྒྱལ་སྤྱིའི་སྤྱི་ཚོགས་ཀྱིས་སྤྲོ་སེམས་འཁོལ་བའི་དང་ལེན་ཞུ་བ་རེད།

ཀྲུང་ཧྭ་མི་རིགས་ནི་སྔར་ནས་ཞི་བདེར་དགའ་བའི་མི་རིགས་ཤིག་ཡིན་ལ། གནམ་འོག་སྤྱི་སྙོམས་ཆེན་པོ་དང་རྒྱལ་ཕྲན་ཁྲི་སྟོང་མཐུན་པར་གནས་རྒྱུ་ནི་ཀྲུང་ཧྭ་མི་རིགས་ཀྱིས་གནའ་སྔ་མོ་ནས་བཟུང་མིའི་རིགས་ཀྱི་སྤྱི་ཚོགས་ལ་བཅངས་པའི་མཛེས་སྡུག་ལྡན་པའི་ཕུགས་རེ་ཞིག་ཡིན། ལོ་རྒྱུས་ཐོག་ཀྲུང་གོ་འདི་ཉིད་དུས་ཡུན་རིང་པོའི་ནང་འཛམ་གླིང་གི་སྟོབས་འབྱོར་ཆེ་ཤོས་ཀྱི་རྒྱལ་ཁབ་གྲས་ཤིག་ཡིན་ནའང་། རྒྱལ་ཁབ་གཞན་ལ་མི་སེར་སྤེལ་བ་དང་བཙན་འཛུལ་བྱས་པའི་ཟིན་ཐོ་བཞག་མེད། དེ་ལས་ལྡོག་སྟེ་ནུབ་ཕྱོགས་རྒྱལ་ཁབ་ཀྱི་དེང་རབས་ཅན་དུ་འགྱུར་བར་དམག་འཁྲུག་དང་། བྲན་གཡོག་ཚོང་བ། མི་སེར་སྤེལ་བ། འཕྲོག་བཅོམ་སོགས་ཁྲག་དྲི་བྲོ་བའི་ནག་ཉེས་ཀྱིས་ཁེངས་ཤིང་། རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་སྡུག་བསྔལ་ཆེན་པོ་བཟོས་ཡོད། མིའི་རིགས་ཀྱི་སྤྱི་ཚོགས་དེང་རབས་ཅན་སླར་ཡང་ལོ་རྒྱུས་ཀྱི་བཞི་མདོ་རུ་སླེབས་སྐབས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མངོན་གསལ་དོད་པོས་བསྟན་གནང་དོན། “ཀྲུང་གོའི་ལུགས་ཀྱི་དེང་རབས་ཅན་ནི་མི་སེར་སྤེལ་ཡུལ་དང་འཕྲོག་བཅོམ་གྱི་ལམ་རྙིང་དུ་མི་སྐྱོད་པ་དང་། རྒྱལ་ཁབ་སྟོབས་འབྱོར་ལྡན་ན་བཙན་ངེས་ཡིན་པའི་ལམ་ཀྱོག་ཏུ་མི་འགྲོ་བར། ཞི་བའི་འཕེལ་རྒྱས་ཀྱི་མི་ཡུལ་གྱི་ཡང་དག་པའི་འགྲོ་ལམ་ཐོག་བསྐྱོད་རྒྱུ་ཡིན་”ཞེས་པ་དང་། “ཀྲུང་གོར་དེང་རབས་ཅན་མངོན་འགྱུར་བྱུང་བ་ནི་འཛམ་གླིང་ཞི་བདེའི་སྟོབས་ཤུགས་ཆེ་རུ་ཕྱིན་པ་དང་། རྒྱལ་སྤྱིའི་དྲང་བདེན་གྱི་སྟོབས་ཤུགས་ཆེ་རུ་ཕྱིན་པ་ཞིག་ཡིན། འཕེལ་རྒྱས་ཀྱི་ཚད་གང་འདྲ་ཞིག་ཏུ་སླེབས་ནའང་ཀྲུང་གོས་ནམ་ཡང་བཙན་དབང་བྱེད་རྒྱུ་མིན་ལ་ནམ་ཡང་རྒྱ་སྐྱེད་གཏོང་རྒྱུ་མིན།” རྩོམ་ཡིག་གལ་ཆེན་འདིའི་ནང་སྤྱི་ཁྱབ་ཧྲུའུ་ཅིས་གོམ་གང་མདུན་སྤོས་ཀྱིས་རྒྱས་འགྲེལ་གནང་དོན། “ཞི་བའི་འཕེལ་རྒྱས་རྒྱུན་འཁྱོངས་བྱས་ནས་འཛམ་གླིང་གི་ཞི་བདེ་དང་འཕེལ་རྒྱས་བློ་བརྟན་འགྱུར་མེད་ངང་སྲུང་སྐྱོང་བྱེད་པའི་ཁྲོད་རང་ངོས་འཕེལ་རྒྱས་དོན་གཉེར་བྱེད་པ་དང་། རང་ངོས་འཕེལ་རྒྱས་ལ་བརྟེན་ནས་འཛམ་གླིང་གི་ཞི་བདེ་དང་འཕེལ་རྒྱས་ལ་དེ་བས་ལེགས་པའི་སྒོ་ནས་སྲུང་སྐྱོང་བྱེད་པ། མིའི་རིགས་ཀྱི་ལས་དབང་གཅིག་མཐུན་ཚོགས་པ་བསྐྲུན་རྒྱུར་སྐུལ་འདེད་གཏོང་བ་སོགས་ནི་ཀྲུང་གོའི་ལུགས་ཀྱི་དེང་རབས་ཅན་གྱི་མངོན་གསལ་དོད་པའི་ཁྱད་ཆོས་ཤིག་རེད་”ཅེས་པ་དང་། “ནུབ་ཕྱོགས་བཙན་དབང་རྒྱལ་ཁབ་ཀྱིས་བཙན་འཛུལ་དང་བརྙས་བཅོས་བྱས་པའི་ཡ་ང་བའི་ལོ་རྒྱུས་དེ་ཀྲུང་ཧྭ་མི་རིགས་ཀྱིས་བརྒྱུད་མྱོང་བ་དང་ཞི་བདེ་རྩ་ཆེན་ཡིན་པ་སེམས་གཏིང་ནས་ཤེས་ཀྱི་ཡོད་པས་ནུབ་ཕྱོགས་རྒྱལ་ཁབ་ཀྱི་ལམ་རྙིང་པར་བསྐྱར་ཟློས་གཏན་ནས་བྱེད་མི་སྲིད།”

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྔ་རྗེས་སུ་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་། གོ་ལ་ཧྲིལ་པོའི་བདེ་འཇགས་གྲོས་འགོ། གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་བཅས་བཏོན་ནས་རྒྱལ་ཁབ་ཁག་གིས་ཡུན་རིང་ཞི་བདེ་དང་ཡོངས་ཁྱབ་བདེ་འཇགས། ཐུན་མོང་དར་རྒྱས། སྒོ་འབྱེད་བསྟུན་མཁས། དྭངས་གཙང་མཛེས་སྡུག་བཅས་ཀྱི་འཛམ་གླིང་བསྐྲུན་པར་ཐུན་མོང་གིས་གཞོལ་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་བསྐྲུན་པར་སྐུལ་འདེད་གཏོང་བའི་འབོད་སྐུལ་གནང་བ་རེད། འདས་པའི་ལོ་ངོ་10ཡི་རིང་ལ། ཀྲུང་གོས་འཛམ་གླིང་དཔལ་འབྱོར་འཕར་སྣོན་ཡོང་བར་ཆ་སྙོམས་ལེགས་སྐྱེས་འབུལ་ཚད་30%ལས་བརྒལ་ཡོད། གོ་ལ་ཧྲིལ་པོའི་དབུལ་པོ་ཉུང་གཏོང་ཐད་ལེགས་སྐྱེས་འབུལ་ཚད་70%ལྷག་ཙམ་ཟིན་ཡོད། གོ་ལ་ཧྲིལ་པོར་ཁ་ཕྱོགས་པའི་ཚད་གཞི་མཐོ་བའི་རང་མོས་ཉོ་ཚོང་ཁུལ་གྱི་དྲ་རྒྱ་འཛུགས་པ་དང་རྒྱུན་ཆད་མེད་པར་རྒྱ་ཆེར་བཏང་ནས་རྒྱལ་ཁབ་དང་ས་ཁུལ་140ལྷག་ཙམ་གྱི་ཉོ་ཚོང་རོགས་ཟླ་གཙོ་བོར་གྱུར་ཡོད། ཀྲུང་གོའི་རྒྱལ་སྤྱིའི་ནང་འདྲེན་དངོས་མང་སྟོན་ཚོགས་ཐོག་མ་བཏོད་པ་དང་། བློ་བརྟན་འགྱུར་མེད་ངང་ཕྱོགས་ཡོངས་ནས་སྒོ་མོ་འབྱེད་རྒྱ་ཆེ་རུ་བཏང་ནས་རྒྱལ་ཁབ་ཕྱི་ནང་གི་ཚོང་ར་འབྲེལ་མཐུད་དང་རྒྱུ་རྐྱེན་གཙོ་བོའི་ཐོན་ཁུངས་མཉམ་སྤྱོད་བྱས་ནས། ཀྲུང་གོའི་ཚོང་ར་དེ་འཛམ་གླིང་གི་ཚོང་ར་དང་མཉམ་སྤྱོད་ཚོང་ར། ཚང་མའི་ཚོང་ར་བཅས་སུ་འགྱུར་བ་བྱེད་དགོས།

ལག་ལེན་གྱི་ཐོག་ནས་ར་འཕྲོད་བྱུང་དོན། ཀྲུང་གོའི་ལུགས་ཀྱི་དེང་རབས་ཅན་གྱིས་འཛམ་གླིང་ལ་སྦྱིན་པ་ནི་ཞི་བདེ་ཡིན་པ་ལས་ཟིང་ཆ་མིན་པ་དང་། གོ་སྐབས་ཡིན་པ་ལས་འཇིགས་སྐུལ་མ་ཡིན་ཏེ། ཀྲུང་གོའི་མི་དམངས་ལ་བདེ་སྐྱིད་བསྐྲུན་པ་མ་ཟད་འཛམ་གླིང་ཐུན་མོང་ཐོག་འཕེལ་རྒྱས་ཡོང་བར་ཡང་སྐུལ་འདེད་གཏོང་ཐུབ། དེ་ཡང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྩོམ་ཡིག་གལ་ཆེན་འདིའི་ནང་ནན་གསུང་གནང་བ་ལྟར། “ཀྲུང་གོའི་ལུགས་ཀྱི་དེང་རབས་ཅན་གྱིས་རང་བཙན་རང་བདག་དང་རང་སྟོབས་རང་སྤེལ་རྒྱུན་འཁྱོངས་བྱེད་པ་དང་། མི་དམངས་ཡོངས་ཀྱི་དཀའ་སྤྱད་ངལ་རྩོལ་དང་གསར་གཏོད་གསར་སྐྲུན་ལ་བརྟེན་ནས་རང་ཉིད་འཕེལ་རྒྱས་དང་སྟོབས་ཆེར་གཏོང་བ་དང་། ནང་གནས་ཀྱི་སྒུལ་ཤུགས་སྐུལ་སློང་དང་ཕྱི་ཕྱོགས་ཀྱི་ཐོན་ཁུངས་ཞི་བའི་ངང་བེད་སྤྱོད་བྱ་རྒྱུ་ཟུང་འབྲེལ་བྱེད་པའི་བྱ་ཐབས་ལ་བརྟེན་ནས་རྒྱལ་ཁབ་འཕེལ་རྒྱས་ཡོང་བར་བྱེད་ཅིང་། རྣམ་པ་གང་རུང་གི་ཐོག་ནས་མི་རིགས་གཞན་དག་ལ་གཉའ་གནོན་དང་རྒྱལ་ཁབ་གཞན་གྱི་ཐོན་ཁུངས་དང་རྒྱུ་ནོར་འཕྲོག་བཅོམ་མི་བྱེད་པར། རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་ནུས་པས་ལྕོགས་ཚོད་ཀྱི་རྒྱབ་སྐྱོར་དང་རོགས་རམ་བྱེད་རྒྱུ་ཡིན།”

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཏང་གི་ཚོགས་ཆེན་ཉི་ཤུ་པའི་སྙན་ཞུའི་ནང་། ང་ཚོས་བློ་བརྟན་འགྱུར་མེད་ངང་ལོ་རྒྱུས་ཡང་དག་པའི་ཕྱོགས་སུ་ལངས་པ་དང་། མིའི་རིགས་ཀྱི་ཤེས་དཔལ་ཡར་ཐོན་གྱི་ཕྱོགས་སུ་ལངས་ཏེ། ཞི་བདེ་དང་འཕེལ་རྒྱས། མཉམ་ལས། གཉིས་ཕན་བཅས་ཀྱི་དར་ཆ་མཐོན་པོར་བསྒྲེངས་ནས། བློ་རྩ་བརྟན་པོས་འཛམ་གླིང་གི་ཞི་བདེ་སྲུང་སྐྱོང་དང་འཕེལ་རྒྱས་ཁྲོད་རང་ངོས་འཕེལ་རྒྱས་དོན་གཉེར་བྱེད་པ་དང་། རང་ངོས་འཕེལ་རྒྱས་ལ་བརྟེན་ནས་འཛམ་གླིང་གི་ཞི་བདེ་དང་འཕེལ་རྒྱས་དེ་བས་ལེགས་པའི་སྒོ་ནས་སྲུང་སྐྱོང་ཡང་བྱས་ཡོད་ཅེས་བརྗིད་ཉམས་ལྡན་པའི་ངང་གསལ་བསྒྲགས་གནང་བ་རེད། རྩོམ་ཡིག་གལ་ཆེན་འདིའི་ནང་སྤྱི་ཁྱབ་ཧྲུའུ་ཅི་ཡིས་ཡང་བསྐྱར་གསལ་བསྒྲགས་ནན་མོ་གནང་དོན། “ང་ཚོས་ཐོག་མཐའ་བར་གསུམ་དུ་ཞི་བདེ་དང་། འཕེལ་རྒྱས