འཇུ་རབ་གསལ་ནི་ལོ་རབས་བརྒྱད་ཅུ་པའི་སྨད་ལ་ཁམས་མི་ཉག་ཏུ་སྐྱེས་ཤིང་། ལོ་བཅོ་ལྔ་ཙམ་གྱི་རིང་བོད་ཀྱི་སྲོལ་རྒྱུན་རིག་གནས་དང་ནང་བསྟན་རིག་གཞུང་སོགས་ལ་སྦྱངས་པ་བྱས། སྤྱི་ལོ་2011ལོ་ནས་སྒྱུ་རྩལ་གྱི་ལས་སུ་ནན་གྱིས་ཞུགས་ཏེ། ད་ལྟའི་བར་རྩོམ་རིག་དང་རི་མོ། པར་ལེན། ཇུས་འགོད་སོགས་ཀྱིས་ལྟ་ཀློག་མཁན་ལ་བག་ཆགས་ཅུང་ཟབ་མོ་བཞག །ལྷག་པར་དུ་ཁོའི་རབ་བཏགས་རི་མོའི་བརྩམས་ཆོས《རྒས་མི་སྲིད་པའི་དགེ་འདུན་ཆོས་འཕེལ》དང་། 《འབུ་ལོ་ཡག》 《ལང་ཚོ་རྟག་བརྟན་གྱི་རྒྱན་དྲུག་མཆོག་གཉིས》སོགས་ལ་དྲང་ལྡོག་གཉིས་ནས་སྐད་གྲགས་ཆེན་པོ་ཡོད།
ཁོང་ནི་སྲོལ་རྒྱུན་ཐང་གའི་རི་མོ་དང་། སྣུམ་ཚོན། ཆུ་ཚོན། འགྱིག་ཚོན། རབ་བཏགས་རི་མོ། གློག་རྡུལ་རི་མོ། ཚེམ་དྲུབ་རི་མོ། བྱིས་སྒྲུང་གི་བར་བཅུག་རི་མོ་བཅས་ལ་བྱང་ཆ་ཆེ་ཞིང་གསར་གཏོད་ཉམས་འགྱུར་གྱིས་ཕྱུག་ཡོད། ད་ལྟའི་བར་པེ་ཅིང་དང་ཁྲེང་ཏུའུ། ཧྲང་ཧེ་སོགས་ནས་གཞུང་སྒེར་གྱི་རི་མོའི་འགྲེམས་སྟོན་གང་མང་ལ་ཞུགས་ཤིང་མཐོ་ཚོང་ཡང་ཐེངས་འགར་བྱས། 2021ལོ་ནས་བཟུང་དེང་རབས་སྒྱུ་རྩལ་སྐོར་ལ་ཞིབ་འཇུག་དང་གསར་རྩོམ་བྱེད་པར་ཞུགས་ཤིང་2022ལོར་ཁྲེང་ཏུའུ་ཐོ་ནེ་ལོ·ལན་པོ་ཅི་ཉི་ལྟེ་གནས་སུ་ཟླ་གཅིག་རིང་དཔལ་རི་གླིང་ཧི་མ་ལ་ཡའི་དེང་རབས་སྒྱུ་རྩལ་ཞེས་པ་འགྲེམས་སྟོན་བྱས།
ད་ལྟ་དཔལ་རི་གླིང་ཧི་མ་ལ་ཡ་དེང་རབས་སྒྱུ་རྩལ་ཁང་གི་འགན་འཛིན་པ་དང་། ཀྲུང་གོའི་དམངས་སྲོལ་པར་ལེན་མཐུན་ཚོགས་ཀྱི་ཚོགས་མི། དཀར་མཛེས་ཁུལ་རྩོམ་རིག་མཐུན་ཚོགས་ཀྱི་ཚོགས་མི་ཡིན། །
