མགོ་མཇུག་ཡོད་པའི་སྒོ་ནས་ཐོག་མཐའ་བར་གསུམ་དུ་གཟབ་ནན་བྱས་ཏེ་བརྗོད་དོན་གཙོ་བོའི་སློབ་གསོར་གྲུབ་འབྲས་དངོས་ཐོན་པར་བྱེད་དགོས།

“རིམ་པ་ཁག་གི་ཏང་རྩ་འཛུགས་ཀྱིས་ཏང་ཀྲུང་དབྱང་གི་བཀོད་སྒྲིག་དོན་འཁྱོལ་བྱས་ཏེ། མགོ་མཇུག་ཡོད་པའི་སྒོ་ནས་ཐོག་མཐའ་བར་གསུམ་དུ་གཟབ་ནན་བྱས་ཏེ་གྲུབ་འབྲས་དངོས་ཐོན་པར་བྱེད་དགོས།” སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཡུན་རིང་མ་འགོར་བའི་སྔོན་སི་ཁྲོན་དུ་རྟོག་ཞིབ་གནང་སྐབས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་ཁག་དང་པོའི་བརྗོད་དོན་གཙོ་བོའི་སློབ་གསོའི་ལས་དོན་དེ་མཇུག་བསྡུའི་དུས་མཚམས་སུ་སླེབས་པར་བྱེ་བྲག་གི་བཀོད་སྒྲིག་གནང་བ་དང་། བརྗོད་དོན་གཙོ་བོའི་སློབ་གསོའི་གྲུབ་འབྲས་དཔྱད་དཔོག་ཡག་པོ་བྱ་རྒྱུར་བླང་བྱ་ཁ་གསལ་བཏོན་པ་དང་ཁ་ཕྱོགས་གསལ་སྟོན་གནང་བ་རེད།

“མགོ་ཡོད་མཇུག་ཡོད་བྱས་ན། བྱ་བ་མི་འགྲུབ་གང་ཡང་མེད།” ཐེངས་འདིའི་བརྗོད་དོན་གཙོ་བོའི་སློབ་གསོ་དེ་གོང་འོག་ཁག་གཉིས་ལ་དབྱེ་ནས་སྤེལ་རྒྱུ་ཡིན་ལ་། ཁག་དང་པོ་ནི་ད་ལོའི་ཟླ་4པ་ནས་འགོ་ཚུགས་པ་དང་ཟླ་8པའི་ནང་གཞི་རྩའི་ཆ་ནས་མཇུག་བསྒྲིལ། ཁག་གཉིས་པ་ནི་ཟླ་9པ་ནས་འགོ་ཚུགས་རྒྱུ་དང་སང་ལོའི་ཟླ་དང་པོའི་ནང་མཇུག་འགྲིལ་རྒྱུ་རེད། མགོ་མཇུག་ཡོད་པའི་སྒོ་ནས་ཐོག་མཐའ་བར་གསུམ་དུ་གཟབ་ནན་བྱས་ཏེ་བརྗོད་དོན་གཙོ་བོའི་སློབ་གསོ་ཁག་དང་པོ་སྤེལ་བ་དང་གྲུབ་འབྲས་དཔྱད་དཔོག་གི་ལས་དོན་ཡག་པོ་བསྒྲུབས་ན། གྲུབ་འབྲས་སྲ་བརྟན་དང་རྒྱ་སྐྱེད་གཏོང་ཐུབ་པ་དང་། བྱེད་ཐབས་དང་ཉམས་མྱོང་ལེགས་པོ་ཕྱོགས་བསྡོམས་བྱེད་ཐུབ་ཅིང་། བརྗོད་དོན་གཙོ་བོའི་སློབ་གསོ་སྔར་བས་གཏིང་ཟབ་དང་དོན་དངོས་སུ་སྐྱོད་པར་སྐུལ་འདེད་གཏོང་ཐུབ་པ་མ་ཟད། དུས་ཐོག་ཏུ་ཆད་ལུས་ཞིབ་བཤེར་དང་ཁ་གསབ་བྱས་ནས་ལས་ཀའི་སྤུས་ཚད་དང་གྲུབ་འབྲས་ཆེ་རུ་བཏང་སྟེ་སྤེལ་གྲབས་ཡོད་པའི་ཁག་གཉིས་པའི་བརྗོད་དོན་གཙོ་བོའི་སློབ་གསོར་དཔེ་སྟོན་སྣེ་ཁྲིད་ཀྱི་ནུས་པ་འདོན་སྤེལ་བྱེད་ཐུབ། རིམ་པ་ཁག་གི་ཏང་རྩ་འཛུགས་དང་། རྒྱ་ཆེའི་ཏང་ཡོན་དང་ལས་བྱེད་པ་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱས་ཏེ། སྒྱིད་ལུག་གི་བསམ་ཚུལ་མཐའ་གཅིག་ཏུ་ཁྱད་བསད་བྱས་པ་དང་བརྗོད་དོན་གཙོ་བོའི་སློབ་གསོའི་ལས་འགན་ཁག་དོན་འཁྱོལ་དང་གྲུབ་འབྲས་ཐོན་པར་རྒྱུན་མཐུད་ངང་སྐུལ་འདེད་བཏང་ནས་བརྗོད་དོན་གཙོ་བོའི་སློབ་གསོའི་གྲུབ་འབྲས་དེ་ལག་ལེན་གྱི་ཞིབ་བཤེར་ཐེག་ཐུབ་པ་དང་མང་ཚོགས་བློ་ཡིད་ཚིམ་པོ་ཡོང་བ་ཁག་ཐེག་བྱེད་དགོས།

བརྗོད་དོན་གཙོ་བོའི་སློབ་གསོའི་དཔྱད་དཔོག་ལས་དོན་སྒྲུབ་རྒྱུ་ནི་ཉམས་མྱོང་ཕྱོགས་བསྡོམས་དང་གྲུབ་འབྲས་ལ་ཞིབ་བཤེར་བྱེད་པའི་བྱ་ཐབས་གལ་ཆེན་ཞིག་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“བརྗོད་དོན་གཙོ་བོའི་སློབ་གསོའི་གྲུབ་འབྲས་ལ་ཚན་རིག་དང་མཐུན་ཞིང་ཕྱི་རོལ་ཡུལ་དང་མཐུན་པའི་སྒོ་ནས་དཔྱད་དཔོག་བྱེད་དགོས་”ཞེས་བསྟན་གནང་བ་མ་ཟད། ད་དུང་རིགས་པའི་གཞུང་ལུགས་སློབ་སྦྱོང་དང་། བརྟག་དཔྱད་ཞིབ་འཇུག །འཕེལ་རྒྱས་ལ་སྐུལ་འདེད། དག་ཐེར་ལེགས་བཅོས་ལ་ཞིབ་བརྟག །ལས་བྱེད་པའི་དཔུང་ཁག་གི་སློབ་གསོ་དག་ཐེར་སོགས་ཕྱོགས་5ལ་དམིགས་ནས་ཁ་གསལ་ལ་ཞིབ་ཕྲའི་ཞིབ་བཤེར་ཚད་གཞི་བཏོན་གནང་བ་རེད། ཕྱོགས་5པོ་འདིའི་ཐད་ཀྱི་ཞིབ་བཤེར་ཚད་གཞི་ནི་ཐེངས་འདིའི་བརྗོད་དོན་གཙོ་བོའི་སློབ་གསོའི་གཙོ་གནད་ཀྱི་བྱེད་ཐབས་དང་ལས་འགན་ཁག་ཏུ་ཁྱབ་པ་དང་། ངོས་འཛིན་དང་ལག་ལེན་ཟུང་འབྲེལ་དང་། རིགས་པའི་གཞུང་ལུགས་དང་དོན་དངོས་ཟུང་འབྲེལ། རང་སྣང་གི་འཇིག་རྟེན་བསྒྱུར་བཀོད་དང་ཕྱི་རོལ་ཡུལ་གྱི་འཇིག་རྟེན་བསྒྱུར་བཀོད་བཅས་ཕན་ཚུན་གཅིག་གྱུར་ཡིན་པ་མཚོན་ཡོད་པས་དམིགས་གཏད་རང་བཞིན་དང་ཁྲིད་སྟོན་རང་བཞིན་ཧ་ཅང་ཆེན་པོ་ལྡན་པ་རེད། རིམ་པ་ཁག་གི་ཏང་རྩ་འཛུགས་དང་། རྒྱ་ཆེའི་ཏང་ཡོན་དང་ལས་བྱེད་པས་དེ་གཞི་འཛིན་སར་བྱས་ནས་དངོས་ཐོག་བདེན་འཚོལ་རྒྱུན་འཁྱོངས་དང་ཞིབ་བསྡུར་ཞིབ་བཤེར་ནན་ཏན་བྱས་ཏེ་དཔྱད་དཔོག་ལས་དོན་གནད་ལ་འཁེལ་བ་དང་འབེན་ཡོད་སར་མདའ་འཕེན་ཐུབ་པ་བྱེད་དགོས།