། མཉམ་ལས། མཉམ་ཁེ་བཅས་ཀྱི་དར་ཆ་མཐོན་པོར་སྒྲེང་བ་དང་། གཉིས་ཁེ་གཉིས་ཕན་གྱི་སྒོ་འབྱེད་འཐབ་ཇུས་ལག་བསྟར་བྱས་ཏེ། རྒྱུན་ཆད་མེད་པར་ཀྲུང་གོའི་འཕེལ་རྒྱས་གསར་པས་འཛམ་གླིང་ལ་གོ་སྐབས་གསར་པ་འདོན་སྤྲོད་བྱེད་དགོས། གོ་ལ་ཧྲིལ་པོའི་བཅོས་སྐྱོང་མ་ལག་བསྒྱུར་བཅོས་དང་འཛུགས་སྐྲུན་བྱེད་པར་ཧུར་ཐག་ཞུགས་པ་དང་། ཕྱོགས་མང་རིང་ལུགས་ངོ་མ་ལག་བསྟར་བྱེད་པ། མིའི་རིགས་ཡོངས་ཀྱི་ཐུན་མོང་གི་རིན་ཐང་དར་སྤེལ་གཏོང་བ། གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ་དོན་འཁྱོལ་ཡོང་བར་སྐུལ་འདེད་གཏོང་བ་བཅས་བྱས་ཏེ་མིའི་རིགས་ཞི་བདེ་དང་འཕེལ་རྒྱས་ཡོང་བར་ཧུར་ཐག་གིས་ལེགས་སྐྱེས་སྔར་ལས་ཆེ་བ་འབུལ་དགོས།”

སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་འཛུགས་སྐྲུན་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱ་རྒྱུ་ནི་ཀྲུང་ཧྭ་མི་རིགས་ཀྱི་ཆེས་མཐོའི་ཁེ་ཕན་དང་རྩ་བའི་ཁེ་ཕན་ཡིན། ཀྲུང་གོའི་གུང་ཁྲན་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་འབད་འཐབ་བྱས་པ་མཐའ་དག་མཐར་གཏུགས་ནས་བཤད་ན་དམིགས་འབེན་རླབས་པོ་ཆེ་འདི་མངོན་འགྱུར་བྱེད་ཆེད་ཡིན། “ཀྲུང་གོའི་ལུགས་ཀྱི་དེང་རབས་ཅན་ནི་ང་ཚོས་ཇི་ལྟར་བྱས་ཏེ་‘སེང་གེ་གཉིད་ལས་དཀྲོགས་པ་’དང་མི་རིགས་བསྐྱར་དར་མངོན་འགྱུར་ཡོང་བའི་ལོ་རྒྱུས་ཀྱི་བརྗོད་གཞི་གལ་ཆེན་འདིའི་ཆེད་དུ་ལན་བཏབ་པ་ཞིག་དང་། རང་ཉིད་ཀྱི་འགྲོ་ལམ་འདེམས་པ་དང་རང་ཉིད་ཀྱི་བྱ་བ་སྒྲུབ་པ་ཞིག་ཡིན།” བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་དང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་ཚན་རིག་དང་མཐུན་པའི་ཁྲིད་སྟོན་འོག །ཀྲུང་གོའི་ལུགས་ཀྱི་དེང་རབས་ཅན་གྱི་ཡངས་ཤིང་རྒྱ་ཆེ་བའི་འགྲོ་ལམ་འདི་དེད་ནས་གོམ་སྟབས་ཆེན་པོས་མདུན་སྐྱོད་བྱས་ན། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་བསྐྲུན་པའི་དམིགས་འབེན་མངོན་འགྱུར་བྱེད་ཐུབ་ངེས་ཡིན་ལ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་ཀྲུང་གོའི་ཕུགས་འདུན་མངོན་འགྱུར་བྱེད་ཐུབ་ངེས་ཡིན།

སྐར་མ་མཚོས་བསྒྱུར།