སྤྱི་ཟླ་2པའི་ཚེས་10ཉིན་གྱི་སྔ་དྲོར། ཀྲུང་གོའི་རྟ་རྒྱུག་རིག་གནས་ཀྱི་ཕ་ཡུལ་དུ་གྲགས་པའི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་ལི་ཐང་རྫོང་གིས་དཔྱིད་གསར་དུས་ཆེན་དང་བོད་ཀྱི་ལོ་སར་གྱི་ཉིན་དང་པོར་རྟ་རྩལ་སྐོར་སྐྱོད་བྱས་ཏེ་སྨོན་འདུན་སྐྱེལ་བའི་བྱེད་སྒོ་སྤེལ།
མཐོ་སྒང་གྲོང་རྡལ་དང་ཚེ་མགོན་ཡུལ་ཤོག །དཔོན་སྐོར་ཡུལ་ཤོག །དགེ་འདུན་ཡར་འཕེལ་གཞིས་ཁུལ་དང་རྟ་རྒྱུག་མཐུན་ཚོགས་བཅས་ཀྱི་ལུས་ལ་གཟབ་མཆོར་ལེགས་པར་སྤྲས་པའི་རྐྱ་པ་50ལྷག་ཙམ་གྱིས་རྟ་ལ་ཞོན་ནས་སྔ་རྗེས་སུ་ཁྲོམ་གཞུང་དུ་སྐོར་སྐྱོད་བྱས་ཏེ། ཟེ་རིང་ལྷབ་ལྷུབ། དར་དམར་ལྷབ་ལྷུབ། སྙན་འཇེབས་ཀྱི་རྨིག་སྒྲ་རྫོང་མཁར་ཡོངས་སུ་གྲགས་ཤིང་། རྐྱ་པ་རྣམས་ཀྱི་ཉམས་དོད་པའི་གཟུགས་བྱད་ཀྱིས་ལི་ཐང་མི་དམངས་ལ་མིག་གི་དགའ་སྟོན་ཕུལ།
སྐོར་སྐྱོད་རུ་ཁག་གེ་སར་ཐང་ཆེན་ནས་ཤར་རིའི་རྩེ་རུ་བསྐྱོད་དེ་སྲོལ་རྒྱུན་གྱི་དམངས་སྲོལ་མཛད་སྒོ་སྟེ་ལྷ་བསང་བཏང་ཞིང་། ཆར་ཆུ་དུས་སུ་འབབ་པ་དང་འབྲུ་རིགས་སྣ་ལྔ་འཛོམས་པ། མེས་རྒྱལ་དར་རྒྱས་གོང་འཕེལ་ཡོང་བའི་སྨོན་ལམ་བཏབ། །