རིགས་པའི་གཞུང་ལུགས་ཀྱི་ཟིལ་ཤུགས་དེ་ལག་ལེན་དུ་བསྟར་ན་གཞི་ནས་འདོན་སྤེལ་བྱེད་ཐུབ། སློབ་སྦྱོང་གི་གྲུབ་འབྲས་ནི་ལག་ལེན་གྱི་གྲུབ་འབྲས་ལ་བརྟེན་ནས་ཞིབ་བཤེར་བྱེད་དགོས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་བྱེད་པའི་དམིགས་ཡུལ་ནི་བེད་སྤྱོད་གཏོང་རྒྱུ་དེ་ཡིན་པ་དང་། དགོངས་པ་དེ་རང་སྣང་གི་འཇིག་རྟེན་དང་ཕྱི་རོལ་ཡུལ་གྱི་འཇིག་རྟེན་བསྒྱུར་བཀོད་བྱེད་པའི་བསམ་བློའི་དྲག་ཆས་སྟོབས་ཆེན་ཞིག་ཏུ་འགྱུར་བ་བྱ་རྒྱུ་དེ་རེད། རིགས་པའི་གཞུང་ལུགས་སློབ་སྦྱོང་གི་གྲུབ་འབྲས་ལ་ཞིབ་བཤེར་བྱེད་དགོས་ན། ཏང་གི་གསར་གཏོད་རིགས་པའི་གཞུང་ལུགས་དེ་སེམས་ལ་ཟུག་ཡོད་མེད་དང་། ཏང་ཡོན་ལས་བྱེད་པས་བསམ་བློ་གཏོང་མཁས་མིན་དང་བེད་སྤྱོད་བྱེད་མཁན་མིན་ལ་བལྟ་དགོས། བརྟག་དཔྱད་ཞིབ་འཇུག་བྱེད་པ་ནི་ཕྱི་ཚུལ་གྱི་རྣམ་པ་ཙམ་གྱི་ཆེད་དུ་མ་ཡིན་པར་སྐད་ཆ་དྲང་པོ་ལ་ཉན་པ་དང་། གནས་ཚུལ་དངོས་ལ་བརྟག་དཔྱད་བྱེད་པ། གནད་དོན་དངོས་སུ་རྟོགས་པ་དང་གནད་དོན་ཐག་གཅོད་བྱེད་པ་བཅས་ཀྱི་ཆེད་དུ་ཡིན། བརྟག་དཔྱད་ཞིབ་འཇུག་གི་གྲུབ་འབྲས་ལ་ཞིབ་བཤེར་བྱེད་དགོས་ན། སྤྱི་ཚོགས་ཀྱི་གནས་ཚུལ་དང་མི་དམངས་ཀྱི་བསམ་འདུན་གསལ་རྟོགས་ཐུབ་མིན་དང་གནད་དོན་དངོས་ཐག་གཅོད་ཐུབ་མིན་ལ་བལྟ་དགོས། བརྗོད་དོན་གཙོ་བོའི་སློབ་གསོ་སྤེལ་སྐབས་སློབ་སྦྱོང་བྱ་རྒྱུ་དང་ལས་དོན་བསྒྲུབ་རྒྱུ་གཉིས་ཁ་ཁ་སོ་སོར་མི་འབྱེད་པར། སློབ་སྦྱོང་དང་བརྟག་དཔྱད་ཞིབ་འཇུག་བྱ་རྒྱུ་དེ་ཏང་གི་ཚོགས་ཆེན་ཉི་ཤུ་པའི་ཐོག་བཀོད་སྒྲིག་བྱས་པའི་ལས་ཀ་དང་ལས་འགན་ཁག་ཏུ་དོན་འཁྱོལ་བྱེད་པ་དང་། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ལས་འགན་ཨང་དང་པོ་འདིའི་ཐོག་དོན་འཁྱོལ་བྱེད་དགོས། འཕེལ་རྒྱས་ལ་སྐུལ་འདེད་གཏོང་བའི་གྲུབ་འབྲས་ལ་ཞིབ་བཤེར་བྱེད་དགོས་ན