གཡུ་འབྲུག་དགྱེས་པའི་དགའ་སྟོན་གྱིས། རྫོགས་ལྡན་དུས་ལ་མཆོད་པ་ཕུལ།

སྤྱི་ཟླ་2པའི་ཚེས་10ཉིན་སྟེ་ལོ་སར་ཚེས་གཅིག་གི་སྔ་དྲོའི་ཆུ་ཚོད་དགུ་པའི་ཐོག །སི་ཁྲོན་རྒྱང་བསྒྲགས་བརྙན་འཕྲིན་ཁང་ཁམས་པའི་བརྙན་འཕྲིན་དང་མི་རིགས་རླུང་འཕྲིན། ཀྲུང་གུང་གསེར་རྟ་རྫོང་ཨུ། གསེར་རྟ་རྫོང་མི་དམངས་སྲིད་གཞུང་གིས་མཉམ་འབྲེལ་སྒོས་གཙོ་སྒྲུབ་བྱས་པའི་བོད་རབ་རྒྱན་ཤིང་ཕོ་འབྲུག་ལོའི་ལོ་སར་སྤྲོ་ཚོགས《གཡུ་འབྲུག་དགྱེས་སྟོན》ཞེས་པ་ཁམས་པའི་བརྙན་འཕྲིན་ཐོག་ནས་བཏང་ཞིང་། རྒྱ་ཆེའི་མང་ཚོགས་ཀྱི་དགའ་བསུ་ཆེན་པོ་ཐོབ།

རྒྱུས་ལོན་བྱས་པ་ལྟར་ན། ཐེངས་འདིའི་ལོ་སར་སྤྲོ་ཚོགས་ཐོག །དུས་རབས་གསར་པའི་མཐོ་སྒང་གི་ཡར་ངོའི་ཟླ་ལྟར་འཕེལ་བའི་བདེ་སྐྱིད་འཚོ་བ་མཚོན་པ་དང་། སྣ་མང་ཕུན་སུམ་ཚོགས་པའི་མི་རིགས་རིག་གནས་དང་དེང་རབས་སྒྱུ་རྩལ་མཉམ་འདྲེས་བྱས་ཤིང་།

དུས་རབས་ཀྱི་འགྲོས་དང་བསྟུན་ཞིང་སྲོལ་རྒྱུན་རིག་གནས་ཀྱི་བཅུད་ཀྱིས་བལྟམས་ཡོད།

དགའ་སྟོན་རྟེན་འབྲེལ་འགྲིག་པའི་ཉིན་དེར། མཚོ་སྔོན་ཞིང་ཆེན་མཚོ་བྱང་གི་ཨོ་རྩལ་འགྲན་ཚོགས་གཉིས་ཀྱི་གསེར་གྱི་བྱ་དགའ་ཐོབ་མཁན་ཆོས་དབྱིངས་སྐྱིད་དང་། བོད་ལྗོངས་ཆབ་མདོའི་རྒྱལ་སྨན་སློབ་དཔོན་ཆེན་མོ་གོ་འཇོ་དབང་འདུས། སི་ཁྲོན་དཀར་མཛེས་ཀྱི་ཚན་རིག་པ་ཚེ་རིང་སྒྲོལ་མ་སོགས་དུས་རབས་ཀྱི་སྟོབས་ཤུགས་མཚོན་པའི་རླབས་ཆེན་གྱི་མི་སྣ་གསུམ་གྱིས་བརྙན་ལམ་ནས་གནམ་ལོ་གསར་པའི་བཀྲ་ཤིས་སྨོན་འདུས་ཞུས། དེ་མིན་བོད་ཀྱི་གཞས་པ་གཞས་མ་མང་པོས་གླུ་ངག་གི་མཆོད་པ་འབུལ་བ་དང་། ལྷག་པར་དུ་རྒྱལ་ཕྱི་ནང་ལ་སྙན་གྲགས་ཀྱི་བ་དན་འཕྱོ་བའི་བོད་ཀྱི་གཞོན་སྐྱེས་ལི་ཐང་བསྟན་འཛིན་གྱིས་ཀྱང་ལོ་སར་གྱི་ལེགས་སྐྱེས་གྱ་ནོམ་པ་ཕུལ་བ་དང་། ལྷག་པར་གསེར་རྟ་དང་རྨ་ཆུ་སོགས་བོད་འབྲེལ་ས་ཁུལ་གྱི་ཕུལ་བྱུང་སྲོལ་རྒྱུན་སྒྱུ་རྩལ་གང་མང་ཞིག་ཀྱང་སྐྱེས་སུ་ཕུལ་འདུག །