། སྤུས་ཚད་མཐོ་བའི་འཕེལ་རྒྱས་ལ་ཚད་བརྒལ་གསར་པ་ཡོད་མེད་དང་མི་དམངས་ཀྱི་འཚོ་བའི་སྤུས་ཚད་མཐོ་རུ་གསར་པ་ཕྱིན་ཡོད་མེད་ལ་བལྟ་དགོས། དག་ཐེར་ལེགས་བཅོས་ལ་ཞིབ་བཤེར་བྱེད་པ་ནི་བརྗོད་དོན་གཙོ་བོའི་སློབ་གསོའི་ཐབས་བཀོད་གལ་ཆེན་ཞིག་ཡིན་པས། ཞིབ་བརྟག་བྱེད་སྐབས་ནན་པོ་ངོ་མ་བྱེད་དགོས་པ་དང་དག་ཐེར་ལེགས་བཅོས་བྱེད་སྐབས་ཕྱི་ཚུལ་ཙམ་བྱེད་མི་རུང་། དག་ཐེར་ལེགས་བཅོས་ཀྱི་གྲུབ་འབྲས་ལ་ཞིབ་བཤེར་དང་ཞིབ་བརྟག་བྱེད་དགོས་ན། གནད་དོན་གྱི་འགག་རྩ་གནད་ལ་འཁེལ་བ་འཚོལ་ཐུབ་མིན་དང་དག་ཐེར་ལེགས་བཅོས་དང་བཅོས་སྐྱོང་གནད་ལ་འཁེལ་བ་བྱེད་ཐུབ་མིན་ལ་བལྟ་དགོས། ཀྲུང་དབྱང་དང་རྒྱལ་ཁབ་ལས་ཁུངས་ཀྱི་སྡེ་ཁག་ཁག་གིས་བརྗོད་དོན་གཙོ་བོའི་སློབ་གསོའི་ཁྲོད་ལས་ཁུངས་དང་ཁོངས་གཏོགས་ནང་གི་ལས་བྱེད་པའི་དཔུང་ཁག་གི་སློབ་གསོ་དག་ཐེར་དམ་འཛིན་བྱ་རྒྱུ་དེ་ནི་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་འཐབ་ལམ་གསར་པའི་ཐོག་ཕྱོགས་ཡོངས་ནས་ཏང་ནན་སྐྱོང་བྱ་རྒྱུར་སྐུལ་འདེད་གཏོང་བའི་ཐབས་བཀོད་གལ་ཆེན་ཞིག་ཡིན་ལ། སློབ་གསོ་ནན་པོས་བསམ་བློ་གཙང་མ་བཟོ་བ་དང་དག་ཐེར་ནན་པོས་རྩ་འཛུགས་གཙང་མ་བཟོ་ཆེད་རེད། ལས་བྱེད་པའི་དཔུང་སྡེའི་སློབ་གསོ་དག་ཐེར་གྱི་གྲུབ་འབྲས་ལ་ཞིབ་བཤེར་བྱེད་སྐབས་བསམ་བློ་མི་གཙང་བ་དང་རྩ་འཛུགས་མི་གཙང་བའི་སྣང་ཚུལ་ཡོ་བསྲང་བྱེད་མིན་དང་ཆབ་སྲིད་ཀྱི་མངོན་མེད་རྐྱེན་ངན་བསལ་ཡོད་མེད་ལ་བལྟ་དགོས།

“ཁང་པའི་ཐིགས་ཆུ་སྡོད་མིས་ཤེས། །སྲིད་ཀྱི་འཇིག་ཉེན་འབངས་ཀྱིས་ཤེས། །” སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གནའ་ཚིག་འདི་ཐེངས་མང་པོར་ལུང་དྲངས་ཏེ། “མང་ཚོགས་ཀྱི་བློ་ལ་འབབ་པ་ནི་ང་ཚོའི་ཏང་གིས་བྱ་བ་ཐམས་ཅད་ལེགས་པོ་སྒྲུབ་པའི་རིན་ཐང་གི་ལྟ་བ་དང་རྩ་བའི་ཚད་གཞི་ཡིན་པ་དང་། མང་ཚོགས་ཀྱི་བསམ་འཆར་ནི་ཚད་གཞི་ལེགས་ཤོས་ཤིག་ཡིན་”ཞེས་ནན་གསུང་གནང་ཡོད། བརྗོད་དོན་གཙོ་བོའི་སློབ་གསོ་སྤེལ་བ་ལེགས་མིན་དང་དོན་དངོས་དང་མཐུན་མིན་ཐད། མང་ཚོགས་ལ་ཐད་ཀར་མྱོང་ཚོར་ཡོད་ལ་སྐད་ཆ་ཤོད་དབང་ཡང་ཡོད། བརྗོད་དོན་གཙོ་བོའི་སློབ་གསོའི་གྲུབ་འབྲས་ལ་དཔྱད་དཔོག་བྱ་རྒྱུ་དམ་འཛིན་ལེགས་པོ་བྱེད་དགོས་པ་ལས། “རང་གཏམ་རང་བརྗོད་དང་། རང་དཀྲོལ་རང་ལེན་”གཏན་ནས་བྱེད་མི་རུང་བ་དང་། སྒོ་གཏན་ནས་ཁེར་སྡོད་དང་བསམ་བློ་མཁྲེགས་འཛིན་བྱེད་མི་རུང་། མི་དམངས་མང་ཚོགས་ཀྱི་བློ་ལ་འབབ་མིན་དེ་བརྗོད་དོན་གཙོ་བོའི་སློབ་གསོའི་གྲུབ་འབྲས་ལ་དཔྱད་འཇོག་བྱེད་པའི་རྩ་བའི་ཚད་གཞིར་བརྩིས་ནས་དོན་དངོས་ཀྱི་ཐོག་ནས་སྐད་ཆ་ཤོད་པ་དང་མང་ཚོགས་ལ་གདེང་འཇོག་བྱེད་དུ་འཇུག་དགོས། སྒོ་ཕྱེ་ནས་དཔྱད་དཔོག་ལ་དམ་འཛིན་བྱས་ཏེ་ཡིག་བསྐུར་ངོ་བཅར་སྣེ་ལེན་དང་། བཅར་འདྲི་དང་བཞུགས་མོལ་སྤེལ་བ། དམངས་འཚོའི་ཐད་གཏོང་ཁ་པར་དང་དྲ་རྒྱའི་ལས་སྟེགས་སྤྱོད་པ་སོགས་ཀྱི་བྱ་ཐབས་སྣ་ཚོགས་ལ་བརྟེན་ནས་མང་ཚོགས་ནང་དུ་ཞུགས་པའི་ཐབས་ལམ་ཤར་བགྲོད་ཐུབ་པ་བྱས་ནས་དཔྱད་དཔོག་དོན་དངོས་དང་མཐུན་ཞིང་མི་དམངས་ཀྱི་བསམ་འདུན་གང་ལེགས་མཚོན་པར་བྱེད་དགོས།

ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ནི་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་འགྲོ་བར་གནོད་པ་བྱེད་མཁན་དགྲ་བོ་ཆེན་པོ་ཞིག་ཡིན་ལ། ཐེངས་འདིའི་བརྗོད་དོན་གཙོ་བོའི་སློབ་གསོའི་ནང་གཙོ་གནད་དུ་བཟུང་ནས་དག་ཐེར་ལེགས་བཅོས་ཞིབ་བརྟག་བྱེད་དགོས་པའི་གནད་དོན་ཡང་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་གནང་དོན། “བརྗོད་དོན་གཙོ་བོའི་སློབ་གསོའི་གྲུབ་འབྲས་ལ་དཔྱད་དཔོག་བྱེད་པའི་ཕྱོགས་གལ་ཆེན་ཞིག་ནི་ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཐག་གཅོད་ནུས་ལྡན་བྱེད་ཐུབ་མིན་ལ་བལྟ་དགོས་པ་དང་། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཀྱི་བྱ་དངོས་ལ་ཞིབ་བརྟག་ཐེངས་གཅིག་བྱེད་དགོས།” ཕྱི་ཚུལ་རིང་ལུགས་ཀྱི་སྐོར། གཙོ་བོ་ཤེས་སྤྱོད་མི་གཅིག་པ་དང་། དོན་འབྲས་ལྷུར་ལེན་མི་བྱེད་པ། ཚོགས་འདུ་དང་ཡིག་ཆ་མང་བ། ལྟར་སྣང་མཛེས་ལམ་ལ་དགའ་བ། མིང་གྲགས་ལ་རྔམ་པ། མི་བདེན་རྫུན་སྒྲིག་བྱེད་པ་སོགས་དང་། དཔོན་ཉམས་རིང་ལུགས་ཀྱི་སྐོར། གཙོ་བོ་དོན་དངོས་དང་ཁ་བྲལ་བ་དང་། མང་ཚོགས་དང་ཁ་བྲལ་བ། མཐོ་སར་བསྡད་ནས་དོན་དངོས་ལ་སྣང་ཆུང་བྱེད་པ། ང་ཆེ་ང་བཙན་བྱེད་པ། རང་ཉིད་ཆེ་རློམ་བྱེད་པ་སོགས་རེད། བརྗོད་དོན་གཙོ་བོའི་སློབ་གསོའི་གྲུབ་འབྲས་ལ་དཔྱད་དཔོག་ཡག་པོ་བྱེད་དགོས་ན། ཐེངས་འདིའི་བརྗོད་དོན་གཙོ་བོའི་སློབ་གསོ་སྤེལ་རིམ་དུ་གནད་དོན་དེ་དག་ཡོད་མེད་ལ་ཞིབ་བརྟག་ནན་ཏན་བྱེད་དགོས་པ་དང་། རྒྱུན་ལྡན་གྱི་ལས་ཀའི་ཁྲོད་ཕྱི་ཚུལ་རིང་ལུགས་དང་། དཔོན་ཉམས་རིང་ལུགས་ཀྱི་སྤྱོད་ཚུལ་སྟེང་གི་སྐྱོན་དང་དྲི་མ་ལ་དག་སེལ་ཆེན་པོ་དང་། ཉམས་གསོ་ཆེན་པོ། གཙང་འཕྱག་ཆེན་པོ་བཅས་བྱེད་དགོས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གནད་ལ་འཁེལ་བའི་སྒོ་ནས་བསྟན་གནང་དོན། “ཕྱི་ཚུལ་རིང་ལུགས་ཀྱི་ངོ་བོ་ནི་རང་སྣང་རིང་ལུགས་དང་ཁེ་ཕན་རིང་ལུགས་ཡིན་པ་དང་། འབྱུང་རྩ་ནི་སྲིད་སྐྱོང་བྱས་འབྲས་ཀྱི་ལྟ་བ་ནོར་འཁྲུལ་དང་འགན་འཁྲི་འཁུར་སེམས་ཉམས་པ་དེ་རེད།” “དཔོན་ཉམས་རིང་ལུགས་ཀྱི་ངོ་བོ་ནི་བཀས་བཀོད་རྒྱུད་འཛིན་གྱི་བསམ་བློའི་ལྷག་རོ་དང་འབྱུང་རྩ་ནི་དཔོན་རང་གནས་ཀྱི་བསམ་བློ་ཚབས་ཆེ་བ་དང་། དབང་ཆའི་ལྟ་བ་འཁྲུལ་བ་དེ་རེད།” སྤྱོད་ཚུལ་གྱི་གནད་དོན་ནི་རྩ་བའི་ཆ་ནས་ཏང་གཤིས་ཀྱི་གནད་དོན་ཡིན། སྤྱོད་ཚུལ་བརྒྱུད་ནས་ཏང་གཤིས་ལ་ལྟ་བ་དང་། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་རྒྱབ་ཀྱི་དབང་ཆའི་ལྟ་བ་གཞན་འགྱུར་དང་། སྲིད་སྐྱོང་བྱས་འབྲས་ཀྱི་ལྟ་བ་འཁྲུལ་བ། བྱ་གཞག་གི་ལྟ་བ་ནོར་འཛོལ་སོགས་གཏིང་རིམ་གྱི་གནད་དོན་ལ་དབྱེ་ཞིབ་གཏིང་ཟབ་བྱས་ན་གཞི་ནས་ནད་དང་བསྟུན་ནས་སྨན་བཅོས་བྱེད་ཐུབ་པ་དང་གྲུབ་འབྲས་ངོ་མ་ཐོན་ཐུབ།

དམངས་གཙོའི་འཚོ་བའི་ཚོགས་འདུ་ནི་ཏང་ནང་གི་དམངས་གཙོ་དར་སྤེལ་དང་། ཏང་ནང་གི་ལྟ་སྐུལ་ལ་ཤུགས་སྣོན། འགོ་ཁྲིད་ཚན་པ་རང་ངོས་ཀྱི་སྟོབས་ཤུགས་ལ་བརྟེན་ནས་འགལ་བ་དང་གནད་དོན་ཐག་གཅོད་བཅས་བྱེད་པའི་བྱེད་སྟངས་གལ་ཆེན་ཞིག་རེད། སྤུས་ཚད་མཐོ་བའི་ཆེད་དོན་དམངས་གཙོའི་འཚོ་བའི་ཚོགས་འདུ་དང་རྩ་འཛུགས་ཀྱི་འཚོ་བའི་ཚོགས་འདུ་འཚོག་རྒྱུ་ནི་བརྗོད་དོན་གཙོ་བོའི་སློབ་གསོའི་དག་ཐེར་ལེགས་བཅོས་ལ་ཞིབ་བརྟག་བྱེད་པའི་གཞི་རྟེན་གལ་ཆེན་ཞིག་ཡིན་ལ། བརྗོད་དོན་གཙོ་བོའི་སློབ་གསོའི་གྲུབ་འབྲས་ལ་རྩིས་བཤེར་དང་ཞིབ་བརྟག་བྱས་པ་ཞིག་ཀྱང་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐེངས་མང་ནན་གསུང་གནང་དོན། “ཏང་ནང་གི་འཚོ་བ་གཟབ་ནན་བྱ་རྒྱུ་ནི་ཏང་ནང་གི་རང་ངོས་གནད་དོན་ཐག་གཅོད་པའི་ཐབས་ལམ་གལ་ཆེན་ཡིན་”ཞེས་པ་དང་། “དམངས་གཙོའི་འཚོ་བའི་ཚོགས་འདུ་དུས་ཐོག་ཏུ་འཚོག་དགོས་པ་དང་། གནད་དོན་གལ་ཆེན་དང་ཡོངས་ཁྱབ་རང་བཞིན་ལྡན་པའི་གནད་དོན་ལ་ཐུག་པ་དང་། ཐུན་མོང་གིས་སྐྱོན་བརྗོད་དང་རང་སྐྱོན་རང་བརྗོད་བྱ་དགོས་རིགས་ཡིན་ན། དམངས་གཙོའི་འཚོ་བའི་ཚོགས་འདུ་འཚོགས་ནས་དོན་དག་གསལ་པོར་བཤད་པ་དང་མཐིལ་ཕྱིན་པར་བཤད་དགོས།” རྒྱ་ཆེའི་ཏང་ཡོན་དང་ལས་བྱེད་པས་རང་ངོས་ཀྱི་གསར་བརྗེའི་སྙིང་སྟོབས་ལ་བརྟེན་ནས་ཏང་དང་། བྱ་གཞག །བློ་མཐུན། རང་ཉིད་བཅས་ལ་ཚད་མཐོའི་འགན་འཁུར་གྱི་རྣམ་འགྱུར་ཐོག་ནས་རིགས་པའི་གཞུང་ལུགས་སློབ་སྦྱོང་དང་། ཆབ་སྲིད་ཀྱི་བྱང་ཚད་དང་། ནུས་པ་དང་འཇོན་ཐང་། འགན་འཁྲི་འཁུར་ནུས། ལས་ཀའི་སྤྱོད་ཚུལ། སྤྱོད་གཙང་རང་གཅུན་སོགས་ཕྱོགས་6ཐད་ཀྱི་མངོན་གསལ་དོད་པའི་གནད་དོན་དང་། ལྷག་པར་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སློབ་སྦྱོང་ལ་བརྟེན་ནས་བློ་སྒྲིམ་སེམས་སྐྱེད་དང་། སློབ་སྦྱོང་ལ་བརྟེན་ནས་བློ་གྲོས་འཕེལ་བ། སློབ་སྦྱོང་ལ་བརྟེན་ནས་སྤྱོད་ཚུལ་སྲོང་བ། སློབ་སྦྱོང་ལ་བརྟེན་ནས་ལས་དོན་སྐུལ་བ་བཅས་བྱེ་བྲག་གི་བླང་བྱ་ཁག་12ཞིབ་བསྡུར་བྱས་ཏེ། རང་ཉིད་ནང་དུ་བཅུག་པ་དང་། འགན་འཁྲི་ནང་དུ་བཅུག་པ། ལས་ཀ་ནང་དུ་བཅུག་པ་བཅས་བྱས་ནས་གནད་དོན་གྱི་འགག་རྩ་ནན་དཔྱད་དང་། ཏང་གཤིས་དབྱེ་ཞིབ་ཟབ་མོ་བྱེད་པ། བསམ་བློའི་འབྱུང་རྩ་འཚོལ་བ། དམིགས་གཏད་ཡོད་པའི་སྒོ་ནས་ལེགས་བཅོས་ཐབས་བཀོད་འདོན་པ་སོགས་བྱེད་དགོས། གྲི་ཁ་ནང་དུ་བསྐོར་བ་དང་། རང་ངོས་གསར་བརྗེ་བྱ་རྒྱུ་རྒྱུན་འཁྱོངས་བྱས་ཏེ་སྐྱོན་བརྗོད་དང་རང་སྐྱོན་རང་བརྗོད་ཀྱི་མཚོན་ཆ་བེད་སྤྱོད་གང་ལེགས་བྱེད་དགོས་པ་དང་། རང་སྐྱོན་རང་བརྗོད་བྱེད་སྐབས་རང་ཉིད་ལ་དབྱེ་ཞིབ་བྱེད་ཕོད་པ་དང་། སྐྱོན་མཚང་འབྱིན་ཐུབ་པ། མི་དང་དོན་དག་དང་བསམ་བློ་མངོན་པ། ཕན་ཚུན་སྐྱོན་བརྗོད་བྱེད་སྐབས་གནད་དོན་ངོ་མ་འདོན་པ་བཅས་བྱས་ནས་ངོ་མདོག་དམར་པོར་འགྱུར་བ་དང་རྔུལ་ཆུ་བཞུར་བ། དུག་སེལ་ནད་བཅོས་བཅས་ཀྱི་གྲུབ་འབྲས་ཐོན་པར་བྱས་ཏེ་བསམ་པའི་གཏིང་ནས་གཞི་སྒྱུར་རྩ་སྒྱུར་དང་རྩ་བ་བརྟན་སྲུང་བྱེད་དགོས།

ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱ་རྒྱུ་ནི་རྒྱུན་མཐུད་ངང་གཏིང་ཟབ་ཏུ་གཏོང་བ་དང་རྒྱུན་ཆད་མེད་པར་མཐོ་རུ་གཏོང་དགོས་པའི་བརྒྱུད་རིམ་ཞིག་རེད། རྒྱ་ཆེའི་ཏང་ཡོན་དང་ལས་བྱེད་པས་ཏང་གི་གསར་གཏོད་རིགས་པའི་གཞུང་ལུགས་ཤེས་སུ་འཇུག་པ་དང་ཁོང་དུ་ཆུད་པ་དང་ཏན་ཏིག་བསྒྲུབ་པ་སོགས་ནི་ཆབ་སྲིད་ཀྱི་དོན་གཉེར་ཞིག་དང་། ལས་ཀ་སྒྲུབ་སྟངས་ཤིག །འཚོ་བའི་གོམས་གཤིས་ཤིག་བཅས་ལ་བརྩིས་ཏེ་རྒྱུན་འཁྱོངས་ལྷོད་མེད་ངང་སློབ་སྦྱོང་ཟབ་མོ་བྱེད་པ་དང་གོ་བ་ཟབ་མོ་ལེན་ནས་ཡིད་བརྟན་ལས་སྒྲུབ་བྱེད་དགོས། བདེན་དོན་གྱི་འོད་ཟེར་ལ་བརྟེན་ནས་འབད་འབུངས་ཡར་བརྩོན་གྱི་ལམ་བུ་གསལ་བར་བྱེད་པ་དང་། ཚན་རིག་དང་མཐུན་པའི་རིགས་པའི་གཞུང་ལུགས་ལ་བརྟེན་ནས་ལག་ལེན་རླབས་པོ་ཆེ་ལ་སྣེ་ཁྲིད་བྱས་ཏེ། ལག་ལེན་དང་། མི་དམངས། ལོ་རྒྱུས་བཅས་ཀྱི་ཞིབ་བཤེར་ཐེག་ཐུབ་པའི་གྲུབ་འབྲས་དངོས་དེ་བས་མང་བ་གཏོད་དགོས།

གནམ་ལྷ་རྒྱལ་གྱིས་བསྒྱུར།